Գործ ԵԱՔԴ/0071/01/10
Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

15 դեկտեմբերի 2010թ. ք.Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂ ԴԱՏԱՎՈՐ՝ Ա.ԴԱՆԻԵԼՅԱՆ
ԴԱՏԱՎՈՐՆԵՐ` Մ.ԱՐՂԱՄԱՆՅԱՆ
Մ.ՌԵՀԱՆՅԱՆ

ՔԱՐՏՈՒՂԱՐՈՒԹՅԱՄԲ՝ Մ.ՄԵԼՔՈՆՅԱՆԻ

ՄԱՍՆԱԿՑՈՒԹՅԱՄԲ՝
ՄԵՂԱԴՐՈՂ` Ա.ԱՂԱՅԱՆԻ
ՊԱՇՏՊԱՆ` Ռ.ՍԻՐԵԿԱՆՅԱՆԻ


Դռնբաց դատական նիստում քննության առնելով պաշտպանի վերաքննիչ բողոքը` Արկադի Արմենի Իգիթխանյանի նկատմամբ ՀՀ քր. օր-ի 177 հոդ. 2-րդ մասի 3-րդ և 4-րդ կետերով, Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 06.09.2010թ. դատավճռի դեմ.

Պ Ա Ր Զ Ե Ց

Գործի դատավարական նախապատմությունը

25.02.2010թ. հարուցված թիվ 14107210 քրեական գործի նախաքննության ընթացքում.
19.05.2010թ. որոշում է կայացվել Արկադի Արմենի Իգիթխանյանին ՀՀ քր. օր-ի 177 հոդ. 2-րդ մասի 3-րդ և 4-րդ կետերով որպես մեղադրյալ ներգրավելու մասին:
26.05.2010թ. թիվ 14107210 քրեական գործը մեղադրական եզրակացությամբ ուղարկվել է Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 06.09.2010թ. դատավճռով` դատական քննության արագացված կարգի կիրառմամբ.
Ամբաստանյալ Արկադի Արմենի Իգիթխանյանը մեղավոր է ճանաչվել ՀՀ քր. օր-ի 177 հոդ. 2-րդ մասի 3-րդ և 4-րդ կետերով և դատապարտվել է ազատազրկման 3 /երեք/ տարի ժամկետով:
ՀՀ քր.օր-ի 66 հոդ. կանոններով Արկադի Արմենի Իգիթխանյանի նկատմամբ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 15.07.2009թ. դատավճռով նշանակված պատժի չկրած մասից մասնակի գումարվել է 3 /երեք/ տարի 7 /յոթ/ ամիս ժամկետով ազատազրկում, իսկ Ավան և Նոր-Նորք համայնքների ընդհանուր իրավասության դատարանի 30.07.2009թ. դատավճռով նախկինում նշանակված պատժից մասնակի գումարվել է 1 /մեկ/ ամիս ժամկետով ազատազրկում նոր նշանակված պատժին և վերջնական պատիժ է նշանակվել ազատազրկում 6 /վեց/ տարի 8 /ութ/ ամիս ժամկետով:
Ընտրված խափանման միջոց կալանքը թողնվել է անփոփոխ:
Պատժի սկիզբը հաշվվել է 05.05.2009թ-ից:
Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 06.09.2010թ. դատավճռի դեմ վերաքննիչ բողոք է բերել պաշտպանը:
Գործի փաստական հանգամանքները.

Արկադի Արմենի Իգիթխանյանին ՀՀ քր.օր-ի 177 հոդ. 2-րդ մասի 3-րդ և 4-րդ կետերով մեղադրանք է առաջադրվել այն բանի համար, որ նա 2008թ. հոկտեմբեր ամսից մինչև 2009թ. հունվար ամիսը հափշտակություններ կատարելուց հետո կրկին անգամ կատարել է գողություն, այն է` 2009թ. հունվար ամսվա վերջին, հստակ օրը հայտնի չէ, գողություն կատարելու դիտավորությամբ տեխնիկական միջոցների գործադրմամբ բացելով Երևանի Կոմիտաս 54 շենքի 94 բնակարանի պատուհանը, ապօրինի մուտք է գործել բնակարան և հափշտակել 5.000 ՀՀ դրամ արժողության □Սուպեր-Սիստեմ□ ալեհավաք սարք և 50.000 ՀՀ դրամ գումար` բնակարանատեր Արթուր Արարատի Տիգրանյանին պատճառելով զգալի չափերի` 55.000 ՀՀ դրամի գույքային վնաս:


Վերաքննիչ բողոքների հիմքերը, հիմնավորումները և պահանջը.

Պաշտպանը վկայակոչելով վերաքննիչ բողոքում շարադրված պատճառաբանությունները` խնդրել է Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի կողմից 06.09.2010թ. կայացված դատավճիռը բեկանել և փոփոխել` նշանակված պատիժը մեղմացնել և □Համաներում հայտարարելու մասին□ ՀՀ ԱԺ 19.06.2009թ. որոշման 1-ին կետի 1-ին ենթակետի կիրառմամբ Արկադի Արմենի Իգիթխանյանին ազատել նշանակված պատժի կրումից հետևյալ հիմնավորումներով.
Պաշտպանյալի վերաբերյալ կայացված դատարանի դատավճիռը պատճառաբանված չէ, քանի որ չեն պատճառաբանվել դատավճռում շարադրված բոլոր հետևությունները:
Դատարանն անդրադառնալով պաշտպանյալի անձին, պատասխանատվությունը և պատիժը մեղմացնող հանգամանքներին, պատասխանատվությունը և պատիժը ծանրացնող հանգամանքների բացակայությամբ այնուամենայնիվ նշանակել է խիստ պատիժ:
Պաշտպանյալը նախաքննության ընթացքում տվել է խոստովանական ցուցմունքներ, որով նպաստել է հանցագործության բացահայտմանը, անկեղծորեն զղջացել է կատարածի համար, մեղքն ընդունելն արդեն իսկ վկայում է նրա մասին, որ իր պաշտպանյալը կանգնել է ճիշտ ուղու վրա, գիտակցել է իր կողմից կատարված հանցանքը, դատարանը պետք է հնարավորություն ընձեռի նրան ուղղվելու:
Գտնում է, որ դատավճռով նշանակված պատիժն անարդարացի է ակնհայտ խիստ լինելու պատճառով, այն չի համապատասխանում պաշտպանյալին վերագրվող հանցագործության ծանրությանը և նրա անձին:

Վերաքննիչ դատարանի պատճառաբանությունները և եզրահանգումը.

Վերաքննիչ բողոքում նշված հիմքերի և հիմնավորումների սահմաններում վերլուծելով գործի նյութերը, վերաքննիչ դատարանը հանգում է այն հետևության, որ պաշտպանի վերաքննիչ բողոքը պետք է մերժել հետևյալ պատճառաբանությամբ:
ՀՀ քր. օր-ի 10 հոդվածն ամրագրում է արդարության և պատասխանատվության անհատականացման սկզբունքը, համաձայն որի` հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար:
Պատիժ նշանակելիս արդարության սկզբունքը դրսևորվում է օրենքով նախատեսված մի շարք պահանջներով:
ՀՀ քր. օր-ի 61 հոդվածի 1-ին մասը սահմանում է, որ հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է նույն օրենսգրքի հատուկ մասի համապատասխան հոդվածի սահմաններում` հաշվի առնելով օրենսգրքի ընդհանուր մասի դրույթները:
ՀՀ քր. օր-ի 61 հոդվածի 2-րդ մասը սահմանում է, որ պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով:
ՀՀ քր. օր-ի 48 հոդվածի 2-րդ մասի համաձայն` պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները:
Վերաքննիչ դատարանը արձանագրում է, որ մինչ սույն գործով /ներկայումս վիճարկվող/ դատական ակտ կայացնելը ամբաստանյալ Արկադի Արմենի Իգիթխանյանի նկատմամբ արդեն իսկ առկա են թվով երկու դատական ակտեր`
1. Երևանի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանի 15.07.2009թ. դատավճռով. Արկադի Արմենի Իգիթխանյանը մեղավոր է ճանաչվել ՀՀ քր. օր-ի 34-177 հոդվածի 2-րդ մասի 1-ին, 3-րդ, 4-րդ կետերով և 177 հոդվածի 2-րդ մասի 1-ին, 2-րդ, 3-րդ, 4-րդ կետերով և ՀՀ քր. օր-ի 66 հոդվածի կիրառմամբ դատապարտվել է ազատազրկման 6/վեց/ տարի ժամկետով, պատժի սկիզբը հաշվվել է 05.05.2009թ-ից: Նշված դատական ակտով վերջինս մեղավոր է ճանաչվել և դատապարտվել է 2008թ. հոկտեմբերից մինչև 2009թ. հունվար ամիսը ընկած ժամանակահատվածում մեկից ավելի դրվագներով հափշտակություններ և հափշտակության փորձ կատարելու համար /գ.թ. 41- 44/:
2. Երևանի Ավան և Նոր-Նորք համայնքների ընդհանուր իրավասության դատարանի 30.07.2009թ. դատավճռով. Արկադի Արմենի Իգիթխանյանը մեղավոր է ճանաչվել ՀՀ քր. օր-ի 34-176 հոդվածի 2-րդ մասի 3-րդ, 5-րդ կետերով և դատապարտվել է ազատազրկման 3/երեք/ տարի ժամկետով, պատժի սկիզբը հաշվվել է 05.05.2009թ-ից: Նշված դատական ակտով վերջինս մեղավոր է ճանաչվել և դատապարտվել է այն բանի համար, որ նա Քանաքեռ-Զեյթուն քննչական բաժնում ՀՀ քր. օր-ի 34-177 հոդվածի 2-րդ մասի 1-ին, 3-րդ, 4-րդ կետերով և 177 հոդվածի 2-րդ մասի 1-ին, 2-րդ, 3-րդ, 4-րդ կետերով որպես մեղադրյալ ներգրավված լինելով, կրկին անգամ, նախնական համաձայնության գալով Ի.Միրզոյանի հետ, 2009թ. մայիսի 1-ին, ժամը 23.00-ի սահմաններում կատարել է ՀՀ քր. օր-ի 34-176 հոդվածի 2-րդ մասի 3-րդ, 5-րդ կետերով նախատեսված հանցավոր արարք /գ.թ. 45- 46/:
Պաշտպանի կողմից ներկայացված վերաքննիչ բողոքի առկայության պայմաններում քննության առնելով ամբաստանյալ Արկադի Արմենի Իգիթխանյանի նկատմամբ նշանակված պատժի հարցը, վերաքննիչ դատարանը հաշվի է առնում ամբաստանյալի կատարած հանցագործության բնույթը և հասարակական վտանգավորության աստիճանը, կատարման հանգամանքները, դատական ակտում շարադրված ամբաստանյալի անձը բնութագրող տվյալներն այն, որ անչափահաս է, միակողմանի ծնողազուրկ, չի աշխատում, չի սովորում, պատասխանատվությունը և պատիժը մեղմացնող հանգամանքներն այն, որ նա զղջացել է կատարած արարքի համար, մեղայական դիմում է ներկայացրել, ինչպես նաև պատասխանատվությունը և պատիժը ծանրացնող հանգամանքների բացակայությունը և հանգում է այն հետևության, որ տվյալ դեպքում ամբաստանյալի նկատմամբ հանցանքների համակցությամբ նշանակվել է համաչափ պատիժ, հետևաբար դատական ակտը պատժի մեղմացման առումով փոփոխելու հիմքեր չկան:
Բացի այդ, ՀՀ ԱԺ □Համաներում հայտարարելու մասին□ որոշման 1-ին կետի 1-ին ենթակետի համաձայն` պատժից ազատվում են առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք:
Նույն որոշման 8-րդ կետի 7-րդ ենթակետի համաձայն համաներումը կիրառելի չէ նաև ՀՀ քր. օր-ի 176 հոդվածի 2-րդ և 3-րդ մասերով նախատեսված հանցագործություններ կատարած կամ այդ հանցագործությունները կատարելու համար դատապարտված անձանց նկատմամբ:
Նշված որոշման 8-րդ կետի 8-րդ ենթակետի համաձայն համաներումը կիրառելի չէ նաև մի քանի հանցագործություն կատարած անձանց նկատմամբ, եթե այդ հանցագործություններից թեկուզ մեկի համար սույն որոշմամբ համաներում չի նախատեսվում:
Տվյալ դեպքում, սույն գործով ամբաստանյալ Արկադի Արմենի Իգիթխանյանի նկատմամբ իրավացիորեն պատիժ է նշանակվել հանցանքների համակցությամբ ՀՀ քր. օր-ի 66 հոդվածով ամրագրված կանոնների կիրառմամբ, այդ թվում նաև ՀՀ քր. օր-ի 34-176 հոդվածի 2-րդ մասի 3-րդ, 5-րդ կետերով նախատեսված հանցավոր արարք կատարելու համար, որպիսի պայմաններում, բացառվում է վերջինիս նկատմամբ համաներում կիրառելու հնարավորությունը:
Նման պայմաններում, պաշտպանի վերաքննիչ բողոքում շարադրված պատճառաբանություններն այն բավարարելու առումով տվյալ դեպքում որևէ իրավական հետևանք առաջացնել չեն կարող:
Վերոգրյալի հիման վրա և ղեկավարվելով ՀՀ քր. դատ. օր-ի 393-394 հոդվածներով վերաքննիչ դատարանը

Ո Ր Ո Շ Ե Ց

Արկադի Արմենի Իգիթխանյանի նկատմամբ ՀՀ քր. օր-ի 177 հոդ. 2-րդ մասի 3-րդ և 4-րդ կետերով, Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 06.09.2010թ. դատավճիռը թողնել օրինական ուժի մեջ, իսկ պաշտպանի վերաքննիչ բողոքը մերժել:
Սույն որոշումը կարող է բողոքարկվել ՀՀ վճռաբեկ դատարան` այն հրապարակվելու պահից մեկամսյա ժամկետում:



ՆԱԽԱԳԱՀՈՂ ԴԱՏԱՎՈՐ՝ ստորագրություն
ԴԱՏԱՎՈՐՆԵՐ` ստորագրություններ

Իսկականի հետ ճիշտ է.


ՆԱԽԱԳԱՀՈՂ ԴԱՏԱՎՈՐ՝ Ա.ԴԱՆԻԵԼՅԱՆ