Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
դատական նիստերի քարտուղարներ Ե.Կարապետյան, Ն.Ղազարյան
մեղադրող Խ. Բաղդասարյան

2010թ. սեպտեմբերի 27-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Վիգեն Ռուբիկի Ղազարյանի, ծնված 11.11.1970թ., Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուրի, խնամքին ոչ ոք, չի աշխատում, նախկինում դատված` 1. Երևան քաղաքի Կենտրոն և Նորք Մարաշ համայնքների առաջին ատյանի դատարանի 04.08.2004թ. դատավճռով ՀՀ քրեական օրենսգրքի 176 հոդվածի 2-րդ մասի 1,4 կետերով դատապարտվել է ազատազրկման 3 տարի ժամկետով, ազատվել է 13.09.2005թ. պայմանական վաղակետ 1 տարի 5 ամիս 20 օրով, 2. Երևան քաղաքի Արաբկիր և Քանաքեռ-Զեյթուն համայնքների առաջին ատյանի դատարանի 20.04.2006թ. դատավճռով ՀՀ քրեական օրենսգրքի 177 հոդվածի 2-րդ մասի 2,4 կետերով, 67 հոդվածի հիման վրա դատապարտվել է ազատազրկման 2 տարի 6 ամիս ժամկետով, ազատվել է 14.07.2008թ., դատվածությունը չմարված, հաշվառված և բնակվում է Երևան քաղաքի Կոնդ թաղամասի 169 տանը, մեղադրվում է ՀՀ քրեական օրենսգրքի 235 հոդվածի 4-րդ մասով, խափանման միջոց է ընտրվել ստորագրություն չհեռանալու մասին,

Պ Ա Ր Զ Ե Ց
1.Գործի դատավարական նախապատմությունը.
2010թ. օգոտոսի 06-ին ՀՀ ոստիկանության ՔԳՎ Երևան քաղաքի ՔՎ Քանաքեռ-Զեյթուն քննչական բաժնում ՀՀ քրեական օրենսգրքի 235 հոդվածի 4-րդ մասի հատկանիշներով հարուցվել է թիվ 09116310 քրեական գործը:
2010թ. օգոստոսի 17-ին Վիգեն Ռուբիկի Ղազարյանի նկատմամբ որպես խափանման միջոց ընտրվել է ստորագրություն չհեռանալու մասին:
2010թ. օգոստոսի 24-ին Վիգեն Ռուբիկի Ղազարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 235 հոդվածի 4-րդ մասով:
2010թ. հունվարի 13-ին թիվ 09116310 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2.Գործի փաստական հանգամանքները.
Նախաքննության մարմինն ամբաստանյալ Վիգեն Ռուբիկի Ղազարյանին մեղադրանք է առաջադրել հետևյալ արարքի համար.
Վիգեն Ղազարյանը ապօրինի կերպով կրել է արհեստագործական եղանակով կռփազենքերի նմանողությամբ պատրաստված, հարվածող-փշրող սառը զենք հանդիսացող սև գույնի մետաղյա առարկա, որը 2010թ. հուլիսի 28-ին, ոստիկանության աշխատակիցների կողմից հայտնաբերվել է նրա անձնական խուզարկությամբ անդրավարտիքի աջ գրպանից և առգրավվել:
3.Ապացույցների հետազոտում.
Ամբաստանյալ Վիգեն Ղազարյանն ընդունելով իր հանցանքը հրաժարվել է ցուցմունք տալ և պնդել է նախնական քննության ընթացքում տված ցուցմունք այն մասին, որ հաճախակի վաղ առավոտյան գնում է Հրազդանի կիրճ` գետում լողանալու: 2010թ. հուլիսի 28-ի առավոտյան, երբ գնացել է լողալու, ափից գտել է մի մետաղյա առարկա` ՙկաստետ՚, որը հենց այնպես, առանց որևէ նպատակի դրել է իր անդրավարտիքի աջ գրպանն ու ժամը 0900-ի սահմաններում երթուղային տաքսով գնացել է աշխատանքի: Ճանապարհին ոստիկանության Քանաքեռ-Զեյթուն ՔՀԲ աշխատակիցներն իրեն Պ.Սևակ և Ռուբինյանց փողոցների խաչմերուկում երթուղային տաքսուց իջեցրել ու սառը զենք կրելու կասկածանքով տարել են ոստիկանության բաժին: Այնտեղ ընթերակաների ներկայությամբ կատարված իր անձնական խուզարկությամբ անդրավարտիքի աջ գրպանից հայտնաբերվել և առգրավվել է գտած մետաղյա առարկան` ՙկաստետը՚:
Նշել է , որ ՙկաստետը՚ ինքը ոչ մի տեղ չի օգտագործել և այն օգտագործելու դիտավորություն չի ունեցել: Զղջում է կատարածի համար:
Ամբաստանյալին առաջադրված մեղադրանքը, բացի նրա ցուցմունքից հիմնավորվել է նաև հետևյալ ապացույցներով.
Վկա Յուրի Գյուրջինյանի նախնական քննության ընթացքում տված և դատական քննության ընթացքում հետազոտված ցուցմունքով այն մասին, որ 2010թ. հուլիսի 28-ին, մեկ այլ ընթերակայի հետ միասին, որպես ընթերակա ոստիկանության Քանաքեռ-Զեյթունի բաժնում մասնակցել է իրեն անծանոթ մի քաղաքացու անձնական խուզարկությանը, ում անունը, ինչպես իմացել է Վիգեն Ղազարյան է: Վ.Ղազարյանի մոտից` շալվարի աջ գրպանից հայտնաբերվել է սև գույնի, չորս մատի անցքերով մետաղյա առարկա` ՙկաստետ՚, որի կապակցությամբ Վ.Ղազարյանը հայտարարել է, որ այն գտել է Հրազդանի կիրճից:
Ամբաստանյալի կատարած հանցանքը հիմնավորվել է նաև գործով ձեռք բերված հետևյալ ապացույցներով.
Վիգեն Ղազարյանի անձնական զննության ենթարկելու արձանագրությամբ, Վ.Ղազարյանի անձնական զննությամբ հայտնաբերված և առգրավված` սառը զենք հանդիսացող մետաղյա առարկայի` կռփազենքի, իրեղեն ապացույց ճանաչելու մասին որոշմամբ:
Փորձագետի թիվ 1790 եզրակացությամբ, համաձայն որի փորձաքննության ներկայացվածը պատրաստված է արհեստագործական եղանակով, կռփազենքերի նմանողությամբ, դասվում է հարվածող-փշրող սառը զենքերի շարքին:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Վիգեն Ռուբիկի Ղազարյանին առաջադրված մեղադրանքը ՀՀ քրեական օրենսգրքի 235 հոդվածի 4-րդ մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 235 հոդվածի 4-րդ մասի հատկանիշներին և արարքի որակումը ճիշտ է:
Ամբաստանյալ Վիգեն Ղազարյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար:
Որպես ամբաստանյալի պատասխանատվությունը և պատիժը ծանրացնող հանգամանք, դատարանը դիտում է հանցանքը կատարելու ռեցիդիվը:
Կատարած արարքի համար ամբաստանյալ Վիգեն Ղազարյանը ենթակա է քրեական պատասխանատվության և պատժի:
Դատարանը, հաշվի առնելով, որ պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ Վիգեն Ղազարյանի նկատմամբ պատիժ պետք է նշանակել տուգանքի ձևով:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց ճանաչված, ՀՀ ոստիկանության փորձաքրեագիտական վարչությունում պահվող, սառը զենք հանդիսացող, արհեստագործական եղանակով պատրաստված սև գույնի մետաղյա առարկան պետք է թողնել փորձաքրեագիտական վարչության տնօրինությանը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Վիգեն Ռուբիկի Ղազարյանին մեղավոր ճանաչել ՀՀ քրեական օրենսգրքի 235 հոդվածի 4-րդ մասով և նրան դատապարտել տուգանքի երկու հարյուր հազար (200.000) ՀՀ դրամի չափով:
Վիգեն Ղազարյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Իրեղեն ապացույց ճանաչված, ՀՀ ոստիկանության փորձաքրեագիտական վարչությունում պահվող, սառը զենք հանդիսացող, արհեստագործական եղանակով պատրաստված սև գույնի մետաղյա առարկան թողնել փորձաքրեագիտական վարչության տնօրինությանը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ