Գործ ԵԱՔԴ/0033/01/10







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

28 ապրիլի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

Նախագահությամբ դատավոր` Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ
Մեղադրող` Հ.Հարությունյանի
Պաշտպաններ` Է.Չինարյանի
Ա.Թովմասյանի

2010 թվականի ապրիլի 28-ին Երևան քաղաքում դռնբաց դատական նիստում արագացված դատական կարգով քննության առավ քրեական գործն ըստ մեղադրանքի
1. Հայկ Վոլոդյայի Սիմոնյանի ծնված 1975 թվականի սեպտեմբերի 17-ին, քաղաք Երևանում, ազգությամբ հայ, ՀՀ քաղաքացի, ամուսնացած, խնամքին երեք երեխա, բարձրագույն կրթությամբ, ֆիզիկապես առողջ, չդատված, աշխատել է ՀՀ ոստիկանության Երևան քաղաքի վարչության Արաբկիրի բաժնի հետաքննության բաժնի հետաքննության բաժանմունքում, որպես ավագ տեսուչ, բնակվում է քաղաք Երևան, Ավան Դուրյան թաղամաս 31 շենքի 46 բնակարանում: Մեղադրվում է ՀՀ քրեական օրենսգրքի 309-րդ հոդվածի 1-ին մասով: Կալանքի տակ է 2010 թվականի հունվարի 11-ից:
2. Դավիթ Արիստակեսի Աթոյանի ծնված 1986 թվականի փետրվարի 17-ին, քաղաք Արտաշատում, հայ, ՀՀ քաղաքացի, ամուսնացած, խնամքին մեկ երեխա, բարձրագույն կրթությամբ, ֆիզիկապես առողջ, չդատված, աշխատել է ՀՀ ոստիկանության Երևան քաղաքի վարչության Շենգավիթի բաժնի հետաքննության բաժանմունքում որպես տեսուչ, հաշվառված է քաղաք Արտաշատ, Հր. Թովմասյան 3 շենք, բնակարան 17, ժամանակավորապես բնակվում է քաղաք Երևան, Սարի-Թաղ 22-րդ փողոցի 7-րդ տանը: Մեղադրվում է ՀՀ քրեական օրենսգրքի 308-րդ հոդվածի 1-ին մասով, որպես խափանման միջոց ընտրվել է ստորագրություն չհեռանալու մասին:
2010 թվականի հունվարի 13-ին Հայկ Վոլոդյայի Սիմոնյանին ՀՀ քրեական օրենսգրքի 309-րդ հոդվածի 1-ին մասով մեղադրանք է առաջադրել հետևյալ արարքի համար, որ ՙ… նա հանդիսանալով պաշտոնատար անձ` ՀՀ ոստիկանության Երևան քաղաքի վարչության Արաբկիրի բաժնի հետաքննության բաժանմունքի ավագ տեսուչ, դիտավորությամբ կատարել է իր լիազորությունների շրջանակից ակնհայտորեն դուրս եկած գործողություններ, որով էական վնաս է պատճառել անձանց և պետության օրինական շահերին՚: Այսպես.
Հայկ Սիմոնյանը ոստիկանության Արաբկիրի բաժնի պետի հրամանով իրականացրել է նույն բաժնի հետաքննության բաժանմունքի նորանշանակ տեսուչ Դավիթ Աթոյանի ղեկավար դաստիարակի պարտականությունները` վերջինիս ցուցաբերել մեթոդական և գործնական օգնություն:
2008թ. նոյեմբերի 24-ի լույս 25-ի գիշերը, Երևան քաղաքի Բաղրամյան պողոտայում գտնվող ՙՊիոներ՚ գիշերային ակումբում տեղի ունեցած միջադեպի վերաբերյալ Հովհաննես Վարդանյանի հաղորդման կապակցությամբ Դավիթ Աթոյանը նյութեր է նախապատրաստել, որի ընթացքում Հայկ Սիմոնյանը վերջինիս մեթոդական և գործնական օգնություն ցուցաբերելու փոխարեն, օգտվելով իր հանդեպ ունեցած վստահությունից, իրենց ցանկալի նպատակին հասնելու համար, չունենալով նման լիազորություն, դեպքի մասնակիցներից և ականատեսներից վերցրել է իրականությանը չհամապատասխանող, փաստական տվյալները էականորեն փոփոխված բովանդակությամբ բացատրություններ, որի հիման վրա հետաքննիչ Դավիթ Աթոյանի անունից որոշում է կայացվել քրեական գործի հարուցումը մերժելու մասին:
Հայկ Սիմոնյանն իր լիազորությունների շրջանակից ակնհայտորեն դուրս եկող գործողություններով դիտավորությամբ խախտել է ՀՀ քրեական դատավարության օրենգրքով սահմանված հետաքննության մարմինների գործառույթների վերաբերյալ նորմերի պահանջները` էական վնաս պատճառելով պետության և քաղաքացիների օրինական շահերին` արատավորել է ոստիկանության ծառայողի պատիվն ու արժանապատվությունը, հանցագործության հետևանքով տուժած անձանց զրկել է օրենսդրությամբ սահմանված իրենց իրավունքներից օգտվել՚:
2010 թվականի սեպտեմբերի 9-ին Դավիթ Արիստակեսի Աթոյանին ՀՀ քրեական օրենսգրքի 308-րդ հոդվածի 1-ին մասով մեղադրանք է առաջադրվել հետևյալ արարքի համար, որ ՙ… նա հանդիսանալով պաշտոնատար անձ` ՀՀ ոստիկանության Երևան քաղաքի վարչության Արաբկիրի բաժնի հետաքննության բաժանմունքի տեսուչ, անձնական շահագրգռվածությունից և խմբային շահերից ելնելով իր պաշտոնեական դիրքն օգտագործել է ծառայության շահերին հակառակ, որով էական վնաս է պատճառել անձանց և պետության օրինական շահերին: Այսպես.
Դավիթ Աթոյանը, ՀՀ ոստիկանության պետի հրամանով, 2008թ. օգոստոսին նշանակվել է ՀՀ ոստիկանության Արաբկիրի բաժնի հետաքննության բաժանմունքի տեսուչի պաշտոնում, ում ղեկավար-դաստիարակ պարտականությունները դրվել է նույն բաժանմունքի ավագ տեսուչ Հայկ Սիմոնյանի վրա:
ՙՊիոներ՚ գիշերային ակումբում դանակի գործոդրմամբ ակումբի անվտանգության աշխատակիցներին մարմնական վնասվածք պատճառելու դեպքի առթիվ նյութեր նախապատրաստելու ընթացքում նա, իր ղեկավար-դաստիարակ Հայկ Սիմոնյանի հանձնարարությամբ ու խնդրանքով, անձնական շահագրգռվածությունից ելնելով` նյութերում կատարել է բազմաթիվ կեղծիքներ, դիտավորյալ թույլ տվել դատավարության օրենսգրքի նորմերի կոպիտ խախտումներ:
Դավիթ Աթոյանը 2008թ. նոյեմբերի 25-ին Հովհաննես Վարդանյանից հիշյալ հանցագործության վերաբերյալ հաղորդում ընդունելու արձանագրության մեջ ՙդանակով հարվածել՚ արտահայտությունը փոփոխել ու դարձրել է ՙձեռքով հարվածել՚` կեղծ տեղեկություններ մտցնելով արձանագրության մեջ, որից հետո բաժնի պատասխանատու հերթապահի ստորագրմանն է ներկայացրել հանցագործության վերաբերյալ կեղծ տվյալներով ամփոփագիր` իբրև հանցագործության կատարման ընթացքում դանակ չի գործածվել:
Չնայած Հովհաննես Վարդանյանից, Սարգիս Հովհաննիսյանից, Նորայր Ղուկասյանից, Ալինա Կուրղինյանից, Մարիամ Սամվելյանից, արայիկ Պետրոսյանից բացատրություններ է վերցրել Հայկ Սիմոնյանը, սակայն դրանք իր ստորագրությամբ վավերացրել է Դավիթ Աթոյանը և լրացրել նրանց կենսագրական տվյալները:
Բացի այդ, հանցագործության մեջ կասկածվող Երվանդ Պետրոսյանի գրպանից առգրավված արնանման հետքերով ստրիպ-կտրոնները հետազոտման չի ենթարկվել, դրանք, ինչպես նաև առգրավված դանակը, նյութերին չի կցել, որոնք հետագայում կորել են:
Հանցագործության մասնակից Էռնեստ Պետրոսյանից բացատրություն ընդունելու արձանագրության մեջ քննչական գործողության ավարտից հետո իր ձեռքով ավելացրել է, թե իբր Է.Պետրոսյանը չի ցանկացել ներկայանալ դատաբժշկական փորձաքննության: Էռնեստ և Երվանդ Պետրոսյաններից բացատրություններ վերցնելու արձանագրություններում դարձյալ Հայկ Սիմոնյանի ցուցմունքով մտցրել է փաստական հանգամանքները փոփոխած տվյալներ:
Դավիթ Աթոյանն իր ստորագրությամբ վավերացրել և բաժնի պետի հաստատմանն է ներկայացրել Հայկ Սիմոնյանի կազմած, իրենց ցանկալի բովանդակությամբ, փաստական աղավաղված տվյալներով քրեական գործի հարուցումը մերժելու մասին որոշումը:
Դավիթ Աթոյանը չարաշահելով իր լիազորությունները, ապօրինի գործողություններով էական վնաս է պատճառել պետության և քաղաքացիների օրինական շահերին, արատավորել է ոստիկանության ծառայողի պատիվն ու արժանապատվությունը, հանցագործության հետևանքով տուժած անձանց զրկել է օրենսդրությամբ սահմանված իրենց իրավունքներից օգտվել՚:
Մինչև դատաքննության սկսելը ամբաստանյալ Հայկ Սիմոնյանը և Դավիթ Աթոյանը միջնորդեցին դատական քննությունն անցկացնել արագացված կարգով և հայտարարեցին, որ առաջադրված մեղադրանքներն իրենց պարզ է, համաձայն են իրենց առաջադրված մեղադրանքների հետ, գիտակցում են արագացված կարգով դատական քննություն անցկացնելու հետևանքները, առ այն, որ նրանք չեն կարող դատավճիռը բողոքարկել ՀՀ քրեական դատավարության օրենսգրքի 395-րդ հոդվածի 1-ին կետի նախատեսված հիմքով, միջնորդությունը ներկայացրել են կամավոր` պաշտպանների հետ խորհրդակցելուցհետո: Պաշտպաններ Է.Չինարյանը և Ա.Թովմասյանը միացան պաշտպանյալների միջնորդությանը և նույնպես խնդրեցին կիրառել արագացված դատական քննություն:
Մեղադրող Հ.Հարությունյանը, որը թեպետ մեղադրական եզրակացությունում առարկել էր արագացված կարգ կիրառելու դեմ, փոխեց իր դիրքորոշումը և խնդրեց կիրառել արագացված կարգ:
Դատարանը համոզվելով, որ առկա է ՀՀ քրեական դատավարության օրենսգրքի 375.1-րդ և 375.2-րդ հոդվածներով նախատեսված պայմանները, որոշում է կայացրել արագացված դատական քննություն անցկացնելու մասին:
Դատարանը հիմք ընդունելով մեադրանքի հիմքում դրված ապացույցները գտնում է, որ Հայկ Վոլոդյայի Սիմոնյանին ՀՀ քրեական օրենսգրքի 309-րդ հոդվածի 1-ին մասով և Դավիթ Արիստակեսի Աթոյանին ՀՀ քրեական օրենսգրքի 308-րդ հոդվածի 1-ին մասով առաջադրված մեղադրանքները հիմնավորված են:
Ամբաստանյալներ Հայկ Սիմոնյանի և Դավիթ Աթոյանի նկատմամբ պատիժ նշանակելիս դատարանը հաշվի է առնում մեղսագրվող արարքների հանրության համար վտանգավորության աստիճանը և բնույթը:
Պատասխանատվությունը և պատիժը մեղմացնող հանգամանք է դիտվում այն, որ ամբաստանյալներ Հայկ Սիմոնյանի խնամքին են գտնվում 1999 թվականին ծնված Սոնա, 2004 թվականին ծնված Սոֆի և 2009 թվականին ծնված Մանե Հայկի Սիմոնյանները, իսկ Դավիթ Աթոյանի խնամքին է գտնվում 2009 թվականի հուլիսի 30-ին ծնված Ալբերտ Դավիթի Աթոյանը:
Դատարանը հաշվի է առնում, որ ամբաստանյալները նախկինում արատավորված և դատապարտված չեն եղել, բնութագրվում են դրականորեն:
Ամբաստանյալների պատասխանատվությունը և պատիժը ծանրացնող հանգամանք է դիտվում, որ կատարված արարքներով նրանք խախտել են ՀՀ ոստիկանության համակարգ աշխատանքի ընդունվելիս տված երդումը:
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 357-360-րդ հոդվածներով, 365-րդ հոդվածի 1-ին մասով, 369-րդ, 372-րդ, 373-րդ, 374-րդ, 375.1-375.3-րդ, 375.4-րդ հոդվածներով դատարանը


ՎՃՌԵՑ

Հայկ Վոլոդյայի Սիմոնյանին մեղավոր ճանաչել ՀՀ քրեական օրենսգրքի 309-րդ հոդվածի 1-ին մասով և նախատեսված հանցագործության կատարման համար դատապարտել ազատազրկման 2 /երկու/ տարի 6 /վեց/ ամիս ժամկետով, կիրառել Հայաստանի Հանրապետության Ազգային ժողովի 19.06.2009 թվականի Համաներում հայտարարելու մասին որոշման 1-ին կետի 1-ին ենթակետը և Հայկ Վոլոդյայի Սիմոնյանին ազատել նշանակված 2 /երկու/ տարի 6 /վեց/ ամիս ազատազրկումը կրելուց: Հայկ Սիմոնյանի նկատմամբ ընտրված խափանման միջոց կալանքը վերացնել և նրան անմիջապես ազատ արձակել դատարանի դահլիճում:
Դավիթ Արիստակեսի Աթոյանին մեղավոր ճանաչել ՀՀ քրեական օրենսգրքի 308-րդ հոդվածի 1-ին մասով և նախատեսված հանցագործության կատարման համար դատապարտել ազատազրկման 2 /երկու/ տարի 6 /վեց/ ամիս ժամկետով, կիրառել Հայաստանի Հանրապետության Ազգային ժողովի 19.06.2009 թվականի Համաներում հայտարարելու մասին որոշման 1-ին կետի 1-ին ենթակետը և Դավիթ Արիստակեսի Աթոյանին ազատել նշանակված 2 /երկու/ տարի 6 /վեց/ ամիս ազատազրկումը կրելուց: Դավիթ Աթոյանի նկատմամբ ընտրված ստորագրություն չհեռանալու մասին խափանման միջոցը վերացնել:
Հայկ Սիմոնյանի ծառայողական վկայականը հանձնել ՀՀ ոստիկանության կադրերի վարչությանը:
Ապացույց ճանաչված արձանագրության հիմք կտրոնը և ոստիկանության Արաբկիրի բաժնում նախապատրաստված նյութերը, որով քրեական գործի հարուցումը մերժելու որոշում է կայացվել, հեռախոսազանգերի վերծանումներ պարունակող լազերային սկավառակը, ամբաստանյալ Հայկ Սիմոնյանի աշխատասենյակից հայտնաբերված թղթերը, որոնք բոլորն էլ կնքված են ՀՀ հատուկ քննչական ծառայության փաթեթների համար կնիքով թողնել քրեական գործում:
Դատավճիռը դատավարության մասնակիցների կողմից մեկ ամսվա ընթացքում կարող է բողոքարկվել ՀՀ վերաքննիչ քրեական դատարան:
Սույն դատավճիռը վերաքննության կարգով չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով: