Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
մեղադրող` Ս. Բադալյանի
ամբաստանյալներ` Ա.Պողոսյանի, Վ.Պողոսյանի
պաշտպան` Գ.Ազարյանի
տուժող` Գ.Նահապետյանի

2010թ. մարտի 04-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
1. Արծիվ Վոլոդյայի Պողոսյանի, ծնված 22.10.1962թ., Վրաստանի Հանրապետության Թելավի քաղաքում, ազգությամբ հայ, ՀՀ քաղաքացի, միջնակարգ-մասնագիտական կրթությամբ, ամուսնացած, խնամքին ոչ ոք, ֆիզիկապես վատառողջ, աշխատում է ՙՄաքս Դալ՚ ՍՊԸ-ում, որպես վարորդ, նախկինում չդատված, հաշվառված և բնակվում է Երևան քաղաքի Գոգոլի փողոցի 46/2 տանը:
Մեղադրվում է ՀՀ քրեական օրենսգրքի 258 հոդվածի 3-րդ մասի 1-ին կետով:
2. Վլադիմիր Արծիվի Պողոսյանի, ծնված 15.03.1986թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, սովորում է Երևանի Պետական Հումանիտար տեխնիկական քոլեջում, ամուսնացած, խնամքին մեկ անձ, աշխատում է ՙԱրաքս՚ ֆաբրիկայում որպես վարորդ, նախկինում չդատված, հաշվառված և բնակվում է Երևան քաղաքի Գոգոլի փողոցի 46/2 տանը:
Մեղադրվում է ՀՀ քրեական օրենսգրքի 258 հոդվածի 3-րդ մասի 1-ին և 4-րդ կետերով:

Պ Ա Ր Զ Ե Ց
1.Գործի դատավարական նախապատմությունը.
2009թ. սեպտեմբերի 23-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 113 հոդվածի 2-րդ մասի 3-րդ կետի հատկանիշներով հարուցվել է թիվ 09117709 քրեական գործը:
2010թ. հունվարի 21-ի որոշմամբ թիվ 09117709 քրեական գործով Արթուր Սերյոժայի Պողոսյանի նկատմամբ քրեական հետապնդում չի իրականացվել` նախաքննության ընթացքում տված սուտ ցուցմունքի մասին հայտնելու և ճշմարտացի ցուցմունք տալու պատճառաբանությամբ:
2010թ. հունվարի 22-ին Արծիվ Վոլոդյայի Պողոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 258 հոդվածի 3-րդ մասի 1-ին կետով և նրա նկատմամբ որպես խափանման միջոց ընտրվել է ստորագրություն չհեռանալու մասին:
2010թ. հունվարի 22-ին Վլադիմիր Արծիվի Պողոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 258 հոդվածի 3-րդ մասի 1-ին և 4-րդ կետերով և նրա նկատմամբ որպես խափանման միջոց ընտրվել է ստորագրություն չհեռանալու մասին:
Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010թ. հունվարի 22-ի որոշմամբ Վլադիմիր Արծիվի Պողոսյանի նկատմամբ կալանավորումը որպես խափանման միջոց ընտրելու միջնորդությունը մերժվել է, նրա նկատմամբ որպես խափանման միջոց ընտրվել է ստորագրություն չհեռանալու մասին:
2010թ. հունվարի 25-ի որոշմամբ թիվ 09117709 քրեական գործից անջատվել է անհայտ անձանց կողմից Ա.Պողոսյանի և Վ.Պողոսյանի հետ միասին խուլիագանություն կատարելու մասը և անջատված մասին շնորհվել է թիվ 09117709/1 համարը:
2010թ. փետրվարի 04-ին թիվ 09117709 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2010թ. փետրվարի 05-ին քրեական գործը վարույթ է ընդունվել և նշանակվել դատաքննության 2010թ. փետրվարի 19-ին:
2.Գործի փաստական հանգամանքները.
Նախաքննության մարմինն ամբաստանյալ Արծիվ Վոլոդյայի Պողոսյանին և Վլադիմիր Արծիվի Պողոսյանին մեղադրանք է առաջադրել հետևյալ արարքի համար.
Արծիվ Պողոսյանը 2009թ. օգոստոսի 5-ին, ժամը 1200-ի սահմաններում, որդու` Վլադիմիր Արծիվի Պողոսյանի և գործով չպարզված անձանց հետ, Երևան քաղաքի Ա.Տիգրանյան փողոցի վրա գտնվող թիվ 114 երթուղային տաքսիների դիսպետչերական կետի մոտ, դիտավորությամբ, կոպիտ կերպով խախտելով հասարակական կարգը, բացահայտ անհարգալից վերաբերմունք դրսևորելով հասարակության նկատմամբ, խուլիգանական դրդումներով, շուրջ 10 րոպե տևողությամբ, վիճաբանության մեջ են մտել Գագիկ Մյասնիկի Նահապետյանի հետ, տվել լկտի հայհոյանքներ, ծեծի ենթարկել նրան` պատճառելով մարմնական վնասվածքներ:
Վլադիմիր Պողոսյանը 2009թ. օգոստոսի 5-ին, ժամը 1200-ի սահմաններում, հոր` Արծիվ Վոլոդյայի Պողոսյանի և գործով չպարզված անձանց հետ, Երևան քաղաքի Ա.Տիգրանյան փողոցի վրա գտնվող թիվ 114 երթուղային տաքսիների դիսպետչերական կետի մոտ, դիտավորությամբ, կոպիտ կերպով խախտելով հասարակական կարգը, բացահայտ անհարգալից վերաբերմունք դրսևորելով հասարակության նկատմամբ, խուլիգանական դրդումներով, շուրջ 10 րոպե տևողությամբ, վիճաբանության մեջ են մտել Գագիկ Մյասնիկի Նահապետյանի հետ, տվել հայհոյանքներ, ծեծի ենթարկել նրան, իր հարվածներով պատճառելով նրա առողջությանը միջին ծանրության վնաս` առողջության տևական քայքայումով, որն արտահայտվել է Գ.Նահապետյանի քթոսկրի բաց կոտրվածքի ձևով:
3.Ապացույցների հետազոտում.
Առաջադրված մեղադրանքում նախաքննության ընթացքում Արծիվ Վոլոդյայի Պողոսյանն իրեն մեղավոր չի ճանաչել և ցուցմունք է տվել այն մասին, որ մոտ 3 տարի է աշխատում է թիվ 114 երթուղային տաքսու վարորդ և Գագիկ Նահապետյանին ճանաչում է, որպես նույն երթուղու վարորդ: 2009թ. օգոստոսի 5-ի առավոտյան սովորականի պես երթուղի է մտել Ա.Տիգրանյան փողոցում գտնվող վերջնակետից և երթուղով հասել Պռոշյան ավանի վերջնակետ: Այնտեղ հավաքված վարորդները յուրաքանչյուր 5 րոպեն մեկ շարժվել են երթուղով: Ժամը 830-ի սահմաններում երթուղի դուրս գալու Գ.Նահապետյանի հերթն է եղել, ով շուրջ 7 րոպե չի գնացել երթուղի ու ժամանակ է ձգել: Ինքը նրան ասել է, որ ժամանակն արդեն լրացել է, անհրաժեշտ է դուրս գալ երթուղի, սակայն վերջինս կոպտորեն հրաժարվել է դա կատարել: Տեսնելով դա, ինքն իրեն ամրացված ավտոմեքենայով մտել է երթուղի: Երբ անցել է մոտ 100-150 մետր տարածություն, Գագիկ Նահապետյանը մեքենայով կտրել է իր ճանապարհը, մոտեցել սկսել քաշքշել ու հայհոյել: Ինքը վեճից խուսափելու համար մեքենան քշել ու հեռացել է: Միանգամից չի գնացել Ա.Տիգրանյան փողոցի վրա գտնվող վերջնակետ, այլ մի քանի ժամ շրջել է քաղաքում, որի ընթացքում Գագիկ Նահապետյանը զանգահարել է իրեն ու կանչել հանդիպման, ինքն էլ պատասխանել է, որ հանդիպեն Ա.Տիգրանյան փողոցում գտնվող վերջնակետում: Ժամը 11-ի սահմաններում գնացել է նշված վերջնակետ, որտեղ կատարվածի մասին պատմել է նույն երթուղու վարորդ Ֆելիքս Հարությունյանին, ով ասել է, որ կմիջամտի ու կհաշտեցնի իրեն ու Գագիկ Նահապետյանին: Ժամը 12-ի սահմաններում եկել է Գագիկ Նահապետյանը և պահանջել իրենից, որ նստի մեքենան, գնան ՙխոսեն՚: Ֆելիքս Հարությունյանը փորձել է իրենց հաշտեցնել, սակայն Գագիկ Նահապետյանը չի համաձայնել: Ինքը հեռացել է դեպի անտառի կողմ, շրջել մոտ 10 րոպե մինչև Գ.Նահապետյանը հանդարտվի և հեռանա: Երբ վերադարձել է, Գ.Նահապետյանը դեռևս դիսպետչերական կետի մոտ է եղել: Նա փորձել է քաշքշել իրեն և նստեցնել մեքենան: Այդ պահին եկել է իր որդին` Վլադիմիր Պողոսյանը, հարձակվել Գագիկ Նահապետյանի վրա ու սկսել հարվածներ հասցնել: Առաջացած կռվի ընթացքում ինքն էլ է մի քանի հարված հասցրել Գ.Նահապետյանին: Ֆելիքս Հարությունյանը բաժանել է իրենց և իր որդին` Վլադիմիր Պողոսյանը, հեռացել է: Այդ պահին տեսել է, որ Գ.Նահապետյանի դեմքից արյուն է հոսում: Գագիկ Նահապետյանը կրկին փորձել է հարձակվել իր վրա: Նոր բախումից խուսափելու համար մեքենայով հեռացել է: Հետագայում իմացել է, որ Գագիկ Նահապետյանը դիմել է ոստիկանություն:
Դատաքննության ժամանակ Արծիվ Պողոսյանն իրեն մեղավոր չի ճանաչել և հայտնել է, որ վեճն առաջացել է աշխատանքի հետ կապված: Իր որդին պատահական է եկել, քանի որ նրա ուսման վայրը մոտ է: Ինքը չի տեսել, թե որդին երբ է եկել: Հեռախոսով խոսել է նրա հետ, սակայն վեճի մասին ոչինչ չի ասել: Իրենցից բացի կռվին ուրիշ մարդ չի մասնակցել: Հնարավոր է, որ ինքը հայհոյած լինի, սակայն որդին չի հայհոյել:
Առաջադրված մեղադրանքում նախաքննության ընթացքում Վլադիմիր Արծիվի Պողոսյանն իրեն մեղավոր չի ճանաչել և ցուցմունք է տվել այն մասին, որ 2009թ. օգոստոսի 5-ին, ժամը 12-ի սահմաններում, դուրս է եկել տանից իր ՙՕպել Վեկտրա՚ մակնիշի, 14 ՍԼ 226 պ/հ ավտոմեքենայով և շարժվել դեպի Երևանի Պետական Հումանիտար տեխնիկական քոլեջ, որտեղ ինքը սովորում է, ստուգարք հանձնելու: Ա.Տիգրանյան փողոցի թիվ 114 երթուղային տաքսիների դիսպետչերական կետի մոտ անցնելիս տեսնելով, որ մի տղամարդ քաշքշում է հորը, կանգնել է, իջել մեքենայից, հարձակվել նրա վրա ու սկսել բռունցքներով հարվածել նրա դեմքին: Շրջակայքում մարդիկ են հավաքվել, բաժանել իրենց և ինքն իր մեքենայով հեռացել է: Հետագայում իմացել է, որ այն տղամարդը, ում ինքը ծեծել է, թիվ 114 երթուղու վարորդ Գագիկ Նահապետյանն է, ով դեպքի կապակցությամբ դիմել է ոստիկանություն:
Դատաքննության ժամանակ Վլադիմիր Պողոսյանն իրեն մեղավոր է ճանաչել մասնակիորեն և հայտնել, որ իր հայտնվելը դեպքի վայր պատահական է եղել: Գագիկ Նահապետյանը նստած է եղել մայթեզրին, իսկ իր հայրը կանգնած: Կարծելով, որ նրանք վիճում են, ինքը մոտեցել և միանգամից հարվածել է Գագիկ Նահապետյանին: Առաջին հարվածը հասցրել է դեմքին, որից հետո հարվածել է երկու անգամ: Իր հայրը և Ֆելիքս Հարությունյանն իրեն մի կողմ են հրել: Ինքը չի հայհոյել: Զղջում է կատարած արարքի համար:
Ամբաստանյալներ Արծիվ Պողոսյանի և Վլադիմիր Պողոսյանի պատճառաբանություններն անհիմն են, հետապնդում են պատասխանատվությունը և պատիժը մեղմացնելու նպատակ:
Ամբաստանյալներին առաջադրված մեղադրանքը հիմնավորվել է հետևյալ ապացույցներով.
Տուժող Գագիկ Մյասնիկի Նահապետյանի նախաքննության ընթացքում տված ցուցմունքով այն մասին, որ շուրջ 3 տարի է աշխատում է որպես թիվ 114 երթուղու վարորդ և հենց այդ ժամանակվանից էլ ճանաչում է Արծիվ Պողոսյանին, որպես նույն երթուղու վարորդ: 2009թ. օգոստոսի 5-ի առավոտյան, սովորականի պես գնացել է աշխատանքի և Պռոշյան ավանում գտնվող վերջնակետում սպասել իր հերթին` երթուղի դուրս գալու համար: Այդ ժամանակ վերջնակետ է եկել Արծիվ Պողոսյանը, ով երթուղի է մտած եղել Ա.Տիգրանյան փողոցում գտնվող վերջնակետից: Ժամը 830-ի սահմաններում, երբ արդեն երթուղի դուրս գալու իր հերթն է եղել, Արծիվ Պողոսյանը սկսել է աղմկել ու պահանջել, որ ինքը գնա երթուղի: Ինքը պատասխանել է, որ սպասաժամը դեռ չի լրացել, երբ լրանա կգնա: Արծիվ Պողոսյանն ասել է, որ այդ դեպքում ինքը կմտնի երթուղի և իր մեքենայով մտել է երթուղի ու գնացել: Ինքը մեքենայով հետապնդել ու վերջնակետից մոտ 100-150 մետր հեռավորության վրա հասել, կանգնեցրել է նրան և պարզաբանում պահանջել, թե ինչու է հերթը խախտում, Արծիվ Պողոսյանը պատասխանելով, որ ինչ ուզում, այն էլ անում է, քշել հեռացել է: Դրանից հետո, ժամը 12-ի սահմաններում, երբ երթուղիով, հերթական պտույտը կատարելուց հետո գնացել է Ա.Տիգրանյան փողոցի վրա գտնվող իրենց դիսպետչերական կետի մոտ, Արծիվ Պողոսյանն արդեն գտնվել է այնտեղ: Մոտեցել է նրան ու պարզաբանում պահանջել կատարածի համար, իսկ Ա.Պողոսյանը ասելով, որ գնում է բնական կարիքները հոգալու` գնացել է անտառի կողմ, իսկ ինքը գնացել ու նստել է դիսպետչերական կետի կողքի մայթեզրին: Քիչ անց Արծիվ Պողոսյանը վերադարձել է, իսկ նրա վերադառնալուց մի քանի րոպե հետո, իրենից մի քանի մետր հեռավորության վրա կանգնել է սև գույնի ՎԱԶ 2106 մակնիշի ավտոմեքենա: Մեքենայից իջել են մոտ 25 տարեկան երեք կամ չորս երիտասարդներ: Արծիվ Պողոսյանը միացել է նրանց և, առանց որևէ բան ասելու, հարձակվել են իր վրա ու մոտ 10 րոպե ծեծի ենթարկել, տվել են հայհոյանքներ: Այդ ընթացքում դեպքի վայրում հավաքվել են մարդիկ: Կռվի ժամանակ իմացել է, որ իրեն ծեծողներից մեկը հանդիսանում է Արծիվ Պողոսյանի որդին` Վլադիմիր Պողոսյանը, ում հարվածներից էլ կոտրվել է իր քիթը: Դրանից հետո, այդ երիտասարդները նույն մեքենայով հեռացել են, իսկ Արծիվ Պողոսյանը հեռացել է իր մեքենայով: Հավաքվածները ջուր են բերել, ինքը լվացվել է: Ստացած մարմնական վնասվածքների կապակցությամբ դիմել է հիվանդանոց, որից հետո` ոստիկանություն:
Դատաքննության ժամանակ Գագիկ Նահապետյանը հայտնել է, որ ինքը դիսպետչերական կետի մոտ կատարածի համար պարզաբանում է պահանջել Արծիվ Պողոսյանից, ով ասելով, որ հիմա կգա, գնացել է անտառի կողմ, իսկ ինքը նստել է մայթեզրին ու ծխել: Քիչ անց դեմքին հարված է ստացել և ընկել գետին: Իմացել է, որ հարվածողը Արծիվ Պողոսյանի որդին է` Վլադիմիրը: Ընկած ժամանակ նա իրեն չի հարվածել: Ինքը չի տեսել Արծիվ Պողոսյանն իրեն հարվածել է, թե ոչ: Բացի նրանցից եղել են նաև ուրիշ մարդիկ, որոնց չի ճանաչել: Չի հիշում նրանք իրեն հարվածել են, թե ոչ: Չի հիշում նաև, թե քանի հարված է եղել և հահոյանքներ եղել են, թե ոչ: Քթի վնասվածքը պատճառել է միայն Վլադիմիր Պողոսյանը, հարվածել է ձեռքով դեմքին: Վնասվել են նաև իր ատամները: Վեճը տևել է մոտ 2-3 րոպե: Կռիվը կանխել և իրենց բաժանել է Ֆելիքսը: Վեճի ժամանակ շատ մարդիկ են հավաքված եղել:
Վկա Ֆելիքս Արամայիսի Հարությունյանի նախաքննության ընթացքում տված ցուցմունքով այն մասին, որ շուրջ 8 տարի է աշխատում է թիվ 114 երթուղայինի վարորդ և Արծիվ Պողոսյանին ու Գագիկ Նահապետյանին ճանաչում է, որպես նույն երթուղու վարորդներ: 2009թ. օգոստոսի 5-ին ժամը 10-ի սահմաններում, երբ Ա.Տիգրանյան փողոցում գտնվող դիսպետչերական կետի մոտ տեսել է Գ.Նահապետյանին, վերջինս պատմել է, որ նույն օրը, առավոտյան, Պռոշյան ավանում գտնվող դիսպետչերական կետի մոտ, վեճ է առաջացել իր ու Արծիվ Պողոսյանի միջև, քանի որ վերջինս խախտել է երթուղի դուրս գալու հերթը: Ինքը հորդորել է Գագիկ Նահապետյանին Արծիվ Պողոսյանի հետ վեճը չշարունակել ու հաշտվել: Ժամը 12-ի սահմաններում, երբ գտնվել է Ա.Տիգրանյան փողոցի վրա գտնվող դիսպետչերական կետի մոտ, այնտեղ են գնացել Արծիվ Պողոսյանն ու Գագիկ Նահապետյանը: Ինքը կանչել է նրանց ու փորձել հաշտեցնել: Ա.Պողոսյանը մի քանի րոպեով գնացել է անտառի կողմ և վերադարձել: Ինքը հորդորել է նրանց չշարունակել վեճը և հաշտվել: Մտածելով, որ հաշտեցրել է նրանց և, բացի այդ երթուղի դուրս գալու իր հերթն է եղել, գնացել նստել է քիչ հեռու կանգնած իր մեքենան: Երբ մեքենայով գնացել է դիսպետչերական կետի մոտ, տեսել է, որ խառնաշփոթ է, հավաքվել են մարդիկ: Իջնելով մեքենայից և մոտենալով տեսել է, որ Գագիկ Նահապետյանն ընկած է գետին, իսկ մի երիտասարդ բռունցքներով հարվածում է նրա դեմքին: Միջամտել, բաժանել է կռվողներին և այդ երիտասարդին քաշել է մի կողմ, ով հեռացել է: Հետագայում իմացել է, որ այդ երիտասարդը Արծիվ Պողոսյանի որդին է: Կռվի ժամանակ կռվողները իրար տվել են հայհոյանքներ: Տեսել է, որ Ա.Պողոսյանը կանգնած է Գ.Նահապետյանի հետևում, իսկ վերջինիս դեմքն ամբողջությամբ արյունոտված է: Տեսել է նաև, որ դիսպետչերական կետի մոտ կանգնած է սև գույնի ՎԱԶ 2106 մակնիշի ավտոմեքենա, բայց ում է դա պատկանում, չգիտի:
Դատաքննության ժամանակ Ֆելիքս Հարությունյանը հայտնել է, որ երբ եկել է դիսպետչերական կետի մոտ, տեսել է, որ մոտ 10-15 մարդիկ են հավաքված: Իջնելով մեքենայից և մոտենալով, տեսել է, որ Գագիկ Նահապետյանն ընկած է գետին, իսկ մի երիտասարդ, որը հետագայում իմացել է, որ Արծիվ Պողոսյանի որդին է բռունցքներով հարվածում է նրա դեմքին: Ինքը վերջինիս քաշել է մի կողմ և նա հեռացել է: Կռվի ժամանակ Արծիվն ու Գագիկն իրար հայհոյանքներ են տվել: Բացի այդ, տեսել է, որ Գագիկ Նահապետյանի դեմքն ամջողջությամբ արյունոտված է: Իր ներկայությամբ վեճը տևել է մոտ 1-1,5 րոպե:
Վկա Կարեն Ֆրունզիկի Ղազարյանի ցուցմունքով այն մասին, որ մոտ 10 տարի է աշխատում է թիվ 114 երթուղային տաքսու վարորդ: Արծիվ Պողոսյանին ու Գագիկ Նահապետյանին ճանաչում է, որպես նույն երթուղու վարորդներ: 2009թ. օգոստոսի 5-ին, ժամը 12-ի սահմաններում, երբ երթուղով եկել է Ա.Տիգրանյան փողոցի վրա գտնվող իրենց դիսպետչերական կետ` տեսել է, որ հավաքված են մարդիկ, իսկ Արծիվ Պողոսյանն իր մեքենայով հեռանում է: Հավաքվածներից իմացել է, որ իրենց երթուղու Պռոշյան ավանում գտնվող վերջնակետում Արծիվ Պողոսյանը խախտել է երթուղի դուրս գալու հերթականությունը: Այդ պատճառով վեճ է առաջացել նրա ու Գագիկ Նահապետյանի միջև, որը շարունակվել է Ա.Տիգրանյան փողոցում գտնվող դիսպետչերական կետի մոտ: Արծիվ Պողոսյանը զանգահարել ու կանչել է որդուն և որդու հետ միասին ծեծի են ենթարկել Գագիկ Նահապետյանին:
Վկա Սերգո Աբրահամի Գրիգորյանի ցուցմունքով այն մասին, որ մոտ 8 տարի է աշխատում է թիվ 114 երթուղային տաքսու վարորդ: Արծիվ Պողոսյանին ու Գագիկ Նահապետյանին ճանաչում է, որպես նույն երթուղու վարորդներ: 2009թ. օգոստոսի 5-ին, կեսօրվա սահմաններում գտնվել է Ա.Տիգրանյան փողոցի վրա գտնվող դիսպետչերական կետի մոտ: Տեսել է, որ դիսպետչերական կետի մոտ հավաքված են մարդիկ: Ընդհանուր խոսակցությունից իմացել է, որ Արծիվ Պողոսյանի և Գագիկ Նահապետյանի միջև վեճ է եղել, որի ընթացքում Արծիվ Պողոսյանն ու նրա որդին ծեծի են ենթարկել Գագիկ Նահապետյանին:
Ամբաստանյալների կատարած հանցանքը հիմնավորվել է նաև գործով ձեռք բերված հետևյալ ապացույցներով.
Դատաբժշկական փորձաքննության թիվ 1134/հ եզրակացությունով և դատաբժշկական փորձագետ Ա.Բաբայանի ցուցմունքով, համաձայն որոնց Գագիկ Նահապետյանի մարմնական վնասվածքները` գլխի, որովայնի աջ ազդրի շրջանների քերծվածքների, արյունազեղումների, արյունահավաքների, սալջարդ վերքերի, ստորին ծնոտի թվով 5 ատամների տրավմատիկ ամպուտացիայի, քթոսկրերի բաց կոտրվածքի ձևով, հասցվել են բութ, կոշտ առարկաներով, հնարավոր է որոշման մեջ նշված ժամկետում, որոնք առաջացրել են առողջության միջին ծանրության վնաս` առողջության տևական քայքայումով: Աջ ազդրի, որովայնի շրջանների քերծվածքները, ինչպես առանձին-առանձին, այնպես էլ միասին առողջության թեթև վնասի հատկանիշներ չեն պարունակում: Գլխի շրջանի քերծվածքները ճակատաքունքային, ստորին շրթունքի շրջանների սալջարդ վերքերը, ստորին ծնոտի թվով 5 ատամների տրավմատիկ ամպուտացիաները առաջացրել են առողջության թեթև վնաս` առողջության կարճատև քայքայումով: Քթի շրջանի սալջարդ վերքը, քթոսկրերի բաց կոտրվածքը առաջացրել է առողջության միջին ծանրության վնաս` առողջության տևական քայքայումով:
Այլ փաստաթուղթ հանդիսացող, Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 06.10.2009թ. որոշմամբ ՙՂ-Տելեկոմ՚ ՓԲԸ-ից ստացված, Արծիվ Պողոսյանի և Վլադիմիր Պողոսյանի կողմից օգտագործվող 094-62-64-38 և 093-28-78-87 հեռախոսահամարների 2009թ. օգոստոսի 5-ի մուտքային և ելքային հեռախոսազանգերի վերծանումներով և դրանց ուսումնասիրությամբ կազմված տեղեկանքով, համաձայն որոնց գործով տուժող Գագիկ Նահապետյանի կողմից օգտագործվող բջջային 094-97-22-83 հեռախոսահամարից դեպի Ա.Պողոսյանի 094-62-64-38 հեռախոսահամարին հեռախոսազանգ գրանցված չէ, այսինքն Գ.Նահապետյանը չի զանգահարել Ա.Պողոսյանին, այլ ընդհակառակը, առկա է հեռախոսազանգ Ա.Պողոսյանի 094-62-64-38 հեռախոսահամարից Գ.Նահապետյանի 094-97-22-83 հեռախոսահամարին ժամը 1021-ին 37 վայրկյան տևողությամբ: Բացի այդ էլ, Ա.Պողասյանի 094-62-64-38 ու նրա որդու` Վ.Պողոսյանի 093-28-78-87 հեռախոսահամարների միջև 05.08.2009թ., ժամը 0821-ից մինչև 1201-ն ընկած ժամանակահատվածում առկա են թվով 17 փոխադարձ հեռախոսազանգեր:
Դեպքի վայրի զննություն կատարելու մասին արձանագրությունով, դրան կից սխեմայով և լուսանկարչական հավելվածով, համաձայն որոնց դեպքը կատարվել է Երևան քաղաքի Ա.Տիգրանյան փողոցի վրա գտնվող թիվ 8 դիսպետչերական կետի մոտ, որը իրենից ներկայացնում է հասարակական վայր:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արծիվ Վոլոդյայի Պողոսյանին առաջադրված մեղադրանքը ՀՀ քրեական օրենսգրքի 258 հոդվածի 3-րդ մասի 1-ին կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 258 հոդվածի 3-րդ մասի 1-ին կետի հատկանիշներին և արարքի որակումը ճիշտ է:
Ամբաստանյալ Վլադիմիր Արծիվի Պողոսյանին առաջադրված մեղադրանքը ՀՀ քրեական օրենսգրքի 258 հոդվածի 3-րդ մասի 1-ին և 4-րդ կետերով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 258 հոդվածի 3-րդ մասի 1-ին և 4-րդ կետերի հատկանիշներին և արարքի որակումը ճիշտ է:
Ամբաստանյալներ Արծիվ Վոլոդյայի Պողոսյանի և Վլադիմիր Արծիվի Պողոսյանի նկատմամբ պատիժ նշանակելիս, դատարանը հաշվի է առնում նրանց կատարած արարքի հանրության համար վտանգավորության աստիճանը, ինչպես նաև հանցավորների անձը:
Որպես ամբաստանյալ Արծիվ Պողոսյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա նախկինում դատված չի եղել, տառապում է պերիոդիկ` ՙերևանյան՚ հիվանդությամբ, զղջում է կատարածի համար:
Ամբաստանյալ Արծիվ Պողոսյանի պատասխանատվությունը և պատիժը ծանրացնող հանգամանքներ չկան:
Որպես ամբաստանյալ Վլադիմիր Պողոսյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա զղջում է կատարածի համար, նախկինում դատված չի եղել, խնամքին է գտնվում յոթ ամսական երեխան, կամովին հատուցել է տուժողի բուժման ծախսերը:
Ամբաստանյալ Վլադիմիր Պողոսյանի պատասխանատվությունը և պատիժը ծանրացնող հանգամանքներ չկան:
Ամբաստանյալների նկատմամբ պատիժ նշանակելիս դատարանը հաշվի է առնում նաև տուժող Գագիկ Նահապետյանի միջնորդությունը` նրանց նկատմամբ մեղմ պատիժ նշանակելու վերաբերյալ:
Կատարած արարքների համար ամբաստանյալներ Արծիվ Վոլոդյայի Պողոսյանը և Վլադիմիր Արծիվի Պողոսյանը ենթակա են քրեական պատասխանատվության և պատժի:
Դատարանը, հաշվի առնելով, որ պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ ամբաստանյալների նկատմամբ պատիժ պետք է նշանակել տուգանքի ձևով:
Նկատի ունենալով, որ տուժող Գագիկ Նահապետյանը հրաժարվել է քաղաքացիական հայցի պահանջից, դատարանն այդ հարցը համարում է լուծված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Վլադիմիր Արծիվի Պողոսյանին մեղավոր ճանաչել ՀՀ քրեական օրենսգրքի 258 հոդվածի 3-րդ մասի 1-ին և 4-րդ կետերով և նրան դատապարտել տուգանքի երեք հարյուր հազար (300.000) ՀՀ դրամի չափով:
Վլադիմիր Արծիվի Պողոսյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Արծիվ Վոլոդյայի Պողոսյանին մեղավոր ճանաչել ՀՀ քրեական օրենսգրքի 258 հոդվածի 3-րդ մասի 1-ին կետով և նրան դատապարտել տուգանքի երկու հարյուր հազար (200.000) ՀՀ դրամի չափով:
Արծիվ Վոլոդյայի Պողոսյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Տուժող Գագիկ Նահապետյանի քաղաքացիական հայցի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ