Ո Ր Ո Շ ՈՒ Մ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

ՙ10՚ մայիսի 2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղարությամբ Ե.Կարապետյանի, մասնակցությամբ մեղադրող Ա.Սեփոյանի, պաշտպան Ռ.Սաֆարյանի, տուժողի ներկայացուցիչ Ա.Թովմասյանի, դռնբաց դատական նիստում քննելով քրեական գործն ըստ մեղադրանքի Արմեն Անդրանիկի Համբարձումյանի (ծնված 20.08.1977թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, աշխատել է ՙԴեյզի՚ տաքսի ծառայությունում, որպես վարորդ, հաշվառված և բնակվում է Երևան քաղաքի Դավիթաշեն 1-ին թաղ. 37 շենքի թիվ 59 բնակարանում) ՀՀ քրեական օրենսգրքի 242 հոդվածի 1-ին մասով,

Պ Ա Ր Զ Ե Ց

2010թ. դեկտեմբերի 24-ին ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 242 հոդվածի 1-ին մասով նախատեսված հանցագործության հատկանիշներով հարուցվել է թիվ 60134710 քրեական գործը:
2011թ. հունվարի 27-ին Արմեն Անդրանիկի Համբարձումյանին մեղադրանք է առաջադրվել ՀՀ քրեական օրենսգրքի 242 հոդվածի 1-ին մասով այն արարքի համար, որ նա 2010 թվականի հոկտեմբերի 24-ին, ժամը 2100-ի սահմաններում ՙԲարերար Հագ՚ ՍՊԸ-ին պատկանող և իրեն ամրակցված ՙՌենո՚ մակնիշի Տ 2503 պ/հ ավտոմեքենան վարել Է Երևան քաղաքի Փափազյան փողոցով դեպի Գրիգոր Արծրունու փողոցի ուղղությամբ, առաջին ուղեգոտով, 20-30 կմ/ժամ արագությամբ՝ մոտակա լույսերով: Մոտենալով Փափազյան փողոցի թիվ 17 շենքին՝ տեսել Է աջ մայթեզրից շուրջ 1,5 մետ հեռավորության վրա մարմնով և դեմքով դեպի թիվ 17 շենքի ուղղությամբ կանգնած հետիոտն Ալլա Սամվելի Գեորգյանին։Հասնելով նրան, դեպի աջ շրջադարձ կատարելու ժամանակ թույլ Է տվել ՃԵԿ-ի 67 կետի և ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ կետի պահանջներին հակասող գործողություններ, այն Է՝ իր երթևեկության համար վտանգ առաջանալու պահից սկսած միջոցներ չձեռնարկելով ժամանակին կատարված արգելակումով ավտոմեքենան մինչ հետիոտն Ալլա Գևորգյանին հասնելը կանգնեցնելու համար, դեպի Գրիգոր Արծրունու փողոց մուտք գործելիս չի պահպանել Ա.Գևորգյանի նկատմամբ անհրաժեշտ անվտանգ կողային միջտարածություն, որի հետևանքով ավտոմեքենայի հետևի աջ անվադողով անցնելով կանգնած վիճակում գտնվող Ալլա Գևորգյանի ոտնաթաթի վրայով, նրա առողջությանը պատճառել միջին ծանրության վնաս՝ առողջության տևական քայքայումով։
2011թ. հունվարի 27-ին Արմեն Անդրանիկի Համբարձումյանի նկատմամբ որպես խափանման միջոց է ընտրվել չհեռանալու մասին ստորագրությունը:
2011թ. փետրվարի 18-ին թիվ 60134710 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2011թ. մայիսի 10-ի դատական նիստի ժամանակ տուժողի ներկայացուցիչ Ա.Թովմասյանը ներկայացնելով տուժող Ա.Գևորգյանի դիմումը, հայտնեց, որ ամբաստանյալի կողմից հատուցվել է տուժող Ալլա Գևորգյանին պատճառված նյութական վնասը, տուժողը հաշտվել է ամբաստանյալ Արմեն Համբարձումյանի հետ և խնդրում է դադարեցնել քրեական հետապնդումը և կարճել քրեական գործը: Տուժողի ներկայացուցիչը խնդրեց նաև կարճել քաղաքացիական հայցի վարույթը:
Ամբաստանյալ Արմեն Համբարձումյանը հայտարարեց, որ հատուցել է տուժողին պատճառված վնասը, հաշտվել է նրա հետ և համաձայն է, որպեսզի իր նկատմամբ հարուցված քրեական գործի վարույթը կարճվի: Նշված հանգամանքը հաստատեց նաև ամբաստանյալի պաշտպան Ռ.Սաֆարյանը:
Մեղադրող Ա.Սեփոյանը հայտարարեց ամբաստանյալ Արմեն Համբարձումյանի նկատմամբ քրեական հետապնդում իրականացնելուց հրաժարվելու մասին և միջնորդեց քրեական գործի վարույթը կարճել:
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 242 հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Վերոգրյալը հաշվի առնելով, դատարանը գտնում է, որ թիվ ԵԱՔԴ/0117/01/10 քրեական գործի վարույթը պետք է կարճել, իսկ Արմեն Անդրանիկի Համբարձումյանի նկատմամբ քրեական հետապնդումը` դադարեցնել:
Նկատի ունենալով, որ քաղաքացիական հայցվոր Ալլա Գևորգյանը հրաժարվել է ներկայացրած քաղաքացիական հայցից, դատարանը գտնում է, որ քաղաքացիական հայցից հրաժարումը պետք է ընդունել և Ալլա Գևորգյանի քաղաքացիական հայցի վարույթը կարճել:
Դատարանը գտնում է նաև, որ դատարանի 2011 թվականի մարտի 22-ի որոշմամբ Արմեն Անդրանիկի Համբարձումյանին պատկանող գույքի և դրամական միջոցների վրա դրված արգելանքը պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Թիվ ԵԱՔԴ/0017/01/11 քրեական գործի վարույթը կարճել և Արմեն Անդրանիկի Համբարձումյանի նկատմամբ քրեական հետապնդումը դադարեցնել` ամբաստանյալի հետ տուժող Ալլա Սամվելի Գևորգյանի հաշտվելու հիմքով:
Արմեն Անդրանիկի Համբարձումյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Ալլա Սամվելի Գևորգյանի քաղաքացիական հայցի վարույթը կարճել:
Որոշումն օրինական ուժի մեջ մտնելուց հետո, դատարանի 2011 թվականի մարտի 22-ի որոշմամբ Արմեն Անդրանիկի Համբարձումյանին պատկանող գույքի և դրամական միջոցների վրա դրված արգելանքը վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:


ԴԱՏԱՎՈՐ Լ. ԱՎԵՏԻՍՅԱՆ