գործ N ԵԱՔԴ 0077/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ. Ավետիսյանի
քարտուղարությամբ` Ե. Կարապետյանի
մասնակցությամբ`
մեղադրող` Գ. Շահբազյանի
ամբաստանյալ` Ս. Վարդերեսյանի
պաշտպան` Է. Չինարյանի

2010թ. հուլիսի 17-ին, Երևան քաղաքում, դռնբաց դատական նիստում, արագացված դատաքննության կարգով, քննելով քրեական գործն ըստ մեղադրանքի Սարգիս Արայիկի Վարդերեսյանի, ծնված 01.03.1992թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, ֆիզիկապես առողջ, չի աշխատում, նախկինում չդատված, հաշվառված և բնակվում է Երևան քաղաքի Մամիկոնյանց փողոցի 29 շենքի թիվ 60 բնակարանում, մեղադրվում է ՀՀ քրեական օրենսգրքի 258 հոդվածի 3-րդ մասի 1-ին կետով,

Պ Ա Ր Զ Ե Ց
1.Գործի դատավարական նախապատմությունը.
2009թ. սեպտեմբերի 30-ին ՀՀ ոստիկանության ՔԳՎ Երևան քաղաքի ՔՎ Արաբկիրի քննչական բաժնում ՀՀ քրեական օրենսգրքի 258 հոդվածի 4-րդ մասի հատկանիշներով հարուցվել է թիվ 14131409 քրեական գործը:
2010թ. հունիսի 04-ին Սարգիս Արայիկի Վարդերեսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 258 հոդվածի 3-րդ մասի 1-ին կետով, նրա նկատմամբ որպես խափանման միջոց է ընտրվել ստորագրություն չհեռանալու մասին:
Նախաքննական մարմնի 2010թ. հունիսի 03-ի որոշմամբ Վաղարշակ Առաքելյանի, Արմեն Ասատրյանի, Դավիթ Հովսեփյանի, Արմեն Խաչատրյանի նկատմամբ քրեական հետապնդում չի իրականացվել` Սարգիս Վարդերեսյանի բողոքի բացակայության հիմքով:
Նախաքննական մարմնի 2010թ. հունիսի 03-ի որոշմամբ Վաղարշակ Առաքելյանի, Արթուր Շիպակցյանի և Հովհաննես Մկոյանի նկատմամբ քրեական հետապնդում չի իրականացվել` նրանց արարքում հանցակազմի բացակայության հիմքով:
Նախաքննական մարմնի 2010թ. հունիսի 10-ի որոշմամբ թիվ 14131409 քրեական գործից ՀՀ քրեական օրենսգրքի 258 հոդվածի 4-րդ մասի հանտկանիշներով մաս է անջատվել` շնորհելով թիվ 14116110 համարը:
2010թ. հունիսի 17-ին թիվ 14131409 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2010թ. հունիսի 18-ին քրեական գործն ընդունվել է վարույթ և նշանակվել դատական քննության 2010թ. հուլիսի 12-ին:
2.Գործի փաստական հանգամանքները.
Նախաքննության մարմինն ամբաստանյալ Սարգիս Արայիկի Վարդերեսյանին մեղադրանք է առաջադրել հետևյալ արարքի համար.
Սարգիս Վարդերեսյանը 2009թ. սեպտեմբերի 10-ին, ժամը 12-ի սահմաններում, Երևան քաղաքի Մամիկոնյանց փողոցի 52 հասցեում գործող Ինֆորմատիկայի պետական քոլեջի դիմաց, դասամիջոցի ժամանակ, դրսում գտնվող բազմաթիվ ուսանողների ներկայությամբ, գործով չպարզված մի խումբ ամձանց հետ կատարել է խուլիգանություն, այն է` կոպիտ կերպով խախտելով հասարակական կարգը և ցուցաբերելով բացահայտ անհարգալից վերաբերմունք հասարակության նկատմամբ, շուրջ 5 րոպե տևողությամբ վիճաբանել է Վաղարշակ Առաքելյանի, Արթուր Շիպակցյանի և Հովհաննես Մկոյանի հետ, որի ընթացքում տվել է լկտի հայհոյանքներ, ձեռքով և ոտքով հարվածներ է հասցրել Վաղարշակ Առաքելյանին:
3. Արագացված դատական քննություն .
Մինչև դատաքննությունն սկսելն ամբաստանյալ Սարգիս Վարդերեսյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքի հետ, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատել է նաև ամբաստանյալի պաշտպան Է.Չինարյանը:
Մեղադրող Գ.Շահբազյանը դատական քննության արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
3.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սարգիս Արայիկի Վարդերեսյանին առաջադրված մեղադրանքը ՀՀ քրեական օրենսգրքի 258 հոդվածի 3-րդ մասի 1-ին կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 258 հոդվածի 3-րդ մասի 1-ին կետի հատկանիշներին և արարքի որակումը` ճիշտ է:
Ամբաստանյալ Սարգիս Վարդերեսյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, հանցանքը կատարելու պահին անչափահաս է եղել, նախկինում դատված չի եղել, զորակոչվելու է ՀՀ զինված ուժեր:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Սարգիս Արայիկի Վարդերեսյանը ենթակա է քրեական պատասխանատվության և պատժի:
Դատարանը, նկատի ունենալով, որ պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ ամբաստանյալի նկատմամբ պատիժ պետք է նշանակել տուգանքի ձևով:
Դատարանը գտնում է, որ դատարան չներկայացած տուժողներ Վաղարշակ Առաքելյանին, Արթուր Շիպակցյանին և Հովհաննես Մկոյանին պետք է քաղաքացիական դատավարության կարգով հայց ներկայացնելու իրավունք վերապահել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Սարգիս Արայիկի Վարդերեսյանին մեղավոր ճանաչել ՀՀ քրեական օրենսգրքի 258 հոդվածի 3-րդ մասի 1-ին կետով և նրան դատապարտել տուգանքի երկու հարյուր հազար (200.000) ՀՀ դրամի չափով:
Սարգիս Վարդերեսյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Տուժողներ Վաղարշակ Առաքելյանին, Արթուր Շիպակցյանին և Հովհաննես Մկոյանին քաղաքացիական դատավարության կարգով հայց ներկայացնելու իրավունք վերապահել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակաման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ