29.09.2010թ. գործ No ԵԱՔԴ /0122/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

նախագահությամբ` դատավոր Ա.Մկրտչյանի
քարտուղարությամբ` Մ.Հայրապետյանի
մասնակցությամբ`
մեղադրող Հ.Բալյանի
ամբաստանյալ Կ.Այլազյանի
տուժող Ա.Ավագյանի
պաշտպան Ղ.Պապոյանի

2010թ. սեպտեմբերի 29-ին, դատարանում, դռնբաց դատական նիստում, արագացված դատաքննության կարգով քննեց քրեական գործն ըստ մեղադրանքի Կարեն Արամի Այլազյանի, ծնված 07.04.1991թ., Երևան քաղաքում, ազգությամբ եզդի, ՀՀ քաղաքացի, բռնցքամարտի միջազգային սպորտի վարպետ, միջնակարգ կրթությամբ, չամուսնացած, նախկինում չդատված, հաշվառված և բնակվում է Երևան քաղաքի Բաղրամյան 4-րդ նրբանցք 22-րդ տանը:
Մեղադրվում է ՀՀ քրեական օրենսգրքի 112-րդ հոդվածի 1-ին մասով:

Պ Ա Ր Զ Ե Ց

1.Գործի դատավարական նախապատմությունը
2010թ. մայիսի 5-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 112-րդ հոդվածի 1-ին մասի հատկանիշներով հարուցվել է թիվ 14153610 քրեական գործը:
2010թ. հուլիսի 19-ին Կարեն Այլազյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով և խափանման միջոց է ընտրվել ստորագրություն չհեռանալու մասին:
2010թ. օգոստոսի 19-ին թիվ 14153610 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

2.Գործի փաստական հանգամանքները
Նախաքննության մարմինն ամբաստանյալ Կարեն Այլազյանին մեղադրանք է առաջադրել այն արարքի համար, որ նա 2010թ. մայիսի 02-ին ժամը 22:00-ի սահմաններում Երևան քաղաքի Կոմիտասի պողոտայի 3-րդ շենքի մոտ իր ընկեր Էդգար Ավդալյանի հետ բարձրաձայն կատակելու համար Ավետ Ավագյանի կողմից իրենց անհարկի, անվայել և վիրավորական արտահայտություններով դիտողություն անելու կապակցությամբ, վիճաբանության մեջ է մտել նրա հետ, որի ընթացքում վերջինիս առողջությանը ծանր վնաս պատճառելու նպատակով ձեռքերով դիտավորյալ հարվածներ է հասցրել նրա գլխին` պատճառելով կյանքի համար վտանգավոր` գլխի ձախից քունքոսկրի, գագաթոսկրի բազմաբեկորային կոտրվածքների, գլխուղեղի ծանր աստիճանի սալջարդի, գլխուղեղի աջ կիսագնդի սուբարախնոիդալ արյունազեղման, գլխուղեղի ձախից գագաթ-քունքային հիմնային շրջանի սուր էպիդուրալ հեմատոմայի գլխի ձախից գագաթա-քունքային շրջանի փափուկ հյուսվածքների սալջարդի և ձախից կզակի շրջանի սալջարդ վերքի ձևով, ծանր մարմնական վնասվածքներ:


3. Արագացված դատական քննություն
Մինչև դատաքննությունն սկսելն ամբաստանյալ Կարեն Այլազյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել է նաև ամբաստանյալի պաշտպան Ղ.Պապոյանը:
Մեղադրող Հ.Բալյանը դատական քննության արագացված կարգ կիրառելուն չի առարկել:
Տուժող Ա.Ավագյանը դատական քննության արագացված կարգ կիրառելուն նույնպես չառարկեց և նշեց, որ ամբաստանյալ Կ.Այլազյանի հետ հաշտվել է և նրանից որևէ պահանջ չունի:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:


4.Դատարանի իրավական վերլուծությունները
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Կարեն Այլազյանին առաջադրված մեղադրանքը ՀՀ քրեական օրենսգրքի 112-րդ հոդվածի 1-ին մասով հիմնավորված է: Նրա կողմից կատարած արարքը համապատասխանում է ՀՀ քրեական օրենսգրքի 112-րդ հոդվածի 1-ին մասի հատկանիշներին:
Արարքի քրեաիրավական որակումը ճիշտ է:
Կարեն Այլազյանի նկատմամբ պատիժ նշանակելիս դատարանը հաշվի է առնում կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը բնութագրող տվյալները:
Ամբաստանյալ Կարեն Այլազյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա ընդունել է մեղքը և անկեղծորեն զղջացել է կատարած արարքի համար, նախկինում դատված չի եղել, բնութագրվում է դրական: 2009թ. Եվրոպայի երիտասարդների առաջնության ոսկե մեդալակիր է, 2006թ. Եվրոպայի պատանիների առաջնության բրոնզե մեդալակիր, 2006-2010թթ. բռնցքամարտի ՀՀ բազմակի չեմպիոն, ըստ ՀՀ բռնցքամարտի ֆեդերացիայի միջնորդության նախապատրաստվում է մասնակցելու 2011թ. աշխարհի առաջնությանը, 2012թ. Լոնդոնում կայանալիք 30-րդ օլիմպիական խաղերին:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրել:
Անդրադառնալով Կարեն Արամի Այլազյանի նկատմամբ նշանակվող պատժին, դատարանը գտնում է, որ նրա ուղղվելը հնարավոր է առանց պատիժ կրելու:
Նման եզրահանգման դատարանը գալիս է` հաշվի առնելով հատկապես ամբաստանյալի անձը բնութագրող, պատասխանատվությունն ու պատիժը մեղմացնող հանգամանքների ամբողջությունը, ինչպես նաև մեղադրողի միջնորդությունը` Կ.Այլազյանի նկատմամբ նշանակված պատիժը պայմանականորեն չկիրառելու մասին:
Ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց


Կարեն Արամի Այլազյանին մեղավոր ճանաչել ՀՀ քրեական օրենսգրքի 112-րդ հոդվածի 1-ին մասով և նրա նկատմամբ պատիժ նշանակել ազատազրկում 3 (երեք) տարի ժամկետով:
Կիրառել ՀՀ քրեական օրենսգրքի 70-րդ հոդվածը և Կարեն Այլազյանի նկատմամբ ազատազրկման ձևով նշանակված պատիժը պայմանականորեն չկիրառել, սահմանել փորձաշրջան 1 /մեկ/ տարի ժամկետով:
Կարեն Այլազյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Դատավճիռը բացի ՀՀ քրեական դատավարության օրենսգրքի 359-րդ հոդվածի 1-ին մասով նախատեսված հիմքից, կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում: