ԵԱՔԴ/0169/01/10





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«8» դեկտեմբերի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ն.Աշրաֆյան
տուժող Ք.Մարտիրոսյան

դռնբաց դատական նիստում քննեց քրեական գործն ըստ մեղադրանքի`
Էդգար Ռոբերտի Խաչատրյանի` ծնված 1990 թվականի մայիսի 26-ին Երևան քաղաքում, ազգությամբ հայ, ՀՀ քաղաքացի, ութամյա կրթությամբ, չամուսնացած, չի աշխատում, նախկինում չդատապարտված, հաշվառված է Երևան քաղաքի Ռուբինյանց փողոցի 11-րդ շենքի 18-րդ բնակարանում: Մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 3-րդ կետով, արգելանքի տակ է 2010 թվականի օգոստոսի 17-ից:
1. Գործի դատավարական նախապատմությունը.
2010 թվականի օգոստոսի 15-ին ՀՀ ոստիկանության Քանաքեռ-Զեյթունի քննչական բաժնի քննիչ Ն.Համբարձումյանի որոշմամբ ՀՀ քրեական օրենսգրքի 177-րդ հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 09116910 քրեական գործը:
2010 թվականի օգոստոսի 20-ին ՀՀ ոստիկանության Քանաքեռ-Զեյթունի քննչական բաժնի քննիչ Ն.Համբարձումյանի որոշմամբ թիվ 09116910 քրեական գործով Էդգար Ռոբերտի Խաչատրյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 3-րդ կետով:
2010 թվականի նոյեմբերի 2-ին Էդգար Ռոբերտի Խաչատրյանի վերաբերյալ քրեական գործը մեղադրական եզրակացությամբ ուղարկվել է Դատարան:
Էդգար Ռոբերտի Խաչատրյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 3-րդ կետով` այն արարքի համար, որ նա 2010 թվականի օգոստոսի 14-ին` ժամը 21:30-ից 22:50-ն ընկած ժամանակահատվածում, հարմարեցված բանալիով բացել է Քնարիկ Եզնիկի Մարտիրոսյանի` Երևան քաղաքի Ռուբինյանց փողոցի 13-րդ շենքի 23-րդ բնակարանի մուտքի դուռը, ապօրինի մուտք գործել ներս և այնտեղից գաղտնի հափշտակել 212.000 ՀՀ դրամ, 112.264,16 ՀՀ դրամին համարժեք 304 ԱՄՆ դոլար, 70.884 ՀՀ դրամին համարժեք 150 եվրո, 1 հատ ոսկյա մատանի, 1 հատ ոսկյա շղթա` Քնարիկ Մարտիրոսյանին պատճառելով զգալի չափերի հասնող` 450.000 ՀՀ դրամի գույքային վնաս:
2. Ապացույցների հետազոտում և գնահատում.
Դատական քննության ընթացքում ամբաստանյալ Էդգար Խաչատրյանն առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ ինքը որևէ գողություն չի կատարել: Իսկ ինչ վերաբերում է գրավադրված մատանուն, ապա 2010 օգոստոսի 15-ին` ժամը 22:00-ի սահմաններում, իրենց` Ռուբինյանց փողոցի 11-րդ շենքից մի փոքր հեռու, ինքը գտել է մի կանացի մատանի և նույն օրն այն գրավադրել Կիևյան փողոցում գտնվող գրավատանը: Այդ մատանին գրավադրելու դիմաց ինքը գրավատնից ստացել է 25.000 ՀՀ դրամ, որն օգտագործել է իր անձնական կարիքների համար: Մատանին գտնելու և այն գրավադրելու վերաբերյալ նախնական քննության մարմնին չի հայտնել, քանի որ իր մոտ առկա է հիշողության կորուստ, և այդ մասին հիշել է միայն մեկ ամիս առաջ:
Ամբաստանյալ Էդգար Խաչատրյանը նախնական քննության ընթացքում` 2010 թվականի օգոստոսի 18-ին, ցուցմունք է տվել այն մասին, որ ինքը Երևան քաղաքի Ռուբինյանց փողոցի 13-րդ շենքի 23-րդ բնակարանից գողություն չի կատարել: 2010 թվականի օգոստոսի 14-ին Կիևյան փողոցում գտնվող «Նինելա» գրավատանը ինքը ոսկյա մատանի չի գրավադրել:
Տուժող Քնարիկ Մարտիրոսյանը դատական քննության ընթացքում ցուցմունք տվեց այն մասին, որ բնակվում է Երևան քաղաքի Ռուբինյանց փողոցի 13-րդ շենքի 23-րդ բնակարանում: 2010 թվականի օգոստոսի 14-ին` ժամը 19:00-ի սահմաններում, ինքը դուրս է եկել տնից և եղել է իրենց շենքի բակում: Տնից դուրս գալու ժամանակ իր ամուսինը եղել է տանը, ով «Լրաբեր» լրատվական ծրագիրը դիտելուց հետո նույնպես դուրս է եկել տնից: Նույն օրը` ժամը 22:30-ի սահմաններում, իր ամուսինը ցանկացել է գնալ տուն, սակայն տեսել է, որ իրենց տան դուռը բաց է և տանից գողություն է կատարվել: Այդ ժամանակ իր ամուսինը կանչել է իրեն և իրենք պարզել են, որ իրենց տնից գողացել են 212.000 ՀՀ դրամ, 150 Եվրո, 304 ԱՄՆ դոլար, մեկ ոսկյա մատանի ու շղթա:
Վկա Արկադի Խաչատրյանը նախնական քննության ընթացքում ցուցմունք է տվել, այն մասին, որ կնոջ հետ միասին բնակվում է Երևան քաղաքի Ռուբինյանց փողոցի 13-րդ շենքի 23-րդ բնակարանում: 2010 թվականի օգոստոսի 14-ին` ժամը 21:00-ի սահմաններում, ինքը դիտել է «Լրաբեր», իսկ կինը դուրս է եկել բակ: «Լրաբեր» լրատվական ծրագրի ավարտից հետո` ժամը 21:30-ի սահմաններում, ինքը նույնպես դուրս է եկել բակ: Նույն օրը` ժամը 22:50-ի սահմաններում, ինքը ցանկացել է գնալ տուն և նկատել է, որ տան դուռը կիսաբաց է, իսկ տան որոշ իրեր թափթփված են: Ինքն իսկույն հասկացել է, որ օտար անձ է մտել իր տուն, ու կանչել է կնոջը: Այնուհետև այդ մասին հայտնել են ոստիկանություն: Իրենց տունը զննելուց հետո պարզել են, որ տնից բացակայում է կնոջ` զմրուխտե քարով ոսկյա մատանին, բարակ ոսկյա շղթան, 304 ԱՄՆ դոլար, 150 եվոր և 200.000 ՀՀ դրամ: ԱՄՆ դոլարները եղել են երեք հատ 100 ԱՄՆ դոլարանոց և չորս հատ 1 ԱՄՆ դոլարանոց, եվրոն եղել է երեք հատ 50 եվրոանոց, իսկ 200.000 ՀՀ դրամը եղել է տարբեր թղթադրամներ: Բացի այդ կնոջ դրամապանակից գողացվել է նաև 12.000 ՀՀ դրամ: Գողացված ոսկյա մատանու արժեքը կարող էր կազմել 30.000 ՀՀ դրամ, իսկ շղթայի արժեքը` 18.000-20.000 ՀՀ դրամ: Հետագայում իմացել է, որ իրենց բնակարանից գողություն է կատարել Էդգար Ռոբերտի Խաչատրյանը, ով բնակվում է իրենց շենքի հարևանությամբ:
Վկա Նինա Կուցանյանը դատական քննության ընթացքում ցուցմունք տվեց այն մասին, որ Երևան քաղաքի Կիևյան 11 հասցեում գտնվող «Նինելա» գրավատունը պատկանում է իրեն: Իր գրավատանն իրերը գրավադրվում են միայն անձնագրի առկայությամբ: Ինքը բացառում է, որ որևէ անձ մեկ այլ անձի անձնագրով կամ դրա պատճենով իր գրավատանը գրավադրի որևէ իր և ստանա գումար: 2010 թվականի օգոստոսին (կոնկրետ օրը չի հիշում)` ժամը 20:00-ից հետո, իր գրավատուն է եկել ամբաստանյալը և ցանկություն հայտնել գրավադրել ոսկյա մատանի: Այդ ոսկյա մատանին ստուգվել է, ստուգվել նաև այն գրավադրողի անձնագիրը, որից հետո կնքվել է վարկային պայմանագիր: Վարկային պայմանագրի մեկ օրինակը տրվել է գրավադրողին: Նախնական քննության ընթացքում իր տված ցուցմունքը ճիշտ է և համապատասխանում է իրականությանը:
Վկա Նինա Կուցանյանը նախնական քննության ընթացքում ցուցմունք է տվել այն մասին, որ Երևան քաղաքի Կիևյան 11 հասցեում գտնվող «Նինելա» գրավատունը պատկանում է իրեն: Գրավատունն աշխատում է ժամը` 11:00-ից մինչև 01:00-ն: 2010 թվականի օգոստոսի 14-ին` ժամը 23:00-ի սահմաններում, իր գրավատուն է եկել մի քաղաքացի և ցանկացել գրավադրել ոսկյա մատանի: Մատանին ստուգվել է իրենց կողմից և պարզվել, որ այն ոսկյա է, ու դրա դիմաց կարող են տրամադրել 25.000 ՀՀ դրամ: Իրենք հաճախորդից պահանջել են նրա անձնագիրը, և կնքվել է վարկային պայմանագիր: Ըստ անձնագրի տվյալների այդ անձը հանդիսացել է Էդգար Ռոբերտի Խաչատրյանը: Վարկային պայմանագրի մեկ օրինակը և 25.000 ՀՀ դրամը հանձնվել է վարկառուին, իսկ պայմանագրի մյուս օրինակը` իրավապահ մարմիններին:
Դեպքի վայրի զննության 2010 թվականի օգոստոսի 14-ի արձանագրության համաձայն` դեպքի վայր է հանդիսացել Երևան քաղաքի Ռուբինյանց փողոցի 13-րդ շենքի 23-րդ բնակարանը, որը գտնվել է չորս հարկանի քարե շենքի 2-րդ մուտքի 1-ին հարկում: Դռան աջ հատվածում` գետնից 0,7 մետր բարձրության վրա առկա է եղել ներփորված փական: Այդ փականի վրա զննության պահին ներգործության հետքեր չեն հայտնաբերվել:
Առգրավում կատարելու մասին 2010 թվականի օգոստոսի 17-ի արձանագրության համաձայն` Կիևյան 11/3 հասցեում գտնվող «Նինելա» գրավատնից առգրավվել է մեկ ոսկյա մատանի` 3,3 գրամ քաշով, 585 հարգի ոսկուց, որի միջնամասում առկա են եղել կանաչավուն երանգի քարեր, իսկ դրա կողքին շարված են եղել ապակու երանգով ութ քարեր: Մատանու վերին հատվածում առկա է եղել քերծվածք:
Առարկաները ճանաչման ներկայացնելու մասին 2010 թվականի օգոստոսի 17-ի արձանագրության համաձայն` Քնարիկ Եզնիկի Մարտիրոսյանին ճանաչման են ներկայացվել մեկ ոսկյա մատանի` վերնամասում կանաչավուն երանգի մեկ և կողքերը անգույն երանգի ութ քարերով, երեք այլ միանման մատանիների հետ: Քնարիկ Մարտիրոսյանը, զննելով իրեն ճանաչման ներկայացված առարկաները, մատնացույց է արել ձախից 2-րդ մատանին և հայտարարել, որ դա իր մատանին է, որը 2010 թվականի օգոստոսի 14-ին գողացվել է իրենց տնից: Այն ճանաչել է մատանու ձևից, քարերի դասավորությունից, միջնամասում տեղադրված կանաչ քարից, մատանու վերնամասի քարերից, կողային մասում գտնվող քերծվածքից` նշելով, որ այդ քերծվածքն առաջացել է նույն մատանին մյուս մատանու հետ դնելուց և մատանիների շփումից:
ՀՀ ոստիկանության Քանաքեռ-Զեյթունի քննչական բաժնի քննիչ Ն.Համբարձումյանի կողմից 2010 թվականի օգոստոսի 17-ին կազմված տեղեկանքի համաձայն` «Նինելա» գրավատնից առգրավված մատանին տուժող Քնարիկ Մարտիրոսյանին ճանաչման ներկայացնելու համար տեղադրվել է երեք այլ միանման մատանիների շարքում և համարակալվել: Համարակալումից հետո նշված մատանին ընկել է ձախից 2-րդ համարի տակ:
Փորձագետի 2010 թվականի օգոստոսի 30-ի թիվ 28401010 եզրակացության համաձայն` փորձաքննությանը ներկայացված մատանու միջին շուկայական արժեքը 2010 թվականի օգոստոսի 14-ի դրությամբ, առկա ապրանքային վիճակի հաշվառմամբ, կարող էր կազմել 31.000 ՀՀ դրամ:
Իրեղեն ապացույց ճանաչելու և քրեական գործին կցելու մասին 2010 թվականի սեպտեմբերի 1-ի որոշան համաձայն` «Նինելա» գրավատնից առգրավված ոսկյա մատանին ճանաչվել է իրեղեն ապացույց և կցվել քրեական գործին:
Խուզարկություն (առգրավում) կատարելու մասին 2010 թվականի օգոստոսի 17-ի արձանագրության համաձայն` Էդգար Ռոբերտի Խաչատրյանի` Երևան քաղաքի Ռուբինյանց փողոցի 11-րդ շենքի 18-րդ բնակարանի խուզարկության ժամանակ Սուսաննա Խաչատրյանը այլ առարկաների հետ միասին ներկայացրել է «Անձնական քարտ N-0-33907» գրառմամբ վարկային պայմանագիրը, ոսկյա խաչ` իր շղթայով, որոնք փաթեթավորվել, կնքվել և առգրավվել են:
Առարկաները ճանաչման ներկայացնելու մասին 2010 թվականի սեպտեմբերի 1-ի արձանագրության համաձայն` Քնարիկ Եզնիկի Մարտիրոսյանին ճանաչման են ներկայացվել մեկ ոսկյա շղթա` երեք այլ ոսկյա շղթաների հետ միասին: Քնարիկ Մարտիրոսյանը, զննելով իրեն ճանաչման ներկայացված առարկաները, հայտարարել է, որ իրեն ճանաչման ներկայացված չորս ոսկյա շղթաների մեջ չկա իր ոսկյա շղթան, որը 2010 թվականի օգոստոսի 14-ին գողացվել է իրենց բնակարանից:
ՀՀ ոստիկանության Քանաքեռ-Զեյթունի քննչական բաժնի քննիչ Ն.Համբարձումյանի կողմից 2010 թվականի սեպտեմբերի 1-ին կազմված տեղեկանքի համաձայն` 2010 թվականի օգոստոսի 17-ին Էդգար Խաչատրյանի բնակարանում կատարված խուզարկության ժամանակ Սուսաննա Խաչատրյանի կողմից ներկայացված ոսկյա շղթան տուժող Քնարիկ Մարտիրոսյանին ճանաչման ներկայացնելու համար տեղադրվել է երեք այլ միանման շղթաների շարքում և համարակալվել: Համարակալումից հետո նշված շղթան ընկել է ձախից 3-րդ համարի տակ:
Փորձագետի 2010 թվականի սեպտեմբերի 2-ի թիվ 1956 եզրակացության համաձայն` փորձաքննությանը ներկայացված դռան կտրակցովի փականը, միակողմանի գլանաձև մեխանիզմը և երկու բանալիները պատրաստված են գործարանային եղանակով: Դռան կտրակցովի փականը, գլանաձև մեխանիզմը ներկայացված վիճակում սարքին են, փականը պիտանի է օգտագործման համար և ներկայացված բանալիները նախատեսված են վերջիններն աշխատեցնելու համար: Փորձաքննության ներկայացված դռան կտրակցովի փականի, դրսի կողմից աշխատացնող, միակողմանի գլանաձև մեխանիզմների մեջերը` բույթերին և բանալու անցքերում օտար մարմնի գործադրման հետքեր չեն հայտնաբերվել: Ներկայացված կտրակցովի փականը կարող էր բացվել ինչպես ներկայացված բանալու միջոցով, այնպես էլ որևէ հարմարեցված կամ կրկնօրինակված բանալու միջոցով, որը բույթերի վրա օտար հետքեր չի առաջացրել:
Իրեղեն ապացույց ճանաչելու և ի պահ հանձնելու մասին 2010 թվականի սեպտեմբերի 9-ի որոշան համաձայն` Երևան քաղաքի Ռուբինյանց փողոցի 13-րդ շենքի 23-րդ բնակարանի դռան փականն ու երկու բանալիները ճանաչվել են իրեղեն ապացույց և ի պահ հանձնվել նույն բնակարանի բնակիչ Արկադի Մկրտիչի Խաչատրյանին:
Այլ փաստաթղթերն ապացույց ճանաչելու մասին 2010 թվականի հոկտեմբերի 25-ի որոշման համաձայն` թիվ 09116910 քրեական գործով թիվ 0-33907 պայմանագրերի երկու օրինակները որպես այլ փաստաթղթեր ճանաչվել են ապացույց և կցվել քրեական գործին:
Թիվ 0-33907 գրավատոմսի համաձայն` 2010 թվականի օգոստոսի 14-ին Էդգար Ռոբերտի Խաչատրյանը Երևան քաղաքի Կիևյան 11 հասցեում գտնվող «Նինելա» գրավտանը գրավադրել է 3,3 գրամ քաշով, 583 հարգի ոսկուց պատրաստված մատանի:
ՀՀ կենտրոնական բանկի պաշտոնական կայքի (www.cba.am) համաձայն` 2010 թվականի օգոստոսի 13-ին 1 ԱՄՆ դոլարի փոխարժեքը եղել է 367,29 ՀՀ դրամ, իսկ 1 եվրոի փոխարժեքը` 472,56 ՀՀ դրամ:
ՀՀ առողջապահության նախարարության «Հոգեբուժական բժշկական կենտրոն» ՓԲ ընկերության Նուբարաշենի հոգեբուժական կլինիկայի ղեկավարի 2010 թվականի օգոստոսի 21-ի թիվ 394 գրության համաձայն` Էդգար Ռոբերտի Խաչատրյանը Արաբկիրի զինկոմիսարիատի ուղեգրով 2008 թվականի ապրիլի 7-ից 14-ը զորակոչային փորձաքննության մեջ է գտնվել ՀՀ առողջապահության նախարարության «Հոգեբուժական բժշկական կենտրոն» ՓԲ ընկերության Նուբարաշենի հոգեբուժական կլինիկայում և ախտորշվել է «Օրգանական ծագման էմոցիոնալ անկայուն խանգարում»:
ՀՀ առողջապահության նախարարությանը կից միջգերատեսչական ստացիոնար դատահոգեբուժական փորձաքննությունների հանձնաժողովի 2010 թվականի հոկտեմբերի 7-ի թիվ 160 եզրակացության համաձայն` Էդգար Ռոբերտի Խաչատրյանը հոգեկան հիվանդությամբ չի տառապել և չի տառապում, նրա մոտ առկա է «Օրգանական ծագման էմոցիոնալ անկայուն խանգարում»: Այդ մասին են վկայում ինչպես անամնեստիկ տվյալները, այնպես էլ ներկա հետազոտման արդյունքները: Ինչպես իրավախախտումը կատարելիս, այնպես էլ ներկայում նա կարող էր և կարող է գիտակցել իր գործողությունների վտանգավորությունը և ղեկավարել դրանք: Ուստի իրեն մեղսագրվող արարքի նկատմամբ Էդգար Ռոբերտի Խաչատրյանին հարկ է ճանաչել մեղսունակ: Իր ներկա հոգեկան վիճակով նա կարող է մասնակցել դատաքննչական գործողություններին:
ՀՀ ոստիկանության ինֆորմացիոն կենտրոնի պահանջագրի համաձայն` Էդգար Ռոբերտի Խաչատրյանը նախկինում դատապարտված չի եղել:
Տուժող ճանաչելու մասին 2010 թվականի օգոստոսի 15-ի որոշման համաձայն` թիվ 09116910 քրեական գործով Քնարիկ Եզնիկի Մարտիրոսյանը ճանաչվել է տուժող:
Քաղաքացիական հայցվոր ճանաչելու մասին 2010 թվականի օգոստոսի 15-ի որոշման համաձայն` թիվ 09116910 քրեական գործով Քնարիկ Եզնիկի Մարտիրոսյանը ճանաչվել է քաղաքացիական հայցվոր և նրա քաղաքացիական հայցի պահանջը կազմել է 450.000 ՀՀ դրամ:
Գույքի վրա կալանք դնելու մասին 2010 թվականի հոկտեմբերի 26-ի որոշման համաձայն` կալանք է դրվել Էդգար Ռոբերտի Խաչատրյանին պատկանող անշարժ և շարժական գույքի վրա:
Գույքի վրա կալանք դնելու մասին 2010 թվականի հոկտեմբերի 26-ի որոշման համաձայն` կալանք է դրվել Էդգար Ռոբերտի Խաչատրյանին պատկանող ոսկյա խաչի և շղթայի վրա:
Ձերբակալման 2010 թվականի օգոստոսի 17-ի արձանագրության համաձայն` 2010 թվականի օգոստոսի 17-ին` ժամը 21:00-ին, Էդգար Ռոբերտի Խաչատրյանը ձերբակալվել է:
Կալանավորումը որպես խափանման միջոց ընտրելու միջնորդությունը քննելու մասին Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2010 թվականի օգոստոսի 20-ի որոշման համաձայն` Էդգար Ռոբերտի Խաչատրյանի նկատմամբ որպես խափանման միջոց կիրառվել է կալանավորումը` երկու ամիս ժամկետով:
Այսպիսով, Դատարանը գտնում է, որ մտացածին են և գործով ձեռք բերված օբյեկտիվ տվյալներով հերքվում են ամբաստանյալ Էդգար Խաչատրյանի` դատական քննության ընթացքում տված ցուցմունքն այն մասին, որ ինքը որևէ գողություն չի կատարել, իսկ Կիևյան փողոցում գտնվող գրավատանը գրավադրած մատանին նույն օրը գտել է իրենց շենքի մոտակայքում, ինչպես նաև նախնական քննության ընթացքում տված ցուցմունքն այն մասին, որ 2010 թվականի օգոստոսի 14-ին Կիևյան փողոցում գտնվող «Նինելա» գրավատանը ինքը ոսկյա մատանի չի գրավադրել:
3. Դատարանի իրավական վերլուծությունները.
Վերոգրյալ ապացույցները վերլուծելու և համադրելու արդյունքում Դատարանը գալիս է այն եզրահանգման, որ Էդգար Ռոբերտի Խաչատրյանը 2010 թվականի օգոստոսի 14-ին` ժամը 21:30-ից 22:50-ն ընկած ժամանակահատվածում, ապօրինի մուտք է գործել Քնարիկ Եզնիկի Մարտիրոսյանի` Երևան քաղաքի Ռուբինյանց փողոցի 13-րդ շենքի 23-րդ բնակարան և գաղտնի, ապօրինի, անհատույց ու շահադիտական նպատակներով վերցրել զգալի չափերի` 443.540,16 ՀՀ դրամ ընդհանուր արժողության գումար և ոսկյա զարդեր, այդ թվում` 212.000 ՀՀ դրամ, 111.656,16 ՀՀ դրամին համարժեք 304 ԱՄՆ դոլար, 70.884 ՀՀ դրամին համարժեք 150 եվրո, 31.000 ՀՀ դրամ արժողության մեկ ոսկյա մատանի և 18.000 ՀՀ դրամ արժողության մեկ ոսկյա շղթա:
Այսինքն, Էդգար Ռոբերտի Խաչատրյանը կատարել է արարք, որը համապատասխանում է ՀՀ քրեական օրենսգրքի 177-րդ հոդվածի 2-րդ մասի 3-րդ կետի հատկանիշներին:
Ապացուցված է Էդգար Ռոբերտի Խաչատրյանի մեղավորությունը ՀՀ քրեական օրենսգրքի 177-րդ հոդվածի 2-րդ մասի 3-րդ կետով նախատեսված արարքը կատարելու մեջ:
Դատարանը գտնում է, որ Էդգար Խաչատրյանի պատասխանատվությունն ու պատիժը մեղմացնող հանգամանքներ պետք է դիտել նախկինում արատավորված` դատապարտված չլինելը և վատառողջ լինելը:
Դատարանը միաժամանակ արձանագրում է, որ Էդգար Խաչատրյանի անձը դրականորեն բնութագրող և պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Էդգար Խաչատրյանը ենթակա է քրեական պատասխանատվության և պատժի:
Դատարանը, հաշվի առնելով Էդգար Խաչատրյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Էդգար Խաչատրյանի կատարած արարքի համար ՀՀ քրեական օրենսգրքի 177-րդ հոդվածի 2-րդ մասի սանկցիայով նախատեսված է պատիժ միայն ազատազրկման ձևով գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիu անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Ամբաստանյալ Էդգար Խաչատրյանի պատժի կրման սկիզբը պետք է հաշվել 2010 թվականի օգոստոսի 17-ից, քանի որ նա ձերբակալվել է այդ օրը, իսկ 2010 թվականի օգոստոսի 20-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Էդգար Խաչատրյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցը ենթակա է արդյոք բավարարման, ում օգտին և ինչ չափով:
Սույն քրեական գործով քաղաքացիական հայց է ներկայացրել տուժող Քնարիկ Եզնիկի Մարտիրոսյանը` ամբաստանյալ Էդգար Խաչատրյանից պահանջելով հանցագործությամբ իրեն պատճառված վնասը` 450.000 ՀՀ դրամը, սակայն սույն գործով ձեռք բերված ապացույցներով հաստատվում է, որ Քնարիկ Մարտիրոսյանին հանցագործությամբ պատճառվել է ոչ թե 450.000 ՀՀ դրամի վնաս, այլ 261.000 ՀՀ դրամի, 304 ԱՄՆ դոլարի և 150 եվրոի վնաս: Նշվածը հաշվի առնելով և նկատի ունենալով, որ Քնարիկ Մարտիրոսյանին պատճառված վնասի մի մասը` 31.000 ՀՀ դրամ արժողության` իրեղեն ապացույց ճանաչված ոսկյա մատանին ներքոհիշյալ հիմանվորմամբ պետք է վերադարձվի Քնարիկ Մարտիրոսյանին, Դատարանը գտնում է, որ Էդգար Խաչատրյանի դեմ ներկայացված Քնարիկ Մարտիրոսյանի քաղաքացիական հայցի պահանջը պետք է բավարարել մասնակի և Էդգար Խաչատրյանից հօգուտ Քնարիկ Մարտիրոսյանի, որպես հանցագործությամբ պատճառված վնաս, պետք է բռնագանձել 230.000 ՀՀ դրամ, ինչպես նաև հատուցման պահին 304 ԱՄՆ դոլարին և 150 եվրոյին համարժեք ՀՀ դրամ (261.000 ՀՀ դրամից, 304 ԱՄՆ դոլարից և 150 եվրոից հանելով (հաշվանցելով) 31.000 ՀՀ դրամը):
ՀՀ քրեական դատավարության օրենսգրքի 360-րդ հոդվածի 1-ին մասի 11-րդ կետի համաձայն` դատարանը պետք է լուծի նաև հանցագործությամբ պատճառված գույքային վնասի հատուցումը կամ գույքի հնարավոր բռնագրավումն ապահովելու համար գույքի վրա դրված կալանքը վերացնելու հարցը, իսկ նույն օրենսգրքի 238-րդ հոդվածը սահմանում է, որ գույքը քրեական վարույթն իրականացնող մարմնի որոշմամբ ազատվում է կալանքից, եթե քաղաքացիական հայցը հետ վերցվելու, կասկածյալին կամ մեղադրյալին վերագրվող արարքի որակումը փոխվելու հետևանքով կամ այլ պատճառներով վերացել է գույքի վրա կալանք դնելուց բխող սահմանափակումների կիրառման անհրաժեշտությունը:
2010 թվականի հոկտեմբերի 26-ի որոշումներով քաղաքացիական հայցի և դատական ծախսերի ապահովման նպատակով կալանք է դրվել Էդգար Խաչատրյանին պատկանող անշարժ և շարժական գույքի, ինչպես նաև ոսկյա խաչի ու շղթայի վրա: Դատարանը, նկատի ունենալով, որ սույն քրեական գործով ներկայացված քաղաքացիական հայցը պետք է բավարարվի մասնակի, գտնում է, որ Էդգար Խաչատրյանի գույքի վրա դրված կալանքը պետք է թողնել անփոփոխ:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2010 թվականի սեպտեմբերի 1-ի որոշմամբ իրեղեն ապացույց ճանաչված` «Նինելա» գրավատնից առգրավված մատանին պետք է վերադարձնել տուժող Քնարիկ Եզնիկի Մարտիրոսյանին, իսկ 2010 թվականի սեպտեմբերի 9-ի որոշմամբ իրեղեն ապացույց ճանաչված և Արկադի Մկրտիչի Խաչատրյանին ի պահ հանձնված դռան փականն ու երկու բանալիները` թողնել Արկադի Մկրտիչի Խաչատրյանի տնօրինությանը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը ամբաստանյալ Էդգար Խաչատրյանից ենթակա չեն բռնագանձման, քանի որ քաղաքացիական հայցը վերոգրյալ հիմնավորմամբ պետք է բավարարել մասնակի: Բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մաuի 2-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 5-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 308-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Էդգար Ռոբերտի Խաչատրյանին մեղավոր ճանաչել ՀՀ քրեական օրենսգրքի 177-րդ հոդվածի 2-րդ մասի 3-րդ կետով և պատիժ նշանակել ազատազրկում` 2 (երկու) տարի 6 (վեց) ամիս ժամկետով` պատժի կրման սկիզբը հաշվելով 2010 թվականի օգոստոսի 17-ից:
Էդգար Ռոբերտի Խաչատրյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Քնարիկ Եզնիկի Մարտիրոսյանի քաղաքացիական հայցը բավարարել մասնակի. Էդգար Ռոբերտի Խաչատրյանից հօգուտ Քնարիկ Եզնիկի Մարտիրոսյանի, որպես հանցագործությամբ պատճառված վնաս, բռնագանձել 230.000 (երկու հարյուր երեսուն հազար) ՀՀ դրամ, հատուցման պահին 304 (երեք հարյուր չորս) ԱՄՆ դոլարին և 150 (հարյուր հիսուն) եվրոին համարժեք ՀՀ դրամ:
Էդգար Ռոբերտի Խաչատրյանի գույքի վրա դրված կալանքը թողնել անփոփոխ:
Դատավճիռն օրինական ուժի մեջ մտնելուց հետո` 2010 թվականի սեպտեմբերի 1-ի որոշմամբ իրեղեն ապացույց ճանաչված` «Նինելա» գրավատնից առգրավված մատանին վերադարձնել տուժող Քնարիկ Եզնիկի Մարտիրոսյանին, իսկ 2010 թվականի սեպտեմբերի 9-ի որոշմամբ իրեղեն ապացույց ճանաչված և Արկադի Մկրտիչի Խաչատրյանին ի պահ հանձնված դռան փականն ու երկու բանալիները թողնել Արկադի Մկրտիչի Խաչատրյանի տնօրինությանը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ