գործ N ԵԱՔԴ 0027/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ն.Ղազարյանի
մասնակցությամբ`
մեղադրող` Ա.Աղայանի
ամբաստանյալ` Խ.Ավետիսյանի
պաշտպան` Գ.Ազարյանի
տուժող` Է.Սուքիասյանի

2010թ. մարտի 31-ին, Երևան քաղաքում, դռնբաց դատական նիստում, արագացված դատաքննության կարգով, քննելով քրեական գործն ըստ մեղադրանքի Խաչատուր Ալբերտի Ավետիսյանի, ծնված 05.10.1981թ., Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուրի, խնամքին ոչ ոք, ֆիզիկապես առողջ, չի աշխատում, նախկինում չդատված, հաշվառված և բնակվում է Երևան քաղաքի Հարավ Արևմտյան Բ 2 թաղամասի 119 շենքի թիվ 3 բնակարանում:
Մեղադրվում է ՀՀ քրեական օրենսգրքի 258 հոդվածի 3-րդ մասի 4-րդ կետով:

Պ Ա Ր Զ Ե Ց
1.Գործի դատավարական նախապատմությունը.
2009թ. հոկտեմբերի 19-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում Էդգար Մերուժանի Սուքիասյանին դիտավորությամբ մարմնական վնասվածք պատճառելու փաստի առթիվ ՀՀ քրեական օրենսգրքի 113 հոդվածի 1-ին մասով հարուցվել է թիվ 14132909 քրեական գործը:
2009թ. նոյեմբերի 06-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում Արտակ Ռաֆիկի Ավետիսյանին առողջությանը միջին ծանրության վնաս պատճառելու փաստի առթիվ ՀՀ քրեական օրենսգրքի 113 հոդվածի 1-ին մասով հարուցվել է թիվ 14134909 քրեական գործը:
2009թ. նոյեմբերի 06-ին նախաքննության մարմնի որոշմամբ համատեղ քննություն կատարելու համար թիվ 14134909 քրեական գործը միացվել է թիվ 14132909 քրեական գործին` թողնելով թիվ 14132909 համարը:
2010թ. փետրվարի 20-ին նախաքննության մարմնի որոշմամբ թիվ 14132909 քրեական գործով Խաչատուր Ավետիսյանի կողմից Արտակ Ավետիսյանին միջին ծանրության մարմնական վնասվածք պատճառելու վերաբերյալ քրեական գործի մասը կարճվել և Խաչատուր Ավետիսյանի նկատմամբ քրեական հետապնդում չի իրականացվել` բողոքի բացակայության հիմքով:
2010թ. փետրվարի 24-ին Խաչատուր Ալբերտի Ավետիսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 258 հոդվածի 3-րդ մասի 4-րդ կետով:
2010թ. փետրվարի 24-ին Խաչատուր Ալբերտի Ավետիսյանի նկատմամբ որպես խափանման միջոց ընտրվել է ստորագրություն չհեռանալու մասին:
2010թ. մարտի 19-ին թիվ 14132909 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2010թ. մարտի 19-ին քրեական գործն ընդունվել է վարույթ և նշանակվել դատաքննության 2010թ. մարտի 31-ին:
2.Գործի փաստական հանգամանքները.
Նախաքննության մարմինն ամբաստանյալ Խաչատուր Ալբերտի Ավետիսյանին մեղադրանք է առաջադրել հետևյալ արարքի համար.
Խաչատուր Ավետիսյանը 2009թ. սեպտեմբերի 25-ին, ժամը 0300-ի սահմաններում Երևան քաղաքի Բաղրամյան պողոտայի թիվ 1 հասցեում գործող ՙԴինուլ՚ գիշերային ակումբում պարուհի Ստելլա Աբրահամյանի նկատմամբ անհարգալից վերաբերմունք է դրսևորել, որի համար նրան դիտողություն է արել ակումբի անվտանգության աշխատակից Էդգար Մերուժանի Սուքիասյանը: Այդ կապակցությամբ նրանց միջև առաջացած վիճաբանության ընթացքում Խաչատուր Ավետիսյանը դիտավորությամբ խախտել է հասարակական կարգը, հասարակության նկատմամբ բացահայտ անհարգալից վերաբերմունք դրսևորել, որի հետևանքով խաթարվել է ակումբի բնականոն աշխատանքը: Առաջացած քաշքշուկի ընթացքում շրջվել է սեղանը և դրա վրա եղած շշերը թափվելով գետին, կոտրվել են, իսկ Խաչատուր Ավետիսյանը և Էդգար Սուքիասյանը վայր են ընկել, որի հետևանքով Էդգար Սուքիասյանին` կոտրած շշի բեկորով ձախ նախաբազկի շրջանի կտրած վերքի, ստորադիր մկանների վնասումով մարմնական վնասվածք է պատճառվել: Էդգար Սուքիասյանի առողջությանը պատճառվել է միջին ծանրության վնաս` առողջության տևական քայքայումով:
3. Արագացված դատական քննություն .
Մինչև դատաքննությունն սկսելն ամբաստանյալ Խաչատուր Ավետիսյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքի հետ, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատել է նաև ամբաստանյալի պաշտպան Գ.Ազարյանը:
Մեղադրող Ա.Աղայանը դատական քննության արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
3.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Խաչատուր Ավետիսյանին առաջադրված մեղադրանքը ՀՀ քրեական օրենսգրքի 258 հոդվածի 3-րդ մասի 4-րդ կետով, հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 258 հոդվածի 3-րդ մասի 4-րդ կետի հատկանիշներին և արարքի որակումը` ճիշտ է:
Ամբաստանյալ Խաչատուր Ալբերտի Ավետիսյանի նկատմամբ պատիժ նշանակելիս, դատարանը հաշվի է առնում կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և անկեղծորեն զղջում է կատարած արարքի համար, նախկինում դատված չի եղել:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Խաչատուր Ալբերտի Ավետիսյանը ենթակա է քրեական պատասխանատվության և պատժի:
Դատարանը, հաշվի առնելով, որ պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ ամբաստանյալի նկատմամբ պատիժ պետք է նշանակել տուգանքի ձևով:
Նկատի ունենալով, որ տուժող Էդգար Սուքիասյանը հրաժարվել է քաղաքացիական հայցի պահանջից, դատարանն այդ հարցը համարում է լուծված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Խաչատուր Ալբերտի Ավետիսյանին մեղավոր ճանաչել ՀՀ քրեական օրենսգրքի 258 հոդվածի 3-րդ մասի 4-րդ կետով և նրան դատապարտել տուգանքի երեք հարյուր հազար (300.000) ՀՀ դրամ գումարի չափով:
Խաչատուր Ալբերտի Ավետիսյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Տուժող Էդգար Սուքիասյանի քաղաքացիական հայցի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակաման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ