Գործ ԵԱՔԴ/ 0086/01/10







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

11 օգոստոսի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

Նախագահությամբ դատավոր` Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ
Մեղադրող` Լ.Մանուկյանի
Պաշտպան` Ա.Քոչարյանի


2010 թվականի օգոստոսի 11-ին Երևան քաղաքում դռնբաց դատական նիստում արագացված դատական կարգով քննության առավ քրեական գործն ըստ մեղադրանքի Աշոտ Վաղարշակի Շարաֆյանի /ծնված 08.09.1950թ., ք. Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չդատված, չի աշխատում, բն. ք. Երևան Ծատուրյան փ. թիվ 34/2 տանը/, կալանքի տակ է 18.03.2010 թվականից, մեղադրվում է ՀՀ քրեական օրենսգրքի 268 հոդվածի 2-րդ մասի 2-րդ կետով և 266 հոդվածի 4-րդ մասով:
Արագացված դատական քննությամբ դատարանն ապացուցված համարեց հետևյալը.
Նախաքննության մարմինը Աշոտ Շարաֆյանին ՀՀ քրեական օրենսգրքի 268 հոդվածի 2-րդ մասի 2-րդ կետով և 266 հոդվածի 4-րդ մասով նախատեսված հանցագործությունների կատարման համար մեղադրանք է առաջադրել, որ նա ՙանհայտ անձից, գործով չպարզված հանգամանքներում, առանց իրացնելու նպատակի ապօրինի ձեռք է բերել և իր` Երևան քաղաքի Ծատուրյան 34/2 տանը ապօրինի պահել է խոշոր չափի 0,2228 գրամ չոր քաշով ացետիլացված ափիոն տեսակի թմրամիջոց և 22 մլ ծավալով պրեկուրսոր հանդիսացող քացախաթթվի անհիդրիդ, որոնք էլ 2010թ. մարտի 18-ին ոստիկանության աշխատակիցների կողմից հայտնաբերվել են նրա բնակարանի խուզարկությամբ՚:
Առաջադրված մեղադրանքում, նախաքննության փուլում Աշոտ Վաղարշակի Շարաֆյանն իրեն մեղավոր է ճանաչել:
Մինչև դատաքննության սկսելը ամբաստանյալ Աշոտ Շարաֆյանը միջնորդեց դատական քննություն անցկացնել արագացված կարգով և հայտարարեց, որ առաջադրված մեղադրանքներն իրեն պարզ է, համաձայն է իրեն առաջադրված մեղադրանքների հետ, գիտակցում է արագացված կարգով դատական քննություն անցկացնելու հետևանքները, առ այն, որ չի կարող դատավճիռը բողոքարկել ՀՀ քրեական դատավարության օրենսգրքի 395-րդ հոդվածի 1-ին կետի նախատեսված հիմքով, միջնորդությունը ներկայացրել է կամավոր` պաշտպանի հետ խորհրդակցելուց հետո: Պաշտպան Ա.Քոչարյանը միացավ պաշտպանյալի միջնորդությանը և նույնպես խնդրեց կիրառել արագացված դատական քննություն:
Մեղադրող Լ.Մանուկյանը, որը թեպետ մեղադրական եզրակացությունում առարկել էր արագացված կարգ կիրառելու դեմ, փոխեց իր դիրքորոշումը և խնդրեց կիրառել արագացված կարգ:
Դատարանը համոզվելով, որ առկա է ՀՀ քրեական դատավարության օրենսգրքի 375.1-րդ և 375.2-րդ հոդվածներով նախատեսված պայմանները, որոշում է կայացրել արագացված դատական քննություն անցկացնելու մասին:
Դատարանը հիմք ընդունելով մեղադրանքի հիմքում դրված ապացույցները գտնում է, որ Աշոտ Շարաֆյանին ՀՀ քրեական օրենսգրքի 268 հոդվածի 2-րդ մասի 2-րդ կետով և 266 հոդվածի 4-րդ մասով առաջադրված մեղադրանքները հիմնավորված են:
Ամբաստանյալ Աշոտ Շարաֆյանի նկատմամբ պատիժ նշանակելիս դատարանը հաշվի է առնում մեղսագրվող արարքների հանրության համար վտանգավորության աստիճանը և բնույթը:
Պատասխանատվությունը և պատիժը մեղմացնող հանգամանք է դիտվում այն, որ նա բնակության վայրում բնութագրվում է դրականորեն: Նրա վերաբերյալ դրական բնութագիր է ներկայցվել նաև ՀՀ ազատամարտի վետերանների միասնություն Արմավիր մասնաճյուղի ՙՄուշ՚ ջոկատի հրամանատարի կողմից: Ըստ բնութագրի Աշոտ Շարաֆյանը 1991-1994 թվականներին մասնակցել է ՀՀ սահմանների պաշտպանությանը:
Աշոտ Շարաֆյանը պարգևատրվել է նաև Ազատամարտի վետերանների միության պատվոգրով և հանդիսանում է ԱՎՄ-ի անդամ (վկայական թիվ 44.359):
Դատարանը հաշվի առնում նաև այն, որ Ա.Շարաֆյանի խնամքին է գտնվում 3-րդ խմբի հաշմանդամ կինը` Ասյա Գրիգորի Դավթյանը:
Դատարանը արձանագրում է, որ գործով բացակայում են ամբաստանյալ Աշոտ Շարաֆյանի պատիժը և պատասխանատվությունը ծանրացնող որևէ հանգամանք:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360-րդ հոդվածներով, 365-րդ հոդվածի 1-ին մասով, 369-րդ, 372-րդ, 373-րդ, 374-րդ, 375.1-375.3-րդ, 375.4-րդ հոդվածներով դատարանը.

ՎՃՌԵՑ

Աշոտ Վաղարշակի Շարաֆյանին մեղավոր ճանաչել ՀՀ քրեական օրենսգրքի 268 հոդվածի 2-րդ մասի 2-րդ կետով և 266 հոդվածի 4-րդ մասով նախատեսված հանցագործությունների կատարման համար և դատապարտել ՀՀ քրեական օրենսգրքի 268 հոդվածի 2-րդ մասի 2-րդ կետով ազատազրկման 1/մեկ/ տարի ժամկետով, իսկ 266 հոդվածի 4-րդ մասով` տուգանքի` նվազագույն աշխատավարձի հարյուրապատիկի, այն է` 100.000 ՀՀ դրամի չափով: ՀՀ քրեական օրենսգրքի 66 հոդվածի 3-րդ մասի պատիժները լրիվ գումարելու սկզբունքով, Աշոտ Վաղարշակի Շարաֆյանին վերջնական պատիժ նշանակել ազատազրկում 1/մեկ/ տարի ժամկետով և տուգանք նվազագույն աշխատավարձի հարյուրապատիկի` 100.000 ՀՀ դրամի չափով:
Կալանքի սկիզբը հաշվել 2010 թվականի մարտի 18-ից, ընտրված խափանման միջոց կալանքը, մինչև դատավճռի օրինական ուժի մեջ մտնելը, թողնել անփոփոխ:
Պատիժը պետք է կրի ՀՀ Արդարադատության նախարարության համապատասխան հիմնարկում:
Իրեղեն ապացույց ճանաչված 3 ներարկիչներով ընդհանուր 8,2 մլ ծավալով ացետիլացված ափիոն տեսակի թմրամիջոցի լուծույթը, որում ացետիլացված ափիոնի ընդհանուր չոր քաշը կազմել է խոշոր չափի 0,2228 գրամ, 2 ներարկիչներով ընդհանուր 22 մլ պրեկուրսոր հանդիսացող քացախաթթվի անհիդրիդը, ացետիլացված ափիոն տեսակի թմրամիջոցի հետքերով 5 մլ դատարկ ներարկիչը, 2 հատ 10 մլ և 1 հատ 1 մլ դատարկ ներարկիչները, 92 հատ ալյումինե նրբաթիթեղով պատված թղթերը, դանակը և ձեռքի կշեռքը` կշռաքարերով, դատավճիռն օրինական ուժի մեջ մտնելուց հետո ոչնչացնել:
Դատավճիռը դատավարության մասնակիցների կողմից` բացի ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով, 1 /մեկ/ ամսվա ընթացքում, վերաքննության կարգով, կարող է բողոքարկվել ՀՀ վերաքննիչ քրեական դատարան: