Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

ՙ14՚ փետրվարի 2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղար Ե.Կարապետյան, մասնակցությամբ մեղադրող Հ.Մարտիրոսյանի, պաշտպան Կ.Ավանեսյանի, տուժող Լ.Սարգսյանի, դռնբաց դատական նիստում քննելով քրեական գործն ըստ մեղադրանքի Բագրատ Խաչիկի Երեմյանի (ծնված 14.09.1972թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին չորս անձ, նախկինում չդատված, չի աշխատում, հաշվառված և բնակվում է Երևան քաղաքի, Ավանի Դ.Մալյան փողոցի 31 տանը) ՀՀ քրեական օրենսգրքի 185 հոդվածի 1-ին մասով,

Պ Ա Ր Զ Ե Ց

2010թ. հուլիսի 22-ին ՀՀ ոստիկանության ՔԳՎ Երևան քաղաքի ՔՎ Արաբկիրի քննչական բաժնում ՀՀ քրեական օրենսգրքի 185 հոդվածի 1-ին մասի հատկանիշներով հարուցվել է թիվ 14122510 քրեական գործը:
2010թ. օգոստոսի 20-ին Բագրատ Խաչիկի Երեմյանը ներգրավվել է որպես մեղադրյալ ՀՀ քրեական օրենսգրքի 185 հոդվածի 1-ին մասով այն արարքի համար, որ նա 2010 թվականի հունիսի 11-ին, ժամը 1300-ի սահմաններում, Երևան քաղաքի Ազատության պողոտայի 11 շենքի թիվ 54 բնակարանում առաջացած վիճաբանության ընթացքում դիտավորությամբ, ուրիշի գույքը վնասելու նպատակով ոտքով երկու անգամ հարվածել և վնասել է Լորիկ Կարմենի Սարգսյանի բնակարանի դուռը և դռան փականը` վերջինիս պատճառելով 18.000 ՀՀ դրամի գույքային վնաս:
2010թ. օգոստոսի 20-ին Բագրատ Երեմյանի նկատմամբ որպես խափանման միջոց է ընտրվել չհեռանալու մասին ստորագրությունը և նրա նկատմամբ հայտարարվել է հետախուզում:
2011թ. հունվարի 16-ին Բագրատ Երեմյանը հայտնաբերվել և ներկայացվել է Արաբկիրի քննչական բաժին:
2010թ. հունվարի 17-ին Բագրատ Խաչիկի Երեմյանին մեղադրանք է առաջադրվել ՀՀ քրեական օրենսգրքի 185 հոդվածի 1-ին մասով և խափանման միջոց է ընտրվել ստորագրություն չհեռանալու մասին:
2011թ. հունվարի 27-ին թիվ 14122510 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2011թ. փետրվարի 14-ի դատական նիստի ժամանակ տուժող Լորիկ Սարգսյանը ներկայացնելով գրավոր դիմում հայտնեց, որ ամբաստանյալի կողմից հանցագործությամբ պատճառված վնասն ամբողջությամբ վերականգնվել է, ինքը հաշտվել է Բագրատ Երեմյանի հետ և խնդրում է գործի վարույթը կարճել:
Ամբաստանյալ Բագրատ Երեմյանը հայտարարեց, որ զղջում է կատարածի համար, հաշտվել է տուժողի հետ և համաձայն է, որպեսզի իր նկատմամբ հարուցված քրեական գործի վարույթը կարճվի:
Մեղադրող Հ.Մարտիրոսյանը հայտարարեց ամբաստանյալ Բագրատ Երեմյանի նկատմամբ քրեական հետապնդում իրականացնելուց հրաժարվելու մասին և միջնորդեց քրեական գործի վարույթը կարճել:
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 177 հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Վերոգրյալը հաշվի առնելով, դատարանը գտնում է, որ թիվ ԵԱՔԴ/0007/01/11 քրեական գործի վարույթը պետք է կարճել և Բագրատ Խաչիկի Երեմյանի նկատմամբ քրեական հետապնդումը դադարեցնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Բագրատ Խաչիկի Երեմյանի նկատմամբ ՀՀ քրեական օրենսգրքի 185 հոդվածի 1-ին մասով քրեական հետապնդումը դադարեցնել և թիվ ԵԱՔԴ/0007/01/11 քրեական գործի վարույթը կարճել` ամբաստանյալի հետ տուժող Լորիկ Կարմենի Սարգսյանի հաշտվելու հիմքով:
Բագրատ Խաչիկի Երեմյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:


ԴԱՏԱՎՈՐ Լ. ԱՎԵՏԻՍՅԱՆ