գործ N ԵԱՔԴ/0088/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ.Ավետիսյան
դատական նիստերի քարտուղար Ե.Կարապետյան
մեղադրող Ա.Սեփոյան,
Ա.Մնացականյան
պաշտպան Կ.Ավանեսյան
տուժողի իրավահաջորդ Ա.Բաբայան
տուժողի իրավահաջորդի ներկայացուցիչներ Գ.Հովհաննիսյան,
Հ.Ճարոյան

2010թ. օգոստոսի 18-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Վահան Մարտինի Եղիազարյանի, ծնված 04.10.1983թ. Վարդենիսի շրջանի Ծովակ գյուղում, ազգությամբ հայ, ՀՀ քաղաքացի, ֆիզիկապես վատառողջ, միջնակարգ կրթությամբ, ամուսնացած, խնամքին է գտնվում չորս ամսական երեխան, չի աշխատում, նախկինում չդատված, հաշվառված է Գեղարքունիքի մարզի Ծովակ գյուղում, բնակվում է Երևան քաղաքի Հաղթանակի 3-րդ փողոցի 3-րդ նրբանցքի 5-րդ տանը, մեղադրվում է ՀՀ քրեական օրենսգրքի 242 հոդվածի 2-րդ մասով,

Պ Ա Ր Զ Ե Ց
1.Գործի դատավարական նախապատմությունը.
2010թ. ապրիլի 06-ին ՀՀ ոստիկանության Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 242 հոդվածի 2-րդ մասի հատկանիշներով հարուցվել է թիվ 60107410 քրեական գործը:
2010թ. ապրիլի 09-ին Վահան Մարտինի Եղիազարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 242 հոդվածի 2-րդ մասով:
2010թ. ապրիլի 06-ին Վահան Եղիազարյանի նկատմամբ որպես խափանման միջոց է ընտրվել ստորագրություն չհեռանալու մասին:
2010թ.ապրիլի 09-ին ընտրված խափանման միջոցը փոփոխվել է և որպես խափանման միջոց է ընտրվել կալանավորումը:
2010թ. հունիսի 30-ին թիվ 60107410 քրեական գործը մեղադրական եզրակացությամբ ստացվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում և ընդունվել վարույթ:
Քրեական գործը նշանակվել է դատաքննության 2010թ. հուլիսի 20-ին:
2.Գործի փաստական հանգամանքները.
Նախաքննության մարմինն ամբաստանյալ Վահան Մարտինի Եղիազարյանին մեղադրանք է առաջադրել հետևյալ արարքի համար.
Վահան Եղիազարյանը 2010թ. ապրիլի 05-ին, ժամը 2100-ի սահմաններում, իր վարած ՙՀունդաի-Սոնատա՚ մակնիշի 06 ՕՕ 147 պետհամարանիշի ավտոմեքենայով Երևան քաղաքի Դավիթ Անհաղթ փողոցով դեպի Կոմիտաս պողոտայի ուղղությամբ երթևեկելիս, հասնելով թիվ 21 հասցեում գտնվող ՙՍթար՚ սուպերմարկետի դիմացը, խախտել է ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ կետի, 24 հոդվածի 7-րդ մասի, ՃԵԿ-ի 53 և 129 կետերի պահանջները, այն է` ավտոմեքենան վարելով ալկոհոլային հարբածության վիճակում, հատել է հանդիպակաց ուղեմասերը բաժանող զույգ հոծ գծանշումը, մեքենան հանդիպակաց ուղղության երթևեկելի ուղեմաս դուրս բերելով, երթևեկություն է իրականացրել տվյալ ուղղության երթևեկելի ուղեմասով, իսկ հանդիպակաց երթևեկությամբ մոտեցող ավտոմեքենայի լապտերների հեռահար լույսերից շլանալուց հետո, չի միացրել վթարային-լուսային ազդանշանները և ընթացքի նույն արագությամբ շարունակել է երթևեկությունը, որի հետևանքով ինքն իրեն զրկելով վրաերթը կանխելու տեխնիկական հնարավորությունից, վրաերթի է ենթարկել հոծ գծանշման վրա կանգնած վիճակում գտնվող հետիոտն Գայանե Վլադիմիրի Բաբայանին և անզգուշությամբ պատճառել է մահ:
3.Ապացույցների հետազոտում.
Առաջադրված մեղադրանքում ամբաստանյալ Վահան Եղիազարյանն իրեն մեղավոր ճանաչեց և հրաժարվելով ցուցմունք տալուց պնդեց նախաքննության ընթացում տված ցուցմունքն այն մասին, որ աշխատել է ՙԲաբիկ-90՚ ՍՊ ընկերությունում որպես վարորդ-առաքիչ: 2010թ. ապրիլի 3-ին ծնվել է իր առաջնեկը: Այդ կապակցությամբ 2010թ. ապրիլի 5-ին Հաղթանակ թաղամասում, գործընկերների հետ օգտագործել են ալկոհոլ: Այնուհետև իր հորաքրոջ որդու` Դավիթ Հալաջյանի հետ ցանկացել են գնալ Զեյթուն թաղամաս: Ժամը 21:00-ի սահմաններում, երբ հասել են Ռուբինյանց և Պ.Սևակ փողոցների խաչմերուկ, զանգահարել են տանից և ասել, որ պետք է գնան ծննդատուն` երեխային տեսնելու: Նշված խաչմերուկից հետադարձ է կատարել և իր վարած ՙՀոնդաի-Սոնատա՚ մակնիշի 06 ՕՕ147 պ/հ ավտոմեքենայով երթևեկել է Երևան քաղաքի Դ.Անհաղթի փողոցով դեպի Կոմիտասի պողոտայի ուղղությամբ, մոտ 50-60 կմ/ժամ արագությամբ, ուղեմասի ձախ եզրային շարքով` տրավմայի գծերի հատվածով, մոտակա լուսարձակները միացված վիճակում: Չհասած Դ.Անհաղթի փողոցի թիվ 21 հասցեում գտնվող ՙՍթար՚ սուպերմարկետի դիմացի հատվածին, իր ավտոմեքենայի հետևից երթևեկող ավտոմեքենայի վարորդը լուսարձակներով ազդանշան տալով` ճանապարհ է խնդրել: Նշված ավտոմեքենային ճանապարհ տալու նպատակով իր վարած ավտոմեքենայով մանևրել է դեպի ձախ և մուտք գործել հանդիպակաց երթևեկելի ուղեմաս, քանի որ աջից այլ ավտոմեքենաներ են ընթացել: Հանդիպակաց ուղեմաս դուրս գալուց հետո, Կ. Ուլնեցու փողոցի կողմից երթևեկող, ՙԲՄՎ՚ մակնիշի ավտոմեքենան հեռահար լուսարձակներով շլացրել է իրեն, սակայն ինքը մոտ 5-6 վայրկյան նույն արագությամբ շարունակել է երթևեկությունը: Երբ շլացնող ավտոմեքենան անցել է իր ավտոմեքենայից, նկատել է ճանապարհի կենտրոնական մասում, հոծ գծերի վրա, դեմքով դեպի ՙՍթար՚ սուպերմակետը կանգնած կնոջը: Վրաերթից խուսափելու նպատակով կրկին մանևրել է դեպի ձախ և դիմել արգելակման, սակայն վրաերթից խուսափել չի կարողացել և արգելակման սկզբնապահին վրաերթի է ենթարկել տուժողին, որից հետո անցնելով որոշակի տարածություն, կանգնեցրել է ավտոմեքենան: Իրենք մոտեցել են վրաերթի ենթարկված կնոջը և փորձել օգնություն ցույց տալ: Քիչ անց դեպքի վայր է մոտեցել շտապօգնության ավտոմեքենան և տուժողին տեղափոխել են Միքայելյանի անվան վիրաբուժության ինստիտուտ, սակայն ճանապարհին տուժողը մահացել է:
Ամբաստանյալին առաջադրված մեղադրանքը, նրա խոստովանական ցուցմունքից բացի, հիմնավորվել է նաև գործով ձեռք բերված հետևյալ ապացույցներով.
Տուժողի իրավահաջորդ Աիդա Բաբայանը ցուցմունք տվեց այն մասին, որ իր քույրը` Գայանե Բաբայանը 2010թ. ապրիլի 5-ին ժամը 21:00-ի սահմաններում աշխատանքից տուն վերադառնալիս գնումներ կատարելու նպատակով ցանկացել է մտնել ՙՍթար՚ սուպերմարկետ: Փորձել է հատել Դավիթ Անհաղթի փողոցը դեպի նշված խանութի կողմը: Հասնելով ճանապարհի կենտրոնական մաս, որոշ ժամանակ կանգնել է այնտեղ դեպի Կոմիտասի պողոտա երթևեկող մեքենաներին ճանապարհը զիջելու նպատակով, սակայն Վահան Եղիազարյանը ալկոհոլ օգտագործած վիճակում, շատ մեծ արագությամբ իր ՙՀունդաի-Սոնատա՚ մակնիշի ավտոմեքենայով վրաերթի է ենթարկել տուժողին:
Դեպքից հետո շտապօգնության մեքենայով Գայանեին տեղափոխել են Միքայելյանի անվան հիվանդանոց, սակայն մինչև հիվանդանոց հասնելը վերջինս մահացել է: Հայտնեց նաև, որ Վահան Եղիազարյանը որևէ կերպ չի աջակցել հուղարկավորության հարցերում և չի հատուցել պատճառված նյութական վնասը:
Աիդա Բաբայանը խնդրեց քաղաքացիական հայցը քննության չառնել և իրեն իրավունք վերապահել հետագայում քաղաքացիական դատավարության կարգով առանձին քաղաքացիական հայց ներկայացնելու համար:
Վկա Դավիթ Յակովի Շահնազարյանը ցուցմունք տվեց այն մասին, որ 2010թ. ապրիլի 5-ին, ժամը 21:00-ի սահմաններում, Դավիթ Անհաղթի փողոցում գտնվող ՙՍթար՚ սուպերմարկետից դուրս գալուց ձայն է լսել: Նայելով այդ կողմը տեսել է, որ վրաերթ է տեղի ունեցել: Մի քանի մետր առաջ քայլելուց հետո նկատել է, որ ճանապարհի կենտրոնում վրաերթի ենթարկված կինն ընկել է դեպի աջ` Կոմիտասի պողոտա տանող ուղեմասին, մայթեզրից մոտ 4-5 մետր հեռավորության վրա: Այդ պահին նկատել է, որ Կ.Ուլնեցու և Դ.Անհաղթի փողոցների խաչմերուկ չհասած, ճանապարհի աջ ուղեմասում կանգնած է արտասահմանյան մակնիշի ավտոմեքենա և այդ մեքենայի կողմից վազելով մոտեցել են երիտասարդ տղաներ ու փորձել օգնություն ցույց տալ տուժողին: Ինքը զանգահարել է շտապօգնություն: Այդ ընթացքում կանգնեցրել են հարակից փողոցով պատահական անցնող շտապօգնության մեքենան և տուժողին դրել են այդ մեքենայի մեջ: Հայտնեց նաև, որ երիտասարդներից մեկը տուժողի հետ նստել է շտապօգնության ավտոմեքենան և գնացել հիվանդանոց:
Վկա Դավիթ Կարապետի Հալաջյանը ցուցմունք տվեց այն մասին, որ Վահան Եղիազարյանն իր քեռու որդին է: 2010թ. ապրիլի 3-ին ծնվել է Վահանի որդին, որի կապակցությամբ 2010թ. ապրիլի 5-ին Հաղթանակ գյուղում նրա գործընկերների հետ օգտագործել են ոգելից խմիչքներ: Երեկոյան, ժամը 21:00-ի սահմաններում, Վահանի հետ, նրա վարած ՙՀոնդաի-Սոնատա՚ մակնիշի ավտոմեքենայով մեկնել են Զեյթուն թաղամաս: Հասնելով Ռուբինյանց և Պ.Սևակ փողոցների խաչմերուկ, Վահանը հետադարձ է կատարել և երթևեկել Դ.Անհաղթի փողոցով դեպի Կոմիտասի պողոտայի ուղղությամբ, մոտ 50-60 կմ/ժամ արագությամբ, ուղեմասի ձախ եզրային շարքով, տրամվայի գծերի վրայով: Իրենց ավտոմեքենայի հետևից համընթաց երթևեկող ավտոմեքենայի վարորդը մեքենայի հեռահար լուսարձակները միացնել-անջատելով ճանապարհ է խնդրել: Նրան ճանապարհը զիջելու նպատակով Վահանը մանևրել է դեպի ձախ, մուտք գործել հանդիպակաց երթևեկելի ուղեմաս և շարունակել երթևեկել հանդիպակաց ուղեմասով: Այդ ընթացքում առջևից հանդիպակաց ուղղությամբ երթևեկող ՙԲՄՎ՚ մակնիշի ավտոմեքենան հեռահար լուսարձակներով շլացրել է, իսկ երբ այդ մեքենան անցել է իրենց մեքենայից, նկատել են ճանապարհի կենտրոնում, դեմքով դեպի ՙՍթար՚ խանութի կողմը կանգնած կնոջը: Վահանը փորձել է արգելակել, սակայն վրաերթից խուսափել չի կարողացել և ավտոմեքենայի առջևի աջ կողմով վրաերթի է ենթարկել տուժողին: Վրաերթի ենթարկված կինը ընկել է դեպի աջ, իսկ Վահանը որոշակի տարածություն անցնելուց հետո կանգնեցրել է մեքենան: Մոտեցել են տուժողին և փորձել օգնություն ցույց տալ: Քիչ անց մոտեցել է շտապօգնության մեքենան և տուժողին տեղափոխել են հիվանդանոց: Սակայն ճանապարհին վերջինս մահացել է:
Ճանապարհատրանսպորտային դեպքի վայրի զննության և տրանսպորտային միջոցի զննության արձանագրություններով այն մասին, որ դեպքի վայրը հանդիսանում է Երևան քաղաքի Դ.Անհաղթի փողոցի թիվ 21 հասցեում գտնվող ՙՍթար՚ սուպերմարկետի դիմաց ընկած ճանապարհահատվածը, որտեղ ճանապարհն ասֆալտապատ է, հարթ, ուղիղ, հորիզոնական: Ճանապարհն առանցքային զույգ հոծ գծերով բաժանված է երկու ուղեմասերի, իսկ յուրաքանչյուր ուղեմասն ընդհատվող բաժանանար նշագծումներով` երեք ուղեգոտիների` համապատասխանաբար 3,7x3,3 x 3,6 մետր չափերով: Ճանապարհի կենտրոնական մասում առկա են տրամվայի գծեր: Դեպքի պահին եղանակը եղել է պարզ, ասֆալտը չոր, տեսանելիությունը բավարար: Դ.Անհաղթ փողոցը լուսավորվում է արտաքին լուսավորության ցանցով: Դեպքի վայրում` ճանապարհի կենտրոնական հատվածում հայտնաբերվել են ապակու և պլաստմասե կտորներ` 25,5 x 3,3 մետր մակերեսի վրա: Վրաերթի հետևանքով վնասվել է ՙՀոնդաի-Սոնատա՚ մակնիշի ավտոմեքենայի առջևի թափարգելի աջ կողմը, առջևի աջ լուսարձակը, շարժիչի ծածկոցի աջակողմյան անկյունը, առջևի անվաթևի դիմացի հատվածը, առջևի դիտապակու աջ կողմը: ՙՀոնդաի-Սոնատա՚ մակնիշի ավտոմեքենան գտնվել է տեխնիկապես սարքին վիճակում:
Մեղադրյալ Վահան Եղիազարյանի և վկա Դավիթ Հալաջյանի մասնակցությամբ կատարված դեպքի վայրի լրացուցիչ զննության արձանագրություններով այն մասին, որ վերջիններս ուղեկցել են Երևան քաղաքի Դ.Անհաղթի փողոց, մատնացույց են արել դեպքի վայրից մոտ 60 մետր դեպի Ռուբինյանց փողոցի կողմն ընկած հատվածը և հայտարարել, որ դեպքին նախորդող պահին ուղեմասի ձախ եզրային հատվածով երթևեկելիս, նշված տարածքում մանևրելով դեպի ձախ, Վ.Եղիազարյանը ավտոմեքենան դուրս է բերել հանդիպակաց ուղեմաս և շարունակելով երթևեկությունը հանդիպակաց ուղեմասով: Հանդիպակաց ուղղությամբ երթևեկող ՙԲՄՎ՚ մակնիշի ավտոմեքենան հեռահար լուսարձակներով շլացրել է իրենց մոտ 6-7 վայրկյան անց, նկատել են ճանապարհի հոծ գծերի վրա, դեմքով դեպի ՙՍթար՚ սուպերմարկետի ուղղությամբ կանգնած կնոջը: Վ.Եղիազարյանը փորձել է արգելակել և մանևրել դեպի ձախ, սակայն վրաերթից խուսափել չի կարողացել և ավտոմեքենայի առջևի աջ կողմով վրաերթի է ենթարկել կանգնած վիճակում գտնվող կնոջը:
Իրեղեն ապացույցների առգրավման և զննության արձանագրություններով այն մասին, որ ՀՀ ԴԲԳԳԿ-ից առգրավվել և զննության են ենթարկվել դեպքի պահին տուժող Գայանե Բաբայանի հագին եղած հագուստները` կանաչ-կարմիր նախշերով ժակետը, դարչնագույն կարճաթև սվիտերը, սև զուգագուլպան և մեկ զույգ կանացի կոշիկները, որոնց զննությամբ հայտնաբերվել են վրաերթին բնորոշ հետքեր ու վնասվածքներ: Դ.Անհաղթի թիվ 21 հասցեում գտնվող ՙՍթար՚ սուպերմարկետից առգրավվել է խանութի արտաքին մասում տեղադրված թիվ 10 տեսախցիկի ֆիքսած տեսանյութը, որտեղ առկա են վրաերթին առնչվող փաստական հանգամանքներ և դրա զննությամբ պարզվել է, որ 05.04.2010թ. ժամը 21:02-ի Դ.Անհաղթի փողոցով դեպի Կոմիտասի պողոտայի ուղղությամբ երթևեկող ՙԲոգդան՚ մակնիշի ավտոբուսը ՙՍթար՚ սուպերմարկետի առջևից անցնելուց հետո, ճանապարհի կենտրոնական մասով, նույն ուղղությամբ երթևեկող արտասահմանյան մակնիշի ավտոմեքենայի կողմից դեպի աջ նետված կնոջ մարմինը ընկնում է ասֆալտին և հայտնվում դեպի Կոմիտաս պողոտայի ուղղությամբ երթևեկող մուգ գույնի մարդատար ավտոմեքենայի աջ կողմի հետևի հատվածում, որից հետո Ռուբինյանց փողոցի կողմից երթևեկող ավտոմեքենաները կանգնում են և շրջապատում տուժողին:
Դեպքի վայրից հայտնաբերվել և զննության են ենթարկվել ապակու և պլաստմասե կտորներ, որոնք իրենց համակցությամբ համապատասխանել են ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի վնասված պահեստամասերին:
Դատաբժկական փորձաքննության թիվ 312 եզրակացությամբ, ըստ որի, Գայանե Բաբայանի մահը վրա է հասել հեմոռագիկ և տրավմատիկ շոկից` գլխի, կրծքավանդակի, ողնաշարի կրծքային հատվածի, որովայնի, կոնքի ստորին վերջույթների, աջ վերին վերջույթի փակ և բաց վնասվածքներ ստանալու հետևանքով: Տվյալ հետևությունը հիմնավորվել է դիակի դատաբժկական փորձաքննությամբ հայտնաբերված հետևյալ վնասվածքների առկայություններով` գանգի դիմային բաժնի ոսկրերի, ողնաշարի կրծքային հատվածի 9-10-րդ ողերի, աջից ձախից` տարբեր անատոմիական գծերով կողոսկրերի, կոնքի ոսկրերի, աջ նախաբազկի զույգ ոսկրերի, ստորին վերջույթների` աջ սրունքի զույգ ոսկրերի, ձախ սրունքի` փոքր մեծ ոլոքի և ծնկոսկրերի կոտրվածքներ, աջ ազդրի դրսակողմնային մակերեսի մաշկամկանային գրպանիկ, գլխուղեղի տարածուն ենթաոստայնային արյունազեղումներ, ուղեղանյութի կետավոր արյունազեղումներ, հեղուկ արյուն ուղեղի փորոքներում, ներքին օրգանների` լյարդի, աջ թոքի պատռվածքներ` հեղուկ արյան առկայությամբ, աջ պլևրալ և որովայնի խոռոչներում, մարմնի բազմաթիվ տեղամասերի քերծվածքներ, վերքեր, ինչպես նաև արյունազեղումներ թոքարմատներում, աջ ազդրի շրջանի մաշկամկանային գրպանիկ: Բոլոր վնասվածնքերը պատճառվել են կենդանության օրոք, բութ առարկաների ներգործությամբ, ինչպիսին կարող են լինել և շարժվող ավտոտրանսպորտի տարբեր արտացցված մակերեսները: Ըստ դիակի փարձաքննության տվյալների, կենդանության օրոք Գ.Բաբայանը եղել է գործնականապես առողջ և, ամենայն հավանականությամբ, առաջին տրավմատիկ հարվածն ուղղված է եղել դեպի մարմնի աջ կողմը: Գ. Բաբայանի դիակից վերցված արյան մեջ դատաքիմիական քննությամբ սպիրտներ չեն հայտնաբերվել:
Դատահետքաբանական, դատաքիմիական և մանրաթելերի համալիր փորձաքննության թիվ 10-0814 եզրակացությամբ, ըստ որի, ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի առաջամասի աջ և աջ կողային հատվածում առկա են մեխանիկական վնասվածքներ և հետքեր, որոնք առաջացել են համեմատաբար փափուկ մարմնի հետ, ինչպիսին հանդիսանում է նաև մարդու մարմինը, փոխազդեցության մեջ մտնելու արդյունքում, վրաերթի հետևանքով:
Գ.Բաբայանի հագուստների և կոշիկների վրա առկա են մեխանիկական վնասվածքներ և հետքեր, որոնք իրենց բնույթով և համակցությամբ առաջացել են վրաերթի հետևանքով:
Դեպքի վայրից հայտնաբերված պոլիմերային դետալի հավաքված հատվածը և ՙՀոնդաի՚ մակնիշի 06 ՕՕ 147 պ/հ ավտոմեքենայի առջևի աջ անվադողի պաշտպանիչն ունեն ընդհանուր բաժանարար գծեր, այսինքն նախկինում կազմել են մեկ ամբողջություն:
Դեպքի վայրից հայտնաբերված շագանակագույն երանգի պոլիմերային դետալների բեկորներն ունեն ընդհանուր բաժանարար գիծ` ավտոմեքենայի շարժիչի դեկորատիվ երեսվածքի աջակողմյան հատվածում առկա վնասվածքի եզրի հետ:
Դեպքի վայրից հայտնաբերված շրջադարձի լապտերի իրանը իր լուսացրիչի հատվածով, կարող էին նախկինում տեղադրված լինել ՙՀոնդաի՚ մակնիշի 06 ՕՕ 147 պ/հ ավտոմեքենայի վրա:
ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի առջևի մասում հայտնաբերված բնական բրդյա կանաչ, կարմիր, յասամանագույն, նարնջագույն, քիմիական փայլատված դեղին գույնի մանրաթելերն իրենց մորֆոլոգիական հատկանիշներով (գույն, բնույթ, հաստություն) համընկնում են Գ.Բաբայանի ժակետի գործվածքի կազմի մեջ մտնող նմանատիպ մանրաթելերի հետ և ունեն ընդհանուր սեռային պատկանելիություն:
Դեպքի վայրից վերցված պլաստմասե կտորների վրա հայտնաբերված բնական բրդյա կարմիր և նարնջագույն, քիմիական փայլատված կանաչ և յասամանագույն մանրաթելերն իրենց մորֆոլոգիական հատկանիշներով համընկնում են Գ.Բաբայանի ժակետի գործվածքի կազմի մեջ մտնող նմանատիպ մանրաթելերի հետ և ունեն ընդհանուր սեռային պատկանելիություն:
Գ.Բաբայանի սվիտերի վրա` ստորին ազատ եզրից 17սմ վեր, աջ կողակարի վրա, նույն բարձրության վրա` աջ կողակարից 1սմ առաջ և հետ 1x0.5 սմ մակերեսով հայտնաբերվել են ավտոմեքենայի ներկածածկույթի թույլ արտահայտված անգույն թափանցիկ քսվածքներ:
Գ.Բաբայանի սվիտերի վրա հայտնաբերված ավտոմեքենայի ներկածածկույթի անգույն թափանցիկ միաշերտ քսվածքն ունի ընդհանուր սեռային պատկանելիություն ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի թափքի ներկածածկույթի անգույն թափանցիկ (արտաքին) շերտի հետ:
Գ.Բաբայանի հագուստների վրա հայտնաբերված ավտոմեքենայի ներկածածկույթի եռաշերտ` մոխրագույն, մուգ շագանակագույն (որի մեջ եղել են փայլուն միկրոմասնիկներ), անգույն թափանցիկ (արտաքին) միկրոմասնիկներն ունեն ընդհանուր խմբային պատկանելիություն ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի թափքի շարժիչի ծածկոցից վերցված ներկածածկույթի եռաշերտ` մոխրագույն, մուգ շագանակագույն (որի մեջ եղել են փայլուն միկրոմասնիկներ), անգույն թափանցիկ (արտաքին) շերտերով մասնիկների հետ:
Դեպքի վայրից վերցված պոլիմերային դետալի վրա հայտնաբերված ներկածածկույթի արտաքին երկու` մուգ շագանակագույն (որի մեջ եղել են փայլուն միկրոմասնիկներ), անգույն թափանցիկ (արտաքին) շերտերն ունեն ընդհանուր սեռային պատկանելիություն ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի թափքի շարժիչի ծածկոցից,առջևի վահանից և աջ անվաթևից վերցված ներկածածկույթների արտաքին երկու` մուգ շագանակագույն (որի մեջ հայտնաբերվել են փայլուն միկրոմասնիկներ), անգույն թափանցիկ (արտաքին) շերտերի հետ:
Դատահետքաբանական, դատաքիմիական, միկրոմասնիկների, դատաբժշկական, դատաավտոտեխնիկական, համակարգչային համալիր փորձաքննության թիվ 10-1320 եզրակացությամբ, համաձայն որի, ելնելով Գ. Բաբայանի մարմնական վնասվածքների և նրա հագուստների ու կոշիկների վրա առկա վնասվածքների և հետքերի տեղակայություններից, ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի վրա առկա վնասվածքների և հետքերի տեղակայություններից և այդպիսիք համադրելով միմյանց հետ, հաշվի առնելով նաև տեսաձայնագրային հետազոտության, փորձագետի թիվ 10-0814 եզրակացության, քիմիական և մանրաթելերի հետազոտությունների արդյունքները, ինչպես նաև քրեական գործում առկա մյուս տվյալները, փորձագիտական հանձնաժողովը գտել է, որ Գ.Բաբայնը վրաերթի է ենթարկվել ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի կողմից և վրաերթին հաջորդող փուլերում նրա մարմնի վրայով շարժվող տրանսպորտային միջոցի վրաանցում տեղ չի գտել: Գ.Բաբայանի մահը չէր կարող պայմանավորված լինել վրաանցմամբ:
Գ.Բաբայանի մահը պայմանավորվել է ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի կողմից վրաերթի ենթարկելու և վրաերթի փուլերում պատճառված մարմնական վնասվածքներով:
Դատաավտոտեխնիկական փորձաքննության թիվ 80ա եզրակացությամբ, համաձայն որի, ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի վարորդը տվյալ վրաերթը կանխելու տեխնիկական հնարավորություն ունեցել է, և առկա պայմաններում, երթևեկության անվտանգությունն ապահովելու նպատակով, նախ պետք է ընդհանրապես ձեռնպահ մնար ալկոհոլային հարբածության վիճակում մեքենան վարելուց: Դրա հետ մեկտեղ, տվյալ ճանապարհահատվածում պետք է նաև ձեռնպահ մնար մեքենան հանդիպակաց ուղղության երթևեկելի ուղեմաս դուրս բերելուց և երթևեկությունը հանդիպակաց ուղեմասով շարունակելուց, իսկ հանդիպակաց ուղղությամբ ընթացող ավտոմեքենայի լապտերների հեռահար լույսից շլանալու ու դրանով պայմանավորված իր երթևեկության համար վտանգի առաջացման պահից սկսած, երթևեկության անվտանգությունն ապահովելու համար պետք է միացներ մեքենայի վթարային լուսային ազդանշանը և տեխնիկական տեսակետից ժամանակին կատարված արգելակումով դանդաղեցներ իր վարած մեքենայի ընթացքն ընդհուպ մինչև այն կանգնեցնելն, ինչի տեխնիկական հնավարությունը մինչև վրաերթի տեղ հասնելն ունեցել է: Դրա փոխարեն, մեքենան վարելով ալկոհոլային հարբածության վիճակում լինելու պայմաններում և հատելով հանդիպակաց ուղեմասերը բաժանող զույգ հոծ գծանշումն ու մեքենան հանդիպակաց ուղղության երթևեկելի ուղեմաս դուրս բերելով, երևեկությունն իրականացնելով տվյալ ուղղության երթևեկելի ուղեմասով, իսկ հանդիպակաց երթևեկությամբ մոտեցող ավտոմեքենայի լապտերների հեռահար լույսերից շլանալուց հետո, չմիացնելով վթարային լուսային ազդանշանները և ընթացքի նույն արագությամբ շարունակելով երթևեկությունը, ՙՀունդաի-Սոնատա՚ մակնիշի 06 ՕՕ 147 պ/հ ավտոմեքենայի վարորդը տեխնիկական տեսակետից թույլ է տվել ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդվածի 3-րդ մասի, 24 հոդվածի 7-րդ մասի և ՃԵԿ-ի 53 ու 129 կետերի պահանջներին հակասող գործողություններ, դրանցով իսկ պայմանավորել հանդիպակաց ուղեմասերը բաժանող զույգ հոծ գծանշման վրա կանգնած վիճակում գտնվող հետիոտն կնոջ նկատմամբ տվյալ վրաերթի առաջացումն` ինքն իրեն զրկելով այն կանխելու տեխնիկական հնարավորությունից:
Դատավտոտեխնիկական փորձաքննության թիվ 10-1014 եզրակացությամբ այն մասին, որ ՙՀոնդաի-Սոնատա՚ մակնիշի 06 ՕՕ 147 պ/հ ավտոմեքենայի ղեկային, արգելակային և կախոցների համակարգերը գտնվել են տեխնիկապես սարքին վիճակում, դրանցում չեն հայտնաբերվել այնպիսի անսարքություններ, որոնցով պայմանավորված լիներ տվյալ վթարը:
ՙՀունդաի-Սոնատա՚ մակնիշի 06 ՕՕ 147 պ/հ ավտոմեքենայի առջևի և հետևի չորս անվադողերը շահագործմանը պիտանի են եղել և լուսային համակարգերը գտնվել են տեխնիկապես սարքին վիճակում:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Վահան Մարտինի Եղիազարյանին ՀՀ քրեական օրենսգրքի 242 հոդվածի 2-րդ մասով առաջադրված մեղադրանքը հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 242 հոդվածի 2-րդ մասի հատկանիշներին և արարքի որակումը ճիշտ է:
Վահան Եղիազարյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, տառապում է ՙաջ կրծքավանդակի մկանի ռախիտիկ դեֆորմացիա՚ ախտորոշումով, խնամքին է գտնվում չորս ամսական երեխան, բնութագրվում է դրական:
Որպես ամբաստանյալի պատասխանատվությունը և պատիժը ծանրացնող հանգամանք դատարանը հաշվի է առնում այն, որ նա հանցանքը կատարելու պահին գտնվել է ալկոհոլի ազդեցության տակ:
Կատարած արարքի համար ամբաստանյալ Վահան Մարտինի Եղիազարյանը ենթակա է քրեական պատասխանատվության և պատժի:
Դատարանը, հաշվի առնելով ամբաստանյալի կատարած արարքի հանրության համար վտանգավորության աստիճանը և բնույթը, նրա անձը, պատասխանատվությունն ու պատիժը մեղմացնող և ծանրացնող հանգամանքերը, գտնում է, որ պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
Դատարանը քննության առնելով ամբաստանյալի նկատմամբ լրացուցիչ պատիժ նշանակելու հարցը, գտնում է, որ պետք է կիրառել ՀՀ քրեական օրենսգրքի 242 հոդվածի 2-րդ մասի սանկցիայով նախատեսված լրացուցիչ պատիժը` տրանսպորտային միջոցներ վարելու իրավունքից զրկելը:
Նկատի ունենալով, որ տուժողի իրավահաջորդ Աիդա Բաբայանը խնդրեց հանցագործությամբ պատճառված վնասի վերաբերյալ քաղաքացիական հայցը քննության չառնել և իրեն իրավունք վերապահել հետագայում քաղաքացիական դատավարության կարգով առանձին քաղաքացիական հայց ներկայացնելու համար, դատարանը գտնում է, որ նրան պետք է իրավունք վերապահել քաղաքացիական դատավարության կարգով առանձին քաղաքացիական հայց ներկայացնելու համար:
Նկատի ունենալով, որ դեպքի պահին ամբաստանյալ Վահան Եղիազարյանի կողմից վարած ՙՀոնդայի-Սոնատա՚ մակնիշի 06 ՕՕ 147 պետհամարանիշի ավտոմեքենան պատկանում է քաղաքացի Արմեն Թադևոսյանին դատարանը գտնում է, որ նշված ավտոմեքենայի վրա դրված կալանքը պետք է վերացնել:
Դատարանն անդրադառնալով իրեղեն ապացույցների տնօրինման հարցին, գտնում է, որ քրեական գործով իրեղեն ապացույց ճանաչված և Երևան քաղաքի քննչական վարչության ՃՏՀ քննության բաժնում պահվող, դեպքի պահին տուժող Գայանե Բաբայանի հագին եղած հագուստները, պետք է վերադարձնել տուժողի իրավահաջորդ Աիդա Բաբայանին: Տուժողի հագուստների վրայից հայտնաբերված ներկանյութի միկրոմասնիկների միկրոպրեպարատը, ՙՀունդայի- Սոնատա՚ մակնիշի ավտոմեքենայի վրայից հայտնաբերված մանրաթելերի միկրոպրեպարատը, դեպքի վայրից հայտնաբերված պլաստմասի և ապակու կտորները պետք է ոչնչացնել, իսկ ՙՍթար՚ սուպերմարկետից առգրավված լազերային սկավառակը` պահել քրեական գործին կցված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Վահան Մարտինի Եղիազարյանին մեղավոր ճանաչել ՀՀ քրեական օրենսգրքի 242 հոդվածի 2-րդ մասով և նրան դատապարտել ազատազրկման չորս (4) տարի ժամկետով` տրանսպորտային միջոցներ վարելու իրավունքից զրկելով երեք (3) տարի ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվել 2010թ. ապրիլի 09-ից:
Վահան Մարտինի Եղիազարյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Տուժողի իրավահաջորդ Աիդա Բաբայանի քաղաքացիական հայցը թողնել առանց քննության և նրան քաղաքացիական դատավարության կարգով քաղաքացիական հայց ներկայացնելու իրավունք վերապահել:
Դեպքի պահին ամբաստանյալ Վահան Եղիազարյանի կողմից վարած ՙՀոնդայի-Սոնատա՚ մակնիշի 06 ՕՕ 147 պետհամարանիշի ավտոմեքենայի վրա դրված կալանքը վերացնել:
Դատավճիռն օրինական ուժի մեջ մտնելուց հետո իրեղեն ապացույց ճանաչված, Երևան քաղաքի քննչական վարչության ՃՏՀ քննության բաժնում պահվող, դեպքի պահին տուժող Գայանե Բաբայանի հագին եղած հագուստները վերադարձնել տուժողի իրավահաջորդ Աիդա Բաբայանին, տուժողի հագուստների վրայից հայտնաբերված ներկանյութի միկրոմասնիկների միկրոպրեպարատը, ՙՀունդայի-Սոնատա՚ մակնիշի ավտոմեքենայի վրայից հայտնաբերված մանրաթելերի միկրոպրեպարատը, դեպքի վայրից հայտնաբերված պլաստմասի և ապակու կտորները ոչնչացնել, իսկ ՙՍթար՚ սուպերմարկետից առգրավված լազերային սկավառակը պահել քրեական գործին կցված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ