գործ N ԵԱՔԴ/0105/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ.Ավետիսյան
դատական նիստերի քարտուղար Ե.Կարապետյան
մեղադրող Խ.Բաղդասարյան
տուժող Ա.Չիլինգարյան
թարգման Վ.Շահինյան

2010թ. օգոստոսի 13-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Արա Լենդրուշի Սողոմոնյանի, ծնված 02.01.1961թ. Ջերմուկ քաղաքում, ազգությամբ հայ, ՀՀ քաղաքացի, բարձրագույն կրթությամբ, ֆիզիկապես առողջ, ամուսնացած, խնամքին ոչ ոք, աշխատում է ՙՇառոյան-Սարյան՚ ՍՊԸ-ում որպես աշխղեկ, նախկինում չդատված, հաշվառված է Ջերմուկ քաղաքի, Բ. Վարդանյան փողոցի 1 շենքի թիվ 14 բնակարանում, բնակվում է Երևան քաղաքի Հր. Ներսիսյան փողոցի 14/1 շենքի թիվ 25 բնակարանում, մեղադրվում է ՀՀ քրեական օրենսգրքի 157 հոդվածի 1-ին մասով,

Պ Ա Ր Զ Ե Ց
1.Գործի դատավարական նախապատմությունը.
2010թ. մայիսի 17-ին ՀՀ ոստիկանության Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 157 հոդվածի 1-ին մասի հատկանիշներով հարուցվել է թիվ 14114010 քրեական գործը:
2010թ. հունիսի 14-ին Արա Լենդրուշի Սողոմոնյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 157 հոդվածի 1-ին մասով և նրա նկատմամբ որպես խափանման միջոց է ընտրվել` ստորագրություն չհեռանալու մասին:
2010թ. հուլիսի 17-ին թիվ 14114010 քրեական գործը մեղադրական եզրակացությամբ ստացվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում և ընդունվել վարույթ:
Քրեական գործը նշանակվել է դատաքննության 2010թ. օգոստոսի 03-ին:
2.Գործի փաստական հանգամանքները.
Նախաքննության մարմինն ամբաստանյալ Արա Լենդրուշի Սողոմոնյանին մեղադրանք է առաջադրել հետևյալ արարքի համար.
Արա Սողոմոնյանը հանդիսանալով ՙՇառոյան-Սարյան՚ ՍՊԸ-ի կողմից Երևան քաղաքի Հր.Քոչար 151 հասցեում գտնվող բազմաբնակարանային շենքի կառուցման շինարարական աշխատանքների ղեկավարը, ի պաշտոնե իրականացրել է աշխատանքի ղեկավարումն ու կազմակերպումը, աշխատակիցներին հրահանգավորել է աշխատանքի պաշտպանության, տեխնիկայի անվտանգության կանոնների ու հրահանգների պահանջները, այդ թվում` 2010թ. մարտի 15-ին պայմանագրային կարգով որպես հյուսն աշխատանքի ընդունված Աշոտ Վլադիմիրի Չիլինգարյանին, սակայն սահմանված կարգով հրահանգավորելուց հետո, 2010թ. մարտի 18-ին աշխատանքի պաշտպանության, տեխնիկայի անվտանգության կանոնների ու հրահանգների պահանջների պահպանման նկատմամբ հսկողությունը թուլացրել է, չի ապահովել շենքի 11-րդ հարկում պատի բետոնացման եղանակով կառուցման համար մետաղական կաղապարների տեղադրման նպատակով աշխատանքային հարթակի հավաքման և բարձրության վրա աշխատանքների անվտանգության պատշաճ հսկողություն, որի արդյունքում Ա. Չիլինգարյանն աշխատելով առանց ապահովող ամրագոտու և սաղավարտի, կորցրել է հավասարակշռությունն ու վայր է ընկել 3 մետր բարձրությունից և ստացել մարմնական վնասվածքներ, որոնք վերջինիս առողջությանը պատճառել են որպես կյանքին վտանգ սպառնացող ծանր վնաս:
3.Ապացույցների հետազոտում.
Առաջադրված մեղադրանքում ամբաստանյալ Արա Լենդրուշի Սողոմոնյանն իրեն մեղավոր չճանաչեց և ցուցմունք տվեց այն մասին, որ 2009 թվականի փետրվարի 13-ից աշխատում է Երևան քաղաքի Հր. Քոչար 151 հասցեում գտնվող բազմաբնակարանային բնակելի շենքի կառուցման աշխատանքներ իրականացնող ՙՇառոյան-Սարյան՚ ՍՊԸ-ում, որպես աշխղեկ և իր պարտականութունների մեջ է մտնում նշված շենքի կառուցման աշխատանքների ղեկավարումն ու կազմակերպումը: Ինքն աշխատակիցներին հրահանգավորել է անվտանգության կանոնների պահպանման պահանջների մասին, ինչի մասին աշխատողները ստորագրել են համապատասխան մատյանում: Աշխատանքային պայմանագրով 2010թ. մարտի 15-ին որպես հյուսն աշխատանքի է ընդունվել Աշոտ Վլադիմիրի Չիլինգարյանը, ով սահմանված կարգով հրահանգավորվել է` աշխատանքի անվտանգության կանոնների և հրահանգների պահպանման վերաբերյալ:
2010թ. մարտի 18-ին ժամը 09:00-ի սահմաններում հյուսն Ա. Չիլինգարյանին և էլեկտրաեռակցող Հովիկ Գրիգորյանին հանձնարարել է շենքի 11-րդ հարկում` վերելակի հորանի մոտ, իրականացնել պատի բետոնացման եղանակով կառուցման համար մետաղական կաղապարի տեղադրման աշխատանքներ և այդ նպատակով վերջիններիս տրամադրել է հարթակ հավաքելու համար նախատեսված բոլոր տարրերը, որից հետո հեռացել է այնտեղից: Այնուհետև, երբ գտնվել է կառուցվող շենքի 5-րդ հարկում, Հ. Գրիգորյանից տեղեկացել է, որ Ա. Չիլինգարյանը հարթակի վրայից վայր է ընկել: Բարձրանալով 11-րդ հարկ, տեսել է Ա. Չիլինգարյանին ընկած, մարմնական վնասվածքներ ստացած վիճակում: Ա. Չիլինգարյանն իրեն հայտնել է, որ գտնվելով միայնակ, ցանկացել է հարթաչափի բերել կաղապարը և այն դեպի իրեն քաշելիս կորցրել է հավասարակաշռությունն ու վայր է ընկել հարթակի վրայից: Աշխատակիցները շտապբուժօգնություն են կանչել և բուժ աշխատակիցները Ա. Չիլինգարյանին տեղափոխել են ՙԱրմենիա՚ բժշկական կենտրոն, որտեղ նրան ցույց է տրվել անհրաժեշտ բուժօգնություն: Հայտնել է նաև, որ չնայած այն հանգամանքին, որ ինքը Ա. Չիլինգարյանին և Հ. Գրիգորյանին տրամադրել է հարթակի տեղադրման համար անհրաժեշտ բոլոր տարրերը, ինչպես նաև ամրագոտի և սաղավարտ, սակայն վերջիններս հարթակը տեղադրել են մասնակի և դրա վրա աշխատանքներ են իրականացրել առանց ամրագոտու և սաղավարտի:
Ամբաստանյալին առաջադրված մեղադրանքը, հիմնավորվել է նաև գործով ձեռք բերված հետևյալ ապացույցներով.
Տուժող Աշոտ Վլադիմիրի Չիլինգարյանը ցուցմունք տվեց այն մասին, որ 2010թ. մարտի 15-ին աշխատանքի է ընդունվել Երևան քաղաքի Հր. Քոչար 151 հասցեում գտնվող բազմաբնակարանային շենքի կառուցապատման աշխատանքներ իրականացնող ՙՇառոյան-Սարյան՚ ՍՊԸ-ում որպես հյուսն: Աշխղեկ Արա Սողոմոնյանի կողմից հրահանգավորվել է անվտանգության կանոնների պահպանման պահանջների մասին: 2010 թվականի մարտի 18-ին ժամը 10:00-ի սահմաններում աշխղեկ Ա. Սողոմոնյանի հանձնարարությամբ էլեկտրաեռակցող Հովիկ Գրիգորյանի հետ շենքի 11-րդ հարկի վերելակի հորանի մոտ իրականացրել են մետաղյա կաղապարի տեղադրման աշխատանքներ և այդ նպատակով Հ. Գրիգորյանի հետ հատակից մոտ 3 մետր բարձրության վրա հավաքել են հարթակ և բարձրանալով դրա վրա, միասին փորձել են տեղադրել կաղապարը, որից հետո այն պետք է զոդման եղանակով ամրացվեր: Երբ Հ. Գրիգորյանը իջել է հարթակից և գնացել մետաղյա ամրան բերելու, ինքը մնալով միայնակ, կաղապարը ուղղելու նպատակով այն դեպի իրեն է քաշել, որի ընթացքում ձեռքը սայթաքել է, կորցրել է հավասարակաշռությունը և հարթակի վրայից վայր է ընկել վերելակի հորանի բացվածքի վրա տեղադրված մետաղական վանդակաձև ցանկապատի վրա, որի հետևանքով ստացել է մարմնական վնասվածքներ: Հայտնել է նաև, որ աշխղեկ Ա. Սողոմոնյանը տրամադրել է ինչպես հարթակի հավաքման համար անհրաժեշտ բոլոր տարրերը, այնպես էլ ամրագոտի և սաղավարտ, սակայն հանձնարարություն տալուց հետո վերջինս հեռացել է: Քանի որ կաղապարի տեղադրումը կարճ ժամանակահատված էր տևելու, ինքն ու Հ. Գրիգորյանը հարթակը հավաքել են մասնակի և հարթակի վրա աշխատելու ընթացքում սաղավարտ և ամրագոտի չեն կրել:
Վկա Սասուն Նորիկի Մանուկյանը ցուցմունք տվեց այն մասին, որ 2009թ. փետրվար ամսից աշխատում է Երևան քաղաքի Հր. Քոչար 151 հասցեում գտնվող բազմաբնակարանային շենքի կառուցապատման աշխատանքներ իրականացնող ՙՇառոյան-Սարյան՚ ՍՊԸ-ում որպես հյուսն, իսկ 2010թ. մարտի 15-ին նշված ՍՊԸ-ում որպես հյուսն աշխատանքի է ընդունվել Աշոտ Չիլինգարյանը: 2010թ. մարտի 18-ին ժամը 10:00-ի սահմաններում հիշյալ շենքի 11-րդ հարկի ճակատային մասում աշխատանքներ իրականացնելիս Հ. Գրիգորյանից լսել է, որ Ա. Չիլինգարյանը վայր է ընկել: Անմիջապես մոտենալով տեսել է, որ Ա. Չիլինգարյանը ընկած է վերելակի հորանի մոտ և վերջինիս գլխի շրջանից արյուն է հոսում: Այնուհետև աշխատակիցները զանգահարել են շտապօգնություն, որից հետո ժամանել են բուժ աշխատողներ և Ա. Չիլինգարյանին տեղափոխել հիվանդանոց: Հետագայում Ա. Չիլինգարյանից տեղեկացել է, որ երբ Հ. Գրիգորյանը հարթակից իջել է և գնացել մետաղյա ամրան բերելու, Ա. Չիլինգարյանը փորձել է միայնակ ողղել կաղապարը և երբ այն դեպի իրեն է քաշել, կորցնելով հավասարակաշռությունը հարթակի վրայից վայր է ընկել: Հայտնել է նաև, որ Ա. Չիլինգարյանը հարթակի վրա աշխատելու ընթացքում ամրագոտի և սաղավարտ չի կրել, չնայած այն հանգամանքին, որ իրենք ամեն առավոտ ստանում են իրենց համար նախատեսված սաղավարտը և ամրագոտին:
Վկա, ՀՀ Շինարարների միության աշխատանքի պաշտպանության հանձնաժողովի նախագահ Հրաչիկ Անանյանը ցուցմունք տվեց այն մասին, որ 2009 թվականից հանդիսանում է շինարարների միության աշխատանքի պաշտպանության հանձնաժողովի նախագահ: 2010 թվականի մարտի 19-ին ՀՀ ոստիկանության Արաբկիրի բաժնի պետի հանձնարարականով, Երևան քաղաքի Հր. Քոչար 151 հասցեում կառուցվող բազմաբնակարանային շենքի շինհրապարակում հյուսն Աշոտ Վլադիմիրի Չիլինգարյանի կողմից ստացած մարմնական վնասվածքների վերաբերյալ կատարել է ուսումնասիրություն և տվել մասնագիտական եզրակացություն: Ուսումնասիրությունների արդյունքում պարզվել է, որ Ա. Չիլինգարյանի վայր ընկնելու և մարմնական վնասվածքներ ստանալու պատճառը հանդիսացել է աշխղեկ Արա Լենդրուշի Սողոմոնյանի կողմից աշխատանքների անվտանգ կատարման նկատմամբ թույլ հսկողությունը, որի արդյունքում հյուսն Ա. Չիլինգարյանը բարձրության վրա աշխատանքներ է իրականացրել պաշտպանիչ ցանկապատ չունեցող հարթակի վրա և չի կրել պաշտպանիչ սաղավարտ և ամրագոտի:
Վկա Հովիկ Գրիգորյանի նախաքննության ընթացքում տված և դատաքննության ժամանակ հետազոտված ցուցմունքով այն մասին, որ 2009 թվականի հունիսի 4-ից աշխատում է ՙՇառոյան-Սարյան՚ ՍՊԸ-ում որպես էլեկտրաեռակցող և նշված օրվանից մասնակցում է Երևան քաղաքի Հր. Քոչար 151 հասցեում նշված ՍՊԸ-ի կողմից կառուցվող բազմաբնակարանային շենքի կառուցապատման աշխատանքներին: 2010 թվականի մարտի 18-ին, ժամը 08:30-ի սահմաններում ներկայացել է աշխատանքի և աշխղեկ Ա.Սողոմոնյանի հանձնարարությամբ հյուսն Ա. Չիլինգարյանի հետ շենքի 11-րդ հարկի վերելակի հորանի մոտ իրականացրել է մետաղյա կաղապարի տեղադրման աշխատանքներ: Այդ նպատակով Ա. Չիլինգարյանի հետ, հատակից մոտ 3 մետր բարձրության վրա հավաքել են հարթակ, որից հետո բարձրանալով դրա վրա միասին փորձել են տեղադրել կաղապարը: Այնուհետև, կաղապարը զոդման եղանակով ամրացնելու համար ինքն իջել է հարթակից և գնացել 10-րդ հարկ` մետաղյա ամրան բերելու, որտեղից վերադառնալով տեսել է, որ Ա. Չիլինգարյանը հարթակի վրայից վայր է ընկել և ստացել է մարմնական վնասվածքներ: Ինքը Ա. Չիլինգարյանի վայր ընկնելու և վնասվածքներ ստանալու մասին հայտնել է աշխղեկ Ա. Սողոմոնյանին և մյուս աշխատողներին, որից հետո իրենց կանչով ժամանել են բուժ աշխատակիցները և Ա. Չիլինգարյանին տեղափոխել ՙԱրմենիա՚ ԲԿ: Հետագայում Ա. Չիլինգարյանից տեղեկացել է, որ վերջինս փորձել է միայնակ ուղղել կաղապարը և երբ այն դեպի իրեն է քաշել, ձեռքը սայթաքել է ու նա կորցնելով հավասարակշռությունը, հարթակի վրայից վայր է ընկել: Հայտնել է նաև, որ հարթակը իր բոլոր բաղկացուցիչ մասերով գտնվել է շենքի 11-րդ հարկի վերելակի հորանի մոտ և աշխղեկ Ա. Սողոմոնյանը հանձնարարել է, որ հարթակը հավաքեն ամբողջությամբ, որից հետո հեռացել է` չհետևելով իրենց կողմից հարթակի տեղադրման աշխատանքներին և ամրագոտին ու սաղավարտը կրելու հանգամանքին: Իրենք աշխղեկի հեռանալուց կարծելով, որ անվտանգ աշխատանք են կատարելու, հարթակը հավաքել են մասնակի` առանց պաշտպանիչ ցանկապատի և դրա վրա աշխատել են առանց ամրագոտու և սաղավարտի:
Դատաբժկական փորձաքննության թիվ 384/հ եզրակացությամբ այն մասին, որ Աշոտ Չիլինգարյանի ստացած մարմնական վնասվածքները` բաց զուգակցված գանգուղեղային վնասվածքի` ձախից ճակատոսկրի բազմաթիվ ներհրված կոտրվածքի, ձախից ճակատային ծոցի ամբողջականության խախտումով, գանգի դիմային բաժնի ոսկրերի` քթի ոսկրերի, ձախ ակնակապճի վերին պատի, զույգ հայմորյան ծոցերի առաջնային պատի կոտրվածքներ, զույգ վերծնոտային ծոցերում և մաղոսկրերի ծոցերում հեմոռագիկ պարունակության առկայության` չափավոր պնևմոցեֆալիայի, հեմոսինուսիտի ձևերով, պատճառվել են բութ առարկաների ներգործության հետևանքով, հնարավոր է տուժողի կողմից, նշված ժամանակին և հանգամանքներում, որոնք պատճառել են առողջությանը ծանր վնաս` որպես կյանքին վտանգ սպառնացող:
ՀՀ Շինարարների միության աշխատանքի պաշտպանության հանձնաժողովի նախագահ Հրաչիկ Անանյանի կողմից 03.05.2010թ. տրված մասնագիտական եզրակացությամբ, դրան կից ներկայացված փաստաթղթերի պատճեններով այն մասին, որ Աշոտ Վլադիմիրի Չիլինգարյանը ՙՇառոյան-Սարյան՚ ՍՊԸ-ում որպես հյուսն աշխատանքի է ընդունվել 2010 թվականի մարտի 15-ին և նույն օրն անվտանգության տեխնիկայի կանոնների և հրահանգների պահպանման գծով հրահանգավորվել է: Ուսումնասիրելով Ա. Չիլինգարյանի հետ տեղի ունեցած դժբախտ դեպքի հանգամանքները և պատճառները հանգել է հետևության, որ դեպքի համար պատասխանատու է աշխղեկ Արա Լենդրուշի Սողոմոնյանը, ով չնայած ապահովել է աշխատանքային հարթակի պատրաստման համար անհրաժեշտ դետալները և հանգույցները, կատարել է աշխատանքի անվտանգության հրահանգներ, սակայն չի ապահովել աշխատանքային հարթակի հավաքման և բարձրության վրա աշխատանքների անվտանգության պատշաճ հսկողություն:
Դեպքի վայրի զննության արձանագրությամբ և դրան կից լուսանկարչական հավելվածով այն մասին, որ Երևան քաղաքի Հր. Քոչար 151 հասցեում կառուցվող բազմաբնակարանային շենքի 11-րդ հարթակում իրականացվել են շինարարական աշխատանքներ և հյուսն Աշոտ Չիլինգարյանը 3 մետր բարձրությունից վայր է ընկել վերելակի հորանի վրա ու ստացել է վնասվածքներ:
Կրիմինալ մատյանի զննության արձանագրությամբ, այն մասին, որ Ա.Չիլինգարյանը տեղափոխվել է Հր. Քոչար փողոցի 151 շենքից և վայր է ընկել բարձրությունից:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արա Լենդրուշի Սողոմոնյանին ՀՀ քրեական օրենսգրքի 157 հոդվածի 1-ին մասով առաջադրված մեղադրանքը հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 157 հոդվածի 1-ին մասի հատկանիշներին և արարքի որակումը ճիշտ է:
Արա Սողոմոնյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, հատուցել է տուժողին պատճառված նյութական վնասը, ինչպես նաև տուժողի խնդրանքն ամբաստանյալի նկատմամբ մեղմ պատիժ նշանակելու վերաբերյալ:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Արա Լենդրուշի Սողոմոնյանը ենթակա է քրեական պատասխանատվության և պատժի:
Դատարանը, հաշվի առնելով, որ պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ ամբաստանյալի նկատմամբ պատիժ պետք է նշանակել տուգանքի ձևով:
Նկատի ունենալով, որ տուժող Աշոտ Չիլինգարյանը հրաժարվել է քաղաքացիական հայցի պահանջից, դատարանը գտնում է, որ քաղաքացիական հայցի հարցը պետք է համարել լուծված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Արա Լենդրուշի Սողոմոնյանին մեղավոր ճանաչել ՀՀ քրեական օրենսգրքի 157 հոդվածի 1-ին մասով և նրան դատապարտել տուգանքի երկու հարյուր հիսուն հազար (250.000) ՀՀ դրամի չափով:
Արա Լենդրուշի Սողոմոնյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Տուժող Աշոտ Չիլինգարյանի քաղաքացիական հայցի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:


ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ