ԵԱՔԴ/0050/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
դատական նիստերի քարտուղար Ե. Կարապետյան
մեղադրող Ռ. Խաչատրյան

2011 թվականի մայիսի 20-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Լևոն Ռուբենի Ղասաբյանի, ծնված 27.05.1945թ., Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, խնամքին ոչ ոք, նախկինում չդատված, չի աշխատում, հաշվառված և բնակվում է Երևան քաղաքի, Դավիթաշեն 4-րդ թաղամասի 4ա շենքի թիվ 34 բնակարանում, մեղադրվում է ՀՀ քրեական օրենսգրքի 258 հոդվածի 1-ին մասով, խափանման միջոց է ընտրվել ստորագրություն չհեռանալու մասին,
Պ Ա Ր Զ Ե Ց

1.Գործի դատավարական նախապատմությունը.
2011թ. ապրիլի 4-ին ՀՀ ոստիկանության ՔԳՎ Երևան քաղաքի ՔՎ Արաբկիրի քննչական բաժնում ՀՀ քրեական օրենսգրքի 258 հոդվածի 1-ին մասի հատկանիշներով հարուցվել է թիվ 14108711 քրեական գործը:
2011թ. ապրիլի 4-ին Լևոն Ռուբենի Ղասաբյանի նկատմամբ որպես խափանման միջոց է ընտրվել չհեռանալու մասին ստորագրությունը:
2011թ. ապրիլի 13-ին Լևոն Ռուբենի Ղասաբյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 258 հոդվածի 1-ին մասով:
2011թ. ապրիլի 20-ին թիվ 14108711 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախաքննության մարմինն ամբաստանյալ Լևոն Ռուբենի Ղասաբյանին մեղադրանք է առաջադրել հետևյալ արարքի համար.
Լևոն Ղասաբյանը 2011 թվականի մարտի 10-ին, ժամը 1300-ի սահմաններում գնացել է Երևան քաղաքի Ն.Զարյան փողոցի 22 հասցեում գտնվող ՙՌադիո Ավրորա՚ կայան, որտեղ դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության նկատմամբ, ռադիոկայանի աշխատակիցներից պահանջել է փոխել հեռարձակվող երաժշտությունը, սակայն մերժում ստանալով, իր կողմից պատրասատված ինքնաշեն ռումբանման սարքը սպառնացելէ պայթեցնել՝ խաթարելով կայանի բնականոն աշխատանքը։

3.Ապացույցների հետազոտում.
Առաջադրված մեղադրանքում ամբաստանյալ Լևոն Ղասաբյանն իրեն լիովին մեղավոր է ճանաչել և խոստովանական ցուցմունքներ է տվել այն մասին, որ Երևան քաղաքի Դավիթաշեն 4-րդ թաղամասի 4ա շենքի 34 բնակարանում բնակվում է միայնակ: Սովորել և ավարտել է Երևանի պոլիտեխնիկական ինստիտուտը՝ ռադիոֆիզիկա մասնագիտությամբ։ Աշխատել է Երևանի պետական համալսարանում` որպես ավագ գիտաշխատող, այնուհետև հաշվիչ տեխնիկայի ինստիտուտում։Այժմ էլ տան պայմաններում զբաղվում է էլեկտրական սարքավորումների վերանորոգմամբ։2010թ. դեկտեմբեր ամսվա վերջերին թոռնիկի համար պատրաստել է մուլտիվիբրատոր և այն պահում էր իր տանը։ Տանը գտնվելու րնթացքում մշտապես լսել է ՙՌադիո Ավրորա՚ ռադիոկայանից հեռարձակվող երաժշտական ծրագրերը, սակայն դրանք մշտապես առաջացրել են իր դժգողությունը։2011թ. մարտի 10-ին առավոտյան լսելով ՙՌադիո Ավրորա՚ ռադիոկայանից հեռարձակվող երաժշտությունը, որը կրկին առաջացրել է իր դժգոհությունը, ցանկացել է գնալ նշված ռադիոկայան և աշխատակիցներին վախեցնելու միջոցով ստիպել փոխել հեռարձարկվող երաժշտական ծրագիրը։ Այդ նպատակով նույն օրը, ժամը 1300-ի սահմաններում մուլտիվիբրատորին մետաղալարերով միացրել է անսարք մարտկոց և այն նմանեցնելով ռումբանման սարքի, վերցրել է իր հետ, դուրս եկել տնից և գնացել ՙՌադիո Ավրորա՚ կայան։ Մտնելով տնօրենի աշխատասենյակ, փոխտնօրեն Ռուզաննա Շահինյանին սպառնացել է, որ եթե չհեռարձակեն Ռուբեն Հախվերդյանի և Արթուր Մեշչյանի երգերը, այդ սարքը կպայթեցնի։Փոխտնօրենը հեռախոսով այդ մասին հայտնել է ոստիկանություն, որից հետո ոստիկանության աշխատակիցներն իրեն տարել են ոստիկանության Արաբկիրի բաժին։Նշել է, որ որևէ մեկն իրեն չի դրդել այդ արարքը կատարելու համար և երբ գնացել է ՙՌադիո Ավրորա՚ կայան, իր հետ որևէ մեկը չի եղել և ռումբանման սարքից բացի, որևէ այլ սարք կամ զենք իր մոտ չի եղել։Կատարած արարքի համար զղջում է և խնդրում է ներողամիտ վերաբերվել։
Ամբաստանյալին առաջադրված մեղադրանքը հիմնավորվել է նաև գործով ձեռք բերված հետևյալ ապացույցներով.
Վկա Ռուզաննա Ալֆրեդի Շահինյանի ցուցմունքով այն մասին, որ շուրջ 6 տարի է աշխատում է ՙՌադիո Ավրորա՚ ՍՊԸ-ում որպես փոխտնօրեն, իսկ տնօրենը հանդիսանում է ամուսինը՝ Միքայել Ջանփոլադյանը։2011թ. մարտի 10-ին, ժամը 1315-ի սահմաններում, աշխատանքի վայրում է եղել, երբ իրենց գովազդային գործակալ Լիա Կիրիշչյանի հետ միասին տնօրենի աշխատասենյակ է մտել մոտ 60 տարեկան մի անծանոթ տղամարդ, ով պահանջել է ասել, թե ինչու ռադիոկայանը չի հեռարձակում Ռուբեն Հախվերդյանի, Արթուր Մեշչյանի և լուրջ երգիչների կատարումներ, այլ ինչ-որ էժանագին երգիչների կատարումներ է հեռարձակում։Ինքը պատասխանել է, որ ռադիոկայանը հեռարձակում է այն, ինչ որ նախատեսված է ֆորմատով և հնարավոր չէ փոխել ծրագիրը։Դրանից հետո այդ անծանոթ տղամարդը մոտեցել է սեղանին, իր մոտ եղած տոպրակից հանել ռումբանման սարքավորում և դնելով սեղանին ասել է, որ եթե չփոխվի հեռարձակվող երաժշտությունը, ապա ինքը կպայթեցնի սարքը, որից հետո սեղմել է այդ սարքի կոճակը և կարմիր լույս է վառվել: Ինքը վախենալով բացականչել է, որ նա դադարեցնի։ Դրանից հետո կայանի աշխատակից Անդրանիկ Հակոբյանին և մյուսներին ասել է, որ փակեն կայանի դռները: Դրանից հետո ինքը զանգահարել է ոստիկանություն և հայտնել այդ մասին։Քիչ անց գնացել են ոստիկանության աշխատակիցները և այդ անծանոթ տղամարդուն, ով ինչպես հետագայում է պարզվել, հանդիսանում է Լևոն Ղասաբյանը, տարել են ոստիկանություն։Վերջինիս արարքի հետևանքով մոտ 20 րոպե խաթարվել են իրենց ռադիոկայանի բնականոն աշխատանքները։ Միաժամանակ նշել է, որ այդ տղամարդուն նախկինում չի ճանաչել, նրա հետ որևէ մեկը չի եղել, ռումբանման սարքից բացի այլ սարք կամ զենք նրա մոտ չի տեսել:
Վկա Լիա Եդուարդի Կիրիշչյանի ցուցմունքով այն մասին, որ 2005թ-ից աշխատում է ՙՌադիո Ավրորա՚ ԱՊԸ-ում որպես գովազդային գործակալ։ 2011թ. մարտի 10-ին, ժամը 1300-ի սահմաններում աշխատանքի ընթացքում լսելով ռադիոկայանի մուտքի դռան զանգը, դուրս է եկել աշխատասենյակից և բանալիով բացել դուռը։ Միջանցքում տեսել է անծանոթ մոտ 60 տարեկան մի տղամարդու: Վերջինս իրեն ասել է, որ ցանկանում է զրուցել տնօրենի հետ։ Այդ տղամարդուն ուղեկցել է տնօրենի աշխատասենյակ, որտեղ փոխտնօրեն Ռուզաննա Շահինյանն է եղել, քանի որ տնօրենը հիվանդության պատճառով չէր եկել աշխատանքի։Այդ տղամարդը մտել է տնօրենի աշխատասենյակ, ինքն էլ գնացել է իր աշխատանքով զբաղվելու։Մոտ 5 րոպե անց լսել է փոխտնօրեն Ռուզաննա Շահինյանի բղավոցի ձայնը, ապա վերջինս ասել է, որ փակեն կայանի դռները և զանգահարեն ոստիկանություն։ Քիչ անց Ռ.Շահինյանի կանչի հիման վրա կայան են գնացել ոստիկանության աշխատակիցները և այդ անծանոթ տղամարդուն տարել ոստիկանություն։Հետո Ռուզաննա Շահինյանից իմացել է, որ երբ այդ տղամարդը մտել է տնօրենի աշխատասենյակ, պահանջել է փոխել ռադիոկայանի երաժշտությունը, սակայն մերժում ստանալով սպառնացել է իր մոտ եղած ռումբանման սարքով պայթեցնել կայանը, եթե իր ցանկությունը չկատարվի։Նշել է, որ այդ տղամարդուն նախկինում իրենց ռադիոկայանում չի տեսել և նրա կատարած արարքի հետևանքով խաթարվել են ռադիոկայանի բնականոն աշխատանքները։
Վկա Անդրանիկ Վահանի Հակոբյանի ցուցմունքով այն մասին, որ շուրջ 3 տարի է աշխատում է ՙՌադիո Ավրորա՚ ՍՊԸ-ում որպես կոմերցիոն բաժնի տնօրեն։ 2011թ. մարտի 10-ին, ժամը 1330-ի սահմաններում աշխատանքի վայրում է եղել և այդ ժամանակ լսել է փոխտնօրեն Ռուզաննա Շահինյանի բղավոցը: Վերջինս ասել է, որ փակեն ռադիոկայանի դռները, որից հետո ինքը փակել է դռները: Ռ.Շահինյանը զանգահարել է ոստիկանություն։ Այդ ժամանակ տնօրենի աշխատասենյակում տեսել է մի անծանոթ տղամարդու, ում մոտ եղել է ինչ-որ ռումբանման սարք: Տնօրենի սենյակից դուրս գալով այդ տղամարդու հետ, գնացել և նստել է հյուրասենյակի բազմոցին։Այնուհետև ոստիկանության աշխատակիցները գնացել են ռադիոկայան և այդ անծանոթ տղամարդուն տարել ոստիկանություն։Հետո փոխտնօրեն Ռուզաննա Շահինյանից իմացել է, որ այդ տղամարդը, ով ինչպես հետագայում է պարզվել, հանդիսանում է ամբաստանյալ Լևոն Ղասաբյանը, մտել էր նրա աշխատասենյակ և իր մոտ եղած ռումբանման սարքով սպառնացել, որ եթե չփոխվի ռադիոկայանից հեռարձակվող երաժշտությունը, կպայթեցնի իր մոտ եղած սարքը։ Նշել է, որ այդ տղամարդու արարքի հետևանքով խաթարվել են ռադիոկայանի բնականոն աշխատանքները։
Վկա Տաթևիկ Լևոնի Հակոբյանի ցուցմունքներով այն մասին, որ շուրջ 2 ամիս է աշխատում է ՙՌադիո Ավրորա՚ ՍՊԸ-ում որպես գովազդային գործակալ։2011թ. մարտի 10-ին, ժամը 1330-ի սահմաններում աշխատանքի վայրում է եղել և այդ ժամանակ միջանցքից լսել է իրենց աշխատակից Անդրանիկ Հակոբյանի խոսակցությունը ինչ-որ տղամարդու հետ, որից հետո դուրս է եկել աշխատասենյակից և տեսել, որ Անդրանիկը մի անծանոթ մոտ 60 տարեկան տղամարդու հետ զրուցում է։ Հետո իրենց փոխտնօրեն Ռուզաննա Շահինյանից հարցրել է, թե ինչ է եղել և նա ահաբեկված պատասխանել է, որ Անդրանիկի հետ զրուցող տղամարդը մտել է իր աշխատասենյակ և իր մոտ եղած ինչ-որ ռումբանման սարքով սպառնացել, որ եթե չփոխվի ռադիոկայանի երգացանկը, կպայթեցնի ռումբանման սարքը: Ռ.Շահինյանը զանգահարել է ոստիկանություն և հայտնել այդ մասին։Դրանից հետո ոստիկանության աշխատակիցները գնացել են ռադիոկայան և այդ տղամարդուն տարել ոստիկանություն։Նշել է, որ այդ տղամարդու արարքի հետևանքով իրենց ռադիոկայանի աշխատանքները խաթարվել են։
Ամբաստանյալի կատարած հանցանքը հիմնավորվել է նաև քրեական գործով ձեռք բերված հետևյալ ապացույցներով.
Փորձագետի թիվ 439 եզրակացությամբ, համաձայն որի ռումբանման սարքը պատրաստված է ինքնաշեն եղանակով որպես պայթուցիկ սարքի մուլյաժ, չի պարունակում պայթուցիկ նյութի լիցք, պիտանի չէ պայթյուն առաջացնելու համար, ռազմամթերք չի հանդիսանում։
Դեպքի վայրի զննության արձանագրությամբ, որով ՙՌադիո Ավրորա՚ կայանի հյուրասենյակի բազմոցի վրայից հայտնաբերվել և առգրավվել է մետաղալարերով իրար միացված ռումբանման սարք։
Լևոն Ղասաբյանին բերման ենթարկելու և անձնական խուզարկության ենթարկելու արձանագրություններով։
Ռումբանման սարքն իրեղեն ապացույց ճանաչելու որոշմամբ։
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Լևոն Ռուբենի Ղասաբյանին ՀՀ քրեական օրենսգրքի 258 հոդվածի 1-ին մասով առաջադրված մեղադրանքը հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 258 հոդվածի 1-ին մասի հատկանիշներին և արարքի որակումը ճիշտ է:
Լևոն Ղասաբյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, թոշակառու է:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Լևոն Ռուբենի Ղասաբյանը ենթակա է քրեական պատասխանատվության և պատժի:
ՀՀ քրեական օրենսգրքի 61 հոդվածի 3-րդ մասի համաձայն, հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Դատարանը, հաշվի առնելով Լևոն Ղասաբյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող և պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ 2011 թվականի ապրիլի 14-ի որոշմամբ իրեղեն ապացույց ճանաչված և Արաբկիրի քննչական բաժնի իրեղեն ապացույցների պահման սենյակում գտնվող ռումբանման սարքը պետք է ոչնչացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Լևոն Ռուբենի Ղասաբյանին մեղավոր ճանաչել ՀՀ քրեական օրենսգրքի 258 հոդվածի 1-ին մասով և նրան դատապարտել տուգանքի հիսուն հազար (50.000) ՀՀ դրամի չափով:
Լևոն Ռուբենի Ղասաբյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո իրեղեն ապացույց ճանաչված ռումբանման սարքը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ