գործ No ԵԱՔԴ 0005/01/10

Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ. Ավետիսյանի
քարտուղարությամբ` Ե. Կարապետյանի
մասնակցությամբ`
մեղադրող` Ա. Բոշնաղյանի
ամբաստանյալ` Ա. Ասատրյանի

2010թ. փետրվարի 24-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Առաքել Վիլիկի Ասատրյանի, ծնված 14.07.1966թ. Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, ՙՋոնաս՚ ՍՊԸ տնօրեն, նախկինում չդատված, հաշվառված և բնակվել է Երևան քաղաքի Դարաբաղի փողոցի 73 տանը:
Մեղադրվում է ՀՀ քրեական օրենսգրքի 189 հոդվածի 3-րդ մասով:

Պ Ա Ր Զ Ե Ց
1.Գործի դատավարական նախապատմությունը.
2008թ. հոկտեմբերի 09-ին ՀՀ ԿԱ պետական եկամուտների կոմիտեի մաքսային ծառայության քննչական բաժնում ՀՀ քրեական օրենսգրքի 205 հոդվածի 2-րդ և 189 հոդվածի 2-րդ մասերի հատկանիշներով հարուցվել է թիվ 84103208 քրեական գործը:
2008թ. նոյեմբերի 24-ին Առաքել Վիլիկի Ասատրյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 205 հոդվածի 2-րդ մասով, 189 հոդվածի 2-րդ մասով և նրա նկատմամբ որպես խափանման միջոց ընտրվել է կալանավորումը:
2008թ. նոյեմբերի 24-ին Առաքել Ասատրյանի նկատմամբ հայտարարվել է հետախուզում:
2009թ. օգոստոսի 13-ին Առաքել Վիլիկի Ասատրյանը ՈւՀ Բորիսպոլ քաղաքի ՆԳ բաժնի աշխատակիցների կողմից հայտնաբերվել և ձերբակալվել է:
2009թ. նոյեմբերի 06-ին Առաքել Ասատրյանը Ուկրաինայի Հանրապետությունից տեղափոխվել է Հայաստանի Հանրապետություն:
2009թ. նոյեմբերի 06-ին Առաքել Ասատրյանի նկատմամբ որպես խափանման միջոց թողնվել է կալանավորումը:
2010թ. հունվարի 14-ի որոշմամբ Արթուր Ղազարյանի նկատմամբ քրեական հետապնդում չի իրականացվել` վերջինիս մահվան պատճառաբանությամբ:
2010թ. հունվարի 14-ին Առաքել Վիլիկի Ասատրյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 189 հոդվածի 3-րդ մասով:
2010թ. հունվարի 14-ի որոշմամբ թիվ 84103208 քրեական գործի նյութերով հարուցվել է թիվ 84100210 քրեական գործը` ՀՀ քրեական օրենսգրքի 205 հոդվածի 2-րդ և 215 հոդվածի 1-ին մասերի հատկանիշներով:
2010թ. հունվարի 26-ին թիվ 84103208 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2009թ. հունվարի 27-ին քրեական գործը վարույթ է ընդունվել և նշանակվել դատաքննության 2009թ. փետրվարի 15-ին:
2.Գործի փաստական հանգամանքները.
Նախաքննության մարմինն ամբաստանյալ Առաքել Վիլիկի Ասատրյանին մեղադրանք է առաջադրել հետևյալ արարքի համար.
Առաքել Ասատրյանը Երևան քաղաքի բնակիչ, ներկայումս հանգուցյալ Արթուր Քյարամի Ղազարյանի նախաձեռնությամբ 10.10.2006թ. հիմնադրել է ՙՋոնաս՚ ՍՊ ընկերությունը և առանց ապրանքների մատակարարման ու ծառայությունների մատուցման Արթուր Ղազարյանին և ՙՎասոՇին՚ ՍՊ ընկերության տնօրեն Վասակ Սարգսյանին 2006-2008թթ. ընթացքում տրամադրել է ՙՋոնաս՚ ՍՊ ընկերության անվամբ կազմված կեղծ փաստաթղթեր` հաշիվ-ապրանքագրեր, որի հետևանքով ՀՀ պետական բյուջեին պատճառվել է առանձնապես խոշոր չափերի, ընդհանուր` 30.997.360 ՀՀ դրամի չափով վնաս:
3.Ապացույցների հետազոտում.
Առաջադրված մեղադրանքում ամբաստանյալ Առաքել Ասատրյանն իրեն մեղավոր է ճանաչել լիովին և տվել խոստովանական ցուցմունքներ այն մասին, որ ՙՋոնաս՚ ՍՊ ընկերությունը հիմնադրել է 2006 թվականին, հարևանությամբ բնակվող Արթուր Ղազարյանի նախաձեռնությամբ և հաշվառել ՙԱրաբկիր-1՚ հարկային տեսչությունում:
Արթուր Ղազարյանն իրեն բացատրել է, որ ՙՋոնաս՚ ՍՊ ընկերությունը հիմնադրելու իմաստն այն է, որ պետք է միայն ստորագրել, կնիքել նախապես կազմված հաշիվ-ապրանքագրերը և ներկայանալ բանկ ՙՋոնաս՚ ՍՊ ընկերության հաշվեհամարին փոխանցված գումարները ստանալու համար: Գումարը բանկում ստանալուց հետո հանձնել է Արթուր Ղազարյանին և ՙՎասո Շին՚ ՍՊԸ տնօրեն Վասակ Սարգսյանին, որի դիմաց ստացել է չնչին գումար: Վերջիններս վստահեցրել են, որ բոլոր հարկերը և տուրքերը վճարվում են, իսկ այն հարցին, թե ինչ է լինելու սրա վերջը, պատասխանել են, որ իր գործը չէ:
ՙՋոնաս՚ ՍՊԸ հաշվեհամարին փոխանցված գումարները ստանալու նպատակով Արթուր Ղազարյանի և Վասակ Սարգսյանի կանչով հաճախակի ներկայացել է ՙԱրցախ Բանկ՚ անմիջապես Հրազդանի կիրճից տան համար վառելափայտ հայթայթելուց հետո, կեղտոտ ձեռքերով: Այդ պատճառով Վասակ Սարգսյանի պահանջով Արթուր Ղազարյանին տվել է լիազորագիր և ՙՋոնաս՚ ՍՊ ընկերության կնիքը, որպեսզի վերջինս կատարի բոլոր գործողությունները:
2007 թվականին Արթուր Ղազարյանի մահից հետո, ՙՋոնաս՚ ՍՊԸ անվամբ կազմված կեղծ հաշիվ-ապրանքագրերը տրամադրել է միայն ՙՎասո Շին՚ ՍՊԸ տնօրեն Վասակ Սարգսյանին:
Տեղեկանալով այն մասին, որ իր նկատմամբ քրեական հետապնդում է սկսվել, դիմել է Վասակ Սարգսյանին: Վերջինս գնելով իքնաթիռի տոմս, ուղեկցել է իրեն ՙԶվարթնոց՚ օդանավակայան, որտեղից էլ մեկնել է Ուկրանիայի Հանրապետություն: ՙԶվարթնոց՚ օդանավակայան մեկնելուց առաջ ՙՋոնաս՚ ՍՊ ընկերության կնիքը Վասակ Սարգսյանի առաջարկով հանձնել է նրան:
Ամբաստանյալին առաջադրված մեղադրանքը, բացի նրա խոստովանական ցուցմունքից հիմնավորվել է նաև գործով ձեռք բերված հետևյալ ապացույցներով.
Վկա, ՙՅու-Վ-Շին՚ ՍՊ ընկերության տնօրեն Յուրիկ Մեսրոպի Գասպարյանի ցուցմունքով այն մասին, որ ՙՅու-Վ-Շին՚ ՍՊ ընկերությունը գործարք է կատարել ՙՋոնաս՚ ՍՊ ընկերության հետ, սակայն նշված ՍՊ ընկերության տնօրեն Առաքել Ասատրյանին չի ճանաչել և չի տեսել: Բոլոր գործարքները կատարվել են ՙՎասո Շին՚ ՍՊ ընկերության տնօրեն Վասակ Սարգսյանի հետ: Ձեռք բերված ապրանքների դիմաց գումարը փոխանցել է ՙՋոնաս՚ ՍՊԸ հաշվեհամարին Վասակ Սարգսյանի նախաձեռնությամբ:
Վկա, ՙԳետն Գրուպ՚ ՓԲ ընկերության գլխավոր հաշվապահ Սուրեն Ժորայի Հովհաննիսյանի ցուցմունքով այն մասին, որ ՙԳետն Գրուպ ՓԲ ընկերությունը ՙՋոնաս՚ ՍՊ ընկերությունից ձեռք է բերել 5198 հատ գազի փականներ, սակայն նշված ընկերության տնօրեն Առաքել Ասատրյանի մասին չի լսել և վերջինիս չի ճանաչել:
Գազի փականները մատակարարել է Լևոն անունով երիտասարդ, ներկայացնելով ՙՋոնաս՚ ՍՊ ընկերության անվամբ կազմված, տնօրենի ստորագրությամբ և կնիքով հաշիվ-ապրանքագրերը: Գումարը փոխանցել են ՙՋոնաս՚ ՍՊ ընկերության հաշվեհամարին:
Վկա, անհատ ձեռնարկատեր Լևոն Կիրակոսի Հարությունյանի ցուցմունքով այն մասին, որ Գնունու փողոցի վրա գտնվող շուկայում առևտրով զբաղվելիս իրեն է մոտեցել ՙՋոնաս՚ ՍՊԸ ներկայացուցիչ հանդես եկած մոտ 40 տարեկան մի տղամարդ և ձեռք բերել ապրանքներ: ՙՋոնաս՚ ՍՊԸ ներկայացուցիչը խնդրել է այդ ապրանքները տանել ՙԳետն Գրուպ՚ ՍՊ ընկերություն, տրամադրելով ՙՋոնաս՚ ՍՊ ընկերության անվամբ կազմված, կնիքված և ստորագրված հաշիվ-ապրանքագրեր: ՙՋոնաս՚ ՍՊԸ տնօրեն Առաքել Ասատրյանին չի ճանաչել:
Վկա, Առաքել Ասատրյանի մորեղբոր որդի Հովհաննես Արշալույսի Հովհաննիսյանի ցուցմունքով այն մասին, որ ՙՋոնաս՚ ՍՊ ընկերության մասին չի լսել և զարմացել է, որ Առաքել Ասատրյանը հանդիսանում է ՍՊ ընկերության տնօրեն, քանի որ վերջինս միշտ գտնվել է նյութապես ծանր վիճակում:
Վկա, Երևանի քիմ-դեղագործական ֆիրմայի պահեստապետ Նիկոլայ Ասատուրի Ալավերդյանի ցուցմունքով այն մասին, որ Երևանի քիմ-դեղագործական ֆիրման ՙՋոնաս՚ ՍՊ ընկերությունից ձեռք է բերել արագակտրիչներ և նշված ապրանքը մատակարարել է ՙՋոնաս՚ ՍՊ ընկերության լիազոր-ներկայացուցիչ ներկայացած Արթուր Ղազարյանը: Ապրանքի դիմաց գումարը նույնպես փոխանցել է ՙՋոնաս՚ ՍՊ ընկերության հաշվեհամարին:
Վկա, Առաքել Ասատրյանի մորաքրոջ որդի Սեյրան Հովհաննեսի Զախարյանի ցուցմունքով այն մասին, որ Առաքել Ասատրյանը 2008 թվականի ամռանը գնացել է իրենց տուն և հայտնել, որ կանչել են հարցաքննության: Հայտնել է նաև, որ Վասակ Սարգսյանը վերցրել է իր անձնագիրը, որպեսզի գնի ինքնաթիռի տոմս: Հաջորդ օրն առավոտյան Վասակ Սարգսյանն իր անձնական ավտոմեքենայով Առաքել Ասատրյանին տարել է ՙԶվարթնոց՚ օդանավակայան:
Ամբաստանյալի կատարած հանցանքը հիմնավորվել է նաև գործով ձեռք բերված հետևյալ ապացույցներով.
Դատահաշվապահական փորձաքննության 12.09.2008թ. փորձագետի թիվ 08-1139 եզրակացությամբ այն մասին, որ 2006թ. 4-րդ եռամսյակից մինչև 2008թ. 1-ին եռամսյակն սկսած ժամանակաշրջանում ՙՋոնաս՚ ՍՊ ընկերությունում առաջացել են պետական բյուջե մարման ենթակա 30.997.360 դրամ հարկային պարտավորություններ:
Փորձագետ Գևորգ Մխիթարի Մկրտչյանի ցուցմունքով այն մասին, որ փորձաքննությամբ նշված 30.997.360 դրամ գումարի չափով հարկային պարտավորությունը կեղծ ձեռնարկատիրությամբ զբաղվելու դեպքում, փոփոխման ենթակա չէ:
Գործով ապացույց ճանաչված 09.04.2007թ. թիվ 23, 10.04.2007թ. թիվ 24, 21.03.2007թ. թիվ 22, 08.06.2007թ. թիվ 91, 01.06.2007թ. թիվ 90, 10.08.2007թ. թիվ 94, 14.09.2007թ. թիվ 95, 01.10.2007թ. թիվ 96, 18.10.2007թ. թիվ 116, 30.11.2007թ. թիվ 114, 04.12.2006թ. թիվ 118 հաշիվ-ապրանքագրերով:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Առաքել Վիլիկի Ասատրյանին առաջադրված մեղադրանքը ՀՀ քրեական օրենսգրքի 189 հոդվածի 3-րդ մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 189 հոդվածի 3-րդ մասի հատկանիշներին և արարքի որակումը ճիշտ է:
Դատարանը նկատի ունենալով, որ ամբաստանյալ Ասատրյանն արարքը կատարել է 2006-2008թթ. ընթացքում, գտնում է, որ նրա նկատմամբ պատիժ պետք է նշանակել 12.07.06թ. խմբագրությամբ:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարածի համար:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Առաքել Ասատրյանը ենթակա է քրեական պատասխանատվության և պատժի:
Դատարանը, հաշվի առնելով Առաքել Ասատրյանի կատարած արարքի հանրության համար վտանգավորության աստիճանը և բնույթը, նրա անձը, պատասխանատվությունը և պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, գտնում է, որ պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
Դատարանը քննության առնելով ՀՀ գլխավոր դատախազության քաղաքացիական հայցը` ամբաստանյալ Առաքել Ասատրյանից հօգուտ պետական բյուջեի 30.997.360 դրամ բռնագանձելու վերաբերյալ, նկատի ունենալով, որ Առաքել Ասատրյանի գործողությունների հետևանքով վնաս է պատճառվել պետության գույքային շահերին, գտնում է, որ ՀՀ գլխավոր դատախազության քաղաքացիական հայցը հիմնավոր է և ենթակա բավարարման ամբողջությամբ:
Դատարանը գտնում է, որ գործով ապացույց ճանաչված 09.04.2007թ. թիվ 23, 10.04.2007թ. թիվ 24, 21.03.2007թ. թիվ 22, 08.06.2007թ. թիվ 91, 01.06.2007թ. թիվ 90, 10.08.2007թ. թիվ 94, 14.09.2007թ. թիվ 95, 01.10.2007թ. թիվ 96, 18.10.2007թ. թիվ 116, 30.11.2007թ. թիվ 114, 04.12.2006թ. թիվ 118 հաշիվ-ապրանքագրերը պետք է պահել քրեական գործում:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը
Վ Ճ Ռ Ե Ց

Առաքել Վիլիկի Ասատրյանին մեղավոր ճանաչել ՀՀ քրեական օրենսգրքի 189 հոդվածի 3-րդ մասով և նրան դատապարտել ազատազրկման չորս (4) տարի ժամկետով:
Պատժի սկիզբը հաշվել 2009թ. օգոստոսի 13-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Առաքել Ասատրյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Առաքել Վիլիկի Ասատրյանից հօգուտ պետական բյուջեի բռնագանձել երեսուն միլիոն ինը հարյուր իննսունյոթ հազար երեք հարյուր վաթսուն (30.997.360) ՀՀ դրամ:
Ապացույց ճանաչված 09.04.2007թ. թիվ 23, 10.04.2007թ. թիվ 24, 21.03.2007թ. թիվ 22, 08.06.2007թ. թիվ 91, 01.06.2007թ. թիվ 90, 10.08.2007թ. թիվ 94, 14.09.2007թ. թիվ 95, 01.10.2007թ. թիվ 96, 18.10.2007թ. թիվ 116, 30.11.2007թ. թիվ 114, 04.12.2006թ. թիվ 118 հաշիվ-ապրանքագրերը պահել քրեական գործում:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ