գործ N ԵԱՔԴ/0207/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

15.02.2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

նախագահությամբ` դատավոր Ա.Մկրտչյանի
քարտուղարությամբ` Լ.Մխոյանի
Ա.Քոչարյանի
մասնակցությամբ`
մեղադրող Ա.Սեփոյանի
ամբաստանյալ Ա.Սարիբեկյանի
տուժողի իրավահաջորդ Ա.Բարսեղյանի

2011թ. փետրվարի 15-ին, դատարանում, դռնբաց դատական նիստում, քննեց քրեական գործն ըստ մեղադրանքի Արարատ Ռազմիկի Սարիբեկյանի, ծնված 07.01.1958թ. ք.Երևանում, ՀՀ քա ղաքացի, ազգությամբ հայ, 8-ամյա կրթությամբ, ամուսնացած, նախկինում չդա տված, աշխատում է ՙՄԳ Հաուզինգ՚ ՍՊԸ-ում որպես վարորդ, բնակվում է` ք . Երևան, Նորագյուղ, 117 տուն:
Մեղադրվում է ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածով:

Պ Ա Ր Զ Ե Ց

1.Գործի դատավարական նախապատմությունը
2010թ. հոկտեմբերի 29-ին Երևան քաղաքի քննչական վարչության ՃՏՀ քննության բաժնի կողմից ՀՀ քրեական օրենսգրքի 242-րդ հոդվածի 2-րդ մասի և 244-րդ հոդվածի հատկանիշներով հարուցվել է թիվ 60126610 քրեական գործը:
2010թ. դեկտեմբերի 06-ին Ա.Սարիբեկյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածով:
2010թ. դեկտեմբերի 23-ին Ա.Սարիբեկյանի նկատմամբ խափանման միջոց է ընտրվել կալանքը:
2010թ. դեկտեմբերի 27-ին թիվ 60126610 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:


2.Գործի փաստական հանգամանքները
Նախաքննության մարմինն ամբաստանյալ Արարատ Ռազմիկի Սարիբեկյանին մեղադրանք է առաջադրել այն արարքի համար, որ ՙնա 2010թ. հոկտեմբերի 29-ին, ժամը 07:15-ի սահմաններում, ՙՄԳ Հաուզինգ՚ ՍՊԸ-ին պատկանող ՙԳԱԶ-32213՚ մակնիշի 35-89 Տ պետհամարանիշի միկրոավտոբուսը մոտ 40 կմ/ժ արագությամբ վարել է Երևան քաղաքի Բաղրամյան պողոտայի կողմից Կասյան փողոցով դեպի Կոմիտաս պողոտայի ուղղությամբ` ճանապարհի բաժանարար հոծ գծերից մոտ 0,5 -1 մետր հեռավորության վրա: Հասնելով Կասյան փողոցի թիվ 8 շենքին, խախտել է ՃԵԿ-ի 67 կետի և ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ կետի պահանջները, այն է` երթևեկության համար վտանգն առաջանալու սկզբնապահից հնարավորություն ունենալով հայտնաբերել իր ընթացքի ուղղությամբ աջից դեպի ձախ, հանգիստ քայլերով փողոցը հատող հետիոտն Արևհատ Գառնիկի Մխիթարյանին, շեղել է ուշադրությունը և տեխնիկական տեսակետից հնարավորություն ունենալով կանխելու վրաերթը, ժամանակին չի դիմել արգելակման մեքենայի արագությունը դանդաղեցնելու կամ կանգնեցնելու համար, որի արդյունքում վրաերթի է ենթարկել Ա.Մխիթարյանին, անզգուշությամբ մահ պատճառել և թողնելով ճանապարհատրանսպորտային պատահարի վայրը` հեռացել է՚:

3.Ապացույցների հետազոտում
Առաջադրված մեղադրանքում Արարատ Սարիբեկյանն իրեն մեղավոր է ճանաչել և դատաքննությամբ ըստ էության պնդել է նախաքննական ցուցմունքն այն մասին, որ 2003 թվականից ունի վարորդական իրավունքի վկայական: 2007թ. աշխատում է ՙՄԳ Հաուզինգ՚ ՍՊԸ-ում որպես վարորդ, որտեղ մինչև 2010թ. հոկտեմբերի սկիզբը վարել է ՙԳԱԶ-32213՚ մակնիշի 25-60 Տ պետհամարանիշի ավտոմեքենան թիվ 41 երթուղում: 2010թ. հոկտեմբերի սկզբին, նույն երթուղում վարվող ՙԳԱԶ-32213՚ մակնիշի 35-89 Տ պետհամարանիշի միկրոավտոբուսի վարորդը աշխատանքից ազատվելու պատճառով պայմանավորվել են և ՙԳԱԶ-32213՚ մակնիշի 35-89 Տ պ/հ միկրոավտոբուսը սկսել է վարել ինքը, որի երթուղին սկսվել է Մամիկոնյանց փողոցից և ավարտվել Շահվերդյան փողոցում: Քանի որ տղան` Ռազմիկ Սարիբեկյանն ունեցել է համապատասխան վարորդական իրավունքի կարգ միկրոավտոբուս վարելու համար, իրեն վստահված նախկին ՙԳԱԶ-32213՚ մակնիշի 25-60 Տ պետհամարանիշի միկրոավտոբուսը 2010թ. հոկտեմբերի սկզբից վարել է տղան: Իր աշխատանքը սկսվել է առավոտյան ժամը 07:30-ից և ամեն օր ինքը տանից` Նորագյուղից դուրս է եկել աշխատանքի և ավտոմեքենայով ընթացել է Բաղրամյան պողոտայի կողմից ինչպես Քոչար փողոցով, այնպես էլ Կասյան փողոցով և հասել Մամիկոնյանց փողոց:
2010թ. հոկտեմբերի 29-ին, առավոտյան տնից դուրս գալուց հետո ՙԳԱԶ-32213՚ մակնիշի 35-89 Տ պետհամարանիշի միկրոավտոբուսով, ժամը 07:15-ի սահմաններում, առանց ուղևորի և բեռի, վարել է Բաղրամյան պողոտայի կողմից Կասյան փողոցով դեպի Կոմիտաս պողոտայի կողմը` մոտակա լույսերով: Հասնելով Կասյան փողոցի թիվ 8 շենքին` տեսել է աջ մայթից 0,5 մետր հեռավորությունից իր ընթացքի ուղղությամբ փողոցը աջից դեպի ձախ, հանգիստ քայլերով, ուղիղ անկյան տակ հատող հետիոտն կնոջը, որից հետո մի պահ ուշադրությունը շեղել է երթևեկությունից և վերջին պահին տեսել է նույն կնոջը` կիսով չափ մեջքով թեքված վիճակում դեպի իր ավտոմեքենան համընթաց քայլելիս, որը 3-4 քայլ կատարելուց հետո, ավտոմեքենայի առջևի կենտրոնից մի փոքր դեպի ձախ ընկած հատվածով վրաերթի է ենթարկել վերջինիս և առանց կանգնելու, դեպքի վայրից հեռացել է: Մինչև վրաերթը, չի արգելակել և մանևրել, իսկ տուժողը մինչև ավտոմեքենայի առջևի ձախ մասը հասնելը, անցել է 8,5 մետր տարածություն: Վրաերթից հետո առանց կանգնելու հեռացել է դեպքի վայրից` չիմանալով տուժողի հետագա ճակատագրի մասին և հասնելով Զեյթուն թաղամաս` կանգնեցրել է ավտոմեքենան, մոտ կես ժամ չի կարողացել ոչինչ անել, որից հետո տեսնելով, որ վրաերթի հետևանքով ավտոմեքենայի շարժիչի ծածկոցի առջևի ձախ մասում կա դեֆորմացված հատված, իր մոտ եղած երկաթե ձողով հնարավորինս փորձել է նախկին տեսքին բերել, որից հետո զանգահարել է իրենց երթուղու երթակարգավարներից մեկին և հայտնել, որ իր առողջական վիճակից ելնելով չի կարող ավտոմեքենան վարել: Դրանից հետո ավտոմեքենան վարել է դեպի Ջրվեժ թաղամաս` ընկերության ավտոձեռնարկություն: Հասնելով ավտոձեռնարկություն տնօրենի օգնական Հայկ Գասպարյանին հայտնել է, որ իրեն լավ չի զգում և պատճառաբանելով, որ նախկինում ինֆարկտ է տարել ու սիրտը ցավում է, ավտոմեքենան թողնելով գնացել է տուն: Այդ ընթացքում բջջային հեռախոսով զանգահարել է կնոջը` Սիլվա Մարտինի Աթոյանին և հայտնել, որ առողջական վիճակը վատանալու հետևանքով ավտոմեքենան թողել է իրենց ձեռնարկությունում և վերադառնում է տուն: Դրանից հետո զանգահարել է իր տղան` Ռազմիկ Սարիբեկյանը և հետաքրքրվել իր առողջականով: Երկու օր տանը մնալուց հետո, 2010թ. նոյեմբերի 1-ից գնացել է աշխատանքի: 2010թ. նոյեմբերի 29-ին, երբ ոստիկանության աշխատակիցներն իրեն հրավիրել են ոստիկանություն վերը նշված ավտոմեքենայով, այդ օրը հայտնել է, որ ոչ մի վրաերթի հետ առնչություն չունի, սակայն 2010թ. դեկտեմբերի 1-ին, երբ բերման է ենթարկվել ոստիկանություն, այդ օրը խոստովանել է, որ 2010թ. հոկտեմբերի 29-ին, Կասյան փողոցի թիվ 8 շենքի դիմաց ինքն է վրաերթի է ենթարկել Արևհատ Մխիթարյանին, որի մահվան մասին իմացել է նոյեմբերի 29-ին, ոստիկանությունում: 2010թ. դեկտեմբերի 1-ին դեպքի վայրում ինքը ընթերակաների ներկայությամբ ցույց է տվել Կասյան փողոցի այն հատվածը, որտեղ վրաերթի է ենթարկել հետիոտնին: Իր կողմից վրաերթ կատարելու դեպքի մասին ոչ ոքի չի հայտնել, միայն դեկտեմբերի 1-ին ոստիկանություն ներկայանալուց առաջ իրականությունը պատմել է տղային և կնոջը: Նշել է, որ ինքը հոգացել է տուժողի հուղարկավորման և այլ ծախսերը և զղջում է կատարած արարքի համար:

Ամբաստանյալ Արարատ Սարիբեկյանին վերագրվող արարքը հիմնավորվել է դատաքննությամբ հետազոտված ներքոհիշյալ ապացույցներով .

Գործով տուժողի իրավահաջորդ Ատոմ Աշոտի Բարսեղյանի ցուցմունքով այն մասին, որ ինքը հանդիսանում է Արևհատ Գառնիկի Մխիթարյանի փեսան և իր կնոջ ու աներոջ խնդրանքով հանդես է գալիս որպես տուժողի իրավահաջորդ: Ինքը բնակվում է իր կնոջ, զոքանչի և աներոջ հետ նույն հարկի տակ: 2010թ. հոկտեմբերի 29-ին, առավոտյան ժամը 06:30-07:00-ի սահմաններում դուրս է եկել տանից` աշխատանքի գնալու նպատակով: Նույն օրը, ժամը 09:00-ի սահմաններում տեղեկացել է, որ Արևհատը Կոմիտասի տարածքում ենթարկվել է վրաերթի և տեղում մահացել: Վրաերթի ենթարկողը դեպքի վայրից դիմել է փախուստի: 2010թ. դեկտեմբերի 1-ին ոստիկանությունից տեղեկացել է, որ Արևհատին վրաերթի ենթարկող վարորդը հայտնաբերվել է, որը հանդիսանում է Արարատ Սարիբեկյանը և տեղեկացել է, որ 2010թ. հոկտեմբերի 29-ին, ժամը 07:15-ի սահմաններում, Արարատը ՙԳազել՚ մակնիշի 35-89 Տ պ/հ, թիվ 41 երթուղում վարվող միկրոավտոբուսով ընթացել է Բաղրամյան պողոտայի կողմից Կասյան փողոցով դեպի Կոմիտաս պողոտայի կողմը, իսկ Արևհատը փողոցը հատել է վրաերթի ենթարկող ավտոմեքենայի ընթացքի ուղղությամբ աջից դեպի ձախ կողմը հանգիստ քայլերով և չհասած հոծ գծին` վրաերթի է ենթարկվել: Վարորդի հարազատների հետ մի քանի անգամ հանդիպելուց հետո եկել են ընդհանուր հայտարարի, որի համար ինքը վարորդի նկատմամբ բողոք, պարտք ու պահանջ չունի և չի ցանկանում, որ ճանաչվի որպես քաղ. հայցվոր:

Գործով վկա Սիլվա Մարտինի Աթոյանի նախաքննական ցուցմունքով այն մասին, որ ինքը, ամուսինը` Արարատ Սարիբեկյանը, որդին` Ռազմիկ Սարիբեկյանը, հարսը և 3 թոռներն ապրում են նույն հարկի տակ, Երևան քաղաքի Նորագյուղ 117 հասցեում: Ինչպես ամուսինը, այնպես էլ տղան աշխատում են ՙՄԳ Հաուզինգ՚ ՍՊԸ-ում և վարում են թիվ 41 երթուղու ՙԳազել՚ մակնիշի ավտոմեքենաներ: Երկու ավտոմեքենաներն էլ աշխատանքի վերջում կանգնեցնում են իրենց բակում և առավոտյան այդ ավտոմեքենաներով գնում են աշխատանքի: 2010թ. հոկտեմբերի սկզբին Արարատն ընդունել է նույն հիմնարկի ՙԳազել՚ մակնիշի 35-89 Տ պ/հ ավտոմեքենա, իսկ նախկին 25-60 Տ պետհամարանիշի ՙԳազել՚ մակնիշի ավտոմեքենան հանձնել է տղային: 2010թ. հոկտեմբերի 29-ին, սովորականի նման, առավոտյան ժամը 07:00-ի սահմաներում Արարատը ՙԳազել՚ մակնիշի 35-89 Տ պ/հ ավտոմեքենայով գնացել է աշխատանքի: Ժամը 11:00-ի սահմաններում զանգահարել է իրեն ու հայտնել, որ իրեն լավ չի զգում և ավտոմեքենան թողել է ձեռնարկությունում և վերադառնում է տուն: Ինքը մտածել է, որ հնարավոր է առողջական վիճակը կապված է սրտի հետ և անհանգստանալով ասել է, որպեսզի տուն վերադառնա: Նույն օրը Արարատին առաջարկել է դիմել բժշկի, սակայն պատասխանել է, որ վատ զգալը գերհոգնածության հետևանք է: Արարատը 2 օր տանը մնալուց հետո, նոյեմբերի 1-ին սովորականի գնացել է աշխատանքի: 2010թ. նոյեմբերի 29-ին, երեկոյան, Արարատը եկել է տուն առանց ավտոմեքենայի և իր այն հարցին, թե ավտոմեքենան որտեղ է, Արարատը պատասխանել է, որ գտնվում է տուգանային հրապարակում և ուրիշ ոչինչ չի ասել: Երբ դեկտեմբերի 1-ին ոստիկանները Արարատին հրավիրել են ոստիկանության բաժին, այնտեղ գնալուց առաջ իրեն և տղային` Ռազմիկին պատմել է, որ 2010թ. հոկտեմբերի 29-ին, ժամը 07-15-ի սահմաններում, ՙԳազել՚ մակնիշի 35-89 Տ պ/հ միկրոավտոբուսով երթուղի գնալու ժամանակ, երբ ընթացել է Բաղրամյան պողոտայի կողմից Կասյան փողոցով դեպի Կոմիտաս պողոտայի կողմը, շուրջ 40 կմ/ժ արագությամբ, Կասյան փողոցում նկատել է մի կնոջ, որը փողոցը հատել է իր ընթացքի ուղղությամբ աջից դեպի ձախ կողմը հանգիստ քայլերով, մի պահ ուշադրությունը շեղել է երթևեկությունից, որից հետո տեսել է, որ այդ կինը գտնվում է իր ավտոմեքենայի ընթացքագոտում, ավտոմեքենայի առջևի ձախ մասով վրաերթի է ենթարկել նրան և առանց կանգնելու դեպքի վայրից հեռացել է, որից հետո գնալով Զեյթուն թաղամա, կանգնեցրել է ավտոմեքենան, որոշ ժամանակ ոչինչ չի կարողացել անել, որից հետո երբ իջել է ավտոմեքենայից ու տեսել, որ վրաերթի հետևանքով դեֆորմացվել է շարժիչի ծածկոցի ձախ մասը, իր մոտ եղած երկաթե ձողով դեֆորմացված հատվածը հնարավորինս նախկին տեսքին է փորձել բերել ու ավտոմեքենան տարել է ավտոձեռնարկություն և հայտնել է, որ իրեն լավ չի զգում ու վերադարձել է տուն: Արարատը 2010թ. նոյեմբերի 29-ին ոստիկանությունից տեղեկացել է, որ այդ կինը դեպքի վայրում մահացել է: Դրա մասին իմանալուց հետո իրենց տան անդամներով շատ են հուզվել:
Գթ. 119-121

Գործով վկա Ռազմիկ Արարատի Սարիբեկյանի նախաքննական ցուցմունքով այն մասին, որ ինչպես ինքը, այնպես էլ հայրը` Արարատ Սարիբեկյանն ունեն երթուղային միկրոավտոբուս վարելու համապատասխան վարորդական իրավունքի կարգ: Հայրը շուրջ 3 տարի է, ինչ աշխատում է ՙՄԳ Հաուզինգ՚ ՍՊԸ-ում որպես վարորդ, որտեղ նրան ամրակցված է եղել ՙԳԱԶ-32213՚ մակնիշի 25-60 Տ պ/հ, թիվ 41 երթուղու միկրոավտոբուսը: Քանի որ հայրն ունի սրտի հետ կապված առողջական խնդիրներ, ինքն անհրաժեշտության դեպքում վարել է վերը նշված միկրոավտոբուսը: Երթուղու աշխատանքը սկսվել է առավոտյան ժամը 07:30-ից և ավարտվել երեկոյան տարբեր ժամերի: Երթուղին սկսվել է Երևան քաղաքի Շահվերդյան փողոցի և ավարտվել Մամիկոնյանց փողոցում: 2010թ. հոկտեմբերի սկզբին նույն երթուղում վարվող ՙԳԱԶ-32213՚ մակնիշի 35-89 Տ պ/հ միկրոավտոբուսի վարորդն այլ աշխատանքի անցնելու կապակցությամբ այդ ավտոմեքենան, ըստ պայմանավորվածության, հանձնել է հորը` Արարատին, որի երթուղին սկսվել է Մամիկոնյանց փողոցից և ավարտվել Շահվերդյան փողոցում: Հայրը հիմնարկության ղեկավարության հետ պայմանավորվել է, և ինքը մեկ ամիս փորձաշրջանով վարել է նախկինում հոր կողմից վարվող 25-60 Տ պ/հ միկրոավտոբուսը: Երկու ավտոմեքենաներն էլ աշխատանքի վերջում կանգնեցրել են իրենց բակում: 2010թ. հոկտեմբերի 29-ին, սովորականի նման, դուրս են եկել աշխատանքի. հայրը 35-89 Տ պ/հ միկրոավտոբուսով, իսկ ինքը` 25-60 Տ պ/հ միկրոավտոբուսով: Նույն օրը, ժամը 11:00-ից 12:00-ն ընկած ժամանակահատվածում մայրը` Սիլվա Աթոյանը զանգահարել է իր բջջային հեռախոսի վրա և հայտնել, որ հայրը երթուղի դուրս չի եկել առողջական խնդիրների պատճառով և որ ավտոմեքենան կանգնեցրել է Ջրվեժ թաղամասում գտնվող ավտոձեռնարկությունում ու վերադարձել է տուն: Ինքն անհանգստանալով զանգահարել է հորը և վերջինս հայտնել է, որ երթուղի դուրս չի եկել ինչպես առողջականի հետ կապված, այնպես էլ ավտոմեքենայի շարժիչի թերությունների պատճառով: Դրանից հետո հայրը 2 օր մնացել է տանը, իսկ ավտոմեքենան գտնվել է ավտոձեռնարկությունում: 2010թ. նոյեմբերի 1-ից հայրը կրկին գնացել է աշխատանքի: 2010թ. նոյեմբերի 29-ին, երեկոյան ժամը 21:00-ի սահմաններում, հայրն առանց ավտոմեքենայի եկել է տուն և հայտնել, որ ավտոմեքենան գտնվում է տուգանային հրապարակում և ուրիշ ոչինչ չի հայտնել: Տանը մեկ օր մնալուց հետո, երբ 2010թ. դեկտեմբերի 1-ին հորը հրավիրել են ոստիկանություն, բաժին ներկայանալուց առաջ իրեն և մորը պատմել է, որ 2010թ. հոկտեմբերի 29-ին, ժամը 07:15-ի սահմաններում, ՙԳազել՚ մակնիշի 35-89 Տ պ/հ միկրոավտոբուսով երթուղի գնալու ժամանակ, երբ ընթացել է Բաղրամյան պողոտայի կողմից Կասյան փողոցով դեպի Կոմիտաս պողոտայի կողմը, շուրջ 40 կմ/ժամ արագությամբ, Կասյան փողոցում նկատել է մի կնոջ, որը փողոցը հատել է իր ընթացքի ուղղությամբ աջից դեպի ձախ կողմը հանգիստ քայլերով, մի պահ ուշադրությունը շեղել է երթևեկությունից, որից հետո տեսել է, որ այդ կինն արդեն գտնվել է իր ավտոմեքենայի ընթացքագոտում և ավտոմեքենայի առջևի ձախ մասով վրաերթի է ենթարկել նրան ու առանց կանգնելու դեպքի վայրից հեռացել է: Հասնելով Զեյթուն թաղամաս, կանգնեցրել է ավտոմեքենան, որոշ ժամանակ ոչինչ չի կարողացել անել, որից հետո երբ իջել է ավտոմեքենայից ու տեսել, որ վրաերթի հետևանքով դեֆորմացվել է շարժիչի ծածկոցի ձախ հատվածը և ավտոմեքենայի մեջ գտնվող եղած երկաթե ձողով փորձել է փոս ընկած հատվածն ուղել, որից հետո ավտոմեքենան տարել է ավտոձեռնարկություն և հայտնել, որ առողջական խնդիրների պատճառով գնում է տուն: Միաժամանակ հայրը պատմել է, որ 2010թ. նոյեմբերի 29-ին ոստիկանությունից տեղեկացել է, որ վրաերթի ենթարկված կինը դեպքի վայրում մահացել է: Դրա մասին իմանալուց հետո իրենց տան անդամներով շատ են հուզվել:
Գթ. 123-125

Գործով վկա ՙՄԳ Հաուզինգ՚ ՍՊԸ-ի տնօրենի օգնական Հայկ Էդիկի Գասպարյանի նախաքննական ցուցմունքով այն մասին, որ 2010թ. փետրվար ամսից աշխատում է ընկերությունում: Տնօրենի հաճախակի բացակայության պատճառով ինքն է զբաղվում ավտոմեքենաների և վարորդների հետ կապված խնդիրներով: Իրենց ՍՊԸ-ն թույլատրված է շահագործել մի շարք երթուղիներ: Դրանցից, թիվ 41 երթուղին սկսվում է Երևան քաղաքի Մամիկոնյանց փողոցից և ավարտվում Շահվերդյան փողոցում և հակառակը: Իրենց երթուղիներում շահագործվում են միայն ՙԳԱԶ-32213՚ մակնիշի միկրոավտոբուսներ: Քանի որ ՍՊԸ-ում աշխատում են շուրջ 130 վարորդներ, նրանցից որոշ մասին է ճանաչում անուն ազգանունով: Տեղյակ է, որ վարորդներից Արարատ Սարիբեկյանը շուրջ 3 տարի աշխատում է ընկերությունում և մինչև 2010թ. հոկտեմբերի սկիզբը վարել է թիվ 41 երթուղում վարվող ՙԳազել՚ մակնիշի 25-60 Տ պ/հ միկրոավտոբուսը: 2010թ. հոկտեմբերի սկզբից Արարատը վարել է նույն երթուղու մեկ այլ ՙԳազել՚ մակնիշի 35-89 Տ պ/հ միկրոավտոբուսը: 2010թ. հոկտեմբերի 29-ին, առավոտյան ժամը 09:00-ից գտնվել է ընկերության ավտոձեռնարկությունում և ժամը 10:00-ի սահմաններում Արարատը ՙԳազել՚ մակնիշի 35-89 Տ պ/հ միկրոավտոբուսով եկել է ավտոձեռնարկություն և հայտնել, որ առողջական խնդիրների հետ կապված ի վիճակի չէ վարել ավտոմեքենան ու թողնելով ձեռնարկության բակում, գնացել է տուն: Շուրջ 2 օր միկրոավտոբուսը ձեռնարկությունում մնալուց հետ, 2010թ. նոյեմբերի 1-ին Արարատը կրկին եկել է ձեռնարկություն ու սկսել է վարել ՙԳազել՚ մակնիշի 35-89 Տ պ/հ միկրոավտոբուսը: 2010թ. նոյեմբերի 29-ին տեղեկացել է, որ Արարատին հրավիրել են Արաբկիրի ոստիկանություն, իսկ ՙԳազել՚ մակնիշի 35-89 Տ պ/հ միկրոավտոբուսը տեղափոխել ՃՈ տուգանային հրապարակ: Մի քանի օր հետո տեղեկացել է, որ 2010թ. դեկտեմբերի 1-ին Արարատը ոստիկանությունում հայտարարել է, որ 2010թ. հոկտեմբերի 29-ին, առավոտյան ժամը 07:15-ի սահմաններում, ՙԳազել՚ մակնիշի 35-89 Տ պ/հ միկրոավտոբուսով աշխատանքի գնալիս Կասյան փողոցում վրաերթի է ենթարկել մի կնոջ ու առանց կանգնելու դեպքի վայրից դիմել է փախուստի: Տուժողը դեպքի վայրում մահացել է: Տեղեկացել է նաև, որ ավտոմեքենան մինչև ձեռնարկություն բերելը, վրաերթից հետո շարժիչի ծածկոցի ձախ մասում առաջացած դեֆորմացված հատվածն իր ուժերով վերականգնել է:
Գթ. 168-170

Դատաբժշկական փորձաքննության թիվ 974 եզրակացությամբ այն մասին, որ Ա. Մխիթարյանի մահը վրա է հասել` գլխուղեղի կենսականորեն կարևորագույն ֆունկցիաների խանգարումից, փակ, բութ գանգուղեղային վնասվածք ստանալու հետևանքով: Փորձաքննության ընթացքում հայտնաբերված բոլոր վնասվածքները պատճառվել են կենդանության օրոք, մահվանից անմիջապես առաջ, բութ առարկաների ներգործությամբ, ինչպիսին կարող են լինել և շարժվող ավտոտրանսպորտային միջոցի տարբեր արտացցված մակերեսները: Տրավմայի առաջացման մեխանիզմում տեղ է գտել առաջային տրավմատիկ հարվածը` ձախ ազդրի ստորին երրորդականի հետին մակերեսի շրջանում, որը հիմնավորվում է ձախ ազդրոսկրի ստորին երրորդականի շրջանում բնորոշ ՙԲամպեր՚ կոտրվածքի առկայությամբ:
Գթ. 160-167

Դատահետքաբանական դատաքիմիական համալիր փորձաքննության թիվ 2592 եզրակացությամբ այն մասին, որ Արևհատ Մխիթարյանի հագուստներից` պիջակի հետևի աջակողմյան վերին հատվածի պատռվածքը, նշված վնասվածքին կից թևքի հետին միացման կարի քանդվածքը, աջ թևքի հետին` արմունկից քիչ վերև հատվածի պատռվածքը, կիսաշրջազգեստի` աջ կողակարի գրեթե ամբողջովին կարի քանդվածքի տեսքով վնասվածքները առաջացել են հագուստների տվյալ հատվածները անհարթ մակերևույթ ունեցող պինդ մարմնի հետ կառչման և ձգման տեսքով տեղի ունեցած անմիջական փոխազդեցությունների արդյունքում: Երկարաճիտ կոշիկների առաջամասերի` ներբանների հատվածներում քսվածքների, զամշատիպ կտորի հատվածներում բզկտվածություններ վնասվածքներն առաջացել են տվյալ հատվածները համեմատաբար հարթ մակերևույթ ունեցող պինդ մարմնի հետ շփման, իսկ կիսաշրջազգեստի առջևի վերին ձախ և ստորին աջ հատվածների վնասվածքներն ուժգին շփման տեսքով տեղի ունեցած անմիջական փոխազդեցությունների արդյունքում, որոնք բնորոշ են ճանապարհատրանսպորտային պատահարի ընթացքում առաջացած հետքերին և դրանք կարող էին առաջանալ վրաերթի և դրան հաջորդող փուլերի ընթացքում:
Գթ. 146-155

Դատահետքաբանական դատաքիմիական համալիր փորձաքննության թիվ 2823 եզրակացությամբ այն մասին, որ ՙԳԱԶ-32213՚ մակնիշի 35-89 Տ պ/հ ավտոմեքենայի շարժիչի ծածկոցի և առջևի վահանի վրա առկա վնասվածքները կարող էին առաջանալ համեմատաբար պինդ առարկայի հետ փոխադարձ կոնտակտի` հնարավոր է վրաերթի հետևանքով:
Ներկայացված ավտոմեքենայի շարժիչի ծածկոցի վրա առկա` 17-14սմ մակերեսով վնասվածքի վրա առկա են մասնակի վերանորոգման հետքեր:
Ներկայացված ավտոմեքենայի շարժիչի ծածկոցը և առջևի թափարգելը ենթարկվել են վերանորոգման և վերաներկման:
Գթ. 156ա -159

Դատաավտոտեխնիկական փորձաքննության թիվ 242ա եզրակացությամբ այն մասին, որ ՙԳԱԶ-32213՚ մակնիշի 35-89 Տ պ/հ միկրոավտոբուսի վարորդը տվյալ վրաերթը կանխելու տեխնիկական հնարավորություն ունեցել է:
ՙԳԱԶ-32213՚ մակնիշի 35-89 Տ պ/հ միկրոավտոբուսի վարորդն իր երթևեկության համար վտանգ առաջ գալու պահից սկսած, երթևեկության անվտանգությունն ապահովելու և իր երթևեկության ուղեմասը հատող հետիոտնի նկատմամբ վրաերթը կանխելու նպատակով, տեխնիկական տեսակետից պետք է ժամանակին կատարված արգելակումով դանդաղեցներ և կանգնեցներ միկրոավտոբուսը` մինչ վրաերթի տեղին հասնելը:
ՙԳԱԶ-32213՚ մակնիշի 35-89 Տ պ/հ միկրոավտոբուսի վարորդն իր երթևեկության համար վտանգ առաջ գալու պահից սկսած ժամանակին չձեռնարկելով անհրաժեշտ համապատասխան միջոցներ միկրոավտոբուսի ընթացքը դանդաղեցնելու` ընդհուպ այն կանգնեցնելու համար, այլ շեղելով ուշադրությունը երթևեկության նկատմամբ, տեխնիկական տեսակետից թույլ է տվել ՃԵԿ-ի 67 կետի և ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ կետի պահանջներին հակասող գործողություններ, իր այդ գործողություններով ստեղծել է վթարային իրադրություն և դրանցով իսկ պայմանավորել տվյալ վրաերթի առաջացումն` ինքն իրեն զրկելով այն կանխելու տեխնիկական հնարավորությունից:
Ճանապարհատրանսպորտային պատահարին մասնակցություն ունենալու դեպքում դեպքի վայրից հեռանալու առումով ՙԳԱԶ-32213՚ մակնիշի 35-89 Տ պ/հ միկրոավտոբուսի վարորդը թույլ է տվել ՙՃանապարհային երթևեկության անվտանգության ապահովման մասին՚ ՀՀ օրենքի 24 հոդվածի 2-րդ կետի պահանջին հակասող գործողություններ:
Գթ. 218-222

ՙՊրոմեթեյ Բանկ՚ ՍՊԸ-ից առգրավված տեսաձայնագրման սկավառակի արձանագրությամբ, ըստ որի 2010թ. հոկտեմբերի 29-ին, ժամը 07:15-ին Կասյան փողոցի թիվ 8 շենքի դիմացից` մայթեզրից հանդիպակաց ուղղությամբ ուղիղ անկյան տակ, Կասյան-Կոմիտաս փողոցի ուղղությամբ, աջից դեպի ձախ կողմը հանգիստ քայլերով ճանապարհը հատում է կին հետիոտն, որը չհասած հոծ գծերին, շրջվում է աջ և համընթաց քայլում դեպի Կոմիտաս պողոտայի կողմը, որտեղ էլ նույն ուղղությամբ ընթացող ՙԳազել՚ մակնիշի միկրոավտոբուսը, որի առջևի ձախ գլխավոր լապտերը չի վառվում, իսկ ձախ կողային մասում հենակի վրա և հետևի ձախ անվի ուղղությամբ վառվում են լրացուցիչ լույսեր, վրաերթի է ենթարկում կին հետիոտնին և առանց կանգնելու դեպքի վայրից հեռանում: Վրաերթի ենթարկվածը տեսախցիկի տեսադաշտում այլևս չի երևում:
Գթ. 46-47ա

Արարատ Սարիբեկյանի մասնակցությամբ դեպքի վայրի լրացուցիչ զննության արձանագրությամբ, ըստ որի Արարատ Սարիբեկյանը Կասյան փողոցի թիվ 8 շենքի դիմաց` դեպի Կոմիտաս պողոտայի կողմը տանող ուղեմասում մատնացույց է կատարել, այն ճանապարհահատվածը, որտեղով որ վրաերթին նախորդող պահին երթևեկել է: Բացի այդ, Ա.Սարիբեկյանը մատնացույց է կատարել այն հատվածը, որտեղ որ վրաերթի է ենթարկել Արևհատ Մխիթարյանին: Նշված հատվածը հոծ գծերից գտնվել է 1,55 սմ հեռավորության վրա:
Գթ.105-107

Դեպքի վայրի զննության արձանագրությամբ այն մասին, որ վրաերթը տեղի է ունեցել Կասյան փողոցի թիվ 8 շենքի դիմաց: Հանգուցյալ Ա. Մխիթարյանի դիակը ընկած է եղել հոծ գծերի վրա, գլխի մասն ուղղված դեպի Բարեկամության հրապարակի կողմը տանող ուղեմասում:
Գթ. 2-7

ՙԳԱԶ-32213՚ մակնիշի 35-89 Տ պ/հ միկրոավտոբուսի զննության արձանագրությամբ այն մասին, որ դեֆորմացված է շարժիչի ծածկոցի ձախակողմյան հատվածը` ձախ կողմից 60սմ դեպի աջ, 15x10սմ չափով, որն ունի վերանորոգման հետքեր:
Գթ. 76-77

Դատարանը գտնում է, որ գործով անթույլատրելի և ոչ վերաբերելի ապացույցներ չկան:

4.Դատարանի իրավական վերլուծությունները
Դատարանը հետազոտելով ձեռք բերված ապացույցներն իրենց համակցությամբ, հանգում է հետևության, որ ամբաստանյալ Արարատ Սարիբեկյանի մեղավորությունը ՀՀ քրեական օրենսգրքի 242-րդ հոդվածի 2-րդ մասի և 244-իդ հոդվածի հատկանիշներով նախատեսված հանցանք կատարելու մեջ ապացուցված է, որի համար նա ենթակա է քրեական պատասխանատվության և պատժի:
Ամբաստանյալի նկատմամբ պատիժ նշանակելիս դատարանը հաշվի է առնում կատարած արարքի բնույթն ու հանրության համար վտանգավորության աստիճանը, պատասխանատվությունն ու պատիժը մեղմացնող և ծանրացնող հանգամանքները, ինչպես նաև ամբաստանյալի անձը բնութագրող տվյալները:
Ամբաստանյալ Արարատ Սարիբեկյանի պատասխանատվությունը և պատիժը մեղմացնող հանգամանք դատարանը հաշվի է առնում այն որ նա ընդունել է մեղքը և անկեղծորեն զղջում է կատարած արարքի համար, նախկինում դատված չէ, բնութագրվում է դրական, հատուցել է տուժողի իրավահաջորդին պատճառած նյութական վնասը:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրել:
Անդրադառնալով իրեղեն ապացույցների տնօրինման հարցին, դատարանը գտնումէ, որ գործով իրեղեն ապացույց հանդիսացող Արևհատ Մխիթարյանի հագուստները պետք է վերադարձնել տուժողի իրավահաջորդ Ա.Բարսեղյանին:
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-րդ, 373-րդ, 379-րդ հոդվածներով, դատարանը

Վ Ճ Ռ Ե Ց

Արարատ Ռազմիկի Սարիբեկյանին մեղավոր ճանաչել ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածով:
ՀՀ քրեական օրենսգրքի 242-րդ հոդվածի 2-րդ մասով նրա նկատմամբ պատիժ նշանակել ազատազրկում 2 /երկու/ տարի 6 /վեց/ ամիս ժամկետով` զրկելով տրասնպորտային միջոցներ վարելու իրավունքից 1 (մեկ) տարի ժամկետով,
ՀՀ քրեական օրենսգրքի 244-րդ հոդվածով նրա նկատմամբ պատիժ նշանակել ազատազրկում 6 /վեց/ ամիս ժամկետով` զրկելով տրասնպորտային միջոցներ վարելու իրավունքից 1 (մեկ) տարի ժամկետով:
ՀՀ քրեական օրենսգրքի 66-րդ հոդվածի կանոններով` Արարատ Սարիբեկյանի նկատմամբ վերջնական պատիժ նշանակել ազատազրկում 3 /երեք/ տարի ժամկետով` զրկելով տրասնպորտային միջոցներ վարելու իրավունքից 2 (երկու) տարի ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվել 2010 թվականի դեկտեմբերի 23-ից:
Արարատ Սարիբեկյանի նկատմամբ ընտրված խափանման միջոցը` կալանքը, թողնել անփոփոխ, մինչև դատավճռի օրինական ուժի մեջ մտնելը:
Գործով իրեղեն ապացույց հանդիսացող Արևհատ Մխիթարյանի հագուստները վերադարձնել տուժողի իրավահաջորդ Ա.Բարսեղյանին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում: