Ո Ր Ո Շ ՈՒ Մ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

ՙ28՚ հոկտեմբերի 2010թ. ք.Երևան


Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղար Ե.Կարապետյան, մասնակցությամբ մեղադրող Ն.Աշրաֆյանի, տուժող Ա.Ներսիսյանի, դռնբաց դատական նիստում քննելով քրեական գործն ըստ մեղադրանքի Արմեն Աշոտի Գևորգյանի (ծնված 23.02.1991թ. Գյումրի քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, չի աշխատում, նախկինում չդատված, հաշվառված և բնակվում է Գյումրի քաղաքի Երևանյան խճուղու Նորվեգական թաղ. 18 քոթեջում) ՀՀ քրեական օրենսգրքի 177 հոդվածի 1-ին մասով,

Պ Ա Ր Զ Ե Ց

2010թ. հուլիսի 30-ին ՀՀ ոստիկանության Քանաքեռ-Զեյթուն բաժնում ՀՀ քրեական օրենսգրքի 177 հոդվածի 1-ին մասով հարուցվել է թիվ 09157010 քրեական գործը:
2010թ. օգոստոսի 20-ին թիվ 09157010 քրեական գործն ըստ ենթակայության ուղարկվել է ՀՀ ոստիկանության ՔԳՎ Քանաքեռ-Զեյթուն քննչական բաժին` նախաքննություն կատարելու համար:
2010թ. սեպտեմբերի 8-ին Արմեն Աշոտի Գևորգյանի նկատմամբ որպես խափանման միջոց է ընտրվել ստորագրություն չհեռանալու մասին:
2010թ. սեպտեմբերի 14-ին Արմեն Աշոտի Գևորգյանին մեղադրանք է առաջադրվել ՀՀ քրեական օրենսգրքի 177 հոդվածի 1-ին մասով:
2010թ. հոկտեմբերի 1-ին թիվ 09157010 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Արմեն Աշոտի Գևորգյանին մեղադրանք է առաջադրվել ՀՀ քրեական օրենսգրքի 177 հոդվածի 1-ին մասով` այն արարքի համար, որ նա Երևան քաղաքի Բաբայան փողոցի 2/9 հասցեում գտնվող ՙՖաբերլիկ՚ ընկերության գրասենյակի աստիճանավանդակի մոտի նստարանի վրայից գողացել է Արթուր Նվերի Ներսիսյանին պատկանող ՙՍոնի Էրիքսոն Կ-770 Ի՚ մոդելի 3516003-371847-1 գործարանային համարով` 077-52-90-07 հեռախոսահամարով 22.000 ՀՀ դրամ արժողությամբ բջջային հեռախոսը:
2010թ. հոկտեմբերի 28-ի դատական նիստի ժամանակ տուժող Արթուր Ներսիսյանը ներկայացնելով գրավոր դիմում հայտնեց, որ հաշտվել է ամբաստանյալ Արմեն Գևորգյանի հետ և խնդրում է գործի վարույթը կարճել:
Ամբաստանյալ Արմեն Գևորգյանը հայտարարեց, որ զղջում է կատարածի համար և համաձայն է, որ իր նկատմամբ հարուցված քրեական գործի վարույթը կարճվի:
Մեղադրող Ն.Աշրաֆյանը հայտարարեց ամբաստանյալ Գևորգյանի նկատմամբ քրեական հետապնդում իրականացնելուց հրաժարվելու մասին և միջնորդեց քրեական գործի վարույթը կարճել:
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 177 հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Վերոգրյալը հաշվի առնելով` դատարանը գտնում է, որ թիվ ԵԱՔԴ/0142/01/10 քրեական գործի վարույթը պետք է կարճել և Արմեն Աշոտի Գևորգյանի նկատմամբ քրեական հետապնդումը դադարեցնել:
Դատարանը գտնում է, որ 2010թ. սեպտեմբերի 22-ի որոշմամբ իրեղեն ապացույց ճանաչված և տուժող Արթուր Ներսիսյանին ի պահ հանձնված ՙՍոնի Էրիքսոն Կ-770 Ի՚ մոդելի 3516003-371847-1 գործարանային համարով բջջային հեռախոսը պետք է թողնել վերջինիս տնօրինությանը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Թիվ ԵԱՔԴ/0142/01/10 քրեական գործի վարույթը կարճել և Արմեն Աշոտի Գևորգյանի նկատմամբ քրեական հետապնդումը դադարեցնել` ամբաստանյալի հետ տուժող Արթուր Նվերի Ներսիսյանի հաշտվելու հիմքով:
Արմեն Աշոտի Գևորգյանի նկատմամբ ընտրված խափանման միջոցը` ստորագրություն չհեռանալու մասին, վերացնել:
Իրեղեն ապացույց ճանաչված և տուժող Արթուր Ներսիսյանին ի պահ հանձնված ՙՍոնի Էրիքսոն Կ-770 Ի՚ մոդելի 3516003-371847-1 գործարանային համարով բջջային հեռախոսը թողնել նրա տնօրինությանը:
Որոշումը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ Լ. ԱՎԵՏԻՍՅԱՆ