ԵԱՔԴ/0021/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ե.Կարապետյանի,Ն.Ղազարյանի, Ա.Մկրտչյանի
մասնակցությամբ
մեղադրող Հ. Մարտիրոսյանի
պաշտպան Ս. Հակոբյանի
տուժողների ներկայացուցիչներ Գ. Ավետիսյանի, Լ.Մուսոյանի


2011 թվականի սեպտեմբերի 30-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի
1. Հարություն Մուշեղի Ղազարյանի, ծնված 1987 թվականի հոկտեմբերի 13-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, չի աշխատել, հաշվառված է Երևան քաղաքի Նոր Նորքի 9-րդ զանգվածի 16բ շենքի թիվ 4 բնակարանում, բնակվել է Երևան քաղաքի Նոր Նորքի 7-րդ զանգվածի 28 շենքի թիվ 3 բնակարանում, մեղադրվում է ՀՀ քրեական օրենսգրքի 178 հոդվածի 2-րդ մասի 1-ին և 3-րդ կետերով, արգելանքի տակ է 2011 թվականի հունվարի 18-ից,
2. Մուշեղ Կիմի Ղազարյանի, ծնված 1962 թվականի նոյեմբերի 21-ին, Ադրբեջանի Հանրապետության Խանլարի շրջանի Ոսկեպատ գյուղում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մեկ երեխա, աշխատել է ՙԷլենա՚ տաքսի ծառայությունում, որպես վարորդ, նախկինում չդատված, հաշվառված է Երևան քաղաքի Նոր Նորքի 9-րդ զանգվածի 16բ շենքի թիվ 4 բնակարանում, բնակվել է Երևան քաղաքի Նոր Նորքի 7-րդ զանգվածի 28 շենքի թիվ 3 բնակարանում, մեղադրվում է ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով, արգելանքի տակ է 2011 թվականի հունվարի 18-ից,

Պ Ա Ր Զ Ե Ց

1.Գործի դատավարական նախապատմությունը.
2010թ. սեպտեմբերի 18-ին ՀՀ ոստիկանության ՔԳՎ Երևան քաղաքի ՔՎ Քանաքեռ-Զեյթուն քննչական բաժնում ՀՀ քրեական օրենսգրքի 178 հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել է թիվ 09120710 քրեական գործը:
2011թ. հունվարի 21-ին Հարություն Մուշեղի Ղազարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 1-ին և 3-րդ կետերով, նրա նկատմամբ որպես խափանման միջոց ընտրվել է կալանավորումը:
2011թ. հունվարի 21-ին Մուշեղ Կիմի Ղազարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով, նրա նկատմամբ որպես խափանման միջոց ընտրվել է կալանավորումը:
2011թ. փետրվարի 28-ին Հարություն Մուշեղի Ղազարյանին առաջադրված մեղադրանքը փոփոխվել, լրացվել և նրան կրկին մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 1-ին և 3-րդ կետերով:
2011թ. մարտի 9-ին թիվ 09120710 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Հարություն Մուշեղի Ղազարյանին մեղադրանք է առաջադրել այն արարքի համար, որ նա 28.04.2010թ. Արման Մամիկոնի Ղազարյանի հետ նախնական համաձայնությամբ, չարաշահելով ՙՖաստ Կրեդիտ՚ ՍՊԸ-ին պատկանող Երևան քաղաքի Ա.Մանուկյան փողոցի 7 հասցեում գտնվող թիվ 8 գրավատան աշխատակիցների վստահությունը, խաբեությամբ գրավադրել է 62.8 գրամ ընդհանուր քաշով թվով 3 հատ կեղծ ոսկյա շղթա, որոնց դիմաց ստացել է 439.000 ՀՀ դրամ գումար և տիրացել դրան` ՙՖաստ Կրեդիտ՚ ՍՊԸ-ին պատճառելով զգալի չափերի հասնող 439.000 ՀՀ դրամի գույքային վնաս:
Հարություն Ղազարյանը 02.05.2010թ. չարաշահելով ՙՖաստ Կրեդիտ՚ ՍՊԸ-ին պատկանող Երևան քաղաքի Ա.Մանուկյան փողոցի 7 հասցեում գտնվող թիվ 8 գրավատան աշխատակիցների վստահությունը, Արմեն Կիրակոսյանի միջոցով, վերջինիս անձնագրով, խաբեությամբ գրավադրել է 64.6 գրամ ընդհանուր քաշով թվով 2 հատ կեղծ ոսկյա շղթաներ, որոնց դիմաց ստացել է 452.000 ՀՀ դրամ գումար և տիրացել դրան` ՙՖաստ Կրեդիտ՚ ՍՊԸ-ին պատճառելով զգալի չափերի հասնող 452.000 ՀՀ դրամի գույքային վնաս:
Դրանից հետո, 21.05.2010թ., կրկին չարաշահելով ՙՖաստ Կրեդիտ՚ ՍՊԸ-ին պատկանող Երևան քաղաքի Մ.Խորենացու փողոցի 24 հասցեում գտնվող թիվ 3 գրավատան աշխատակիցների վստահությունը, Ա.Կիրակոսյանի անձնագրով, խաբեությամբ գրավադրել է 13.7 գրամ քաշով մեկ հատ կեղծ ոսկյա մատանի, որի դիմաց ստացել է 92.000 ՀՀ դրամ գումար և տիրացել դրան` ՙՖաստ Կրեդիտ՚ ՍՊԸ-ին պատճառելով զգալի չափերի հասնող 92.000 ՀՀ դրամի գույքային վնաս:
Այնուհետև, 21.05.2010թ. Արման Մամիկոնի Ղազարյանի հետ նախնական համաձայնությամբ, չարաշահելով Երևան քաղաքի Կորյունի փողոցի 11/10 հասցեում գտնվող ՙԿարմեն՚ Ա/Կ գրավատան աշխատակիցների վստահությունը, խաբեությամբ գրավադրել է 13.9 գրամ քաշով, 8.000 ՀՀ դրամ արժողությամբ մեկ հատ տղամարդու կեղծ ոսկյա մատանի, որի դիմաց ստացել է 93.000 ՀՀ դրամ գումար և տիրացել դրան` ՙԿարմեն՚ Ա/Կ գրավատանը պատճառելով զգալի չափերի հասնող 85.000 ՀՀ դրամի գույքային վնաս:
24.05.2010թ., կրկին Արման Մամիկոնի Ղազարյանի հետ նախնական համաձայնությամբ, չարաշահելով Երևան քաղաքի Կոմիտաս պողոտայի 12 հասցեում գտնվող ՙՊրոֆֆինանս՚ ՓԲԸ-ին պատկանող գրավատան աշխատակիցների վստահությունը, խաբեությամբ գրավադրել է 12.8 գրամ քաշով, 8.000 ՀՀ դրամ արժողությամբ մեկ հատ տղամարդու կեղծ ոսկյա մատանի, որի դիմաց ստացել է 76.000 ՀՀ դրամ գումար և տիրացել դրան` ՙՊրոֆֆինանս՚ ՓԲԸ-ին պատճառելով զգալի չափերի հասնող 68.000 ՀՀ դրամի գույքային վնաս:
Դրանից հետո, 27.05.2010թ. Արման Մամիկոնի Ղազարյանի հետ նախնական համաձայնությամբ, չարաշահելով Երևան քաղաքի Հր.Ներսիսյան փողոցի 1/124 հասցեում գտնվող ՙՄուսոյան ԱԱԱ՚ ՍՊԸ գրավատան աշխատակիցների վստահությունը, խաբեությամբ գրավադրել է 17.2 գրամ գրամ քաշով, 10.000 ՀՀ դրամ արժողությամբ, խաչի տեսքով մեկ հատ կեղծ ոսկյա կախազարդ ու դրա դիմաց ստանալով 110.000 ՀՀ դրամ տիրացել է այդ գումարին, ՙՄուսոյան ԱԱԱ՚ ՍՊԸ գրավատանը պատճառելով զգալի չափերի հասնող 100.000 ՀՀ դրամի գույքային վնաս:
03.06.2010թ., կրկին Արման Մամիկոնի Ղազարյանի հետ, նախնական համաձայնությամբ, չարաշահելով Երևան քաղաքի Հր.Ներսիսյան փողոցի 1/124 հասցեում գտնվող ՙՄուսոյան ԱԱԱ՚ ՍՊԸ գրավատան աշխատակիցների վստահությունը, խաբեությամբ գրավադրել է 17.8 գրամ քաշով, 10.000 ՀՀ դրամ արժողությամբ, խաչի տեսքով մեկ հատ կեղծ ոսկյա կախազարդ ու դրա դիմաց ստանալով 115.000 ՀՀ դրամ գումար տիրացել է այդ գումարին, ՙՄուսոյան ԱԱԱ՚ ՍՊԸ գրավատանը պատճառելով զգալի չափերի հասնող 105.000 ՀՀ դրամի գույքային վնաս:
12.06.2010թ., կրկին Արմեն Գրիգորի Կիրակոսյանի միջոցով, չարաշահելով ՙԻզի Կրեդիտ՚ ՍՊԸ-ին պատկանող Երևան քաղաքի Տ.Մեծի փողոցի 6/1 հասցեում գտնվող գրավատան աշխատակիցների վստահությունը, Ա.Կիրակոսյանի անձնագրով, խաբեությամբ գրավադրել է 12.4 գրամ քաշով մեկ հատ կեղծ ոսկյա խաչ, որի դիմաց ստացել է 83.000 ՀՀ դրամ գումար և տիրացել դրան` ՙԻզի Կրեդիտ՚ ՍՊԸ-ին պատճառելով զգալի չափերի հասնող 83.000 ՀՀ դրամի գույքային վնաս:
Նախնական քննության մարմինն ամբաստանյալ Մուշեղ Կիմի Ղազարյանին մեղադրանք է առաջադրել այն արարքի համար, որ նա 24.06.2010թ. Արման Մամիկոնի Ղազարյանի հետ, նախնական համաձայնությամբ, չարաշահելով Երևան քաղաքի Մ.Խորենացու փողոցի թիվ 24 հասցեում գտնվող ՙՖաստ Կրեդիտ՚ ՍՊԸ-ի թիվ 3 գրավատան աշխատակիցների վստահությունը, խաբեությամբ գրավադրել է 96.465 գրամ ընդհանուր քաշով խաչի տեսքով տասներկու հատ կեղծ ոսկյա կախազարդեր ու դրանց դիմաց ստանալով 640.000 ՀՀ դրամ, տիրացել է այդ գումարին, ՙՖաստ Կրեդիտ՚ ՍՊԸ-ի թիվ 3 գրավատանը պատճառելով խոշոր չափերի հասնող` 640.000 ՀՀ դրամի գույքային վնաս:
3.Ապացույցների հետազոտում.
Առաջադրված մեղադրանքում Հարություն Մուշեղի Ղազարյանն իրեն մեղավոր է ճանաչել լիովին և ցուցմունք է տվել այն մասին, որ 2007 թվականից սկսած աշխատում է Մ.Խորենացի փողոցի 24 հասցեում գտնվող ՙՎաղարշ և որդիներ՚ ՍՊԸ-ին պատկանող ոսկու շուկայում որպես ոսկերիչ: 2010թ. գարնան սկզբներին գումարի կարիք ունենալու պատճառով որոշել է տարբեր մետաղների համաձուլվածքից պատրաստել 3 հատ զարդ, ոսկեջրել ու որպես ոսկյա զարդ դրանք գրավադրել գրավատանը և տիրանալ ստացված գումարին: Այդ նպատակով իրենց բնակարանի փակ պատշգամբում տեղադրված ոսկերչական գործիքների միջոցով սկսել է տարբեր մետաղների համաձուլվածքներից պատրաստել շղթաներ ապա ոսկեջրել դրանք: 2010թ. գարնան ընթացքում իր հորեղբոր որդի Արման Մուշեղի Ղազարյանը, պարբերաբար այցելելով իրենց բնակարան, նկատել է, որ ինքը պատրաստում է կեղծ ոսկյա զարդեր: Ինքը հորեղբոր որդուն պատմել է, որ զարդերը պատրաստում է տարբեր մետաղների համաձուլվածքից, ոսկեջրում, որպիսի որպես ոսկյա զարդ գրավադրի գրավատանը և տիրանա ստացված գումարին: Արման Ղազարյանն իմանալով այդ մասին, առաջարկել է իր անձնագրով գրավադրել պատրաստած զարդերը, իսկ գրավադրումից ստացված գումարը բաժանել միմյանց միջև` նախապես այդ գումարից հանելով զարդի պատրաստման համար ծախսված գումարը: Ինքը համաձայնվել է Ա.Ղազարյանի առաջարկին:
2010թ. ապրիլի 28-ին, նախնական պայմանավորվածության համաձայն, իրենց Երևան քաղաքի Նոր Նորքի 7-րդ զանգվածի 28 շենքի թիվ 3 բնակարանում Ա.Ղազարյանին տվել է իր կողմից պատրաստված 62.8 գրամ ընդհանուր քաշով թվով 3 հատ կեղծ ոսկյա շղթաներ` գրավատանը գրավադրելու համար: Ա.Ղազարյանն այդ շղթաներն իր անձնագրով խաբեությամբ գրավադրել է Երևան քաղաքի Ա.Մանուկյան փողոց թիվ 7 հասցեում գտնվող ՙՖաստ Կրեդիտ՚ ՍՊԸ-ին պատկանող գրավատանը, իսկ դրանց դիմաց ստացած 439.000 ՀՀ դրամ գումարը ինքն ու Ա.Ղազարյանը բաժանել են միմյանց միջև:
Այնուհետև, 2010թ. մայիսի 21-ին, գրավատանը գրավադրելու համար, իրենց բնակարանում Ա.Ղազարյանին տվել է 13.9 գրամ քաշով, մեկ հատ տղամարդու կեղծ ոսկյա մատանի: Ա.Ղազարյանն այն գրավադրել է Երևան քաղաքի Կորյունի թողոցի թիվ 11/10 հասցեում գտնվող ՙԿարմեն՚ Ա/Կ գրավատանը և գրավադրումից ստացված գումարը` 93.000 ՀՀ դրամը բաժանել են միմյանց միջև:
2010թ. մայիսի 24-ին, իրենց բնակարանում ինքն Արմանին տվել է, իր կողմից նույն եղանակով պատրաստված, 12.8 գրամ քաշով, մեկ հատ տղամարդու կեղծ ոսկյա մատանի` գրավատանը գրավադրելու համար: Ա.Ղազարյանը մի քանի ժամ անց գնացել է իրենց բնակարան, պատմել, որ գրավադրումը կատարել է Կոմիտասի փողոցի վրա գտնվող գրավատներից մեկում: Գրավադրումից ստացված 76.000 ՀՀ դրամ գումարը բաժանել են միմյանց միջև:
Դրանից հետո, 2010թ. մայիսի 27-ին, նախնական պայմանավորվածության համաձայն, Ա.Ղազարյանի հետ հանդիպել է Երևանի պետական բժշկական համալսարանի մոտ ու միասին գնացել Երևան քաղաքի Հր.Ներսիսյան փողոցի թիվ 1/124 հասցեում գտնվող ՙՄուսոյան ԱԱԱ՚ ՍՊԸ գրավատուն: Գրավատանը Ա.Ղազարյանը գրավադրել է իր կողմից պատրաստված 17.2 գրամ գրամ քաշով, խաչի տեսքով մեկ հատ կախազարդը: Գրավի դիմաց տրված 110.000 ՀՀ դրամ գումարը բաժանել են միմյանց միջև:
03.06.2010թ. հունիսի 03-ին, նախնական պայմանավորվածության համաձայն, Ա.Ղազարյանի հետ հանդիպել է Երևանի պետական բժշկական համալսարանի մոտ ու միասին նորից գնացել են Երևան քաղաքի Հր.Ներսիսյան փողոցի 1/124 հասցեում գտնվող ՙՄուսոյան ԱԱԱ՚ ՍՊԸ գրավատուն: Ճանապարհին ինքը Ա.Ղազարյանին է տվել իր պատրաստած 17.8 գրամ գրամ քաշով խաչի տեսքով մեկ հատ կախազարդը: Վերջինս այն գրավադրել է գրավատանը, որի դիմաց տրված 115.000 ՀՀ դրամը բաժանել են միմյանց միջև:
2010թ. մայիսի 1-ին Երևանի Կենտրոն համայնքում պատահական հանդիպել է իր վաղեմի ծանոթ Արմեն Գրիգորի Կիրակոսյանին: Զրույցի ընթացքում նրան ասել է, որ իբր պատքեր ունի և դրանք մարելու համար ստիպված իր ունեցած ոսկյա զարդերը պետք է գրավադրի գրավատանը: Ինքը խնդրել է Ա.Կիրակոսյանին նրա անձնագրով գրավադրումը կատարել` պատճառաբանելով, թե իբր իր անձնագիրը գտնվում է պարտատերերի մոտ, խոստանալով որոշ ժամանակ հետո գրավադրված ոսկյա զարդերը հանել գրավադրումից: Ա.Կիրակոսյանը համաձայնել է օգնել իրեն: 2010թ. մարտի 02-ին, Ա.Կիրակոսյանի հետ հանդիպել է Երևանի պետական բժշկական համալսարանի մոտ, միասին գնացել են Ա.Մանուկյան փողոցի թիվ 7 հասցեում գտնվող ՙՖաստ Կրեդիտ՚ ՍՊԸ-ին պատկանող գրավատուն: Գրավատան մուտքի մոտ ինքը գրավադրելու համար Ա.Կիրակոսյանին է տվել 64.6 գրամ ընդհանուր քաշով 2 հատ կեղծ ոսկյա շղթաներ, ասելով, որ չի ցանկանում ներս մտնել գրավատուն, քանի որ գրավատանը գրավադրված զարդեր ունի, որոնց տոկոսները չի կարողանում մարել: Ա.Կիրակոսյանն իր անձնագրով գրավադրել է վերը նշված 2 շղթաները, որոնց դիմաց ստացված 452.000 ՀՀ դրամ գումարն ամբողջությամբ տվել է իրեն:
Դրանից հետո, 2010թ. մայիսի 21-ին, Ա. Կիրակոսյանին հանդիպել է Մ.Խորենացի փողոցի 24 հասցեում գտնվող, ՙՎաղարշ և որդիներ՚ ՍՊԸ-ին պատկանող ոսկու շուկայի մոտ: Ոսկու շուկայի ներսում գործող ՙՖաստ Կրեդիտ՚ ՍՊԸ-ին պատկանող թիվ 3 գրավատանը գրավադրելու համար ինքը Ա.Կիրակոսյանին է տվել 13.7 գրամ քաշով մեկ հատ կեղծ ոսկյա մատանի ու նորից, նույն պատճառաբանությամբ, չի մտել գրավատուն: Ա.Կիրակոսյանն իր անձնագրով գրավադրել է վերը նշված զարդը, որի դիմաց ստացված 92.000 ՀՀ դրամ գումարը գրավատնից դուրս գալու հետո ամբողջությամբ տվել է իրեն:
2010թ. հունիսի 12-ին, զանգահարել ու խնդրել է Ա.Կիրակոսյանին մեկ անգամ էլ օգնել իրեն: Նրա հետ հանդիպել է Երևանի պետական մանկավարժական համալսարանի մոտ, որտեղից քայլելով գնացել են Երևանի Տ.Մեծի պողոտայի 6/1 հասցեում գտնվող ՙԻզի Կրեդիտ՚ ՍՊԸ-ին պատկանող գրավատուն: Ճանապարհին Հ.Ղազարյանն Ա.Կիրակոսյանին տվել է 12.4 գրամ քաշով մեկ հատ կեղծ ոսկյա խաչ և խնդրել միայնակ ներս մտնել գրավատուն և գրավադրել, կրկին ասելով, թե, իբր, պարտք է գրավատանը: Ա.Կիրակոսյանը չի մերժել իր խնդրանքը, իր անձնագրով գրավադրել է վերը նշված զարդը, որի դիմաց ստացված 83.000 ՀՀ դրամ գումարն ամբողջությամբ տվել է իրեն: Հ.Ղազարյանը նշել է, որ Ա.Կիրակոսյանին չի ասել զարդերի կեղծ լինելու մասին և կատարված գրավադրումների համար նրան ընդհանրապես գումար չի տվել:
Հարություն Ղազարյանը նաև նշել է, որ ինքը նպատակ չի ունեցել շարունակաբար նման կեղծ զարդեր պատրաստել և գրավադրել, այլ ամեն անգամ, երբ իրեն գումար է անհրաժեշտ եղել, այդ ժամանակ էլ որոշել, պատրաստել ու գրավադրել է դրանք:
Դատական քննության ընթացքում Հարություն Ղազարյանը ցուցմունք տվեց նաև, որ Արմանը Ղազարյանը, Մուշեղ Ղազարյանը և Արմեն Կիրակոսյանը չեն իմացել, որ զարդերը կեղծ են և նրանց հետ ինքը նախանական համաձայնություն չի ունեցել: Ինքը զարդերը տվել է նրանց, ովքեր դրանք գրավադրելուց հետո, փողը իրեն են տվել: Զղջում է կատարածի համար: Դրամական խնդիրներ է ունեցել, որի պատճառով նման քայլի է դիմել:
Առաջադրված մեղադրանքում Մուշեղ Կիմի Ղազարյանն իրեն մեղավոր ճանաչեց լիովին և հրաժարվելով ցուցմունք տալուց պնդեց նախնական քննության ընթացքում տված ցուցմունքը: Համաձայն այդ ցուցմունքի 2010թ. գարնան ընթացքում ինքքը նկատել է, որ իր որդի Հարություն Ղազարյանն իրենց բնակարանի փակ պատշգամբում տեղադրված ոսկերչական գործիքների օգնությամբ կեղծ զարդեր է պատրաստում: Հետագայում իմացել է, որ դրանք իր եղբոր որդու` Ա.Ղազարյանի հետ գրավադրել է գրավատներում: 2010թ. հունիս ամսին ինքն ունենալով նյութական խնդիրներ, որոշել է առանց որդուն տեղյակ պահելու վերցնել նրա կողմից պատրաստած զարդերից և գրավադնել գրավատանը: 2010թ. հունիսի 24-ին, առավոտյան, իրենց բնակարանում ինքն Արմանին պատմել է իր մտադրությամ մասին: Նրա հետ նախնական համաձայնության գալով վերցրել են Հ.Ղազարյանի կողմից պատրաստված 96.465 գրամ ընդհանուր քաշով խաչի տեսքով տասներկու հատ կեղծ ոսկյա կախազարդերը, գնացել Երևան քաղաքի Մ.Խորենացու փողոցի 24 հասցեում գտնվող ՙՖաստ Կրեդիտ՚ ՍՊԸ-ի թիվ 3 գրավատուն և չարաշահելով ՍՊԸ-ի աշխատակիցների վստահությունը, խաբեությամբ գրավադրել են դրանք ու ստանալով 640.000 ՀՀ դրամ, խարդախությամբ տիրացել են այդ գումարին:
Ամբաստանյալներ Հ.Ղազարյանի և Մ.Ղազարյանի հանցանքները հիմնավորվել է նաև գործով ձեռք բերված հետևյալ ապացույցներով.
Տուժողի ներկայացուցիչ, ՙՄուսոյան ԱԱԱ՚ ՍՊԸ-ի տնօրեն Լևոն Վիդոկի Մուսոյանի ցուցմունքով այն մասին, որ 2010թ. մայիսի 27-ին, ժամը 1930-ի սահմաններում, իրենց գրավատուն են գնացել երկու երիտասրդ տղաներ և ցանկություն հայտնել ոսկյա խաչ գրավադրել: Երիտասարդներից մեկն իրեն է տվել ոսկյա խաչը և ՙԱրման Ղազարյան՚ անուն անզգանունով անձնագիրը: Ինքը զննել և ստուգել է խաչը, ստուգումը ցույց է տվել, որ խաչը 585 հարգի ոսկուց է պատրաստված և ունի 17.2 գրամ քաշ: Այնուհետև ինքը խաչը վերցրել է որպես գրավ, կնքվել է վարկային պայմանագիր Արման Ղազարյանի անձնագրով և խաչի դիմաց տրվել է 110.000 ՀՀ դրամ գումար` ամսական 5590 ՀՀ դրամ տոկոսադրույքով: Վարկային պայմանագիրը կնքվել է մեկ ամիս ժամկետով: Լ.Մուսոյանը նշել է, որ թեպետ վերը նշված գրավադրման օրը գրավի առարկան իրեն կասկածելի է թվացել, սակայն ինքը ձեռնպահ է մնացել այն վնասելուց, քանի որ զարդը խաչ է եղել: Գրավադրումից մի քանի ամիս անց տեսնելով, որ Ա.Ղազարյանը չի մարում գրավի տոկոսները, որոշել է կրկին ստուգել գրավադրված խաչը, այս անգամ ստուգմամբ պարզվել է, որ խաչը ոսկյա չէ, այլ ընդամենը ոսկեջրված է: Գրավատան վարկային պայմանագրերը ստուգելով, պարզել է, որ Ա.Ղազարյանը 03.06.2010թ. իրենց գրավատանը 17.8 գրամ քաշով 585 հարգի ոսկուց պատրաստված խաչի տեսքով կախազարդ է գրավադրել, որի դիմաց ստացել է 115.000 ՀՀ դրամ գումար: Այդ խաչը ստուգել է և պարզել, որ այն նույնպես ոսկյա չէ, այլ ոսկեջրված է: Համոզվելով, որ Ա.Ղազարյանը խարդախ է, եկել է ոստիկանություն և հաղորդում տվել կատարվածի մասին: Լ.Մուսոյանը նշել է, որ կատարված խարդախությամբ իրենց գրավատանը պատճառվել է 225.000 ՀՀ դրամի գույքային վնաս:
Տուժողի ներկայացուցիչ, ՙԿարմեն՚ Ա/Կ գրավատան տնօրեն Աշոտ Հայկի Մուրադյանի նախնական քննության ընթացքում տված և դատաքննության ընթացքում հետազոտված ցուցմունքով այն մասին, որ 21.05.2010թ. ՙԿարմեն՚ Ա/Կ գրավատան և Արման Ղազարյանի միջև կնքվել է վարկային պակմանագիր, համաձայն որի Ա.Ղազարյանը գրավատանը գրավադրել է 585 հարգի ոսկուց պատրաստված 13.9 գրամ քաշով տղամարդու մատանի, որի դիմաց ստացել է 93.000 ՀՀ դրամ: Ընդհամենը երկու անգամ 19.06.2010թ-ին և 20.07.2010թ-ին վճարել է տոկոսագումար` յուրաքանչյուր անգամ 4740 ՀՀ դրամ, որից հետո այլևս վճարումներ չի կատարել: 30.10.2010թ. իրենց գրավատուն եկած ոստիկանության աշխատակցից իմացել է, որ Ա.Ղազարյանը կեղծ զարդեր է գրավադրել գրավատներում և հնարավոր է, որ իրենց գրավատանը գրավադրված զարդը նույնպես կեղծ լինի: 03.11.2010թ. փորձաքննություն կատարելու համար ինքը ոստիկանություն է ներկայացրել Ա.Ղազարյանի գրավադրած մեկ մատանին: Կատարված փորձաքննությամբ պարզվել է, որ Ա.Ղազարյանի կողմից իրենց գրավատանը գրավադրված տղամարդու մեկ մատանին ոսկյա չէ: Ա.Մուրադյանն իր ցուցմունքում նշել է, որ կատարված խարդախությամբ իրենց գրավատանը պատճառվել է 85.000 ՀՀ դրամի գույքային վնաս:
Տուժողի ներկայացուցիչ, ՙՖաստ Կրեդիտ՚ ՍՊԸ-ի թիվ 8 գրավատան մենեջեր Գալուստ Անակի Ավետիսյանի ցուցմունքով այն մասին, որ 28.04.2010թ. Արման Ղազարյանը Երևան քաղաքի Ա.Մանուկյան փողոցի թիվ 7 հասցեում գտնվող ՙՖաստ Կրեդիտ՚ ՍՊԸ-ին պատկանող թիվ 8 գրավատանը գրավադրել է 62.8 գրամ ընդհանուր քաշով թվով 3 հատ 583 հարգի ոսկուց պատրաստված շղթա, որոնց դիմաց ստացել է 439.000 ՀՀ դրամ գումար: 02.05.2010թ. Արմեն Կիրակոսյանը նույն գրավատանը գրավադրել է 2 շղթա, որոնց համար առանձին վարկային պայմանագրեր են կնքվել: Շղթաներից մեկը եղել է 34.6 գրամ քաշի, որի դիմաց որպես վարկ տրվել է 241.000 ՀՀ դրամ գումար, իսկ մյուսը` 30 գրամ քաշի, որի դիմաց որպես վարկ տրվել է 209.000 ՀՀ դրամ գումար: 21.05.2010թ. Արմեն Կիրակոսյանը Երևան քաղաքի Մ.Խորենացի փողոցի 24 հասցեում գտնվող ՙՖաստ Կրեդիտ՚ ՍՊԸ-ի թիվ 3 գրավատանը գրավադրել է մեկ հատ մատանի 13.7 գրամ քաշի, որի դիմաց ստացել է 92.000 ՀՀ դրամ գումար: 24.06.2010թ. Մուշեղ Ղազարյանը Երևան քաղաքի Մ.Խորենացի փողոցի թիվ 24 հասցեում գտնվող ՙՖաստ Կրեդիտ՚ ՍՊԸ-ի թիվ 3 գրավատանը գրավադրել է 96 գրամ ընդհանուր քաշով խաչի տեսքով տասներկու հատ կախազարդեր ու դրանց դիմաց ստացել 640.000 ՀՀ դրամ գումար: Գ.Ավետիսյանը նշել է, որ ոստիկանությունից տեղեկացել է վերը նշված զարդերի կեղծ լինելու մասին: Ա.Ղազարյանի, Մ.Ղազարյանի և Ա.Կիրակոսյանի կողմից կատարված գրավադրումներով իրենց ՍՊԸ-ին պատճառվել է 1.621.000 ՀՀ դրամի գույքային վնաս: Նշված վնասից 310.000 ՀՀ դրամը վերականգնվել է մյուս ամբաստանյալ Արման Ղազարյանի վերաբերյալ սույն քրեական գործից անջատված քրեական գործի դատաքննության ընթացքում, իսկ 129.000 դրամի բռնագանձման վերաբերյալ նշված քրեական գործով դատավճիռ է կայացվել:
Տուժողի ներկայացուցիչ, ՙՊրոֆֆինանս՚ ՓԲԸ-ի տնօրեն Էդգար Աշոտի Մալխասյանի նախնական քննության ընթացքում տված և դատաքննության ընթացքում հետազոտված ցուցմունքով այն մասին, որ 24.05.2010թ. Արման Մամիկոնի Ղազարյանը Երևան քաղաքի Կոմիտասի պողոտայի թիվ 12 հասցեում գտնվող ՙՊրոֆֆինանս՚ ՓԲԸ-ին պատկանող իրենց գրավատանը գրավադրել է 12.8 գրամ քաշով, 8.000 ՀՀ դրամ արժողությամբ մեկ հատ տղամարդու կեղծ ոսկյա մատանի, որի դիմաց ստացել է 76.000 ՀՀ դրամ գումար: Է.Մալխասյանը նշել է, որ կատարված խարդախությամբ իրենց ՙՊրոֆֆինանս՚ ՓԲԸ-ին պատճառվել է 68.000 ՀՀ դրամի գույքային վնաս և ներկայացրել նույքան գումարի քաղ. հայցի պահանջ:
Տուժող ՙԻզի Կրեդիտ՚ ՍՊԸ-ի ներկայացուցիչ Արկադի Նորիկի Հովհաննիսյանի նախնական քննության ընթացքում տված և դատաքննության ընթացքում հետազոտված ցուցմունքով այն մասին, որ 12.06.2010թ. Արմեն Գրիգորի Կիրակոսյանը ՙԻզի Կրեդիտ՚ ՍՊԸ-ին պատկանող Երևան քաղաքի Տ.Մեծի պողոտայի 6/1 հասցեում գտնվող գրավատանը գրավադրել է 12.4 գրամ քաշով մեկ հատ կեղծ ոսկյա խաչ, որի դիմաց ստացել է 83.000 ՀՀ դրամ գումար: Ա.Հովհաննիսյանն իր ցուցմունքում նշել է, որ չնայած վերը նշված գրավադրմամբ գրավատանը պատճառվել է 83.000 ՀՀ դրամի գույքային վնաս, սակայն իրենք քաղ. հայցի պահանջ չունեն: Ա.Հովհաննիսյանը նշել է նաև, որ ինչպես ինքը, այնպես էլ ՙԻզի Կրեդիտ՚ ՍՊԸ-ին պատկանող գրավատան աշխատակիցները Ա.Կիրակոսյանին չեն ճանաչում:
Վկա, ՙՄուսոյան ԱԱԱ՚ ՍՊԸ գրավատան ոսկերիչ-գնահատող Գագիկ Արտուշի Մելքոնյանի նախնական քննության ընթացքում տված և դատաքննության ընթացքում հետազոտված ցուցմունքով այն մասին, որ 03.06.2010թ., ժամը 1600-ի սահմաններում, իրենց գրավատուն են եկել երկու երիտասարդներ և ցանկացել գրավադրել ոսկյա խաչ: Երիտասարդները, որոնց խոսակցութոյունից ինքը հասկացել է, որ նրանք ազգականներ են, իրեն ստուգման համար տվել են խաչ, որը թեպետ իր մոտ կասկած է առաջացրել, սակայն ստուգումը ցույց է տվել, որ այն ոսկյա է: Երիտասարդները գրավադրել են այդ խաչը և հեռացել: 2010թ. սեպտեմբերի սկսզբին գրավատան տնօրեն Լ.Մուսոյանը հայտնաբերել է, որ Արման Ղազարյան անուն ազգանունով ինչ-որ մի անձնավորություն իրենց գրավատանը 27.05.2010թ. գրավադրել է 17.2 գրամ քաշով կեղծ ոսկյա խաչ, որի դիմաց ստացել է 110.000 ՀՀ դրամ գումար: Գրավատան վարկային պայմանագրերի ստուգմամբ, պարզվել է, որ բացի վերը նշված դեպքից, 03.06.2010թ. Արման Ղազարյանի կողմից գրավատանը գրավադրվել է ևս մեկ կեղծ ոսկյա խաչ: Ինքը անմիջապես հասկացել է, որ դա վերը նշված երկու երիտասարդների կողմից կատարված գրավադրում է եղել ու երիտասարդերից մեկը եղել է հենց Ա.Ղազարյանը: Հետագայում ինքը իմացել է, որ 03.06.2010թ. Ա.Ղազարյանի հետ իրենց գրավատուն եկած մյուս երիտասարդը եղել է նրա հորեղբոր որդին` Հարություն Ղազարյանը: Գ.Մելքոնյանն իր ցուցմունքում նշել է նաև, որ թե Ա.Ղազարյանին և թե Հ.Ղազարյանին ինքը չի ճանաչում:
Վկա Մամիկոն Կիմի Ղազարյանն օգտվելով իր իրավունքից, հրաժարվեց իր եղբոր դեմ ցուցմունք տալուց և պնդեց նախաքննության ընթացքում տված ցուցմունքը: Համաձայն այդ ցուցմունքի 2010թ. սեպտեմբեր ամսին նկատել է, որ իրենց` Երևան քաղաքի Լազոյի փողոցի 6 շենքի 45 բնակարանի հասցեով իր որդու` Արման Ղազարյանի անունով գրավատներից գրություններ են գալիս: Որդուն հարցրել է, թե ինչ զարդեր է վերջինս գրավադրել գրավատներում և ինչու են նման գրություններ գրավատներից գալիս: Ա.Ղազարյանն անկեղծորեն խոստովանել է, որ գրավադրված զարդերը կեղծ են և որ այդ զարդերը գրավատներում գրավադրել է իր եղբոր որդի Հ.Ղազարյանի հետ միասին:
Վկա Արև Գեորգիի Գաբրիելյանն օգտվելով իր իրավունքից, հրաժարվեց իր որդու և ամուսնու դեմ ցուցմունք տալուց և պնդեց նախաքննության ընթացքում տված ցուցմունքը: Համաձայն այդ ցուցմունքի ինքն ամուսնու` Մուշեղ Ղազարյանի, որդու` Հարություն Ղազարյանի և անչափահաս աղջկա հետ վարձով բնակվում են Երևան քաղաքի Նոր Նորքի 7-րդ զանգվածի 28 շենքի 3 բնակարանում: 2010թ. գարնանը նկատել է, որ որդին` Հ.Ղազարյանը բնակարանի փակ պատշգամբում տեղադրված ոսկերչական գործիքների միջոցով պատրաստում է զարդեր և կարծել է, թե որդին պատվիրված ոսկյա զարդեր է պատրաստում: 2010թ. սեպտեմբեր ամսին իմացել է, որ իր ամուսնու եղբոր որդին` Ա.Ղազարյանը կեղծ ոսկյա զարդեր է գրավադրել գրավատներում: Հետագայում որդուց` Հարությունից, ավելի մանրամասն իմացել է, որ Արմանի կողմից գրավատներում գրավադրված զարդերը պայմանավորվածության համաձայն պատրաստել է Հարությունը, որոնք կեղծ են եղել: Այնուհետև այդ զարդերն Արմանի անձնագրով գրավադրել գրավատներում և ստացված գումարը բաժանել միմյանց միջև: Տեղեկացել է նաև ամուսնու` Մ.Ղազարյանի կողմից գրավատանը կեղծ ոսկյա խաչեր գրավադրելու մասին: Ա.Գաբրիելյանը խնդրել է ներել իր որդուն և ամուսնուն կատարած խարդախությունների համար և նրանց նկատմամբ կիրառել հնարավորինս մեղմ պատիժ:
Վկա Արմեն Գրիգորի Կիրակոսյանի նախնական քննության ընթացքում տված և դատական քննության ընթացքում հետազոտված ցուցմունքով այն մասին, որ 2010թ. մայիսի 1-ին, ՙբաղնիք՚ կոչվող ոսկու շուկայի մոտ հանդիպել է իր ծանոթ Հարություն Ղազարյանին: Զրույցի ընթացքում վերջինս ասել է, որ պատքեր ունի կուտակված և դրանք մարելու համար ստիպված իր ունեցած ոսկյա զարդերը պետք է գրավադրի գրավատնում: Խնդրել է գրավադրումը կատարել իր անձնագրով, պատճառաբանելով, թե իբր նրա անձնագիրը գտնվում է պարտատերերի մոտ և խոստացել որոշ ժամանակ հետո գրավադրված ոսկյա զարդերը հանել գրավադրումից: Ինքը համաձայնել է և 02.05.2010թ., Ա.Մանուկյան փողոցի 7 հասցեում գտնվող ՙՖաստ Կրեդիտ՚ ՍՊԸ-ի գրավատանը գրավադրել է 2 հատ ոսկյա շղթաներ, որոնց դիմաց ստանալով 452.000 ՀՀ դրամ գումար, տվել է Հ.Ղազայանին:
Դրանից հետո, 21.05.2010թ., ՙՖաստ Կրեդիտ՚ ՍՊԸ-ին պատկանող Երևան քաղաքի Մ.Խորենացու փողոցի 24 հասցեում գտնվող գրավատանը գրավադրել է մեկ հատ ոսկյա մատանի, որի դիմաց ստացված 92.000 ՀՀ դրամ գումարն ամբողջությամբ տվել է Հ.Ղազարյանին: 12.06.2010թ. Երևանի Տ.Մեծի պողոտայի 6/1 հասցեում գտնվող ՙԻզի Կրեդիտ՚ ՍՊԸ գրավատանը գրավադրել է մեկ հատ ոսկյա խաչ, որի դիմաց ստացված 83.000 ՀՀ դրամ գումարը նույնպես ամբողջությամբ տվել է Հ.Ղազարյանին: Ա.Կիրակոսյանը նշել է նաև, որ չի իմացել Հ.Ղազարյանի խնդրանքով իր կողմից գրավատներում գրավադրված զարդերի կեղծ լինելու մասին, հակառակ դեպքում այդ զարդերը երբևիցէ չէր գրավադրի:
Ամբաստանյալի կատարած հանցանքը հիմնավորվել է նաև գործով ձեռք բերված հետևյալ ապացույցներով.
Խուզարկության արձանագրությունով, համաձայն որի Երևան քաղաքի Լազոյի փողոցի 6 շենքի 45 բնակարանի խուզարկությամբ հայտնաբերվել և առգրավվել է Ա.Ղազարյանի կողմից տարբեր գրավատներում ոսկյա զարդերի գրավադրումը վկայող թվով 5 հատ գրություններ` իրենց ծրարներով, ՙՊրոֆֆինանս՚ ՓԲԸ-ի կողմից 16.07.2010թ. Երևան քաղաքի Լազոյի փողոցի 6 շենքի 45 բնակարանում բնակվող Արման Ղազարյանին հասցեագրված բռնագանձման ծանուցումը, մեկ հատ գրավատոմս` թիվ 148, մեկ հատ տետր և աշակերտական տետրի մեկ թերթ, դրանք զննելու արձանագրությամբ, որպես ապացույց ճանաչելու և քրեական գործին կցելու մասին որոշմամբ:
Խուզարկության արձանագրությունով, համաձայն որի Երևան քաղաքի Նոր Նորքի 7-րդ զանգվածի 28 շենքի 3 բնակարանի խուզարկությամբ հայտնաբերվել և առգրավվել է մեկ հատ փուքս, մեկ հատ ոսկերչական կրակայրիչ, մեկ հատ ՙբոռ մեքենա՚, մեկ հատ ոսկերչական գործիք ֆիլեր, 12 փաթույթ մետաղյա թիթեղներ, լատունե թիթեղ, 12 հատ ոսկու պիտակներ, մեկ հատ շղթա, մեկ հատ ժապավենի սև տուփ` մեջը մետաղյա թիթեղներ, մեկ հատ ժապավենի սպիտակ տուփ, որի մեջ լցված են մեղատյա կլոր կտորներ և վերը թվարկվածը զննելու արձանագրությամբ:
Նշանակված մետաղագիտական և ապրանքագիտական համալիր փորձաքննության 32271004 եզրակացությամբ, համաձայն որի փորձաքննության ներկայացված, Հ.Ղազարյանի ու Ա.Ղազարյանի կողմից 27.05.2010թ. և 03.06.2010թ. ՙՄուսոյան ԱԱԱ՚ ՍՊԸ գրավատանը գրավադրված, 17.831գ և 17.246գ կշիռներով երկու կախազարդերը պատրաստված են պղնձի համաձուլվածքից` լատունից և պատված են ոսկու շերտով, իսկ կախազարդերի օղակաձև կախիչները պատրաստված են 583 հարգի ոսկու համաձուլվածքից: Կախազարդերի ընդհանուր շուկայական արժեքը 2010թ. մայիսի 27- և հունիսի 03-ի դրությամբ կարող էր կազմել 20.000 ՀՀ դրամ:
Նշանակված մետաղագիտական և ապրանքագիտական համալիր փորձաքննության 36261004 եզրակացությամբ, համաձայն որի`
Փորձաքննության ներկայացված դեղին գույնի մետաղից պատրաստված մեկ հատ շղթան` փականով, պատրաստված է ոչ թանկարժեք մետաղների համաձուլվածքից: Շղթայի փականը պատրաստված է 583 հարգի ոսկու համաձուլվածքից: Շղթայի կշիռը կազմում է 29.850 գրամ:
Փորձաքննության ներկայացված թվով 12 կախազարդերը պատրաստված են 916 հարգի արծաթի համաձուլվածքից: Բոլոր քարերը հանդիսանում են ցիրկոններ: Կախազարդերի բոլոր կախիչները պատրաստված են 583 հարգի ոսկու համաձուլվածքից: Կախազարդերի ընդհանուր կշիռը կազմում է 96.465 գրամ:
Փորձաքննության ներկայացված դեղին գույնի մետաղից պատրաստված մեկ հատ շղթան` փականով, պատրաստված է ոչ թանկարժեք մետաղների համաձուլվածքից: Շղթայի փականը պատրաստված է 583 հարգի ոսկու համաձուլվածքից: Շղթայի կշիռը կազմում է 34.427 գրամ:
Փորձաքննության ներկայացված դեղին գույնի մետաղից պատրաստված մեկ հատ մատանին, պատրաստված է ոչ թանկարժեք մետաղների համաձուլվածքից: Մատանու կշիռը կազմում է 13.622 գրամ:
Փորձաքննության ներկայացված դեղին գույնի մետաղից պատրաստված երեք հատ շղթան` փականով, պատրաստված են ոչ թանկարժեք մետաղների համաձուլվածքից: Շղթաների փականը պատրաստված է 583 հարգի ոսկու համաձուլվածքից: Շղթաների կշիռը կազմում է 62.737 գրամ:
Նշանակված մետաղագիտական և ապրանքագիտական համալիր փորձաքննության 39321004 եզրակացությամբ, համաձայն որի փորձաքննության ներկայացված, Ա.Ղազարյանի կողմից 24.05.2010թ. ՙՊրոֆֆինանս՚ ՓԲԸ-ին պատկանող գրավատանը և 21.05.2010թ. ՙԿարմեն՚ Ա/Կ գրավատանը գրավադրված մատանիներն ունեն համապատասխանաբար 12.835 գրամ և 13.812 գրամ քաշեր և պատրաստված են ոչ թանկարժեք մետաղների համաձուլվածքից:
Նշանակված մետաղագիտական և ապրանքագիտական համալիր փորձաքննության 42671004 եզրակացությամբ, համաձայն որի փորձաքննության ներկայացված, Ա.Կիրակոսյանի կողմից 12.06.2010թ. ՙԻզի Կրեդիտ՚ ՍՊԸ-ին պատկանող գրավատանը գրավադրված կախազարդն ունի 12.389 գրամ քաշ, պատրաստված է 916 հարգի արծաթի համաձուլվածքից և պատված է ոսկու շերտով: Կախազարդի կախիչը պատրաստված է 583 հարգի ոսկու համաձուլվածքից:
Քննչական փորձարարություն կատարելու արձանագրությամբ, համաձայն որի Հ.Ղազարյանը քննչական փորձարարության ընթացքում մատնացույց է արել այն գրավատները, որտեղ գրավադրում է կատարել:
18.01.2011թ. Հ.Ղազարյանի Երևան քաղաքի Նոր Նորքի 7-րդ զանգվածի 28 շենքի 3 բնակարանի խուզարկության ժամանակ հայտնաբերված և առգրավված 12 փաթույթ մետաղյա թիթեղները, մեկ հատ լատունե թիթեղը, մեկ հատ շղթան, ժապավենի սև տուփի մեջ լցված մետաղյա կտորները` քառակուսի և ուղանկյուն կտրված, ժապավենի սպիտակ տուփի մեջ լցված դեղին, մետաղյա օղակաձև կտորները, մեկ հատ ՙբոռ մեքենան՚, մեկ հատ ոսկերչական գործիք ֆիլերը, մեկ հատ փուքսը, մեկ հատ ոսկերչական կրակայրիչը, Մուշեղ Ղազարյանի կողմից ՙՖաստ Կրեդիտ՚ ՍՊԸ-ին պատկանող գրավատանը գրավադրած 12 կախազարդերը, Արման Ղազարյանի կողմից ՙՄուսոյան ԱԱԱ՚ ՍՊԸ գրավատանը գրավադրված 2 կախազարդերը, Ա/Կ ՙԿարմեն՚ և ՙՊրոֆֆինանս՚ ՓԲԸ-ի գրավատներում գրավադրած թվով 2 տղամարդու մատանիները, ՙՖաստ Կրեդիտ՚ ՍՊԸ-ին պատկանող գրավատանը գրավադրված թվով 3 շղթաները, Արմեն Կիրակոսյանի անձնագրով ՙՖաստ Կրեդիտ՚ ՍՊԸ-ին պատկանող գրավատանը գրավադրած 2 շղթաները և 1 տղամարդու մատանին, ՙԻզի Կրեդիտ՚ ՍՊԸ գրավատանը գրավադրած 1 կախազարդը իրեղեն ապացույցներ ճանաչելու որոշումներով:
Այլ փաստաթուղթ հանդիսացող թիվ 174, 209, 1439, 1435, 1-13970, 35702, 35847, 25893, 251 և 210 վարկային պայմանագրերը ապացույց ճանաչելու և քրեական գործին կցելու որոշմամբ:
Այլ փաստաթուղթ հանդիսացող` Ա.Ղազարյանի կողմից տարբեր գրավատներում ոսկյա զարդերի գրավադրումը վկայող թվով 5 հատ գրություններ` իրենց ծրարներով, ՙՊրոֆֆինանս՚ ՓԲԸ-ի կողմից 16.07.2010թ. Երևան քաղաքի Լազոյի փողոցի 6 շենքի 45 բնակարանում բնակվող Արման Ղազարյանին հասցեագրված բռնագանձման ծանուցումը, մեկ հատ գրավատոմսը /թիվ 148/, մեկ հատ տետրը և աշակերտական տետրի մեկ թերթը ապացույց ճանաչելու և քրեական գործին կցելու որոշմամբ:
Դատարանի 2011թ. հունիսի 27-ի որոշմամբ նշանակված լրացուցիչ մետաղագիտական և ապրանքագիտական համալիր փորձաքննության թիվ 24901104 եզրակացության համաձայն, փորձաքննությանը ներկայացված զարդերում առկա թանկարժեք մետաղների ընդհանուր շուկայական արժեքը, փորձաքննության կատարման ժամանակահատվածի դրությամբ կարող է կազմել մեկ միլիոն երկու հարյուր ութսունութ հազար երկու հարյուր ութսուն (1.288.280) ՀՀ դրամ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
ՙՀՀ քրեական օրենսգրքում փոփոխություններ և լրացումներ կատարելու մասին՚ 2011 թվականի մայիսի 23-ի ՀՀ օրենքի 17-րդ հոդվածի համաձայն` ՀՀ քրեական օրենսգրքի 178 հոդվածի 2-րդ մասի 3-րդ կետը ճանաչվել է ուժը կորցրած:
ՀՀ քրեական օրենսգրքի 13-րդ հոդվածի 1-ին մասի համաձայն, արարքի հանցավորությունը վերացնող, պատիժը մեղմացնող կամ հանցանք կատարած անձի վիճակն այլ կերպ բարելավող օրենքը հետադարձ ուժ ունի, այսինքն` տարածվում է մինչև այդ օրենքն ուժի մեջ մտնելը համապատասխան արարք կատարած անձանց, այդ թվում` այն անձանց վրա, ովքեր կրում են պատիժը կամ կրել են դա, սակայն ունեն դատվածություն:
Նկատի ունենալով, որ ՀՀ քրեական օրենսգրքի 178 հոդվածի 2-րդ մասի 3-րդ կետով նախատեսված արարքի հանցավորությունը վերացվել է, քրեական գործով մեղադրանքը պաշտպանող դատախազը մեղադրական ճառում հրաժարվեց Հարություն Մուշեղի Ղազարյանին ՀՀ քրեական օրենսգրքի 178 հոդվածի 2-րդ մասի 3-ին կետով առաջադրված մեղադրանքից:
Դատարանը հետազոտելով ձեռք բերված ապացույցներն իրենց համակցությամբ, գտնում է, որ ամբաստանյալ Հարություն Մուշեղի Ղազարյանին առաջադրված մեղադրանքը ՀՀ քրեական օրենսգրքի 178 հոդվածի 2-րդ մասի 1-ին կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 178 հոդվածի 2-րդ մասի 1-ին կետի հատկանիշներին և արարքի որակումը ճիշտ է:
Ամբաստանյալ Մուշեղ Կիմի Ղազարյանին առաջադրված մեղադրանքը ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերի հատկանիշներին և արարքի որակումը ճիշտ է:
Ամբաստանյալներ Հարություն Մուշեղի Ղազարյանի, Մուշեղ Կիմի Ղազարյանի նկատմամբ պատիժ նշանակելիս, դատարանը հաշվի է առնում նրանց կատարած արարքների հանրության համար վտանգավորության աստիճանը, ինչպես նաև հանցավորների անձը:
Որպես ամբաստանյալ Հարություն Մուշեղի Ղազարյանի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել:
Ամբաստանյալ Հարություն Մուշեղի Ղազարյանի պատասխանատվությունը և պատիժը ծանրացնող հանգամանքներ չկան:
Որպես ամբաստանյալ Մուշեղ Կիմի Ղազարյանի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, խնամքին է գտնվում անչափահաս դուստրը:
Ամբաստանյալ Մուշեղ Կիմի Ղազարյանի պատասխանատվությունը և պատիժը ծանրացնող հանգամանքներ չկան:
Կատարած արարքների համար ամբաստանյալներ Հարություն Մուշեղի Ղազարյանը, Մուշեղ Կիմի Ղազարյանը ենթակա են քրեական պատասխանատվության և պատժի:
Հաշվի առնելով Հարություն Մուշեղի Ղազարյանի և Մուշեղ Կիմի Ղազարյանի կատարած արարքների հանրության համար վտանգավորության աստիճանը և բնույթը, նրանց անձը, նրանց դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 178 հոդվածի 2-րդ մասի սանկցիայով նախատեսված է պատիժ նաև ազատազրկման ձևով, դատարանը գտնում է, որ պատժի նպատակներին հասնելու համար Հարություն Ղազարյանի նկատմամբ ՀՀ քրեական օրենսգրքի 178 հոդվածի 2-րդ մասի 1-ին կետով, Մուշեղ Ղազարյանի նկատմամբ ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով, նախատեսված արարք կատարելու համար պատիժներ պետք է նշանակել ազատազրկման ձևով:
ՀՀ Ազգային ժողովի 2011 թվականի մայիսի 26-ի ՙՀամաներում հայտարարելու մասին՚ որոշման 15-րդ կետի համաձայն, ՙՀամաներում հայտարարելու մասին՚ որոշումը կիրառվում է այն անձանց նկատմամբ, ովքեր հանցագործություն են կատարել մինչև 2011 թվականի մայիսի 1-ը ներառյալ: Հարություն և Մուշեղ Ղազարյանները հանրորեն վտանգավոր վերջին արարքը կատարել են 2010 թվականի հունիսին:
Սույն քրեական գործով բացակայում են համաներման մասին հիշյալ որոշման 9-րդ կետում նշված այն սահմանափակումները, որոնք կարող են արգելք հանդիսանալ Հարություն և Մուշեղ Ղազարյանների նկատմամբ համաներման ակտի կիրառման համար:
Հիմք ընդունելով վերը նշվածը, դատարանը գտնում է, որ ամբաստանյալներ Հարություն և Մուշեղ Ղազարյանների նկատմամբ կիրառելի է ՀՀ Ազգային Ժողովի 2011 թվականի մայիսի 26-ի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ որոշումը:
Դատարանը գտնում է, որ Հարություն Մուշեղի Ղազարյանի և Մուշեղ Կիմի Ղազարյանի դեմ ներկայացված տուժող ՙՖաստ Կրեդիտ՚ ՍՊԸ ներկայացուցիչ Գալուստ Ավետիսյանի 1.182.000 ՀՀ դրամ գումարի քաղաքացիական հայցի հարցը պետք է համարել լուծված, նկատի ունենալով, որ դատական նիստի ժամանակ Գ.Ավետիսյանի խնդրանքով ՙՖաստ Կրեդիտ՚ ՍՊ ընկերությանն է հատկացվել քրեական գործով իրեղեն ապացույց ճանաչված, փորձագետների կողմից 1.288.280 ՀՀ դրամ գնահատված ոսկերչական զարդերը և ձուլակտորները, հայտնելով նաև, որ ամբաստանյալների նկատմամբ որևէ պահանջ չունեն:
Սույն քրեական գործով տուժող ՙՊրոֆֆինանս՚ ՓԲ ընկերության ներկայացուցիչ Էդգար Մալխասյանը ներկայացրել է քաղաքացիական հայց` ամբաստանյալից պահանջելով հանցագործությամբ պատճառված վնասը` 68.000 ՀՀ դրամը: ՀՀ քրեական դատավարության օրենսգրքի 308 հոդվածի 2-րդ մասի համաձայն` քաղաքացիական հայցվորի չներկայանալու դեպքում դատարանը քաղաքացիական հայցը թողնում է առանց քննության` քաղաքացիական հայցվորին իրավունք վերապահելով հայց հարուցել քաղաքացիական դատավարության կարգով։ Քանի որ քաղաքացիական հայցվոր Էդգար Մալխասյանը չի ներկայացել դատական նիստին և չի միջնորդել քաղաքացիական հայցը քննարկել իր բացակայությամբ, ուստի դատարանը գտնում է, որ նրա ներկայացրած քաղաքացիական հայցը պետք է թողնել առանց քննության և նրան իրավունք վերապահել քաղաքացիական հայց ներկայացնել քաղաքացիական դատավարության կարգով:
Դատարանը գտնում է, որ տուժողներ ՙԿարմեն՚ Ա/Կ, ՙՄուսոյան ԱԱԱ՚ ՍՊԸ քաղաքացիական հայցերի հարցը պետք է համարել լուծված, քանի որ պատճառված նյութական վնասները մյուս քրեական գործով ամբաստանյալ Արման Ղազարյանի կողմից վերականգնվել են:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց ճանաչված և թիվ 09120710 քրեական գործին կցված`
18.01.2011թ. Հ.Ղազարյանի Երևան քաղաքի Նոր Նորքի 7-րդ զանգվածի 28 շենքի 3 բնակարանի խուզարկության ժամանակ հայտնաբերված և առգրավված 12 փաթույթ մետաղյա թիթեղները, մեկ հատ լատունե թիթեղը, մեկ հատ շղթան, ժապավենի սև տուփի մեջ լցված մետաղյա կտորները՝ քառակուսի և ուղանկյուն կտրված, ժապավենի սպիտակ տուփի մեջ լցված դեղին, մետաղյա օղակաձև կտորները, մեկ հատ ՙբոռ մեքենան՚, մեկ հատ ոսկերչական գործիք ֆիլերը, մեկ հատ փուքսը, մեկ հատ ոսկերչական կրակայրիչը պետք է ոչնչացնել:
Իրեղեն ապացույց հանդիսացող Մուշեղ Ղազարյանի կողմից ՙՖաստ Կրեդիտ՚ ՍՊԸ-ին պատկանող գրավատանը գրավադրած 12 կախազարդերը, Արման Ղազարյանի կողմից ՙՄուսոյան ԱԱԱ՚ ՍՊԸ գրավատանը գրավադրված 2 կախազարդերը, Ա/Կ ՙԿարմեն՚ և ՙՊրոֆֆինանս՚ ԲԲԸ-ի գրավատներում գրավադրած տղամարդու թվով 2 մատանիներր, ՙՖաստ Կրեդիտ՚ ՍՊԸ-ին պատկանող գրավատանը գրավադրված թվով 3 շղթաները, Արմեն Կիրակոսյանի անձնագրով ՙՖաստ Կրեդիտ՚ ՍՊԸ-ին պատկանող գրավատանը գրավադրած 2 շղթաները և 1 տղամարդու մատանին, ՙԻզի Կրեդիտ՚ ՍՊԸ գրավատանը գրավադրած 1 կախազարդը, դատարանի որոշման համաձայն փորձագետների կողմից փորձաքննություն կատարելու ընթացքում ձուլվել են և գնահատվել 1.288.280 ՀՀ դրամ:
Նկատի ունենալով, որ ՙՖաստ Կրեդիտ՚ ՍՊԸ-ի ներկայացուցիչ Գալուստ Ավետիսյանը գործի դատաքննության ընթացքում նշված ոսկերչական զարդերը և ձուլակտորները ստացել է պատճառված նյութական վնասի դիմաց, դատարանը գտնում է, որ իրեղեն ապացույցների տնօրինման հարցը պետք է համարել լուծված:
Ապացույց ճանաչված այլ փաստաթուղթ հանդիսացող` Ա.Ղազարյանի կողմից տարբեր գրավատներում ոսկյա զարդերի գրավադրումը վկայող թվով 5 հատ գրություններ` իրենց ծրարներով, ՙՊրոֆֆինանս՚ ՓԲԸ-ի կողմից 16.07.2010թ. Երևան քաղաքի Լազոյի փողոցի 6 շենքի 45 բնակարանում բնակվող Արման Ղազարյանին հասցեագրված բռնագանձման ծանուցումը, մեկ հատ գրավատոմսը /թիվ 148/, մեկ հատ տետրը և աշակերտական տետրի մեկ թերթը պետք է պահել քրեական գործի հետ միասին:
Ապացույց ճանաչված այլ փաստաթուղթ հանդիսացող թիվ 174, 209, 1439, 1435, 1-13970, 35702, 35847, 25893, 251 և 210 վարկային պայմանագրերը պետք է պահել քրեական գործի հետ միասին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Հարություն Մուշեղի Ղազարյանին մեղավոր ճանաչել ՀՀ քրեական օրենսգրքի 178 հոդվածի 2-րդ մասի 1-ին կետով և նրան դատապարտել ազատազրկման երեք (3) տարի ժամկետով:
Կիրառել ՀՀ Ազգային Ժողովի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ 2011 թվականի մայիսի 26-ի որոշման 1-ին կետի 1-ին ենթակետը և Հարություն Մուշեղի Ղազարյանին ազատել պատժի կրումից:
Հարություն Մուշեղի Ղազարյանի նկատմամբ ընտրված խափանման միջոցը` կալանավորումը, վերացնել:
Հարություն Մուշեղի Ղազարյանին անհապաղ ազատել կալանքից:
Մուշեղ Կիմի Ղազարյանին մեղավոր ճանաչել ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով և նրան դատապարտել ազատազրկման երկու (2) տարի վեց (6) ամիս ժամկետով:
Կիրառել ՀՀ Ազգային Ժողովի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ 2011 թվականի մայիսի 26-ի որոշման 1-ին կետի 1-ին ենթակետը և Մուշեղ Կիմի Ղազարյանին ազատել պատժի կրումից:
Մուշեղ Կիմի Ղազարյանի նկատմամբ ընտրված խափանման միջոցը` կալանավորումը, վերացնել:
Մուշեղ Կիմի Ղազարյանին անհապաղ ազատել կալանքից:
Տուժող ՙՊրոֆֆինանս՚ ՓԲԸ ներկայացուցիչ Էդգար Մալխասյանին քաղաքացիական դատավարության կարգով քաղաքացիական հայց ներկայացնելու իրավունք վերապահել:
Տուժող ՙՖաստ Կրեդիտ՚ ՍՊԸ-ի ներկայացուցիչ Գալուստ Ավետիսյանի և տուժողներ ՙԿարմեն՚ Ա/Կ և ՙՄուսոյան ԱԱԱ՚ ՍՊ ընկերության քաղաքացիական հայցերի հարցը համարել լուծված:
Իրեղեն ապացույց հանդիսացող 18.01.2011թ. Հ.Ղազարյանի Երևան քաղաքի Նոր Նորքի 7-րդ զանգվածի 28 շենքի 3 բնակարանի խուզարկության ժամանակ հայտնաբերված և առգրավված 12 փաթույթ մետաղյա թիթեղները, մեկ հատ լատունե թիթեղը, մեկ հատ շղթան, ժապավենի սև տուփի մեջ լցված մետաղյա կտորները՝ քառակուսի և ուղանկյուն կտրված, ժապավենի սպիտակ տուփի մեջ լցված դեղին, մետաղյա օղակաձև կտորները, մեկ հատ ՙբոռ մեքենան՚, մեկ հատ ոսկերչական գործիք ֆիլերը, մեկ հատ փուքսը, մեկ հատ ոսկերչական կրակայրիչը ոչնչացնել:
Ապացույց ճանաչված այլ փաստաթուղթ հանդիսացող թիվ 174, 209, 1439, 1435, 1-13970, 35702, 35847, 25893, 251 և 210 վարկային պայմանագրերը պահել քրեական գործի հետ միասին:
Ապացույց ճանաչված այլ փաստաթուղթ հանդիսացող` Ա.Ղազարյանի կողմից տարբեր գրավատներում ոսկյա զարդերի գրավադրումը վկայող թվով 5 հատ գրություններ` իրենց ծրարներով, ՙՊրոֆֆինանս՚ ՓԲԸ-ի կողմից 16.07.2010թ. Երևան քաղաքի Լազոյի փողոցի 6 շենքի 45 բնակարանում բնակվող Արման Ղազարյանին հասցեագրված բռնագանձման ծանուցումը, մեկ հատ գրավատոմսը /թիվ 148/, մեկ հատ տետրը և աշակերտական տետրի մեկ թերթը պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ