գործ N ԵԱՔԴ/0178/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ.Ավետիսյան
դատական նիստերի քարտուղար Ե.Կարապետյան
մեղադրող Ա.Գասպարյան
պաշտպան Գ. Զաքարյան

2011 թվականի փետրվարի 15-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Արմեն Վարդգեսի Մարտիրոսյանի, ծնված 26.06.1991թ., Բերդ քաղաքում, ազգությամբ հայ, ՀՀ քաղաքացի, ութամյա կրթությամբ, ամուրի, նախկինում չդատված, ՀՀ ՊՆ 31549 զորամասի ժամկետային զինծառայող, շարքային, հաշվառված է Բերդ քաղաքի Շիրազի փողոցի 32 տանը, մեղադրվում է ՀՀ քրեական օրենսգրքի 333 հոդվածի 1-ին մասով, խափանման միջոց է ընտրվել հրամանատարության հսկողության հանձնելը,

Պ Ա Ր Զ Ե Ց

1.Գործի դատավարական նախապատմությունը.
2010թ. սեպտեմբերի 15-ին ՀՀ ՊՆ քննչական ծառայության 4-րդ կայազորային քննչական բաժնում ՀՀ քրեական օրենսգրքի 178 հոդվածի 1-ին մասի հատկանիշներով հարուցվել է թիվ 90264410 քրեական գործը:
2010թ. նոյեմբերի 10-ին Արմեն Վարդգեսի Մարտիրոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 333 հոդվածի 1-ին մասով, նրա նկատմամբ որպես խափանման միջոց ընտրվել է զորամասի հրամանատարության հսկողության հանձնելը:
2010թ. նոյեմբերի 10-ի որոշումներով թիվ 90264410 քրեական գործով Սիփան Փարվանի Իսրայելյանի մասը կարճվել և քրեական հետապնդումը դադարեցվել է` հանցադեպի բացակայության պատճառաբանությամբ:
Արմեն Վարդգեսի Մարտիրոսյանի նկատմամբ քրեական հետապնդում չի իրականացվել` նրա արարքում հանցակազմի բացակայության պատճառաբանությամբ:
Անդրանիկ Սերգեյի Պողոսյանի նկատմամբ քրեական հետապնդում չի իրականացվել` հանցադեպի բացակայության պատճառաբանությամբ:
2010թ. նոյեմբերի 16-ին թիվ 90264410 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախաքննության մարմինն ամբաստանյալ Արմեն Վարդգեսի Մարտիրոսյանին մեղադրանք է առաջադրել հետևյալ արարքի համար.
Արմեն Մարտիրոսյանը հանդիսանալով ՀՀ ՊՆ 31549 զորամասի ժամկետային զինծառայող, կոչումով շարքային, 2010թ. հունիսի 17-ից մինչև 26-ը զորամասի հրամանատարության կողմից իրեն հատկացված հերթական արձակուրդ մեկնելուց հետո, մորից՝ Շուշանիկ Աբգարյանից պահանջել է 200 ԱՄՆ դոլար, ասելով, թե իբր այդ գումարը պետք է տա համածառայող սերժանտ Սիփան Իսրայելյանին, որ վերջինս էլ այն փոխանցի փոխգնդապետ Անդրանիկ Պողոսյանին՝ իրեն արձակուրդ հատկացնելու դիմաց։ Մորից վերցնելով 100 ԱՍՆ դոլար և 30.000 ՀՀ դրամ գումարը, այն ծախսել է իր անձնական կարիքների համար։ Իր սուտը թաքցնելու և մոր մոտ արդարանալու նպատակով, 06.09.2010թ. ՀՀ ՊՆ ՔԾ 4֊րդ կայազորային քննչական բաժնում գիտակցաբար կեղծ տեղեկատվություն պարունակող հաղորդում է տվել այն մասին, թե իբրև 17.06.2010թ-ից մինչև 26.06.2010թ. իրեն հատկացված արձակուրդի դիմաց, 2010թ. հունիսի 28-ին, ժամը 1430-ի սահմաններում համածառայող սերժանտ Սիփան Իսրայելյանին է տվել 100 ԱՄՆ դոլար և 30.000 ՀՀ դրամ փոխգնդապետ Անդրանիկ Պողոսյանին փոխանցելու նպատակով։
3.Ապացույցների հետազոտում.
Առաջադրված մեղադրանքում ամբաստանյալ Արմեն Մարտիրոսյանն իրեն մեղավոր ճանաչեց և հրաժարվելով ցուցմունք տալուց, պնդեց նախնական քննության ընթացքում տված ցուցմունքը: Համաձայն այդ ցուցմունքի 2010թ. հունիս ամսին ինքը խնդրել է համածառայող սերժանտ Սիփան Իսրայելյանին, որ վերջինս միջնորդի 2-րդ գումարտակի հրամանատար, փոխգնդապետ Անդրանիկ Պողոսյանին իրեն արձակուրդ հատկացնել, որից հետո 2010թ. հունիսի 17-ից 26-ը զորամասի հրամանատարության կողմից իրեն հատկացվել է հերթական արձակուրդ։ Արձակուրդի ավարտից հետո, 2010թ. հունիսի 26-ին եկել է քաղաք Երևան, սակայն զորամաս չի ներկայացել, այլ նույն օրը երեկոյան վերադարձել է իրենց տուն՝ քաղաք Բերդ և մորը՝ Շուշանիկ Աբգարյանին խաբելով ասել է, թե իբր իրեն տրամադրած արձակուրդի դիմաց սերժանտ Սիփան Իսրայելյանին պետք է տա 200 ԱՍՆ դոլար, որ վերջինս իր հերթին այդ գումարը փոխանցի փոխգնդապետ Անդրանիկ Պողոսյանին։ Իր մայրը հարազատներից ու բարեկամներից պարտք է վերցրել է 100 ԱՍՆ դոլար և 30.000 ՀՀ դրամ և իր հետ միասին 2010թ. հունիսի 28-ին գնացել զորամաս։ Զորամասի ՀԱԿ-ի մոտ մորից վերցրել է վերը նշված գումարը և մտել զորամասի տարածք, սակայն նույն օրը երեկոյան ինքնակամ թողել է ծառայության վայրը։ Նշված գումարն ինքը ծախսել է անձնական կարիքների համար, իսկ 01.09.2010թ. կամովին ներկայացել է Տավուշի ՌՈ բաժանմունք: Ծառայության հետ կապված որևէ խնդիր չունի, ծառայությունից չի խուսափում, սերժանտ Ս.Իսրայելյանի և փոխգնդապետ Ա.Պողոսյանի հետ գումարի դիմաց արձակուրդ գնալու վերաբերյալ երբևէ պայմանավորվածություն չի ունեցել և նրանց գումար չի տվել։ 2010թ. հունիսի 26-ին արձակուրդի ավարտից հետո չի ներկայացել զորամաս, իսկ 2010թ. հունիսի 28-ից մինչև հուլիսի 1-ը զորամասն ինքնակամ թողել է անձնական շարժառիթների պատճառով, որոնց մասին հրաժարվել է նշել։ Մորից վերցրած գումարը նույնպես ծախսել է անձնական կարիքների համար՝ հրաժարվելով նշել, թե կոնկրետ ինչ նպատակով է ծախսել այդ գումարը:
Ամբաստանյալի կատարած հանցանքը, բացի նրա ցուցմունքից հիմնավորվել է նաև գործով ձեռք բերված հետևյալ ապացույցներով.
Վկա, ՀՀ ՊՆ 31549 զորամասի սպա, փոխգնդապետ Անդրանիկ Պողոսյանի ցուցմունքով այն մասին, որ շարքային Արմեն Մարտիրոսյանին հերթական արձակուրդը հատկացվել է սերժանտ Սիփան Իսրայելյանի միջնորդությունն ու խնդրանքը հաշվի առնելով, դրա դիմաց շարքային Արմեն Մարտիրոսյանից գումար չի պահանջել և վերջինս էլ իրեն անձամբ կամ որևէ մեկի միջոցով գումար չի փոխանցել:
Վկա, ՀՀ ՊՆ 31549 զորամասի ժամկետային զինծառայող, սերժանտ Սիփան Իսրայելյանի ցուցմունքով այն մասին, որ 2010թ. հունիս ամսին շարքային Արմեն Մարտիրոսյանի խնդրանքով դիմել է 2-րդ գումարտակի հրամանատար, փոխգնդապետ Անդրանիկ Պողոսյանին ու խնդրել վերջինիս հաակացնել արձակուրդ: Արձակուրդ հատկացնելու համար շարքային Արմեն Մարտիրոսյանն իրեն գումար չի առաջարկել ու չի տվել՝ փոխգնդապեա Պողոսյանին փոխանցելու նպատակով:
Վկաներ, ՀՀ ՊՆ 31549 զորամասի ժամկետային զինծառայողներ, շարքայիններ Արթուր Մատինյանի և Արթուր Խաչատրյանի նույնաբովանդակ ցուցմունքներով այն մասին, որ 2010թ. հունիսի 28-ին, ժամը 1800-ից մինչև 2000-ն ընկած ժամանակահատվածում, շարքային Արմեն Մարտիրոսյանը զորամասի խանութում իրենց քաղցրավենիք և ծխախոտ է հյուրասիրել, պատմել է, որ 2010թ. հունիսի 26-ին իր ծննդյան օրը չի ներկայացել զորամաս, քանի որ Երևանում բնակվող ընկերների հետ նշել է իր ծննդյան տարեդարձը, որից հետո վերադարձել է Բերդ քաղաք: Այդ օրը երեկոյան Արմեն Մարտիրոսյանի մոտ նրանք տեսել են 40.000-70.000 ՀՀ դրամի սահմաններում գումար:
Վկա, ՀՀ ՊՆ 31549 զորամասի ժամկետային զինծառայող, շարքային Հայկ Գյուրջինյանի ցուցմունքով այն մասին, որ 2010թ. հունիսի 28-ին, ժամը 1430-ի սահմաններում զորամասի ՀԱԿ-ի մոտ շարքային Արմեն Մարտիրոսյանը պատմել է, որ 2010թ. հունիսի 26-ին իր ծննդյան օրը չի ներկայացել զորամաս, քանի որ Երևանում բնակվող ընկերների հետ նշել է իր տարեդարձը, որից հետո վերադարձել է քաղաք Բերդ։ Իր ներկայությամբ շարքային Արմեն Մարտիրոսյանը սերժանտ Սիփան Իսրայելյանին գումար չի փոխանցել։
Վկա, ՀՀ ՊՆ 31549 զորամասի ժամկետային զինծառայող, շարքային Վոլոդյա Վարդանյանի ցուցմունքով այն մասին, որ գումարի կամ այլ նյութական արժեքների դիմաց զորամասից արձակուրդ գնալու կամ զորացրվելու դեպքերի մասին տեղյակ չէ: Շարքային Ա.Սահակյանը արձակուրդ գնալու դիմաց փոխգնդապետ Ա.Պողոսյանին գումար չի տվել, իսկ շարքային Վ.Վարդանյանն էլ շարքային Ա.Մարտիրոսյանին երբևէ չի ասել, որ շարքային Ա.Սահակյանն արձակուրդ է գնացել 30.000 ՀՀ դրամի դիմաց:
Վկա, ՀՀ ՊՆ 31549 զորամասի ժամկետային զինծառայող, շարքային Անդրանիկ Սահակյանի նախնական քննության ընթացքում տված և դատաքննության ընթացքում հետազոտված ցուցմունքով այն մասին, որ գումարի կամ այլ նյութական արժեքների դիմաց զորամասից արձակուրդ գնալու կամ զորացրվելու դեպքերի մասին տեղյակ չէ: Շարքային Ա.Սահակյանը արձակուրդ գնալու դիմաց փոխգնդապետ Ա.Պողոսյանին գումար չի տվել, իսկ շարքային Վ.Վարդանյանն էլ շարքային Ա.Մարտիրոսյանին երբևէ չի ասել, որ շարքային Ա.Սահակյանն արձակուրդ է գնացել 30.000 ՀՀ դրամի դիմաց:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արմեն Վարդգեսի Մարտիրոսյանին առաջադրված մեղադրանքը ՀՀ քրեական օրենսգրքի 333 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 333 հոդվածի 1-ին մասի հատկանիշներին և արարքի որակումը ճիշտ է:
Արմեն Վարդգեսի Մարտիրոսյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպե ամբաստանյալ Արմեն Մարտիրոսյանի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Արմեն Վարդգեսի Մարտիրոսյանը ենթակա է քրեական պատասխանատվության և պատժի:
Դատարանը, հաշվի առնելով ամբաստանյալի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 333 հոդվածի 1-ին մասով նախատեսված է պատիժ նաև կալանքի ձևով, գտնում է, որ պատժի նպատակներին հասնելու համար նրա նկատմամբ պատիժ պետք է նշանակել կալանքի ձևով, որը նա պետք է կրի:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Արմեն Վարդգեսի Մարտիրոսյանին մեղավոր ճանաչել ՀՀ քրեական օրենսգրքի 333 հոդվածի 1-ին մասով և նրան դատապարտել կալանքի երկու (2) ամիս ժամկետով:
Պատժի սկիզբը հաշվել նրան կալանավորելու օրվանից:
Պատիժը պետք է կրի կայազորային կարգապահական մեկուսարանում:
Արմեն Վարդգեսի Մարտիրոսյանի նկատմամբ ընտրված խափանման միջոցը` հրամանատարության հսկողության հանձնելը, թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ