ԵԱՔԴ/0205/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր Լ. Ավետիսյան
դատական նիստերի քարտուղար Ե. Կարապետյան
մասնակցությամբ`
մեղադրող Ա. Սեփոյան
պաշտպան Ա. Քոչարյան


2011 թվականի մարտի 3-ին, Երևան քաղաքում, դռնբաց դատական նիստում, արագացված դատաքննության կարգով, քննեց քրեական գործն ըստ մեղադրանքի Հաբեթ Գագիկի Ստեփանյանի, ծնված 15.01.1979թ., Եղվարդ քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երկու անձ, նախկինում չդատված, չի աշխատում, հաշվառված է Արարատի մարզի Վերին Արտաշատ գյուղի Րաֆֆու նրբանցքի 1-ին տանը, բնակվում է Երևան քաղաքի Վրացական փողոցի 15 շենքի թիվ 9 բնակարանում, մեղադրվում է ՀՀ քրեական օրենսգրքի 244 հոդվածով, խափանման միջոց է ընտրվել ստորագրություն չհեռանալու մասին,

Պ Ա Ր Զ Ե Ց

1.Գործի դատավարական նախապատմությունը.
2010թ. նոյեմբերի 22-ին ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 242 հոդվածի 2-րդ մասով և 244 հոդվածով նախատեսված հանցագործության հատկանիշներով հարուցվել է թիվ 60129110 քրեական գործը:
2010թ. նոյեմբերի 23-ին Հաբեթ Գագիկի Ստեփանյանի նկատմամբ որպես խափանման միջոց է ընտրվել չհեռանալու մասին ստորագրությունը:
2010թ. նոյեմբերի 30-ին Հաբեթ Գագիկի Ստեփանյանին մեղադրանք է առաջադրվել ՀՀ քրեական օրենսգրքի 242 հոդվածի 2-րդ մասով և 244 հոդվածով:
2010թ. դեկտեմբերի 15-ի որոշմամբ թիվ 60129110 քրեական գործով ՙՖորդ-ERPLORER՚ մակնիշի 13 ՕՕ 707 պ/հ ավտոմեքենայի վարորդ Արտաշես Մարտինի Մելքոնյանի և ՙՎԱԶ-2105՚ մակնիշի Տ 83-02 պ/հ ավտոմեքենայի վարորդ Վարդան Սուրենի Գասպարյանի նկատմամբ քրեական հետապնդում չի իրականացվել` նրանց արարքներում հանցակազմի բացակայության պատճառաբանությամբ:
2010թ. դեկտեմբերի 29-ին թիվ 60129110 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախաքննության մարմինն ամբաստանյալ Հաբեթ Գագիկի Ստեփանյանին մեղադրանք է առաջադրել հետևյալ արարքի համար.
Հաբեթ Ստեփանյանը 2010թ. հոկտեմբերի 10-ին, ժամր 0130-ի սահմաններում, իր վարած ՙՎԱԶ-21214՚ մակնիշի 10 ՕՏ 544 պ/հ ավտոմեքենայով երթևեկելով Երևան քաղաքի Կասյան փողոցի կողմից Կոմիտաս պողոտայով և հասնելով Կոմիտասի պողոտայի և Վրացական փողոցի խաչմերուկին, ձախ շրջադարձ իրականացնելիս խախտել է ՃԵԿ-ի 99 կետի և ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ կետի պահանջները, այն է՝ իրականացրել է ոչ պատշաճ և վտանգավոր երթևեկություն, նշված խաչմերուկում ձախ շրջադարձ կատարելիս ճանապարհը չի զիջել հանդիպակաց ուղեմասով երթևեկող և երթևեկության առավելություն ունեցող ՙՖորդ- ERPLORER՚ մակնիշի 13 ՕՕ 707 պ/հ ավտոմեքենային՝ ստեղծել է խոչընդոտ դրա վարորդի երթևեկության համար և ընդհարվել այդ ավտոմեքենային, որի հետևանքով ավտովարորդ Արտաշես Մարտինի Մելքոնյանի առողջությանը անզգուշությամբ պատճառել է միջին ծանրության վնաս՝ առողջության տևական քայքայումով։ Վթարի հետևանքով ՙՖորդ- ERPLORER՚ մակնիշի 13 ՕՕ 707 պ/հ ավտոմեքենան շրջվել է և ընդհարվել ճամփեզրին կանգնած վիճակում գտնվող Վարդան Սուրենի Գասպարյանի շահագործմանը հանձնված ՙՎԱԶ-2105՚ մակնիշի Տ 83-02 պ/հ ավտոմեքենային՝ ստեղծելով վթարային իրադրություն և դրանով իսկ պայմանավորել տվյալ ճանապարհատրանսպորտային պատահարի առաջացումն՝ ինքն իրեն զրկելով այն կանխելու տեխնիկական հնարավորությունից։
Այնուհետև Հաբեթ Ստեփանյանը ՃԵԿ-ի պահանջների խախտմամբ ավտովթար կատարելուց հետո թողել է ճանապարհատրանսպորտային պատահարի վայրը և հեռացել։
Տուժող Արտաշես Մարտինի Մելքոնյանը ներկայացրել է բողոք Հաբեթ Ստեփանյանին քրեական պատասխանատվության ենթարկելու նպատակով։
Դատարանի 2011 թվականի մարտի 3-ի որոշմամբ Հաբեթ Գագիկի Ստեփանյանի նկատմամբ ՀՀ քրեական օրենսգրքի 242 հոդվածի 1-ին մասով քրեական հետապնդումը դադարեցվել է:
3. Արագացված դատական քննություն .
Մինչև դատաքննությունն սկսելն ամբաստանյալ Հաբեթ Գագիկի Ստեփանյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատել է նաև ամբաստանյալի պաշտպան Ա.Քոչարյանը:
Մեղադրող Ա.Սեփոյանը դատական քննության արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Հաբեթ Գագիկի Ստեփանյանին առաջադրված մեղադրանքը ՀՀ քրեական օրենսգրքի 244 հոդվածով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 244 հոդվածի հատկանիշներին և արարքի որակումը ճիշտ է:
Հաբեթ Ստեփանյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, խնամքին են գտնվում 14 տարին չլրացած երկու երեխաները, բնութագրվում է դրական, կամովին հատուցել է հանցագործությամբ պատճառված վնասները:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Հաբեթ Գագիկի Ստեփանյանը ենթակա է քրեական պատասխանատվության և պատժի:
Դատարանը, հաշվի առնելով Հաբեթ Ստեփանյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող և պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Անդրադառնալով ամբաստանյալի նկատմամբ լրացուցիչ պատիժ նշանակելու հարցին, դատարանը գտնում է, որ նպատակահարմար չէ նշանակել ՀՀ քրեական օրենսգրքի 244 հոդվածի սանկցիայով նախատեսված լրացուցիչ պատիժը` տրանսպորտային միջոցներ վարելու իրավունքից զրկելը, նկատի ունենալով, որ Հաբեթ Ստեփանյանն ընտանիքի միակ կերակրողն է և նրա աշխատանքը կապված է վարորդի մասնագիտության հետ, որով հոգում է իր ընտանիքի ապրուստի միջոցը:
2010թ. դեկտեմբերի 17-ի գույքի վրա կալանք դնելու մասին որոշման համաձայն, քաղաքացիական հայցերն ապահովելու համար արգելանք է դրվել Հաբեթ Ստեփանյանի գույքի վրա:
ՀՀ քրեական դատավարության օրենսգրքի 238 հոդվածի համաձայն, գույքը, քրեական վարույթն իրականացնող մարմնի որոշմամբ ազատվում է կալանքից, եթե քաղաքացիական հայցը հետ վերցվելու, կասկածյալին կամ մեղադրյալին վերագրվող արարքի որակումը փոխվելու հետևանքով կամ այլ պատճառներով վերացել է գույքի վրա կալանք դնելուց բխող սահմանափակումների կիրառման անհրաժեշտությունը:
Դատարանը, նկատի ունենալով, որ քաղաքացիական հայցերի վարույթը կարճվել է, ինչպես նաև բռնագանձման ենթակա դատական ծախսեր առկա չեն, գտնում է, որ վերացել է գույքի վրա կալանք դնելուց բխող սահմանափակումների կիրառման անհրաժեշտությունը: Հետևաբար, դատավճիռն օրինական ուժի մեջ մտնելուց հետո ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնի ՀԿԳ ավագ քննիչի 2010թ. դեկտեմբերի 17-ի որոշմամբ Հաբեթ Ստեփանյանի գույքի վրա դրված կալանքը պետք է վերացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Հաբեթ Գագիկի Ստեփանյանին մեղավոր ճանաչել ՀՀ քրեական օրենսգրքի 244 հոդվածով և նրան դատապարտել տուգանքի հարյուր հազար (100.000) ՀՀ դրամի չափով` առանց տրանսպորտային միջոցներ վարելու իրավունքից զրկելու:
Հաբեթ Ստեփանյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ, մինչև դատավճռի օրինական ուժի մեջ մտնելը:
2010թ. դեկտեմբերի 17-ի որոշմամբ Հաբեթ Գագիկի Ստեփանյանի գույքի վրա դրված կալանքը վերացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:


ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ


ԵԱՔԴ/0205/01/10

Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ


ՙ3՚ մարտի 2011թ. ք.Երևան


Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղար Ե.Կարապետյան, մասնակցությամբ մեղադրող Ա.Սեփոյանի, պաշտպան Ա.Քոչարյանի, տուժող Ա.Մելքոնյանի, քաղաքացիական հայցվոր Ա.Շահբազյանի քաղաքացիական հայցվորի ներկայացուցիչ Գ.Վարդանյանի, քաղաքացիական պատասխանող Մ.Սահակյանի, դռնբաց դատական նիստում քննելով քրեական գործն ըստ մեղադրանքի Հաբեթ Գագիկի Ստեփանյանի (ծնված 15.01.1979թ., Եղվարդ քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երկու անձ, նախկինում չդատված, չի աշխատում, հաշվառված է Արարատի մարզի Վերին Արտաշատ գյուղի Րաֆֆու նրբանցքի 1-ին տանը, բնակվում է Երևան քաղաքի Վրացական փողոցի 15 շենքի թիվ 9 բնակարանում) ՀՀ քրեական օրենսգրքի 242 հոդվածի 1-ին մասով և 244 հոդվածով,

Պ Ա Ր Զ Ե Ց

2010թ. նոյեմբերի 22-ին ՀՀ ոստիկանության Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 242 հոդվածի 2-րդ մասով և 244 հոդվածով նախատեսված հանցագործության հատկանիշներով հարուցվել է թիվ 60129110 քրեական գործը:
2010թ. նոյեմբերի 23-ին Հաբեթ Գագիկի Ստեփանյանի նկատմամբ որպես խափանման միջոց է ընտրվել չհեռանալու մասին ստորագրությունը:
2010թ. նոյեմբերի 30-ին Հաբեթ Գագիկի Ստեփանյանին մեղադրանք է առաջադրվել ՀՀ քրեական օրենսգրքի 242 հոդվածի 2-րդ մասով և 244 հոդվածով այն արարքի համար, որ նա 2010թ. հոկտեմբերի 10-ին, ժամր 0130-ի սահմաններում, իր վարած ՙՎԱԶ-21214՚ մակնիշի 10 ՕՏ 544 պ/հ ավտոմեքենայով երթևեկելով Երևան քաղաքի Կասյան փողոցի կողմից Կոմիտաս պողոտայով և հասնելով Կոմիտաս և Վրացական փողոցների խաչմերուկին, ձախ շրջադարձ իրականացնելիս խախտել է ՃԵԿ-ի 99 կետի և ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ կետի պահանջները, այն է՝ իրականացրել է ոչ պատշաճ և վտանգավոր երթևեկություն, նշված խաչմերուկում ձախ շրջադարձ կատարելիս ճանապարհը չի զիջել հանդիպակաց ուղեմասով երթևեկող և երթևեկության առավելություն ունեցող ՙՖորդ- ERPLORER՚ մակնիշի 13 ՕՕ 707 պ/հ ավտոմեքենային՝ ստեղծել է խոչընդոտ դրա վարորդի երթևեկության համար և ընդհարվել այդ ավտոմեքենային, որի հետևանքով ավտովարորդ Արտաշես Մարտինի Մելքոնյանի առողջությանը անզգուշությամբ պատճառել է միջին ծանրության վնաս՝ առողջության տևական քայքայումով։ Վթարի հետևանքով ՙՖորդ- ERPLORER՚ մակնիշի 13 ՕՕ 707 պ/հ ավտոմեքենան շրջվել է և ընդհարվել ճամփեզրին կանգնած վիճակում գտնվող Վարդան Սուրենի Գասպարյանի շահագործմանը հանձնված ՙՎԱԶ-2105՚ մակնիշի Տ 83-02 պ/հ ավտոմեքենային՝ ստեղծելով վթարային իրադրություն և դրանով իսկ պայմանավորել տվյալ ճանապարհատրանսպորտային պատահարի առաջացումն՝ ինքն իրեն զրկելով այն կանխելու տեխնիկական հնարավորությունից։
Այնուհետև Հաբեթ Ստեփանյանը ՃԵԿ-ի պահանջների խախտմամբ ավտովթար կատարելուց հետո թողել է ճանապարհատրանսպորտային պատահարի վայրը և հեռացել։
2010թ. դեկտեմբերի 29-ին թիվ 60129110 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2011թ. մարտի 3-ի դատական նիստի ժամանակ տուժող Արտաշես Մելքոնյանը ներկայացնելով գրավոր դիմում հայտնեց, որ ամբաստանյալի կողմից հանցագործությամբ պատճառված վնասն ամբողջությամբ վերականգնվել է, ինքը հաշտվել է Հաբեթ Ստեփանյանի հետ և խնդրում է գործի վարույթը կարճել:
Ամբաստանյալ Հաբեթ Ստեփանյանը հայտարարեց, որ զղջում է կատարածի համար, հաշտվել է տուժողի հետ և համաձայն է, որպեսզի իր նկատմամբ ՀՀ քրեական օրենսգրքի 242 հոդվածի 1-ին մասով հարուցված քրեական գործի վարույթը կարճվի:
Մեղադրող Ա.Սեփոյանը հայտարարեց ամբաստանյալ Հաբեթ Ստեփանյանի նկատմամբ ՀՀ քրեական օրենսգրքի 242 հոդվածի 1-ին մասով քրեական հետապնդում իրականացնելուց հրաժարվելու մասին:
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 242 հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Վերոգրյալը հաշվի առնելով, դատարանը գտնում է, որ Հաբեթ Գագիկի Ստեփանյանի նկատմամբ ՀՀ քրեական օրենսգրքի 242 հոդվածի 1-ին մասով քրեական հետապնդումը պետք է դադարեցնել:
Նկատի ունենալով, որ տուժող և քաղաքացիական հայցվոր Արտաշես Մելքոնյանին և քաղաքացիական հայցվոր Աղվան Շահբազյանին հանցագործությամբ պատճառված վնասները վերականգնվել է և նրանք հրաժարվել են ներկայացրած քաղաքացիական հայցերից, դատարանը գտնում է, որ քաղաքացիական հայցերի հրաժարումը պետք է ընդունել և Արտաշես Մելքոնյանի և Աղվան Շահբազյանի քաղաքացիական հայցերի վարույթը կարճել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Հաբեթ Գագիկի Ստեփանյանի նկատմամբ ՀՀ քրեական օրենսգրքի 242 հոդվածի 1-ին մասով քրեական հետապնդումը դադարեցնել:
Արտաշես Մելքոնյանի և Աղվան Շահբազյանի քաղաքացիական հայցերի վարույթը կարճել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:

ԴԱՏԱՎՈՐ Լ. ԱՎԵՏԻՍՅԱՆ