գործ No ԵԱՔԴ 0012/01/10

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ն.Ղազարյանի
մասնակցությամբ`
մեղադրող` Ս. Բադալյանի
ամբաստանյալ` Գ. Ազարյանի
պաշտպան` Ռ. Թովմասյանի
տուժողի իրավահաջորդ` Ս. Բաղմանյանի
տուժողի իրավահաջորդի ներկայացուցիչ` Վ. Զուռնաչյանի

2010թ. ապրիլի 27-ին, Երևան քաղաքում, դռնբաց դատական նիստում, արագացված դատաքննության կարգով քննելով քրեական գործն ըստ մեղադրանքի Գոհար Վիլիկի Ազարյանի, ծնված 09.10.1977թ., Մեղրի քաղաքում, ազգությամբ հայ, ՀՀ քաղաքացի, բարձրագույն կրթությամբ, ֆիզիկապես առողջ, ամուսնալուծված, խնամքին մեկ անձ, նախկինում չդատված, աշխատել է ՙԱրդՇինԻնվեստ բանկ՚ ՓԲԸ-ի Մեղրու մասնաճյուղում, որպես հաշվապահ-մասնագետ, բնակվել է ք.Մեղրի, Մ.Օհանջանյան փողոցի 45 տանը, հաշվառված է ք.Մեղրի, Մ.Օհանջանյան փողոցի 4/5 տանը:
Մեղադրվում է ՀՀ քրեական օրենսգրքի 105 հոդվածի 1-ին մասով:

Պ Ա Ր Զ Ե Ց
1.Գործի դատավարական նախապատմությունը.
2009թ. հուլիսի 27-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 104 հոդվածի 1-ին մասով հարուցվել է թիվ 09112709 քրեական գործը:
2009թ. հուլիսի 31-ին Գոհար Վիլիկի Ազարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 104 հոդվածի 1-ին մասով և նրա նկատմամբ որպես խափանման միջոց ընտրվել է կալանավորումը:
2010թ. փետրվարի 03-ին Գոհար Վիլիկի Ազարյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 105 հոդվածի 1-ին մասով:
2010թ. փետրվարի 24-ին թիվ 09112709 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2010թ. փետրվարի 25-ին քրեական գործն ընդունվել է վարույթ և նշանակվել դատական քննության 2010թ. մարտի 15-ին:
2.Գործի փաստական հանգամանքները.
Նախաքննության մարմինն ամբաստանյալ Գոհար Վիլիկի Ազարյանին մեղադրանք է առաջադրել հետևյալ արարքի համար.
Գոհար Ազարյանը 2009թ. հուլիսի 26-ին, ժամը 1600-ի սահմաններում, Երևան քաղաքի Զ.Սարկավագի փողոցի 128ա շենքի 4-րդ բնակարանում, գտնվելով հոգեկան խիստ հուզմունքի վիճակում, կյանքից զրկել է նույն բնակարանի բնակիչ Հենրիկ Ռաֆիկի Մադոյանին: Այսպես.
2009թ. հուլիսի 26-ին, ժամը 16-ի սահմաններում, Հենրիկ Մադոյանը հարաբերությունները պարզելու նպատակով Գոհար Ազարյանին հրավիրել է իր Երևան քաղաքի Զ.Սարկավագի փողոցի 128ա շենքի 4-րդ բնակարան: Բնակարանում Հենրիկ Մադոյանը ցանկացել է սեռական հարաբերություններ ունենալ Գոհար Ազարյանի հետ և այն նկարահանել բջջային հեռախոսով, սակայն վերջինս չի համաձայնել և նրանց միջև առաջացած վիճաբանության և քաշքշուկի ընթացքում Հենրիկ Մադոյանը սեղանի վրայից վերցրել է դանակը և սպանության սպառնալիքների տակ փորձել է իրականացնել իր մտադրությունը: Առաջացած քաշքշուկի ընթացքում նրանք ընկել են գետին: Հենրիկ Մադոյանի կողմից գործադրված բռնությունը, տևական ժամանակահատվածում նրա հակաիրավական և հակաբարոյական վարքագիծը էապես ազդել է Գոհար Ազարյանի գիտակցության և հոգեկան գործունեության վրա: Գոհար Ազարյանի մոտ առաջ է եկել երկարատև հոգեճնշող իրավիճակ, որի հետևանքով հանկարծակի առաջացած հոգեկան խիստ հուզմունքի վիճակում Գոհար Ազարյանը Հենրիկ Մադոյանի ձեռքից խլել է դանակը, սպանության դիտավորությամբ բազմաթիվ հարվածներ հասցրել նրա մարմնի տարբեր մասերին: Առաջացած արյան սուր կորստից Հ.Մադոյանը տեղում մահացել է:
3. Արագացված դատական քննություն .
Մինչև դատաքննությունն սկսելն ամբաստանյալ Գոհար Ազարյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել է նաև ամբաստանյալի պաշտպան Ռ.Թովմասյանը:
Մեղադրող Ս.Բադալյանը մեղադրական եզրակացությունում դատական քննության արագացված կարգի կիրառմանն առարկել է, սակայն դատական քննության ժամանակ փոխել է իր դիրքորոշումը և արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գոհար Վիլիկի Ազարյանին առաջադրված մեղադրանքը` ՀՀ քրեական օրենսգրքի 105 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 105 հոդվածի 1-ին մասի հատկանիշներին և արարքի որակումը ճիշտ է:
Գոհար Ազարյանի նկատմամբ պատիժ նշանակելիս դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, մեղայականով ներկայացել է իրավապահ մարմիններ և աջակցել է հանցագործությունը բացահայտելուն, նախկինում դատված չի եղել, խնամքին է գտնվում ինը տարեկան երեխան, բնութագրվում է դրական:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Գոհար Ազարյանը ենթակա է քրեական պատասխանատվության և պատժի:
Դատարանն անդրադառնալով տուժողի իրավահաջորդ Ս.Բաղմանյանի քաղաքացիական հայցին` 2 300 000 /երկու միլիոն երեք հարյուր հազար/ ՀՀ դրամի չափով, նկատի ունենալով, որ ամբաստանյալ Գ.Ազարյանը չի ընդունել քաղաքացիական հայցը, գտնում է, որ ՀՀ քրեական դատավարության օրենսգրքի 3751 հոդվածի 6-րդ մասի համաձայն, տուժողի իրավահաջորդ Ս.Բաղմանյանի քաղաքացիական հայցը պետք է թողնել առանց քննության և նրան քաղաքացիական դատավարության կարգով հայց ներկայացնելու իրավունք վերապահել:
Դատարանն անդրադառնալով իրեղեն ապացույցների տնօրինման հարցին, գտնում է, որ իրեղեն ապացույց ճանաչված Հ.Մադոյանի ձեռքի պայուսակը, բջջային հեռախոսը, հեռուստացույցի հեռակառավարման վահանակը, Հ.Մադոյանին պատկանող մուգ կապույտ գույնի սպորտային տաբատը պետք է վերադարձնել տուժողի իրավահաջորդ Ս.Բաղմանյանին, իսկ Գ.Ազարյանին պատկանող կարմիր, սև նախշերով զգեստը, խոհանոցային դանակը և սպանության գործիք հանդիսացող դանակը պետք է ոչնչացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Գոհար Վիլիկի Ազարյանին մեղավոր ճանաչել ՀՀ քրեական օրենսգրքի 105 հոդվածի 1-ին մասով և նրան դատապարտել ազատազրկման երկու (2) տարի ժամկետով:
Պատժի սկիզբը հաշվել 2009թ. հուլիսի 28-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Գոհար Վիլիկի Ազարյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Տուժողի իրավահաջորդ Ս.Բաղմանյանին իրավունք վերապահել հանցագործությամբ պատճառված վնասի հատուցման պահանջով քաղաքացիական դատավարության կարգով հայց ներկայացնելու դատարան:
Իրեղեն ապացույց ճանաչված Հ.Մադոյանի ձեռքի պայուսակը, բջջային հեռախոսը, հեռուստացույցի հեռակառավարման վահանակը, Հ.Մադոյանին պատկանող մուգ կապույտ գույնի սպորտային տաբատը վերադարձնել տուժողի իրավահաջորդ Ս.Բաղմանյանին, Գ.Ազարյանին պատկանող կարմիր, սև նախշերով զգեստը, խոհանոցային դանակը և սպանության գործիք հանդիսացող դանակը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ