գործ No ԵԱՔԴ 0070/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ն.Ղազարյանի
մասնակցությամբ`
մեղադրող` Լ.Մանուկյանի
ամբաստանյալ` Տ.Գաբրիելյանի

2010թ. հունիսի 14-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Տարոն Մանուկի Գաբրիելյանի, ծնված 02.01.1966թ. Արարատի մարզի, Մասիսի շրջանի Ազատաշեն գյուղում, ազգությամբ հայ, ՀՀ քաղաքացի, ութամյա կրթությամբ, ամուսնացած, խնամքին երեք անձ, չի աշխատում, նախկինում չդատված, հաշվառված և բնակվում է Մասիսի շրջանի Ազատաշեն գյուղի 4-րդ փողոցի թիվ 4 տանը, մեղադրվում է ՀՀ քրեական օրենսգրքի 268 հոդվածի 1-ին մասով,

Պ Ա Ր Զ Ե Ց
1.Գործի դատավարական նախապատմությունը.
2010թ. մարտի 29-ին ՀՀ ոստիկանության Երևան քաղաքի ՔՎ Քանաքեռ-Զեյթուն քննչական բաժնում ՀՀ քրեական օրենսգրքի 268 հոդվածի 1-ին մասի հատկանիշներով հարուցվել է թիվ 09107510 քրեական գործը:
2010թ. ապրիլի 01-ին Տարոն Մանուկի Գաբրիելյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 268 հոդվածի 1-ին մասով, նրա նկատմամբ որպես խափանման միջոց ընտրվել է ստորագրություն չհեռանալու մասին:
2010թ. մայիսի 31-ին թիվ 09107510 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2010թ. մայիսի 31-ին քրեական գործը վարույթ է ընդունվել և նշանակվել դատական քննության 2010թ. հունիսի 14-ին:
2.Գործի փաստական հանգամանքները.
Նախաքննության մարմինն ամբաստանյալ Տարոն Մանուկի Գաբրիելյանին մեղադրանք է առաջադրել հետևյալ արարքի համար.
Տարոն Գաբրիելյանն, առանց իրացնելու նպատակի, Ազատաշեն գյուղի իր հողամասի մերձակայքից քաղելով կանեփի թուփ, դրանից ապօրինի պատրաստել և իր մոտ է պահել զգալի չափի հասնող` 1,4 գրամ հաստատուն քաշով չորացված ՙմարիխուանա՚ տեսակի թմրամիջոց, որը 2010թ. մարտի 27-ին հայտնաբերվել է նրա անձնական խուզարկությամբ ոստիկանության աշխատակիցների կողմից:
3.Ապացույցների հետազոտում.
Առաջադրված մեղադրանքում ամբաստանյալ Տարոն Գաբրիելյանն իրեն լիովին մեղավոր է ճանաչել և հրաժարվելով ցուցմունք տալուց հայտարարել, որ պնդում է նախաքննության ժամանակ տված ցուցմունքն այն մասին, որ 2009թ. նոյեմբեր ամսին, կոնկրետ օրը չի հիշում, Ազատաշեն գյուղի իր արտը ջրելու ժամանակ կողքի արտից քաղել է կանեփի բույսի սածիլ, որից չորացնելու եղանակով պատրաստել է մարիխուանա տեսակի թմրամիջոց և մեկ անգամ օգտագործել այն` ծխելու եղանակով, իսկ մնացածը պահել իր մոտ` բաճկոնի գրպանում: 27.03.2010թ. ընկերների` Արամ Սեդրակյանի, Ռազմիկ Սեդրակյանի, Սամվել Երիցյանի, Էդգար Սեդրակյանի հետ հիվանդ ընկերոջը` Տիգրան Տիգրանյանին, Երևանի ՙսրտաբանական՚ ինստիտուտ տեսակցության գնալու ժամանակ, երբ ոստիկանության աշխատակիցներն իրենց տարել են ոստիկանության Քանաքեռ-Զեյթուն բաժին, իր անձնական խուզարկությամբ բաճկոնի գրպանից հայտնաբերվել է պահած մարիխուանա տեսակի թմրամիջոցը: Զղջում է կատարածի համար:
Ամբաստանյալի կատարած հանցանքը նրա խոստովանական ցուցմունքից բացի հիմնավորվել է նաև քրեական գործով ձեռք բերված հետևյալ ապացույցներով.
Վկա Արմեն Տիգրանի Սարգսյանի նախաքննության ընթացքում տված և դատաքննության ընթացքում հետազոտված ցուցմունքով այն մասին, որ 2010թ. մարտ մասին, կոնկրետ օրը չի հիշում, ոստիկանության աշխատակիցների կողմից որպես ընթերակա հրավիրվել է ոստիկանության Քանաքեռ-Զեյթուն բաժնի թիվ 42 աշխատասենյակ, որտեղ իր և իրեն անծանոթ մեկ այլ քաղաքացու ներկայությամբ կատարված Տարոն անունով, ազգանունը չի հիշում, մարդու անձնական խուզարկության ժամանակ վերջինիս բաճկոնի վերևի գրպանից հայտնաբերվել է թերթի թղթի մեջ փաթաթված դեղնականաչավուն զանգված: Այդ մարդը` Տարոնը, հայտարարել է, որ իր անձնական խուզարկությամբ հայտնաբերված դեղնականաչավուն զանգվածը հանդիսանում է մարիխուանա տեսակի թմրանյութ:
Տ.Գաբրիելյանի անձնական խուզարկություն կատարելու մասին արձանագրությամբ, համաձայն որի 27.03.2010թ. ժամը 2325-ին, Քանաքեռ-Զեյթուն բաժնի թիվ 42 աշխատասենյակում ընթերականներ Արմեն Տիգրանի Սարգսյանի և Արմեն Վոլոդյայի Արշակյանի ներկայությամբ կատարված Տարոն Մանուկի Գաբրիելյանի անձնական խուզարկությամբ վերջինիս բաճկոնի ձախ վերևի գրպանից հայտնաբերվել է թերթի թղթի մեջ փաթաթված մոտ 1,8 գրամ քաշով դեղնականաչավուն զանգված, որն առգրավվել, փաթեթավորվել և կնիքվել է բաժնի կնիքով` ՀՀ ոստիկանության ՓՔՎ ուղարկելու համար: Տ.Գաբրիելյանը հայտարարել է, որ իր անձնական խուզարկությամբ հայտնաբերված ղեղնականաչավուն զանգվածը հանդիսանում է մարիխուանա տեսակի թմրամիջոց, որը պատկանում է իրեն:
Քննչական փորձարարություն կատարելու արձանագրությամբ, համաձայն որի Տ.Գաբրիելյանը մատնացույց անելով Խաչպար գյուղի ուղղությամբ Ազատաշեն գյուղի վերջնամասում գտնվող խաչմերուկից դեպի աջ թեքվող ճանապարհից 290 մետրի վրա գտնվող դաշտի եզրային հատվածը, հայտարարել է, որ 2009թ. նոյեմբեր ամսին, կոնկրետ օրը չի հիշում, նշված վայրից քաղել է կանեփի բույսի սածիլ, որից չորացնելու եղանակով պատրաստել և իր մոտ է պահել մարիխուանա տեսակի թմրամիջոց, որն էլ 27.03.2010թ. հայտնաբերվել է ոստիկանության աշխատակիցների կողմից իր անձնական խուզարկությամբ:
27.03.2010թ. Տ.Գաբրիելյանի անձնական խուզարկությամբ հայտնաբերված ու իրեղեն ապացույց ճանաչված 1,4 գրամ հաստատուն քաշով չորացված մարիխուանա տեսակի թմրամիջոցի առկայությամբ:
Դատաքիմիական փորձաքննության 29.03.2010թ. թիվ 174 Ք եզրակացությամբ, համաձայն որի փորձաքննությանը ներկայացված ընդհանուր 1,65 գրամ հաստատուն քաշով խառնուրդը հանդիսանում է 1,4 գրամ քաշով չորացված մարիխուանա տեսակի թմրամիջոցի և 0,25 գրամ քաշով թութունի մասնիկների խառնուրդ: Թութունի մասնիկները թմրամիջոց չեն հանդիսանում:
Դատաքիմիական փորձաքննության 06.04.2010թ. Հմ 0224 եզրակացությամբ, համաձայն որի 28.03.2010թ. Տարոն Մանուկի Գաբրիելյանի մեզի փորձանմուշում հայտնաբերվել են կանաբիսի խմբի թմրամիջոցի թմրալկալոիդներ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Տարոն Մանուկի Գաբրիելյանին առաջադրված մեղադրանքը ՀՀ քրեական օրենսգրքի 268 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 268 հոդվածի 1-ին մասի հատկանիշներին և արարքի որակումը ճիշտ է:
Տարոն Գաբրիելյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, բնութագրվում է դրական, խնամքին են գտնվում տասնվեց և ինը տարեկան երկու երեխաները, երկրորդ խմբի հաշմանդամ մայրը, որոնց միակ կերակրողն ինքն է:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Տարոն Գաբրիելյանը ենթակա է քրեական պատասխանատվության և պատժի:
Դատարանը հաշվի առնելով հանցավորի անձը բնութագրող, պատասխանատվությունն ու պատիժը մեղմացնող վերը նշված հանգամանքները, ինչպես նաև պատասխանատվությունն ու պատիժը ծանրացնող հանգամանքների բացակայությունը, հանգում է հետևության, որ Տարոն Գաբրիելյանի ուղղվելը հնարավոր է առանց պատիժը կրելու` պայմանականորեն պատիժը չկիրառելու պայմաններում:
Դատարանն անդրադառնալով իրեղեն ապացույցների տնօրինման հարցին, գտնում է, որ գործով իրեղեն ապացույց ճանաչված` 1,4 գրամ հաստատուն քաշով չորացված մարիխուանա տեսակի թմրամիջոցը և քննչական փորձարարությամբ Տ.Գաբրիելյանի մատնացույց արած վայրից հայտնաբերված 4,6 գրամ քաշով կանեփի բույսի սացիլը պետք է ոչնչացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը
Վ Ճ Ռ Ե Ց

Տարոն Մանուկի Գաբրիելյանին մեղավոր ճանաչել ՀՀ քրեական օրենսգրքի 268 հոդվածի 1-ին մասով և նրան դատապարտել ազատազրկման վեց (6) ամիս ժամկետով:
Կիրառել ՀՀ քրեական օրենսգրքի 70 հոդվածը և Տարոն Մանուկի Գաբրիելյանի նկատմամբ ազատազրկման ձևով նշանակված պատիժը պայմանականորեն չկիրառել` սահմանելով փորձաշրջան մեկ (1) տարի ժամկետով:
Տարոն Գաբրիելյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Իրեղեն ապացույց ճանաչված` 1,4 գրամ հաստատուն քաշով չորացված մարիխուանա տեսակի թմրամիջոցը և քննչական փորձարարությամբ հայտնաբերված 4,6 գրամ քաշով կանեփի բույսի սացիլը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ