Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
առաջին ատյանի դատարանը

նախագահող դատավոր Լ. Ավետիսյան
դատական նիստերի քարտուղար Ն.Ղազարյան, Ե.Կարապետյան
մեղադրող Հ. Մարտիրոսյան
պաշտպան Ռ. Տեր-Վարդանյան
տուժող Գ. Ազիբեկյան
տուժողի ներկայացուցիչ Ս. Սահակյան


2011 թվականի մայիսի 31-ին, Երևան քաղաքում, դռնբաց դատական նիստում, արագացված դատաքննության կարգով, քննեց քրեական գործն ըստ մեղադրանքի Հայկ Թաթուլի Կիրակոսյանի, ծնված 10.01.1991թ., Երևան քաղաքում, ազգությամբ հայ, ՀՀ քաղաքացի, միջին-մասնագիտական կրթությամբ, ամուրի, խնամքին ոչ ոք, ֆիզիկապես վատառողջ, չի աշխատում, նախկինում չդատված, հաշվառված և բնակվում է Երևան քաղաքի Քանաքեռ ՀԷԿ 2-րդ շենքի թիվ 5 բնակարանում, մեղադրվում է ՀՀ քրեական օրենսգրքի 177 հոդվածի 2-րդ մասի 2-րդ կետով, խափանման միջոց է ընտրվել ստորագրություն չհեռանալու մասին,

Պ Ա Ր Զ Ե Ց

1.Գործի դատավարական նախապատմությունը.
2011թ. փետրվարի 21-ին ՀՀ ոստիկանության ՔԳՎ Երևան քաղաքի ՔՎ Արաբկիրի քննչական բաժնում ՀՀ քրեական օրենսգրքի 177 հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել է թիվ 14104511 քրեական գործը:
2011թ. փետրվարի 21-ին Հայկ Թաթուլի Կիրակոսյանի նկատմամբ որպես խափանման միջոց ընտրվել է չհեռանալու մասին ստորագրությունը:
2011թ. փետրվարի 28-ին Հայկ Թաթուլի Կիրակոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 2-րդ կետով:
2011թ. ապրիլի 18-ին թիվ 14104511 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Հայկ Թաթուլի Կիրակոսյանին մեղադրանք է առաջադրել հետևյալ արարքի համար.
Հայկ Կիրակոսյանը 2010 թվականի մայիս ամսվա կեսերից մինչև 2011 թվականի փետրվարի 21-ն ընկած ժամանակահատվածում, գողություն կատարելու նպատակով պարբերաբար Երևան քաղաքի Քանաքեռ ՀԷԿ 2-րդ շենքի իր փաստացի բնակության ու հաշվառման վայր հանդիսացող թիվ 5 բնակարանից գողացել է մորը` Գոհար Բենիկի Ազիբեկյանին պատկանող տարբեր տեսակի ոսկյա զարդեր` Գոհար Ազիբեկյանին պատճառելով խոշոր չափի` մոտ 2.000.000 ՀՀ դրամի գույքային վնաս:
3. Արագացված դատական քննություն .
Մինչև դատաքննությունն սկսելն ամբաստանյալ Հայկ Թաթուլի Կիրակոսյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Ռ.Տեր-Վարդանյանը:
Մեղադրող Հ.Մարտիրոսյանը դատական քննության արագացված կարգ կիրառելուն չի առարկել:
Տուժող Գ.Ազիբեկյանը և տուժողի ներկայացուցիչ Ս.Սահակյանը նույնպես արագացված քննություն կիրառելուն չառարկեցին, հայտնելով նաև, որ ամբաստանյալից որևէ նյութական պահանջ չունեն:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Հայկ Թաթուլի Կիրակոսյանին առաջադրված մեղադրանքը ՀՀ քրեական օրենսգրքի 177 հոդվածի 2-րդ մասի 2-րդ կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 177 հոդվածի 2-րդ մասի 2-րդ կետի հատկանիշներին և արարքի որակումը ճիշտ է:
Ամբաստանյալ Հայկ Կիրակոսյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, երրորդ խմբի հաշմանդամ է:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Հայկ Թաթուլի Կիրակոսյանը ենթակա է քրեական պատասխանատվության և պատժի:
Հաշվի առնելով Հայկ Թաթուլի Կիրակոսյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 177 հոդվածի 2-րդ մասի սանկցիայով նախատեսված է պատիժ միայն ազատազրկման ձևով, դատարանը գտնում է, որ պատժի նպատակներին հասնելու համար Հայկ Կիրակոսյանի նկատմամբ ՀՀ քրեական օրենսգրքի 177 հոդվածի 2-րդ մասի 2-րդ կետով կատարած արարքի համար պատիժ պետք է նշանակել ազատազրկման ձևով:
ՀՀ Ազգային ժողովի 2011 թվականի մայիսի 26-ի ՙՀամաներում հայտարարելու մասին՚ որոշման 15-րդ կետի համաձայն, ՙՀամաներում հայտարարելու մասին՚ որոշումը կիրառվում է այն անձանց նկատմամբ, ովքեր հանցագործություն են կատարել մինչև 2011 թվականի մայիսի 1-ը ներառյալ: Հայկ Թաթուլի Կիրակոսյանը հանրորեն վտանգավոր վերջին արարքը կատարել է 2011 թվականի փետրվարին:
Սույն քրեական գործով բացակայում են համաներման մասին հիշյալ որոշման 9-րդ կետում նշված այն սահմանափակումները, որոնք կարող են արգելք հանդիսանալ Հայկ Թաթուլի Կիրակոսյանի նկատմամբ համաներման ակտի կիրառման համար:
Հիմք ընդունելով վերը նշվածը, դատարանը գտնում է, որ ամբաստանյալ Հայկ Թաթուլի Կիրակոսյանի նկատմամբ կիրառելի է ՀՀ Ազգային Ժողովի 2011 թվականի մայիսի 26-ի ՙՀայաստանի Հանրապետության անկախության հռչակման 20-րդ տարեդարձի կապակցությամբ Համաներում հայտարարելու մասին՚ որոշման 1-ին կետի 1-ին ենթակետը, համաձայն որի պատժից պետք է ազատել առավելագույնը երեք տարի ժամկետով ազատությունից զրկելու հետ կապված պատիժների դատապարտված անձանց:
Դատարանը գտնում է, որ Գոհար Ազիբեկյանի քաղաքացիական հայցի հարցը պետք է համարել լուծված, քանի որ դատական քննության ժամանակ տուժողը հայտնել է, որ ամբաստանյալից որևէ պահանջ չունի:
Անդրադառնալով իրեղեն ապացույցների տնօրինման հարցին, դատարանը գտնում է, որ 2011թ. մարտի 25-ի որոշմամբ իրեղեն ապացույց ճանաչված` 22.02.2011թ. Սարգսի Ռոբերտի Գևորգյանի կողմից ներկայացված արծաթյա կախազարդը, մեկ դեղնավուն սաթի, մեկ ալեքսանդրիտի և երկու կոռունտ տեսակի քարերը, ինչպես նաև Հայկ Կիրակոսյանի կողմից Նարեկ Մուրադյանին հանձնված և 22.02.2011թ. Նարեկ Մուրադի Մուրադյանի կողմից նախնական քննության մարմնին ներկայացված ընդհանուր 260.000 ՀՀ դրամ գումարը պետք է վերադարձնել տուժող Գոհար Ազիբեկյանին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց


Հայկ Թաթուլի Կիրակոսյանին մեղավոր ճանաչել ՀՀ քրեական օրենսգրքի 177 հոդվածի 2-րդ մասի 2-րդ կետով և նրան դատապարտել ազատազրկման երկու (2) տարի ժամկետով:
Կիրառել ՀՀ Ազգային ժողովի 2011 թվականի մայիսի 26-ի ՙՀամաներում հայտարարելու մասին՚ որոշման 1-ին կետի 1-ին ենթակետը և Հայկ Թաթուլի Կիրակոսյանին ազատել պատժի կրումից:
Հայկ Թաթուլի Կիրակոսյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ, մինչև դատավճռի օրինական ուժի մեջ մտնելը:
Տուժող Գոհար Ազիբեկյանի քաղաքացիական հայցի հարցը համարել լուծված:
Դատավճիռն օրինական ուժի մեջ մտնելուց հետո 2011թ. մարտի 25-ի որոշմամբ իրեղեն ապացույց ճանաչված` 22.02.2011թ. Սարգսի Ռոբերտի Գևորգյանի կողմից ներկայացված արծաթյա կախազարդը, մեկ դեղնավուն սաթի, մեկ ալեքսանդրիտի և երկու կոռունտ տեսակի քարերը վերադարձնել տուժող Գոհար Ազիբեկյանին:
22.02.2011թ. Նարեկ Մուրադի Մուրադյանի կողմից ներկայացված ընդհանուր 260.000 ՀՀ դրամ գումարը վերադարձնել տուժող Գոհար Ազիբեկյանին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ