գործ N ԵԱՔԴ/0151/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
դատական նիստերի քարտուղար Ե. Կարապետյան
մեղադրող Ն. Աշրաֆյան
ամբաստանյալի օրինական ներկայացուցիչ Ա. Մանուկյան
պաշտպան Մ. Սարգսյան
տուժողներ Գ.Գրիգորյան, Վ.Մանավազյան, Ս.Մանավազյան

2010թ. նոյեմբերի 10-ին, Երևան քաղաքում, դռնբաց դատական նիստում, արագացված դատաքննության կարգով քննելով քրեական գործն ըստ մեղադրանքի անչափահաս Արտակ Հրաչյայի Մանուկյանի, ծնված 30.09.1995թ., Երևան քաղաքում, ազգությամբ հայ, ՀՀ քաղաքացի, ութամյա կրթությամբ, ամուրի, նախկինում չդատված, չի աշխատում, հաշվառված և բնակվում է Երևան քաղաքի Քանաքեռի 12 փողոցի 33 տանը, մեղադրվում է ՀՀ քրեական օրենսգրքի 177 հոդվածի 2-րդ մասի 3-րդ և 4-րդ կետերով, խափանման միջոց է ընտրվել ծնողի հսկողության հանձնելը,

Պ Ա Ր Զ Ե Ց
1.Գործի դատավարական նախապատմությունը.
2010թ. օգոստոսի 20-ին ՀՀ ոստիկանության ՔԳՎ Երևան քաղաքի ՔՎ Քանաքեռ-Զեյթուն քննչական բաժնում ՀՀ քրեական օրենսգրքի 177 հոդվածի 2-րդ մասի 3-րդ կետի հատկանիշներով հարուցվել է թիվ 09117510 քրեական գործը:
2010թ. սեպտեմբերի 20-ին Արտակ Հրաչյայի Մանուկյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 3-րդ և 4-րդ կետերով, նրա նկատմամբ որպես խափանման միջոց ընտրվել է ծնողի հսկողությանը հանձնելը:
2010թ. սեպտեմբերի 30-ին որոշում է կայացվել թիվ 09117510 քրեական գործով Արտակ Հրաչյայի Մանուկյանի կողմից Սուրեն Զավենի Մանավազյանի` Երևան քաղաքի Քանաքեռի 12 փողոցի 31/1 տան ննջասենյակից 10.000 ՀՀ դրամ կանխիկ գումար գաղտնի հափշտակելու մասով Արտակ Մանուկյանի նկատմամբ քրեական հետապնդում չիրականացնել` քրեական պատասխանատվության ենթարկելու` օրենքով նախատեսված տարիքին հասած չլինելու պատճառաբանությամբ:
2010թ. հոկտեմբերի 8-ին թիվ 09117510 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախաքննության մարմինն ամբաստանյալ Արտակ Հրաչյայի Մանուկյանին մեղադրանք է առաջադրել հետևյալ արարքի համար.
Անչափահաս ամբաստանյալ Արտակ Հրաչյայի Մանուկյանը 2010թ. օգոստոսի 19-ին, ժամը 2340-ի սահմաններում, գտնվելով Երևան քաղաքի Քանաքեռի 10 փողոցի 9 հասցեում գտնվող տան մոտ, որոշել է գողություն կատարել նշված տանը կից մթերային խանութից: Տեսնելով, որ տան դարպասի դուռը փականով փակ չէ, այդ դռնով մտել է թիվ 9 տան բակ, որտեղից խանութի պահեստասենյակի բաց դռնով մտել է տանը կից մանրածախ առևտրի խանութ և այնտեղից գաղտնի հափշտակել 12.900 ՀՀ դրամ գումար` մանրադրամներով, 20.000 ՀՀ դրամ արժողությամբ ՙՍամսունգ SGH-E350՚ տեսակի բջջային հեռախոս իր քարտով և նուն ճանապարհով դուրս է եկել: Տան բակում Արտակ Մանուկյանը պատահաբար դիպել է այնտեղ դրված փայտե տախտակներին: Այդ ձայնի վրա դեպի իրեն է եկել տան բնակչուհի Գոհար Գրիգորյանը և տեսել փախչող երիտասարդին: Գոհար Գրիգորյանը չի տեսել նրա դեմքը և չի իմացել, որ նա գողություն է կատարել իր խանութից` մտածելով, որ նշված անձնավորությունը չի հասցրել մտնել խանութ: Գողության մասին իմացել է միայն հաջորդ օրն առավոտյան: Գողություն կատարելուց հետո Արտակ Մանուկյանը գնացել է Քանաքեռի 12 փողոցում գտնվող ցայտաղբյուրի մոտ, որտեղ մանրադրամները լցրել է իր դրամապանակի մեջ, գողացված բջջային հեռախոսից հանել է քարտը և այն կոտրելով նետել մոտակայքում գտնվող ջրատար առուն և գնացել տուն:
Հաջորդ օրն Արտակ Մանուկյանը հեռախոսը նվիրել է իր մորը` Արմինե Գրիշայի Մանուկյանին, խաբելով նրան, որ այն գնել է իր ընկերոջ մորից 5000 դրամով և գումարը կարող են հետագայում մաս-մաս մարել: Արմինե Մանուկյանն առանց որևէ բան կասկածելու վերցրել է նշված բջջային հեռախոսը: 12.900 ՀՀ դրամով Արտակ Մանուկյանն իր համար գնել է պաղպաղակներ, քաղցրավենինքեր, նստել է կարուսել:
Բացի այդ, կրկին անգամ, 2010թ. սեպտեմբերի 10-ին, ժամը 13-ի սահմաններում Արտակ Մանուկյանը բաց մուտքի դռնով մտել է իր քեռու որդու` Վահան Մանավազյանի Երևան քաղաքի Քանաքեռի 12 փողոցի 31 տուն: Բարձրանալով տան 2-րդ հարկ, հյուրասենյակից գաղտնի հափշտակել է 20.000 ՀՀ դրամ արժողությամբ ՙՍոնի-Էրիքսոն G900՚ տեսակի բջջային հեռախոսը և 2000 ՀՀ դրամ արժողությամբ ՙՍամսունգ՚ տեսակի բջջային հեռախոսի մարտկոցի լիցքավորիչը: Որոշ ժամանակ անց Արտակ Մանուկյանենց տան բակում նրան է մոտեցել Վահան Մանավազյանի եղբոր որդին` Հովհաննես Սուրենի Մանավազյանը և Արտակ Մանուկյանը խոստովանելով իր կատարած գողությունը հարկադրված գողացված ՙՍոնի- Էրիքսոն G900՚ տեսակի բջջային հեռախոսն ու ՙՍամսունգ՚ տեսակի բջջային հեռախոսի մարտկոցի լիցքավորիչը վերադարձրել է Վահան Մանավազյանին:
Նախաքննությամբ հիմնավորվել է նաև, որ Արտակ Մանուկյանը դեռևս 2009թ. սեպտեմբերի 5-ին` ցերեկը, բաց դռնով մտել է իր հոր քեռու մյուս որդի Սուրեն Զավենի Մանավազյանի` Երևան քաղաքի Քանաքեռի 12 փողոցի 31/1 տուն և տան ննջասենյակից գաղտնի հափշտակել 10.000 ՀՀ դրամ գումար: Կատարվածից մի քանի օր հետո Սուրեն Մանավազյանի որդին` Հովհաննես Մանավազյանը Արտակ Մանուկյանի մոտ կասկածելի վարքագիծ նկատելով, հարցրել է, թե արդյոք 10.000 դրամը նա է գողացել: Արտակ Մանուկյանը խոստովանել է, որ ինքն է գողացել: Հաջորդ օրը Արտակ Մանուկյանի մայրը` Արմինե Մանուկյանը փորձել է 10.000 ՀՀ դրամը վերադարձնել Սուրեն Մանավազյանին, սակայն ոչ Սուրեն Մանավազյանը և ոչ էլ նրա կինը` Գայանե Մանավազյանն այդ գումարը հետ չեն վերցրել:
Նշված արարքը կատարելու պահին Արտակ Մանուկյանը եղել է 13 տարեկան, այսինքն հասած չի եղել քրեական պատասխանատվության ենթարկելու` օրենքով նախատեսված տարիքին: Նշված հանգամանքը հաշվի առնելով նախաքննության մարմինը 2010թ. սեպտեմբերի 30-ին որոշում է կայացրել Արտակ Հրաչյայի Մանուկյանի կողմից Սուրեն Զավենի Մանավազյանի` Երևան քաղաքի Քանաքեռի 12 փողոցի 31/1 տան ննջասենյակից 10.000 ՀՀ դրամ գումար գաղտնի հափշտակելու մասով Արտակ Մանուկյանի նկատմամբ քրեական հետապնդում չիրականացնել` քրեական պատասխանատվության ենթարկելու` օրենքով նախատեսված տարիքին հասած չլինելու պատճառաբանությամբ:
3. Արագացված դատական քննություն .
Մինչև դատաքննությունն սկսելն ամբաստանյալ Արտակ Հրաչյայի Մանուկյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել են նաև ամբաստանյալի օրինական ներկայացուցիչ Արմինե Մանուկյանը և պաշտպան Մ.Սարգսյանը:
Մեղադրող Ն.Աշրաֆյանը դատական քննության արագացված կարգ կիրառելուն չի առարկել:
Տուժողներ Գոհար Գրիգորյանը, Վահան Մանավազյանը և Սուրեն Մանավազյանը քաղաքացիական հայցի պահանջից հրաժարվեցին և հայտարարեցին, որ արագացված քննություն կիրառելուն չեն առարկում:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արտակ Հրաչյայի Մանուկյանին առաջադրված մեղադրանքը ՀՀ քրեական օրենսգրքի 177 հոդվածի 2-րդ մասի 3-րդ և 4-րդ կետերով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 177 հոդվածի 2-րդ մասի 3-րդ և 4-րդ կետերի հատկանիշներին և արարքի որակումը ճիշտ է:
Ամբաստանյալ Արտակ Հրաչյայի Մանուկյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, անչափահաս է, նախկինում դատված չի եղել, դեռևս 2003թ. մահացել է նրա հայրը:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Արտակ Հրաչյայի Մանուկյանը ենթակա է քրեական պատասխանատվության և պատժի:
Դատարանը, հաշվի առնելով Արտակ Մանուկյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 177 հոդվածի 2-րդ մասի սանկցիայով նախատեսված է պատիժ միայն ազատազրկման ձևով, գտնում է, որ Արտակ Մանուկյանի նկատմամբ պատիժ պետք է նշանակել ազատազրկման ձևով:
Դատարանը միաժամանակ հաշվի առնելով վերը նշված հանգամանքները հանգում է հետևության, որ անչափահաս ամբաստանյալ Արտակ Մանուկյանի ուղղվելը հնարավոր է առանց ազատազրկման ձևով նշանակված պատիժը կրելու` պայմանականորեն պատիժը չկիրառելու պայմաններում:
Նկատի ունենալով, որ տուժողներ Գոհար Սարգսի Գրիգորյանը, Վահան Զավենի Մանավազյանը և Սուրեն Զավենի Մանավազյանը քաղաքացիական հայցերի պահանջ չեն ներկայացրել, դատարանը գտնում է, որ այդ հարցը պետք է համարել լուծված:
Դատարանն անդրադառնալով իրեղեն ապացույցների տնօրինման հարցին, գտնում է, որ 2010թ. սեպտեմբերի 30-ի որոշմամբ իրեղեն ապացույց ճանաչված` ՙՍամսունգ SGH-E350՚ տեսակի բջջային հեռախոսը, որը պատասխանատու պահպանման է հանձնվել տուժող Գոհար Սարգսի Գրիգորյանին, ՙՍոնի-Էիքսոն G900՚ տեսակի բջջային հեռախոսը և ՙՍամսունգ՚ տեսակի բջջային հեռախոսի մարտկոցի լիցքավորիչը, որոնք պատասխանատու պահպանման են հանձնվել տուժող Վահան Զավենի Մանավազյանին պետք է թողնել նրանց տնօրինությանը:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Արտակ Հրաչյայի Մանուկյանին մեղավոր ճանաչել ՀՀ քրեական օրենսգրքի 177 հոդվածի 2-րդ մասի 3-րդ և 4-րդ կետերով և նրան դատապարտել ազատազրկման երկու (2) տարի ժամկետով:
Կիրառել ՀՀ քրեական օրենսգրքի 70 հոդվածը և Արտակ Հրաչյայի Մանուկյանի նկատմամբ ազատազրկման ձևով նշանակված պատիժը պայմանականորեն չկիրառել` սահմանելով փորձաշրջան երկու (2) տարի ժամկետով:
Արտակ Հրաչյայի Մանուկյանի նկատմամբ ընտրված խափանման միջոցը` ծնողի հսկողությանը հանձնելը, թողնել անփոփոխ, մինչև դատավճռի օրինական ուժի մեջ մտնելը:
Տուժողներ Գոհար Գրիգորյանի, Վահան Մանավազյանի և Սուրեն Մանավազյանի քաղաքացիական հայցերի հարցը համարել լուծված:
Դատավճիռն օրինական ուժի մեջ մտնելուց հետո, իրեղեն ապացույց ճանաչված ՙՍամսունգ SGH-E350՚ տեսակի բջջային հեռախոսը, որը պատասխանատու պահպանման է հանձնվել տուժող Գոհար Գրիգորյանին, թողնել նրա տնօրինությանը:
ՙՍոնի-Էիքսոն G900՚ տեսակի բջջային հեռախոսը և ՙՍամսունգ՚ տեսակի բջջային հեռախոսի մարտկոցի լիցքավորիչը, որոնք պատասխանատու պահպանման են հանձնվել տուժող Վահան Մանավազյանին, թողնել նրա տնօրինությանը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ