գործ N ԵԱՔԴ/0183/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

17.12.2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

նախագահությամբ` դատավոր Ա.Մկրտչյանի
քարտուղարությամբ` Լ.Մխոյանի
մասնակցությամբ`
մեղադրող Ա.Մնացականյանի
ամբաստանյալ Ա.Պետրոսյանի

2010թ. դեկտեմբերի 17-ին, դատարանում, դռնբաց դատական նիստում, քննեց քրեական գործն ըստ մեղադրանքի Արշակ Ասատուրի Պետրոսյանի, /ծնված 19.03.1983թ. Արագածոտնի մարզ, Թալինի շրջան, գյուղ Ակունք, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չդատված, չի աշխատում, գրանցված է Արագածոտնի մարզ, Թալինի շրջան, գյուղ Ակունք/:
Մեղադրվում է ՀՀ քրեական օրենսգրքի 244-րդ հոդվածով:

Պ Ա Ր Զ Ե Ց

1.Գործի դատավարական նախապատմությունը
23.10.2010 թվականին Երևան քաղաքի քննչական վարչության ՃՏՀ քննության բաժնի կողմից ՀՀ քրեական օրենսգրքի 244-րդ հոդվածի հատկանիշներով հարուցվել է թիվ 60126210 քրեական գործը:
12.11.2010 թվականին Արշակ Պետրոսյանը ներգրավվել է որպես մեղադրյալ ՀՀ քրեական օրենսգրքի 244-րդ հոդվածի հատկանիշներով և խափանման միջոց է ընտրվել ստորագրություն չհեռանալու մասին:
19.11.2010 թվականին թիվ 60126210 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

2.Գործի փաստական հանգամանքները
Նախաքննության մարմինն ամբաստանյալ Արշակ Պետրոսյանին մեղադրանք է առաջադրել ՀՀ քրեական օրենսգրքի 244-րդ հոդվածով այն արարքի համար, որ նա 2010թ. սեպտեմբերի 27-ին, ժամը 14:20-ի սահմաններում, իր անձնական օգտագործման ՙՎԱԶ 2107՚ մակնիշի 16 ՍԼ 630 պ/հ-ի ավտոմեքենան վարել է Երևան քաղաքի Կոմիտաս պողոտայի` Դավիթ Անհաղթ փողոցի կողմից Կոմիտասի շուկա տանող ուղեմասով: Հասնելով Կոմիտաս պողոտայի 63 շենքի դիմացª թույլ է տվել ՃԵԿ-ի 104 կետի պահանջներին հակասող գործողություններ, այն էª մոտենալով առկա չկարգավորվող հետիոտնային անցումներին և տեսնելով համընթաց ուղղությամբª աջակողմյան և մեջտեղի գոտիներում կանգնած ՙԳԱԶԵԼ՚ մակնիշի ավտոմեքենաներին և չհամոզվելով, որ դրանց առջևում հետիոտներ չկան, երթևեկության անվտանգությունն ապահովելու և վրաերթը բացառելու համար չի դադարեցրել մեքենայի ընթացքը ընդհուպ մինչև կանգնեցնելը, շարունակել է երթևեկությունը և չկարգավորվող հետիոտնային անցումների վրա ավտոմեքենայի առջևի աջ դռան մասով վրաերթի ենթարկել աջից դեպի ձախ կողմը փողոցը հատող հետիոտն Էռնա Օնիկի Մարգարյանին, անզգուշությամբ նրա առողջությանը պատճառելով միջին ծանրության վնասª առողջության տևական քայքայումով, որից հետո խախտելով ՙՃանապարհային երթևեկության անվտանգության ապահովման մասին՚ ՀՀ օրենքի 24-րդ հոդվածի 2-րդ կետի պահանջը,թողել է ճանապարհատրանսպորտային պատահարի վայրը:

3.Ապացույցների հետազոտում
Առաջադրված մեղադրանքում ամբաստանյալ Արշակ Պետրոսյանն իրեն մեղավոր է ճանաչել և ցուցմունք տվել այն մասին, որ 2010թ. սեպտեմբերի 27-ին, ժամը 14:20-ի սահմաններում, վերը նշված ավտոմեքենան առանց բեռի և մեկ ուղևորով վարել է Երևան քաղաքի Կոմիտաս պողոտայով` Դավիթ Անհաղթ փողոցի կողմից Կոմիտասի շուկայի կողմը տանող ուղեմասի երրորդ գոտով` 20-30 կմ/ժ արագությամբ: Մոտենալով Կոմիտասի պողոտայի 63 շենքի դիմաց գտնվող հետիոտնային անցումներին, տեսել է, որ առաջին ուղեգոտով ընթացող ՙԳազել՚ մեքենան կանգնեց հետիոտնային անցումի մոտ: Այդ ժամանակ երկրորդ ուղեգոտով ընթացող ՙԳազել՚ մեքենայից գտնվելով մոտ 5 մետր հեռավորության վրա, տեսել է, թե ինչպես վերջինս հետիոտնային անցումներից գտնվելով 4-5 մետր հեռավորության վրա ևս արգելակում է և դանդաղեցնում ընթացքը: Ինքը նույնպես դանդաղեցրել է ընթացքը` մեքենայի արագությունը հասցնելով մոտ 20 կմ/ժ-ի և շարունակել ընթանալ նույն ուղղությամբ: Երբ երկրորդ ուղեգոտով ընթացող ՙԳազել՚ մեքենան գտնվել է հետիոտնային անցումների մոտ, նրա առջևի մասից մոտ 1 մետր հեռավորությունից իր ընթացքի ուղղությամբ աջից դեպի ձախ արագ քայլերով դուրս է եկել մի հետիոտն կին և սկսել հատել փողոցը: Գտնվելով ՙԳազել՚ մեքենայից մոտ 1 մետր միջկողային տարածության վրա նույն արագությամբ և ուղղությամբ շարունակել է ընթացքը, որի ժամանակ մեքենայի աջ կողային հատվածով վրաերթի է ենթարկել հետիոտն կնոջը և, առանց կանգնելու, դեպքի վայրից հեռացել է:
Գ.թ. 37-38, 55-56

Ամբաստանյալ Ա.Պետրոսյանին մեղսագրվող արարքը հիմնավորվել է նաև գործով հետազոտված ներքոհիշյալ ապացույցներով.
Գործով վկա Էռնա Օնիկի Մարգարյանի նախաքննական ցուցմունքով այն մասին, որ 2010թ. սեպտեմբերի 27-ին, ժամը 14:20-ի սահմաններում գտնվել է Երևան քաղաքի Կոմիտաս պողոտայում` թիվ 63 շենքի դիմաց և ցանկացել է հատել փողոցը դեպի հանդիպակաց մայթի կողմը: Մայթից իջնելուց հետո տեսնելով, որ մեքենաները առաջին և երկրորդ ուղեգոտիներում կանգնել են և զիջում են իրեն ճանապարհը սկսել է արագ քայլերով հետիոտնային անցումներով հատել փողոցը և երրորդ ուղեգոտում անցնելով մոտ 1 մետ, Դավիթ Անհաղթ փողոցի կողմից եկող մեքենան իր աջ կողմի առջևի դռան հատվածով վրաերթի է ենթարկել իրեն և առանց կանգնելու ` հեռացել: 28.09.2010թ. իրեն է ներկայացել Ա.Պետրոսյանը և ներողություն խնդրել կատարվածի համար, և ինքը հաշտվել է նրա հետ:
Գ.թ. 43-44

Գործով վկա Մանուշակ Սմբատի Աղաբեկյանի նախաքննական ցուցմունքով այն մասին, որ հանդիսանում է վրաերթ կատարող վարորդի` Արշակ Պերոսյանի մայրը: 2010թ. սեպտեմբերի 27-ին, ժամը 14:20-ի սահմաններում, որդին` Արշակը վարել է ՙՎազ 2107՚ մակնիշի 16 ՍԼ 630 պ/հ-ի ավտոմեքենան, իսկ ինքը նստած է եղել հետևի նստատեղին: Իրենք ընթացել են Դավիթ անհաղթ փողոցի կողմից Կոմիտաս պողոտայով` Կոմիտասի շուկայի կողմը: Հասնելով իրենց ուղեմասի հետիոտնային անցումներին` մեքենայի առջևի աջ դռան հատվածից ձայն է լսել և տղային հարցրել է, թե ինչ է պատահել և Արշակը նրան հայտնել է, որ ոչինչ էլ չի պատահել: Գյուղ հասնելուն պես Արշակը հայտնել է, որ հետիոտնային անցումներով անցնելու ժամանակ ավտոմեքենայի առջևի աջ դռանն է կպել մի կին, սակայն ինքը վախեցել է և դեպքի վայրից հեռացել, որի ժամանակ հետին տեսանելիության հայելիով տեսել է, որ այդ կնոջը ոչինչ չի պատահել:
Գ.թ. 39

Դատաբժշկական փորձաքննության թիվ 2604 եզրակացությամբ այն մասին, որ Է.Մարգարյանի ստացած մարմնական վնասվածքները` աջ և ձախ ճաճանչոսկրերի տիպիկ տեղերի փակ կոտրվածքների ձևով, պատճառել են առողջության տևական քայքայում:
Գ.թ. 30-31

Դատաավտոտեխնիկական փորձաքննության թիվ 203ա եզրակացության համաձայն, ՙՎազ 2107՚ մակնիշի 16 ՍԼ 630 պ/հ-ի ավտոմեքենայի վարորդը տվյալ վրաերթը կանխելու տեխնիկական հնարավորություն ունեցել է և առաջադրված պայաններում առջևում, իր վարած մեքենայի ընթացքի ուղղության երթևեկելի ուղեմասի աջակողմյան և մեջտեղի գոտիներով, համընթաց ուղղությամբ ընթացող ՙԳԱԶԵԼ՚ մակնիշի ավտոմեքենաների ընթացքի դանդաղեցման պահից սկսած, երթևեկության անվտանգությունն ապահովելու և տվյալ վրաերթի առաջացումը բացառելու համար, մինչև առջևում առկա չկարգավորող հետիոտնային անցումներին հասնելը պետք է տեխնիկական տեսակետից ժամանակին կատարած արգելակումով դանդաղեցներ իր վարած մեքենայի ընթացքը` անհրաժեշտության դեպքում ընդհուպ մինչև մեքենան կանգնեցնելը և շարունակեր երթևեկությունը` միայն համոզվելով, որ այդ տրանսպորտային միջոցի առջևում հետիոտներ չկան, ինչի տեխնիկական հնարավորությունն ունեցել է:
Չկատարելով դա` ՙՎազ 2107՚ մակնիշի ավտոմեքենայի վարորդը տեխնիկական տեսակետից թույլ է տվել ՃԵԿ-ի 104 կետի պահանջին հակասող գործողություններ, դրանով իսկ պայմանավորել տվյալ վրաերթի առաջացումը` ինքն իրեն զրկելով այն կանխելու տեխնիկական հնարավորությունից:
Գ.թ. 32-35

4.Դատարանի իրավական վերլուծությունները
Դատարանը հետազոտելով ձեռք բերված ապացույցներն իրենց համակցությամբ, ներքին համոզմամբ, հանգում է հետևության, որ Արշակ Պետրոսյանը կատարել է արարք որը համապատասխանում ՀՀ քրեական օրենսգրքի 244-րդ հոդվածի հատկանիշներին :
Կատարած արարքի համար Արշակ Պետրոսյանը ենթակա է քրեական պատասխանատվության և պատժի:
Դատարանն ամբաստանյալի նկատմամբ պատիժ նշանակելիս, հաշվի է առնում նրա կողմից կատարած արարքի բնույթն ու հանրության համար վտանգավորության աստիճանը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Արշակ Պետրոսյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա բնութագրվում է դրական, ընդունել է մեղքը, անկեղծորեն զղջացել է կատարած արարքի համար, նախկինում դատված չէ:
Ամբաստանյալի պատասխանատվությունն ու պատիժը ծանրացնող հանգամանքներ դատարանը չի արձանագրել:
Հաշվի առնելով հանրորեն վտանգավոր արարքի բնույթը, դատարանը գտնում է, որ Ա.Պետրոսյանի նկատմամբ պետք է նշանակվի լրացուցիչ պատիժ`տրանսպորտային միջոցներ վարելու իրավունքից զրկելով:
Ղեկավարվելով ՀՀ քրեական դատավարության օրենսգրքի 357-360-րդ հոդվածներով, դատարանը

Վ Ճ Ռ Ե Ց

Արշակ Ասատուրի Պետրոսյանին մեղավոր ճանաչել ՀՀ քրեական օրենսգրքի 244-րդ հոդվածով և նրա նկատմամբ պատիժ նշանակել տուգանք ՀՀ-ում գործող նվազագույն աշխատավարձի հարյուրապատիկի` 100.000 (հարյուր հազար) ՀՀ դրամի չափով:
Արշակ Պետրոսյանին զրկել տրանսպորտային միջոցներ վարելու իրավունքից մեկ տարի ժամկետով:
Արշակ Պետրոսյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում: