Գործ ԵԱՔԴ 0035/01/10


Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

10.12.2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը`
նախագահությամբ դատավոր` Ս.Հովսեփյանի
քարտուղարությամբ` Ս. Արտաշեսյանի

մասնակցությամբ`
մեղադրող` Ռ.Խաչատրյանի
ամբաստանյալ` Թ.Եգանյանի
պաշտպան` Ա.Ալվանդյանի
տուժող և քաղաքացիական
հայցվոր` Ա.Թաշչյանի
տուժողի և քաղաքացիական
հայցվորի ներկայացուցիչ` Ա.Դաբաղյանի



Դռնբաց դատական նիստում քննեց քրեական գործն ըստ մեղադրանքի`
Թերեզա Անուշավանի Եգանյանի, ծնված 05.02.1950 թվականին, Երևան քաղաքում, ազգությամբ հայ, Հայաստանի Հանրապետության քաղաքացի, բարձրագույն կրթությամբ, ամուսնացած, նախկինում չդատված, չի աշխատում, բնակվում է Երևան քաղաքի Ն.Դուման 53 շենքի, 26 բնակարանում:

Մեղադրվում է ՀՀ քրեական օրենսգրքի 178 հոդվածի 3-րդ մասի 1-ին կետով:
03.03.2009 թվականին որպես խափանման միջոց է ընտրվել ստորագրություն չհեռանալու մասին:
ՊԱՐԶԵՑ

1. Գործի դատավարական նախապատմությունը.
Սույն քրեական գործը հարուցվել է Արաբկիրի քննչական բաժնի քննիչ Ռ.Համբարձումյանի 13.08.2009 թվականի որոշմամբ:
Թերեզա Եգանյանին մեղադրանք է առաջադրվել ՀՀ քրեական օրենսգրքի 178 հոդվածի 3-րդ մասի 1-ին կետով:
Մեղադրական եզրակացությունն ուղարկվել է դատարան 29.03.2010 թվականին:

2. Ապացույցների հետազոտում և գնահատում.
Հետազոտելով քրեական գործով դատաքննությամբ ձեռք բերված ապացույցները դատարանը հաստատված համարեց հետևյալը.
Ամբաստանյալ Թերեզա Եգանյանը գտնվելով նյութական ծանր վիճակում և տեղեկանալով, որ 2005 թվականի աշնանը Հայաստանի Հանրապետությունում բիզնես հիմնելու և տուն կառուցելու նպատակով Ամերիկայի Միացյալ Նահանգներից Հայաստանի Հանրապետություն է վերադարձել իր մորաքրոջ աղջկա` գործով վկա Կատերինա Թադևոսյանի փեսան՝ գործով տուժող Ավետիս Թաշչյանը և վերը նշված գործընթացները իրականացնելու համար իր հետ գումար է բերել Հայաստանի Հանրապետություն` մտադրվել է Ավետիս Թաշչյանի հետ ծանոթանալ և վստահություն ներշնչելով խաբեությամբ տիրանալ նրա մոտ առկա գումարներին։Այդ նպատակով Կատերինա և Լևոն Թադևոսյանների միջոցով ծանոթացել է Ավետիս Թաշչյանի հետ, ստեղծել է ջերմ բարեկամական հարաբերություններ և 2005 թվականի աշնան ամիսների ընթացքում նրան հայտնելով, որ ինքը զբաղվում է Թուրքիայի Հանրապետությունից մեծաքանակ շինապրանքների ներկրմամբ և դրանց վաճառքով, առաջարկել է Ավետիս Թաշչյանին 50.000 ԱՄՆ դոլար գումար ներդնել իր կողմից ծավալած բիզնեսի մեջ, որի դիմաց ամսական 3.000 ԱՄՆ դոլար եկամուտ կստանա։Նշել է նաև, որ նշված գումարը ներդնելու համար որպես երաշխիք իրեն պատկանող Երևան քաղաքի Զարոբյան փողոցի 62 շենքի 3-րդ բնակարանը կանվանափոխի Ա.Թաշչյանի անունով։Ոչինչ չկասկածելով Ավետիս Թաշչյանը համաձայնվել է Թերեզա Եգանյանի առաջարկին: Միաժամանակ պայմանավորվել են Ա.Թաշչյանի կողմից Թ.Եգանյանին գումար տալու ժամանակ կնքվել փոխառության պայմանագիր և Թ.Եգանյանի անվամբ բնակարանը անվանափոխել Ա.Թաշչյանի անունով։
2006 թվականի հունվարի 9-ին գումարը պարտքով տալու մասին փոխառության պայմանագիրը կնքելու և վերը նշված տունը անվանափոխելու համար Թերեզա Եգանյանը, վերջինիս ամուսինը՝ էդուարդ Եգանյանը, Ավետիս Թաշչյանը և նրա կնոջ հայրը՝ Լևոն Թադևոսյանը գնացել են ՀՀ Կենտրոնական նոտարական գրասենյակ։
Նոտարական գրասենյակում Ա.Թաշչյանը նկատել է, որ իր անձնագիրը մոռացել է տանը և քանի որ նույն պահին էլ Թերեզա Եգանյանը հայտնել է, որ բնակարանն ամուսնու՝ Է.Եգանյանի անունով է, առաջարկել է, որպեսզի պայմանագիրը կնքվի Լևոն Թադևոսյանի և էդուարդ Եգանյանի միջև, պատճառաբանելով, որ հետագայում բնակարանի վերաբերյալ պայմանագիր կնքելիս անուն-ազգանունների տարբերություններ չլինեն: Այնուհետև Թ.Եգանյանը մտացածին պատճառաբանություններ է բերել, հայտնելով, որ վերը նշված բնակարանն ունի այլ համասեփականատերեր, որոնք գտնվում են ՌԴ-ում և ինքը չի կարողացել ձեռք բերել նրանց համաձայնությունը բնակարանը Ա.Թաշչյանի անունով վերաձևակերպելու համար: Նշված պատճառանությունները լսելով Ա.Թաշչյանը հրաժարվել է Թ.Եգանյանին գումար տալ, սակայն տեղի տալով Թ.Եգանյանի հորդորներին, համաձայնվել է Թ.Եգանյանին պարտքով մինչ 2007 թվականի հունվարի 9-ը տալ 22 500 000 ՀՀ դրամ գումար և այդ կապակցությամբ Լ.Թադևոսյանի ու Էդուարդ Եգանյանի միջև 09.01.2006 թվականին կնքվել է փոխառության պայմանագիր: Թ.Եգանյանի բնակարանում, Ա.Թաշչյանը Թ.Եգանյանին առձեռն հանձնել է 22 500 000 ՀՀ դրամ գումարը: Հաջորդած ամիսների ընթացքում Թ.Եգանյանը Ա.Թաշչյանին տարբեր կեղծ ու մտացածին պատճառաբանություններ բերելով անընդհատ ձգձգել է տան անվանափոխության և Ա.Թաշչյանին բիզնեսում ներգրավելու հարցը: Իսկ 2006 թվականի նոյեմբերի 23-ին նշված բնակարանը գրավադրել է ՙՆորվիկ՚ ՈՒՎԿ ՓԲԸ-ում: Այդ պատճառով էլ Ա.Թաշչյանը ցանկացել է հանդիպել Թ.Եգանյանի ամուսնուն` Է.Եգանյանին: Թ.Եգանյանը ցանկանալով Է.Եգանյանին ազատել Ա.Թաշչյանի ներկայացրած պահանջներից, վերջինիս կրկին պատճառաբանել է, որ գումարը կվերադարձնի և Ա.Թաշչյանին համոզել է կնքել նոր փոխառության պայմանագիր, սակայն այդ անգամ` իր և Ա.Թաշչյանի միջև: Ա.Թաշչյանը կրկին հավատալով Թ.Եգանյանին` 12.01.2007 թվականին Կենտրոնական նոտարական գրասենյակում կնքել է նոր պայմանագիր, նույն գումարի վերաբերյալ` արդեն մինչև 2009 թվականի հունվարի 12-ը վերադարձնելու պայմանով: Պայմանագիրը կնքելուց հետո, որոշ ժամանակ անց, Ա.Թաշչյանը տեղեկացել է, որ Թ.Եգանյանն իր բնակարանն արդեն իսկ վաճառել է և համոզվելով, որ Թ.Եգանյանը իր վստահությունը չարաշահելու եղանակով խաբեությամբ տիրացել է իր կողմից տված 22 500 000 ՀՀ դրամ գումարին, փոխառության պայմանագրի ժամկետը լրանալուց և Թ.Եգանյանին տրված գումարը հետ չստանալուց հետո վերջինիս կողմից խարդախություն կատարելու վերաբերյալ հաղորդում է ներկայացրել ոստիկանության Արաբկիրի բաժին:

Վերը նշված արարքի համար Թերեզա Եգանյանին մեղադրանք է առաջադրվել ՀՀ քրեական օրենսգրքի 178 հոդվածի 3-րդ մասի 1-ին կետով
Ամբաստանյալ Թերեզա Եգանյանը նախաքննության ընթացքում իրեն մեղավոր էր ճանաչել և հայտնել էր, որ 25.06.1985 թվականին երեխա չունենալու պատճառով որդեգրել է Տաթևիկ Եգանյանին: 2004-2005 թվականներին, կոնկրետ ժամանակահատվածը չի հիշում, Թուրքիայի Հանրապետությունից վերադառնալով տուն տեղեկացել է, որ դուստրը` Տաթևիկ Եգանյանը խաղատներում խաղալու հետևանքով մոտ 90.000 ԱՄՆ դոլար գումար է տարվել։Հայտնվելով ծանր ֆինանսական պայմաններում և միաժամանակ տեղեկանալով, որ ԱՄՆ-ից ՀՀ է վերադարձել իր մորաքրոջ աղջկա փեսան՝ Ավետիս Թաշչյանը մտադրվել է նրա վստահությունը չարաշահելու եղանակով խարդախությամբ նրանից գումար հափշտակել։Այդ նպատակով ծանոթացել է Ա.Թաշչյանի հետ և առաջարկել է նրան գումար ներդնել իր կողմից ծավալած բիզնեսում, որի դիմաց ամսական վերջինս որպես եկամուտ պետք է ստանար 3.000 ԱՄՆ դոլար գումար։ Բացի այդ առաջարկել է կնքել փոխառության պայմանագիր և իրեն պատկանող Երևան քաղաքի Զարոբյան փողոցի 62 շենքի թիվ 3 բնակարանը որպես երաշխիք անվանափոխել Ա.Թաշչյանի անունով։2006 թվականի հունվարի 9-ին վերջինիս հետ հանդիպել են Կենտրոնական նոտարական գրասենյակում, որտեղ բնակարանը չանվանափոխելու համար ինքը մտացածին պատճառաբանություններ է բերել, հայտնելով, որ բնակարանն ունի այլ համասեփականատերեր և դեռևս չի կարողացել ձեռք բերել նրանց համաձայնությունը և առաջարկել է կնքել միայն գումարը պարտքով տալու վերաբերյալ փոխառության պայմանագիր։Նշված նոտարական գրասենյակում ներկա են եղել նաև իր ամուսինը՝ էդուարդ Եգանյանը, Ավետիս Թաշչյանը և նրա կնոջ հայրը՝ Լևոն Թադևոսյանը։Նոտարական գրասենյակում Ա.Թաշչյանը նկատել է, որ իր անձնագիրը մոռացել է տանը և քանի որ նույն պահին էլ ինքը հայտնել է, որ բնակարանն ամուսնու՝ Է.Եգանյանի անունով է, առաջարկել է, որպեսզի պայմանագիրը կնքվի Լևոն Թադևոսյանի և էդուարդ Եգանյանի միջև՝ պատճառաբանություն բերելով, որ հետագայում բնակարանի վերաբերյալ պայմանագիր կնքելիս անուն-ազգանունների տարբերություններ չլինեն։Նշված պայմանագիրը կնքելուց հետո գնացել են իր բնակարան, որտեղ Ա.Թաշչյանից առձեռն ստացել է 22.500.000 ՀՀ դրամ գումար։Նշված գումարն ինքը տվել է պարտատերերին և չի կատարել Ա.Թաշչյանին տված խոստումները, իսկ հետագայում անընդհատ վերջինիս ստել է՝ ներկայացնելով տարբեր պատճառաբանություններ, իբրև թե չի կարողանում բնակարանի անվանափոխության համար համապատասխան փաստաթղթեր ապահովել։Հետագայում վերը նշված բնակարանը գրավադրել է ՙՆորվիկ՚ ՈՒՎԿ ՓԲԸ-ում և չկարողանալով մարել վարկը բնակարանը դարձել է բանկի սեփականությունը։
Ինքը մինչ Ա.Թաշչյանից գումարը վերցնելը մտադրություն ունեցել է վերջինիս վստահությունը չարաշահելու եղանակով խարդախությամբ տիրանալ նրա գումարին։Ինքը զղջացել է կատարած հանցագործության համար։
Ամբաստանյալ Թերեզա Եգանյանը դատաքննության սկզբում իրեն մեղավոր չճանաչեց, հայտնելով, որ ինքը խարդախություն չի կատարել, նշված գումարները վերցրել է ամսական 5% տոկոսադրույքով, որպիսի փաստը կարող են հաստատել վկաները: Եվ թեև դատարանի արձանագրային որոշմամբ նրա միջնորդությունը բավարարվել էր և դատարան էին հրավիրվել նրա կողմից մատնանշած վկաները, սակայն դատաքննության վերջում միջնորդեց վկաներին չհարցաքննել և դատարանում հայտարարեց իր մեղավորության մասին:
Ամբաստանյալ Թերեզա Եգանյանի կատարած հանցանքը հիմնավորված է ինչպես իր ինքնախոստովանական ցուցմունքով, այնպես էլ գործով ձեռք բերված հետևյալ ապացույցներով`
Քրեական գործով տուժող և քաղաքացիական հայցվոր Ավետիս Թաշչյանի ցուցմունքով այն մասին, որ 1990 թվականից մշտական բնակություն է հաստատել Ամերիկայի Միացյալ Նահանգներում, որտեղ աշխատել է և գումար վաստակել։2005 թվականի սեպտեմբեր ամսին վերադարձել է Հայաստանի Հանրապետություն, որտեղ ցանկացել է գումար ներդնել, զբաղվել բիզնեսով և տուն կառուցել։2005 թվականի նոյեմբեր կամ դեկտեմբեր ամիսներին, կնոջ մոր՝ Կարինա Թադևոսյանի մորաքրոջ աղջիկը՝ Թերեզա Եգանյանը, բարեկամական խոսակցություններից տեղեկացել է, որ ինքը իր հետ ԱՄՆ-ից գումար է բերել և և դիմել է Լևոն Թադևոսյանին որպեսզի վերջինս իրենից պարտքով գումար վերցնի և փոխանցի Թ.Եգանյանին։Լևոն Թադևոսյանը Թերեզա Եգանյանի խնդրանքը փոխանցել է իրեն և ինքը նրան պատասխանել է, որ կհանդիպի Թերեզա Եգանյանի հետ և կքննարկի այդ հարցը։Դրանից մի քանի օր անց հանդիպել է Թերեզա Եգանյանին, ծանոթացել է նրա հետ և քննարկել են Թերեզա Եգանյանին պարտքով գումար տալու հարցը։Քննարկման արդյունքում Թերեզա Եգանյանը խնդրել է 22.500.000 ՀՀ դրամ՝ դրա դիմաց խոստանալով որպես երաշխիք Զարոբյան փողոցի 62 շենքի իր թիվ 3-րդ բնակարանը անվանափոխել իր անունով։Բացի այդ հայտնել է, որ ինքը զբաղվում է բիզնեսով, ապրանքներ է ներմուծում արտասահմանից և խոստացել է իր կողմից տված գումարը ներդնել այդ բիզնեսի մեջ, որի դիմաց ինքը կստանա ամսական 3.000 ԱՄՆ դոլար եկամուտ։Հավատալով Թերեզա Եգանյանին ու ոչինչ չկասկածելով խոստացել է նրան օգնել և միաժամանկ պայմանավորվել, որ գումարը տալու դիմաց որպես երաշխիք Թ.Եգանյանի կողմից նշված բնակարանը կանվանափոխվի իր անվամբ։Այնուհետև իր մոտ առաջացրած վստահությունը ամրապնդելու համար Թ.Եգանյանն անընդհատ զանգահարել է և զրուցել կնոջ՝ Ասպրամ Թադևոսյանի հետ՝ ստեղծելով ջերմ բարեկամական հարաբերություններ։2006 թվականի հունվար ամսվա սկզբներին Թերեզա Եգանյանն իրեն հյուրընկալել է, որի ընթացքում պայմանավորվել են 2006 թվականի հունվարի 9-ին գնալ նոտարական գրասենյակ և կնքել համապատասխան պայմանագիր տունը անվանափոխելու և նշված 22.500.000 ՀՀ դրամ գումարն իր կողմից պարտքով Թերեզա Եգանյանին հանձնելու մասին։
2009 թվականի հունվարի 9-ին ինքը, Լևոն Թադևոսյանը, Թերեզա Եգանյանը և նրա ամուսինը՝ էդուարդ Եգանյանը գնացել են Երևան քաղաքի Կենտրոնական նոտարական գրասենյակ` տան անվանափոխության և գումարը տալու մասին փոխառության պայմանագրերը կնքելու համար։Նոտարական գրասենյակում Թերեզա Եգանյանը հայտնել է, որ իր վերը նշված բնակարանն ունի մեկ այլ համասեփականատեր, որը գտնվում է Ռուսաստանի Դաշնությունում և նա չի կարողացել ստանալ նրա համաձայնությունը՝ բնակարանը անվանափոխելու համար, ապա առաջարկել է կնքել միայն գումարը տալու վերաբերյալ փոխառության պայմանագիր, իսկ տան անվանափոխությունը խնդրել է հետաձգել` մինչև համապատասխան փաստաթղթերի հարցը լուծելը: Ինքը մի պահ ցանկացել է հրաժարվել, սակայն տեսնելով, որ Թերեզա Եգանյանը մեջբերելով բարեկամական հարաբերություները նեղանում է, համաձայնվել է կնքել փոխառության պայմանագիր։Նույն պահին ինքը հայտնաբերել է, որ անձնագիրը մոռացել է տանը և ժամանակ չկորցնելու համար պայմանավորվել են, որ պայմանագիրը կնքվի Լևոն Թադևոսյանի անունով, քանի որ նրա անձնագիրը նրա մոտ է եղել։Թերեզա Եգանյանն էլ պատճառաբանելով, որ բնակարանը էդուարդ Եգանյանի անունով է ու քանի որ հետագայում բնակարանի անվանափոխության պայմանագիր պետք է կնքվեր նրա անունով առաջարկել է փոխառության պայմանագիրը կնքել Լևոն Թադևոսյանի և ամուսնու` էդուարդ Եգանյանի միջև։Ընդհանուր համաձայնության գալով և պայմանագիրը կնքելուց հետո իրենք գնացել են` Երևան քաղաքի Զարոբյան փողոցի 62 շենքի Թերեզա Եգանյանին պատկանող թիվ 3 բնակարան, որտեղ էլ ինքը Թերեզա Եգանյանին առձեռն տվել է 22.500.000 ՀՀ դրամ գումար։Պայմանագիրը կնքելուց հետո, հաջորդած օրերի ընթացքում ինքն անընդհատ Թերեզա Եգանյանին հիշեցրել է տան անվանափոխության մասին, սակայն վերջինս անընդհատ պատճառաբանել է, որ ինքը զբաղվում է բնակարանի փաստաթղթերը պատրաստելով, սպասում է մյուս համասեփականատիրոջ կողմից համաձայնագիրն ուղարկելուն և այլն, իսկ որոշ ժամանակ անց հայտնել է, որ նշված մյուս համասեփականատերը համաձայնություն չի տալիս, որ նշված բնակարանը անվանափոխվի և միաժամանակ խոստումներ տալով, որ այդ հարցը կլուծի։Մոտ երեք ամիս անց ինքը կողմնակի խոսակցություններից տեղեկացել է, որ Թերեզա Եգանյանը նշված բնակարանը անվանափոխել է ուրիշ անձնավորության անունով և գրավադրել բանկում։Այդ իմանալով ինքը հանդիպել է Թերեզա Եգանյանին և նրանից պարզաբանումներ պահանջել։Վերջինս հայտնել է, որ դա ձևական բնույթ է կրում, այդ անձնավորությունը իր գործընկերն է և դա անհրաժեշտ է եղել բիզնեսի համար ու խոստացել է, որ գումարը շուտափույթ կվերադարձնի։Այդպես տարբեր պատճառաբանություններ բերելով անցել է մոտ մեկ տարի ժամանակ և տեսնելով, որ Թ.Եգանյանը մտադրություն չունի գումարը վերադարձնել սկսել է այն պահանջել նրա ամուսնուց՝ էդուարդ Եգանյանից։Դրանից հետո, Թերեզա Եգանյանը կրկին սկսել է համոզել ու վստահեցնել, որ գումարը կվերադարձնի ու խնդրել է կրկին գնալ նոտարական գրասենյակ և նոր պայմանագիր կնքել այդ անգամ արդեն իրենց միջև նույն գումարի չափով և երկու տարի ժամկետով։Այլ ելք չունենալով, ինքը համաձայնվել է Թերեզա Եգանյանի առաջարկին և 2007 թվականի հունվարի 12-ին ՀՀ Կենտրոն նոտարական գրասենյակում կնքվել է նոր փոխառության պայմանագիր։Պայմանագիրը կնքելուց հետո Թերեզա Եգանյանը, կրկին տարբեր պատճառաբանություններ ներկայացնելով, շարունակել է ստել և գումարը չվերադարձնել և ինքը համոզվելով, որ Թ.Եգանյանը իր վստահությունը չարաշահելու եղանակով խաբեությամբ տիրացել է իր գումարին, հաղորդում է ներկայացրել ոստիկանության Արաբկիրի բաժին։
Տուժողի ներկայացուցիչը պնդեց քաղաքացիական հայցը, հայտնելով, որ Թերեզա Եգանյանի կողմից հանցավոր արարքի հետևանքով պատճառված վնասի հատուցում մինչ օրս չի կատարվել, և ղեկավարվելով ՀՀ քրեական դատավարության օրենսգրքի 154 հոդվածով, 158 հոդվածով, 163 հոդվածով ՀՀ քաղաքացիական օրենսգրքի 17 հոդվածով, 1058 հոդվածի 1-ին մասով, խնդրեց բավարարել հայցապահանջը և Թերեզա Եգանյանից հօգուտ Ավետիս Թաշչյանի բռնագանձել 22.500 000 ՀՀ դրամ՝ որպես հանցագործությամբ պատճառված վնաս:

Քրեական գործով վկաներ Լևոն Թադևոսյանի, Կատերինա Թադևոսյանի, Ասպրամ Թաևոսյանի նույնաբովանդակ ցուցմունքներով:

Քրեական գործով վկա Ռաֆայել ժիրայրի Վանյանի ցուցմունքով այն մասին, որ 2007 թ. կոնկրետ ամիսը և օրը չի հիշում, Ավետիս Թաշչյանի հետ միասին գնացել է Թերեզա Եգանյանի բնակարան, որտեղ Լ.Թաշչյանը Թ.Եգանյանից իր ներկայությամբ պահանջել է նրա կողմից Թ.Եգանյանին պարտքով տված 50.000 ԱՄՆ դոլար գումարը, սակայն Թ.Եգանյանը սկսել է Ա.Թաշչյանին համոզել, որ բնակարանը անպայման կանվանափոխի Ա.Թաշչյանի անունով կամ կվերադարձնի գումարը։Հետագայում Ա.Թաշչյանից տեղեկացել է, որ այդ ժամանակ արդեն Թ.Եգանյանն իր բնակարանը գրավադրած է եղել և ստել է Ա.Թաշչյանին։

Քրեական գործով վկա Սիլվա Ստեփանյանի ցուցմունքով այն մասին, որ Թերեզա Եգանյանը իր վաղեմի ծանոթն է և նրանք գտնվել են գործընկերական հարաբերությունների մեջ։ Ինքը տեղյակ է, որ Թերեզա Եգանյանի աղջիկը` Տաթևիկ Եգանյանը մոտ 90.000 ԱՄՆ դոլար գումար է տարվել խաղատներում և այդ պարտքը վճարելու համար Թերեզա Եգանյանը Ավետիս Թաշչյանից խաբեությամբ հափշտակել է 22.500.000 ՀՀ դրամ:


3. Դատարանի իրավական վերլուծությունները.
Այսպիսով, դատարանը գնահատելով դատաքննությամբ ձեռք բերված ապացույցները, գտնում է, որ ամբաստանյալին առաջադրված մեղադրանքը` ՀՀ քրեական օրենսգրքի 178 հոդվածի 3-րդ մասի 1-ին կետով, հիմնավորված է` նրա կողմից կատարված արարքը համապատասխանում է ՀՀ քրեական օրենսգրքի 178 հոդվածի 3-րդ մասի 1-ին կետի հատկանիշներին, և արարքի որակումը` ճիշտ է:
Պատիժ նշանակելիս դատարանը հաշվի է առնում հանցավորի անձը, ինչպես նաև արարքի հասարակական վտանգավորության աստիճանն ու բնույթը: Որպես պատասխանատվությունը և պատիժը մեղմացնող հանգամանք դիտվում է այն, որ ամբաստանյալը նախկինում դատված չի եղել, բնութագրվում է դրական: Պատասխանատվությունը ծանրացնող հանգամանքներ չկան:
Սույն քրեական գործով տուժող Ավետիս Թաշչյանը ներկայացրել է քաղաքացիական հայց` ամբաստանյալ Թերեզա Եգանյանից պահանջելով հանցագործությամբ իրեն պատճառված վնասը` 22 500 000 ՀՀ դրամի չափով, որը գործով ձեռք բերված ապացույցներով հաստատվեց:
Ելնելով նշվածից դատարանը գտնում է, որ Թերեզա Եգանյանի դեմ ներկայացված Ավետիս Թաշչյանի քաղաքացիական հայցի պահանջը պետք է բավարարել և Թերեզա Եգանյանից հօգուտ Ավետիս Թաշչյանի, որպես հանցագործությամբ պատճառված վնաս, պետք է բռնագանձել 22 500 000 ՀՀ դրամ:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

ՎՃՌԵՑ

Թերեզա Եգանյանին մեղավոր ճանաչել Հայաստանի Հանրապետության քրեական օրենսգրքի 178 հոդվածի 3-րդ մասի 1-ին կետով և նրան դատապարտել ազատազրկման 4 (չորս) տարի ժամկետով:
Թերեզա Եգանյանի նկատմամբ ընտրված խափանման միջոցը` ստորագրություն չհեռանալու մասին թողնել անփոփոխ` մինչև դատավճռի օրինական ուժի մեջ մտնելը:
Ավետիս Թաշչյանի քաղաքացիական հայցը բավարարել` Թերեզա Եգանյանից հօգուտ Ավետիս Թաշչյանի, որպես հանցագործությամբ պատճառված վնաս, բռնագանձել 22 500 000 (քսաներկու միլիոն հինգ հարյուր հազար) ՀՀ դրամ:
Դատավճիռը կարող է բողոքարկվել ՀՀ վերաքննիչ քրեական դատարանին հրապարակման պահից մեկամսյա ժամկետում:



ԴԱՏԱՎՈՐ` Ս.ՀՈՎՍԵՓՅԱՆ