ԵԱՔԴ/0091/01/10






ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«27» օգոստոսի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղարներ Ն.Ղազարյան
Ա.Մնացականյան
Ռ.Ավետյան
մեղադրող Գ.Շահբազյան
տուժողներ Լ.Պետրոսյան
Զ.Պետրոսյան
պաշտպան Է.Չինարյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Արմեն Մակեդոնի Երիցյանի` ծնված 1979 թվականի մայիսի 8-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, աշխատում է Երևան քաղաքի Թբիլիսյան խճուղի 22 հասցեում գործող «Էտնա» ռեստորանում` որպես մատուցող, նախկինում չդատապարտված, հաշվառված է Երևան քաղաքի Պ.Սևակի փողոցի 1/4 շենքի 1-ին բնակարանում: Մեղադրանք է առաջադրվել ՀՀ քրեական օրենսգրքի 118-րդ հոդվածով և 136-րդ հոդվածի 2-րդ մասով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2010 թվականի մայիսի 10-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Է.Պողոսյանի որոշմամբ ՀՀ քրեական օրենսգրքի 118-րդ հոդվածով և 113-րդ հոդվածի 1-ին մասով նախատեսված հանցագործությունների հատկանիշներով հարուցվել և վարույթ է ընդունվել թիվ 09110410 քրեական գործը:
2010 թվականի հունիսի 15-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Է.Պողոսյանի որոշմամբ թիվ 09110410 քրեական գործով Մարիամ Գարդյանին վիրավորելու մասով Արմեն Մակեդոնի Երիցյանի նկատմամբ քրեական հետապնդում չի իրականացվել դիմողի բողոքի բացակայության հիմքով:
2010 թվականի հունիսի 15-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Է.Պողոսյանի որոշմամբ թիվ 09110410 քրեական գործով Զվարթ Պետրոսյանի առողջությանը միջին ծանության վնաս պատճառելու մասով Վարդան Սեդրակյանի նկատմամբ քրեական հետապնդում չի իրականացվել դիմողի բողոքի բացակայության հիմքով:
2010 թվականի հունիսի 16-ին ՀՀ ոստիկանության Քանաքեռ-Զեյթունի քննչական բաժնի ավագ քննիչ Է.Պողոսյանի որոշմամբ թիվ 09110410 քրեական գործով Արմեն Մակեդոնի Երիցյանին մեղադրանք է առաջադրվել ՀՀ քրեական օրենսգրքի 118-րդ հոդվածով և 136-րդ հոդվածի 2-րդ մասով:
2010 թվականի հունիսի 30-ին Արմեն Մակեդոնի Երիցյանի վերաբերյալ քրեական գործը մեղադրական եզրակացությամբ ուղարկվել է Դատարան:
Արմեն Մակեդոնի Երիցյանին մեղադրանք է առաջադրվել ՀՀ քրեական օրենսգրքի 118-րդ հոդվածով և 136-րդ հոդվածի 2-րդ մասով` այն արարքների համար, որ նա 2010 թվականի ապրիլի 23-ին` ժամը 17:30-ի սահմաններում, Երևան քաղաքի Դրոյի փողոցի 21-րդ շենքի 27-րդ բնակարանում կենցաղային հարցերի շուրջ առաջացած վիճաբանության ժամանակ ծեծի է ենթարկել նախկին կնոջը` Լիլիթ Կարոյի Պետրոսյանին և նրա մորը` Զվարթ Բազոյի Պետրոսյանին` պատճառելով նրանց առողջությանը թեթև վնասի հատկանիշներ չպարունակող վնասվածքներ և այդ ընթացքում սեռական բնույթի հայհոյանքներ տալով Զվարթ և Լիլիթ Պետրոսյաններին, անպարկեշտ ձևով ստորացրել է նրանց պատիվն ու արժանապատվությունը:
Որից հետո, նույն օրը` երեկոյան ժամը 21:00-ի սահմաններում, կրկին գնացել է Դրոյի փողոցի 21-րդ շենքի 27-րդ բնակարան, որտեղ կենցաղային հարցերի շուրջ առաջացած վիճաբանության ժամանակ ծեծի է ենթարկել Լիլիթ և Զվարթ Պետրոսյաններին` պատճառելով նրանց առողջությանը թեթև վնասի հատկանիշներ չպարունակող վնասվածքներ և այդ ընթացքում, կրկին անգամ, սեռական բնույթի հայհոյանքներ տալով Զվարթ և Լիլիթ Պետրոսյաններին, անպարկեշտ ձևով ստորացրել է նրանց պատիվն ու արժանապատվությունը:
2010 թվականի հուլիսի 9-ին Դատարանի որոշմամբ թիվ ԵԱՔԴ/0091/01/10 քրեական գործով Արմեն Մակեդոնի Երիցյանին ՀՀ քրեական օրենսգրքի 136-րդ հոդվածի 2-րդ մասով առաջադրված մեղադրանքի մասով գործի վարույթը կարճվել և նրա նկատմամբ այդ մասով քրեական հետապնդումը դադարեցվել է` արարքում հանցակազմի բացակայության հիմքով:
2010 թվականի օգոստոսի 6-ին Դատարանի որոշմամբ թիվ ԵԱՔԴ/0091/01/10 քրեական գործով վարույթը կասեցվել է և ամբաստանյալ Արմեն Մակեդոնի Երիցյանի նկատմամբ հայտարարվել է հետախուզում:
2010 թվականի օգոստոսի 20-ին Դատարանի որոշմամբ թիվ ԵԱՔԴ/0091/01/10 քրեական գործով վարույթը վերսկսվել է:
2. Արագացված դատական քննություն.
Մինչ դատաքննությունն սկսելն ամբաստանյալ Արմեն Մակեդոնի Երիցյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արմեն Մակեդոնի Երիցյանը կատարել է արարք` նախատեսված ՀՀ քրեական օրենսգրքի 118-րդ հոդվածով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, «Նինջ» ՍՊ ընկերության «Էտնա» ռեստորանի կողմից տրված անվանաքարտը, եկավ հետևյալ եզրահանգման.
Արմեն Երիցյանի անձը դրականորեն բնութագրող հանգամանքներ են աշխատելը, ինքնախոստովանական ցուցմունքներ տալը և կատարածի համար զղջալը:
Արմեն Երիցյանի պատասխանատվությունն ու պատիժը մեղմացնող հանգամանք է նախկինում արատավորված` դատապարտված չլինելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Դատարանը միաժամանակ արձանագրում է, որ սույն գործում ամբաստանյալ Արմեն Երիցյանի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Արմեն Երիցյանը ենթակա է քրեական պատասխանատվության և պատժի:
Դատարանը, հաշվի առնելով Արմեն Երիցյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքը, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Արմեն Երիցյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը դատարանի նախաձեռնությամբ ամբաստանյալ Արմեն Երիցյանից ենթակա չեն բռնագանձման, քանի որ տուժողները, հնարավորություն ունենալով իրենց շահերը դատարանում ներկայացնել, ամբաստանյալին որևէ պահանջ չեն ներկայացրել: Ինչ վերաբերում է նույն մասի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753-րդ հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751-րդ և 3753-րդ հոդվածներով` Դատարանը



ՎՃՌԵՑ

Արմեն Մակեդոնի Երիցյանին մեղավոր ճանաչել ՀՀ քրեական օրենսգրքի 118-րդ հոդվածով և պատիժ նշանակել տուգանք` նվազագույն աշխատավարձի հիսնապատիկի չափով:
Արմեն Մակեդոնի Երիցյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ