ԵԱՔԴ/0056/01/11

Ո Ր Ո Շ ՈՒ Մ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

ՙ30՚ մայիսի 2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի դատարանը` նախագահող դատավոր Լ.Ավետիսյան, քարտուղարությամբ Ե.Կարապետյանի, մասնակցությամբ մեղադրող Խ.Բաղդասարյանի, պաշտպան Ա.Գալստյանի, դռնբաց դատական նիստում քննեց քրեական գործն ըստ մեղադրանքի Նշան Աշոտի Սարգսյանի (ծնված 15.09.1981թ. Երևան քաղաքում, ազգությամբ հայ, ՌԴ քաղաքացի, միջնակարգ կրթությամբ, ամուսնացած, խնամքին երկու անձ, նախկինում դատված, դատվածությունը մարված, չի աշխատել, բնակվել է Երևան քաղաքի Ս.Զորավարի փողոցի 22 տանը) ՀՀ քրեական օրենսգրքի 235 հոդվածի 1-ին մասով, արգելանքի տակ է 2011 թվականի մարտի 22-ից,

Պ Ա Ր Զ Ե Ց

2011թ. մարտի 22-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 235 հոդվածի 1-ին մասի հատկանիշներով հարուցվել է թիվ 09105111 քրեական գործը:
2011թ. մարտի 24-ին Նշան Աշոտի Սարգսյանին մեղադրանք է առաջադրվել ՀՀ քրեական օրենսգրքի 235 հոդվածի 1-ին մասով այն արարքի համար, որ նա ապօրինի ձեռք է բերել և իր կողմից շահագործվող ՙՄերսեդես՚ 20 ՍՏ 078 պ/հ ավտոմեքենայի սրահում պահել է հրազեն հանդիսացող ՙՆորթ Ամերիքն Արմս՚ տեսակի թմբուկավոր ատրճանակ՝ 5 հատ 5,6 տրամաչափի օղակաձև բոցավառման փամփուշտներով, որը 2011թ. մարտի 22-ին ժամը 1000-ի սահմաններում ոստիկանության Քանաքեռ-Զեյթուն բաժնի աշխատակիցների կողմից հայտնաբերվել և առգրավվել է վերը նշված մեքենայի զննությամբ։
2011թ. մարտի 24-ին Նշան Աշոտի Սարգսյանի նկատմամբ որպես խափանման միջոց է կիրառվել կալանավորումը:
2011թ. մայիսի 13-ին թիվ 09105111 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի դատարան:
Դատական նիստի ժամանակ ամբաստանյալ Նշան Աշոտի Սարգսյանը հայտնել է, որ համաձայն է, որ իր նկատմամբ կիրառվի ՀՀ Ազգային ժողովի կողմից ընդունված ՙՀամաներում հայտարարելու մասին՚ որոշումը:
Մեղադրող Խ.Բաղդասարյանը հիմք ընդունելով ՀՀ Ազգային ժողովի ՙՀամաներում հայտարարելու մասին՚ 2011թ. մայիսի 26-ի որոշումը միջնորդել է քրեական գործի վարույթը կարճել:
ՙՀամաներում հայտարարելու մասին՚ որոշման 15-րդ կետի համաձայն, ՀՀ Ազգային ժողովի 2011 թվականի մայիսի 26-ի ՙՀամաներում հայտարարելու մասին՚ ՀՀ որոշումը կիրառվում է այն անձանց նկատմամբ, ովքեր հանցագործություն են կատարել մինչև 2011 թվականի մայիսի 1-ը ներառյալ: Նշան Սարգսյանը հանրորեն վտանգավոր վերջին արարքը կատարել է 2011 թվականի մարտի 22-ին:
Սույն քրեական գործով բացակայում են համաներման մասին հիշյալ որոշման 9-րդ կետում նշված այն սահմանափակումները, որոնք կարող են արգելք հանդիսանալ Նշան Սարգսյանի նկատմամբ համաներման ակտի կիրառման համար:
Նկատի ունենալով, որ ՀՀ Ազգային ժողովի 2011 թվականի մայիսի 26-ի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ որոշման 6-րդ կետի 2-րդ ենթակետը սահմանում է կարճել այն անձանց կողմից կատարված հանցագործությունների վերաբերյալ գործերը, որոնք մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ ոչ ավելի, քան երեք տարի ժամկետով ազատազրկում, իսկ ՀՀ քրեական օրենսգրքի 235 հոդվածի 1-ին մասը նախատեսում է ազատազրկում` առավելագույնը երեք տարի ժամկետով, դատարանը գտնում է, որ ամբաստանյալ Նշան Սարգսյանի նկատմամբ կիրառելի է ՙՀամաներում հայտարարելու մասին՚ որոշումը:
Դատարանը գտնում է, որ ՀՀ ոստիկանության փորձաքրեագիտական վարչությունում պահվող, ՙՆորթ Ամերիքն Արմս՚ տեսակի ՙG37455՚ համարի թմբուկավոր ատրճանակը և 5 հատ 5,6մմ տրամաչափի օղակաձև բոցավառման փամփուշտները (որոնցից 3 հատը փորձարարական կրակվել են) պետք է թողնել փորձաքրեագիտական վարչության տնօրինությանը:
Ղեկավարվելով ՙՀամաներում հայտարարելու մասին՚ ՀՀ Ազգային ժողովի 2011թ. մայիսի 26-ի որոշման 6-րդ կետի 2-րդ ենթակետով, 13-րդ կետի 1-ին ենթակետի ՙա՚ պարբերությամբ, ՀՀ քրեական դատավարության օրենսգրքի 35 հոդվածի 1-ին մասի 13-րդ կետով և 4-րդ մասով, 313 հոդվածով դատարանը

Ո Ր Ո Շ Ե Ց

Նշան Աշոտի Սարգսյանի նկատմամբ ՀՀ քրեական օրենսգրքի 235 հոդվածի 1-ին մասով քրեական հետապնդումը դադարեցնել և թիվ ԵԱՔԴ/0056/01/11 քրեական գործի վարույթը կարճել` ՀՀ Ազգային ժողովի 2011 թվականի մայիսի 26-ի ՙՀամաներում հայտարարելու մասին՚ որոշման 6-րդ կետի 2-րդ ենթակետի համաձայն:
Նշան Աշոտի Սարգսյանին անհապաղ ազատել կալանքից:
Նշան Աշոտի Սարգսյանի նկատմամբ ընտրված խափանման միջոցը` կալանավորումը, վերացնել:
Որոշումն օրինական ուժի մեջ մտնելուց հետո ՀՀ ոստիկանության փորձաքրեագիտական վարչությունում պահվող, ՙՆորթ Ամերիքն Արմս՚ տեսակի ՙG37455՚ համարի թմբուկավոր ատրճանակը և 5 հատ 5,6մմ տրամաչափի օղակաձև բոցավառման փամփուշտները (որոնցից 3 հատը փորձարարական կրակվել են) թողնել փորձաքրեագիտական վարչության տնօրինությանը:
Որոշումը կարող է բողոքարկվել ՀՀ վերաքննիչ քրեական դատարան` հրապարակման օրվանից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ` Լ. ԱՎԵՏԻՍՅԱՆ