գործ N ԵԱՔԴ/0079/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ.Ավետիսյան
դատական նիստերի քարտուղար Ե.Կարապետյան
մեղադրող Ռ.Խաչատրյան
տուժողներ Է.Պետրոսյան, Ա.Հաբեթյան
տուժողի օրինական ներկայացուցիչ Ս.Գրիգորյան

2010թ. սեպտեմբերի 07-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`
1. Արթուր Ռաշիդի Եդիգարյանի, ծնված 13.03.1991թ., ԼՂՀ Ստեփանակերտ քաղաքում, ազգությամբ հայ, ՀՀ քաղաքացի, ֆիզիկապես առողջ, ամուրի, խնամքին ոչ ոք, նախկինում չդատված, չի աշխատում, սովորում է ԵՊՀ-ի Ինֆորմատիկայի և կիրառական մաթեմատիկայի ֆակուլտետի 3-րդ կուրսում, հաշվառված և բնակվում է Երևան քաղաքի, Րաֆֆու փողոցի 29 շենքի թիվ 1ա բնակարանում, մեղադրվում է ՀՀ քրեական օրենսգրքի 258 հոդվածի 2-րդ մասով և 316 հոդվածի 1-ին մասով, խափանման միջոց է ընտրվել ստորագրություն չհեռանալու մասին,
2. Ահարոն Ռաշիդի Եդիգարյանի, ծնված 03.07.1989թ., ԼՂՀ Տոնաշեն գյուղում, ազգությամբ հայ, ՀՀ քաղաքացի, ֆիզիկապես առողջ, ամուրի, խնամքին ոչ ոք, նախկինում չդատված, չի աշխատում, 2010թ. ավարտել է ԵՊՀ-ի Ինֆորմատիկայի և կիրառական մաթեմատիկայի ֆակուլտետը, հաշվառված և բնակվում է Երևան քաղաքի, Րաֆֆու փողոցի 29 շենքի թիվ 1ա բնակարանում, մեղադրվում է ՀՀ քրեական օրենսգրքի 316 հոդվածի 1-ին մասով, խափանման միջոց է ընտրվել ստորագրություն չհեռանալու մասին,

Պ Ա Ր Զ Ե Ց
1.Գործի դատավարական նախապատմությունը.
2010թ. մայիսի 10-ին ՀՀ Քանաքեռ-Զեյթուն քննչական բաժնում ՀՀ քրեական օրենսգրքի 258 հոդվածի 3-րդ մասի 1-ին կետի և 316 հոդվածի 1-ին մասի հատկանիշներով հարուցվել է թիվ 09110310 քրեական գործը:
2010թ. մայիսի 10-ին Արթուր և Ահարոն Ռաշիդի Եդիգարյանները ձերբակալվել են:
2010թ. մայիսի 12-ին Արթուր Ռաշիդի Եդիգարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 258 հոդվածի 2-րդ մասով և 316 հոդվածի 1-ին մասով:
2009թ. մայիսի 12-ին Ահարոն Ռաշիդի Եդիգարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 316 հոդվածի 1-ին մասով:
Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010թ. մայիսի 12-ի որոշումներով Արթուր Ռաշիդի Եդիգարյանի և Ահարոն Ռաշիդի Եդիգարյանի նկատմամբ կալանավորումը որպես խափանման միջոց ընտրելու վերաբերյալ միջնորդությունները մերժվել են:
2010թ. մայիսի 12-ին Արթուր և Ահարոն Ռաշիդի Եդիգարյանների նկատմամբ որպես խափանման միջոց է ընտրվել ստորագրություն չհեռանալու մասին:
2010թ. հունիսի 08-ին Արթուր Ռաշիդի Եդիգարյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 258 հոդվածի 2-րդ մասով և 316 հոդվածի 1-ին մասով, ընտրված խափանման միջոցը թողնվել է անփոփոխ:
2010թ. հունիսի 08-ին Ահարոն Ռաշիդի Եդիգարյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 316 հոդվածի 1-ին մասով, ընտրված խափանման միջոցը թողնվել է անփոփոխ:
2010թ. հունիսի 21-ին թիվ 09110310 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախաքննության մարմինն ամբաստանյալներ Արթուր Ռաշիդի Եդիգարյանին և Ահարոն Ռաշիդի Եդիգարյանին մեղադրանքներ է առաջադրել հհետևյալ արարքների համար.
Արթուր Եդիգարյանը 2010թ. մայիսի 9-ին, ժամը 2130-ի սահմաններում, Երևան քաղաքի Պ.Սևակի փողոցի թիվ 106 շենքի մոտ, ալկոհոլ օգտագործած վիճակում, դիտավորությամբ, կոպիտ կերպով խախտելով հասարակական կարգը, բացահայտ անհարգալից վերաբերմունք դրսևորելով հասարակության նկատմամբ, վիճաբանության մեջ է մտել անչափահաս Էրիկ Տիգրանի Պետրոսյանի հետ, տվել հայհոյանքներ, բռնություն գործադրել նրա նկատմամբ` պատճառելով վերջինիս առողջությանը թեթև վնաս, առողջության կարճատև քայքայումով:
Այնուհհետև, եղբոր` Ահարոն Եդիգարյանի հետ միասին, անհիմն վիճաբանության մեջ են մտել ոստիկանության համազգեստով իրենց ծառայողական պարտականությունները կատարող իշխանության ներկայացուցիչներ, ՀՀ ոստիկանության Քանաքեռ-Զեյթուն բաժնի պետի տեղակալ Աշոտ Ղամբարյանի, պրոֆիլակտիկ բաժանմունքի աշխատակիցներ Նիկոլայ Մարգարյանի ու Արտյոմ Հաբեթյանի հետ, դիմադրություն ցույց տվել, քաշքշել ու հարվածել նրանց` Ա.Ղամբարյանի առողջությանը պատճառելով թեթև վնասի հատկանիշներ չպարունակող մարմնական վնասվածքներ, այսինքն` կյանքի և առողջության համար ոչ վտանգավոր բռնություն է գործադրել իշխանության ներկայացուցչիների նկատմամբ:
Ոստիկանության Քանաքեռ-Զեյթուն բաժին տարվելուց հետո, շուրջ 30 րոպե տևողությամբ շարունակել է հայհոյանքներ տալ ոստիկանության աշխատակիցներին` խանգարելով ոստիկանության բաժնի բնականոն աշխատանքը:
Ահարոն Եդիգարյանը 2010թ. մայիսի 9-ին, ժամը 2130-ի սահմաններում, ալկոհոլային հարբածության վիճակում, Երևան քաղաքի Պ.Սևակի փողոցի թիվ 106 շենքի մոտ, եղբոր` Արթուր Եդիգարյանի հետ միասին, անհիմն վիճաբանության մեջ են մտել ոստիկանության համազգեստով իրենց ծառայողական պարտականությունները կատարող իշխանության ներկայացուցիչներ, ՀՀ ոստիկանության Քանաքեռ-Զեյթուն բաժնի պետի տեղակալ Աշոտ Ղամբարյանի, պրոֆիլակտիկ բաժանմունքի աշխատակիցներ Նիկոլայ Մարգարյանի ու Արտյոմ Հաբեթյանի հետ, դիմադրություն ցույց տվել, քաշքշել ու հարվածել նրանց` Ա.Ղամբարյանի առողջությանը պատճառելով թեթև վնասի հատկանիշներ չպարունակող մարմնական վնասվածքներ:
Այնուհհետև, ոստիկանության Քանաքեռ-Զեյթուն բաժին բերման ենթարկվելուց հետո, շուրջ 30 րոպե տևողությամբ շարունակել է հայհոյանքներ տալ, քաշքշել ու հարվածել ոստիկանության աշխատակիցներին, այսինքն` կյանքի և առողջության համար ոչ վտանգավոր բռնություն գործադրել իշխանության ներկայացուցչիների նկատմամբ:
3.Ապացույցների հետազոտում.
Առաջադրված մեղադրանքում նախնական քննության ընթացքում Արթուր Ռաշիդի Եդիգարյանն իրեն մեղավոր է ճանաչել լիովին, հայտնել, որ զղջում է այն բանի համար, որ 2010թ. մայիսի 9-ին երեկոյան, Պ.Սևակի փողոցի թիվ 106 շենքի մոտ վիճաբանել է Էրիկ Պետրոսյանի հետ, որից հետո դիմադրություն է ցույց տվել ոստիկանության աշխատակիցներին, սակայն հրաժարվել է դեպքի մասին մանրամասն ցուցմունք տալ:
Դատական քննության ժամանակ Արթուր Եդիգարյանը ցուցմունք տվեց, որ ընկերոջ ծննդյան տարեդարձի արարողության ժամանակ, ժամը 21-ի սահմաններում խորտկարանից դուրս է եկել ծխելու: Այդ ժամանակ Էրիկի հետ երկու աղջիկ ու մեկ տղա են կանգնած եղել: Էրիկը հարցրել է. ՙինչու էս էդպես նայում՚, որից հետո ինքը սկզբում հրել, հետո ձեռքով հարվածել է նրա դեմքին: Հետո սկսվել է վիճաբանությունը Էրիկի ընկերների հետ:
Էրիկ Պետրոսյանի վնասվածքն ինքն է հասցրել: Բացի իրենից նրան ոչ ոք չի հարվածել: Ինքը ոչ մի հայհոյանք չի տվել: Ինքը և եղբայրը ոստիկանին չեն հարվածել:
Ոստիկաններն իրենց քաշքշելով նստեցրել են մեքենան: Ոստիկանի վերնաշապիկի պատռվածքը այդ քաշքշուկի ժամանակ հնարավոր է որ առաջանար: Զղջում է կատարածի համար: Իրեն մեղավոր է ճանաչում մասնակի, քանի որ ոստիկանության շենքում իրենք իրենց կոռեկտ են պահել:
Առաջադրված մեղադրանքում նախնական քննության ընթացքում Ահարոն Ռաշիդի Եդիգարյանն իրեն մեղավոր է ճանաչել լիովին, հայտնել, որ 2010թ. մայիսի 9-ին երեկոյան, Պ.Սևակի փողոցի 106 շենքի մոտ գտնվող ՙԳուրման՚ կոչվող խորտկարանում և դրա մոտ վիճաբանել է ոստիկանության աշխատակիցների հետ, քաշքշել նրանց, ինչի համար անկեղծորեն զղջում է, սակայն չի ցանկանում դեպքի մասին մանրամասն ցուցմունք տալ:
Դատական քննության ժամանակ Ահարոն Եդիգարյանը ցուցմունք տվեց, որ մայիսի 9-ին երեկոյան, ժամը 21-ի սահմաններում տեսել է որ դրսում մարդիկ են հավաքված և Արթուրը վեճի է բռնվել: Այդ ընթացքում եկել է Տիգրանի հայրը և իրենց խորտկարան է տարել: Եթե խմած չլինեին այդ խառնաշփոթը չէր լինի: Ընդունում է, որ ոստիկանության պահանջը չեն կատարել, որից էլ այդ դիմադրությունը սկսվել է: Ոստիկանի վերնաշապիկը պատռված կարող էր լինել այդ ժամանակ: Ինքը ոչ մի ոստիկանի չի հարվածել, եղբայրը` նույնպես: Կատարածի համար զղջում է:
Ամբաստանյալներին առաջադրված մեղադրանքը, բացի նրանց ցուցմունքներից հիմնավորվել է նաև քրեական գործով ձեռք բերված հհետևյալ ապացույցներով.
Տուժողներ Էրիկ Պետրոսյանի, Աշոտ Ղամբարյանի, Արտյոմ Հաբեթյանի, Նիկոլայ Մարգարյանի, վկաներ Կարինե Հախունցի, Հրանտ Դանիելյանի, Արթուր Հախունցի, Արմեն Առաքելյանի, Անժելա Սաքունցի, Նարեկ Թորոսյանի, Գրիգոր Գասպարյանի, Արմեն Բեգլարյանի, Հարություն Քարտաշյանի, Մանվել Ասպատուրյանի, Արման Քոչարյանի, Արամայիս Մկրտչյանի, Արսեն Մանուչարյանի նախնական քննության ընթացքում տրված և դատարանում հետազոտված ցուցմունքներով հհետևյալի մասին.
Տուժող Էրիկ Տիգրանի Պետրոսյանը նախնական քննության ընթացքում ցուցմունք է տվել այն մասին, որ 2010թ. մայիսի 9-ին, ժամը 2130-ի սահմաններում, տուն գնալիս, Պ.Սևակ 106 շենքի դիմաց գտնվող խորտկարանի մոտով անցնելիս խորտկարանի առջև կանգնած երիտասարդներն իր հետևից ինչ որ բան են ասել ու սկսել ծիծաղել: Հարցրել է, թե ինչ ասացին, դա իրեն է վերաբերում, թե` ոչ և արդյոք իր վրա են ծիծաղում: Երիտասարդներից մեկն ասելով, որ լավ է անում, հենց իր վրա է ծիծաղում, սկսել վիճաբանել իր հետ, տվել հայհոյանքներ իր հասցեին, որից հետո բռունցքով հարվածել է իր աջ աչքին: Ինքը կորցրել է հավասարակշռությունը և ընկել գետին: Այդ ընթացքում շրջապատում հավաքվել են մարդիկ: Ինքը գետնից վեր կենալով և հասկանալով, որ միայնակ չի կարող դիմադրել այդ տղաներին, փախել է:
Դատական քննության ժամանակ Էրիկ Պետրոսյանը ցուցմունք տվեց, որ 2010թ. մայիսի 9-ին, ժամը 2130-ի սահմաններում, ՙԵրևան Սիթի՚-ի խանութի կողմից տուն գնալիս, Պ.Սևակի փողոցի թիվ 106 շենքի դիմաց գտնվող խորտկարանի առջև կանգնած երիտասարդն ուշադիր իրեն է նայել և իր հարցին, թե ինչու է նայում, ի պատասխան վերջինս հարվածել է իր աչքին: Ինքն ընկել է գետին և վեր կենալով փախել է, որովհհետև նրանք 8-9 հոգի են եղել: Չի հիշում հայհոյանքներ տվել են, թե ոչ:
Տուժողի օրինական ներկայացուցիչ Սվետլանա Գրիգորյանը հայտնեց, որ բակի երեխաներից տեղեկանալով, որ վերևում Էրիկին ծեծում են, գնացել է այդ կողմ: Ճանապարհին հանդիպել է Էրիկին և տեսել, որ ծեծված վիճակում է: Բուժման ծախսերի պահանջ չունի:
Տուժող, ոստիկանության Քանաքեռ-Զեյթուն բաժնի պետի ծառայության գծով տեղակալ Աշոտ Սերյոժայի Ղամբարյանը նախնական քննության ընթացքում ցուցմունք է տվել այն մասին, որ 2010թ. մայիսի 9-ին, ժամը 2130-ի սահմաններում, ահազանգ է ստացվել ոստիկանության բաժնի հերթապահ մաս այն մասին, որ Պ.Սևակի փողոցում գտնվող դպրոցի մոտ վիճաբանություն է: Ոստիկանության բաժնի օպերատիվ հերթապահն անմիջապես դեպքի վայր է ուղարկել տեղամասային տեսուչներ Նիկոլայ Մարգարյանին և Արտյոմ Հաբեթյանին: Քիչ անց նրանք հեռախոսով ոստիկանության բաժնից օգնություն են խնդրել: Անմիջապես դեպքի վայր են մեկնել ինքն ու ոստիկանության բաժնի պետի օպերատիվ գծով տեղակալ Արմեն Բեգլարյանը: Ինքը եղել է ոստիկանության համար սահմանված համազգեստով, իսկ Ա.Բեգլարյանը քաղաքացիական հագուստով: Հասնելով դեպքի վայր, Պ.Սևակ փողոցի 106 շենքի մոտ գտնվող խորտկարանի դիմաց տեսել են, որ մոտ 20-25 տարեկան մի երիտասարդ քաշքշուկ է տեղամասային տեսուչ Ն.Մարգարյանին և վիճաբանում նրա հետ: Պահանջել է այդ երիտասարդից դադարեցնել վեճն ու քաշքշուկը և նրա հետ մտել է խորտկարանի առանձնասենյակ, որտեղ եղել են 7-8 երիտասարդներ: Ներկայացել է, որ ոստիկանության Քանաքեռ-Զեյթուն բաժնի պետի տեղակալն է և հարցրել է, թե ինչ է պատահել և ինչու է այդ երիտասարդը վիճում տեղամասային տեսուչի հետ: Սենյակում նստած երիտասարդներից մեկն արհամարական տոնով պատասխանել է. ՙախպեր ոչ մի բան չի եղել, արի մի 50 խմենք՚: Այդ երիտասարդին ասել է, որ ինքը չի խմում և պահանջել է նրանից կարգի հրավիրել իրեն: Այդ ժամանակ միջամտել է նաև Ն.Մարգարյանը, խոսքն ուղղելով նույն երիտասարդին, ասել, որ նա խոսում է միլպետի տեղակալի հետ և առաջարկել իրեն ավելի կոռեկտ պահել: Դրանից այդ երիտասարդը վրդովվել է` ասելով, թե իրենք չգիտեն, ինքն ով է, ում տղան: Իրեն ոչ մի միլպետ, տեղակալ չի հետաքրքրում, ով ուզում է լինի: Պահանջել է այդ երիտասարդից իրեն կարգի հրավիրել և դուրս գալ առանձնասենյակից, բայց նա, վեր կենալով տեղից, սկսել է քաշքշել իրեն: Մյուս երիտասարդը, ով մինչ այդ վիճել է Ն.Մարգարյանի հետ, նույնպես սկսել է իրեն քաշքշել: Տեղամասային տեսուչներ Ն.Մարգարյանը և Ա.Հաբեթյանը միջամտել են, փորձել կարգի հրավիրել այդ երիտասարդներին, բայց նրանք չեն ենթարկվել: Նրանց առանձնասենյակից դուրս են հանել, բայց դրսում նրանք ավելի ագրեսիվ են դարձել, շարունակել են քաշքշուկը, սկսել են նաև հայհոյանքներ տալ ու հարվածել իրենց: Այդ քաշքշուկի հհետևանքով պատռվել է նաև տեղամասային տեսուչ Ա.Հաբեթյանի համազգեստի վերնաշապիկը: Քիչ անց եկել են ոստիկանության բաժնի օպեր-լիազորներ Հարություն Քարտաշյանը և Վաչե Մալաքյանը, որոնց օգնությամբ մի կերպ կարողացել են այդ երիտասարդներին նստեցնել իր ծառայողական ՎԱԶ 2107 մակնիշի 182ՈՍ02 պ/հ ավտոմեքենան ու տանել ոստիկանության բաժին: Պարզվել է, որ այդ երիտասարդները հանդիսանում են Ահարոն և Արթուր Ռաշիդի Եդիգարյանները, ովքեր ոստիկանության բաժնում շարունակել են հայհոյանքներ տալ, իսկ Ահարոն Եդիգարյանը շարունակել է քաշքշել ու հարվածել ոստիկաններին:
Տուժող, ոստիկանության Քանաքեռ-Զեյթուն բաժնի տեղամասային տեսուչ Արտյոմ Անդրուշի Հաբեթյանը ցուցմունք տվեց այն մասին, որ 2010թ. մայսիս 9-ին գտնվել է ոստիկանության բաժնի օպերատիվ խմբի կազմում, հերթապահություն է կատարել: Ժամը 2130-ի սահմաններում օպերատիվ հերթապահից տեղեկացել է, որ ահազանգ է ստացվել ոստիկանություն այն մասին, որ ՙ24-ի կռուգում՚ գտնվող դպրոցի մոտ վիճաբանություն ու կռիվ է տեղի ունենում: Տեղամասային տեսուչ Նիկոլայ Մարգարյանի հետ անմիջապես մեկնել են դեպքի վայր: Տեղ հասնելով` տեսել են, որ վիճաբանություն չկա, սակայն հարցուփորձով պարզել են, որ կռիվը տեղի է ունեցել Պ.Սևակի փողոցի թիվ 106 շենքի մոտ գտնվող ՙԳուրման՚ կոչվող խորտկարանի դիմաց և դրան մասնակցել են այդ խորտկարանում կազմակերպված խնջույքի մասնակիցները: Մոտենալով խորտկարանին ներսից լսել են աղմուկի ձայներ, մտածել են, որ վիճաբանությունը շարունակվում է և մտել են խորտկարանի այն սենյակ, որտեղից լսվել են ձայները: Տեսել են, որ ներսում կան մոտ 7-8 երիտասարդներ, ովքեր ոգելից խմիչքի ազդեցության տակ են եղել: Հարցուփորձ են արել տեղի ունեցած վեճի մասին և երիտասարդներից մեկը, ով ինչպես հետագայում է պարզվել հանդիսանում է Ահարոն Եդիգարյանը, պատասխանել է, որ ինչ եղել է դա նրանց խնդիրն է և իրենց չի վերաբերում, որից հետո սկսել է վիճել իրենց հետ: Տեսնելով, որ նշված երիտասարդներին երկուսով չեն կարող կարգի հրավիրել, դուրս են եկել սենյակից, զանգահարել ոստիկանություն և օգնություն կանչել: Իրենց հետևից դուրս է եկել նաև Ահարոն Եդիգարյանը, ով նորից սկսել է վիճել իրենց հետ և քաշքշել իրենց: Քիչ անց եկել են ոստիկանության բաժնի պետի տեղակալներ Աշոտ Ղամբարյանը և Արմեն Բեգլարյանը: Ա.Ղամբարյանը եղել է ոստիկանության համազգեստով և մոտենալով Ահարոն Եդիգարյանին, պահանջել է դադարեցնել վիճաբանությունը ու նրա հետ մտել է առանձնասենյակ: Նրանց հետևից ներս են մտել նաև ինքն ու Ն.Մարգարյանը: Ա.Ղամբարյանը հարցրել է, թե ինչ վիճաբանություն է տեղի ունեցել և ինչու է Ահարոն Եդիգարյանը վիճում իրենց հետ: Ի պատասխան դրան սենյակում նստած երիտասարդներից մեկը, ով ինչպես հետագայում են իմացել հանդիսանում է Արթուր Եդիգարյանը, արհամարական ձևով դիմելով Ա.Ղամբարյանին ասել է. ՙախպեր ոչ մի բան չի եղել, արի մի բաժակ խմենք՚: Ա.Ղամբարյանը պահանջել է Արթուր Եդիգարյանից իրեն կարգի բերել, իսկ Ն.Մարգարյանը դիմելով վերջինիս ասել է, որ նա խոսում է միլպետի տեղակալի հետ և կարող է իրեն ավելի կոռեկտ պահել: Ա.Եդիգարյանը ասել է, որ իրենք չգիտեն թե ինքն ով է, ում տղան, իրեն ոչ մի միլպետ կամ տեղակալ չի հետաքրքրում: Ա.Ղամբարյանը ասել է նրան, որ դուրս գա սենյակից, իսկ նա վեր կենալով տեղից սկսել է քաշքշել Ա.Ղամբարյանին: Արթուր եդիգարյանին է միացել նաև եղբայրը` Ահարոն Եդիգարյանն ու նա էլ է սկսել քաշքշել Ա.Ղամբարյանին: Ն.Մարգարյանի հետ միջամտել են, փորձել դադարեցնել քաշքշուկը, սակայն Եդիգարյանները ավելի են վրդովվել ու սկսել են հայհոյանքներ տալ ու հարվածել իրենց: Նրանց մի կերպ դուրս են բերել խորտկարանից, բայց դրսում նրանք ավելի ագրեսիվ են դարձել ու շարունակել են քաշքշել, հայհոյել ու հարվածել իրենց: Քիչ անց եկել են ոստիկանության բաժնի օպեր-լիազորներ Հարություն Քարտաշյանը և Վաչե Մալաքյանը, փորձել են կարգի հրավիրել Եդիգարյաններին ու միասին նրանց բերման ենթարկել, սակայն վերջիններս դիմադրություն են ցույց տվել: Իրենց մի կերպ հաջողվել է Եդիգարյաններին նստեցնել Ա.Ղամբարյանի ծառայողական Վազ 2107 մակնիշի 182ՈՍ02 պ/հ ավտոմեքենան և տանել ոստիկանության բաժին: Մեքենա նստեցնելիս պատռել են իր վերաշապիկը: Ոստիկանության բաժնում Եդիգարյանները մոտ կես ժամ շարունակել են հայհոյանքներ տալ ոստիկաններին, իսկ Ահարոն Եդիգարյանը նույնիսկ շարունակել է քաշքշել ու հարվածել իրենց:
Տուժող` ոստիկանության Քանաքեռ-Զեյթուն բաժնի տեղամասային տեսուչ Նիկոլայ Նիկոլայի Մարգարյանի նախնական քննության ընթացքում ցուցմունք է տվել այն մասին, որ 2010թ. մայսիս 9-ին ոստիկանության բաժնի օպերատիվ խմբի կազմում հերթապահություն է կատարել: Ժամը 2130-ի սահմաններում օպերատիվ հերթապահի ցուցումով տեղամասային տեսուչ Արտյոմ Հաբեթյանի հետ մեկնել են Պ.Սևակի փողոցի 106 շենքի մոտ, որտեղ ոստիկանության բաժին ստացված ահազանգի համաձայն վիճաբանություն է տեղի ունենում: Տեղ հասնելով տեսել են, որ վիճաբանություն չկա, սակայն հարցուփորձով պարզել են, որ վեճին մասնակցել են Պ.Սևակի 106 շենքի մոտ գտնվող խորտկարանում կազմակերպված խնջույքի մասնակիցները: Մոտենալով խորտկարանին, ներսից լսել է աղմուկի ձայներ: Մտածել են, որ վեճը շարունակվում է և մտել են խորտկարանի այն առանձնասենյակ, որտեղից լսվել են ձայները: Տեսել են, որ ներսում կան մոտ 7-8 երիտասարդներ, ովքեր ոգելից խմիչքի ազդեցության տակ են եղել: Հարցուփորձ են արել տեղի ունեցած վեճի մասին և երիտասարդներից մեկը, ով ինչպես հետագայում են իմացել հանդիսանում է Ահարոն Եդիգարյանը, պատասխանել է, որ ինչ եղել է դա նրանց խնդիրն է և իրենց չի վերաբերում, որից հետո սկսել է վիճել իրենց հետ: Տեսնելով, որ նշված երիտասարդներին երկուսով չեն կարող կարգի հրավիրել դուրս են եկել սենյակից, զանգահարել ոստիկանություն և օգնություն կանչել: Իրենց հետևից դուրս է եկել նաև Ահարոն Եդիգարյանը, ով նորից սկսել է վիճել իրենց հետ և քաշքշել իրենց: Քիչ անց եկել են ոստիկանույթան բաժնի պետի տեղակալներ Աշոտ Ղամբարյանը և Արմեն Բեգլարյանը: Ա.Ղամբարյանը եղել է ոստիկանության համազգեստով և մոտենալով նրանց պահանջել է Ահարոն Եդիգարյանից դադարեցնել վիճաբանությունն ու նրա հետ մտել է առանձնասենյակ: Նրանց հետևից ներս են մտել նաև ինքն ու Ա.Հաբեթյանը: Ա.Ղամբարյանը հարցրել է, թե ինչ վիճաբանություն է տեղի ունեցել: Ի պատասխան դրան, սենյակում նստած երիտասարդներից մեկը, ով հետագայում իմացել են, որ հանդիսանում է Արթուր Եդիգարյանը, արհամարական ձևով դիմելով Ա.Ղամբարյանին ասել է. ՙախպեր ոչ մի բան չի եղել, արի մի 50 խմենք՚: Ա.Ղամբարյանը պահանջել է Արթուր Եդիգարյանից իրեն կարգի հրավիրել, իսկ ինքը դիմելով վերջինիս ասել է, որ նա խոսում է միլպետի տեղակալի հետ և կարող է իրեն ավելի կոռեկտ պահել: Ա.Եդիգարյանը ասել է, որ իրենք չգիտեն թե ինքն ով է, ում տղան, իրեն ոչ մի միլպետ կամ տեղակալ չի հեթաքրքրում: Ա.Ղամբարյանն առաջարկել է նրան, դուրս գալ սենյակից, իսկ նա վեր կենալով տեղից սկսել է քաշքշել Ա.Ղամբարյանին: Արթուր եդիգարյանին է միացել նաև եղբայրը` Ահարոն Եդիգարյանն ու նա էլ է սկսել Ա.Ղամբարյանին քաշքշել: Ա.Հաբեթյանի հետ միջամտել են, փորձել դադարեցնել քաշքշուկը, սակայն Եդիգարյաններն ավելի են վրդովվել ու սկսել են հայհոյանքներ տալ ու հարվածել իրենց: Նրանց մի կերպ դուրս են բերել խորտկարանից, բայց դրսում նրանք ավելի ագրեսիվ են դարձել ու շարունակել են քաշքշել, հայհոյել ու հարվածել իրենց: Քիչ անց եկել են ոստիկանության բաժնի օպեր-լիազորներ Հարություն Քարտաշյանը և Վաչե Մալաքյանը, փորձել են կարգի հրավիրել Եդիգարյաններին ու միասին նրանց բերման ենթարկել, սակայն վերջիններս կատաղի դիմադրություն են ցույց տվել: Իրենց մի կերպ հաջողվել է Եդիգարյաններին նստեցնել Ա.Ղամբարյանի ծառայողական Վազ 2107 մակնիշի 182ՈՍ02 պ/հ ավտոմեքենան և տանել ոստիկանություն: Ոստիկանության բաժնում Եդիգարյանները մոտ կես ժամ շարունակել են հայհոյանքներ տալ ոստիկաններին, իսկ Ահարոն Եդիգարյանը նույնիսկ շարունակել է քաշքշել ու հարվածել իրենց:
Վկա Կարինե Ստեփանի Հախունցը նախնական քննության ընթացքում ցուցմունք է տվել այն մասին, որ 2010թ. մայիսի 9-ին, ժամը 1630-ից 1700-ի սահմաններում, որդու` Տիգրան Հախունցի համակուրսեցիները գնացել են Պ.Սևակի փողոցի 106 շենքի մոտ գտնվող իրենց խորտկարան` ծննդյան տարեդարձ նշելու: Ժամը 2130-ի սահմաններում իրենց տուն է զանգահարել խորտկարանի աշխատող Անժելան և խորտկարան կանչել: Ամուսնու` Արթուր Հախունցի հետ միասին գնացել են խորտկարան և տեսել, որ խորտկարանի դիմաց հավաքված են մարդիկ, նրանց մեջ են եղել նաև իր որդու համակուրսեցիներից մի քանիսը, ովքեր բարձր ձայնով խոսել են մի քանի այլ երիտասարդների հետ: Որդու համակուրսեցիներին կանչել է խորտկարան, նրանք ներս են մտել, իսկ Արթուր Հախունցը դրսում հավաքվածներին խնդրել է հեռանալ: Խորտկարանում իմացել է, որ խնջույքի մասնակիցներից մեկը վիճել ու կռվել է Զեյթունի բնակիչ Էրիկի հետ: Մի քանի րոպեից եկել են ոստիկանության համազգեստով 2 աշխատակիցներ և մտել խորտկարանի առանձնասենյակ, որտեղ եղել են իր տղայի համակուրսեցիները, իսկ ինքը դուրս է եկել փողոց: Քիչ անց տեսել է, որ ոստիկանության աշխատակիցներն առանձնասենյակից դուրս են բերել Արթուր և Ահարոն եղբայրներին, ովքեր չեն ենթարկվել ոստիկաններին և դիմադրել են նրանց: Ոստիկանները Արթուր և Ահարոն եղբայրներին նստեցրել են ավտոմեքենա և տարել ոստիկանություն:
Դատական քննության ժամանակ Կարինե Հախունցը ցուցմունք տվեց, որ ժամը 21-ի սահմաններում իրենց խորտկարանի աշխատող Անժելան զանգահարել և ասել է, որ կռիվ է եղել իր որդու համակուրսեցիների և զեյթունցիների միջև: Ամուսնու հետ գնալով խորտկարան տեսել են, որ մոտ 30 հոգի մարդիկ են հավաքված և խմբերով կանգնած խոսում են: Իր ամուսինը տղաներին խորտկարան է տարել, իսկ հավաքված մյուս քաղաքացիներին խնդրել է հեռանալ: 5-7 րոպե անց եկել են երկու ոստիկաններ, հետո մեքենաներով եկել են մյուսները: Ներս մտնելով հարցրել են, թե ինչ է եղել: Ինքը նրանց խոսակցությունից միայն լսել է, որ տղաներից մեկը բարձր ձայնով ասել է. ՙինչու ես խփում, նա իմ եղբայրն է՚: Հետո քաշքշուկի ձայներ է լսել և տեսել, որ Ահարոնին և Արթուրին հարվածելով ու քաշքշելով ոստիկանները տարել ու մեքենան են նստեցրել: Տղաները դիմադրում էին: Ինքը հետո է իմացել, որ վեճը եղել է Զույթունի բնակիչ Էրիկի հետ: Դեպքի մանրամասներն ինքը չգիտի, քանի որ ականատես չի եղել: Այդ ամենն իր կարծիքով շրջակա շենքերի բնակիչների համար հաճելի չէր լինի և երևի թե նրանց հանգիստը խանգարվել է:
Վկա Հրանտ Հարությունի Դանիելյանը նախնական քննության ընթացքում ցուցմունք է տվել այն մասին, որ իր բարեկամներ Ահարոն և Արթուր Եդիգարյանների, մտերիմներ Նարեկի, Արմենի, Արսենի, Արամայիսի և Գոքորի հետ 2010թ. մայիսի 9-ին գնացել են իրենց ծանոթ Տիգրանենց, Զեյթուն թաղամասում գտնվող խորտկարան` Արսենի ծննդյան տարեդարձը նշելու: Ժամը 20-ից հետո, Ահարոն և Արթուր Եդիգարյանները դուրս են եկել խորտկարանից` ծխելու: Մոտ 5-10 րոպե հետո լսել է վիճաբանության ձայներ և դուրս գալով տեսել, որ Արթուր Եդիգարյանը վիճում է մի տղայի հետ: Հանկարծ նրանց միջև քաշքշուկ է առաջացել, մարդիկ են հավաքվել, ընդհանուր աղմուկ ու խառնաշփոթ է ստեղծվել, լսվել են հայհոյանքների ձայներ: Այս խառնաշփոթը տևել է մոտ 5 րոպե: Ինքը տեսել է, որ այն տղան ում հետ վիճել է Արթուր Եդիգարյանը չկա: Տիգրանի հայրը հավաքվածներից պահանջել է, որ գնան: Իրենք մտել են խորտկարանի առանձնասենյակ` խնջույքը շարունակելու: Մոտ 2-3 րոպե հետո առանձնասենյակ են մտել ոստիկանության համազգեստով 2 ոստիկան և հարցուփորձ արել, թե ինչ կռիվ է եղել: Պատասխանել են, որ կռիվ չի եղել: Ոստիկանները դուրս են եկել սենյակից և քիչ անց ներս է մտել ոստիկանության համազգեստով մի փոխգնդապետ: Արթուր Եդիգարյանը նրան ասել է. ՙարի մի բաժակ խմենք՚, իսկ փոխգնդապետը բարկացել է ու բարձր տոնով ինչ որ բան ասել նրան: Արթուր Եդիգարյանն այդ փոխգնդապետին ասել է մի գոռա վրաս, իսկ Ահարոն Եդիգարյաննել ասել է. ՙեղբորս վրա չգոռաս՚: Այդ ոստիկանի ու Եդիգարյան եղբայրների միջև վեճ է սկսվել, ոստիկանը պահանջել է, որ նրանք դուրս գան առանձնասենյակից, իսկ նրանք չեն ենթարկվել: Ոստիկանը բռնել է Արթուր Եդիգարյանի ձեռքից ու սենյակից դուրս քաշել: Ահարոն Եդիգարյանը նրանց հհետևից դուրս է եկել: Դրսից լսվել են վիճաբանության ձայներ և երբ ինքը սենյակից դուրս է եկել, տեսել է, որ ոստիկանները փորձում են Արթուր և Ահարոն Եդիգարյաններին նստեցնել ավտոմեքենա, իսկ նրանք քաշքշուկ են ու դիմադրում ոստիկաններին: Ինքը մի կողմ է քաշվել, որ զանգահարի: Երբ վերադարձել է, տեսել է, որ ոստիկանները Արթուր և Ահարոն Եդիգարյաններին տարել են ոստիկանություն: Դրանից հետո, ոստիկանները իրեն, Նարեկին ու Արմենին նույնպես ոստիկանություն են տարել, որտեղ երբ գտնվել է սենյակներից մեկում, լսել են Ահարոն Եդիգարյանի հայհոյանքները:
Դատական քննության ժամանակ Հրանտ Դանիելյանը ցուցմունք տվեց, որ խորտկարանի դիմաց տեղի ունեցած վեճից մոտ 5 րոպե անց եկել են երկու ոստիկաններ և հարցրել, թե ինչ է պատահել: Իրենք պատասխանել են, որ ոչինչ չի եղել, ամեն ինչ ավարտվել է: Հետո, երբ եկել է փոխգնդապետը, Արթուրն առաջարկել է նրանց նստել և մի բաժակ բան խմել, իրենց ընկերոջ ծնունդը շնորհավորել, ինչից վրդովված ոստիկաններից մեկն ասել է, որ նրա դիմաց միլպետի տեղակալն է կանգնած, հրել և գոռացել է Արթուրի վրա: Այդ խառնաշփոթը տևել է մոտ 15 րոպե: Իր կարծիքով այդ ամենը շրջակա բնակիչների համար հաճելի չէր:
Վկա Արթուր Արեստի Հախունցը ցուցմունք տվեց այն մասին, որ որդու` Տիգրան Հախունցի համակուրսեցիները 2010թ. մայիսի 9-ին, ժամը 1700-ից, Պ.Սևակ փողոցի 106 շենքի մոտ գտնվող իրենց խորտկարանում նշել են համակուրսեցիներից մեկի ծննդյան տարեդարձը: Ժամը 2130-ի սահմաններում իրենց տուն է զանգահարել խորտկարանի աշխատող Անժելան և ասել, որ շուտ գնան խորտկարան: Կնոջ` Կարինե Հախունցի հետ գնացել են և խորտկարանի դիմաց տեսել մարդկանց բազմություն, որոնց մեջ ճանաչել է իր տղայի համակուրսեցիներ Արթուրին և ևս 2-3 տղաների: Նրանք վիճել են Զեյթունի բնակիչ մի քանի տղաների հետ: Մոտեցել է նրանց, պահանջել, որ հավաքվածները ցրվեն, իսկ տղայի համակուրսեցիներին` որ գնան խորտկարանի առանձնասենյակ: Քիչ անց եկել են ոստիկանության համազգեստով տեղամասային տեսուչները և մտել խորտկարանի
առանձնասենյակ, որտեղ եղել են իր տղայի համակուրսեցիները: Մի քանի րոպեից եկել է ոստիկանության բաժնի պետի տեղակալ Ղամբարյանը, ով նույնպես եղել է ոստիկանության համազգեստով, և մտել նույն առանձնասենյակ: Քիչ անց տեսել է, որ Ղամբարյանը առանձնասեյակից դուրս գալով, թևից բռնած, փորձում է դուրս քաշել խնջույքի մասնակից եղբայրներից մեկին, իսկ վերջինս չի ենթարկվում նրան, հրաժարվում է դուրս գալ: Այդ պահին առանձնասենյակից դուրս է եկել նաև այդ երիտասարդի եղբայրը և խառնվել հրմշտոցին: Մյուս ոստիկանները մոտեցել են Ղամբարյանին, փորձել օգնել նրան և այդ երիտասարդներին նստեցնել մեքենան, սակայն եղբայրները շարունակել են դիմադրել ոստիկաններին: Այդ պահին նկատել է, որ մոտեցել են քաղաքացիական հագուստով ևս մի քանի ոստիկան և ոստիկաններին ի վերջո հաջողվել է երկու եղբայրներին նստեցնել ավտոմեքենան ու տանել ոստիկանություն: Հետագայում իմացել է, որ մինչ իր գալը խնջույքի մասնակից եղբայրներից Արթուրը վիճաբանել ու կռվել է Զեյթունի բնակիչ Էրիկի հետ:
Վկա Արմեն Զուրաբի Առաքելյանը նախնական քննության ընթացքում ցուցմունք է տվել այն մասին, որ իր համակուրսեցի Ահարոն Եդիգարյանի, վերջինիս եղբոր` Արթուրի ու նրա համակուրսեցիներ Նարեկի, Հրանտի, Արսենի, Արամայիսի և Գոքորի հետ նրանց համակուրսեցի Տիգրանենց, Զեյթուն թաղամասում գտնվող խորտկարանում ս/թ մայիսի 9-ին նշել են Արսենի ծննդյան տարեդարձը: Ժամը 2100-ի սահմաններում լսել է աղմուկի ձայներ և դուրս եկել խորտկարանի առանձնասենյակից: Դրսում տեսել է, որ մի խումբ անծանոթ երիտասարդներ վիճում են իրենց խնջույքի մասնակիցների հետ: Միջամտել է, փորձել պարզել թե ինչ է եղել: Նկատել է նաև, որ Տիգրանի հայրը` Արթուրը փորձել է կանխել վեճը: Վեճը դադարել է և իրենք մտել են խորտկարան: Քիչ անց եկել են ոստիկանության համազգեստով 2 ոստիկանության աշխատակիցներ, ովքեր հարցրել են, թե ինչ վեճ է տեղի ունեցել: Դրանից հետո, եկել են ևս 2 ոստիկաններ, նրանցից 1-ը ոստիկանության փոխգնդապետի համազգեստով է եղել: Վերջինս մտել է առանձնասենյակ, իսկ ինքը մնացել է դրսում: Այդ ժամանակ իրենց առանձնասենյակից բղավոցներ է լսել: Այնուհհետև խառնաշփոթ իրավիճակ է առաջացել, տեսել է, որ Արթուր և Ահարոն Եդիգարյանները վիճում են ոստիկանների հետ, ոստիկանները փորձել են նրանց նստեցնել ավտոմեքենան, սակայն վերջիններս չեն ենթարկվել ոստիկաններին, մոտ 5 րոպե քաշքշել ու դիմադրել են նրանց: Այդ ընթացքուն քաղաքացիական հագուստով ևս մի քանի ոստիկաններ են եկել և նրանց ի վերջո հաջողվել է Արթուր և Ահարոն Եդիգարյաններին նստացնել ավտոմեքենան և տանել ոստիկանություն: Դրանից հետո, ոստիկանություն են տարել նաև իրեն, Հրանտին և Նարեկին:
Վկա, ՙԳուրման՚ խորտկարանի վաճառողուհի Անժելա Բարսեղի Սակունցը նախնական քննության ընթացքում ցուցմունք է տվել այն մասին, որ 2010թ. մայիսի 9-ին իրենց տնօրենի որդու համակուրսեցիները նշել են ծննդյան տարեդարձ: Ժամը 2130-ի սահմաններում դրսից լսել է վիճաբանության ձայներ և դուրս գալով տեսել, որ խնջույքի մասնակիցներից մեկը վիճում է Զեյթունի բնակիչ Էրիկի հետ ու քաշքշուկ նրան: Տեսել է նաև, որ խնջույքի մասնակից երիտասարդը բռունցքով հարվածել է Էրիկի աչքին: Այդ ժամանակ լսել է նաև հայհոյանքներ: Անմիջապես մտել է խորտկարան ու զանգահարել իրենց տնօրենին և նրան կանչել խորտկարան: Քիչ անց եկել է իրենց տնօրեն Կարինե Հախունցը ամուսնու` Արթուր Հախունցի հետ: Նրանք խնջույքի մասնակիցներին ներս են տարել խորտկարան, իսկ դրսում հավաքվածները հեռացել են: Թե ինչ է տեղի ունեցել դրանից հետո չի տեսել, քանի որ զբաղված է եղել աշխատանքով, սակայն իմացել է, որ տեղի ունեցած վեճի կապակցությամբ ոստիկաններ են եկել խորտկարան և խնջույքի մասնակից երկու եղբայրները վիճաբանության մեջ են մտել ոստիկանների հետ, չեն ենթարկվել ոստիկանների պահանաջներին և դիմադրություն են ցույց տվել նրանց:
Դատական քննության ժամանակ Անժելա Սաքունցը ցուցմունք տվեց, որ մայիսի 9-ին տնօրենի որդին համակուրսեցիների հետ ծննդյան տարեդարձ է նշել: Ժամը 21-ի սահմաններում ձայներ լսելով դուրս է եկել խորտկարանից և տեսել, որ մի խումբ երիտասարդներ վիճում են: Ներս է մտել ու զանգահարել տնօրենին: Տեսել է, որ ծնունդի մասնակիցներից ինչ որ մեկը, թե կոնկրետ ով չի տեսել, հարվածել է Էրիկին: Հարվածի պահը չի տեսել: Տեսել է, որ Էրիկն աչքը բռնած փախչում է: Դրանից հետո ոչինչ չի տեսել, քանի որ զբաղված է եղել աշխատանքով:
Վկա Նարեկ Աղասու Թորոսյանը ցուցմունք տվեց այն մասին, որ 2010թ. մայիսի 9-ին, իր համակուրսեցի Տիգրանենց խորտկարանում Հրանտի, Արսենի Արամայիսի, Գրիգորի, Արմենի, Ահարոնի և Արթուրի հետ նշել են Արսենի ծննդյան տարեդարձը: Ժամը 2100-ի սահմաններում Արթուր և Ահարոն եղբայրները դուրս են եկել խորտկարանից: Մոտ 5 րոպե հետո լսվել են վիճաբանության ձայներ և դուրս գալով տեսել է, որ Արթուրն ու Ահարոնը վիճում են ինչ-որ տղայի հետ: Քիչ անց տեսել է, որ այդ տղան ում հետ վիճում էին Արթուրն ու Ահարոնը, ընկած է գետին: Շրջապատում հավաքվել են մարդիկ, ովքեր փորձել են դադարեցնել վիճաբանությունը: Այդ ժամանակ եկել է Տիգրանի հայրը, իրենցից պահանջել, որ մտնեն խորտկարան, ինչն իրենք արել են: Մի քանի րոպեից եկել են ոստիկանության համազգեստով ոստիկանության աշխատակիցներ, Արթուր Եդիգարյանը ինչ-որ բան է ասել նրանց, որի հհետևանքով ոստիկաններից մեկը զայրացել է Արթուրի վրա: Ահարոնը ոստիկանին ասել է. ՙչգոռաս եղբորս վրա՚ և նրանց միջև վեճ է սկսվել: Տեսնելով դա` Արսենի հետ գնացել են հաշիվը փակելու, որ հեռանան: Երբ վերադարձել են, տեսել է, որ ոստիկանները Ահարոն և Արթուր Եդիգարյաններին նստեցրել են ավտոմեքենան և տարել: Դրանից հետո իրեն էլ են տարել ոստիկանություն:
Վկա Գրիգոր Աբրահամի Գասպարյանը նախնական քննության ընթացքում ցուցմունք է տվել այն մասին, որ 2010թ. մայիսի 9-ին Նարեկի, Արսենի, Հրանտի, Արթուրի, Արմենի, Ահարոնի և Արամայիսի հետ միասին Տիգրանի հոր, Զեյթուն թաղամասում գտնվող ՙԳուրման՚ խորտկարանում նշել են Արսենի ծննդյան տարեդարձը: Ժամը 2100-ից հետո Արթուր և Ահարոն եղբայրները դուրս են եկել խորտկարանից: Մոտ 5 րոպե անց դրսից բարձ վիճաբանության ձայներ են լսել: Դուրս գալով տեսել է, որ Արթուր և Ահարոն եղբայրենրը վիճաբանում են մի անծանոթ երիտասարդի հետ: Հավաքված են եղել նաև քաղաքացիներ, որոնցից ոմանք սկսել են բաժանել կռվողներին: Դրանից հետո, նկատել է իրենց համակուրսեցի Տիգրանի հորը, ով փորձել է հանդարտացնել կռվողներին և իրենց մտցրել է խորտկարանի առանձնասենյակը: Մոտ 5 րոպե անց խորտկարանի առանձնասենյակ են մտել ոստիկանության համազգեստով 2 ոստիկան և հարցուփորձ են արել, թե ինչ է տեղի ունեցել: Իրենք պատասխանել են, որ ոչինչ չի եղել և իրենց ընկերոջ ծնունդն են նշում: Դրանից հետո այդ ոստիկանները դուրս են եկել: Մի քանի րոպե հետո ներս է մտել մեկ այլ ոստիկան: Այդ ոստիկանը հարցրել է, թե ինչ է կատարվում, իսկ Արթուրը պատասխանել է.ՙհորոխպեր արի մի 2 բաժակ խմենք՚: Դրանից այդ ոստիկանը բարկացել է և Եդիգարյան եղբայրնեին դուրս է հրավիրել: Դրսում Եդիգարյան եղբայրների և ոստիկանների միջև քաշքշուկ է սկսվել, ոստիկանները փորձել են Եդիգարյան եղբայրներին նստեցնել մեքենա, սակայն վերջիններս չեն ենթարկվել և դիմադրել են: Մոտ 5 րոպեից ոստիկաններին հաջողվել է Եդիգարյան եղբայրներին նստեցնել մեքենան և տանել:
Վկա, ոստիկանության Քանաքեռ-Զեյթուն բաժնի պետի օպերատիվ գծով տեղակալ Արմեն Նորիկի Բեգլարյանը նախնական քննության ընթացքում ցուցմունք է տվել այն մասին, որ 2010թ. մայիսի 9-ին, ժամը 2130-ի սահմաններում, ահազանգ է ստացվել ոստիկանության բաժնի հերթապահ մաս այն մասին, որ ՙ24-ի կռուգում՚ գտնվող դպրոցի մոտ վիճաբանություն է: Ոստիկանության բաժնի օպերատիվ հերթապահն անմիջապես դեպքի վայր է ուղարկել տեղամասային տեսուչներ Նիկոլայ Մարգարյանին և Արտյոմ Հաբեթյանին: Քիչ անց նրանք զանգահարել են ոստիկանության բաժին և օգնություն խնդրել: Անմիջապես դեպքի վայր են մեկնել ինքն ու ոստիկանության բաժնի պետի ծառայության գծով տեղակալ Աշոտ Ղամբարյանը, միաժամանակ հանձնարարելով օպերատիվ հերթապահին ոստիկանության բաժնի մի քանի աշխատակիցներ էլ ուղարկել դեպքի վայր: Այդ ժամանակ Ա.Ղամբարյանը եղել է ոստիկանության համազգեստով, իսկ ինքը` քաղաքացիական հագուստով: Հասնելով դեպքի վայր, Պ.Սևակի փողոցի 106 շենքի մոտ գտնվող ՙԳուրման՚ կոչվող խորտկարանի դիմաց տեսել են, որ մոտ 20-25 տարեկան մի երիտասարդ քաշքշուկ է տեղամասային տեսուչ Ն.Մարգարյանին և վիճաբանում նրա ու Ա.Հաբեթյանի հետ: Տեղամասային տեսուչները փորձել են նրան կարգի հրավիրել, սակայն վերջինս եղել է հարբած վիճակում և չի ենթարկվել նրանց: Մոտենալով նրանց, Ա.Ղամբարյանը պահանջել է այդ երիտասարդից դադարեցնել վեճն ու քաշքշուկը և նրա հետ մտել է խորտկարանի առանձնասենյակ: Նրանց հետևից առանձնասենյակ են մտել նաև Ն.Մարգարյանը և Ա.Հաբեթյանը, իսկ ինքը մնացել է դրսում, սակայն տեսել է, որ առանձնասենյակում մի խումբ տղաներ կան: Քիչ անց լսել է վիճաբանության ձայներ և զանգահարել ոստիկանության բաժին և լրացուցիչ ուժեր խնդրել օպերատիվ հերթապահից, ով պատասխանել է, որ արդեն ուղարկել է: Այդ ժամանակ երկու երիտասարդ, քաշքշելով Ա.Ղամբարյանին, Ն.Մարգարյանին և Ա.Հաբեթյանին, դուրս են եկել խորտկարանից: Դրսում այդ երիտասարդները շարունակել են քաշքշել, նաև սկսել են հայհոյանքներ տալ և հարվածել ոստիկաններին, որի ընթացքում պատռել են տեղամասային տեսուչ Ա.Հաբեթյանի համազգեստի վերնաշապիկը: Ինքը միջամտել է, փորձել կարգի հրավիրել նրանց, բայց նրանք չեն ենթարկվել ու շարունակել են քաշքշել, հայհոյել ու հարվածել ոստիկանության աշխատակիցներին: Քիչ անց եկել են ոստիկանության բաժնի օպեր-լիազորներ Հարություն Քարտաշյանը և Վաչե Մալաքյանը, ում օգնությամբ կարողացել են այդ երիտասարդներին նստեցնել Ա.Ղամբարյանի ծառայողական ՎԱԶ 2107 մակնիշի 182ՈՍ02 պ/հ ավտոմեքենան ու տանել ոստիկանության բաժին: Այնտեղ պարզվել է, որ այդ երիտասարդները հանդիսանում են Ահարոն և Արթուր Ռաշիդի Եդիգարյանները, ովքեր բաժնում շարունակել են հայհոյանքներ տալ, իսկ Ահարոն Եդիգարյանը նույնիսկ շարունակել է քաշքշել ու հարվածել ոստիկաններին:
Վկա, ոստիկանության Քանաքեռ-Զեյթուն բաժնի ՔՀԲ օպեր-լիազոր Հարություն Արկադիի Քարտաշյանը նախնական քննության ընթացքում ցուցմունք է տվել այն մասին, որ 2010թ. մայսիս 9-ին գտնվել է ՙՀաղթանակ՚ զբոսայգում ծառայության մեջ: Ժամը 2130-ի սահամններում ոստիկանության բաժնի օպերատիվ հերթապահը զանգահարել է իրեն և հայտնել, որ ՙ24-ի կռուգում՚ գտնվող դպրոցի մոտ կռիվ է, դեպքի վայր է ուղարկում տեղամասային տեուչներին, որ իրենք էլ գնան այդ հասցեով: Օպեր-լիազոր Վաչե Մալաքյանի հետ գնացել են նշված հասցե, որտեղ Պ.Սևակի 106 շենքի հարևանությամբ գտնվող ՙԳուրման՚ կոչվող խորտկարանի մոտ տեսել են, որ 2 երիտասարդ քաշքշուկ ու հարվածում են ոստիկանության բաժնի պետի տեղակալ Աշոտ Ղամբարյանին, տեղամասային տեսուչներ Նիկոլայ Մարգարյանին և Արտյոմ Հաբեթյանին, ովքեր երեքն էլ եղել են ոստիկանության համազգեստով: Վ.Մալաքյանի հետ միջամտել են, ներկայացել, որ ոստիկանության բաժնի քրեական հետախուզության բաժանմունքի աշխատակիցներ են և փորձել են այդ 2 երիտասարդին հանդարտեցնել, սակայն նրանք չեն ենթարկվել իրենց ու շարունակել են քաշքշուկը: Մի կերպ կարողացել են այդ 2 երիտասարդին նստեցնել Ա.Ղամբարյանի ծառայողական ՎԱԶ 2107 նակնիշի 182ՈՍ02 պ/հ ավտոմեքենան և տանել ոստիկանության բաժին, որտեղ պարզվել է, որ այդ երիտասարդները հանդիսանում են եղբայրներ Արթուր և Ահարոն Ռաշիդի Եդիգարյանները; Վերջիններս ոստիկանության բաժնում շարունակել են հայհոյանքներ տալ ոստիկանների հասցեին, Ահարոն Եդիգարյանը շարունակել է քաշքշել ոստիկաններին:
Վկա, ոստիկանության Քանաքեռ-Զեյթուն բաժնի ՔՀԲ-ի օպեր-լիազոր Մանվել Հրանտի Ասպատուրյանը ցուցմունք է տվել այն մասին, որ 2010թ. մայիսի 9-ին գտնվել է ծառայության մեջ ՙՀաղթանակ՚ զբոսայգում: Ժամը 22-ի սահմաններում գալով ոստիկանության բաժին տեսել է, որ ոստ. բաժին բերման ենթարկված Արթուր և Ահարոն Եդիգարյանները բաժնի շենքում տալիս են հայհոյանքներ, Ահարոն Եդիգարյանը նույնիսկ քաշքշուկ ու հարվածում է ոստիկաններին, ովքեր փորձում են նրան կարգի հրավիրել: Իմացել է նաև, որ ժամը 2130-ին ահազանգ է ստացվել ոստիկանություն այն մասին, որ Պ.Սևակ 106 շենքի մոտ վիճաբանություն է: Դեպքի վայր են մեկնել տեղամասային տեսուչներ Արտյոմ Հաբեթյանը և Նիկոլայ Մարգարյանը, այնուհհետև նաև` բաժնի պետի տեղակալներ Աշոտ Ղամբարյանը և Արմեն Բեգլարյանը: Տեղում` Պ.Սևակի փողոցի 106 շենքի դիմաց գտնվող խորտկարանի մոտ, Եդիգարյան եղբայրները վիճաբանության մեջ են մտել ոստիկանության նշված աշխատակիցների հետ, չեն ենթարկվել նրանց օրինական պահանջներին, տվել են հայհոյանքներ և բռնություն գործադրել նրանց նկատմամբ:
Դատական քննության ժամանակ Մանվել Ասպատուրյանը ցուցմունք տվեց, որ ամբաստանյալներին տեսել է բաժին բերվելուց հետո: Ոստիկանության աշխատողներին քաշքշուկ և չէր ենթարկվում Ահարոնը: Ահարոնը խմիչքի ազդեցության տակ չէր հասկանում, թե ինչ է անում: Հաջորդ օրը երբ շփվել է նրա հետ վերջինս չէր հիշում իր կատարած արարքը: Չի հիշում նա հայհոյել է, թե ոչ: Ինքը տեսել է, որ Արտյոմի վերնաշապիկը պատռված էր, իսկ մյուս ոստիկանների վնասվածքներից տեղյակ չէ:
Վկա, ոստիկանության Քանաքեռ-Զեյթուն բաժնի ՔՀԲ-ի օպեր-լիազոր Արման Ժիրայրի Քոչարյանը նախնական քննության ընթացքում ցուցմունք է տվել այն մասին, որ 2010թ. մայիսի 9-ին ծառայության մեջ է գտնվել ՙՀաղթանակ՚ զբոսայգում: Ժամը 22-ի սահմաններում գալով ոստիկանության բաժին տեսել է, որ ոստիկանության բաժին բերման ենթարկված Արթուր և Ահարոն Եդիգարյանները բաժնի շենքում տալիս են հայհոյանքներ, Ահարոն Եդիգարյանը նաև հարձակվում է ոստիկանության աշխատակիցների վրա, քաշքշուկ ու հարվածում է ոստիկաններին, ովքեր փորձում են նրան կարգի հրավիրել: Իմացել է նաև, որ ժամը 2130-ին ահազանգ է ստացվել ոստիկանություն այն մասին, որ Պ.Սևակի փողոցի 106 շենքի մոտ վիճաբանություն է, դեպքի վայր են մեկնել տեղամասային տեսուչներ Արտյոմ Հաբեթյանը և Նիկոլայ Մարգարյանը, որից հետո նաև ոստիկանության բաժնի պետի տեղակալներ Աշոտ Ղամբարյանը և Արմեն Բեգլարյանը: Տեղում, Պ.Սևակի փողոցի 106 շենքի դիմաց գտնվող խորտկարանի մոտ Եդիգարյան եղբայրները վիճաբանության մեջ են մտել ոստիկանության վերը նշված աշխատակիցների հետ, չեն ենթարկվել նրանց օրինական պահանջներին, տվել հայհոյանքներ և բռնություն են գործադրել նրանց նկատմամբ:
Վկա Արամայիս Տիգրանի Մկրտչյանը նախնական քննության ընթացքում ցուցմունք է տվել այն մասին, որ 2010թ. մայիսի 9-ին իր համակուրսեցի Տիգրանի հոր` Զեյթուն թաղամասում գտնվող ՙԳուրման՚ խորտկարանում Արսենի, Նարեկի, Հրանտի, Արթուրի, Ահարոնի, Արմենի և Գրիգորի հետ նշել են Արսենի ծննդյան տարեդարձը: Ժամը 2130-ի սահմաններում դրսից բարձ ձայներ են լսել և դուրս եկել: Նկատել է, որ մեծ խառնաշփոթ և վեճ է, մի երիտասարդ գոռգոռում և վիճաբանում է իր ընկերների հետ: Այնուհհետև, տեսել է, որ այդ երիտասարդը ընկած է գետնին, բայց չի նկատել, թե ով է հարվածել նրան: Դրանից հետո, նկատել է, որ իր համակուրսեցի Տիգրանի հայրը` Արթուրը, մտել է ամբոխի մեջ և փորձել է ցրել վեճը ու իրենց տարել է խորտկարանի առանձնասենյակ: Մոտ 5 րոպե անց, իրենց առանձնասենյակ են մտել ոստիկանության համազգեստով 2 ոստիկան և հարցուփորձ են արել, թե ինչ է կատարվել: Մի քանի րոպե հետո առանձնասենյակ է մտել ևս 1 ոստիկան և հարցրել է, թե ինչ է կատարվում: Արթուր Եդիգարյանը պատասխանել է, որ իրենց ընկերոջ ծնունդն են նշում: Արթուրի խոսելու տոնից ոստիկանը զայրացել է: Այդ պահին Ահարոն Եդիգարյանը ոստիկանին ասել է, որ չբղավի եղբոր վրա ու ինքը զգալով, որ ոստիկանների ու Եդիգարյան եղբայրների միջև կոնֆլիկտ է սկսվում Արսենի և Նարեկի հետևից գնացել է վերջիններիս արագացնելու: Նրանք գնացած են եղել հաշիվը փակելու: Հաշիվը փակելուց հետո, դրսում տեսել է, որ ոստիկանների և Եդիգարյան եղբայրների միջև քաշքշուկ է, ոստիկանները փորձում են Եդիգարյան եղբայրներին նստեցնել մեքենան: Մոտ 10 րոպե հետո ոստիկաններին հաջողվել է Եդիգարյան եղբայրներին նստեցնել մեքենան և տանել:
Վկա Արսեն Գրիշայի Մանուչարյանը ցուցմունք տվեց այն մասին, որ 2010թ. մայիսի 9-ին իր համակուրսեցի Տիգրանի հոր` Զեյթուն թաղամասում գտնվող ՙԳուրման՚ խորտկարանում Արամայիսի, Նարեկի, Հրանտի, Արթուրի, Ահարոնի, Արմենի և Գրիգորի հետ նշել են իր ծննդյան տարեդարձը: Ժամը 2100-ի սահմաններում ինքը, Նարեկը, Արամայիսը, Արմենը խորտկարանում են եղել, իսկ մնացածը դուրս են եկել ծխելու: Մոտ 5 րոպեից դրսից վիճաբանության ձայներ են լսել: Դուրս գալով նկատել է, որ մի երիտասարդ բղավում և վիճաբանում է իր ընկերներից մեկի հետ, սակայն չի նկատել, թե կոնկրետ ում հետ: Դրանից հետո մարդիկ են հավաքվել ու խառնաշփոթ է սկսվել: Լսել է բարձր գոռգոռոցներ ու հայհոյանքներ: Դրանից հետո, նկատել է իր կուրսեցի Տիգրանի հորը, ով իրենց տարել է խորտկարանի առանձնասենյակ: Մոտ 5 րոպե անց, իրենց առանձնասենյակ են մտել ոստիկանության համազգեստով 2 ոստիկան և հարցուփորձ արել, թե ինչ վեճ է եղել: Մի քանի րոպե հետո առանձնասենյակ է մտել ոստիկանության փոխգնդապետի համազգեստով ոստիկան և հարցրել է, թե ինչ է կատարվել: Արթուր Եդիգարյանը պատասխանել է, որ ոչ մի բան չի պատահել, իրենց ընկերոջ ծնունդն են նշում: Արթուրի խոսելու տոնից ոստիկանը զայրացել է: Այդ պահին Ահարոն Եդիգարյանը ոստիկանին ասել է, որ չբղավի եղբոր վրա ու ինքը զգալով, որ ոստիկանների ու Եդիգարյան եղբայրների միջև կոնֆլիկտ է սկսվում, Արսենին և Նարեկին արագացնելու նպատակով գնացել է նրանց հետևից, ովքեր գնացած են եղել հաշիվը փակելու: Հաշիվը փակելուց հետո, դրսում տեսել է, որ ոստիկանների և Եդիգարյան եղբայրների միջև քաշքշուկ է, ոստիկանները փորձում են Եդիգարյան եղբայրներին նստեցնել մեքենան, իսկ նրանք դիմադրում են: Մոտ 10 րոպե հետո ոստիկաններին հաջողվել է Եդիգարյան եղբայրներին նստեցնել մեքենան և տանել ոստիկանություն:
Դատարանը գնահատելով վկաներ Կարինե Հախունցի, Հրանտ Դանիելյանի, Նարեկ Թորոսյանի դատական քննության ժամանակ տված ցուցմունքները, գտնում է որ արժանահավատ պետք է համարել նրանց նախնական քննության ընթացքում տված ցուցմունքները, քանի որ ամբաստանյալները Կ.Հախունցի որդու համակուրսեցիներն են, իսկ Հ.Դանիելյանի և Ն.Թորոսյանի ընկերներն են: Նրանք ցանկանում են այդ եղանակով մեղմել ամբաստանյալների պատասխանատվությունն ու պատիժը:
Դատաբժշկական փորձաքննության 27.05.2010թ. թիվ 1066 եզրակացությամբ, համազայն որի, Է.Պետրոսյանի մարմնական վնասվածքները` որովայնի, ստորին վերջույթների շրջանների քերծվածքների, աջ ակնակապճի շրջանի արյունազեղման, ենթամաշկային արյունահավաքի ձևով, հասցվել են բութ կոշտ առարկաներով, հնարավոր է որոշման մեջ նշված ժամկետում, որոնք առաջացրել են առողջությանը թեթև վնաս` առողջության կարճատև քայքայումով:
Դատաբժշկական փորձաքննության 27.05.2010թ. թիվ 1137 եզրակացությամբ, համազայն որի, Ա.Ղամբարյանի մարմնական վնասվածքները` ձախ դաստակի, սրունքի, աջ ազդրի շրջանների քերծվածքների, արյունազեղման ձևով, հասցվել են բութ կոշտ առարկաներով, հնարավոր է նշված ժամկետում և որոշման մեջ նշված հանգամանքներում, որոնք ինչպես առանձին-առանձին, այնպես էլ միասին վերցրած` առողջության թեթև վնասի հատկանիշներ չեն պարունակում:
Իրեղեն ապացույց ճանաչված, ոստիկանական համազգեստի վերնաշապիկով, այն ներկայացնելու ու զննելու մասին արձանագրությունով, իրեղեն ապացույց ճանաչելու մասին որոշումով:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արթուր Ռաշիդի Եդիգարյանին առաջադրված մեղադրանքը ՀՀ քրեական օրենսգրքի 316 հոդվածի 1-ին մասով, 258 հոդվածի 2-րդ մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 316 հոդվածի 1-ին մասի, 258 հոդվածի 2-րդ մասի հատկանիշներին և արարքի որակումը ճիշտ է:
Ամբաստանյալ Ահարոն Ռաշիդի Եդիգարյանին առաջադրված մեղադրանքը ՀՀ քրեական օրենսգրքի 316 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 316 հոդվածի 1-ին մասի հատկանիշներին և արարքի որակումը ճիշտ է:
Ամբաստանյալներ Արթուր Եդիգարյանի և Ահարոն Եդիգարյանի նկատմամբ պատիժ նշանակելիս, դատարանը հաշվի է առնում նրանց կատարած արարքի հանրության համար վտանգավորության աստիճանը, ինչպես նաև հանցավորների անձը:
Որպես ամբաստանյալ Արթուր Եդիգարյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, 3-րդ կուրսի ուսանող է, բնութագրվում է դրական, հայրը զոհվել է 1992թ. ԼՂՀ-ի Մարտակերտի շրջանում մարտական գործողությունների ժամանակ, հետմահու ՀՀ Նախագահի 2002թ. հրամանագրով պարգևատրվել է ՙԱրիության մեդալով՚:
Դատարանը որպես ամբաստանյալ Արթուր Եդիգարյանի պատասխանատվությունը և պատիժը ծանրացնող հանգամանք է դիտում հանցանքն ալկոհոլի ազդեցության տակ կատարելը:
Որպես ամբաստանյալ Ահարոն Եդիգարյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, 2010թ. ավարտել է ԵՊՀ-ի Ինֆորմատիկայի և կիրառական մաթեմատիկայի ֆակուլտետը, բնութագրվում է դրական, 2010թ. զորակոչվելու է բանակ, հայրը զոհվել է 1992թ. ԼՂՀ-ի Մարտակերտի շրջանում մարտական գործողությունների ժամանակ, հետմահու ՀՀ Նախագահի 2002թ. հրամանագրով պարգևատրվել է ՙԱրիության՚ մեդալով:
Դատարանը որպես ամբաստանյալ Ահարոն Եդիգարյանի պատասխանատվությունը և պատիժը ծանրացնող հանգամանք է դիտում հանցանքն ալկոհոլի ազդեցության տակ կատարելը:
Կատարած արարքների համար ամբաստանյալներ Արթուր Եդիգարյանը և Ահարոն Եդիգարյանը ենթակա են քրեական պատասխանատվության և պատժի:
Դատարանը, հաշվի առնելով ամբաստանյալ Արթուր Եդիգարյանի կատարած արարքի հանրության համար վտանգավորության աստիճանը և բնույթը, նրա անձը բնութագրող, պատասխանատվությունը և պատիժը մեղմացնող և ծանրացնող վերը նշված հանգամանքները, գտնում է, որ պատժի նպատակներին հասնելու համար Արթուր Եդիգարյանի նկատմամբ պատիժ պետք է նշանակել ազատազրկման ձևով, որը նա պետք է կրի:
Դատարանը հաշվի առնելով ամբաստանյալ Ահարոն Եդիգարյանի կատարած արարքի հանրության համար վտանգավորության աստիճանը և բնույթը, նրա անձը բնութագրող, պատասխանատվությունն ու պատիժը մեղմացնող և ծանրացնող վերը նշված հանգամանքները, ինչպես նաև այն, որ նույն գործով մյուս եղբայրն ազատազրկման է դատապարտվում, հանգում է հհետևության, որ Ահարոն Եդիգարյանի ուղղվելը հնարավոր է առանց պատիժը կրելու` պայմանականորեն պատիժը չկիրառելու պայմաններում:
Դատարանը նկատի ունենալով, որ տուժողի օրինական ներկայացուցիչ Սվետլանա Գրիգորյանը և տուժող Արտյոմ Հաբեթյանը հրաժարվել են քաղաքացիական հայցի պահանջից, գտնում է, որ այդ հարցը պետք է համարել լուծված:
Դատարանը գտնում է, որ դատարան չներկայացած տուժողներ Նիկոլայ Մարգարյանին և Աշոտ Ղամբարյանին պետք է քաղաքացիական դատավարության կարգով հայց ներկայացնելու իրավունք վերապահել:
Դատարանը քննության առնելով իրեղեն ապացույցների տնօրինման հարցը, գտնում է, որ իրեղեն ապացույց ճանաչված` տուժող Արտյոմ Հաբեթյանի կողմից ներկայացված ոստիկանական համազգեստի վերնաշապիկը պետք է վերադարձնել Ա.Հաբեթյանին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով դատարանը

Վ Ճ Ռ Ե Ց

Արթուր Ռաշիդի Եդիգարյանին մեղավոր ճանաչել ՀՀ քրեական օրենսգրքի 258 հոդվածի 2-րդ մասով և 316 հոդվածի 1-ին մասով:
ՀՀ քրեական օրենսգրքի 316 հոդվածի 1-ին մասով նրան դատապարտել ազատազրկման տաս (10) ամիս ժամկետով:
ՀՀ քրեական օրենսգրքի 258 հոդվածի 2-րդ մասով` ազատազրկման վեց (6) ամիս ժամկետով:
ՀՀ քրեական օրենսգրքի 66 հոդվածի հիման վրա, պատիժները մասնակի գումարելու սկզբունքով Արթուր Ռաշիդի Եդիգարյանի նկատմամբ վերջնական պատիժ նշանակել ազատազրկում մեկ (1) տարի ժամկետով:
Արթուր Ռաշիդի Եդիգարյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Պատժի սկիզբը հաշվել դատավճռի կատարման օրվանից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Ահարոն Ռաշիդի Եդիգարյանին մեղավոր ճանաչել ՀՀ քրեական օրենսգրքի 316 հոդվածի 1-ին մասով և նրան դատապարտել ազատազրկման մեկ (1) տարի ժամկետով:
Կիրառել ՀՀ քրեական օրենսգրքի 70 հոդվածը և Ահարոն Ռաշիդի Եդիգարյանի նկատմամբ ազատազրկման ձևով նշանակված պատիժը պայմանականորեն չկիրառել` սահմանելով փորձաշրջան մեկ (1) տարի ժամկետով:
Ահարոն Ռաշիդի Եդիգարյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Տուժողի օրինական ներկայացուցիչ Սվետլանա Գրիգորյանի և տուժող Ա.Հաբեթյանի քաղաքացիական հայցերի հարցը համարել լուծված:
Տուժողներ Նիկոլայ Մարգարյանին և Աշոտ Ղամբարյանին քաղաքացիական դատավարության կարգով հայց ներկայացնելու իրավունք վերապահել:
Իրեղեն պացույց ճանաչված, ոստիկանական համազգեստի վերնաշապիկը վերադարձնել տուժող Արտյոմ Հաբեթյանին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ