ԵԱՔԴ/0123/01/10





ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

«23» սեպտեմբերի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Ռ.Ավետյանի և Ա.Մնացականյանի, մասնակցությամբ մեղադրող Ս.Գրիգորյանի, տուժողներ Ա.Երանոսյանի և Ա.Հակոբյանի, պաշտպաններ Մ.Խաչատրյանի և Է.Վարդանյանի, դռնբաց դատական նիստում քննելով քրեական գործն ըստ մեղադրանքի Ալվարդ Դերենիկի Երանոսյանի (ծնված 1963 թվականի ապրիլի 11-ին Արագածոտնի մարզի Կոշ գյուղում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, նախկինում չդատապարտված, չի աշխատում, հաշվառված է Երևան քաղաքի Ա.Տիգրանյան փողոցի 38-րդ շենքի 30-րդ բնակարանում)` ՀՀ քրեական օրենսգրքի 118-րդ հոդվածով և Անահիտ Համբարձումի Հակոբյանի (ծնված 1957 թվականի հունիսի 6-ին Վրաստանի Հանրապետությունում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, դատվածություն չունեցող, չի աշխատում, հաշվառված է Երևան քաղաքի Բայդուկովի փողոցի 17-րդ տանը, բնակվում է Երևան քաղաքի Ա.Տիգրանյան փողոցի 38-րդ շենքի 1/4 բնակարանում)` ՀՀ քրեական օրենսգրքի 118-րդ հոդվածով
ՊԱՐԶԵՑ

2010 թվականի հունիսի 4-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ ՀՀ քրեական օրենսգրքի 118-րդ հոդվածով նախատեսված հանցագործության հատկանիշներով հարուցվել և վարույթ է ընդունվել թիվ 09112310 քրեական գործը:
2010 թվականի օգոստոսի 5-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ թիվ 09112310 քրեական գործով Ալվարդ Դերենիկի Երանոսյանին մեղադրանք է առաջադրվել ՀՀ քրեական օրենսգրքի 118-րդ հոդվածով:
2010 թվականի օգոստոսի 5-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ թիվ 09112310 քրեական գործով Անահիտ Համբարձումի Հակոբյանին մեղադրանք է առաջադրվել ՀՀ քրեական օրենսգրքի 118-րդ հոդվածով:
2010 թվականի օգոստոսի 21-ին Ալվարդ Դերենիկի Երանոսյանի և Անահիտ Համբարձումի Հակոբյանի վերաբերյալ քրեական գործը մեղադրական եզրակացությամբ ուղարկվել է Դատարան:
Ալվարդ Դերենիկի Երանոսյանին մեղադրանք է առաջադրվել ՀՀ քրեական օրենսգրքի 118-րդ հոդվածով` այն արարքի համար, որ նա 2010 թվականի մայիսի 14-ին` ժամը 11:30-ի սահմաններում, կենցաղային հարցերի շուրջ վիճաբանության մեջ մտնելով Երևան քաղաքի Ա.Տիգրանյան փողոցի 38-րդ շենքի 1/4 բնակարանի բնակչուհի Անահիտ Համբարձումի Հակոբյանի հետ, նրա բնակարանում, այնուհետև նույն շենքի 1/1 բնակարանում ծեծի է ենթարկել Անահիտ Հակոբյանին` պատճառելով առողջության թեթև վնասի հատկանիշներ չպարունակող մարմնական վնասվածքներ:
Անահիտ Համբարձումի Հակոբյանին մեղադրանք է առաջադրվել ՀՀ քրեական օրենսգրքի 118-րդ հոդվածով` այն արարքի համար, որ նա 2010 թվականի մայիսի 14-ին` ժամը 11:30-ի սահմաններում, կենցաղային հարցերի շուրջ վիճաբանության ընթացքում Երևան քաղաքի Ա.Տիգրանյան փողոցի 38-րդ շենքի 1/1 բնակարանում ծեծի է ենթարկել նույն շենքի 30-րդ բնակարանի բնակչուհի Ալվարդ Դերենիկի Երանոսյանին` պատճառելով առողջության թեթև վնասի հատկանիշներ չպարունակող մարմնական վնասվածքներ:
2010 թվականի սեպտեմբերի 23-ի դատական նիստի ժամանակ տուժող Ալվարդ Երանոսյանը հայտնեց, որ հաշտվել է ամբաստանյալ Անահիտ Հակոբյանի հետ և նշեց, որ գիտակցում է հաշտվելու հետևանքները: Տուժող Անահիտ Հակոբյանը նույնպես հայտնեց, որ հաշտվել է ամբաստանյալ Ալվարդ Երանոսյանի հետ և նշեց, որ գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 118-րդ հոդվածով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժողներ Ալվարդ Երանոսյանը և Անահիտ Հակոբյանը հաշտվել են համապատասխանաբար ամբաստանյալներ Անահիտ Հակոբյանի և Ալվարդ Երանոսյանի հետ, գտնում է, որ թիվ ԵԱՔԴ/0123/01/10 քրեական գործի վարույթը պետք է կարճել և Ալվարդ Դերենիկի Երանոսյանի ու Անահիտ Համբարձումի Հակոբյանի նկատմամբ քրեական հետապնդումը դադարեցնել:
ՀՀ քրեական դատավարության օրենսգրքի 151-րդ հոդվածի 2-րդ մասի համաձայն` խափանման միջոցը վերացվում է, երբ վերանում է դրա անհրաժեշտությունը:
Դատարանը, նկատի ունենալով, որ վերը նշված հիմնավորմամբ թիվ ԵԱՔԴ/0114/01/10 քրեական գործի վարույթը պետք է կարճել և Ալվարդ Դերենիկի Երանոսյանի նկատմամբ քրեական հետապնդումը դադարեցնել, գտնում է, որ նրա նկատմամբ խափանման միջոց կիրառելու անհրաժեշտությունը վերացել է, ուստի սույն որոշումն օրինական ուժի մեջ մտնելուց հետո Ալվարդ Դերենիկի Երանոսյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Դատարանը, վերոգրյալ հիմնավորմամբ, գտնում է, որ սույն որոշումն օրինական ուժի մեջ մտնելուց հետո Անահիտ Համբարձումի Հակոբյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 151-րդ, 183-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԱՔԴ/0114/01/10 քրեական գործի վարույթը կարճել և Ալվարդ Դերենիկի Երանոսյանի ու Անահիտ Համբարձումի Հակոբյանի նկատմամբ քրեական հետապնդումը դադարեցնել` տուժողներ Ալվարդ Դերենիկի Երանոսյանի ու Անահիտ Համբարձումի Հակոբյանի հաշտվելու հիմքով:
Որոշումն օրինական ուժի մեջ մտնելուց հետո Ալվարդ Դերենիկի Երանոսյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումն օրինական ուժի մեջ մտնելուց հետո Անահիտ Համբարձումի Հակոբյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ