Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
դատական նիստերի քարտուղար Ե. Կարապետյան, Ն. Ղազարյան
մեղադրող Ա. Սեփոյան
պաշտպաններ Գ. Քալաշյան, Ն.Պետրոսյան


2011 թվականի մայիսի 6-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Կարեն Գևորգի Խաչատրյանի, ծնված 1982թ. օգոստոսի 23-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, խնամքին երկու անձ, աշխատում է ՙԱրցախբանկ՚ ՓԲԸ-ում՝ որպես առաջին կարգի մասնագետ, նախկինում չդատված, հաշվառված և բնակվում է Երևան քաղաքի Նորագյուղ 251 տանը, մեղադրվում է ՀՀ քրեական օրենսգրքի 242 հոդվածի 2-րդ մասով, խափանման միջոց է կիրառվել գրավը,

Պ Ա Ր Զ Ե Ց

1.Գործի դատավարական նախապատմությունը.
2011թ. հունվարի 3-ին ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 242 հոդվածի 2-րդ մասով նախատեսված հանցագործության հատկանիշներով հարուցվել է թիվ 60100111 քրեական գործը:
2011թ. հունվարի 12-ին Կարեն Գևորգի Խաչատրյանը ձերբակալվել է:
2011թ. հունվարի 15-ին Կարեն Գևորգի Խաչատրյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 242 հոդվածի 2-րդ մասով:
2011թ. հունվարի 15-ին Կարեն Խաչատրյանի նկատմամբ որպես խափանման միջոց ընտրվել է կալանավորումը և որպես կալանավորման այլընտրանքային խափանման միջոց կիրառվել է գրավ:
2011թ. փետրվարի 22-ի որոշմամբ թիվ 60100111 քրեական գործով, ուղևորներ` Նազելի Արայիկի Այվազյանին, Ռուզաննա Արմենի Կարապետյանին, Հասմիկ Հովհաննեսի Հովհաննիսյանին, Գառնիկ Հովհաննեսի Հովհաննիսյանին, Լիլիթ Վարդանի Հովհաննիսյանին, Հովհաննես Գառնիկի Հովհաննիսյանին, Վարդան Գառնիկի Հովհաննիսյանին և ՙԴեու-Նեքսիա՚ մակնիշի Տ 4897 պ/հ ավտոմեքենայի վարորդ Մկրտիչ Բաղդասարի Բաբաջանյանին պատճառված մարմնական վնասվածքների մասով Կարեն Գևորգի Խաչատրյանի նկատմամբ քրեական հետապնդում չի իրականացվել` հանցակազմի բացակայության պատճառաբանությամբ:
Ավտովարորդներ Մկրտիչ Բաղդասարի Բաբաջանյանի և Գառնիկ Անդրանիկի Թադևոսյանի նկատմամբ քրեական հետապնդում չի իրականացվել` նրանց գործողություններում հանցակազմի բացակայության պատճառաբանությամբ:
2011թ. մարտի 3-ին թիվ 60100111 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2.Գործի փաստական հանգամանքները.
Նախաքննության մարմինն ամբաստանյալ Կարեն Գևորգի Խաչատրյանին մեղադրանք է առաջադրել հետևյալ արարքի համար.
Կարեն Խաչատրյանը 2011թ. հունվարի 3-ին, ժամը 2100-ի սահմաններում, իր անձնական օգտագործման ՙԲՄՎ-X5՚ մակնիշի 23 ՍՕ 981 պ/հ ավտոմեքենան վարել է Երևան քաղաքի Բաղրամյան պողոտայով՝ Կասյան փողոցի կողմից Մաշտոցի պողոտայի ուղղությամբ, իր ուղեմասի 3-րդ գոտով, 50-60 կմ/ժամ արագությամբ՝ մոտակա լույսերով և ոչ սթափ վիճակում` խախտելով ՙՃանապարհային երթևեկության անվտանգության ապահովման մասին՚ ՀՀ օրենքի 24 հոդվածի 7-րդ կետի պահանջը: Թիվ 79/45 շենքի դիմացից, իր ընթացքի ուղղության նկատմամբ ձախից դեպի աջ կողմ պողոտան հատող, Դավիթ Սերգեյի Կարապետյանին Կ.Խաչատրյանը նկատել է հանդիպակաց ուղեմասի 3-րդ գոտով ընթացող ավտոմեքենայի հետևի մասից դուրս գալիս: Իր երթևեկության համար վտանգի բացակայության պայմաններում, հանդիպակաց ուղեմասի 3-րդ գոտին հատող Դ.Կարապետյանին թիկունքից շրջանցելու համար, ավտովարորդ Կ.Խաչատրյանը խախտել է նաև ՃԵԿ֊-ի 53 կետի և ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ կետի պահանջները, մուտք է գործել հանդիպակաց ուղեմաս` անտեսելով ճանապարհի երկկողմ երթևեկությամբ չորսից ավելի գոտի ունենալու հանգամանքը, ստեղծել է վթարային իրադրություն, որպիսի գործողությունների հետևանքով հանդիպակաց ուղեմասում, ավտոմեքենայի առջևի մասով վրաերթի է ենթարկել Դ.Կարապետյանին և անզգուշությամբ նրան պատճառել մահ։
Այսպիսով, Կարեն Խաչատրյանը ՃԵԿ-ի 53 կետի և ՙՃանապարհային երթևեկության անվտանգության ապահովման մասին ՀՀ օրենքի 23 հոդվածի 3-րդ կետի պահանջների խախտմամբ վրաերթի ենթարկելով Դ.Կարապետյանին և անզգուշությամբ մահ պատճառելով նրան, կատարել է հանցանք, որը նախատեսված է ՀՀ քրեական օրենսգրքի 242 հոդվածի 2-րդ մասով։
3.Ապացույցների հետազոտում.
Առաջադրված մեղադրանքում ամբաստանյալ Կարեն Խաչատրյանն իրեն մեղավոր ճանաչեց և հրաժարվելով ցուցմունք տալուց պնդեց նախաքննության ընթացում տված ցուցմունքը: Համաձայն այդ ցուցմունքի, 2011թ. հունվարի 3-ին, ժամը 2100-ի սահմաներում, ալկոհոլային խմիչք օգտագործած վիճակում, իր անձնական օգտագործման ՙԲՄՎ X5՚ մակնիշի 23 ՍՕ 98 պետհամարանիշի տեխնիկապես սարքին ավտոմեքենան առանց բեռի և մեկ ուղևորով վարել է Երևան քաղաքի Բաղրամյան պողոտայով` Կասյան փողոցի կողմից Մ.Մաշտոց պողոտայի ուղղությամբ, իր ուղեմասի երրորդ ընթացագոտով, զույգ հոծ գծերից մոտ 0,5 մետր հեռավորությա վրա, 50-60 կմ/ժամ արագությամբ, մոտակա լույսերով: Թիվ 79/45 շենքի դիմացից, իր ընթացքի ուղղության նկատմամբ ձախից դեպի աջ կողմ պողոտան հատող, հետիոտն Դավիթ Սերգեյի Կարապետյանին ինքը նկատել է հանդիպակաց ուղեմասի 3-րդ գոտով ընթացող ավտոմեքենայի հետևի մասից դուրս գալիս։ Կարծելով, որ հանդիպակաց ուղեմասի 3-րդ գոտին հատող Դ.Կարապետյանը մուտք է գործելու իր ուղեմաս, որոշել է նրան թիկունքի կողմից շրջանցել, որի համար ձախ մանևրումով մուտք է գործել հանդիպակաց ուղեմաս: Նույն ժամանակ զույգ հոծ գծերին հասած Դ.Կարապետյանը մի պահ կանգնելուց հետո, արագ քայլերով հետ գնալով, շուրջ 3 մետր տարածություն անցնելով՝ հայտնվել է իր դիմաց, որի ընթացքում ավտոմեքենայի առջևի մասով վրաերթի է ենթարկել նրան։ Հարվածից իր ավտոմեքենայի անվտանգության բարձիկները բացվել, հարվածվել են իր դեմքին, որի հետևանքով ինքը կորցրել է կառավարումն ու չի զգացել ինչպես հանդիպակաց ուղղությամբ ընթացող Մկրտիչ Բաբաջանյանի վարած ՙԴեու-Նեքսիա՚ մակնիշի ավտոմեքենայի հետ իր ավտոմեքենայի ընդհարումը, այնպես էլ Գառնիկ Թադևոսյանի վարած ավտոմեքենայի հետ ՙԴեու-Նեքսիա՚-ի ընդհարումը։Շտապօգնության ավտոմեքենայով դեպքի վայրից հիվանդանոց տեղափոխվելու ճանապարհին Դ.Կարապետյանի մահվան մասին ինքն իմացել է հետագայում։
Ամբաստանյալին առաջադրված մեղադրանքը, նրա խոստովանական ցուցմունքից բացի, հիմնավորվել է նաև գործով ձեռք բերված հետևյալ ապացույցներով.
Տուժողի իրավահաջորդ Սերգեյ Հակոբի Կարապետյանի նախնական քննության ընթացքում տված ցուցմունքով այն մասին, որ ինքը վրաերթի ենթարկված Դավիթ Կարապետյանի հայրն Է։2011թ. հունվարի 4-ին, վաղ առավոտյան իրեն Է զանգահարել հարսը՝ Դիաննա Հակոբյանը և հայտնել, որ Դավիթը երեկոյան տանից դուրս է եկել և չի վերադարձել։Անհանգստանալով սկսել են փնտրել և ի վերջո իմացել են, որ նա վրաերթի է ենթարկվել ու մահացել։Վրաերթի մասին իրեն միայն հայտնի Է, որ ՙԲՄՎ՚ մակնիշի ավտոմեքենան Կոմիտաս պողոտայից իջնելիս անցել Է կամուրջը և Բաղրամյան պողոտայով դեպի Օրբելու փողոցի խաչմերուկ ընթանալիս իր ուղեմասով երթևեկելու փոխարեն դուրս է եկել հանդիպակաց ուղեմաս ու վրաերթի ենթարկել իր որդուն, ով հիվանդանոց տեղափոխվելու ճանապարհին մահացել է։ Դեպքից մի քանի օր անց իրենց են այցելել իր որդուն վրաերթի ենթարկած վարորդի հարազատները և փոխհատուցել որդու հուղարկավորման ու նրա անչափահաս երեխայի խնամքի հետ կապված ծախսերը։
Վկա Վարդան Գառնիկի Հովհաննիսյանի ցուցմունքով այն մասին, որ 2011թ. հունվարի 3-ին, ժամը 2100-ի սահմաներում, իր ընտանիքի անդամների՝ կնոջ Ռուզաննա Կարապետյանի, դստեր՝ Լիլիթ Հովհաննիսյանի, եղբոր՝ Հովհաննես Հովհաննիսյանի, վերջինիս կնոջ` Նազելի Ավդալյանի և նրանց երեխաների՝ Գառնիկ ու Հասմիկ Հովհաննիսյանների հետ միասին ՙՊարտեզ պլյուս՚ տաքսի ծառայության ՙԴեյու-Նեքսիա՚ մակնիշի ավտոմեքենայով ուղևորվել են Երևան քաղաքի Ա.Ավետիսյան փողոցով դեպի Բաղրամյան պողոտայի ուղղությամբ։Ինքը նստած է եղել մեքենայի առջևի, իսկ մյուսները` հետևի նստատեղերին։Ավետիսյան փողոցից աջ շրջադարձով Բաղրամյան պողոտա մուտք գործելիս, տեսել է պողոտայի՝ դեպի Օրբելի փողոցի ուղությամբ, հանդիպակաց ուղեմասով ընթացող սև գույնի ՙԲՄՎ X5՚ մակնիշի ավտոմեքենան, որը հանդիպակաց ուղեմասում՝ երկրորդ և երրորդ ուղեգոտիների հարակցման շրջանում մի տղամարդու վրաերթի ենթարկելուց հետո շարունակելով րնթացքը, առջևի ձախ մասով ընդհարվել է իրենց ավտոմեքենայի առջևի ձախ մասին։ ՙԲՄՎ-X5՚-ի հետ ընդհարումից հետո, իրենց ավտոմեքենան հետ է շպրտվել ու հանդիպակաց ուղեմասում հետևի ձախ մասով ընդհարվել ՙՖոլկսվագեն-Պասսատ՚ մակնիշի ավտոմեքենայի ձախ կողային մասին: Վթարի հետևանքով ինքը և ընտանիքի մյուս անդամները ստացել են մարմնական վնասվածքներ:
Վկա Արսեն Սամսոնի Սիմոնյանի ցուցմունքով այն մասին, որ աշխատում է ՙԱրցախ բանկ՚ ՓԲԸ-ում որպես առաջատար մասնագետ, իսկ Կարեն Խաչատրյանն իր ընկերն է։ 2011թ. հունվարի 3-ին Կարեն Խաչատրյանի հետ միասին, նրա անձնական օգտագործման ՙԲՄՎ-X5՚ մակնիշի 23 ՍՕ 981 պ/հ ավտոմեքենայով Երևան քաղաքի Բաղրամյան պողոտայով` Կասյան փողոցի կողմից Սայաթ-Նովա փողոցի ուղությամբ ընթանալիս, Կարենն ավտոմեքենան վարել է իրենց ուղեմասի երրորդ գոտով։Իրենց ընթացքի ուղության նկատմամբ ձախից դեպի աջ կողմ` ուղղանկյան տակ պողոտան հատող մոտ 40 տարեկան տղամարդուն ինքը նկատել է հանդիպակաց ուղեմասը հատելիս, ով հասնելով բաժանարար զույգ հոծ գծերին, կանգնել է։Այդ տեսնելով Կարենը ձախ մանևրով մուտք է գործել հանդիպակաց ուղեմաս՝ թիկունքից նրան շրջանցելու համար, սակայն հետիոտն տղամարդը մի պահ զույգ հոծ գծերի վրա կանգնելուց հետո, շուրջ 3 մետր հետ-հետ է քայլել, հայտնվել իրենց ավտոմեքենայի դիմաց, որի ընթացքում Կարենն ավտոմեքենայի առջևի կենտրոնական մասով վրաերթի է ենթարկել նրան, ինչի արդյունքում բացվել են ավտոմեքենայի անվտանգության բարձիկները և դրանից հետո չի զգացել, թե ինչ է կատարվել։
Գործով վկա Մկրտիչ Բաղդասարի Բաբաջանյանի նախնական քննության ընթացքում տված ցուցմունքով այն մասին, որ աշխատում է ՙՊարտեզ պլյուս՚ տաքսի ծառայությունում որպես վարորդ։2011թ. հունվարի 3-ին, ժամը 2030-ի սահմաներում տաքսի ծառայությունից ստանալով պատվեր, իրեն ամրակցված ՙԴԵՅՈՒ ՆԵՔՍԻ մակնիշի Տ 4897 պետհամարանիշի ավտոմեքենայով ժամանել է Գուլակյան փողոց, որտեղից 7 ուղևորով շարժվել է ըստ պատվերի։Ա.Ավետիսյան փողոցից աջ շրջադարձով Բաղրամյան պողոտայի՝ դեպի Կասյան փողոց տանող ուղեմաս մուտք գործելիս տեսել Է հանդիպակաց ուղությամբ, սակայն իրենց ուղեմասով դեպի իր ավտոմեքենան ընթացող ՙԲՄՎ X5՚ մակնիշի ավտոմեքենան, փորձել Է աջ մանևրել, սակայն չի հասցրել և ՙԲՄՎ X5՚-ը առջևի մասով ընդհարվել Է իր վարած ավտոմեքենայի առջևի մասին, որից հետո ինքը չի հիշում թե ինչ Է կատարվել։Հետագայում Է տեղեկացել, որ մինչ այդ նշված ՙԲՄՎ X5՚ մակնիշի ավտոմեքենայի վարորդը հետիոտն Դ.Կարապետյանին վրաերթի ենթարկելուց հետո է ընդհարվել իր ավտոմեքենային, ինչի արդյունքում Էլ իր ավտոմեքենան շպրտվել Է հետ և ընդհարվել Բաղրամյան պողոտայով դեպի Մ.Մաշտոց պողոտայի ուղությամբ ընթացող ՙՖՈԼԿՍՎԱԳԵՆ ՊԱՍԱՏ՚ մակնիշի ավտոմեքենային։
Ամբաստանյալի կատարած հանցանքը հիմնավորվել է նաև գործով ձեռք բերված հետևյալ ապացույցներով.
Դեպքի վայրի և տրանսպորտային միջոցների զննության արձանագրություններով այն մասին, որ դեպքի վայրում առկա են եղել վթարված ավտոմեքենաները, տուժող Դ.Կարապետյանի կոշիկը, սպորտային գլխարկը։
Դեպքի վայրի լրացուցիչ զննության արձանագրությամբ այն մասին, որ Կարեն Խաչատրյանը մատնացույց Է արել Երևանի Բաղրամյան 79/45 շենքի դիմացի ճանապարհի այն հատվածը, որտեղով մինչ վրաերթը երթևեկել Է ՙԲՄՎ X5՚ մակնիշի 23 ՍՕ 981 պ/h ավտոմեքենայով, ինչպես նաև այն հատվածը, որտեղ վրաերթի Է ենթարկել Դավիթ Կարապետյանին։
Դատահետքաբանական-դատաքիմիական և մանրաթելային համալիր փորձաքննության թիվ 01101104 եզրակացությամբ այն մասին, որ փորձաքննությանը ներկայացված հագուստներից կիսավերարկուի, սվիտերի, անդրավարտիքի և կոշիկների վրա առկա են մեխանիկական վնասվածքներ, աջ ոտքի կոշիկի ներբանի վրա՝ սահքին բնորոշ հետքեր, որոնք իրենց բնույթով և համակցությամբ առաջացել են վրաերթի հետևանքով։Ներկայացված հագուստների և կոշիկներ վրա անվադողերի նախշանկարների հետքեր չեն հայտնաբերվել։
Փորձաքննությանը տրամադրված ՙԲՄՎ X5՚ մակնիշի առանց պետհամարանիշի ավտոմեքենայի առաջամասում առկա են մեխանիկական վնասվածքներ, որոնք իրենց բնույթով և համակցությամբ առաջացել են վրաերթի ընթացքում, համեմատաբար փափուկ մակերես ունեցող առարկայի հետ, որպիսին հանդիսանում Է նաև մարդու մարմինը, փոխազդեցության մեջ մտնելու հետևանքով։
Փորձաքննությանը ներկայացված հագուստներից և կոշիկներից անջատված ընդհանուր զանգվածում հայտնաբերվել Է սև գույնի դեկորատիվ ներկածածկույթի շերտով, ավտոմեքենայի երկշերտանի ներկածածկույթի միկրոմասնիկ, որն ունի ընդհանուր սեռային պատկանելիություն փորձաքննությանը տրամադրված ՙԲՄՎ X5՚ մակնիշի առանց պետհամարանիշի ավտոմեքենայի շարժիչի ծածկոցից վերցված ներկածածկույթի նմուշների առաջին երկու շերտերի հետ։
Փորձաքննության ներկայացված կոշիկներից և հագուստներից՝ շարֆի վրա հայտնաբերվել են մուգ նավթամթերքի՝ քսայուղի, ներծծված հետքեր, որոնք ունեն ընդհանուր սեռայի պատկանելիություն փորձաքննությանը տրամադրված ՙԲՄՎ X5՚ մակնիշի առանց պետհամարանիշի ավտոմեքենայի շարժիչախցի առջևի ձախ անկյունային մասում տեղակայված դետալների մակերեսներից վերցված քսայուղի նմուշների հետ։
Փորձաքննությանը տրամադրված ՙԲՄՎ X5՚ մակնիշի առանց պետհամարանիշի ավտոմեքենայի շարժիչի ծածկոցի ձախակողմյան հատվածի, առջևի հողմապակու և ձախակողմյան կողային հայելու մակերեսների վրա հայտնաբերված բնական բամբակյա սև գույնի, բնական բրդյա անգույն և սև գույնի մանրաթելերն ունեն ընդհանուր սեռային պատկանելիություն Դավիթ Սերգեյի Կարապետյանի արտաքին հագուստների գործվածքների կազմի մեջ մտնող բնական բամբակյա սև գույնի, բնական բրդյա անգույն և սև գույնի մանրաթելերի հետ։
Դատաբժշկական փորձաքննության թիվ 19 եզրակացությամբ այն մասին, որ Դ.Կարապետյանի դիակի դատաբժշկական փորձաքննությամբ հայտնաբերվել են գլխուղեղի, որովայնի, զույգ ստորին վերջույթների համակցված, փակ, բութ վնասվածքներ՝ ճակատի, աջ ակնակապճի, վերին կոպի, աջ նախաբազուկ-դաստակային հոդի, զույգ դաստակների, սրունքների շրջանների բազմաթիվ քերծվածքներ, որովայնի, գլխի մազածածկ շրջանի փափուկ հյուսվածքների, գլխուղեղի փափուկ թաղանթների, ուղեղանյութի արյունազեղումներ, լյարդի պատռվածք, զույգ ազդրերի, սրունքների վ/3-րդների փակ կոտրվածքներ, ներքին արյունահոսություն, որոնք առաջացել են կենդանության օրոք, բութ առարկաների ազդեցությամբ, որպիսին կարող Է լինել շարժվող տրանսպորտի արտացցված մասերը, նրա մահվան հետ գտնվում են անմիջական պատճառական կապի մեջ։Դ.Կարապետյանի մահը վրա Է հասել տրավմատիկ-հեմոռագիկ շոկից, որն էլ պայմանավորված է եղել գլխուղեղի, որովայնի, զույգ ստորին վերջույթների համակցված, փակ, բութ վնասվածքներով: Առաջնային տրավմատիկ հարվածը կարելի է ենթադրել, որ ուղղված է եղել Դ.Կարապետյանի զույգ սրունքների վ/3-րդների առաջային մակերեսներին, իսկ մնացած վնասվածքներն առաջացել են վրաերթի հետագա փուլերի ընթացքում։
Դատաավտոտեխնիկական փորձաքննության թիվ 00901108 եզրակացությամբ այն մասին, որ ՙԲՄՎ X5՚ մակնիշի 23 ՍՕ 981 պ/հ ավտոմեքենայի բանվորական արգելակային և ղեկային կառավարման համակարգերը գտնվում են աշխատունակ վիճակում և նշված համակարգերի այնպիսի անսարքություններ, որպիսիք գոյություն ունեցած լինեին մինչև տվյալ պատահարը և պայմանավորած լինեին ավտոմեքենայի ընթացքի կայունության կամ կառավարելիության կորստի առաջացումը, չեն հայտնաբերվել։
Փորձաքննությանը տրամադրված վիճակում ի հաշիվ վթարային բնույթի վնասվածքների առկայության՝ ՙԲՄՎ X5՚ մակնիշի 23 ՍՕ 981 պ/հ ՛ավտոմեքենայի առջևի կախոցը գտնվում է տեխնիկապես անսարք ու անաշխատունակ վիճակում, իսկ առջևի ձախ անիվը` ճնշազրկված վիճակում, սակայն ավտոմեքենայի ընթացքային մասի՝ կախոցների և անիվների այնպիսի վնասվածքներ կամ անսարքություններ, որպիսիք գոյություն ունեցած լինեին մինչև տվյալ պատահարը և պայմանավորած լինեին ավտոմեքենայի ընթացքի կայունության կամ կառավարելիության կորստի առաջացումը, չեն հայտնաբերվել։
ՙԴեու-Նեքսիա՚ մակնիշի Տ 4897 պ/հ ավտոմեքենայի բանվորական արգելակային և ղեկային կառավարման համակարգերն՝ ի հաշիվ վթարային բնույթի վնասվածքների առկայության, գտնվում են տեխնիկապես անսարք ու անաշխատունակ վիճակում, սակայն նշված համակարգերի այնպիսի վնասվածքներ կամ անսարքություններ, որպիսիք գոյություն ունեցած լինեին մինչև տվյալ պատահարը և պայմանավորած լինեին ավտոմեքենայի ընթացքի կայունության կամ կառավարելիության կորստի առաջացումը, չեն հայտնաբերվել։
Փորձաքննությանը տրամադրված վիճակում ի հաշիվ վթարային բնույթի վնասվածքների առկայության՝ ՙԴեու-Նեքսիա՚ մակնիշի Տ 4897 պ/հ ավտոմեքենայի առջևի կախոցը գտնվում է տեխնիկապես անսարք ու անաշխատունակ վիճակում, իսկ առջևի ձախ անիվը` ճնշազրկված վիճակում, սակայն ավտոմեքենայի ընթացքային մասի՝ կախոցների և անիվների այնպիսի վնասվածքներ կամ անսարքություններ, որպիսիք գոյություն ունեցած լինեին մինչև տվյալ պատահարը և պայմանավորած լինեին ավտոմեքենայի ընթացքի կայունության կամ կառավարելիության կորստի առաջացումը, չեն հայտնաբերվել։
ՙՖոլկսվագեն-Պասսատ՚ մակնիշի 23 ԼՏ 684 պ/հ ավտոմեքենայի բանվորական արգելակային և ղեկային կառավարման համակարգերն՝ ընթացքային մասը` կախոցները և անիվները, գտնվում են աշխատունակ վիճակում և դրանց անսարքություններ, որպիսիք գոյություն ունեցած լինեին մինչև տվյալ պատահարը և պայմանավորած լինեին ավտոմեքենայի ընթացքի կայունության կամ կառավարելիության կորստի առաջացումը, չեն հայտնաբերվել։
ՙԲՄՎ X5՚ մակնիշի 23 ՍՕ 981 պ/հ և ՙԴեու-Նեքսիա՚ մակնիշի Տ 4897 պ/ ավտոմեքենաների փոխադարձ դիրքի անկյունը դրանց ընդհարման պահին՝ ընդհարման բլոկավորման փուլում, հաշված ՙԲՄՎ X5՚ մակնիշի ավտոմեքենայի երկայնական առանցքի դեպի առաջ ուղղությունից ժամսլաքի պտույտին հակառակ ուղղությամբ մինչև ՙԴեու-Նեքսիա՚ մակնիշ ավտոմեքենայի երկայնական առանցքի դեպի առաջ ուղղությունը, կազմել է 165 աստիճան։
ՙԴեու-Նեքսիա՚ մակնիշի Տ 4897 պ/հ և ՙՖոլկսվագեն-Պասսատ՚ մակնիշի 23 ԼՏ 684 ՆԱ ավտոմեքենաների փոխադարձ դիրքի անկյունը դրանց ընդհարման պահին տվյալ կոնկրետ դեպքում որոշել հնարավոր չէ։
Տեսաձայնագրային և ավտոտեխնիկական համալիր փորձաքննության թիվ 04901106 եզրակացությամբ այն մասին, որ փորձաքննությանը տրամադրված սկավառակի վրա առկա է ՙ1՚ անվանումով ՙmp4՚ ֆորմատի ֆայլ, որը հանդիսանում է 22 վայրկյան տևողությամբ տեսագրություն առանց ձայնային ուղեկցության)։
Որոշել տեսագրության մեջ առկա սև գույնի ավտոմեքենայի արագությունը տեսախցիկի տեսադաշտում, տվյալ դեպքում հնարավոր չէ՝ բավարար փորձագիտական հատկանիշների բացակայության պատճառով։
Դատաավտոտեխնիկական փորձաքննության թիվ 3ա եզրակացությամբ այն մասին, որ ՙԲՄՎ X5՚ մակնիշի 23 ՍՕ 981 պ/հ ավտոմեքենայի վարորդը, երթևեկության անվտանգությունն ապահովելու և հանդիպակաց ուղղության երթևեկելի ուղեմասը հատելով, հանդիպակաց ուղեմասերը բաժանող զույգ հոծ գծանշմանը մոտեցող հետիոտն տղամարդու նկատմամբ տվյալ վրաերթի առաջացումը բացառելու համար, պետք է, առանց իր վարած մեքենայի ընթացքի ուղղությունը փոխելու և մեքենան հանդիպակաց ուղղության երթևեկելի ուղեմաս դուրս բերելու, երթևեկությունը շարունակեր իր ընթացքի ուղղության երթևեկելի ուղեմասով, ինչի տեխնիկական հնարավորությունը պատահարի պարագաներում ունեցել է և ինչը կատարելով, նա կկանխեր տվյալ վրաերթի առաջացումը։
Դրա փոխարեն, պատահարի պարագաներում մանևրելով դեպի ձախ և մեքենան դուրս բերելով հանդիպակաց ուղղության երթևեկելի ուղեմաս, ինչը տեխնիկական առումով չի բխել երթևեկության անվտանգության ապահովման պահանջի տեսանկյունից և որի արդյունքում հանդիպակաց ուղղության երթևեկելի ուղեմասում, ավտոմեքենայի առջևի մասով, վրաերթի է ենթարկել այդ ընթացքում հանդիպակաց ուղղությունների երթևեկելի ուղեմասերը բաժանող զույգ հոծ գծանշմանը հասնելուց և այդ գծանշման վրա կանգնելուց հետո իր վարած ավտոմեքենայի ընթացքի ուղղությամբ աջից դեպի ձախ կողմն, այն է՝ հանդիպակաց ուղղության երթևեկելի ուղեմասը, դեպի հետ ուղղությամբ հատող հետիոտն տղամարդուն, ՙԲՄՎ X5՚ մակնիշի 23 ՍՕ 981 պ/հ ավտոմեքենայի վարորդը թույլ է տվել գործողություններ, որոնք հակասել են ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ մասի և ՃԵԿ-ի 53 կետի պահանջներին։
Իր այդ գործողություններով ՙԲՄՎ X5՚ մակնիշի 23 ՍՕ 981 պ/հ ավտոմեքենայի վարորդը պայմանավորել է տվյալ վրաերթի և դրանից հետո Ավետիսյան փողոցից աջ շրջադարձով Բաղրամյան պողոտայի՝ դեպի Կասյան փողոց տանող ուղղության երթևեկելի ուղեմաս մուտք գործած ՙԴեու-Նեքսիա՚ մակնիշի ավտոմեքենայի հետ ընդհարման, ինչպես նաև՝ այդ ընդհարումից հետո շեղակի ուղղությամբ դեպի հետ շպրտվելուց և Բաղրամյան պողոտայի՝ դեպի Մաշտոցի պողոտա տանող ուղղության երթևեկելի ուղեմաս մուտք գործելուց հետո ՙԴեու-Նեքսիա՚ մակնիշի ավտոմեքենայի և այդ ուղեմասի երկրորդ գոտով ընթացող ՙՖոլկսվագեն-Պասսատ՚ մակնիշի ավտոմեքենայի միջև տեղի ունեցած ընդհարման, այն է՝ տվյալ ճանապարհատրանսպորտային պատահարի առաջացումն՝ ինքն իրեն զրկելով այն կանխելու տեխնիկական հնարավորությունից։
ՙԴեու-Նեքսիա՚ մակնիշի Տ 48-97 պ/հ ավտոմեքենայի վարորդը տվյալ ճանապարհատրանսպորտային պատահարը կանխելու տեխնիկական հնարավորություն չի ունեցել և առաջադրված պայմաններում նրա կողմից թույլ տրված այնպիսի գործողություններ, որպիսիք տեխնիկական տեսակետից հակասելով ՃԵԿ-ի պահանջներին, պայմանավորած լինեին տվյալ պատահարի առաջացումը, չեն դիտվել։
ՙՖոլկսվագեն-Պասսատ՚ մակնիշի 23 ԼՏ 684 պ/հ ավտոմեքենայի վարորդը տվյալ ընդհարումը կանխելու տեխնիկական հնարավորություն չի ունեցել և առաջադրված պայմաններում նրա կողմից թույլ տրված այնպիսի գործողություններ, որպիսիք տեխնիկական տեսակետից հակասելով ՃԵԿ-ի պահանջներին, պայմանավորած լինեին տվյալ պատահարի առաջացումը, չեն դիտվել։
Դեպքի պահին Դավիթ Կարապետյանի հագին եղած հագուստներն իրեղեն ապացույց ճանաչելու և դրանք Երևան քաղաքի քննչական վարչության ՃՏՀ քննության բաժնի իրեղեն ապացույցների համար նախատեսված սենյակում պահելու որոշմամբ:
Սույն գործով Բաղրամյան 85 հասցեի` ՙSAS՚ սուպերմարկետի արտաքին անվտանգության ապահովման տեսախցիկի 03.01.2011թ. ժամը 2053.49 վրկ. մինչև 2054.11 վրկ. տեսաձայնագրությունն ապացույց ճանաչելու և քրեական գործին կցելու որոշմամբ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Կարեն Գևորգի Խաչատրյանին առաջադրված մեղադրանքը ՀՀ քրեական օրենսգրքի 242 հոդվածի 2-րդ մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 242 հոդվածի 2-րդ մասի հատկանիշներին և արարքի որակումը ճիշտ է:
Ամբաստանյալ Կարեն Խաչատրյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, բնակության վայրում և աշխատավայրում դրականորեն է բնութագրվում, խնամքին են գտնվում մանկահասակ երեխան և կինը, ով գտնվում է 17 շաբաթական հղիության վիճակում, հանցագործությամբ պատճառված վնասները կամովին հատուցել է:
Դատարանը որպես ամբաստանյալի պատասխանատվությունը և պատիժը ծանրացնող հանգամանք է դիտում հանցանքն ալկոհոլի ազդեցության տակ կատարելը:
Կատարած արարքի համար ամբաստանյալ Կարեն Գևորգի Խաչատրյանը ենթակա է քրեական պատասխանատվության և պատժի:
Դատարանը, հաշվի առնելով Կարեն Խաչատրյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ ՀՀ քրեական օրենսգրքի 242 հոդվածի 2-րդ մասի սանկցիայով նախատեսված է պատիժ միայն ազատազրկման ձևով, գտնում է, որ պատժի նպատակներին հասնելու համար Կարեն Խաչատրյանի նկատմամբ պատիժ պետք է նշանակել ազատազրկման ձևով, որը նա պետք է կրի:
Դատարանը գտնում է, որ տուժողի իրավահաջորդ Սերգեյ Կարապետյանի քաղաքացիական հայցի հարցը պետք է համարել լուծված, նկատի ունենալով, որ վերջինս դատարան ներկայացված գրավոր դիմումով հայտնել է, որ ամբաստանյալ Կարեն Խաչատրյանից որևէ պահանջ չունի:
Անդրադառնալով իրեղեն ապացույցների տնօրինման հարցին, դատարանը գտնում է, որ 2011թ. փետրվարի 22-ի որոշմամբ իրեղեն ապացույց ճանաչված և Երևան քաղաքի քննչական վարչության ՃՏՀ քննության բաժնի իրեղեն ապացույցների սենյակում պահվող` դեպքի պահին տուժող Դ.Կարապետյանի հագին եղած հագուստները պետք է վերադարձնել տուժողի իրավահաջորդ Սերգեյ Կարապետյանին, իսկ ապացույց ճանաչված տեսաերիզը` պահել քրեական գործի հետ միասին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Կարեն Գևորգի Խաչատրյանին մեղավոր ճանաչել ՀՀ քրեական օրենսգրքի 242 հոդվածի 2-րդ մասով և նրան դատապարտել ազատազրկման երեք (3) տարի վեց (6) ամիս ժամկետով` տրանսպորտային միջոցներ վարելու իրավունքից զրկելով երկու (2) տարի ժամկետով:
ՀՀ քրեական օրենսգրքի 69 հոդվածի կանոններով` նշանակված պատժին հաշվակցել Կարեն Խաչատրյանի նախնական կալանքի տակ եղած 3 օր ժամկետը և վերջնական թողնել կրելու ազատազրկում երեք (3) տարի հինգ (5) ամիս քսանյոթ (27) օր ժամկետով:
Պատժի սկիզբը հաշվել Կարեն Խաչատրյանի կալանավորման օրվանից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Կարեն Գևորգի Խաչատրյանի նկատմամբ ընտրված խափանման միջոցը` գրավը, թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 500.000 (հինգ հարյուր հազար) ՀՀ դրամ գրավի գումարը վերադարձնել Գագիկ Ավետիկի Ալոյանին:
Տուժողի իրավահաջորդ Սերգեյ Կարապետյանի քաղաքացիական հայցի հարցը համարել լուծված:
Դատավճիռն օրինական ուժի մեջ մտնելուց հետո իրեղեն ապացույց ճանաչված և Երևան քաղաքի քննչական վարչության ՃՏՀ քննության բաժնի իրեղեն ապացույցների սենյակում պահվող` դեպքի պահին տուժող Դ.Կարապետյանի հագին եղած հագուստները վերադարձնել տուժողի իրավահաջորդ Սերգեյ Կարապետյանին: Ապացույց ճանաչված տեսաերիզը պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ