գործ N ԵԱՔԴ/0089/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ.Ավետիսյան
դատական նիստերի քարտուղար Ե.Կարապետյան
մեղադրող Ա.Մնացականյան
ամբաստանյալ Կ. Ավագյան
տուժողի իրավահաջորդ Լ. Տեր-Զաքարյան

2010թ. հուլիսի 21-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Կոստիկ Գալուստի Ավագյանի, ծնված 15.02.1970թ. Նախիջևան քաղաքում, ազգությամբ հայ, ՀՀ քաղաքացի, ֆիզիկապես վատառողջ, ամուսնացած, խնամքին երկու անձ, չի աշխատում, նախկինում չդատված, հաշվառված և բնակվում է Արարատի մարզ, Սայաթ-Նովա գյուղ, Նոր թաղամաս 1-ին փողոց 15 տանը, մեղադրվում է ՀՀ քրեական օրենսգրքի 242 հոդվածի 2-րդ մասով,

Պ Ա Ր Զ Ե Ց
1.Գործի դատավարական նախապատմությունը.
2010թ. հունիսի 18-ին ՀՀ ոստիկանության Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 242 հոդվածի 2-րդ մասի հատկանիշներով հարուցվել է թիվ 60113610 քրեական գործը:
2010թ. հունիսի 23-ին Կոստիկ Գալուստի Ավագյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 242 հոդվածի 2-րդ մասով և նրա նկատմամբ 21.06.2010թ. որպես խափանման միջոց ընտրված` ստորագրություն չհեռանալու մասին թողնվել է անփոփոխ:
2010թ. հունիսի 30-ին թիվ 60113610 քրեական գործը մեղադրական եզրակացությամբ ստացվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում և ընդունվել վարույթ:
Քրեական գործը նշանակվել է դատաքննության 2010թ. հուլիսի 21-ին:
2.Գործի փաստական հանգամանքները.
Նախաքննության մարմինն ամբաստանյալ Կոստիկ Գալուստի Ավագյանին մեղադրանք է առաջադրել հետևյալ արարքի համար.
Կոստիկ Ավագյանը 2010թ. ապրիլի 21-ին, ժամը 1730-ի սահմաններում, իր անձնական օգտագործման ՙՕպել՚ մակնիշի, 14 ՍՏ 872 պետհամարանիշի ավտոմեքենայով Երևան քաղաքի Բաղրամյան պողոտայով` Կասյան փողոցի կողմից Օրբելի փողոցի ուղղությամբ ընթանալիս, իր ընթացքի ուղղության նկատմամբ աջից դեպի ձախ կողմ` թիվ 79Ա շենքի դիմացից փողոցը հատող, իր երթևեկության համար վտանգ առաջացրած հետիոտն Կարո Գրիգորի Տեր-Զաքարյանին նկատելուց հետո, ժամանակին արգելակելու դեպքում, մինչ նրան հասնելն ավտոմեքենան կանգնեցնելու տեխնիկական հնարավորություն ունենալով, խախտել է ՃԵԿ-ի 67 կետի պահանջը` ուշացումով է դիմել արգելակման, որի հետևանքով էլ ավտոմեքենայի առջևի աջ կողային մասով վրաերթի է ենթարկել նրան ու անզգուշությամբ պատճառել մահ:
3.Ապացույցների հետազոտում.
Առաջադրված մեղադրանքում ամբաստանյալ Կոստիկ Ավագյանն իրեն մեղավոր ճանաչեց լիովին և ցուցմունք տվեց այն մասին, որ 2010թ. ապրիլի 21-ին, ժամը 1730-ի սահմաններում, իր անձնական օգտագործման ՙՕպել՚ մակնիշի, 14 ՍՏ 872 պետհամարանիշի` տեխնիկապես սարքին, առանց բեռի և ուղևորի ավտոմեքենան վարել է Երևան քաղաքի Բաղրամյան պողոտայով` Կասյան փողոցի կողմից Օրբելի փողոցի ուղղությամբ, իր ուղեմասի ձախ եզրային գոտով, զույգ հոծ գծից մոտ 0,5 մետր հեռավորության վրա` շուրջ 30 կմ/ժ արագությամբ: Հետիոտն Կարո Գրիգորի Տեր-Զաքարյանին նկատել է աջ ճամփեզրից սկսած` թիվ 79Ա շենքի դիմացից, իր ընթացքի ուղղության նկատմամբ աջից դեպի ձախ կողմ փողոցը հատելիս, ով դանդաղ քայլերով, ուղղանկյան տակ շուրջ 10 մետր անցնելուց հետո հայտնվել է իր ընթացագոտում: Ինքը կտրուկ արգելակման է դիմել ու միաժամանակ դեպի ձախ է մանևրել Տեր-Զաքարյանի կողմից իր ընթացագոտում հայտնվելու պահին, սակայն չկարողանալով խուսափել բախումից, ավտոմեքենայի առջևի աջ կողային մասով վրաերթի է ենթարկել նրան: Վրաերթից հետո ինքը կանգ է առել ու մնացել դեպքի վայրում, իսկ Կարո Տեր-Զաքարյանին դեպքի վայր ներկայացած շտապօգնության բուժանձնակազմը տեղափոխել է հիվանդանոց: Հիվանդանոցում Տեր-Զաքարյանը բուժվել է մինչև 2010թ. ապրիլի 28-ը, ապա դուրս գրվելով գնացել է տուն, որտեղ էլ 2010թ. ապրիլի 30-ին մահացել է: Կարո Տեր-Զաքարյանի բուժման ընթացքում ինքը հոգացել է բոլոր ծախսերը:
Ամբաստանյալին առաջադրված մեղադրանքը, նրա խոստովանական ցուցմունքից բացի, հիմնավորվել է նաև գործով ձեռք բերված հետևյալ ապացույցներով.
Տուժող Կարո Գրիգորի Տեր-Զաքարյանի կողմից մինչ մահը տված բացատրությամբ ու դիմումով այն մասին, որ 2010թ. ապրիլի 21-ին, ժամը 1730-ի սահմաններում, գտնվելով Երևան քաղաքի Բաղրամյան պողոտայում, թիվ 79Ա շենքի դիմաց, ցանկացել է հատել պողոտան` դեպի Օրբելու փողոց տանող ուղեմասին հարակից մայթեզրից հանդիպակաց մայթեզրն անցնելու նպատակով: Մայթեզրից սկսած, դանդաղ քայլերով, ուղղանկյան տակ շուրջ 10 մետր տարածություն անցնելուց հետո լսել է արգելակային ձայն, իսկ ապա վրաերթի է ենթարկվել ձախ կողմից մոտեցող արտասահմանյան արտադրության ավտոմեքենայի կողմից: Նշված ավտոմեքենայի վարորդ Կոստիկ Ավագյանը դեպքի վայրում մոտեցել և օգնել է իրեն ոտքի կանգնել: Կոստիկ Ավագյանի նկատմամբ ինքը բողոք և վնասի փոխհատուցման պահանջ չունի ու չի ցանկանում, որ իրեն պատճառված մարմնական վնասվածքի համար նա քրեական պատասխանատվության ենթարկվի:
Տուժողի իրավահաջորդ Լեոն Կարոյի Տեր-Զաքարյանի ցուցմունք տվեց այն մասին, որ 2010թ. ապրիլի 21-ին, ժամը 1730-ի սահմաններում, Երևան քաղաքի Բաղրամյան պողոտայում, Կոստիկ Ավագյանի կողմից ՙՕպել՚ մակնիշի ավտոմեքենայով հորը վրաերթի ենթարկելու և մարմնական վնասվածք պատճառելու մասին իմացել է նույն օրը: Ըստ վարորդ Կոստիկ Ավագյանի և հոր պատմածի տեղեկացել է, որ վրաերթը տեղի է ունեցել Բաղրամյան պողոտայի դեպի Օրբելի փողոց տանող ուղեմասում: Վրաերթից հետո Կոստիկը մնացել է դեպքի վայրում ու կազմակերպել հոր տեղափոխումը հիվանդանոց, որտեղ էլ հոգացել է բուժման ծախսերը: Հիվանդանոցից դուրս գրվելուց հետո, 2010թ. ապրիլի 30-ին հայրը մահացել է: Որպես տուժողի իրավահաջորդ Կոստիկ Ավագյանի նկատմամբ ինքը վնասի փոխհատուցման պահանջ չունի: Նա միաժամանակ խնդրեց ամբաստանյալ Ավագյանի նկատմամբ նշանակել մեղմ պատիժ:
Դեպքի վայրի և ավտոմեքենայի զննության արձանագրություններով, ինչպես նաև վերջիններիս լուսանկարով այն մասին, որ դեպքի վայրում առկա է ՙՕպել՚ մակնիշի 14 ՍՏ 872 պետհամարանիշի ավտոմեքենայի կողմից թողնված 6,2 մետր երկարությամբ մեկ արգելակային հետք, իսկ ավտոմեքենան կանգնած է Բաղրամյան պողոտայի` դեպի Օրբելի փողոց տանող ուղեմասում` թից 79Ա շենքի դիմաց, ձախ կողմի անիվները զույգ հոծ գծի վրա` հետվրաերթային դիրքով: Դեֆորմացված է ավտոմեքենայի շարժիչի ծածկոցի աջ կողային շրջանը:
Դեպքի վայրի լրացուցիչ զննության արձանագրությամբ, կազմված սխեմայով և լուսանկարով այն մասին, որ Կոստիկ Ավագյանը դեպքի վայրում ցույց է տվել վրաերթի նախորդ պահին իր ընթացքի և հետիոտնի շարժման ուղղությունները, ինչպես նաև վրաերթի տեղը:
Դատաբժշկական փորձաքննության եզրակացություններով այն մասին, որ Կարո Գրիգորի Տեր-Զաքարյանի վնասվածքները` ձախ բազուկոսկրի վ/3-ի փակ կոտրվածքի, գլխի աջից ճակատային շրջանի փափուկ հյուսվածքների քերծվածքների և արյունազեղման ձևերով են: Մահը վրա է հասել կենդանության օրոք բութ առարկայով հասցված ձախ բազուկոսկրի անատոմիական վզիկի տեղաշարժված փակ կոտրվածքից` թոքերի մանր ու միջին տրամաչափի, ինչպես նաև գլխուղեղի եզակի մանր անոթների ճարպային էմբոլներով առաջացած խցանման հետևանքով:
Դատահետքաբանական փորձաքննության թիվ 13761002 եզրակացությամբ այն մասին, որ ՙՕպել՚ մակնիշի 14 ՍՏ 872 պետհամարանիշի ավտոմեքենայի շարժիչի ծածկոցի աջ կողմում առկա է մեխանիկական բնույթի վնասվածք, որն առաջացել է համեմատաբար փափուկ մակերես ունեցող առարկայի հետ փոխազդեցության մեջ մտնելու հետևանքով, որպիսին կարող է հանդիսանալ նաև մարդու մարմինը:
Դատաավտոտեխնիկական փորձաքննության եզրակացությամբ այն մասին, որ ՙՕպել՚ մակնիշի 14 ՍՏ 872 պետհամարանիշի ավտոմեքենայի վարորդ Կոստիկ Գալուստի Ավագյանն իր երթևեկության համար վտանգ առաջացրած հետիոտն Կարո Գրիգորի Տեր-Զաքարյանին նկատելուց հետո, ժամանակին արգելակելու դեպքում, մինչ նրան հասնելն ավտոմեքենան կանգնեցնելու տեխնիկական հնարավորություն ունենալով, խախտել է ՃԵԿ-ի 67 կետի պահանջը` ուշացումով է դիմել արգելակման, որպիսի գործողությամբ էլ պայմանավորել է վրաերթը:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Կոստիկ Գալուստի Ավագյանին ՀՀ քրեական օրենսգրքի 242 հոդվածի 2-րդ մասով առաջադրված մեղադրանքը հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 242 հոդվածի 2-րդ մասի հատկանիշներին և արարքի որակումը ճիշտ է:
Կոստիկ Ավագյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, երկրորդ խմբի հաշմանդամ է, խնամքին են գտնվում երկու անչափահաս երեխաները, բնութագրվում է դրական, կամովին հատուցել է հանցագործությամբ պատճառված վնասը, ինչպես նաև տուժողի իրավահաջորդի խնդրանքն ամբաստանյալի նկատմամբ մեղմ պատիժ նշանակելու վերաբերյալ:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Կոստիկ Գալուստի Ավագյանը ենթակա է քրեական պատասխանատվության և պատժի:
Դատարանը հաշվի առնելով հանցավորի անձը բնութագրող և պատասխանատվությունն ու պատիժը մեղմացնող վերը նշված հանգամանքները, ինչպես նաև պատասխանատվությունն ու պատիժը ծանրացնող հանգամանքների բացակայությունը, հանգում է հետևության, որ Կոստիկ Ավագյանի ուղղվելը հնարավոր է առանց պատիժը կրելու` պայմանականորեն պատիժը չկիրառելու պայմաններում:
Դատարանը գտնում է, որ նախնական քննության մարմնի կողմից ապացույց ճանաչված` որպես այլ փաստաթուղթ տուժող Կարո Տեր-Զաքարյանի բացատրությունը պետք է պահել քրեական գործի հետ միասին:
Նկատի ունենալով, որ տուժողի իրավահաջորդ Լևոն Տեր-Զաքարյանին պատճառված նյութական վնասն ամբաստանյալի կողմից ամբողջովին հատուցվել է և նա հրաժարվել է քաղաքացիական հայցի պահանջից, դատարանը գտնում է, որ քաղաքացիական հայցի հարցը պետք է համարել լուծված:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Կոստիկ Գալուստի Ավագյանին մեղավոր ճանաչել ՀՀ քրեական օրենսգրքի 242 հոդվածի 2-րդ մասով և նրան դատապարտել ազատազրկման մեկ (1) տարի վեց (6) ամիս ժամկետով` տրանսպորտային միջոցներ վարելու իրավունքից զրկելով երկու (2) տարի ժամկետով:
Կիրառել ՀՀ քրեական օրենսգրքի 70 հոդվածը և Կոստիկ Գալուստի Ավագյանի նկատմամբ ազատազրկման ձևով նշանակված պատիժը պայմանականորեն չկիրառել` սահմանելով փորձաշրջան երկու (2) տարի ժամկետով:
Կոստիկ Ավագյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Ապացույց ճանաչված` որպես այլ փաստաթուղթ տուժող Կարո Տեր-Զաքարյանի բացատրությունը պահել քրեական գործի հետ միասին:
Տուժողի իրավահաջորդ Լևոն Տեր-Զաքարյանի քաղաքացիական հայցի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ