Գործ ԵԱՔԴ/0072/01/10







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

18 սեպտեմբերի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

Նախագահությամբ դատավոր` Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ`
Մեղադրող` Ա.Աղայանի
Պաշտպաններ` Վ.Գրիգորյանի
Ն.Պետրոսյանի
Տուժողներ` Վ.Սարգսյանի
Հ.Ամիրաքյանի
Ս.Փարեմուզյանի
Մ.Մնացականյանի

2010 թվականի սեպտեմբերի 18-ին, դռնբաց դատական նիստում քննության առավ քրեական գործն ըստ մեղադրանքի
1. Ռուբեն Գրիգորիի Ամատունու, ծնված 04.06.1986 թվականին, ք.Երևանում, ազգությամբ հայ, ՀՀ քաղաքացի, միջնակարգ կրթությամբ, ամուրի, նախկինոում չդատված, չի աշխատում, հաշվառված է ք.Երևան Կոմիտաս 42 շենք 52 բնակարանում, փաստացի բնակվում է ք.Երևան Յան Ռայնիսի 13 շենք 31 բնակարանում, նրա նկատմամբ որպես խափանման միջոց է ընտրվել կալանավորումը, կալանքի տակ է 28.01.2010 թվականից, մեղադրվում է ՀՀ քրեական օրենսգրքի 175-րդ հոդվածի 2-րդ մասի 5-րդ կետով, 34-176-րդ հոդվածի 2-րդ մասի 5-րդ կետով և 35-175-րդ հոդվածի 2-րդ մասի 1-ին և 5-րդ կետերով:
2. Տիգրան Էդիկի Թաթոսյանի, ծնված 04.10.1980թվականին, ք.Երևանում, ազգությամբ հայ, ՀՀ քաղաքացի, բարձրագույն կրթությամբ, ամուրի, նախկինոում չդատված, աշխատում է ՙՄետելիցա՚ սրճարանում որպես ավագ բարմեն, հաշվառված է և բնակվում է ք.Երևան Կիլիկիա 1-ին փողոց 18 տանը, նրա նկատմամբ որպես խափանման միջոց է ընտրվել ստորագրությունը չհեռանալու մասին, մեղադրվում է ՀՀ քրեական օրենսգրքի 335-րդ հոդվածի 1-ին մասով և 35-175-րդ հոդվածի 2-րդ մասի 1-ին կետով:
Դատաքննությամբ դատարանը հիմնավորված համարեց հետևյալը:
Նախաքննության մարմինը` Ռուբեն Գրիգորիի Ամատունուն ՀՀ քրեական օրենսգրքի 175-րդ հոդվածի 2-րդ մասի 5-րդ կետով, 34-176-րդ հոդվածի 2-րդ մասի 5-րդ կետով և 35-175-րդ հոդվածի 2-րդ մասի 1-ին և 5-րդ կետերով մեղադրանք է առաջադրել հետևյալ արարքի համար. ըր նա ՙ2010թ. հունվարի 8-ին, ժամը 06.00-ի սահմաններում, դիմակավորված գնացել է Երևան քաղաքի Մյասնիկյան պող. 20ա հասցեում գտնվող ՙԱրաքս՚ բենզալցակայան, որտեղ կրակայրիչ-ատրճանակը պահելով նույն բենզալցակայանի աշխատակից Վահե Սարգիսի Սարգսյանի վրա, նրա կյանքի և առողջության համար վտանգավոր բռնություն գործադրելու սպառնալիքով, ավազակային հարձակմամբ, հափշտակել է զգալի չափերի հասնող 143.000 ՀՀ դրամ գումար:

Այնուհետև, կրկին անգամ, 2010թ. հունվարի 13-ին, ժամը 08.00-ի սահմաններում, գնացել է Դ.Անհաղթ փող. 10/1 հասցեում գտնվող ՙԼիդեր՚ բենզալցակայան, որտեղ կրակայրիչ-ատրճանակը ցուցադրելով բենզալցակայանի աշխատակից Հարություն Մամիկոնի Ամիրաքյանից փորձել է բացահայտ հափշտակել նրա մոտ եղած գումարը, սակայն տեսնելով, որ վերջինս իր սպառնալիքն ու պահանջը լուրջ չի ընդունում, հրաժարվում է գումար տալ, իսկ այնուհետև էլ հանդիպելով նրա դիմադրությանը, իր կամքից անկախ հանգամանքներում ավարտին չի հասցրել հանցագործությունը և դիմել է փախուստի:
Որից հետո, կրկին անգամ, 2010թ. հունվարի 15-ին, ժամը 08.00-ի սահմաններում, դիմակավորված մուտք է գործել Երևան քաղաքի Սայաթ-Նովա 26 հասցեում գտնվող ՙԴոկա-Պիցցա՚ բար, որտեղ կրակայրիչ-ատրճանակը պահելով նշված բարի բարմեն Սենիկ Ֆրունզիկի Փարեմուզյանի վրա, նրա կյանքի և առողջության համար վտանգավոր բռնություն գործադրելու սպառնալիքով, ավազակային հարձակմամբ, փորձել է հափշտակել նրա մոտ եղած գումարը, սակայն վերջինիս բարձրացրած աղմուկի հետևանքով դիմել է փախուստի:
Այնուհետև, 2010թ. հունվարի 27-ին, Տիգրան Էդիկի Թաթոսյանի հետ միասին նախնական համաձայնության են եկել և նախապատրաստվել ավազակային հարձակում կատարել Ազատության պող. 12/2 հասցեում գտնվող ՙՌԱՆԳԱ՚ ՍՊԸ-Ի խանութի վրա, նախապես ուսումնասիրել է տեղանքը, որոշել են օգտագործել իր կողմից արդեն իսկ պատրաստված դիմակը և իր կրակայրիչ-ատրճանակը, իրար մեջ բաժանել յուրաքանչյուրի գործողությունները, որից հետո, 28.01.2010թ. ժամը 04-ի սահմաններում գնացել են Ազատության պող. 12/2 հասցեում գտնվող ՙՌԱՆԳԱ՚ ՍՊԸ-ի խանութի մոտ` ավազակությունը կատարելու, սակայն խանութը փակ լինելու պատճառով չեն կարողացել իրականացնել ավազակային հարձակումը` իրենց կամքից անկախ հանգամանքներում ավարտին չհասցնելով հանցագործությունը, որից հետո բերման են ենթարկվել ոստիկանության բաժին՚:
Մեղադրյալ Տիգրան Էդիկի Թաթոսյանին ՀՀ քրեական օրենսգրքի 335-րդ հոդվածի 1-ին մասով և 35-175-րդ հոդվածի 2-րդ մասի 1-ին կետով մեղադրանք է առաջադրել այն բանի համար, որ նա ՙհաստատապես իմանալով, որ Ռուբեն Գրիգորիի Ամատունին նախապատրաստվում է կատարել ծանր հանցագործություններ, այն է իր կողմից կտորե գլխարկից պատրաստված դիմակի և կրակայրիչ-ատրճանակի օգտագործմամբ կատարել ավազակային հարձակումներ, այդ մասին չի հայտնել իրավապահ մարմիններին: Այսպես.
2010թ. հունվարի 7-ին, հաստատապես իմանալով, որ Ռուբեն Գրիգորիի Ամատունին նախապատրաստվում է հունվարի 8-ի գիշերը ավազակային հարձակում կատարել Երևան քաղաքի Մյասնիկյան պող. 20ա հասցեում գտնվող ՙԱրաքս՚ բենզալցակայանում, այդ մասին չի հայտնել իրավապահ մարմիններին:
Այնուհետև, 2010թ. հունվարի 12-ին, հաստատապես իմանալով, որ Ռուբեն Գրիգորիի Ամատունին նախապատրաստվում է հունվարի 13-ի առավոտյան ավազակային հարձակում կատարել Երևան քաղաքի Դ.Անհաղթ փող. 10/1 հասցեում գտնվող ՙԼիդեր՚ բենզալցակայանում, այդ մասին չի հայտնել իրավապահ մարմիններին:
Որից հետո, 2010թ. հունվարի 14-ին, հաստատապես իմանալով, որ Ռուբեն Գրիգորիի Ամատունին նախապատրաստվում է հունվարի 15-ի գիշերը ավազակային հարձակում կատարել Երևան քաղաքի Սայաթ-Նովա 26 հասցեում գտնվող ՙԴոկա-Պիցցա՚ բարում, այդ մասին չի հայտնել իրավապահ մարմիններին:
Այնուհետև, 2010թ. հունվարի 27-ին, Ռուբեն Գրիգորիի Ամատունու հետ միասին նախնական համաձայնության են եկել և նախապատրաստվել ավազակային հարձակում կատարել Ազատության պող. 12/2 հասցեում գտնվող ՙՌԱՆԳԱ՚ ՍՊԸ-Ի խանութի վրա, Ռ.Ամատունին նախապես ուսումնասիրել է տեղանքը, որոշել են օգտագործել Ռ.Ամատունու կողմից արդեն իսկ պատրաստված դիմակը և նրա կրակայրիչ-ատրճանակը, իրար մեջ բաժանել յուրաքանչյուրի գործողությունները, որից հետո, 28.01.2010թ. ժամը 04-ի սահմաններում գնացել են Ազատության պող. 12/2 հասցեում գտնվող ՙՌԱՆԳԱ՚ ՍՊԸ-Ի խանութի մոտ` ավազակությունը կատարելու, սակայն խանութը փակ լինելու պատճառով չեն կարողացել իրականացնել ավազակային հարձակումը` իրենց կամքից անկախ հանգամանքներում ավարտին չհասցնելով հանցագործությունը, որից հետո բերման են ենթարկվել ոստիկանության բաժին՚:
ՀՀ քր. օր-ի 175 հոդ. 2-րդ մասի 5-րդ կետով, 34-176 հոդ. 2-րդ մասի 5-րդ կետով և 35-175 հոդ. 2-րդ մասի 1-ին և 5-րդ կետերով առաջադրված մեղադրանքում Ռուբեն Գրիգորիի Ամատունին իրեն մեղավոր է ճանաչել լիովին և խոստովանական ցուցմունքներ տվել այն մասին, որ հաշվառված է Կոմիտաս 42 շենքի 52 բնակարանում, սակայն 2009թ. սեպտեմբեր ամսից ժամանակավոր բնակվում է ընկերոջª Արմեն Մանասյանի Երևանի, Յան Ռայնիսի 13շենքի 31բնակարանում, քանի որ Ա.Մանասյանը բացակայում է ՀՀ-ից, իսկ իր Կոմիտաս 42 շենքի 52 բնակարանում չի կարող բնակվել, քանի որ բնակարանի շուրջ առկա է վեճ իր և ազգականների միջև£ Ընկերը` Տիգրան Թաթոսյանը հաճախ այցելել է իրեն, ինչպես նաև գիշերել այդ տանը: 2009թ. դեկտեմբերի սկզբներին աշխատանքի է ընդունվել ՙԱլեքս՚ տաքսի ծառայությունում որպես վարորդ: Դեկտեմբերի 29-ին, երեկոյան, հերթական պատվերը կատարելու ժամանակ, իրեն ամրակցված ՙՌենո՚ մակնիշի ավտոմեքենայով, Երևանի, Խանջյան փողոցով երթևեկելիս քնել է ղեկին և այդ պատճառով ավտոմեքենան դուրս է եկել երթևեկության հանդիպակած գոտի և բախվել է ՙՏոյոտա Պրադո՚ մակնիշի ավտոմեքենային: Նշված մեքենայի վարորդի` Ասքանազ Ավետիսյանի հետ պայմանավորվել է, որ կկատարի վերանորոգման ծախսերը, սակայն այդ պահին գումար չի ունեցել, ուստի ավտոմեքենայի նորոգման ծախսերը կատարել է Ա.Ավետիսյանը և ինքը նրան պարտք է մնացել 110.000 ՀՀ դրամ: Բացի այդ, իր վարած ՙՌենո՚ մակնիշի տաքսի մեքենայի նորոգման համար էլ տաքսի ծառայությանը պարտք է մնացել 70.000 ՀՀ դրամ և ազատվել աշխատանքից: Դրանից հետո, չունենալով աշխատանք և չկարողանալով մարել պարտքերը, 2010թ. հունվարի սկզբներին որոշել է ավազակային հարձակում կատարել և այդ նպատակով իր ձմեռային կտորե գլխարկից պատրաստել է դիմակ, իսկ հարձակման ժամանակ որոշել է օգտագործել իր կրակայրիչ-ատրճանակը: 2010թ. հունվարի 7-ին, երբ Տ.Թաթոսյանը գտնվել է իր հետ Յան Ռայնիսի 13շենքի 31բնակարանում, նրան պատմել է, որ որոշել է հունվարի 8-ի առավոտյան ավազակային հարձակում կատարել Մյասնիկյան պողոտայի վրա գտնվող ՙԱրաքս՚ բենզալցակայանի վրա, քանի որ նախկինում աշխատել է այդ բենզալցակայանում, լավ ծանոթ է տեղանքին և գիտի, որ հերթափոխը ավարտվելու ժամանակ աշխատակիցների մոտ բավականին գումար է կուտակվում: Տ.Թաթոսյանին ցույց է տվել նաև իր կրակայրիչ-ատրճանակը և գլխարկից պատրաստած դիմակը: Դրանից հետո, գիշերը ժամը 04.00-ի սահմաններում, վերցնելով դիմակը և կրակայրիչ-ատրճանակը, դուրս է եկել տանից, փողոցից պատահական տաքսի է կանգնեցրել ու դրանով գնացել Մյասնիկյան պողոտա, որտեղ տաքսի ավտոմեքենայից իջել է ՙԱրաքս՚ բենզալցակայանից մոտ 100 մետր ներքև, փողոցի վրա ու ոտքով մոտեցել բենզալցակայանին: Հասնելով շինության մոտ, հագել է դիմակը, կրակայրիչ-ատրճանակը բռնելով աջ ձեռքում մոտեցել է սենյակին ու տեսել, որ ներսում 2 աշխատակից են, որոնցից մեկը քնած է, իսկ մյուսը նստած է աթոռին: Ատրճանակը պահելով այնպես, որ աշխատողը տեսնի դա, պահանջել է նրա մոտ եղած գումարը տալ իրեն: Աշխատողը բացել է մետաղյա պահարանը հանել գումար, իսկ ինքը ասել է, որ այն դնի տոպրակի մեջ ու թողնի պատուհանի գոգին, դրսի կողմից, ինչն էլ բենզալցակայանի աշխատակիցը կատարել է: Այդ ընթացքում արթնացել է քնած մյուս աշխատակիցը, որին ճանաչել է, գիտի, որ անունը Արմեն է: Վերցնելով պատուհանի գոգին դրված տոպրակով գումարը, արագ հեռացել է: Հասնելով տուն Տ.Թաթոսյանին պատմել է, որ կատարել է ավազակությունը և ցույց տվել գումարը: Նույն օրը այդ գումարից 40.000 ՀՀ դրամ վճարել է Ա.Ավետիսյանին, 20.000 ՀՀ դրամ վճարել է ՙԱլեքս՚ տաքսի ծառայության պարտքից, 15.000 ՀՀ դրամով Տ.Թաթոսյանի համար գնել է բջջային հեռախոս և ևս 8.000 ՀՀ դրամ էլ տվել է վերջինիս: Չկարողանալով մարել բոլոր պարտքերը որոշել է կրկին ավազակային հարձակում կատարել: Հունվարի 12-ի երեկոյան, երբ Տ.Թաթոսյանը գտնվել է իր բնակության վայրում նրան պատմել է, որ որոշել է ևս մեկ ավազակային հարցակում կատարել, այս անգամª Զեյթունի ուսանողական ավանի մոտ գտնվող բենզալցակայանի վրա կրկին օգտագործելով իր կրակայրիչ-ատրճանակը: Հունվարի 13-ի առավոտյան ժամը 07.30-ից 08.00-ի սահմաններում, վերցնելով կրակայրիչ- ատրճանակը և հագնելով ձմեռային գլխարկը, որը մեծ արևապաշտպանիչ ունի, գնացել է Դ.Անհաղթ փողոցի վրա գտնվող Լիդեր բենզալցակայան, որտեղ գլխարկի արևապաշտպանիչը իջեցրել է դեմքին, որ դեմքը չերևա, թակել, ապա հրել ու բացել է բենզալցակայանի շինության դուռը£ Կրակայրիչ-ատրճանակը ձեռքում բռնած, որպեսզի աշխատակիցների համար այն տեսանելի լինի գումար է պահանջել£ Շինության ներսում գտնվել են երկու աշխատակից, որոնցից մեկը երիտասարդ, մյուսըª տարեց: Նրանք ծիծաղել են իր պահանջի վրա£ Կրկին պնդել է իր պահանջը, սակայն ապարդյուն£ Այդ ժամանակ բենզալցակայան ավտոմեքենա է մոտեցել և երիտասարդ աշխատակիցը իր կողքով անցնելով գնացել է այդ մեքենան լիցքավորելու: Հասկացել է, որ բենզալցակայանի աշխատակիցը իր սպառնալիքները ոչ միայն լուրջ չի ընդունել, այլ նաև սենյակի անկյունից վերցրել է փայտի կտոր և ինքը վախենալով, որ իրեն կծեծիª փախել է: Գնալով տուն ամաչել է Տ.Թաթոսյանին պատմել իր անհաջողության մասին: Դրանից հետո որոշել է թալանել Սայաթ Նովա և Խանջյան փողոցների խառմերուկում գտնվող ՙԴոկա-Պիցցա՚ բարը, գնացել և ուսումնասիրել է տարածքը, որ կարողանա իրականացնել ավազակային հարձակումը: Հունվարի 14-ին պատմել է Տ.Թաթոսյանի, որ որոշել է թալանել ՙԴոկա-Պիցցա՚ բարը, վերջինս էլ ասել է, որ իրեն կհաջորվի կատարել այն£ Հունվարի 14-ի լույս 15-ի գիշերը, ժամը 04.00-ի սահմաններում, իր հետ վերցնելով դիմակը և կրակայրիչ-ատրճանակը ոտքով գնացել է ՙԴոկա-Պիցցա՚ բարի մոտ£ Տեղ հասնելով, հագել է դիմակը նայել, որ շրջապատում մարդ չկա, որից հետո ատրճանակը ձեռքում բռնած բացել է բարի դուռը և մտել ներս: Բարմենը այդ ժամանակ բարի հետևում նստած քնած է եղել: Դռան բացվելու ձայնից բարմենը արդնացել է ու տեսնելով իրեն դիմակով և ատրճանակով, սկսել է գոռալ ու աղմկել, որ փող չունի£ Բարմենի բարձրացրած աղմուկի հետևանքովª փախել և տուն է գնացել, որտեղ Տ.Թաթոսյանին պատմել է կատարվածի մասին: Դրանից հետո 2010թ. հունվարի 27-ին, երբ Տ.Թաթոսյանը կրկին իր բնակության վայրում է եղել միասին զրուցել են, թե ինչպես գումար հայթհայթեն և Տ.Թաթոսյանը իրեն ասել է, որ պետք է կրկին ավազակային հարձակում կատարել ու առաջարկել է իր մասնակցությունը և օգնությունը այն կատարելու մեջ: Որոշել են միասին կատարել ավազակային հարձակում: Տ.Թաթոսյանը ասել է, որ Ազատության պողոտայի վրա ՙԼամբադա՚ կոչվող կամրջից դեպի ՙՀաղթանակ՚ զբոսայգի ընկած հատվածում շուրջօրյա խանութ կա, որի աշխատողը կին է, ինքը ուսումնասիրել է տարածքը և կարող են հենց դրա վրա կատարել հարձակում: Միասին պայմանավորվել են, որ ինքը իր հետ վերցնի կրակայրիչ-ատրճանակը ու դիմակը, միասին գնան նշված խանութ, որտեղ ինքը պետք է դիմակը հագած մտնի խանութ ու կրակայրիչ-ատրճանակի սպառնալիքով գումար պահանջի աշխատողից, իսկ Տ.Թաթոսյանը մնա դրսում և մարդ գալու կամ որևէ այլ վտանգի դեպքում տեղեկացնի իրեն: Որոշել են նաև, որ հափշտակված գումարից 5.000 ՀՀ դրամը վերցնի Տ.Թաթոսյանը, իսկ մնացածով ինքը փակի իր պարտքերը: Պայմանավորվածության համաձայն Տ.Թաթոսյանի հետ հունվարի 28-ի գիշերը ժամը 04.00-ի սահմաններում դուրս են եկել տանից, իր հետ վերցնելով կրակայրիչ-ատրճանակը, դիմակը և դանակ, գնացել են Ազատության պողոտայի վրա գտնվող ՙԼամբադա՚ կամրջից մոտ 100 մետր ներքև ճանապարհի ձախ հատվածում գտնվող խանութի մոտ, ավազակային հարձակումը կատարելու, սակայն չեն կարողացել այն կատարել, քանի որ խանութը փակ է եղել: Դրանից հետո տուն վերադառնալու ճանապարհին Դ.Անհաղթ և Կ.Ուլնեցի փողոցների խաչմերուկի մոտ իրենց են մոտեցել ոստիկանության աշխատակիցներ ՈւԱԶ մակնիշի մեքենայով և բերման ենթարկել ոստիկանության բաժին: Ճանապարհին ինքը ոստիկաններից աննկատ կրակայրիչ-ատրճանակը գցել է մեքենայի սրահի մեջ: Ոստիկանության բաժնում իր անձնական խուզարկությամբ ոստիկանները հայտնաբերել են դիմակն ու դանակը և ինքը խոստովանել է իր կատարած հանցագործությունների մասին, ասել նաև, որ կրակայրիչ-ատրճանակը գցել է ոստիկանական մեքենայի մեջ և ոստիկանները մեքենայից այն հայտնաբերել են:
Ռ.Ամատունին նշել է նաև, որ զղջում է կատարածի համար: /Գ/Թ 31-35, 75-76, 156-157, 238-239, 252, 311/:
Դատաքննության ժամանակ ամբաստանյալ Ռուբեն Ամատունին հաստատեց իր նախաքննական ցուցմունքները, նշելով, որ առաջադրված մեղադրանքի բոլոր դրվագներով իրեն մեղավոր է ճանաչում:
Իրեղեն ապացույցների հետազոտման ժամանակ ամբաստանյալ Ռուբեն Ամատունին հայտարարեց, որ կրակայրիչ ատրճանակը իրենը չի, ինքը այդպիսին չի ունեցել, իսկ դիմակը նման է իր դիմակին:
Դատաքննության ավարտին, Ռ.Ամատունու շահերի պաշտպան Վ.Գրիգորյանը միջնորդեց լրացուցիչ հարցաքննել իր պաշպանյալին, որը դատարանի կողմից բավարարվեց: Ամբաստանյալ Ռ.Ամատունին լրացուցիչ ցուցմունքում նշեց, որ ինքը որևէ հանցագործություն չի կատարել, իսկ նախաքննության ընթացքում նման ցուցմունքներ տվել է հոգեբանական ճնշման տակ:
Գնահատելով ամբաստանյալ Ռ.Ամատունու նշված ցուցմունքները դատարանն արձանագրում է, որ Ռ.Ամատունին որպես ամբաստանյալ իրավունք ունի տալու ցանկացած ցուցմունք: Նա ժխտելով իր նախաքննական և դատաքննության ընթացքում տրված ցուցմունքները ուղղակի օգտվում է օրենքով սահմանված ցուցմունք տալու իրավունքից: Դատարանին հավատ է ներշնչում նրա նախաքննության ընթացքում և դատաքննության սկզբնական փուլում տված ցուցմունքները, քանզի այդպիսիք հիմնավորվում են գործով հետազոտված այլ ապացույցներով:
Ամբաստանյալ Ռ.Ամատունու դատաքննության ժամանակ տրված լրացուցիչ ցուցմունքը հակասում է գործով հավաքված և հետազոտված այլ ապացույցներին, որոնց վերլուծությանը կանդրադառնանք: Դրանով ամբաստանյալ Ռ.Ամատունին նպատակ ունի խուսափել քրեական պատասխանատվությունից:
ՀՀ քր. օր-ի 335 հոդ. 1-ին մասով և 35-175 հոդ. 2-րդ մասի 1-ին կետով առաջադրված մեղադրանքում Տիգրան Էդիկի Թաթոսյանը նախաքննության փուլում իրեն մեղավոր է ճանաչել լիովին և խոստովանական ցուցմունքներ տվել այն մասին, որ Ռուբեն Ամատունուն ճանաչում է 2007թ. սկզբից, նրա հետ գտնվել է ընկերական հարաբերությունների մեջ: Ընկերություն են արել ու հաճախ հանդիպել, ինչպես նաև ինքը հաճախ է գիշերել Ռ.Ամատունու բնակության վայրում: 2009թ. դեկտեմբերի վերջերին տեղեկացել է, որ Ռ.Ամատունին, որը այդ ժամանակ աշխատել է ՙԱլեքս՚ տաքսի ծառայությունում, Խանջյան փողոցի վրա իր վարած տաքսի ավտոմեքենայով վթարի է ենթարկել ՙՏոյոտա Պրադո՚ մակնիշի մեքենայի և այդ ՙՊրադոի՚ ու իր տաքսի մեքենայի նորոգման ծախսերը պարտք մնացել ՙՊրադո՚ մակնիշի վարորդին ու տաքսի ծառայությանը: 2010թ. հունվարի 07-ին, գտնվել է Ռ.Ամատունու բնակության վայրում, վերջինս իրեն ասել է, որ պարտքերը փակելու համար որոշել է ինչ որ մեկին թալանել: Իր այն հարցին, թե ում պետք է թալանի, Ռ.Ամատունին պատասխանել է, որ որոշել է թալանել Միասնիկյան պողոտայի վրա գտնվող ՙԱրաքս՚ բենզալցակայանը, քանի որ նախկինում աշխատել է այդ բենզալցակայանում, լավ ծանոթ է տեղանքին, գիտի, որ գիշերը աշխատողների մոտ բավականին գումար է լինում և հենց այդ գիշեր գնալու է այն թալանելու: Ասել է նաև, որ իր կտորե գլխարկից դիմակ է պատրաստել որոշել է օգտագործել իր կրակայրիչ-ատրճանակը, դրանք ցույց տվել իրեն ու ասել, որ պետք է դիմակը հագած մտնի բենզալցակայան կրակայրիչ-ատրճանակի սպառնալիքով աշխատակիցներից գումար պահանջի և այն վերցնելով փախչի: Գիշերը, ժամը 04.00-ի սահմաններում Ռ.Ամատունին վերցնելով դիմակը և կրակայրիչ ատրճանակը գնացել է: Առավոտյան, երբ վերադարձել է պատմել է, որ թալանել է ՙԱրաքս՚ բենզալցակայանը, որից հետո իրեն ցույց է տվել հափշտակած գումարը, որը իր հիշելով եղել է 120.000 ՀՀ դրամ: Այդ գումարով Ռ.Ամատունին փակել է ՙՊրադոյի՚ վարորդի և ՙԱլեքս՚ տաքսի ծառայության պարտքերի մի մասը, իր համար 14.000 ՀՀ դրամով գնել ՙՍամսունգ՚ ֆիրմայի բջջային հեռախոս և տվել նաև 5000 ՀՀ դրամ: 2010թ. հունվարի 12-ին Ռ.Ամատունու բնակության վայրում վերջինս իրեն ասել է, որ որոշել է կրկին ավազակային հարձակում կատարել և այս անգամ թալանել Դ.Անհաղթ փողոցի վրա, Զեյթունի ուսանողական ավանի մոտ գտնվող բենզալցակայանը ու լուսաբացին գնալու է այն թալանելու: Հունվարի 13-ի առավոտյան, Ռ.Ամատունին վերցնելով կրակայրիչ-ատրճանակը գնացել է ավազակային հարձակման: Մոտ 2 ժամից վերադառնալով, ասել է, որ բենզալցակայանը փակ է և ինքը չի կարողացել կատարել մտածածը, սակայն հետագայում ինքը իմացել է, որ Ռ.Ամատունին իրականում փորձել է թալանել բենզալցակայանը, սակայն աշխատողները հասկացել են, որ ատրճանակը իսկական չէ և նրան գումար չեն տվել ու հարձակումը ձախողվել է£ Դրանից հետո, 2010թ. հունվարի 14-ին, երբ կրկին գտնվել է Ռ.Ամատունու բնակության վայրում, վերջինս իրեն ասել է, որ որոշել է ավազակային հարձակում կատարել Սայաթ-Նովա փողոցի վրա գտնվող ՙԴոկա-Պիցցա՚ բարի վրա£ Ասել է նաև, որ ուսումնասիրել է տարածքը, գիտի, որ բարը աշխատում է շուրջօրյա ու պետք է դիմակը հագած մտնի բար կրակայրիչ-ատրճանակի սպառնալիքով թալանի աշխատողին և հենց այդ գիշեր կատարելու է որոշածը: Գիշերը, ժամը 04.00-ի սահմաններում, Ռ.Ամատունին վերցնելով դիմակը և կրակայրիչ-ատրճանակը գնացել է ավազակային հարձակում կատարելու: Առավոտյան, երբ վերադարձել է պատմել է, որ դիմակը հագած, կրակայրիչ-ատրճանակը ձեռքին մտել է բար, բարմենը քնած է եղել և արթնանալով ու տեսնելով իրեն, վախից սկսել է աղմկել ու գոռգոռալ և ինքը փախել է: Դրանից հետո, 2010թ. հունվարի 27-ին, երբ նորից գտնվել է Ռ.Ամատունու բնակության վայրում, միասին զրուցել են Ռ.Ամատունու պարտքերի մասին և մտածել, թե որտեղից գումար հայթհայթեն: Այդ ժամանակ իրեն էլ է գումար անհրաժեշտ եղել, քանի որ հունվարի 29-ից պետք է աշխատանքի գնար, բայց ճանապարհածախսի գումար չի ունեցել: Ռ.Ամատունու հետ պայմանավորվել է միասին կատարել ավազակային հարձակում, որի արդյունքում հափշտակած գումարից 5000 ՀՀ դրամը պետք է վերցներ ինքը, մի քանի օր աշխատանքի գնալու ճանապարհածախս, իսկ մնացածով` Ռ.Ամատունին պետք է փակեր պարտքերը: Այդ ժամանակ Ռ.Ամատունին ասել է, որ Ազատության պողոտայի վրա կա խանութ, որը աշխաում է նաև գիշերը, աշխատողը կին է£ Նա ուսումնասիրել է տարածքը, այն հարմար է ավազակությունը կատարելու համար: Միասին պայմանավորվել են հենց այդ գիշեր գնալ խանութի վրա հարձակվելու: Ըստ պայմանավորվածության Ռ.Ամատունին դիմակը հագած պետք է մտներ խանութ, կրակայրիչ-ատրճանակի սպառնալիքով գումար պահանջեր, իսկ ինքը սպասեր դրսում, հսկելով շրջակայքը և մարդ գալու դեպքում տեղեկացներ Ռ.Ամատունուն: Գումարը հափշտակելուց հետո պետք է միասին փախչեին: Պայմանավորվածության համաձայն գիշերը, ժամը 04.00-ի սահմաններում Ռ.Ամատունին վերցրել է դիմակը, կրակայրիչ-ատրճանակը և դանակ, միասին դուրս են եկել տանից ու գնացել ավազակություն կատարելու: Երբ հասել են խանութի մոտ տեսել են, որ այն փակ է և չեն կարողացել իրականացնել հարձակումը: Դրանից հետո տուն վերադառնալու ճանապարհին Դ.Անհաղթ և Կ.Ուլնեցի փողոցների խաչմերուկի մոտ իրենց են մոտեցել ոստիկանության աշխատակիցներ ՈւԱԶ մակնիշի մեքենայով և բերման ենթարկել ոստիկանության բաժին, որտեղ իրենք խոստովանել են իրենց կատարածը: Տ.Թաթոսյանը հայտնել է նաև, որ տեղյակ լինելով Ռ.Ամատունու կողմից նախապատրաստվող վերը նշված հանցագործությունների մասին չի հայտնել իրավապահ մարմիններին, քանի որ չի ցանկացել, որ Ռ.Ամատունին դատապարտվի£
Տ.Թաթոսյանը նշել է նաև, որ զղջում է կատարածի համար: /Գ/Թ 37-40, 249-250, 266-268, 282/:
Ամբաստանյալ Տ.Թաթոսյանը նույնպես դատաքննությամբ ընդունեց առաջադրված մեղադրանքները և ըստ էության ամբողջովին հաստատեց նախաքննական ցուցմունքները:
Բացի ամբաստանյալ Ռ.Ամատունու և Տ.Թաթոսյանի նախաքննության և դատաքննության ժամանակ տրված ինքնախոստովանական ցուցմունքներից, նրանց առաջադրված մեղադրանքները հիմնավորվեցին նախաքննությամբ հավաքված և դատաքննությամբ հետազոտված հետևյալ ապացույցներով:
ՙԱրաքս՚ բենզալցակայանի լիցքավորող, գործով տուժող` Վահե Սարգիսի Սարգսյանի ցուցմունքով այն մասին, որ աշխատում է 24 ժամյա հերթափոխով: 2010թ. հունվարի 7-ին սովորականի պես գնացել է աշխատանքի, նույն բենզալցակայանի աշխատակից Արմեն Համբարձումյանի հետ ընդունել հերթափոխը և անցել աշխատանքի: Հունվարի 8-ին ժամը 06.00-ի սահմաններում, երբ բենզալցակայանի ծառայողական սենյակում նստած հեռուստացույց է դիտել, իսկ Ա.Համբարձումյանը նույն սենյակում քնած է եղել, սենյակի դուռը բացվել է, սև կտորե դիմակը գլխին, ատրճանակը ձեռքում, դեպի իր կողմ պահած, մի մարդ է կանգնել դռան շեմին և ասել, որ սեյֆից փողերը հանի ու տա իրեն: Տեսնելով ատրճանակը և վախենալով, որ պահանջը չկատարելու դեպքում այդ մարդը կարող է իրեն սպանել, պատասխանել է, որ հիմա կտա ու բացել է մետաղե պահարանը: Այդ պահին արթնացել է Ա.Համբարձումյանը և ցանկացել վեր կենալ տեղից, իսկ ատրճանակով մարդը նրան ասել է, որ պարկի ու չշարժվի: Երբ փողերը հանել է մետաղյա պահարանից, ատրճանակով մարդը ասել է, որ դրանք լցնի տոպրակի մեջ, դուրս գա սենյակից ու դնի պատուհանի գոգին, ինչն էլ ինքը արել է և ատրճանակով մարդը վերցնելով տոպրակով փողերը փախել է փողոցի կողմ: Դրանից հետո Ա.Համբարձումյանը զանգահարել են բենզալցակայանի տնօրեն Հովհաննես Սևլիկյանին, պատմել կատարվածի մասին և նրա գալուց հետո, երբ կատարել են հաշվարկ, պարզվել է, որ հափշտակված գումարը կազմել է 143.000 ՀՀ դրամ: /Գ/Թ 63-64/:
Տուժողը նշված ցուցմունքը տվեց նաև դատաքննության ժամանակ:
Գործով տուժող` ՙԼիդեր՚ բենզալցակայանի լիցքավորող Հարություն Մամիկոնի Ամիրաքյանի ցուցմունքով այն մասին, որ աշխատում է շուրջօրյա հերթափոխով` ժամը 09.00-ից մինչև հաջորդ օրը 09.00-ն: 2010թ. հունվարի 12-ին ժամը 09.00-ին սովորականի պես գնացել է աշխատանքի, նույն բենզալցակայանի աշխատակից Էդուարդ Գալստյանի հետ ընդունել հերթափոխը: Հունվարի 13-ի առավոտյան ժամը 08.00-ի սահմաններում, երբ Է.Գալստյանի հետ գտնվել են աշխատանքի վայրում և նստած են եղել գտնվել են ՙԼիդեր՚ բենզալցակայանի աշխատանքային սենյակում, դուռը բացել և ներս է մտել մոտ 25 տարեկան մի երիտասարդ, գլխարկը դեպի դեմքը քաշած, որպեսզի դեմքը չերևա, ձեռքին ատրճանակ, դեպի ցած պահած: Ներս մտնելուն պես նա գումար է պահանջել: Հարցրել է, թե ինչու պետք է փողերը նրան տան, իսկ անծանոթը պատասխանել է, որ կատակ չի անում և այդ ընթացքում ետ քաշվելով դուրս է եկել ու կանգնել դռան շեմին: Հասկացել են, որ այդ երիտասարդի ձեռքի ատրճանակը իսկական չէ, այլ կրակայրիչ է, նրա ասածը լուրջ չեն ընդունել, սկսել են ծիծաղել` մտածելով, որ ինչ որ մեկը կատակ է անում: Այդ ժամանակ բենզալցակայան ավտոմեքենա է մոտեցել և Է.Գալստյանը գնացել է այն լիցքավորելու: Վերջինիս գնալուց հետո, ատրճանակով երիտասարդը կրկին պահանջել է փողերը` ասելով, որ կատակ չի անում, իսկ ինքը զայրանալով վերցրել է սենյակի անկյունում դրված մոտ 1 մետր երկարությամբ փայտի կտորը, որը պահել է նման դեպքերի համար և այդ երիտասարդը տեսնելով փայտը, անմիջապես դիմել է փախուստի: /Գ/Թ 22-24/:
Տուժողը համանման ցուցմունք տվեց նաև դատաքննության ժամանակ:
Գործով տուժող` ՙԴոկա-Պիցցա՚ բարի բարմեն Սենիկ Ֆրունզիկի Փարեմուզյանի ցուցմունքով այն մասին, որ աշխատում է հերթափոխով, մի օր ժամը 09.00-ից 21.00-ն, հաջորդ օրը 21.00-ից ժամը 09.00-ն: 2010թ. հունվարի 14-ին, ժամը 21.00-ին գնացել է աշխատանքի ու ընդունել հերթափոխը: Հունվարի 15-ի ժամը 08.00-ի սահմաններում, երբ բոլոր գիշերային հաճախորդները գնացել են, նստած է եղել բարմենի իր աթոռին, բարի դուռը բացվել է, դիմակավորված ու ատրճանակը ձեռքում մի երիտասարդ մտել է ներս, կանգնել մուտքի մոտ, ատրճանակը պահելով իր ուղղությամբ ասել, որ փողերը տա: Ինքը վախեցած և շփոթված ասել է, որ գումար չկա: Այդ երիտասարդը կրկին պահանջել է փողերը, իսկ ինքը շփոթված բարձրաձայն սկսել է աղմկել ու կրկնել, որ փող չկա և այդ երիտասարդը հեռացել է, սակայն եթե երիտասարդը պնդեր իր պահանջը, ապա ինքը գումարը կտար նրան, քանի որ վախեցել է և չի պատկերացրել, որ ատրճանակը կրակայրիչ է: /Գ/Թ 67-68/:
Տուժողը նշված ցուցմունքը հաստատեց նաև դատաքննության ժամանակ:
Գործով տուժող` Մարգարիտա Վաղինակի Մնացականյանի ցուցմունքով այն մասին, որ մոտ 5 տարի է աշխատում է ՙՌԱՆԳԱ՚ ՍՊԸ-Ի Ազատության 12/2 հասցեում գտնվող խանութում որպես գլխավոր հաշվապահ և վաճառողուհի: Խանութը աշխատում է առավոտյան ժամը 09-10-ից մինչև գիշերը ժամը 03-04-ը: 2010թ. հունվարի 27-ից 28-ի գիշերը խանութը աշխատել է մինչև ժամը 01.00-ն, քանի որ ցերեկը աշխատանքը շատ է եղել, ինքը շատ հոգնած է եղել, ուստի գիշերը ժամը 01.00-ի սահմաններում փակել է խանութը և գնացել տուն: Հետագայում իմացել է, որ Ռուբեն Ամատունին և Տիգրան Թաթոսյանը նախապատրաստվել են 2010թ. հունվարի 27-ից 28-ի գիշերը ավազակային հարձակում կատարել իրենց խանութի վրա, բայց չեն կարողացել, քանի որ խանութը փակ է եղել: /Գ/Թ 188-189, 245/:
Տուժողը այս ցուցմունքը հաստատեց նաև դատաքննության ժամանակ:
Գործով վկա` ՙԱրաքս՚ բենզալցակայանի լիցքավորող Արմեն Ստեփանի Համբարձումյանի ցուցմունքով այն մասին, որ աշխատանքը հերթափոխով է, առավոտյան ժամը 09.00-ից մինչև հաջորդ օրը ժամը 09.00-ն: 2010թ. հունվարի 7-ին սովորականի պես գնացել է աշխատանքի և նույն բենզալցակայանի աշխատակից Վահե Սարգսյանի հետ ընդունել հերթափոխը: Հունվարի 8-ին, ժամը 05.00-ի սահմաններում քնել է բենզալցակայանի աշխատանքային սենյակում, իսկ Վ.Սարգսյանը այդ ժամանակ նստած հեռուստացույց է դիտել: ժամը 06.00-ի սահմաններում արթնացել է սենյակում գտնվող մետաղյա պահարանի բացվելու ձայնից և տեսել, որ ինչ որ մեկը մուգ գույնի հագուստով, գլխին կտորե դիմակ, ձեռքում ատրճանակ բռնած և դեպի իրենց ուղղությամբ պահած կանգնած է սենյակի դռան մոտ` դրսում: Տեսնելով, որ ինքը արթնացել է, ատրճանակով մարդը իրեն ասել է, որ տեղից վեր չկենա: Հասկանալով, որ ատրճանակով մարդը կարող է կրակել, վնասել կամ նույնիսկ սպանել իրենց, ենթարկվել է նրա պահանջին: Այդ ժամանակ Վ.Սարգսյանը մետաղյա պահարանից հանել է վաճառված վառելիքի գումարները, ատրճանակով մարդու պահանջով դրանք լցրել է տոպրակի մեջ, տարել ու դրել է պատուհանի գոգին` դրսի կողմից: Վ.Սարգսյանը արել է դա, իսկ ատրճանակով մարդը վերցնելով տոպրակը` փողերով փախել է: Դրանից հետո ինքը զանգահարել են բենզալցակայանի տնօրեն Հովհաննես Սևլիկյանին, պատմել կատարվածը և նրա գալուց հետո, երբ կատարել են հաշվարկ, պարզվել է, որ հափշտակված գումարը կազմում է 143.000 ՀՀ դրամ: /Գ/Թ 128-129/:
Վկան ըստ էության համանման ցուցմուց տվեց նաև դատարանում:
Գործով վկա` Ասքանազ Մելքոնի Ավետիսյանի նախաքննական ցուցմունքով այն մասին, որ 2009թ. դեկտեմբերի 28-ին, ժամը 21.00-ի սահմաններում, իր ՙՏոյոտա Պրադո՚ մակնիշի ավտոմեքենայով Խանջյան փողոցով երթևեկելիս, հանդիպակած գոտիով ընթացող ՙՌենո՚ մակնիշի տաքսի ավտոմեքենան հանկարծ մտել է իր երթևեկության գոտի, բախվել իր ավտոմեքենային և վնասել այն: Զրույցից հետո, տաքսի մեքենայի վարորդի` Ռուբեն Ամատունու, հետ պայմանավորվել է, որ նա կկատարի մեքենայի նորոգման ծախսերը, սակայն հետագայում մեքենան նորոգելիս վերջինս ասել է, որ գումար չունի, ուստի նորոգման գումարը վճարել է ինքը և Ռ.Ամատունին իրեն պարտք է մնացել 110.000 ՀՀ դրամ: 2010թ. հունվարի սկզբներին Ռ.Ամատունին բերել ու իրեն է տվել 40.000 ՀՀ դրամ, մնացած գումարը մնացել պարտք ու այդպես էլ չի վճարել: /Գ/Թ 104-106/:
Գործով վկա` Արարատ Մաթևոսի Մելիքսեթյանի նախաքննական ցուցմունքով այն մասին, որ 2009թ. դեկտեմբերի սկզբներին իրենց տաքսի ծառայությունում աշխատանքի է ընդունվել Ռուբեն Ամատունին, որը 2009թ. դեկտեմբերի վերջերին վթարի է ենթարկել իրեն ամրակցված ՙՌենո՚ մակնիշի ավտոմեքենան, որից հետո ազատվել է աշխատանքից: Մեքենայի նորոգման ծախսերը կատարել է ինքը և Ռ.Ամատունին իրեն պարտք է մնացել 100.000 ՀՀ դրամ: 2010թ. հունվարի սկզբներին Ռ.Ամատունին բերել ու տաքսի ծառայությունում վճարել է իր պարտքից մոտ 20.000 ՀՀ դրամ, մնացածը մնալով պարտք: /Գ/Թ 109-110, 150-152/:
Ռ.Ամատունու և Տ.Թաթոսյանի մասնակցությամբ կատարված քննչական փորձարարություններ կատարելու մասին արձանագրությունով, համաձայն որոնց Ռ.Ամատունին փորձարարության ընթացքում մատնացույց է արել Երևանի, Մյասնիկյան պողոտա 20ա հասցեում գտնվող ՙԱրաքս՚ բենզալցակայանը, Դ.Անհաղթ փող. 10/1 հասցեում գտնվող ՙԼիդեր՚ բենզալցակայանը, Սայաթ-Նովա 26 հասցեում գտնվող ՙԴոկա-Պիցցա՚ բարը և Ազատության պող. 12/2 հասցեում գտնվող ՙՌԱՆԳԱ՚ ՍՊԸ-Ի խանութը և հայտարարել, թե որտեղ, ինչ եղանակով և ինչպես է կատարել հանցանքները, իսկ Տ.Թաթոսյանը մատնացույց է արել Ազատության պող. 12/2 հասցեում գտնվող ՙՌԱՆԳԱ՚ ՍՊԸ-Ի խանութը և հայտարարել, որ 2010թ. հունվարի 28-ի գիշերը Ռ.Ամատունու հետ եկել են այդ խանութի վրա ավազակային հարձակում կատարելու, բայց այն փակ է եղել և այդ պատճառով չեն կարողացել կատարել ավազակությունը: /Գ/Թ 81-88, 258-260/:
Իրեղեն ապացույց ճանաչված դիմակի, կրակայրիչ-ատրճանակի և դանակի առկայությամբ, դրանք հայտնաբերելու, զննելու արձանագրություններով և իրեղեն ապացույց ճանաչելու մասին որոշմամբ£ /Գ/Թ 9-10, 14, 97-98, 299/:
Անձին անձնական զննության կատարելու մասին արձանագրությամբ, համաձայն որի 28.01.2010 թվականին ընթերականների մասնակցությամբ զննության է ենթարկվել Ռուբեն Ամատունին, որի մոտից հայտնաբերվել է կենցաղային դանակ` ընդհանուր երկարությունը 31 սմ, շեղբի երկարությունը 18 սմ, շեղբի լայնությունը միջնամասում 2,9 սմ, մեկ հատ սև գույնի գործված գլխարկ, որի վրա միջնամասում կա երկու բացված անցք և այլ առարկաներ: /Գ/Թ 9-10/:
Գ./Թ 13-ում եղած զեկուցագրով համաձայն որի ՊՊԾ 6-րդ վաշտի ՊԱ-64 պարեկային ավտոմեքենայի վարորդ, ոստիկանության սերժանտ Ռ.Սարգսյանը նշել է. ՙ... ս/թ հունվարի 28-ին ՊՊԾ 6-րդ վաշտի ամրակցված թիվ -64 պարեկային ավտոմեքենայով /068 ՈՍ 02 պ/հ/ Քանաքեռ-Զեյթունի բաժին բերման ենք ենթարկել քաղաքացիներ Տիգրան Էդիկի Թաթոսյանին և Ռուբեն Գրիգորի Ամատունուն … Նույն օրը ժամը 13-ի սահմաններում նշված պարեկային ավտոմեքենայի սրահը մաքրելիս վարորդի նստարանի տակից հայտնաբերեցի կրակայրիչ-ատրճանակ, մուգ արծաթագույն, սև բռնակով ՙՍ.մ 9 mm M 9-P BERETTA-PB՚ գրառումով: Նշված կրակայրիչը ինձ և պ/ա-ի ավագ սերժանտ Ս.Պետրոսյանին չի պատկանում և մինչև վերը նշված քաղաքացիների բերման ենթարկելը չէր կարող գտնվել իմ նստատեղի տակ՚: Այս զեկուցագիրը դատարանը գնահատում է որպես գրավոր ապացույց:
Նույն օրը Տիգրան Թաթոսյանը տված բացատրությունում հայտնել , որ ՙԻր մոտ եղած կրակայրիչ-ատրճանակը Ռուբենը ոստիկանության բաժին մեկնելիս գցել էր վարորդի նստատեղի տակ: Ավելացնում եմ նաև, որ մինչև տանից դուրս գալը Ռուբենը իր հետ վերցրեց նշված ատրճանակը, դանակը և դիմակ հանդիսացող գլխարկը: Գ/Թ 19/: Նշված հանգամանքը Ռուբեն Ամատունին նշել է նաև 28.01.2010 թվականին իր որպես կասկածյալ տված ցուցմունքում: Գ/Թ 35՚:
Այն, որ ամբաստանյալներ Ռ.Ամատունու և Տ.Թաթոսյանի ցուցմունքները, որոնցով ընդունել են իրենց մեղավորությունը դատարանին հավատ է ներշնչում, նաև այն պատճառով, որ մեղսագրվող արարքների վերաբերյալ, մինչև նրանց ոստիկանության բաժին բերման ենթարկելը և նրանցից բացատրություններ վերցնելը, ոչ մի դեպքով քրեական գործ հարուցված չի եղել և իրավապահ մարմինները մեղսագրվող արարքների մասին իմացել են միայն 28.01.2010 թվականին և այդ օրն էլ կատարված հանցագործությունների մասին տրվել են հայտարարություններ: /Գ.Թ. 3, 47, 48/:
Վերոգրյալների հիման վրա դատարանը գտնում է, որ դատաքննությամբ Ռուբեն Գրիգորիի Ամատունուն ՀՀ քրեական օրենսգրքի 175-րդ հոդվածի 2-րդ մասի 5-րդ կետով, 34-176-րդ հոդվածի 2-րդ մասի 5-րդ կետով և 35-175-րդ հոդվածի 2-րդ մասի 1-ին և 5-րդ կետերով և Տիգրան Էդիկի Թաթոսյանին ՀՀ քրեական օրենսգրքի 335-րդ հոդվածի 1-ին մասով և 35-175-րդ հոդվածի 2-րդ մասի 1-ին կետով առաջադրված մեղադրանքները հիմնավորվեցին:
Ամբաստանյալներ Ռուբեն Ամատունու և Տիգրան Թաթոսյանի նկատմամբ պատիժ նշանակելիս դատարանը հաշվի է առնում մեղսագրվող արարքների հանրության համար վտանգավորության աստիճանը և բնույթը:
Պատասխանատվությունը և պատիժը մեղմացնող հանագամանք է դիտվում այն, որ ամբաստանյալներ Ռուբեն Ամատունին և Տիգրան Թաթոսյանը նախկինում դատապարտված չեն եղել, Տ.Թաթոսյանն անկեղծորեն զղջում է կատարածի համար:
Գործով բացակայում են ամբաստանյալների պատասխանատվությունը և պատիժը ծանրացնող օրենքով նախատեսված որևէ հանգամանք:
Անդրադառնալով Տիգրան Էդիկի Թաթոսյանի նկատմամբ պատժի նշանակմանը դատարանը գտնում է, որ նրա նկատմամբ ՀՀ քրեական օրենսգրքի 35-175-րդ հոդվածի 2-րդ մասի 1-ին կետով պետք է կիրառվի ՀՀ քրեական օրենսգրքի 64-րդ հոդվածի դրույթները և ավազակային հարձակման նախապատրաստության համար պետք է նշանակվի նվազագույն չափից ավելի ցածր պատիժ հետևյալ պատճառաբանությամբ: Ամբողջ նախաքննության և դատական քննության ընթացքում Տիգրան Թաթոսյանը տվել է անկեղծ ցուցմունք, անկեղծորեն զղջացել է և ակտիվորեն մերկացրել է մյուս ամբաստանյալի մեղավորությունը նրան մեղսագրվող արարքներում: Անգամ դատական նիստում, երբ Ռուբեն Ամատունին լրացուցիչ ցուցմունքում հրաժարվեց նախաքննական և դատարանում տված ցուցմունքներից, ամբաստանյալ Տիգրան Թաթոսյանը կրկին հաստատեց իր նախաքննական և դատաքննական ցուցմունքները:
Դատարանը հաշվի է առնում նաև ավազակային հարձակման նախապատրաստության հարցում Տիգրան Թաթոսյանի ոչ ակտիվ դերը, այն է` հանցագործության նախապատրաստման ընթացքում եղած գործիքները` կրակայրիչ ատրճանակը և դիմակը ձեռք է բերել Ռ.Ամատունին: Ռ.Ամատունու մոտ է եղել նաև դանակը: Երբ նրանց ներկայացրել են ոստիկանությանբաժին Տ.Թաթոսյանը ցուցաբերել է ազնիվ վարքագիծ և միաժամանակ պատմել է իրեն և Ռ.Ամատունուն դեռևս չմեղսագրված բոլոր արարքների մասին, այդ արարքների մասին իրավապահ մարմիններին դեռևս հայտնի չի եղել: Նրա վարքագծում որևէ փոփոխություն չկատարվեց նաև դատական քննության ողջ ընթացքում:
Վերը նշվածը էականորեն նվազեցնում է Տ.Թաթոսյանի կողմից ավազակային հարձակման նախապատրաստության հարորեն վտանգավորությունը: Դատարանը նկատի է ունենում նաև Տ.Թաթոսյանի անձը բնութագրող տվյալները, այն է, որ նա նախկինում դատապարտված չի եղել:
Վերը նշված հանգամանքները դատարանը դիտում է բացառիկ և հնարավոր է համարում ՀՀ քրեական օրենսգրքի 64-րդ հոդվածի դրույթների կիրառումը Տ.Թաթոսյանին ՀՀ քրեական օրենսգրքի 35-175-րդ հոդվածի 2-րդ մասի 1-ին կետով պատիժ նշանակելիս:
Անդրադառնալով լրացուցիչ պատժի` գույքի բռնագրավման խնդրին, դատարանը գտնում է , որ այդպիսին պետք է կիրառվի Ռ.Ամատունու նկատմամբ, նկատի ունենալով նրա կողմից կատարված ավարտված ավազակային հարձակումների փաստը:
Հենց այս նկատառումով էլ դատարանը գտնում է, որ Տ.Թաթոսյանի նկատմամբ նման լրացուցիչ պատիժ չպետք է կիրառվի:
Գործով իրեղեն ապացույցների ճակատագիրը պետք է լուծվի ՀՀ քրեական դատավարության օրենսգրքով սահմանված կարգով:
Դատարանը գտնում է, որ ՙՍամսունգ՚ մոդելի հեռախոսը մույնպես պետք է բռնագրավվի, քանզի այն Ռ. Ամատունին գնել է հափշտակված փողով և այն տվել է Տիգրան Թաթոսյանին:
Ռուբեն Ամատունու գույքի վրա դրված կալանքը պետք է թողնել անփոփոխ:
Ինչ վերաբերում է ՙԱրաքս՚ ՍՊԸ-ին ավազակային հարձակմամբ պատճառված 143.000 ՀՀ դրամին, ապա այդ հարցը պետք է համարել լուծված, քանզի ՙԱրաքս՚ ՍՊԸ-ի տնօրենը գրավոր հայտնել է, որ. ՙՍՊԸ-ին պատճառվել է 143.000 ՀՀ դրամի գույքային վնաս, բայց ՙԱրաքս՚ ՍՊԸ-ն քաղաքացիական հայցի պահանջ չունի՚ /գ.թ. 134/:
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-373-րդ և 379-րդ հոդվածներով դատարանը

ՎՃՌԵՑ

Ռուբեն Գրիգորիի Ամատունուն մեղավոր ճանաչել ՀՀ քրեական օրենսգրքի 175-րդ հոդվածի 2-րդ մասի 5-րդ կետով, 34-176-րդ հոդվածի 2-րդ մասի 5-րդ կետով և 35-175-րդ հոդվածի 2-րդ մասի 1-ին և 5-րդ կետերով նախատեսված հանցանքների կատարման համար և դատապարտել ազատազրկման` ՀՀ քրեական օրենսգրքի 175-րդ հոդվածի 2-րդ մասի 5-րդ կետով 6 /վեց/ տարի ժամկետով գույքի բռնագրավմամբ, բայց ոչ ավելի 143.000 /մեկ հարյուր քառասուներեք հազար/ ՀՀ դրամի չափով, ՀՀ քրեական օրենսգրքի 34-176-րդ հոդվածի 2-րդ մասի 5-րդ կետով` 3 /երեք/ տարի ժամկետով, ՀՀ քրեական օրենսգրքի 35-175-րդ հոդվածի 2-րդ մասի 1-ին և 5-րդ կետերով 5 /հինգ/ տարի ժամկետով գույքի բռնագրավմամբ, բայց ոչ ավելի 143.000 /մեկ հարյուր քառասուներեք հազար/ ՀՀ դրամի չափով:
ՀՀ քրեական օրենսգրքի 66-րդ հոդվածի 4-րդ մասի կիրառմամբ ՀՀ քրեական օրենսգրքի 175-րդ հոդվածի 2-րդ մասի 5-րդ կետով 6 /վեց/ տարի ժամկետով նշանակված պատժին մասնակիորեն գումարել ՀՀ քրեական օրենսգրքի 34-176-րդ հոդվածի 2-րդ մասի 5-րդ կետով և 35-175-րդ հոդվածի 2-րդ մասի 1-ին և 5-րդ կետերով նշանակված պատիժներից վեցական ամիս և Ռուբեն Գրիգորիի Ամատունուն վերջնական պատիժ նշանակել ազատազրկում 7 /յոթ/ տարի ժամկետով` գույքի բռնագրավմամբ, բայց ոչ ավելի 143.000 /մեկ հարյուր քառասուներեք հազար/ ՀՀ դրամի չափով: Բռնագրավումը տարածել Ռուբեն Ամատունու ՙՆոկիա-1200՚ տեսակի 356869024848408, ՙՆոկիա 65009-1՚ 3520270246751810 գործարանային համարներով և 099-66-08-65, 091-66-08-65, 093-66-08-65, 055-66-08-65 հեռախոսաքարտերի, Սուրեն Գոլ ՍՊՀ գրավատան N0618 հարկային պայմանագրի ՙՇանգիլա՚ խաղատան 3 /երեք/ քարտի, ՙՊրոկրեդիտ բանկ՚ ՓԲԸ այցեքարտի, Երևանի Մետրոպոլիտենի քարտի, ՙԿոնվերս Բանկ՚ ՓԲԸ-ի էլեկտրոնային քարտի, ՙԿոնվերս Բանկ՚ ՓԲԸ-ի 4 թիվ 01827 կտրոնի, ՙԱնելիք Բանկի՚ էլեկտրոնային քարտի, ինչպես նաև ՙՍամսունգ՚ մոդելի /CTE-1080/, 3573780322210317 գործարանային համարի բջջային հեռախոս վրա: Թիվ 1414860653 սոց. քարտը և տաս հատ այցեքարտերը վերադարձնել Ռուբեն Ամատունուն: Պատժի կրման սկիզբը հաշվել 2010 թվականի հունվարի 28-ից: Պատիժը պետք է կրի ՀՀ ԱՆ համապատասխան հիմնարկում:
Տիգրան Էդիկի Թաթոսյանին մեղավոր ճանաչել ՀՀ քրեական օրենսգրքի 335-րդ հոդվածի 1-ին մասով և 35-175-րդ հոդվածի 2-րդ մասի 1-ին կետով նախատեսված հանցագործությունների կատարման համար և դատապարտել ՀՀ քրեական օրենսգրքի 335-րդ հոդվածի 1-ին մասով տուգանքի նվազագույն աշխատավարձի երեքհարյուրապատիկի չափով` 300.000 /երեք հարյուր հազար/ ՀՀ դրամի, ՀՀ քրեական օրենսգրքի 35-175-րդ հոդվածի 2-րդ մասի 1-ին կետով` ՀՀ քրեական օրենսգրքի 64-րդ հոդվածի կիրառմամբ ազատազրկման 2 /երկու/ տարի ժամկետով` առանց գույքի բռնագրավման:
ՀՀ քրեական օրենսգրքի 66-րդ հոդվածի կանոններով ՀՀ քրեական օրենսգրքի 35-175-րդ հոդվածի 2-րդ մասի 1-ին կետով 2 /երկու/ տարի ժամկետով նշանակված պատժին լրիվ գումարել ՀՀ քրեական օրենսգրքի 335-րդ հոդվածի 1-ին մասով նշանակված տուգանքը և Տիգրան Էդիկի Թաթոսյանին վերջնական պատիժ նշանակել ազատազրկում 2 /երկու/ տարի ժամկետով, առանց գույքի բռնագրավման և տուգանք 300.000 /երեք հարյուր հազար/ ՀՀ դրամի չափով:
Պատիժը պետք է կրի ՀՀ ԱՆ համապատասխան հիմնարկում:
Ռուբեն Գրիգորիի Ամատունու գույքի վրա դրված կալանքը թողնել անփոփոխ, իսկ Տիգրան Էդիկի Թաթոսյանի գույքի վրա դրված կալանքը վերացնել:
Իրեղեն ապացույց ճանաչված դիմակը, դանակը և կրակայրիչ-ատրճանակը ոչնչացնել:
Մինչև դատավճռի օրինական ուժի մեջ մտնելը Ռուբեն Գրիգորիի Ամատունու նկատմամբ ընտրված խափանման միջոց կալանքը և Տիգրան Էդիկի Թաթոսյանի նկատմամբ ընտրված խափանման միջոցը` ստորագրություն չհեռանալու մասին թողնել անփոփոխ:
Դատավճիռը դատավարության մասնակիցների կողմից 1 /մեկ/ ամսվա ընթացքում վերաքննության կարգով կարող է բողոքարկվել ՀՀ վերաքննիչ քրեական դատարան: