գործ N ԵԱՔԴ/0134/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
դատական նիստերի քարտուղար Ե. Կարապետյան
մեղադրող Խ. Բաղդասարյան
պաշտպան Ռ. Դավթյան
տուժողներ Ս.Գալստյան, Ս.Նավոյան, Մ.Վարդանյան, Մ.Վարդանյան
տուժողների օրինական ներկայացուցիչներ Հ.Տոնոյան, Լ.Նաջարյան, Ա.Կարապետյան


2010թ. հոկտեմբերի 20-ին, Երևան քաղաքում, դռնբաց դատական նիստում, արագացված դատաքննության կարգով, քննեց քրեական գործն ըստ մեղադրանքի Թորոս Հակոբի Ումրիկյանի, ծնված 28.10.1955թ., Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, խնամքին մեկ անձ, աշխատում է ՙՈւրախ ժամանց՚ ՍՊԸ-ի տնօրեն, նախկինում չդատված, հաշվառված և բնակվում է Երևան քաղաքի Հր.Ներսիսյան փողոցի 1 շենքի թիվ 110 բնակարանում, մեղադրվում է ՀՀ քրեական օրենսգրքի 279 հոդվածի 2-րդ մասի 2-րդ կետով, խափանման միջոց է ընտրվել ստորագրություն չհեռանալու մասին,

Պ Ա Ր Զ Ե Ց
1.Գործի դատավարական նախապատմությունը.
2010թ. մայիսի 12-ին Արաբկիր և Քանաքեռ-Զեյթուն վարչական շրջանների դատախազության ավագ դատախազ Խ.Բաղդասարյանի կողմից ՀՀ քրեական օրենսգրքի 279 հոդվածի 2-րդ մասի 2-րդ կետի հատկանիշներով հարուցվել է թիվ 14200710 քրեական գործը:
2010թ. մայիսի 14-ին թիվ 14200710 քրեական գործն ուղարկվել է ՀՀ ոստիկանության ՔԳՎ Երևան քաղաքի ՔՎ Քանաքեռ-Զեյթուն քննչական բաժին` նախաքննություն կատարելու համար:
2010թ. սեպտեմբերի 10-ին Թորոս Հակոբի Ումրիկյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 279 հոդվածի 2-րդ մասի 2-րդ կետով, նրա նկատմամբ որպես խափանման միջոց ընտրվել է ստորագրություն չհեռանալու մասին:
2010թ. սեպտեմբերի 16-ին թիվ 14200710 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախաքննության մարմինն ամբաստանյալ Թորոս Հակոբի Ումրիկյանին մեղադրանք է առաջադրել հետևյալ արարքի համար.
Թորոս Ումրիկյանը հանդիսանալով ՙՈւրախ Ժամանց՚ ՍՊԸ-ի տնօրեն, մատուցել է սպառողների կյանքի կամ առողջության անվտանգության պահանջներին չհամապատասխանող ծառայություններ, այն է.
ՙՈւրախ Ժամանց՚ ՍՊԸ-ում 2009թ. աշնանից 2010թ. ապրիլ ամիսն ընկած ժամանակահատվածում, առանց համապատասխան նախագծային փաստաթղթերը տեխնիկական անվտանգության փորձաքննության ենթարկելու և դրանք հաստատելու կառուցվել է ՙԹայֆուն՚ անվանումով արտադրական վտանգավոր օբյեկտ, որն առանց տեխնիկական անվտանգության դրական փորձագիտական եզրակացության, այսինքն ՙՏեխնիկական անվտանգության ապահովման պետական կարգավորման մասին՚ ՀՀ օրենքի պահանջների խախտմամբ, 2010թ. մայիսի 1-ից սկսել է շահագործել Երևան քաղաքի Ազատության պողոտայի 2 հասցեում:
2010թ. մայիսի 9-ին, ժամը 1655-ի սահմաններում, շահագործման ընթացքում կոտրվել է ՙԹայֆուն՚ անվանումով զվարճահարմարանքի /կարուսել/ ձախ թևը, իսկ դրան ամրացված ուղևորատար սայլակն ընկել է գետին, որի հետևանքով ուղևորատար սայլակում գտնվող ուղևորներ Մենուա Արմենի Վարդանյանն ստացել է առողջության թեթև վնասի հատկանիշներ չպարունակող մարմնական վնասվածք, Մարինե Արմենի Վարդանյանն ստացել է առողջության թեթև վնաս` առողջության կարճատև քայքայումով, Սուսաննա Դերենիկի Գալստյանն ստացել է առողջության թեթև վնաս` առողջության կարճատև քայքայումով, իսկ Սիրարփի Արտաշի Նավոյանն ստացել է առողջության միջին ծանրության վնաս` առողջության տևական քայքայումով:
3. Արագացված դատական քննություն .
Մինչև դատաքննությունն սկսելն ամբաստանյալ Թորոս Ումրիկյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատել է նաև ամբաստանյալի պաշտպան Ռ.Դավթյանը:
Մեղադրող Խ.Բաղդասարյանը դատական քննության արագացված կարգ կիրառելուն չի առարկել:
Տուժող Մարինե Վարդանյանը և տուժող Մենուա Վարդանյանի օրինական ներկայացուցիչ Անահիտ Կարապետյանն արագացված քննություն կիրառելուն չեն առարկել, հայտնելով նաև, որ ամբաստանյալից որևէ քաղաքացիական հայցի պահանջ չունեն: Նման բովանդակությամբ գրավոր դիմում է ներկայացրել նաև տուժող Սուսաննա Գալստյանի օրինական ներկայացուցիչ Հայկանուշ Տոնոյանը:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
3.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Թորոս Հակոբի Ումրիկյանին առաջադրված մեղադրանքը ՀՀ քրեական օրենսգրքի 279 հոդվածի 2-րդ մասի 2-րդ կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 279 հոդվածի 2-րդ մասի 2-րդ կետի հատկանիշներին և արարքի որակումը ճիշտ է:
Ամբաստանյալ Թորոս Ումրիկյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, խնամքին է գտնվում տասներկու տարեկան երեխան:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Թորոս Ումրիկյանը ենթակա է քրեական պատասխանատվության և պատժի:
Դատարանը, նկատի ունենալով, որ պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ Թորոս Ումրիկյանի նկատմամբ պատիժ պետք է նշանակել տուգանքի ձևով:
Քննության առնելով ամբաստանյալի նկատմամբ ՀՀ քրեական օրենսգրքի 279 հոդվածի 2-րդ մասով նախատեսված լրացուցիչ պատիժ կիրառելու հարցը, դատարանը գտնում է, որ նրա նկատմամբ լրացուցիչ պատիժ չպետք է նշանակել:
Նկատի ունենալով, որ տուժող Մարինե Վարդանյանը, տուժող Մենուա Վարդանյանի օրինական ներկայացուցիչ Անահիտ Կարապետյանը, տուժող Սուսաննա Գալստյանի օրինական ներկայացուցիչ Հայկանուշ Տոնոյանը, տուժող Սիրարփի Նավոյանի օրինական ներկայացուցիչ Լուսինե Նաջարյանը քաղաքացիական հայցերի պահանջ չեն ներկայացրել, դատարանը գտնում է, որ այդ հարցը պետք է համարել լուծված:
Դատարանն անդրադառնալով իրեղեն ապացույցների տնօրինման հարցին, գտնում է, որ 2010թ. սեպտեմբերի 3-ի որոշմամբ իրեղեն ապացույց ճանաչված, Քանաքեռ-Զեյթուն քննչական բաժնի իրեղեն ապացույցների սենյակում պահվող, ՙԹայֆուն՚ անվանումով զվարճահարմարանքի /կարուսելի/ ձախ թևի ուղևորատար սայլակը կարուսելին միացնող կոտրված հանգույցը պետք է ոչնչացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Թորոս Հակոբի Ումրիկյանին մեղավոր ճանաչել ՀՀ քրեական օրենսգրքի 279 հոդվածի 2-րդ մասի 2-րդ կետով և նրան դատապարտել տուգանքի հինգ հարյուր հազար (500.000) ՀՀ դրամի չափով, առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու:
Թորոս Հակոբի Ումրիկյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Տուժող Մարինե Վարդանյանի, տուժողների օրինական ներկայացուցիչներ Անահիտ Կարապետյանի, Հայկանուշ Տոնոյանի, Լուսինե Նաջարյանի քաղաքացիական հայցերի հարցը համարել լուծված:
Դատավճիռն օրինական ուժի մեջ մտնելուց հետո, իրեղեն ապացույց ճանաչված ՙԹայֆուն՚ անվանումով զվարճահարմարանքի /կարուսելի/ ձախ թևի ուղևորատար սայլակը կարուսելին միացնող կոտրված հանգույցը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ