գործ N ԵԱՔԴ/0173/01/10

Ո Ր Ո Շ ՈՒ Մ

ՔՐԵԱԿԱՆ ԳՈՐԾԻ ՎԱՐՈՒՅԹԸ ՎԵՐՍԿՍԵԼՈՒ ՄԱՍԻՆ

10.02.2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահությամբ դատավոր Ա.Մկրտչյանի, ուսումնասիրելով թիվ ԵԱՔԴ/0173/01/10 քրեական գործի նյութերն ըստ մեղադրանքի Դավիթ Վլադիմիրի Օհանյանի /ՀՀ քրեական օրենսգրքի 182-րդ հոդվածի 3-րդ մասի 5-րդ կետով/.

Պ Ա Ր Զ Ե Ց

2010թ. նոյեմբերի 02-ին նախաքննության մարմնի կողմից որոշում է կայացվել Դավիթ Վլադիմիրի Օհանյանին որպես մեղադրյալ ներգրավելու և ՀՀ քրեական օրենսգրքի 182-րդ հոդվածի 3-րդ մասի 5-րդ կետով մեղադրանք առաջադրելու մասին:
2010թ. նոյեմբերի 10-ին թիվ 09119710 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2010թ. նոյեմբերի 16-ին թիվ ԵԱՔԴ/0173/01/10 քրեական գործն ընդունվել է վարույթ և նշանակվել դատական քննության:
Ամբաստանյալ Դավիթ Օհանյանի դատական նիստին չներկայանալու պատճառով դատարանի 2011թ. հունվարի 31-ի որոշմամբ նրա նկատմամբ ընտրված խափանման միջոցը փոխվել, ընտրվել է կալանավորումը, հայտարարվել է հետախուզում և թիվ ԵԱՔԴ/0173/01/10 քրեական գործի վարույթը կասեցվել է:
2011թ. փետրվարի 09-ին ՀՀ ոստիկանության Երևան քաղաքի վարչության Քանաքեռ-Զեյթուն բաժնի կողմից ամբաստանյալ Դավիթ Վլադիմիրի Օհանյանը հայտնաբերվել և կալանավորվել է:
Նկատի ունենալով, որ ամբաստանյալը հայտնաբերվել է և քրեական գործով վարույթի կասեցման հիմքը վերացել է, դատարանը գտնում է, որ թիվ ԵԱՔԴ/0173/01/10 քրեական գործով վարույթը պետք է վերսկսել:
Ղեկավարվելով ՀՀ քրեական դատավարության օրենսգրքի 31-րդ հոդվածի 5-րդ կետով, 313-րդ և 379-րդ հոդվածով, դատարանը

Ո Ր Ո Շ Ե Ց

Դավիթ Վլադիմիրի Օհանյանի /ՀՀ քրեական օրենսգրքի 182-րդ հոդվածի 3-րդ մասի 5-րդ կետով/ վերաբերյալ թիվ ԵԱՔԴ/0173/01/10 քրեական գործի վարույթը վերսկսել և գործի դատական քննությունը նշանակել 2011թ. մարտի 01-ին, ժամը 12:00-ին:
Որոշումը կարող է բողոքարկվել ՀՀ քրեական վերաքննիչ դատարան` հրապարակման պահից տասնօրյա ժամկետում:

գործ N ԵԱՔԴ/0173/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

13 ապրիլի 2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը`

նախագահությամբ` դատավոր Ա.Մկրտչյանի
քարտուղարությամբ` Լ.Մխոյանի
Ա.Քոչարյանի
Օ.Կիրակոսյանի
մասնակցությամբ`
մեղադրող Ս.Գրիգորյանի
ամբաստանյալ Դ.Օհանյանի
պաշտպան Է.Աղաջանյանի

Դատարանում, դռնբաց դատական նիստում քննեց քրեական գործն ըստ մեղադրանքի Դավիթ Վլադիմիրի Օհանյանի (ծնված 13.06.1960թ. ք.Երևան, ազգությամբ հայ, ՀՀ քաղաքացի, ամուսնացած, միջնակարգ կրթությամբ, չի աշխատում, նախկինում 3 անգամ դատապարտված.
1/ 11.06.99թ. Էրեբունու ժող. դատարանի կողմից ՀՀ նախկին քր. օր.-ի 89 հոդ. 2-րդ մասով` 3 տարի 6 ամիս ազատազրկման,
2/ 11.07.00 Էրեբունի-Նուբարաշեն համայնքների առաջին ատյանի դատարանի կողմից ՀՀ նախկին քր. օր.-ի 92 հոդ 2-րդ մասով, 38 և 39 հոդ` 2 տարի ազատազրկման,
3/ 13.09.04թ. Կենտրոն և Նորք Մարաշ համայնքների առաջին ատյանի դատարանի կողմից ՀՀ քր. օր.-ի 177 հոդ. 2-րդ մասի 4-րդ կետով` 3 տարի ազատազրկման, որը 15.03.05թ. Վերաքննիչ դատարանը ժամկետը սահմանել է 2 տարի ազատազրկումը,
հաշվառված է ք.Երևան Աբովյան փող. 22ա շենք, 15 բն. հասցեում, փաստացի բնակվում է ք.Երևան, Դրոյի փող. 28 շենք, 65 բնակարան):
Մեղադրվում է ՀՀ քրեական օրենսգրքի 182-րդ հոդվածի 3-րդ մասի 5-րդ կետով:

Պ Ա Ր Զ Ե Ց

1.Գործի դատավարական նախապատմությունը
Թիվ 09119710 քրեական գործը հարուցվել է 08.09.2010թ.:
2010 թվականի նոյեմբերի 2-ին Դավիթ Վլադիմիրի Օհանյանին մեղադրանք է առաջադրվել ՀՀ քրեական օրենսգրքի 182-րդ հոդվածի 3-րդ մասի 5-րդ կետով:
02.11.2010թ. Դավիթ Վլադիմիրի Օհանյանի նկատմամբ խափանման միջոց է ընտրվել ստորագրություն չհեռանալու մասին:
2010 թվականի նոյեմբերի 10-ին թիվ 09119710 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 31.01.2011 որոշմամբ Դավիթ Օհանյանի նկատմամբ ընտրված խափանման միջոցը` ստորագրություն չհեռանալու մասին, փոփոխվել է և որպես խափանման միջոց է ընտրվել կալանքը ու նրան հայտնաբերելու համար հայտարարվել է հետախուզում:
2011 թվականի փետրվարի 8-ին Դ.Օհանյանը հայտնաբերվել և տեղափոխվել է ՀՀ ԱՆ Նուբարաշեն ՔԿՀ:

2.Գործի փաստական հանգամանքները
Նախաքննության մարմինն ամբաստանյալ Դավիթ Վլադիմիրի Օհանյանին ՀՀ քրեական օրենսգրքի 182-րդ հոդվածի 3-րդ մասի 5-րդ կետով մեղադրանք է առաջադրել այն արարքի համար, որ ՙնա նախկինում 3 անգամ հափշտակություններ կատարելու համար դատապարտված լինելով ազատազրկումների, դատվածությունը չմարված 2010թ. սեպտեմբերի 7-ին ժամը 15:10-ից 17:04-ն ընկած ժամանակահատվածում պարբերաբար զանգահարել է Լյուբով Գուրգենի Մկրտչյանի` Երևան քաղաքի Մ.Ավետիսյան 4 փող. 8ա շենքի 14 բնակարանի 28-48-45 հեռախոսահամարին, խոսել Լ.Մկրտչյանի հետ և նրա մասին արատավորող տեղեկությունններ հրապարակելու սպառնալիքով պահանջել է 5.000 ՀՀ դրամ գումար՚:

3.Ապացույցների հետազոտում
Դատաքննությամբ ամբաստանյալ Դավիթ Օհանյանը առաջադրված մեղադրանքում իրեն մեղավոր ճանաչեց մասնակիորեն և ցուցմունք տվեց այն մասին, որ 2010 թվականի սեպտեմբերի 5-ին ժամը 24:00-ի սահմաններում ինքը գտնվել է Դրոյի փողոցի 21 շենքի մոտ, երբ նրան մոտեցել է մի կին, մտածելով, որ ինքը վատ է զգում, առաջարկել է գնալ իր Երևան քաղաքի Մ.Ավետիսյանի 4 փողոցի 8ա շենքի 14 բնակարան Դ.Օհանյանը համաձայնվել է և միասին գնացել են վերը նշված բնակարան: Բնակարանում Լ. Մկրտչյանն իրեն ձմերուկ է հյուրասիրել, պատմել իր երեխաներից, իր անձնական կյանքից և երիտասարդ տարիքում մահացած ամուսնուց: Այնուհետև ասել, որ երկար ժամանակ տղամարդու հետ չի եղել,տղամարդու կարիք է զգում և առաջարկել ինտիմ հարաբերություն ունենալ: Միասին բնակարանի հյուրասենյակում փոխադարձ համաձայնությամբ սեռական հարաբերություն են ունեցել: Դրանից հետո` ժամը 03:00-ի սահմաններում, երբ ինքը պատրաստվել է դուրս գալ բնակարանից Լ.Մկրտչյանն իրեն տվել է իր բնակարանի հեռախոսահամարը` գրելով այն թղթի վրա: Ինքը վերջինիցս 1000 ՀՀ դրամ գումար է խնդրել, որպեզի տաքսի մեքենայով տուն գնա և վերցնելով այդ գումարը հեռացել է, դրանից հետո մի քանի անգամ զանգահարել է Լ.Մկրտչյանին սակայն վերջինս խնդրել է հանգիստ թողնել իրեն և այլևս չանհանգստացնել: Դ.Օհանյանը նրանից խնդրել է 5000 դրամ որպիսի մեկնի Գորիս քաղաք, ասելով, որ մեկնելուց հետո այլևս չի անհանգստացնի:Լ.Մկրտչյանը համաձայնվել է նրան տալ 5000 դրամ:Ամբաստանյալը նշեց, որ ինքը որևէ սպառնալիք չի տվել Լ.Մկրտչյանին, շորթելու դիտավորություն չի ունեցել:
Դատարանը գտնում է, որ պետք է հիմք ընդունել ամբաստանյալ Դ.Օհանյանի նախաքննական ցուցմունքները, քանի որ դատաքննությամբ տված նրա ցուցմունքները հերքվել են գործով հետազոտված ներքոհիշյալ ապացույցներով.
Ամբաստանյալ Դավիթ Օհանյանը նախաքննության փուլում առաջադրված մեղադրանքում իրեն մեղավոր է ճանաչել և ցուցմունք տվել այն մասին, որ 2010 թվականի սեպտեմբերի 05-ին Երևան քաղաքի Դրոյի 21 շենքի մոտ գտնվող կանգառում իրեն է մոտեցել Լ.Մկրտչյանը, հարցրել, թե վատ է զգում իրեն, ինքը պատասխանել է, որ վատ չի զգում, պարզապես ծարավ է: Լ.Մկրտչյանն առաջարկել է գնալ իր Երևան քաղաքի Մ.Ավետիսյանի 4 փողոցի 8ա շենքի 14 բնակարան: Միասին քայլելով, զրուցելով գնացել են վերը նշված բնակարան: Բնակարանում Լ. Մկրտչյանն իրեն ձմերուկ է հյուրասիրել, պատմել իր երեխաներից, իր անձնական կյանքից և երիտասարդ տարիքում մահացած ամուսնուց: Այնուհետև ասել, որ երկար ժամանակ տղամարդու հետ չի եղել, տղամարդու կարիք է զգում և առաջարկել է ինտիմ հարաբերություն ունենալ: Միասին բնակարանի հյուրասենյակում փոխադարձ համաձայնությամբ սեռական հարաբերություն են ունեցել: Դրանից հետո` ժամը 03:00-ի սահմաններում , երբ ինքը պատրաստվել է դուրս գալ բնակարանից Լ.Մկրտչյանն իրեն տվել է իր բնակարանի հեռախոսահամարը` գրելով այն թղթի վրա: Ինքը վերջինիցս 1000 ՀՀ դրամ գումար է խնդրել, որպիսի տաքսի մեքենայով տուն գնա և վերցնելով այդ գումարը հեռացել է : Սակայն քիչ անց, ցանկանալով նորից տեսնել Լ.Մկրտչյանին, վերադարձել է, պարբերաբար թակել բնակարանի մուտքի դուռը և փակ պատշգամբի պատուհանը, զանգահարել բնակարանի հեռախոսահամարին, սակայն տեսնելով, որ վերջինս ոչ հեռախոսազանգերին և ոչ էլ թակոցներին չի պատասխանում, թողել և հեռացել է:
2010 թվականի սեպտեմբերի 07-ին` ժամը 15:00-ից մինչև 17:00 ընկած ժամանակահատվածում պարբերաբար զանգահարել է Լ.Մկրտչյանի բնակարանի 28-48-45 հեռախոսահամարին, խոսել նրա հետ և 5000 ՀՀ դրամ գումար պահանջել` սպառնալով, որ եթե չտա նրա երեխաներին և հարևաններին կպատմի, որ կենակցել է իր հետ, ՙխայտառակ՚ կանի: Լ.Մկրտչյանը վախենալով վարկաբեկվել համաձայնվել է իրեն տալ 5000 ՀՀ դրամ գումար: Ինքը իր ծանոթ Աշոտի տաքսի մեքենայով գնացել է Լ.Մկրտչյանի Երևան քաղաքի Մ.Ավետիսյան 4 փող. 8ա շենքի 14 բնակարանի փակ պատշգամբի մոտ, որպիսզի գումարը վերցնի: Հասնելով Մ.Ավետիսյան 4 փող. 8ա շենքի մոտ, դուրս է եկել տաքսի մեքենայից և մոտեցել Լ.Մկրտչյանի բնակարանի փակ պատշգամբի պատուհանին, որպիսի Լ.Մկրտչյանից վերցնի 5000 ՀՀ դրամ գումարը: Չհասցնելով վերցնել գումարը իրեն են մոտեցել ոստիկանության աշխատակիցները և բերման ենթարկել ոստիկանության Քանաքեռ-Զեյթուն բաժին:
Գ/Թ 22-24,51-52

Գործով տուժող` Լյուբով Գուրգենի Մկրտչյանի նախաքննության փուլում տված ցուցմունքով այն մասին, որ 2010 թվականի սեպտեմբերի 05-ին` ժամը 23:00-ի սահմաններում, բնակարանից դուրս է եկել աղբ թափելու, ճանապարհին` կանգառի նստարանին պառկած տեսել է մի անծանոթ մարդու, որի անունն ու ազգանունը ինքը հետագայում իմացել է Դավիթ Օհանյան է: Մոտեցել է նրան ու հարցրել ` ՙքեզ վատ ես զգում՚: Դ. Օհանյանը երբ պատասխանել է, որ ծարավ է, ինքն առաջարկել է գնալ իր բնակարան` ջուր խմելու: Միասին քայլելով եկել են իր Մ.Ավետիսյան 4 փող. 8ա շենքի թիվ 14 բնակարան, Դ.Օհանյանը կանգնել է բնակարանի մուտքի դռան մոտ, ինքը խոհանոցից ջուր է բերել: Ջուրը խմելուց հետո Դ.Օհանյանն ասել է, որ դրամապանակը թողել է տանը և իրենից տրանսպորտի գումար է խնդրել` խոստանալով հաջորդ օրը վերադարձնել: Ինքը թղթի վրա գրել է իր բնակարանի հեռախոսահամարը և 1000 ՀՀ դրամի հետ տվել նրան, որպիսի զանգահարի իրեն և գումարը վերադարձնի: Դ.Օհայնյանը վերցնելով 1000 ՀՀ դրամ գումարը և հեռախոսահամարը հեռացել է, սակայն ուշ գիշեր նորից վերադարձել է, սկսել թակել իր բնակարանի մուտքի դուռը, փակ պատշգամբի պատուհանը, զանգահարել իր բնակարանի հեռախոսահամարին, բայց ինքը չի պատասխանել, դուռը չի բացել:
2010 թվականի սեպտեմբերի 07-ին` ժամը 14:50-ի սահմաններում Դ.Օհանյանը սկսել է պարբերապար զանգահարել իր Երևան քաղաքի Մ.Ավետիսյան 4 փողոցի 8ա շենքի 14 բնակարանի 28-48-45 հեռախոսահամարին և իրենից պահանջել 5000 ՀՀ դրամ գումար, սպառնալով, որ այդ գումարը չտալու դեպքում իրեն ՙխայտառակ՚ անել, իր երեխաներին և հարևաններին ասել, որ ինքը անբարոյական է: Տեսնելով, որ Դ.Օհանյանը իրեն հանգիստ չի տալիս, ստիպված ասել է, որ գա իր բնակարանի փակ պատշգամբի մոտ ու վերցնի պահանջած 5000 ՀՀ դրամ գումարը, որից հետո զանգահարել է ոստիկանության Քանաքեռ-Զեյթուն բաժին և հայտնել այդ մասին: Երբ Դ.Օհանյանը մոտեցել է իր բնակարանի պատշգամբի պատուհանի մոտ ոստիկանության աշխատակիցները բռնել են նրան և բերման ենթարկել ոստիկանություն:
Գ/Թ 19-21

Գործով վկա ª Նարինե Ղազարի Վարդանյանի Նախաքննության փուլում տված ցուցմունքով այն մասին, որ 2010 թվականի սեպտեմբերի 05-ի լույս 06-ի գիշերը, ժամը 04:30-ի սահմաններում, գտնվելով իր Երևան քաղաքի Մ.Ավետիսյան 4 փողոցի 8ա շենքի 15 բնակարանում, լսել է հեռախոսազանգի և դռան թակոցների ձայներ, վեր կենալով անկողնուց մոտեցել է բնակարանի մուտքի դռանը և դիտանցքից տեսել, որ իր հարևանուհի Լ.Մկրտչյանի բնակարանը մի անծանոթ, մոտ 50 տարեկան մարդ թակում է: Հետագայում Լ.Մկտչյանից իմացել է, որ այդ անձնավորությունը վերջինիս անընդհատ անհանգստացել է, զանգահարել և գումար է պահանջել,որի համար Լ.Մկրտչյանը այդ մասին հայտնել է ոստիկանությանը և ոստիկանության աշխատակիցները այդ անձնավորությանը բերման են ենթարկել ոստիկանություն: Իմացել է նաև , որ այդ անծանոթ մարդու անունը Դավիթ է, ազգանունը` Օհանյան և որ վերջինս 2010թ. սեպտեմբերի 07-ին` ժամը 14:50-ի սահմաններում պարբերաբար զանգահարել է Լ.Մկրտչյանի բնակարանի 28-48-45 հեռախոսահամարին և նրա մասին արատավորող տեղեկություններ հրապարակելու սպառնալիքով պահանջել 5000 ՀՀ դրամ գումար:
Գ/Թ 34-35

Գործով վկա ª Ամալյա Տաճատի Մովսիսյանի նախաքննական ցուցմունքով այն մասին, որ 2010 թվականի սեպտենբերի 05-ի ուշ գիշերը գտնվելով իր Երևան քաղաքի Մ.Ավետիսյան 4 փողոցի 8ա շենքի 21 բնակարանում, լսել է, որ ինչ որ մեկը ասել է ՙԼյուբա դուռը բաց, թե չէ հարևաններիդ մոտ խայտառակ կանեմ՚, սակայն ուշադրություն չի դարձրել: Հաջորդ օրը իր հարևանուհի Լ.Մկրտչյանին հարցրել է, թե ով էր գիշերը իրեն նման բան ասում, վերջինս պատասխանել է, որ մի անծանոթ է, ընկել է իր հետևից: Մի քանի օր անց Լ.Մկրտչյանից իմացել է, որ այդ անձնավորությունը նրանից գումար է պահանջել, Լ.Մկրտչյանը զանգահարել է ոստիկանություն և հայտնել այդ մասին, որից հետո ոստիկանության աշխատակիցները նրան բերման են ենթարկել ոստիկանություն: Հետագայում իմացել է նաև, որ այդ անձնավորությունը եղել է Դավիթ Օհանյանը, որը 2010թ. սեպտեմբերի 07-ին պարբերաբար զանգահարել է Լ.Մկրտչյանի բնակարանի 28-48-45 հեռախոսահամարին և նրա մասին արատավորող տեղեկություններ հրապարակելու սպառնալիքով պահանջել է 5000 ՀՀ դրամ գումար:
Գ/Թ 36-37

Վկա` Աշոտ Կարապետի Իրադյանի նախաքննական ցուցմունքով այն մասին, որ 2010 թվականի սեպտեմբերի 07-ին` ժամը 16:50-ի սահմաններում, Դրոյի փողոցում` Զեյթունի հացի գործարանի մոտ, իրեն է մոտեցել իր վաղեմի ծանոթ Դավիթ Օհանյանը և խնդրել տեղափոխել իրեն Մ.Ավետիսյան 4 փողոցի 8ա շենքի մոտ: Ինքը իր ՙՎԱԶ 2107՚ մակնիշի Լ 6913 պետհամարանիշի տաքսի մեքենայով նրան տարել է վերը նշված հասցե: Ճանապարհին Դ.Օհանյանը չի ասել, թե ինչ նպատակով է գնում այդ հասցե: Իջնելով մեքենայից Դ.Օհանյանը մոտեցել է շենքի 1-ին հարկի պատուհաններից մեկին և ինչ-որ մեկին ձայն տվել: Այդ պահին Դ.Օհանյանին են մոտեցել ոստիկանության երկու աշխատակիցներ և բերման ենթարկել ոստիկանություն: Հետագայում ոստիկանությունում իմացել է, որ Դ.Օհանյանը վերը նշված օրը զանգահարել է Լ.Մկրտչյանին և նրա մասին արատավորող տեղեկություններ հրապարակելու սպառնալիքով 5000 ՀՀ դրամ գումար պահանջել:
Գ/Թ 41-42

Լյուբով Գուրգենի Մկրտչյանի և Դավիթ Վլադիմի Օհանյանի առերես հարցաքննության արձանագրությամբ:
Գ/Թ 26-28

Ապացույց ճանաչված այլ փաստաթուղթ հանդիսացող, Լ.Մկրտչյանի Երևան քաղաքի Մ.Ավետիսյանի 4 փողոցի 8ա շենքի 14 բնակարանի 28-48-45 հեռախոսահամարի 01.09.2010թ.-ից մինչև 08.09.2010թ. մուտքային և ելքային հեռախոսազանգերի վերծանումների առկայությամբ:
Գ/Թ 38-39

4.Դատարանի իրավական վերլուծությունները
Դատարանը հետազոտելով ձեռք բերված ապացույցներն իրենց համակցությամբ, գտնում է, որ ամբաստանյալ Դավիթ Օհանյանի մեղավորությունը ՀՀ քրեական օրենսգրքի 182-րդ հոդվածի 3-րդ մասի 5-րդ կետի հատկանիշներով նախատեսված հանցանք կատարելու մեջ ապացուցված է, որի համար նա ենթակա է քրեական պատասխանատվության և պատժի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև հանցավորի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Դավիթ Օհանյանի պատասխանատվությունն ու պատիժը մեղմացնող կամ ծանրացնող հանգամանքներ Դատարանը չի արձանագրել:
Դավիթ Օհանյանի նկատմամբ ընտրված խափանման միջոց կալանքը պետք է թողնել անփոփոխ մինչև դատավճռի օրինական ուժի մեջ մտնելը:
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-373-րդ հոդվածներով դատարանը

Վ Ճ Ռ Ե Ց

Դավիթ Վլադիմիրի Օհանյանին մեղավոր ճանաչել ՀՀ քրեական օրենսգրքի 182-րդ հոդվածի 3-րդ մասի 5-րդ կետով և նրա նկատմամբ պատիժ նշանակել ազատազրկում վեց (6) տարի ժամկետով` առանց գույքի բռնագրավման:
Պատիժը կրելու սկիզբը հաշվել 2011թ. փետրվարի 08-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Դավիթ Օհանյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում: