Գործ ԵԱՔԴ/0006/01/10


Ո Ր Ո Շ Ո Ւ Մ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

20 հոկտեմբերի 2010թ. ք. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂ ԴԱՏԱՎՈՐ Ս. ՉԻՉՈՅԱՆ
ԴԱՏԱՎՈՐՆԵՐ Ե. ԴԱՐԲԻՆՅԱՆ
Ա. ՀՈՎՀԱՆՆԻՍՅԱՆ

ՔԱՐՏՈՒՂԱՐՈՒԹՅԱՄԲ Տ. ՀԱԿՈԲՅԱՆԻ

ՄԱՍՆԱԿՑՈՒԹՅԱՄԲ

ՄԵՂԱԴՐՈՂ Հ.ՄԱՐՏԻՐՈՍՅԱՆԻ

Դռնբաց դատական նիստում, վճռաբեկ վարույթի կանոններով, քննության առնելով ամբաստանյալ Անդրանիկ Կարապետյանի շահերի պաշտպան Արմինե Բեջանյանի վերաքննիչ բողոքը` Անդրանիկ Արամի Կարապետյանի վերաբերյալ ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանի 2010 թվականի օգոստոսի 04-ի դատավճռի դեմ

Պ Ա Ր Զ Ե Ց

1. Գործի դատավարական նախապատմությունը.

2009 թվականի սեպտեմբերի 23-ին Քնաքեռ-Զեյթուն քննչական բաժնում ՀՀ քրեական օրենսգրքի 325-րդ հոդվածի 1-ին մասով հարուցվել է թիվ 09117509 քրեական գործը։
2009 թվականի նոյեմբերի 19-ին Անդրանիկ Արամի Կարապետյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով:
Նույն օրվա որոշմամբ մեղադրյալ մեղադրյալ Անդրանիկ Արամի Կարապետյանի նկատմամբ հայտարավել է հետախուզում:
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանի 2009 թվականի նոյեմբերի 19-ի որոշմամբ մեղադրյալ Անդրանիկ Արամի Կարապետյանի նկատմամբ որպես խափանման միջոց է ընտրվել կալանքը` 2/երկու/ ամիս ժամկետով: Կալանքի սկիզբը հաշվվել է նրան կալանավորելու օրից:
2009 թվականի նոյեմբերի 23-ին թիվ 09117509 քրեական գործի վարույթը կասեցվել է` մեղադրյալ Անդրանիկ Արամի Կարապետյանի գտնվելու վայրը պարզված չլինելու պատճառաբանությամբ:
2009 թվականի նոյեմբերի 27-ին մեղադրյալ Անդրանիկ Կարապետյանը բերման է ենթարկվել ՀՀ ոստիկանության Երևան քաղաքի վարչության Քնաքեռ-Զեյթուն բաժին և նույն օրվա որոշմամբ քրեական գործի կասեցված վարույթը վերսկսվել է:
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը 2009 թվականի նոյեմբերի 27-ի որոշմամբ բավարարել է ՀՀ ոստիկանության Քնաքեռ-Զեյթուն քննչական բաժնի քննիչ Կ.Հակոբյանի միջնորդությունը` Անդրանիկ Արամի Կարապետյանի նկատմամբ կալանավորումը որպես խափանման միջոց ընտրելու որոշումը վերահաստատելու մասին: Կալանավորման սկիզբը հաշվվել է 2009 թվականի նոյեմբերի 27-ից:
2009 թվականի դեկտեմբերի 25-ին թիվ 09117509 քերական գործի նախաքննության ժամկետը երկարացվել է երկու ամիս ժամկետով` մինչև 2010 թվականի փետրվարի 27-ը:
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանի 2010 թվականի հունվարի 22-ի որոշմամբ մեղադրյալ Անդրանիկ Կարապետյանին կալանքի տակ պահելու ժամկետը երկարացվել է քսան օր ժամկետով` մինչև 2010 թվականի փետրվարի 16-ը:
2010 թվականի փետրվարի 01-ին Անդրանիկ Արամի Կարապետյանին 19.11.2009թ. ՀՀ քրեական օրենսգրքի 325-րդ հոդվածի 1-ին մասով առաջադրված մեղադրանքը փոփոխվել, լրացվել և նոր մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով և 34-178-րդ հոդվածի 3-րդ մասի 1-ին կետով:
2010 թվականի փետրվարի 02-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազի կողմից քրեական գործն ըստ մեղադրանքի` Անդրանիկ Արամի Կարապետյանի վերաբերյալ ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննության առնելու համար։
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը 2010 թվականի օգոստոսի 04-ի դատավճռով Անդրանիկ Արամի Կարապետյանին մեղավոր է ճանաչել ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով:
ՀՀ քրեական օրենսգրքի 34-178-րդ հոդվածի 3-րդ մասի 1-ին կետով նրան դատապարտել է ազատազրկման չորս 4/չորս/ տարի վեց 6/վեց/ ամիս ժամկետով` առանց գույքի բռնագրավման: ՀՀ քրեական օրենսգրքի 325-րդ հոդվածի 1-ին մասով` ազատազրկման մեկ 1/մեկ/ տարի ժամկետով:
ՀՀ քրեական օրենսգրքի 66-րդ հոդվածի հիման վրա, նշանակված պատիժները մասնակի գումարելու սկզբունքով, Անդրանիկ Արամի Կարապետյանի նկատմամբ վերջնական պատիժ է նշանակել ազատազրկում հինգ 5/հինգ/ տարի ժամկետով` առանց գույքի բռնագրավման:
Պատժի կրման սկիզբը հաշվվել է 2009 թվականի նոյեմբերի 27-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Անդրանիկ Կարապետյանի նկատմամբ ընտրված խափանման միջոցը` կալանավորումը, թողնվել է անփոփոխ, մինչև դատավճռի օրինական ուժի մեջ մտնելը:
Վճռվել է իրեղեն ապացույց ճանաչված ՌԴ Սամարայի մարզի Սամարա քաղաքի նոտար Պոլինա Արոնի Շեյֆերի անունից 28.11.2008թ. հաստատված, 29.10.2006թ. մահացած Էմմա Սարգսյանի անունից կազմված թիվ 1-11940 կեղծ լիազորագիրը պահել քրեական գործի հետ միասին:
Դատավճռի դեմ 2010 թվականի սեպտեմբերի 06-ին ամբաստանյալ Անդրանիկ Կարապետյանի շահերի պաշտպան Արմինե Բեջանյանը բերել է վերաքննիչ բողոք:
Քրեական գործը ՀՀ վերաքննիչ քրեական դատարան է մուտք եղել 2010 թվականի սեպտեմբերի 24-ին:
ՀՀ վերաքննիչ քրեական դատարանի 2010 թվականի սեպտեմբերի 28-ի որոշմամբ վերաքննիչ բողոքն ընդունվել է վարույթ և քրեական գործը նշանակվել քննության վճռաբեկ դատարանում գործերի քննության համար սահմանված կանոններով:
Վերաքննիչ բողոքի դեմ գրավոր պատասխան չի ստացվել:

2. Գործի փաստական հանգամանքները.

Ամբաստանյալ Անդրանիկ Արամի Կարապետյանը մեղավոր է ճանաչվել և դատապարտվել ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով այն բանի համար, որ նա պատրաստել է ՌԴ Սամարայի մարզի Սամարա քաղաքի նոտար Պոլինա Արոնի Շեյֆերի անունից 28.11.2008թ. հաստատված, դեռևս 29.10.2006թ. մահացած Էմմա Սարգսյանի անունից գրված, վերջինիս Երևան քաղաքի Ա.Խաչատրյան փողոցի 24 շենքի թիվ 66 բնակարանը տնօրինելու և օգտագործելու իրավունք վերապահող կեղծ լիազորագիր, որը 2009 թվականի հունվարի 12-ին օգտագործելով` այն ներկայացրել է ՀՀ կառավարությանն առընթեր անշարժ գույքի կադաստրի պետական կոմիտեի աշխատակազմի Արաբկիրի տարածքային ստորաբաժանում, ստացել անշարժ գույքի սահմանափակումների բացակայության միասնական տեղեկանք, ապա նույն կեղծ լիազորագիրն օգտագործելով` 2009 թվականի հունվարի վերջերին, Կենտրոն նոտարական գրասենյակում, խաբեությամբ փորձել է վաճառել առանձնապես խոշոր չափերի հասնող` 21.100.000 ՀՀ դրամ արժողությամբ, Երևան քաղաքի Ա.Խաչատրյան փողոցի 24 շենքի թիվ 66 բնակարանն ու տիրանալ դրա գումարին, սակայն նոտար Ալվարդ Մելքոնյանը կասկածելով, որ լիազորագիրը կեղծ է, առք ու վաճառքի գործարք չի կնքել: Այսինքն` Անդրանիկ Կարապետյանն իր կամքից անկախ հանգամանքներով հանցագործությունն ավարտին չի հասցրել:

3. Վերաքննիչ բողոքի հիմքերը, փաստարկները և պահանջը.

Վերաքննիչ բողոքը քննվում է հետևյալ հիմքերի սահմաններում, ներքոհիշյալ հիմնավորումներով:
Պաշտպան Արմինե Բեջանյանը վերաքննիչ բողոքում նշել է, որ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի դատավճիռն անհիմն է հետևյալ պատճառաբանությամբ.
Դատարանը խախտել է ՀՀ քրեական դատավարության օրենսգրքի 358-րդ հոդվածի 4-րդ կետի և 398-րդ հոդվածի 4-րդ կետի պահանջները:
Դատարանը հաշվի չի առել այն հանգամանքը, որ Անդրանիկ Կարապետյանը իր ցուցմունքում նշել է, որ լիազորագիրն իրեն է տվել իր դասընկերուհի Զարուհի Հարությունյանը: Այն բոլոր գործողությունները, որոնք կատարվել են տվյալ բնակարանի հետ, կատարվել են Զ.Հարությունյանի կողմից: Նմանատիպ ցուցմունք է տվել նաև որպես վկա նախաքննության ընթացքում հարցաքննված Ալվարդ Մելքոնյանը և Անդրանիկ Կարապետյանը, սակայն դատարանը անտեսել է այս հանգամանը, չի գնահատել ապացույցներն իր ողջ ծավալով, որի հետևանքով կայացրել է ոչ իրավաչափ դատական ակտ:
Դատաքննության ընթացքում պաշտպանական կողմը միջնորդել է, որպես լրացուցիչ վկաներ հարցաքննել Անդրանիկ Կարապետյանի համադասարանցիներին, որով կապացուցվեր, որ Զարուհի Հարությունյան անձնավորություն գոյություն ունի և հանդիսանում է Անդրանիկ Կարապետյանի համադասարանցին, սակայն դատարանը անհիմն մերժել է այն: Դատարանը անհիմն մերժել է նաև կրկնակի դատաձեռագրաբանական փորձաքննություն նշանակելու մասին միջնորդությունը:
Դատարանը հաշվի չի առել ՀՀ քրեական օրենսգրքի 10-րդ, 48-րդ, 61-րդ հոդվածների պահանջները, որի արդյունքում իր պաշտպանյալի նկատմամբ նշանակվել է ակնհատ խիստ պատիժ:
Պատիժ նշանակելիս դատարանը պետք է հաշվի առներ նաև ՀՀ քրեական օրենսգրքի 62-րդ և 63-րդ հոդվածներով նախատեսված պատասխանատվությունն ու պատիժը մեղմացնող և ծանրացնող հանգամանքները:
Դատարանի կողմից թույլ տված առերևույթ դատական սխալը` նյութական և դատավարական իրավունքի խախտումները կարող են առաջացնել և առաջացրել են իր պաշտպանյալի համար ծանր հետևանքներ:
Ելնելով վերոգրյալից և ղեկավրվելով ՀՀ քրեական օրենսգրքի 10-րդ, 25-րդ, 48-րդ, 61-րդ, 62-րդ, 64-րդ, 70-րդ հոդվածներով, ՀՀ քրեական դատավարության օրենսգրքի 358-րդ, 376-րդ, 379-րդ հոդվածներչով պաշտպան Արմինե Բեջանյանը խնդրել է բեկանել Անդրանիկ Կարապետյանի վերաբերյալ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 04.08.2010թ. դատավճիռը և նրա նկատմամբ կայացնել արդարացման դատական ակտ: Եթե դատարանը գտնի, որ Անդրանիկ Կարապետյանի գործողություններում առկա է ՀՀ քրեական դատավարության օրենսգրքի օրենսգրքի 34-178-րդ հոդվածի 3-րդ մասի 1-ին կետի և 325-րդ հոդվածի 1-ին մասի հատկանիշները, ապա մասնակի բեկանել դատավճիռը` սահմանելով մեղմ պատիժ:
Ամբաստանյալ Անդրանիկ Կարապետյանի շահերի պաշտպան Արմինե Բեջանյանը դիմում է ներակայացրել ՀՀ վերաքննիչ քրեական դատարան` խնդրելով վերաքննիչ բողոքը քննել իր բացակայությամբ:
Վերաքննիչ դատարանում ամբաստանյալ Անդրանիկ Կարապետյանը միացավ պաշտպանի վերաքննիչ բողոքին:

4. Վերաքննիչ բողոքի դեմ բերված պատասխանը.

Մեղադրող, Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Հ.Մարտիրոսյանը վերաքննիչ բողոքի դեմ առարկեց` նշելով, որ Անդրանիկ Կարապետյանին ներկայացված մեղադրանքը հիմնավոր է, դատավճիռն օրինական է և հիմնավորված, նշանակված պատիժը` համաչափ, ուստի դատավճիռը բեկանելու հիմքեր չկան:

5 Վերաքննիչ դատարանի պատճառաբանությունները և եզրահանգումը.

Վերաքննիչ դատարանը, վերաքննիչ բողոքի հիմքերի և հիմնավորումների սահմաններում, լսելով բողոքում ներկայացված հետևությունները հիմնավորելու մասին ամբաստանյալի ելույթը, դատական ակտը չբողոքարկած մեղադրողի պատասխանը, վերլուծելով քրեական գործի նյութերը, դրանք գնահատելով իրենց համակցությամբ, ներքին համոզմամբ, հանգում է այն հետևության, որ վերաքննիչ բողոքը պետք է մերժել հետևյալ պատճառաբանությամբ.
Առաջադրված մեղադրանքում ամբաստանյալ Անդրանիկ Կարապետյանն իրեն մեղավոր չի ճանաչել և ցուցմունք է տվել այն մասին, որ մոտ մեկ տարի առաջ, պատահաբար Երևանի Կասկադ համալիրի մոտ հանդիպել է իր դասընկերուհի Զարուհի Հարությունյանին, ում հետ միասին սովորել է Ալ.Շիրվանզադեի անվան թիվ 21 միջնակարգ դպրոցում: Վերջինս իրեն ասել է, որ Սամարա քաղաքում բնակվող իր հիվանդ հորաքույրը, Երևանում ունեցած իր բնակարանը ցանկանում է վաճառել: Զ.Հարությունյանն առաջարկել է իրեն տալ անձնագրի պատճենը, որպեսզի հորաքույրն իր անունով լիազորագիր տա` վաճառելու վերջինիս Երևանի բնակարանը: Ինքն այդ առաջարկին համաձայնել է, քանի որ Զարուհի Հարությունյանը դրա դիմաց խոստացել է որպես պարգևավճար վճարել 5000 ԱՄՆ դոլար: Այդ հանդիպումից մոտ 20 օր անց Զարուհի Հարությունյանը զանգահարել է և, հանդիպելով իրեն, ցույց է տվել ռուսերեն լեզվով կազմված լիազորագիր, համաձայն որի Զ.Հարությունյանի հորաքույրը, որի անունը չի հիշում, լիազորել է իրեն, Երևան քաղաքի Ա.Խաչատրյան փողոցի 24 շենքի թիվ 66 բնակարանը վաճառել: Զ.Հարությունյանն առաջարկել է այդ լիազորագիրը հայերեն թարգմանելուց հետո հանձնել իրեն: Այդ հանդիպումից մի քանի օր անց Զարուհի Հարությունյանը կրկին զանգահարել է իրեն և նորից հանդիպելով տվել նշված լիազորագրի թարգմանված օրինակը, որից երկու օր անց ինքը նշված լիազորագիրը ներկայացրել է ՀՀ կառավարությանն առընթեր անշարժ գույքի կադաստրի պետական կոմիտեի աշխատակազմի Արաբկիրի տարածքային ստորաբաժանում, որպեսզի ստանա տեղեկանք այն մասին, որ Ա.Խաչատրյան փողոցի 24 շենքի թիվ 66 բնակարանը արգելանքի տակ չգտնվելու վերաբերյալ, որ կարողանա նշված բնակարանը վաճառել: Քանի որ ներկայացված լիազորագիրն իրավունք չէր տալիս ստանալ վերը նշված բնակարանի սեփականության վկայականի կրկնօրինակը, կադաստրի ստորաբաժանման աշխատակիցները հետ են վերադարձրել լիազորագիրը: Ինքը հենց նույն օրը Զ.Հարությունյանին է վերադարձրել լիազորագիրը և պատմել կատարվածի մասին: Դրանից մոտ 15 օր անց իր հետ կրկին հանդիպել է Զարուհի Հարությունյանը և հանձնել նոր փոփոխված լիազորագիր, որով հնարավոր կլիներ ստանալ վերը նշված բնակարանի սեփականության վկայականի կրկնօրինակը: Հաջորդ օրը, նշված լիազորագիրը ներկայացնելով ՀՀ կառավարությանն առընթեր անշարժ գույքի կադաստրի պետական կոմիտեի աշխատակազմի Արաբկիրի տարածքային ստորաբաժանում, ստացել է տեղեկանք այն մասին, որ Ա.Խաչատրյան փողոցի 24 շենքի թիվ 66 բնակարանն արգելանքի տակ չի գտնվում: Այդ ընթացքում Զ.Հարությունյանը գտել է գնորդ, և իրենք այդ գնորդի հետ գնացել են ՀՀ կենտրոնական նոտարական գրասենյակ, որպեսզի վաճառեն Ա.Խաչատրյան փողոցի 24 շենքի թիվ 66 բնակարանը, սակայն նոտար Ա.Մելքոնյանը,
կասկածելով, որ ներկայացված լիազորագիրը կեղծ է, առք ու վաճառքի գործարք չի կնքել և ներկայացված լիազորագիրը հետ չի վերադարձրել: Դրանից հետո ինքը չի տեսել Զարուհի Հարությունյանին և նրանից որևէ տեղեկություն չունի:
Դատարանը գտել է, որ Անդրանիկ Կարապետյանի պատճառաբանություններն անհիմն են և նպատակ են հետապնդում խուսափել քրեական պատասխանատվությունից:
Ամբաստանյալի կատարած հանցանքը հիմնավորվել է դատարանի կողմից որպես արժանահավատ գնահատվող և քրեադատավարական օրենքի պահանջների պահպանմամբ ձեռք բերված, դատական ակտում շարադրված հետևյալ ապացույցներով.
Նախաքննության ընթացքում տուժողի ներկայացուցիչ ճանաչված, դատարանում որպես վկա հարցաքննված Վոլոդյա Էդուարդի Բենեդիկտովի ցուցմունքով այն մասին, որ Էմմա Սամսոնի Սարգսյանը հանդիսացել է իր ընկերոջ` Նուբար Ավոյանի կնոջ` Իրինա Սահակովայի մայրը, ով մահացել է 2006 թվականին Գերմանիայում: Իրինա Սահակովան և Նուբար Ավոյանը 2009 թվականի ամռան վերջերին մեկնել են Շվեդիա և ներկայումս գտնվում են այնտեղ: ՀՀ-ից մեկնելու ժամանակ նրանք իրեն պատմել են, որ ամիսներ առաջ ինչ որ մեկը ցանկացել է խաբեությամբ վաճառել Ի.Սահակովայի` Երևան քաղաքի, Ա.Խաչատրյան փողոցի 24 շենքի թիվ 66 բնակարանը, բայց ով է դա փորձել, իրենց հայտնի չէ:
Մեկնելուց առաջ Իրինա Սահակովան իրեն տվել է լիազորագիր նշված բնակարանի տիրապետման վերաբերյալ:
Վկա, Կենտրոն նոտարական գրասենյակի նոտար Ալվարդ Պարգևի Մելքոնյանի նախաքննության ընթացքում տված ցուցմունքով այն մասին, որ 2009 թվականի գարնան սկզբներին, Երևան քաղաքի Ա.Խաչատրյան փողոցի 24 շենքի թիվ 66 բնակարանի առուվաճառքի գործարք կնքելու համար իրեն են դիմել երկու կին և երկու տղամարդ, որոնցից մեկը եղել է Անդրանիկ Կարապետյանը: Ա.Կարապետյանը հանդես է եկել որպես վաճառող, ներկայացրել ՌԴ Սամարայի մարզի Սամարա քաղաքի նոտար Պոլինա Շեյֆերի կողմից հաստատված, Ա.Խաչատրյան փողոցի 24 շենքի թիվ 66 բնակարանի սեփականատեր Էմմա Սարգսյանի անունից գրված լիազորագիր և որպես լիազորված անձ, փորձել է վաճառել վերը նշված բնակարանը: Ինքը կասկածելով, որ ներկայացված լիազորագիրը կեղծ է, չի կնքել գործարքը, իսկ լիազորագիրը վերցրել և ուղարկել է ՀՀ արդարադատության նախարարություն:
ՌԴ Սամարայի մարզի ՆԳ Վարչությունից 11.12.2009թ. թիվ 12/10-173 գրությամբ ստացված, գործով վկա ՌԴ Սամարայի մարզի Սամարա քաղաքի նոտար Պոլինա Շեյֆերի ցուցմունքով այն մասին, որ քննիչի կողմից իրեն զննության է ներկայացվել իր անունից 28.11.2008թ. հաստատված, Էմմա Սարգսյանի անունից գրված թիվ 1-11940 լիազորագրի պատճենը, որով վերջինս լիազորել է Անդրանիկ Կարապետյանին վաճառել, փոխանակել կամ վարձակալության տրամադրել Երևան քաղաքի, Ա.Խաչատրյան փողոցի 24 շենքի թիվ 66 բնակարանը: Նշված լիազորագիրը իր կողմից չի հաստատվել, դրանում առկա ստորագրությունը և կնիքն իրենը չեն, այլ` կեղծված են: Ինքը նշված լիազորագիրը չի կազմել և չի հաստատել: Իր ստորագրությունն ու կնիքը չեն համապատասխանում այդ լիազորագրի ստորագրությանն ու կնիքին, իսկ այդ լիազորագրի հերթական 1-11940 համարով փաստաթուղթ 2008 թվականի ընթացքում չի կազմվել:
Ամբաստանյալի կատարած հանցանքը հիմնավորվել է նաև քրեական գործով ձեռք բերված հետևյալ ապացույցներով.
Փաստաթղթաբանական և ձեռագրաբանական համալիր փորձաքննության 15.01.2010թ. թիվ 09-2579 եզրակացությամբ, ապրանքագիտական փորձաքննության 29.01.2010թ. թիվ 10-0102 եզրակացությամբ, որպես ապացույց, այլ փաստաթուղթ հանդիսացող` Ալ.Շիրվանզադեի անվան թիվ 21 միջնակարգ դպրոց պետական ոչ առևտրային կազմակերպության 22.01.2010թ. թիվ 01-13 գրությամբ, ՀՀ արդարադատության նախարարությունից առգրավված, ՌԴ Սամարայի մարզի Սամարա քաղաքի նոտար Պոլինա Արոնի Շեյֆերի անունից 28.11.2008թ. հաստատված, 29.10.2006թ. մահացած Էմմա Սարգսյանի անունից գրված թիվ 1-11940 կեղծ լիազորագրով, այն առգրավվելու որոշմամբ, առգրավելու և զննելու արձանագրությամբ, իրեղեն ապացույց ճանաչելու որոշումով:
Դատարանը քննության առնելով գործում եղած և դատավճռում շարադրված ապացույցները` հանգել է իրավացի հետևության, որ ամբաստանյալ Անդրանիկ Արամի Կարապետյանին ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով առաջադրված մեղադրանքը հիմնավորված է, արարքի որակումը` ճիշտ և նա պետք է քրեական պատասխանատվության ենթարկվի նշված հոդվածներով:
Վերաքննիչ դատարանը նույնպես հանգում է հետևության, որ ամբաստանյալ Անդրանիկ Կարապետյանին առաջադրված մեղադրանքը հաստատված է գործին վերաբերվող փոխկապակցված հավաստի ու արժանահավատ ապացուցների բավարար ամբողջությամբ:
Վերաքննիչ դատարանը գտնում է, որ վերաքննիչ բողոքում նշված պատճառաբանություններն այն մասին, որ դատարանը թույլ է տվել նյութական և դատավարական իրավունքի խախտումներ, անհիմն են և չեն բխում գործի հանգամանքներից:
Վերաքննիչ դատարանը արձանագրում է, որ գործի քննության և լուծման ընթացքում քրեադատավարական օրենքի որևէ էական խախտում թույլ չի տրվել:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը ամբաստանյալի նկատմամբ պատիժ նշանակելիս, հաշվի է առել կատարած արարքի հանրության համար վտանգավորության աստիճանը, ինչպես նաև հանցավորի անձը: Որպես պատասխանատվությունը և պատիժը մեղմացնող հանգամանք է դիտել նախկինում դատված չլինելը, պատասխանատությունը և պատիժը ծանրացնող հանգամանք չի արձանագրել:
Քննության առնելով վերաքննիչ բողոքի պահանջը` ամբաստանյալ Անդրանիկ Կարապետյանի նկատմամբ մեղմ պատիժ սահմանելու մասին, վերաքննիչ դատարանը գտնում է, որ ընդհանուր իրավասության դատարանը ամբաստանյալի նկատմամբ պատժատեսակի և պատժաչափի նշանակման, ինչպես նաև նշանակված պատիժը կրելու անհրաժեշտության հարցում հանգել է հիմնավորված հետևությունների, ուստի վերաքննիչ բողոքում նշված հանգամանքները և գործի տվյալները չեն կարող օբյեկտիվ հիմք հանդիսանալ դատական ակտը բեկանելու կամ փոփոխելու համար:
Հետևաբար, Անդրանիկ Կարապետյանի վերաբերյալ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատավճիռն օրինական, հիմնավորված և պատճառաբանված է, այն պետք է թողնել օրինական ուժի մեջ, իսկ պաշտպանի վերաքննիչ բողոքը` մերժել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-394-րդ, 402-րդ և 418-րդ հոդվածներով` ՀՀ վերաքննիչ քրեական դատարանը

Ո Ր Ո Շ Ե Ց

Ամբաստանյալ Անդրանիկ Կարապետյանի շահերի պաշտպան Արմինե Բեջանյանի վերաքննիչ բողոքը մերժել:
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանի 2010 թվականի օգոստոսի 04-ի դատավճիռը քրեական գործով ըստ մեղադրանքի` Անդրանիկ Արամի Կարապետյանի ՀՀ քրեական օրենսգրքի 34-178-րդ հոդվածի 3-րդ մասի 1-ին կետով և 325-րդ հոդվածի 1-ին մասով, թողնել օրինական ուժի մեջ:
Որոշումը կարող է բողոքարկվել ՀՀ Վճռաբեկ դատարան` հրապարակման պահից մեկամսյա ժամկետում։



ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ

Իսկականի հետ ճիշտ է`

ՆԱԽԱԳԱՀՈՂ ԴԱՏԱՎՈՐ Ս. ՉԻՉՈՅԱՆ