գործ N ԵԱՔԴ/0174/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

02 փետրվարի 2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը`

նախագահությամբ` դատավոր Ա.Մկրտչյանի
քարտուղարությամբ` Լ.Մխոյանի
Ա.Քոչարյանի
մասնակցությամբ`
մեղադրող Խ.Բաղդասարյանի
ամբաստանյալ Ա.Խուրշուդյանի
պաշտպան Ի.Գազարովայի

Դատարանում, դռնբաց դատական նիստում քննեց քրեական գործն ըստ մեղադրանքի` Արման Ռաֆայելի Խուրշուդյանի, /ծնված 09.04.1982թ., Կոտայքի մարզ, գ. Սևաբերդ, ազգությամբ հայ, ՀՀ քաղաքացի, միջնակարգ կրթությամբ, չի աշխատում, նախկինում չդատված, ամուսնացած, խնամքին երեք մանկահասակ երեխա, հաշվառված է` ք. Երևան, Կ. Ուլնեցու փողոց 70/1շենք բնակարան 44/:
Մեղադրվում է ՀՀ քրեական օրենսգրքի 235-րդ հոդվածի 4-րդ մասով:

Պ Ա Ր Զ Ե Ց

1.Գործի դատավարական նախապատմությունը
1. 2010 թվականի հունիսի 11-ին հարուցվել է թիվ 09112610 քրեական գործը:
2. 2010 թվականի հուլիսի 6-ին որոշում է կայացվել Ա. Խուրշուդյանին` ՀՀ քրեական օրենսգրքի 235-րդ հոդվածի 4-րդ մասով որպես մեղադրյալ ներգրավելու մասին, նրա նկատմամբ խափանման միջոց է ընտրվել ստորագրություն չհեռանալու մասին և հայտարարվել է հետախուզում:
3. 2010 թվականի հոկտեմբերի 25-ին Ա. Խուրշուդյանը հայտնաբերվել է, քրեական գործի վարույթը վերսկսվել և Ա. Խուրշուդյանին մեղադրանք է առաջադրվել` ՀՀ քրեական օրենսգրքի 235-րդ հոդվածի 4-րդ մասով:
4. 2010թ. նոյեմբերի 11-ին թիվ 09112610 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

2.Գործի փաստական հանգամանքները
Նախաքննության մարմինն Արման Ռաֆայելի Խուրշուդյանին մեղադրանք է առաջադրել ՀՀ քրեական օրենսգրքի 235-րդ հոդվածի 4-րդ մասով այն արարքի համար,որ ՙնա ապօրինի կերպով կրել է գործարանային եղանակով պատրաստված հարվածող-փշրող սառը զենք հանդիսացող լախտ ՚, որը 2010 թվականի մայիսի 18-ին, ժամը 21.30-ին ոստիկանության աշխատակիցների կողմից հայտնաբերվել է նրա վարած ՙՎազ-21121՚ մակնիշի 09 ՏՍ 071 պետհամարանիշի ավտոմեքենայի սրահի պահոցում և առգրավվել է:

3.Ապացույցների հետազոտում
Առաջադրված մեղադրանքում ամբաստանյալ Արման Խուրշուդյանը իրեն մեղավոր չի ճանաչել և տվել է ցուցմունք այն մասին, որ 2009թ. սեպտեմբեր ամսից Արմենուհի Մալխասյանի խնդրանքով վարել է նրանց անձնական օգտագործման ՙՎազ-21121՚ մակնիշի 09 ՏՍ 071 պետհամարանիշի ավտոմեքենան, որը բացի իրենից ուրիշ ոչ-ոք չի վարել, այն գտնվել է իր տրամադրության տակ, օգտագործել է նաև իր ընտանիքի կարիքների համար և մշտապես կայանել է իրենց շենքի բակում: 2010թ. մայիսի 18-ին, ժամը 21:30-ի սահմաններում, ավտոմեքենայով դեղատուն գնալիս, Պ. Սևակի փողոցում, շուկայի մոտ իրեն կանգնեցրել են ոստիկանության աշխատակիցները, ստուգել են փաստաթղթերն ու ավտոմեքենան և տեսնելով ավտոմեքենայի պահախցիկում գտնվող լախտը, իրեն ավտոմեքենայով բերման են ենթարկել ոստիկանության Քանաքեռ-Զեյթուն բաժին:
Ոստիկանության Քանաքեռ-Զեյթուն բաժնի բակում, ընթերակաների ներկայությամբ զննության են ենթարկել ՙՎԱԶ-21121՚ մակնիշի 09 ՏՍ 071 պետհամարանիշի ավտոմեքենան և սրահի պահախցիկից հայտնաբերել են այնտեղ գտնվող սառը զենք հանդիսացող լախտը, որն առգրավվել են, փաթեթավորել և կնիքել: Այդ լախտը պատկանել է Ա. Մալխասյանի անչափահաս որդուն` Գրիգոր Սարգսյանին, որն էլ այն դրել է ավտոմեքենայի պահախցիկի մեջ:

Գործով վկա Արմենուհի Ղազարի Մալխասյանի նախաքննական ցուցմունքի համաձայն` 2009թ. դեկտեմբեր ամսից, իր խնդրանքով` կենցաղային հարցերում իրեն օգնելու համար, Արման Խուրշուդյանը վարել է իրենց անձնական օգտագործման ՙՎԱԶ-21121՚ մակնիշի 09 ՏՍ 071 պետհամարանիշի ավտոմեքենան, որը մշտապես գտնվել է նրա տրամադրության տակ: Ա. Խուրշուդյանն ավտոմեքենան օգտագործել է նաև իր ընտանիքի կարիքների համար: 2007թ. ՙՓեթակ՚ տոնավաճառից, իր մանկահասակ, նյարդային հիվանդ երեխայի պահանջով` որպես մահակ-խաղալիք, ինքը գնել է հարվածող-փշրող սառը զենք հանդիսացող լախտը, որն այնուհետև մնացել է իրենց ավտոտնակում: 2010թ. մայիսի սկզբներին, որդին` Գրիգոր Սարգսյանն ավտոտնակում տեսնելով իր մահակ-խաղալիքը, այն դրել է ավտոմեքենայի սրահի պահախցիկում: 2010թ. մայիսի 18-ին, ժամը 21:30-ի սահմաններում, Ա. Խուրշուդյանի վարած ՙՎԱԶ-21121՚ մակնիշի 09 ՏՍ 071 պետհամարանիշի ավտոմեքենայի սրահի պահախցիկից, ոստիկանության աշխատակիցները հայտնաբերել են սառը զենք հանդիսացող լախտը և առգրավել են:
Գ. Թ. 36-37

Գործով վկա Ստյոպա Գրիգորի Հարությունյանը ցուցմունք է տվել այն մասին,որ` 2010 թվականի հունվարի 29-ին, ժամը 21:30-ի սահմաններում,ինքը Արտակ Փանոսյանի հետ միասին գտնվել է Երևան քաղաքի, Ահարոնյան փողոցում` ոստիկանության Քանաքեռ-Զեյթուն բաժնի բակում, երբ իրենց է մոտեցել մի երիտասարդ, ներկայացել որպես ոստիկանության Քանաքեռ-Զեյթուն բաժնի ՔՀԲ աշխատակից, խնդրել, որպես ընթերակա մասնակից լինել իրենց գործողություններին: Ինքը և Ա. Փանոսյանը միասին մոտեցել են ոստիկանության բաժնի բակում կանգնած ՙՎԱԶ-21121՚ մակնիշի 09 ՏՍ 071 պետհամարանիշի ավտոմեքենային, որի զննության ընթացքում տեսել են, որ ավտոմեքենայի սրահի պահախցիկից հայտնաբերվել է սև կաշվե պատյանի մեջ մետաղական, զսպանակաձև բացվող մահակ: Կասկածելով որ մետաղական մահակ կարող է հանդիսանալ որպես սառը զենք, ոստիկանության աշխատակիցներն այն առգրավել են և կազմել են համապատասխան արձանագրություններ, որի ընթացքում իմացել է, որ ավտոմեքենայի վարորդը հանդիսանում է Արման Խուրշուդյանը:
Գործով վկաներ Եղիշե Արմենի Առաքելյանի, Նորայր Սոսի Ղազարյանի, Արմեն Նաիրիի Գրիգորյանի նույնաբովանդակ ցուցմունքների համաձայն`նրանք աշխատում են ոստիկանության Քանաքեռ-Զեյթուն բաժնում: 2010թ. մայիսի 18-ին, միասին մասնակցել են ոստիկանության բաժնի կողմից անցկացվող ՙՆելեգալ-2010՚ օպերատիվ միջոցառմանը, որի նպատակն է եղել հայտնաբերել ապօրինի զենք-զինամթերք:Ժամը 21.30-ի սահմաններում, Պ. Սևակի փողոցում, իրենց կողմից կանգնեցվել է ՙՎազ-21121՚ մակնիշի 09 ՏՍ 071 պետհամարանիշի, սև գույնի ավտոմեքենան, որի վարորդը ներկայացել է Արման Խուրշուդյան անուն-ազգանունով և ներկայացրել փաստաթղթերը: Իրենց հարցին, թե ավտոմեքենայի մեջ զենք-զինամթերք, հրազեն, սառը զենք, կամ թմրամիջոց կա, թե ոչ, Ա. Խուրշուդյանը հայտարարել է, որ չկա: Ավտոմեքենայի սրահի պահոցում, տեսանելի և ձեռքին հասանելի հատվածում եղել է սև կաշվե պատյանի մեջ, մետաղական զսպանակավոր բացվող առարկա: Կասկածելով, որ այն կարող է սառը զենք հանդիսանալ, իրենք անմիջապես Ա. Խուրշուդյանին ավտոմեքենայով բերման են ենթարկել ոստիկանության Քանաքեռ-Զեյթուն բաժին: Հրավիրված երկու ընթերակաների ներկայությամբ զննության են ենթարկել ավտոմեքենան և սրահի պահախցիկից հայտնաբերված զսպանակավոր մետաղական մահակն առգրավել են և կազմել համապատասխան արձանագրություն:

Փորձագետի թիվ 1374 եզրակացության, համաձայն փորձաքննությանը ներկայացված լախտը գործարանային արտադրության է, դասվում է հարվածող-փշրող սառը զենքերի շարքին:
Գ. Թ. 14-15

4.Դատարանի իրավական վերլուծությունները
Վերոգրյալ ապացույցների հիման վրա Դատարանը արձանագրում է, որ Արման Խուրշուդյանը իր վարած ՙՎազ-21121՚ մակնիշի 09 ՏՍ 071 պետհամարանիշի ավտոմեքենայի սրահի պահոցում պահել է գործարանային եղանակով պատրաստված հարվածող-փշրող սառը զենք հանդիսացող լախտը:
ՀՀ քրեական օրենսգրքի 3-րդ հոդվածի համաձայն` քրեական պատասխանատվության հիմքը այնպիսի արարք կատարելն է, որն իր մեջ պարունակում է քրեական օրենքով նախատեսված հանցակազմի բոլոր հատկանիշները:
Նման պայմաններում Դատարանը հարկ է համարում անդրադառնալ ՀՀ քրեական օրենսգրքի 235-րդ հոդվածի 4-րդ մասով նախատեսված հանցակազմի առանձնահատկություններին: ՀՀ քրեական օրենսգրքի 235-րդ հոդվածի 4-րդ մասը պատասխանատվություն է սահմանում միայն ապօրինի կերպով գազային,սառը կամ նետողական զենք կրելու համար:
ՀՀ վճռաբեկ դատարանը 24.10.2006թ. Արման Մհերի Խաչատրյանի /գործ ՎԲ-223/06/ վերաբերյալ քրեական գործով արտահայտել է այն իրավական դիրքորոշումը, որ. ՙսառը զենքի ապօրինի կրում է համարվում դրա գտնվելը հագուստի մեջ կամ անմիջականորեն անձի մարմնի վրա, ինչպես նաև դրանց գտնվելը ձեռքի պայուսակում, կապոցում, այլ պահոցներում, այսինքն` զենք կրելու տակ պետք է նկատի ունենալ այն դեպքերը, երբ զենքը գտնվում է հանցավորի մոտ: Գործի նյութերով, այդ թվում` Արմեն Խաչատրյանի, Տիգրան Հովհաննիսյանի, Արթուր Տեր-Պողոսյանի ցուցմունքներով հիմնավորվել է, որ սառը զենք հանդիսացող դանակը գտնվել է ավտոմեքենայի սրահի բեռնախցիկում, որը համարվում է ոչ թե կրել, այլ պահել, որը քրեական պատասխանատվություն չի առաջացնում: Հետևաբար, Արման Խաչատրյանի արարքում ապօրինի կերպով սառը զենք կրելու հանցակազմը բացակայում է՚:
ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե արարքի մեջ հանցակազմ չկա:
ՀՀ քրեական դատավարության օրենսգրքի 366-րդ հոդվածի 2-րդ մասի համաձայն` դատարանը պարտավոր է սույն օրենսգրքի 35-րդ հոդվածի առաջին մասի 1-3-րդ կետերով և երկրորդ մասով նախատեսված հիմքերից որևէ մեկի առկայության դեպքում տվյալ դատական նիստում կայացնել արդարացման դատավճիռ:
Վերոգրյալի հիման վրա Դատարանը գալիս է այն եզրահանգման, որ Արման Խուրշուդյանի արարքում բացակայում է ՀՀ քրեական օրենսգրքի 235-րդ հոդվածի 4-րդ մասով նախատեսված հանցակազմը, ուստի պետք է ճանաչել և հռչակել Արման Խուրշուդյանի անմեղությունը ՀՀ քրեական օրենսգրքի 235-րդ հոդվածի 4-րդ մասով նախատեսված հանցանքի կատարման մեջ:
Դատարանը միաժամանակ գտնում է, որ Արման Խուրշուդյանի նկատմամբ խափանման միջոց կիրառելու անհրաժեշտությունը վերացել է և ընտրված խափանման միջոցը` ստորագրություն չհեռանալու մասին, պետք է վերացնել:
Դատարանն անդրադառնալով իրեղեն ապացույցների տնօրինման հարցին, գտնում է, որ իրեղեն ապացույց ճանաչված սառը զենք հանդիսացող լախտը պետք է ոչնչացնել:
Ղեկավարվելով ՀՀ քրեական դատավարության օրենսգրքի 35-րդ,119-րդ,151-րդ,357-360-րդ,366-րդ հոդվածներով, դատարանը

Վ Ճ Ռ Ե Ց

Արման Ռաֆայելի Խուրշուդյանին ՀՀ քրեական օրենսգրքի 235-րդ հոդվածի 4-րդ մասով ճանաչել անպարտ և արդարացնել` նրա արարքում հանցակազմի բացակայության հիմքով:
Արման Ռաֆայելի Խուրշուդյանի նկատմամբ ընտրված խափանման միջոցը` ստորագրություն չհեռանալու մասին, վերացնել:
Իրեղեն ապացույց հանդիսացող` ՙՎազ-21121՚ մակնիշի 09 ՏՍ 071 պետհամարանիշի ավտոմեքենայի զննությամբ հայտնաբերված և առգրավված սառը զենք հանդիսացող լախտը ոչնչացնել:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում: