Ո Ր Ո Շ ՈՒ Մ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

ՙ25՚ մարտի 2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղարությամբ Ե.Կարապետյանի, մասնակցությամբ մեղադրող Ն.Աշրաֆյանի, տուժող Ք.Բալագյոզյանի, դռնբաց դատական նիստում քննելով քրեական գործն ըստ մեղադրանքի Կարեն Ծերունի Հարությունյանի (ծնված 29.01.1973թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երկու անձ, նախկինում չդատված, չի աշխատում, հաշվառված է Երևան քաղաքի Շերամի փողոցի 55 շենքի թիվ 43 բնակարանում, բնակվում է Արմավիրի մարզի Թաիրով ավանի 1 շենքի թիվ 1 բնակարանում) ՀՀ քրեական օրենսգրքի 177 հոդվածի 1-ին մասով,

Պ Ա Ր Զ Ե Ց

2010թ. սեպտեմբերի 1-ին ՀՀ ոստիկանության Արաբկիրի քննչական բաժնում ՀՀ քրեական օրենսգրքի 177 հոդվածի 1-ին մասով նախատեսված հանցագործության հատկանիշներով հարուցվել է թիվ 14126310 քրեական գործը:
2010թ. սեպտեմբերի 1-ին Կարեն Ծերունի Հարությունյանը ձերբակալվել է:
2010թ. սեպտեմբերի 4-ին Կարեն Ծերունի Հարությունյանին մեղադրանք է առաջադրվել ՀՀ քրեական օրենսգրքի 177 հոդվածի 1-ին մասով այն արարքի համար, որ նա 2010 թվականի հուլիսի 2-ին ժամը 1930-ի սահմաններում, այցելելով Երևան քաղաքի Ադոնց փողոցի 3 շենքի 23 հասցեում գործող ՙՎիվա գոլդ՚ ՄՊԸ-ին պատկանող ինտերնետ ակումբ հայտնել է, որ քթից արյուն է հոսում և խնդրել է լվացվել: Այնուհետև նշված ակումբի աշխատակցուհի Քրիստինա Բալագյոզյանի և վերջինիս ընկերուհի Անահիտ Կարապետյանի առաջարկով գլխի հատվածում դրել է թրջոցներ, որից հետո գողություն կատարելու դիտավորությամբ, պատճառաբանելով, որ երեխաները գալու են, Քրիստինե Բալագյոզյանին և Անահիտ Կարապետյանին խնդրել է ակումբի մուտքին ուշադրություն դարձնել, իսկ ինքը մտել է լոգարան, որից հետո օգտվելով վերջիններիս բացակայությունից, լոգարանի մուտքի դռան մոտ տեղադրված Քրիստինե Բալագյոզյանի աշխատասեղանի վրայից գաղտնի հափշտակել է վերջինիս պատկանող 12.000 ՀՀ դրամ արժողությամբ ՙՍամսունգ՚ տեսակի բջջային հեռախոսը և հեռացել է ինտերնետ ակումբից։
2010թ. սեպտեմբերի 4-ին Կարեն Հարությունյանի նկատմամբ որպես խափանման միջոց է ընտրվել չհեռանալու մասին ստորագրությունը և նա ազատվել է արգելանքից:
2010թ. դեկտեմբերի 14-ին թիվ 14126310 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2011թ. մարտի 25-ի դատական նիստի ժամանակ տուժող Ք.Բալագյոզյանը ներկայացնելով գրավոր դիմում հայտնեց, որ հաշտվել է ամբաստանյալ Կարեն Հարությունյանի հետ և խնդրում է գործի վարույթը կարճել:
Ամբաստանյալ Կարեն Հարությունյանը հայտարարեց, որ զղջում է կատարածի համար և համաձայն է, որ իր նկատմամբ հարուցված քրեական գործի վարույթը կարճվի:
Մեղադրող Ն.Աշրաֆյանը հայտարարեց ամբաստանյալ Կարեն Հարությունյանի նկատմամբ քրեական հետապնդում իրականացնելուց հրաժարվելու մասին և միջնորդեց քրեական գործի վարույթը կարճել:
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 177 հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Վերոգրյալը հաշվի առնելով, դատարանը գտնում է, որ թիվ ԵԱՔԴ/0197/01/10 քրեական գործի վարույթը պետք է կարճել, իսկ Կարեն Ծերունի Հարությունյանի նկատմամբ քրեական հետապնդումը` դադարեցնել:
Դատարանը գտնում է, որ 2010թ. սեպտեմբերի 2-ի որոշմամբ իրեղեն ապացույց ճանաչված Քրիստինա Բալագյոզյանի կողմից ներկայացված 1 հատ լազերային սկավառակը պետք է պահել թիվ 14126310 քրեական գործի հետ միասին:
2010թ. սեպտեմբերի 9-ի որոշմամբ իրեղեն ապացույց ճանաչված և տուժող Քրիստինա Բալագյոզյանին ի պահ հանձնված ՙՍամսունգ՚ տեսակի բջջային հեռախոսը պետք է թողնել նրա տնօրինությանը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Թիվ ԵԱՔԴ/0197/01/10 քրեական գործի վարույթը կարճել և Կարեն Ծերունի Հարությունյանի նկատմամբ քրեական հետապնդումը դադարեցնել` ամբաստանյալի հետ տուժող Քրիստինա Բալագյոզյանի հաշտվելու հիմքով:
Կարեն Հարությունյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումն օրինական ուժի մեջ մտնելուց հետո, իրեղեն ապացույց ճանաչված և տուժող Քրիստինա Բալագյոզյանին ի պահ հանձնված ՙՍամսունգ՚ տեսակի բջջային հեռախոսը թողնել Քրիստինա Բալագյոզյանի տնօրինությանը:
Մեկ հատ լազերային սկավառակը պահել թիվ 14126310 քրեական գործի հետ միասին:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:

ԴԱՏԱՎՈՐ Լ. ԱՎԵՏԻՍՅԱՆ