ԵԱՔԴ/0136/01/10







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«16» նոյեմբերի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ն.Աշրաֆյան
տուժող Ն.Առաքելյան
պաշտպան Է.Արամյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Արտաշես Արամի Ծառուկյանի` ծնված 1967 թվականի փետրվարի 18-ին Աբովյան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատապարտված, չի աշխատում, հաշվառված է Աբովյան քաղաքի 4-րդ միկրոշրջանի 35-րդ շենք 21-րդ բնակարանում, բնակվել է Աբովյան քաղաքի Դարանի 8-րդ շենքի 3-րդ բնակարանում: Մեղադրանք է առաջադրվել ՀՀ քրեական օրենսգրքի 175-րդ հոդվածի 1-ին մասով, արգելանքի տակ է 2010 թվականի օգոստոսի 7-ից:
1. Գործի դատավարական նախապատմությունը.
2010 թվականի օգոստոսի 7-ին ՀՀ ոստիկանության Արաբկիրի քննչական բաժնի քննիչ Ռ.Համբարձումյանի որոշմամբ ՀՀ քրեական օրենսգրքի 175-րդ հոդվածի 2-րդ մասի 4-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 14124310 քրեական գործը:
2010 թվականի օգոստոսի 9-ին ՀՀ ոստիկանության Արաբկիրի քննչական բաժնի քննիչ Ռ.Համբարձումյանի որոշմամբ թիվ 14124310 քրեական գործով Արտաշես Արամի Ծառուկյանին մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 4-րդ կետով:
2010 թվականի օգոստոսի 13-ին ՀՀ ոստիկանության Արաբկիրի քննչական բաժնի քննիչ Ռ.Համբարձումյանի որոշմամբ թիվ 14124310 քրեական գործով Արտաշես Արամի Ծառուկյանին առաջադրված մեղադրանքը փոփոխվել, լրացվել է և նրան նոր մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 4-րդ կետով:
2010 թվականի օգոստոսի 14-ին թիվ 14124310 քրեական գործով կազմվել է մեղադրական եզրակացություն:
2010 թվականի օգոստոսի 26-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազություն ավագ դատախազ Ն.Աշրաֆյանի որոշմամբ թիվ 04124310 քրեական գործով Արտաշես Արամի Ծառուկյանի վերաբերյալ մեղադրական եզրակացությունը չի հաստատվել և գործը վերադարձվել է լրացուցիչ քննության` արարքը ՀՀ քրեական օրենսգրքի 175-րդ հոդվածի 1-ին մասով որակելու համար:
2010 թվականի սեպտեմբերի 2-ին ՀՀ ոստիկանության Արաբկիրի քննչական բաժնի քննիչ Ռ.Համբարձումյանի որոշմամբ թիվ 14124310 քրեական գործով Արտաշես Արամի Ծառուկյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 175-րդ հոդվածի 1-ին մասով:
2010 թվականի սեպտեմբերի 15-ին Արտաշես Արամի Ծառուկյանի վերաբերյալ քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը:
2010 թվականի սեպտեմբերի 18-ին Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը դատավոր Լ.Ավետիսյանի որոշմամբ Արտաշես Արամի Ծառուկյանի վերաբերյալ քրեական գործն ընդունվել է վարույթ:
2010 թվականի հոկտեմբերի 20-ին Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դատավոր Լ.Ավետիսյանը Արտաշես Արամի Ծառուկյանի վերաբերյալ քրեական գործով հայտնել է ինքնաբացարկ:
2010 թվականի հոկտեմբերի 22-ին Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դատավոր Մ.Պապոյանի որոշմամբ Արտաշես Արամի Ծառուկյանի վերաբերյալ քրեական գործն ընդունվել է վարույթ:
Արտաշես Արամի Ծառուկյանին մեղադրանք է առաջադրվել ՀՀ քրեական օրենսգրքի 175-րդ հոդվածի 1-ին մասով` այն արարքի համար, որ նա ուրիշի գույքի հափշտակություն կատարելու նպատակով 2010 թվականի օգոստոսի 6-ին` ժամը 23:00-ի սահմաններում, Երևան քաղաքի Կոմիտասի պողոտայի 38/1 շենքի 1-ին հարկում Նարինե Սոկրատի Առաքելյանի կյանքի և առողջության համար վտանգավոր բռնություն` ծառի ճյուղի կտորը որպես դանակ ձևականացնելու և դրանով մարմնական վնասվածք պատճառելու սպառնալիքով ցանկացել է հափշտակել Նարինե Առաքելյանի պարանոցին առկա 147.000 ՀՀ դրամ ընդհանուր արժողության ոսկյա շղթան իր կախազարդով, սակայն բռնվել է նույն շենքի բնակիչ Արմեն Սերժիկի Ցականյանի և դեպքի վայր ժամանած ոստիկանության աշխատակիցների կողմից:
2. Արագացված դատական քննություն.
Մինչ դատաքննությունն սկսելն ամբաստանյալ Արտաշես Արամի Ծառուկյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արտաշես Արամի Ծառուկյանը կատարել է արարք` նախատեսված ՀՀ քրեական օրենսգրքի 175-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները և ՀՀ ոստիկանության ինֆորմացիոն կենտրոնի պահանջագիրը, եկավ հետևյալ եզրահանգման.
Արտաշես Ծառուկյանի անձը դրականորեն բնութագրող հանգամանքներ են բարձրագույն կրթություն ունենալը, ամուսնացած լինելը, ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Արտաշես Ծառուկյանի պատասխանատվությունն ու պատիժը մեղմացնող հանգամանք պետք է դիտել նախկինում արատավորված` դատապարտված չլինելը:
Դատարանը միաժամանակ արձանագրում է, որ Արտաշես Ծառուկյանի պատասխանատվությունն ու պատիժը ծանրացնող հանգամանքներ չկան:
Կատարած արարքների համար ամբաստանյալ Արտաշես Ծառուկյանը ենթակա է քրեական պատասխանատվության և պատժի:
Դատարանը, հաշվի առնելով Արտաշես Ծառուկյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքը, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ Արտաշես Ծառուկյանի կողմից կատարված արարքի համար ՀՀ քրեական օրենսգրքի 175-րդ հոդվածի 1-ին մասի սանկցիայով որպես հիմնական պատիժ նախատեսված է միայն ազատազրկում, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ հիմնական պատիժ պետք է նշանակել ազատազրկման ձևով, որը նա պետք է կրի: Ընդ որում` կատարված արարքի համար չպետք է նշանակել ՀՀ քրեական օրենսգրքի 175-րդ հոդվածի 1-ին մասի սանկցիայով նախատեսված լրացուցիչ պատիժը` գույքի բռնագրավումը:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիu անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Ամբաստանյալ Արտաշես Ծառուկյանի պատժի կրման սկիզբը պետք է հաշվել 2010 թվականի օգոստոսի 7-ից, քանի որ նա ձերբակալվել է այդ օրը, իսկ 2010 թվականի օգոստոսի 9-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Արտաշես Ծառուկյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2010 թվականի օգոստոսի 13-ի որոշմամբ իրեղեն ապացույց ճանաչված փայտի կտորը պետք է ոչնչացնել, իսկ ոսկյա շղթան և կախազարդը պետք է թողնել տուժող Նարինե Առաքելյանի տնօրինությանը:
Դատարանը գտնում է, որ դատական ծախսերն ամբաստանյալ Արտաշես Ծառուկյանից ենթակա չեն բռնագանձման, քանի որ տուժող Նարինե Առաքելյանը, հնարավորություն ունենալով ներկայացնելու իր շահերը, ամբաստանյալին որևէ պահանջ չի ներկայացրել: Ավելին` իրեղեն ապացույց ճանաչված ոսկյա շղթան և կախազարդը պետք է թողնվեն տուժող Նարինե Առաքելյանի տնօրինությանը: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 2-8-րդ կետերով նախատեuված դատական ծախuերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753-րդ հոդվածի 8-րդ մասի, ամբաuտանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ, 369-372-րդ, 3751-րդ և 3753-րդ հոդվածներով` Դատարանը
ՎՃՌԵՑ

Արտաշես Արամի Ծառուկյանին մեղավոր ճանաչել ՀՀ քրեական օրենսգրքի 175-րդ հոդվածի 1-ին մասով և պատիժ նշանակել ազատազրկում` 3 (երեք) տարի ժամկետով` պատժի կրման սկիզբը հաշվելով 2010 թվականի օգոստոսի 7-ից:
Արտաշես Արամի Ծառուկյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Դատավճիռն օրինական ուժի մեջ մտնելուց հետո` 2010 թվականի օգոստոսի 13-ի որոշմամբ իրեղեն ապացույց ճանաչված փայտի կտորը ոչնչացնել, իսկ ոսկյա շղթան և կախազարդը թողնել տուժող Նարինե Առաքելյանի տնօրինությանը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ