17.11.2010թ. գործ N ԵԱՔԴ/0149/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը


նախագահությամբ` դատավոր Ա.Մկրտչյանի
քարտուղարությամբ` Հ.Արտաշեսյանի
մասնակցությամբ`
մեղադրող Ս.Գրիգորյանի
ամբաստնյալ Մ.Մեսրոպյանի
պաշտպան Յու.Խաչատրյանի

2010թ. նոյեմբերի 17-ին, դատարանում, դռնբաց դատական նիստում, արագացված դատաքննության կարգով քննեց քրեական գործն ըստ մեղադրանքի Մեսրոպ Ալֆրեդի Մեսրոպյանի, ծնված 26.05.1969թ. ք.Երևանում, ազգությամբ հայ, ՀՀ քաղաքացի, բարձրագույն կրթությամբ, չի աշխատում, չամուսնացած, նախկինում չդատված, հաշվառված և բնակվող ք.Երևան Մամիկոնյանց 27 շենք 30 բնակարանում:
Մեղադրվում է ՀՀ քրեական օրենսգրքի 279-րդ հոդվածի 2-րդ մասի 3-րդ կետով:
Պ Ա Ր Զ Ե Ց

1.Գործի դատավարական նախապատմությունը
Թիվ 14117610 քրեական գործը հարուցվել է 2010թ. հունիսի 22-ին:
2010թ. սեպտեմբերի 27-ին Մեսրոպ Մեսրոպյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 279-րդ հոդվածի 2-րդ մասի 3-րդ կետով և խափանման միջոց է ընտրվել ստորագրություն չհեռանալու մասին:
2010թ. հոկտեմբերի 04-ին թիվ 14117610 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

2.Գործի փաստական հանգամանքները
Նախաքննության մարմինն ամբաստանյալ Մեսրոպ Ալֆրեդի Մեսրոպյանին մեղադրանք է առաջադրել այն արարքի համար, որ նա 2008թ. ապրիլից մինչև 2010թ. ապրիլ ամիսը աշխատելով ՙԷյ-Ի-Ջի սերվիս՚ ՍՊԸ-ում որպես փականագործ, իրականացրել է Երևանի Թավրիզյան 37 տան ներտնային գազասպառման համակարգի անվտանգության պահանջներին չհամապատասխանող ծառայություններ: Այսպես.
Մ.Մեսրոպյանը 11.02.2009թ., 05.08.2009թ. և 07.02.2009թ. նշված տանը կատարելով ՍՊԸ կողմից սահմանված պլանային տեխնիկական սպասարկում չի հայտնաբերել և չի արձանագրել գազասպառման համակարգի այնպիսի խախտումներ, ինչպիսիք են գազասարքեր տեղադրված սենյակներում արտահոս օդափոխության անցուղու, ինչպես նաև օդի ներհոսքի համար նախատեսված մուտքի դռան և հատակի միջև բացակի բացակայությունները, հյուրասենյակում տեղադրված ջեռուցման վառարանի ծխատար խողովակների անցումը ննջասենյակով և դրանց միմյանց սխալ` ծխագազերի հոսքին հակառակ, միացումը, արձանագրել է միայն ջրատաքացուցիչի ծխատար խողովակի կրճատումը տանիքի համեմատ խախտումը, որից հետո կազմել է միայն ակտ` առանց խցանային փականը խցափակելու և հոլոգրաֆիկ կնիքով կնքելու:
Այդ ամենի հետևանքով Երևանի Թավրիզյան 37 տանը տեղակայված գազասարքավորումների շահագործման ընթացքում 2010թ. փետրվարի 6-ին տեղի է ունեցել բնական գազի թերայրման և այրման արգասիքների, մասնավորապես` ածխածնի մոնօքսիդի /շմոլ գազի/ թույլատրելի սահմանափակումները գերազանցող կոնցետրացիայի կուտակում, ինչի արդյունքում Արգինե Հովհաննեսի Զաքարյանը մահացել է` ածխածնի մոնօքսիդի սուր թունավորումից:

3. Արագացված դատական քննություն
Մինչև դատաքննությունն սկսելն ամբաստանյալ Մեսրոպ Մեսրոպյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է առաջադրված մեղադրանքի հետ, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել է նաև ամբաստանյալի պաշտպան Յու..Խաչատրյանը:
Մեղադրող Ս.Գրիգորյանը դատական քննության արագացված կարգ կիրառելու դեմ չի առարկել:
Տուժողի իրավահաջորդ Հովհաննես Զաքարյանը գրավոր դիմում է ներկայացրել դատարան և նշել, որ չի ցանկանում մասնակցել քրեական գործի դատական քննությանը, իսկ ամբաստանյալ Մ.Մեսրոպյանից որևէ պահանջ չունի:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:

4.Դատարանի իրավական վերլուծությունները
Դատարանը հետազոտելով մեղադրանքի հիմքում դրված ապացույցները գտնում է, որ ամբաստանյալ Մեսրոպ Մեսրոպյանին առաջադրված մեղադրանքը ՀՀ քրեական օրենսգրքի 279-րդ հոդվածի 2-րդ մասի 3-րդ կետի հատկանիշներով հիմնավորված է:
Ամբաստանյալ Մեսրոպ Մեսրոպյանի նկատմամբ պատիժ նշանակելիս, դատարանը հաշվի է առնում նրա կատարած արարքի բնույթը, հանրության համար վտանգավորության աստիճանը, ինչպես նաև անձը բնութագրող տվյալները:
Ամբաստանյալ Մեսրոպ Մեսրոպյանի անձը բնութագրող պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա ընդունել է մեղքը, անկեղծորեն զղջացել և աջակցել է հանցագործության բացահայտմանը, բնութագրվում է դրական, նախկինում դատված չի եղել, խնամքին է գտնվում 1940թ. ծնված 1-ին կարգի հաշմանդամ կույր մայրը:
Ամբաստանյալ Մեսրոպ Մեսրոպյանի պատասխանատվությունը և պատիժը ծանրացնող հանգամանքներ դատարանը չի արձանագրել:
Ղեկավարվելով ՀՀ քրեական դատավարության օրենսգրքի 357-360, 3751-3754 հոդվածներով, դատարանը

Վ Ճ Ռ Ե Ց


Մեսրոպ Ալֆրեդի Մեսրոպյանին մեղավոր ճանաչել ՀՀ քրեական օրենսգրքի 279-րդ հոդվածի 2-րդ մասի 3-րդ կետով և նրա նկատմամբ պատիժ նշանակել տուգանք ՀՀ նվազագույն աշխատավարձի չորսհարյուրապատիկի` 400.000 /չորս հարյուր հազար/ ՀՀ դրամի չափով:
Մեսրոպ Մեսրոպյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Դատավճիռը, բացի ՀՀ քրեական դատավարության օրենսգրքի 395-րդ հոդվածի 1-ին մասով նախատեսված հիմքից, կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում: