գործ N ԵԱՔԴ/0125/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ.Ավետիսյան
դատական նիստի քարտուղարներ Ե.Կարապետյան, Ն.Ղազարյան
մեղադրող Խ.Բաղդասարյան
պաշտպան Կ. Քաջազնունի
տուժողներ Հ.Տերտերյան, Հ.Օհանյան, Հ.Օհանյան

2010թ. հոկտեմբերի 18-ին, Երևան քաղաքում, դռնբաց դատական նիստում, արագացված դատաքննության կարգով, քննեց քրեական գործն ըստ մեղադրանքի Կարեն Զարզանդի Պողոսյանի, ծնված 19.07.1974թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, գտնվում է փաստական ամուսնական հարաբերությունների մեջ, խնամքին մեկ անձ, չի աշխատել, նախկինում չդատված, հաշվառված և բնակվել է Երևան քաղաքի Արաբկիրի 51 փողոցի 8 տանը, մեղադրվում է ՀՀ քրեական օրենսգրքի 258 հոդվածի 3-րդ մասի 2-րդ կետով, արգելանքի տակ է 2010թ. հունիսի 18-ից,

Պ Ա Ր Զ Ե Ց
1.Գործի դատավարական նախապատմությունը.
2010թ. հունիսի 18-ին ՀՀ ոստիկանության ՔԳՎ Երևան քաղաքի ՔՎ Արաբկիրի քննչական բաժնում ՀՀ քրեական օրենսգրքի 258 հոդվածի 3-րդ մասի 2-րդ կետի հատկանիշներով հարուցվել է թիվ 14117110 քրեական գործը:
2010թ. հունիսի 21-ին Կարեն Զարզանդի Պողոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 258 հոդվածի 3-րդ մասի 2-րդ կետով, նրա նկատմամբ որպես խափանման միջոց է ընտրվել կալանավորումը:
2010թ. օգոստոսի 24-ին թիվ 14117110 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախաքննության մարմինն ամբաստանյալ Կարեն Զարզանդի Պողոսյանին մեղադրանք է առաջադրել հետևյալ արարքի համար.
Կարեն Պողոսյանը 2010թ. հունիսի 18-ի, երեկոյան, գտնվելով տանը 6-7 շիշ գարեջուր օգտագործելուց հետո, վերհիշել է, որ մոտ մեկ ամիս առաջ Երևան քաղաքի Ազատության պողոտայի 3 հասցեում գտնվող տնտեսական խանութի աշխատակցուհի ոմն Հասմիկը վիրավորել է իր կնոջը` Էլեոնորա Պողոսյանին` կասկածելով սրբիչի կախիչի գողության մեջ: Նույն օրը ժամը 19-ի սահմաններում, դուրս գալով տանից ուղևորվել է Ազատության պողոտայի կողմ: Անցնելով վերը նշված խանութի մոտով, արդեն իսկ գտնվելով ալկոհոլային հարբածության վիճակում, պարզաբանումներ կատարելու նպատակով մտել է խանութ, ապա, անհիմն վիճաբանության մեջ մտնելով աշխատակցուհիների հետ, ձեռքերով ծեծի է ենթարկել գանձապահ Հասմիկ Տերտերյանին` խափանելով խանութի բնականոն աշխատանքը: Այնուհետև ձեռքերով ծեծի է ենթարկել խուլիգանական գործողությունները կանխելու նպատակով միջամտած նույն խանութի հսկիչ Համեստ Օհանյանին, վերջինիս այցելած քրոջը` Հասմիկ Օհանյանին, նշված անձանց պատճառելով մարմնական վնասվածքներ, որոնք առողջության թեթեև վնասի հատկանիշներ չեն պարունակում: Շարունակելով իր խուլիգանական գործողությունները, Կարեն Պողոսյանը դիտավորությամբ շրջել է խանութի գրենական պիտույքների ցուցափեղկերը, տնտեսական ապրանքները, ոտքով ջարդել և վնասել է խանութի գույքը` ՙՎ.Ավետիսյան՚ Ա/Ձ տնօրեն Վարդան Ավետիսյանին պատճառելով 200.000 ՀՀ դրամի նյութական վնաս:
3. Արագացված դատական քննություն .
Մինչև դատաքննությունն սկսելն ամբաստանյալ Կարեն Պողոսյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքի հետ, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատել է նաև ամբաստանյալի պաշտպան Կ.Քաջազնունին:
Մեղադրող Խ.Բաղդասարյանը դատական քննության արագացված կարգ կիրառելուն չի առարկել:
Տուժողներ Հասմիկ Տերտերյանը, Համեստ և Հասմիկ Օհանյանները արագացված քննություն կիրառելուն չեն առարկել, հայտնելով նաև, որ ամբաստանյալից որևէ քաղաքացիական հայցի պահանջ չունեն: Նման բովանդակությամբ գրավոր դիմում է ներկայացրել նաև մյուս տուժող Վարդան Ավետիսյանը:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
3.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Կարեն Զարզանդի Պողոսյանին առաջադրված մեղադրանքը ՀՀ քրեական օրենսգրքի 258 հոդվածի 3-րդ մասի 2-րդ կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 258 հոդվածի 3-րդ մասի 2-րդ կետի հատկանիշներին և արարքի որակումը` ճիշտ է:
Ամբաստանյալ Կարեն Պողոսյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, վատառողջ է` նրա մոտ առկա են էպիլեպտիֆորմ ցնցումներ, ուղորդվող գիտակցության կորստով, խնամքին է գտնվում մեկ տարեկան երեխան, բնութագրվում է դրական:
Որպես ամբաստանյալի պատասխանատվությունը և պատիժը ծանրացնող հանգամանք, դատարանը դիտում է հանցանքն ալկոհոլի ազդեցության տակ կատարելը:
Կատարած արարքի համար ամբաստանյալ Կարեն Պողոսյանը ենթակա է քրեական պատասխանատվության և պատժի:
Դատարանը, հաշվի առնելով Կարեն Պողոսյանի կատարած արարքի հանրության համար վտանգավորության աստիճանը և բնույթը, նրա անձը բնութագրող, պատասխանատվությունը և պատիժը մեղմացնող և ծանրացնող հանգամանքները, գտնում է, որ պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
Նկատի ունենալով, որ տուժողներ Հասմիկ Տերտերյանը, Համեստ Օհանյանը, Հասմիկ Օհանյանը, Վարդան Ավետիսյանը քաղաքացիական հայցերի պահանջ չեն ներկայացրել, դատարանը գտնում է, որ այդ հարցը պետք է համարել լուծված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Կարեն Զարզանդի Պողոսյանին մեղավոր ճանաչել ՀՀ քրեական օրենսգրքի 258 հոդվածի 3-րդ մասի 2-րդ կետով և նրան դատապարտել ազատազրկման երկու (2) տարի ժամկետով:
Պատժի սկիզբը հաշվել 2010թ. հունիսի 18-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Կարեն Զարզանդի Պողոսյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Տուժողներ Հասմիկ Տերտերյանի, Համեստ Օհանյանի, Հասմիկ Օհանյանի, Վարդան Ավետիսյանի քաղաքացիական հայցերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ