Գործ ԵԱՔԴ/0080/01/10







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

28 հուլիսի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

Նախագահությամբ դատավոր` Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ
Մեղադրող` Ա.Աղայանի
Պաշտպան` Ա.Հովհաննիսյանի
Տուժող` Ն.Ամիրշադյանի


Դռնբաց դատական նիստում քննության առավ քրեական գործն ըստ մեղադրանքի`
Անդրանիկ Կարապետի Չիվտչյանի` ծնված 04.02.1966թ., ք.Երևան, ազգությամբ հայ, ՀՀ քաղաքացի, ութամյա կրթությամբ, ամուրի, դատապարտվել է`
1. 29.10.87թ. ՀՀ քրեական օրենսգրքի 144-րդ հոդվածի 2-րդ մասով 3 տարի ազատազրկման, ազատվել է 12.04.89թ.,
2. 26.12.95թ. ՀՀ քրեական օրենսգրքի 86-րդ հոդվածի 2-րդ մասով 2 տարի ազատազրկման,
3. 16.12.98թ. ՀՀ քրեական օրենսգրքի 87-րդ հոդվածի 2-րդ մասով 6 տարի ազատազրկման, 15.10.03թ. ՀՀ քրեական օրենսգրքի 87-րդ հոդվածի 2-րդ մասը համապատասխանեցվել է ՀՀ քրեական օրենսգրքի 176-րդ հոդվածի 2-րդ մասի 1,4,5 կետերով` 5 տարի ազատազրկման,
4. 08.09.03թ. ՀՀ քրեական օրենսգրքի 175-րդ հոդվածի 3-րդ մասի 1-ին կետով 7 տարի ազատազրկման, 28.12.07թ. պայմանական վաղաժամկետ ազատվել է մնացած 2 տարի 3 օր ազատազրկումը կրելուց,
չի աշխատում, հաշվառված է ք. Երևան` Արցախի փողոց 24/1շենքի 55 բնակարանում, կալանքի տակ է 28.04.2010թ., մեղադրվում է ՀՀ քրեական օրենսգրքի 175-րդ հոդվածի 3-րդ մասի 4-րդ կետով:
Դատաքննությամբ դատարանը հաստատված համարեց հետևյալը.
Նախաքննության մարմինն Անդրանիկ Կարապետի Չիվտչյանին մեղադրանք է առաջադրել ՀՀ քրեական օրենսգրքի 175-րդ հոդվածի 3-րդ մասի 4-րդ կետով այն բանի համար, որ. ՙնա նախկինում գույքի հափշտակություններ կատարելու համար երկու և ավելի անգամ դատապարտված լինելով, դատվածությունը չմարված, կրկին անգամ կատարել է գույքի հափշտակություն: Այսպես.
2010 թվականի մարտի 16-ին` ժամը 22-ի սահմաններում, Երևան քաղաքի Զեյթունի հացի գործարանի մոտ Նորիկ Անուշավանի Ամիրշադյանի դրամապանակը հափշտակելու նպատակով ավազակային հարձակում է կատարել նրա նկատմամբ և Ն.Ամիրշադյանի կյանքի և առողջության համար վտանգավոր բռնություն գործադրելով` բռունցքով հարվածելով դեմքին, վայր է գցել, ապա ծոցագրպանից դրամապանակը հանելիս հանդիպելով Ն.Ամիրշադյանի դիմադրությանը, կրկին բռունցքներով հարվածներ է հասցրել նրա դեմքի և գլխի շրջաններին, կոտրել ատամը ու հափշտակելով դրամապանակը, որի մեջ եղել է զգալի չափի` 80.000 ՀՀ դրամ, դիմել է փախուստի՚:
Առաջադրված մեղադրանքում Անդրանիկ Կարապետի Չիվտչյանն իրեն մեղավոր չճանաչեց, նշելով, որ իր կատարածը ոչ թե ավազակային հարձակում է, այլ կողոպուտ:
Նախաքննության փուլում Անդրանիկ Կարապետի Չիվտչյանը ցուցմունք է տվել այն մասին, որ 2010թ. մարտի կեսերին, կոնկրետ օրը չի հիշում, ՙԶեյթուն՚ բիստրոյի դիմաց նկատել է մի տարեց մարդու, որի գրպանից երևացել է դրամապանակը, և որոշել տիրանալ դրան: Հետապնդելով վերջինիս` Զեյթունի թիվ 5-րդ հացի գործարանի մոտ մոտեցել է այդ մարդուն, փաթաթվել և ձեռքով հարվածել նրա դեմքին, որից վերջինիս ծնկները ծալվել են և վայր է ընկել: Ձեռքը տարել է այդ մարդու ծոցագրպանը և ծոցագրպանից դրամապանակը հանելիս հանդիպելով վերջինիս դիմադրությանը` հարվածներ է հասցրել նրան և հափշտակելով դրամապանակը` դիմել փախուստի: Նստել է տաքսի և ճանապարհին հափշտակած դրամապանակից հանելով դրամապանակում եղած 80.000 ՀՀ դրամը` դրամապանակը ճանապարհին նետել է աղբամաններից մեկում: Գ/Թ 18-19,38:
Դատական քննության ընթացքում Անդրանիկ Չիվտչյանը նշեց, որ տուժողին չի հարվածել, այլ ուղղակի հրել է:
Ամբաստանյալ Անդրանիկ Կարապետի Չիվտչյանի դատարանում տված ցուցմունքը հավատ չի ներշնչում և այն նպատակ ունի մեղմացնել իր պատասխանատվությունը:
Ամբաստանյալ Անդրանիկ Չիվտչյանին ՀՀ քրեական օրենսգրքի 175-րդ հոդվածի 3-րդ մասի 4-րդ կետով առաջադրված մեղադրանքը դատաքննությամբ ապացուցվեց ներքոհիշյալ ապացույցներով:
Գործով տուժող Նորիկ Ամիրշադյանի նախաքննության և դատաքննության տված ցուցմունքներով:
Նախաքննության ժամանակ Նորիկ Ամիրշադյանը ցւցմունք է տվել այն մասին, որ 2010թ. մարտի 16-ին` ժամը 22-ի սահմաններում, Զեյթունի թիվ 5-րդ հացի գործարանի մոտ իրեն մոտենալով Անդրանիկ Կարապետի Չիվտչյանը ` փաթաթվել է իրեն և բռունցքով ուժգին հարվածել ծնոտին, որից ինքը, շշմելով, վայր է ընկել: Ա. Չիվտչյանը ձեռքը մեկնել է իր ծոցագրպանը և ծոցագրպանից դրամապանակը հանելիս հանդիպելով իր դիմադրությանը` ձեռքերով և ոտքերով հարվածներ է հասցրել գլխի շրջանում և հափշտակելով իր դրամապանակը, որի մեջ եղել է 80.000 ՀՀ դրամ կանխիկ գումար դիմել է փախուստի: Ա.Չիվտչյանի հարվածներից ինքը ստացել է բազմաթիվ վնասվածքներ` այտուցվել և կապտել է այտը, կոտրվել է ատամը և երկար ժամանակ ունեցել է գլխացավեր: Նախաքննության Ընթացքում Նորիկ Ամիրշադյանը ներկայացրել է 80.000 ՀՀ դրամի քաղ. հայցի պահանջ: Գ/Թ 22-24,63:
Դատաքննության ժամանակ տուժողը տվեց նույնաբովանդակ ցուցմունք, և կրկնեց, որ իրոք ամբաստանյալը հարվածել է իր ծնոտին, որից կոտրել է իր ատամը, հարվածներ է հասցրել իր գլխին, և հափշտակել է դրամապանակը, որի մեջ եղել է ստացած աշխատավարձը` 80.000 ՀՀ դրամ և խնդրեց գումարը վերադարձնել:
Գործով վկա Մանվել Կոստանի Հայրոյանի` նախաքննության ցուցմունքով այն մասին, որ հանդիսանում է Զեյթունի թիվ 5-րդ հացի գործարանի պահակը և Նորիկ Ամիրշադյանին ճանաչում է որպես նույն գործարանի էլեկտրիկ:
2010թ. մարտ ամսին, կոնկրետ օրը չի հիշում, ժամը 22-ի սահմաններում Ն. Ամիրշադյանը եկել է իր պահակակետ դեմքը այտուցված, կապտած և հայտնել , որ գործարանի պարսպի մոտ ինչ որ մեկը հարձակվել է իր վրա, ծեծել իրեն և հափշտակել դրամապանակը:
Այդ ողջ գիշեր աշխատանքի վայրում Ն. Ամիրշադյանը ստացած վնասվածքների պատճառով վատ է զգացել իրեն և պառկած տեղից վեր չի կացել: Գ/Թ 82-83:
Վկա Մանվել Հայրոյանը դատաքննության ժամանակ ըստ էության հաստատեց նախաքննական ցուցմունքը:
Կատարված քննչական փորձարարության առթիվ կազմված արձանագրությամբ, համաձայն որի Անդրանիկ Կարապետի Չիվտչյանը, մատնացույց անելով Դրոյի 22 հասցեյում գտնվող թիվ 5-րդ հացի գործարանի դարպասներից 35 մետր Պ. Սևակ փողոցի ուղղությամբ ձգվող մայթեզրի 35-րդ մետրի վրա գտնվող հատվածը, հայտարարել է , որ 2010թ. մարտի կեսերին, կոնկրետ օրը չի հիշում, դրամապանակը հափշտակելու նպատակով հարձակում է գործել մի տարեց տղամարդու վրա, բռունցքով հարվածել նրա դեմքին, վայր գցել և վերջինիս ծոցագրպանից դրամապանակը վերցնելիս ևս մի քանի անգամ հարվածներ հասցնելով վերջինիս դեմքի և գլխի շրջանում, դիմել է փախուստի: Գ/Թ 31-32:
Անդրադառնալով գործով նշանակված դատաբժշկական փորձաքննության եզրակացությանը` ըստ որի, փորձաքննության պահին, վաղեմության դեպքին համապատասխանող մարնական վնասվածքների օբյեկտիվ հատկանիշներ չեն հայտնաբերվել, դատարանն արձանագրում է հետևյալը.
Ավազակության հանցակազմի առկայության համար անհրաժեշտ է կյանքի կամ առողջության համար վտանգավոր բռնության գործադրումը կամ դա գործադրելու սպառնալիքը:
Բռնությունը որպես իրավական կատեգորիա, դրա, որպես ապացուցման ենթակա հանգամանքի առկայությունը կամ բացակայությունը կարող է ապացուցվել կամ հերքվել ապացույցի ցանկացած տեսակով:
Նախ` դատաբժշկական փորձագետի եզրակացության ՙԱնձնական զննության տվյալներ՚ բաժնում նշվել է, որ վերին ծնոտի, ձախից մատնանշվող 7-րդ ատամը բացակայում է, ատամնափոսը` փակ, մոխրավարդագույն զանգվածով լցված /Գ.Թ.67/: Տ
Տուժող Ն.Ամիրշադյանն ինչպես նախաքննության, այնպես էլ դատաքննության ժամանակ միանշանակ նշել է, որ իր վրա հարձակում կատարողը բռունցքով ուժգին հարվածել է ծնոտին, որից ինքը, շշմելով վայր է ընկել: Հարձակվողը ձեռքը մեկնել է իր ծոցագրպանը և ծոցագրպանից դրամապանակը հանելիս հանդիպել է իր դիմադրությանը` հարձակվողը ձեռքերով և ոտքերով հարվածներ է հասցրել գլխի շրջանում և հափշտակել է դրամապանակը, որի մեջ եղել է 80.000 ՀՀ դրամ և դիմել է փախուստի: Հարձակվողի հարվածներից ինքը ստացել է բազմաթիվ վնասվածքներ, այտուցվել և կապտել է այտը, կոտրվել է ատամը և երկար ժամանակ ունեցել է գլխապտույտ:
Տուժողը նաև նշեց, որ ժամանակին ոստիկանություն չի դիմել, քանզի չի ցանկացել կտրվել աշխատանքից:
Ավազակության հանցակազմի առկայության համար պարտադիր չէ, որպեսզի առողջությանը պատճառված լինի իրական վնաս, բավարար է միայն բռնության կիրառումը, որը հանցագործության կատարման ժամանակ տուժողի առողջության կամ կյանքի համար ստեղծել է վտանգ:
Դատարանը ամբաստանյալի վերը նշված գործողությունները գնահատում է տուժողի առողջության և կյանքի համար կիրառված վտանգավոր բռնություն և գտնում է, որ ամբաստանյալ Անդրանիկ Կարապետի Չիվտչյանի արարքը որպես ավազակային հարձակում ՀՀ քրեական օրենսգրքի 175 հոդվածի 3-րդ մասի 4-րդ կետով որակված է ճիշտ:
Տուժողի ներկայացրած քաղ.հայցի պահանջը 80.000 ՀՀ դրամի չափով նույնպես ենթակա է բավարարման, քանզի վնասը պատճառվել է անմիջականորեն ավազակային հարձակման հետևանքով:
Դատարանն արձանագրում է նաև, որ գործով բացակայում է ամբաստանյալի պատասխանատվությունը և պատիժը մեղմացնող օրենքով նախատեսված որևէ հանգամանք:
Ամբաստանյալի պատասխանատվությունը և պատիժը ծանրացնող հանգամանք է դիտվում հանցանքն ալկոհոլի ազդեցության տակ կատարելը: Ամբաստանյալն ինչպես նախաքննության ժամանակ, այնպես էլ դատարանում նշեց, որ մինչև հափշտակություն կատարելը իր ընկերների հետ ՙԶեյթուն Բիստրո՚ գարեջրատանը խմել է գարեջուր: Ամբաստանյալի հետ գարեջուր խմելու հանգամանքը, դեպքից անմիջապես առաջ, իրենց նախաքննական ցուցմունքներում հայտնել են նաև վկաներ Կարապետ Դոքմանյանը և Արտակ Հակոբյանը /գ.թ. 53-56/:
Դատարանը գտնում է, որ ամբաստանյալի նկատմամբ պետք է կիրառվի նաև գույքի բռնագրավում, նկատի ունենալով մեղսագրվող արարքի վտանգավորության բարձր աստիճանը և դատապարտյալի անձը:
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 357-360-րդ, 365-րդ, 367-րդ, 369-373-րդ հոդվածներով դատարանը

ՎՃՌԵՑ

Անդրանիկ Կարապետի Չիվտչյանին մեղավոր ճանաչել ՀՀ քրեական օրենսգրքի 175 հոդվածի 3-րդ մասի 4-րդ կետով նախատեսված հանցագործության կատարման համար և դատապարտել ազատազրկման 8 /ութ/ տարի 3 /երեք/ ամիս ժամկետով, գույքի բռնագրավմամբ, բայց ոչ ավել 80.000 ՀՀ դրամի չափով:
Կալանքի սկիզբը հաշվել 2010թ. ապրիլի 28-ից:
Անդրանիկ Կարապետի Չիվտչյանի անձնական վաստակից և տնտեսությունից հօգուտ տուժող Նորիկ Անուշավանի Ամիրշադյանի բռնագանձել 80.000 ՀՀ դրամ:
Անդրանիկ Կարապետի Չիվտչյանի նկատմամբ ընտրված խափանման միջոց կալանքը, մինչև դատավճռի ուժի մեջ մտնելը, թողնել անփոփոխ:
Անդրանիկ Կարապետի Չիվտչյանը պատիժը պետք է կրի ՀՀ արդարադատության նախարարության համապատասխան հիմնարկում:
Դատավճիռը դատավարության մասնակիցների կողմից 1 /մեկ/ ամսվա ընթացքում վերաքննության կարգով կարող է բողոքարկվել ՀՀ վերաքննիչ քրեական դատարան: