ԵԱՔԴ/0111/01/10







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«20» օգոստոսի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Խ.Բաղդասարյան
պաշտպան Ս.Գրիգորյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Սամվել Վլադիմիրի Սիմոնյանի` ծնված 1968 թվականի հոկտեմբերի 23-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատապարտված, աշխատում է Քաղաքացիական ավիացիայի հայկական վարչությունում որպես օդաչու, հաշվառված է Երևան քաղաքի Շարուրի փողոցի 24-րդ շենքի 136-րդ բնակարանում: Մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով, խափանման միջոց է ընտրվել գրավ:
1. Գործի դատավարական նախապատմությունը.
2010 թվականի փետրվարի 16-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Ա.Վանյանի որոշմամբ ՀՀ քրեական օրենսգրքի 258-րդ հոդվածի 4-րդ մասով նախատեսված հանցագործության հատկանիշներով հարուցվել և վարույթ է ընդունվել թիվ 09103910 քրեական գործը:
2010 թվականի մարտի 25-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Ա.Վանյանի որոշմամբ թիվ 09103910 քրեական գործով Գայանե Միշայի Մուրադյանին մեղադրանք է առաջադրվել ՀՀ քրեական օրենսգրքի 333-րդ հոդվածի 2-րդ մասի 1-ին կետով:
2010 թվականի մարտի 26-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Ա.Վանյանի որոշմամբ թիվ 09103910 քրեական գործով Սամվել Վլադիմիրի Սիմոնյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով:
2010 թվականի ապրիլի 16-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Ա.Վանյանի որոշմամբ թիվ 09103910 քրեական գործով Գայանե Միշայի Մուրադյանի վերաբերյալ մասը կարճվել և նրա նկատմամբ քրեական հետապնդումը դադարեցվել է գործուն զղջալու հիմքով:
2010 թվականի ապրիլի 16-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Ա.Վանյանի որոշմամբ թիվ 09103910 քրեական գործով վարույթը կասեցվել է մեղադրյալ Սամվել Վլադիմիրի Սիմոնյանի գտնվելու վայրը պարզված չլինելու հիմքով:
2010 թվականի հուլիսի 16-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Է.Պողոսյանի որոշմամբ թիվ 09103910 քրեական գործն ընդունվել է վարույթ և քրեական գործով վարույթը վերսկսվել է:
2010 թվականի հուլիսի 27-ին Սամվել Վլադիմիրի Սիմոնյանի վերաբերյալ քրեական գործը մեղադրական եզրակացությամբ ուղարկվել է Դատարան:
Սամվել Վլադիմիրի Սիմոնյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով` այն արարքի համար, որ նա 2010 թվականի փետրվարի 13-ին` ժամը 18:00-ի սահմաններում, գնացել է իր նախկին կնոջ` Գայանե Միշայի Մուրադյանի` Քանաքեռի փողոցի 38-րդ տուն` երեխաներին տուն տանելու նպատակով, սակայն տեսնելով, որ կինը իր առջև տան դուռը բաց չի անում և չի ցանկանում երեխաներին տրամադրել` շուրջ 15-20 րոպե տևողությամբ դիտավորությամբ կոպիտ կերպով խախտել է հասարակական կարգը և բացահայտ անհարգալից վերաբերմունք դրսևորելով շրջապատի նկատմամբ` սեռական բնույթի հայհոյանքներ է ու բռնություն գործադրելու սպառնալիք է տվել կնոջ հասցեին, ապա վիճաբանել իրեն դիտողություն արած հարևանների և հավաքված քաղաքացիների հետ:
2. Արագացված դատական քննություն.
Մինչ դատաքննությունն սկսելն ամբաստանյալ Սամվել Վլադիմիրի Սիմոնյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սամվել Վլադիմիրի Սիմոնյանը կատարել է արարք` նախատեսված ՀՀ քրեական օրենսգրքի 258-րդ հոդվածի 2-րդ մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, բնութագիրը, ծննդյան թիվ ԱԱ138592 ու թիվ ԱԱ430594 վկայականների, ամուսնության թիվ ԱԱ046555 վկայականի, Մարշալ Հ.Ք.Բաղրամյանի անվան մեդալի վկայականի, ՀՀ պաշտապնության նախարարության սոցիալական պաշտպանության վարչության թիվ 0555 վկայականի և ՀՀ ԿԱ քաղաքացիական ավիացիայի գլխավոր վարչության «Ավիաուսումնական կենտրոն» ՓԲ ընկերության թիվ 248 վկայականի պատճենները, եկավ հետևյալ եզրահանգման.
Սամվել Սիմոնյանի անձը դրականորեն բնութագրող հանգամանքներ են բարձրագույն կրթություն ունենալը, աշխատելը, ինքնախոստովանական ցուցմունքներ տալը և կատարածի համար զղջալը:
Սամվել Սիմոնյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած երկու երեխաների (Վլադիմիր Սամվելի Սիմոնյան` ծնված 1998 թվականի մարտի 18-ին և Արման Սամվելի Սիմոնյան` ծնված 2004 ապրիլի 30-ին) առկայությունը:
Սամվել Սիմոնյանի պատասխանատվությունն ու պատիժը մեղմացնող հանգամանքներ են նաև նախկինում արատավորված` դատապարտված չլինելը և դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Դատարանը գտնում է, որ Սամվել Սիմոնյանի պատասխանատվությունն ու պատիժը մեղմացնող հանգամաներ պետք է դիտել նաև ՀՀ պաշտպանության համար մղված մարտական գործողություններին մասնակցելը և Մարշալ Հ.Ք.Բաղրամյանի անվան մեդալով պարգևատրվելը:
Դատարանը միաժամանակ արձանագրում է, որ Սամվել Սիմոնյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Սամվել Սիմոնյանը ենթակա է քրեական պատասխանատվության և պատժի:
Դատարանը, հաշվի առնելով Սամվել Սիմոնյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Սամվել Սիմոնյանի նկատմամբ ընտրված խափանման միջոցը` գրավը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2010 թվականի ապրիլի 12-ի որոշմամբ իրեղեն ապացույց ճանաչված հաղորդում ընդունելու մասին թիվ 001300 արձանագրությունը պետք է պահել քրեական գործի հետ միասին:
Դատարանը գտնում է, որ դատական ծախսերն ամբաստանյալ Սամվել Սիմոնյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753-րդ հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ, 369-372-րդ, 3751-րդ և 3753-րդ հոդվածներով` Դատարանը

ՎՃՌԵՑ

Սամվել Վլադիմիրի Սիմոնյանին մեղավոր ճանաչել ՀՀ քրեական օրենսգրքի 258-րդ հոդվածի 2-րդ մասով և պատիժ նշանակել տուգանք` նվազագույն աշխատավաձի երկուհարյուրապատիկի չափով:
Սամվել Վլադիմիրի Սիմոնյանի նկատմամբ ընտրված խափանման միջոցը` գրավը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2010 թվականի ապրիլի 12-ի որոշմամբ իրեղեն ապացույց ճանաչված հաղորդում ընդունելու մասին թիվ 001300 արձանագրությունը պահել քրեական գործի հետ միասին:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ