գործ N ԵԱՔԴ/0177/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ.Ավետիսյան
դատական նիստերի քարտուղար Ե.Կարապետյան
մեղադրող Դ.Կարապետյան


2010թ. դեկտեմբերի 13-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Գոռ Գուրգենի Հակոբյանի, ծնված 02.11.1989թ., Երևան քաղաքում, ազգությամբ հայ, ՀՀ քաղաքացի, ութամյա կրթությամբ, ամուրի, նախկինում դատված` 1.Արաբկիր և Քանաքեռ-Զեյթուն համայնքների առաջին ատյանի դատարանի 2005թ. օգոստոսի 9-ի դատավճռով ՀՀ քրեական օրենսգրքի 177 հոդվածի 2-րդ մասի 3-րդ կետով, 34-177 հոդվածի 2-րդ մասի 3-րդ, 4-րդ կետերով, 66 հոդվածի կիրառմամբ դատապարտվել է տուգանքի 250.000 դրամի չափով, 2.Արաբկիր և Քանաքեռ-Զեյթուն համայնքների առաջին ատյանի դատարանի 2006թ. մայիսի 11-ի դատավճռով ՀՀ քրեական օրենսգրքի 177 հոդվածի 2-րդ մասի 1-ին, 3-րդ, 4-րդ կետերով դատապարտվել է ազատազրկման 2 տարի ժամկետով և տուգանքի 50.000 դրամի չափով, ազատվել է 07.07.2006թ. համաներում հայտարարելու մասին որոշմամբ, 3.Արաբկիր և Քանաքեռ-Զեյթուն համայնքների առաջին ատյանի դատարանի 2007թ. հունիսի 8-ի դատավճռով ՀՀ քրեական օրենսգրքի 177 հոդվածի 2-րդ մասի 1-ին, 4-րդ կետերով դատապարտվել է ազատազրկման 2 տարի ժամկետով, 2009թ. փետրվարի 5-ին պայմանական վաղաժամկետ ազատվել է պատժի մնացած մասը` 1 ամիս 11 օրը կրելուց, դատվածությունը չմարված, չի աշխատել, հաշվառված է Երևան քաղաքի Ա.Սերոբ փողոցի 2ա շենքի թիվ 64 բնակարանում, մեղադրվում է ՀՀ քրեական օրենսգրքի 327 հոդվածի 1-ին մասով, արգելանքի տակ է 2010թ. օգոստոսի 8-ից,

Պ Ա Ր Զ Ե Ց

1.Գործի դատավարական նախապատմությունը.
2010թ. փետրվարի 10-ին ՀՀ ոստիկանության ՔԳՎ Երևան քաղաքի ՔՎ Արաբկիրի քննչական բաժնում ՀՀ քրեական օրենսգրքի 327 հոդվածի 1-ին մասի հատկանիշներով հարուցվել է թիվ 14105510 քրեական գործը:
2010թ. մարտի 26-ին Գոռ Գուրգենի Հակոբյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 327 հոդվածի 1-ին մասով, նրա նկատմամբ որպես խափանման միջոց ընտրվել է կալանավորումը և հայտարարվել հետախուզում:
2010թ. ապրիլի 8-ին Գոռ Գուրգենի Հակոբյանը հայտնաբերվել և կալանավորվել է:
2010թ. մայիսի 14-ին Արաբկիր և Քանաքեռ-Զեյթուն վարչական շրջանների դատախազության դատախազ Հ.Մարտիրոսյանի որոշմամբ Գոռ Գուրգենի Հակոբյանի նկատմամբ որպես խափանման միջոց ընտրված կալանավորումը փոփոխվել և խափանման միջոց է ընտրվել չհեռանալու մասին ստորագրությունը:

2010թ. հուլիսի 14-ին Գոռ Գուրգենի Հակոբյանը նկատմամբ որպես խափանման միջոց է ընտրվել կալանավորումը և կրկին հայտարարվել հետախուզում:
2010թ. օգոստոսի 8-ին Գոռ Գուրգենի Հակոբյանը հայտնաբերվել և ներկայացվել է Արաբկիրի քննչական բաժին։
2010թ. նոյեմբերի 16-ին թիվ 14105510 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախաքննության մարմինն ամբաստանյալ Գոռ Գուրգենի Հակոբյանին մեղադրանք է առաջադրել հետևյալ արարքի համար.
1989թ. նոյեմբերի 2-ին ծնված Գոռ Գուրգենի Հակոբյանը, Երևան քաղաքի Արաբկիրի զինկոմիսարիատում անցել Է կցագրում և պիտանի Է ճանաչվել ՀՀ զինված ուժերում շարային ծառայության անցնելու համար սահմանափակումով: 2009թ. թվականի աշնանային զորակոչի ժամանակ Գոռ Հակոբյանը Երևան քաղաքի Արաբկիրի զինկոմիսարիատում բժշկական հանձնաժողովի կողմից ենթարկվել Է բժշկական ստուգումների և ճանաչվել Է պիտանի զինվորական շարային ծառայության համար` սահմանափակումով և ստացել Է ծանուցագիր 12.11.2009թ. զինկոմիսարիատ ներկայանալու և ՀՀ զինված ուժեր մեկնելու համար, սակայն վերջինս առանց օրինական հիմքի չի ներկայացել Արաբկիրի զինկոմիսարիատ և խուսափել Է ՀՀ զինված ուժերում զինծառայության մեկնելուց։
3.Ապացույցների հետազոտում.
Առաջադրված մեղադրանքում ամբաստանյալ Գոռ Հակոբյանն իրեն լիովին մեղավոր ճանաչեց և ցուցմունք տվեց այն մասին, որ Երևան քաղաքի Արաբկիրի զինկոմիսարիատում անցնել է կցագրում և պիտանի ճանաչվել ՀՀ զինված ուժերում ծառայության անցնելու համար: 2009 թվականի աշնանային զորակոչի ժամանակ Երևան քաղաքի Արաբկիրի զինկոմիսարիատում անցել է բժշկական հանձնաժողովի կողմից կատարված ստուգումները և ճանաչվել է պիտանի զինվորական շարային ծառայության համար` սահմանափակումով, սակայն չի ներկայացել զինկոմիսարիատ և չի մեկնել զինծառայության: 2010 թվականի գարնանային զորակոչի ժամանակ ինքը ներկայացել է Արաբկիրի զինկոմիսարիատ և տեղեկանալով, որ չնայած իր հիվանդությունների առկայությանն իրեն զորակոչելու են բանակ, կրկին դիմել է փախուստի և չի մեկնել ՀՀ ազգային բանակ Զղջում է կատարած արարքի համար։
Ամբաստանյալի կատարած հանցանքը, բացի նրա ցուցմունքից հիմնավորվել է նաև գործով ձեռք բերված հետևյալ ապացույցներով.
Վկա, Արաբկիր զինկոմիսարիատի բաժանմունքի տեսուչ Արմեն Աուրենի Գրիգորյանի նախնական քննության ընթացքում տված և դատաքննության ընթացքում հետազոտված ցուցմունքով այն մասին, որ ծառայում է Երևան քաղաքի Արաբկիրի զինկոմիսարիատում որպես բաժանմունքի տեսուչ: Ծառայության բնույթը և էությունը կայանում է նրանում, որ զորակոչի ժամանակ ապահովում է զինակոչիկներին զինծառայության մեկնելու մասին ծանուցագրեր տալը և ՀՀ զինված ուժեր ծառայության մեկնելու համար նրանց ներկայությունն ապահովելը։ 2009 թվականի աշնանային զորակոչի ժամանակ Երևան քաղաքի Ա.Սերոբ փողոցի 2ա շենքի 64-րդ բնակարանի բնակիչ Գոռ Գուրգենի Հակոբյանը կցագրման ժամանակ ստացել է ծանուցագիր և ՀՀ զինված ուժեր մեկնելու համար բազմիցս հրավիրվել է Արաբկիրի զինկոմիսարիատ, սակայն վերջինս չի ներկայացել և չարամտորեն խուսափել է ՀՀ զինված ուժեր ժամկետային զինվորական ծառայության մեկնելուց։
Դատահոգեբուժական փորձաքննության թիվ 319/10 եզրակացությամբ, համաձայն որի Գոռ Գուրգենի Հակոբյանը որևէ հոգեկան հիվանդությամբ չի տառապում, նրա մոտ հայտնաբերվել է բնավորության գծերի շեշտվածություն, անձի պրիմիտիվություն։Ուստի ԿՌԲՀ կողմից դրված ՙՇեշտված և պրիմիտիվ անձ՚ ախտորոշումը ճիշտ է։


Հանձնաժողովային դատաբժշկական փորձաքննության թիվ 105/հձ եզրակացությամբ հաձայն որի Գոռ Գուրգենի Հակոբյանը սիրտ-անոթային համակարգի կողմից որևէ հիվանդությամբ չի տառապում, իսկ նրա մոտ ախտորոշված շնչառական առիթմիան համապատասխանում է տարիքային նորմային և այն որպես առանձին հիվանդության միավոր չի դիտվում։ Գոռ Գուրգենի Հակոբյանի հիվանդության վերաբերյալ ախտորոշումը ՙՍպինա-Բիֆիդա Տ 1 - Տ 2՚ համաձայն ներկայացված բժշկական փաստաթղթերի տվյալների ճիշտ է։
Գործով որպես այլ ապացույց ճանչված 12.08.2009թ. ՀՀ ՊՆ իրավաբանական վարչությունից Արաբկիրի զինկոմիսարիատում ստացված գրությունով այն մասին, որ Գոռ Գուրգենի Հակոբյանին նպատակահարմար է զորակոչել ՀՀ ԶՈՒ։
Գործով որպես այլ ապացույց ճանչված 12.11.2010թ. Արաբկիրի զինկոմիսարիատից ստացված թիվ 2/1678 գրությունով այն մասին, որ Գոռ Գուրգենի Հակոբյանը ՀՀ ՊՆ 378–06թ. հրամանի 7 հոդվածի ՙԳ՚ կետի համաձայն ճանաչվել է պիտանի զինծառայության` սահմանափակումով ՙՇեշտված և պրիմիտիվ անձ՚ ախտորոշմամբ։
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գոռ Գուրգենի Հակոբյանին առաջադրված մեղադրանքը ՀՀ քրեական օրենսգրքի 327 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 327 հոդվածի 1-ին մասի հատկանիշներին և արարքի որակումը ճիշտ է:
Գոռ Գուրգենի Հակոբյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Ամբաստանյալի պատասխանատվությունը և պատիժը մեղմացնող ու ծանրացնող հանգամանքներ չկան:
Կատարած արարքի համար ամբաստանյալ Գոռ Գուրգենի Հակոբյանը ենթակա է քրեական պատասխանատվության և պատժի:
Դատարանը, հաշվի առնելով ամբաստանյալի կատարած արարքի հանրության համար վտանգավորության աստիճանը և բնույթը, նրա անձը, պատասխանատվությունն ու պատիժը մեղմացնող և ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 327 հոդվածի 1-ին մասով նախատեսված է պատիժ նաև ազատազրկման ձևով, գտնում է, որ պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
Գոռ Հակոբյանի` 2010 թվականի ապրիլի 8-ից մինչև մայիսի 14-ը կալանքի տակ գտնվելու ժամանակահատվածը` 1 ամիս 6 օրը, պետք է հաշվակցել նրա նկատմամբ նշանակվելիք պատժին:
Դատարանը գտնում է, որ գործով որպես այլ ապացույց ճանչված 12.08.2009թ. Արաբկիրի զինկոմիսարիատ ՀՀ ՊՆ իրավաբանական վարչությունից ստացված և 12.11.2010թ. Արաբկիրի զինկոմիսարիատից ստացված գրությունները պետք է պահել քրեական գործի հետ միասին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Գոռ Գուրգենի Հակոբյանին մեղավոր ճանաչել ՀՀ քրեական օրենսգրքի 327 հոդվածի 1-ին մասով և նրան դատապարտել ազատազրկման երկու (2) տարի վեց (6) ամիս ժամկետով:
Գոռ Գուրգենի Հակոբյանի` 2010թ. ապրիլի 8-ից մինչև մայիսի 14-ը կալանքի տակ գտնվելու ժամկետը` 1 ամիս 6 օրը, հաշվակցել նշանակված պատժին և վերջնական պատիժ նշանակել ազատազրկում երկու (2) տարի չորս (4) ամիս քսանչորս (24) օր ժամկետով:
Պատժի սկիզբը հաշվել 2010թ. օգոստոսի 8-ից:

Պատիժը պետք է կրի ՀՀ ԱՆ համապատասխան քրեակատարողական հիմնարկում:
Գոռ Գուրգենի Հակոբյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Ապացույց ճանչված 12.08.2009թ. ՀՀ ՊՆ իրավաբանական վարչությունից Արաբկիրի զինկոմիսարիատում ստացված և 12.11.2010թ. Արաբկիրի զինկոմիսարիատից ստացված գրությունները պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:


ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ