ԵԱՔԴ/0002/01/10



ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«6» օգոստոսի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղարներ Ռ.Ավետյան
Ա.Մնացականյան
մեղադրողներ Ռ.Խաչատրյան
Ա.Շահազիզյան
պաշտպաններ Ռ.Սաֆարյան
Ա.Հոբոսյան

դռնբաց դատական նիստում քննեց քրեական գործն ըստ մեղադրանքի`
Արտեմ Գրիգորի Գևորգյանի` ծնված 1966 թվականի ապրիլի 21-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չի աշխատում, չամուսնացած, դատվածություն չունեցող, հաշվառված է Երևան քաղաքի Լևոնյան փողոցի 22-րդ տանը: Մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ կետով, արգելանքի տակ է 2009 թվականի դեկտեմբերի 11-ից,
Գեղամ Գրիգորի Կարապետյանի` ծնված 1966 թվականի մարտի 21-ին Երևան քաղաքում, ազգությամբ հայ, ՀՀ քաղաքացի, ութամյա կրթությամբ, չի աշխատում, չամուսնացած, նախկինում չդատապարտված, հաշվառված է Երևան քաղաքի Դավթաշենի 2-րդ թաղամասի 44-րդ շենքի 46-րդ բնակարանում: Մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 2-րդ կետով, արգելանքի տակ է 2009 թվականի հոկտեմբերի 22-ից:
1. Գործի դատավարական նախապատմությունը.
2009 թվականի հոկտեմբերի 22-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ ՀՀ քրեական օրենսգրքի 268-րդ հոդվածի 2-րդ մասի 2-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 09119709 քրեական գործը:
2009 թվականի հոկտեմբերի 24-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ թիվ 09119709 քրեական գործով Գեղամ Գրիգորի Կարապետյանին մեղադրանք է առաջադրվել ՀՀ քրեական օրենսգրքի 266-րդ հոդվածի 1-ին մասով և 268-րդ հոդվածի 2-րդ մասի 2-րդ կետով:
2009 թվականի դեկտեմբերի 7-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ թիվ 09119709 քրեական գործով Արտեմ Գրիգորի Գևորգյանին մեղադրանք է առաջադրվել ՀՀ քրեական օրենսգրքի 38-266-րդ հոդվածի 2-րդ մասի 2-րդ կետով:
2009 թվականի դեկտեմբերի 28-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ թիվ 09119709 քրեական գործով Գեղամ Գրիգորի Կարապետյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 2-րդ կետով:
2009 թվականի դեկտեմբերի 28-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ թիվ 09119709 քրեական գործով Արտեմ Գրիգորի Գևորգյանին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ կետով:
2009 թվականի դեկտեմբերի 28-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ թիվ 09119709 քրեական գործի նյութերով ՀՀ քրեական օրենսգրքի 266-րդ հոդվածի 2-րդ մասի 2-րդ կետով հարուցվել է նոր քրեական գործ, շնորհվել 09119709 համարը և ընդունվել վարույթ:
2009 թվականի դեկտեմբերի 30-ին Արտեմ Գրիգորի Գևորգյանի և Գեղամ Գրիգորի Կարապետյանի վերաբերյալ քրեական գործը մեղադրական եզրակացությամբ ուղարկվել է Դատարան:
Արտեմ Գրիգորի Գևորգյանին մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ կետով` այն արարքի համար, որ նա 2009 թվականի հոկտեմբերի 21-ին` Երևան քաղաքի Լևոնյան փողոցի 22-րդ տան մոտ անհայտ անձից իրացնելու նպատակով ապօրինի ձեռք է բերել ափիոն տեսակի թմրամիջոց, որից նույն օրը` ժամը 13:00-ի սահմաններում, իր Երևան քաղաքի Լևոնյան փողոցի 22-րդ տանը, 19.000 ՀՀ դրամով վաճառելու եղանակով ապօրինի իրացրել է Գեղամ Գրիգորի Կարապետյանին, որից հետո դրա մի մասը ներարկվելու եղանակով օգտագործել է Գեղամ Կարապետյանի հետ միասին, իսկ մնացած` խոշոր չափի 0.288 գրամ չոր քաշով ացետիլացված ափիոն տեսակի թմրամիջոցը Գեղամ Կարապետյանը ապօրինի պահել է իր մոտ, որն էլ 2009 թվականի հոկտեմբերի 21-ին հայտնաբերվել է նրա անձնական խուզարկությամբ:
Գեղամ Գրիգորի Կարապետյանին մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 2-րդ կետով` այն արարքի համար, որ նա 2009 թվականի հոկտեմբերի 21-ին` ժամը 13:00-ի սահմաններում, Երևան քաղաքի Լևոնյան փողոցի 22 հասցեում գտնվող տանը, նույն տան բնակիչ` Արտեմ Գրիգորի Գևորգյանից 19.000 ՀՀ դրամով ապօրինի ձեռք է բերել ափիոն տեսակի թմրամիջոց, որի մի մասը ներարկվելու եղանակով օգտագործել է Արտեմ Գևորգյանի հետ միասին, իսկ մնացած` խոշոր չափի 0.288 գրամ չոր քաշով ացետիլացված ափիոն տեսակի թմրամիջոցն ապօրինի պահել է իր մոտ, որը նույն օրը ոստիկանության Քանաքեռ-Զեյթունի բաժնում հայտնաբերվել է նրա անձնական խուզարկությամբ:
2.Ապացույցների հետազոտում և գնահատում.
Դատական քննության ընթացքում ամբաստանյալ Արտեմ Գևորգյանն առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ ինքը Գեղամին ոչ թե իրացրել, այլ օգնել է ձեռք բերել թմրամիջոց: Գեղամը զանգահարել է իրեն, ասել, որ վատ է զգում, ու խնդրել նրա համար թմրամիջոց ձեռք բերել: Գեղամն ասել է նաև, որ ունի 19.000 ՀՀ դրամ: Դրանից հետո ինքը տնից դուրս է եկել և դրսում տեսել մի անծանոթ անձի, ով եղել է թմրամիջոց օգտագործած վիճակում: Ինքն այդ անձին հարցրել է, թե արդյոք նա կարող է օգնել իրեն` թմրամիջոց ձեռք բերել, իսկ նա պատասխանել է, որ 20.000 ՀՀ դրամով կարող է թմրամիջոց ձեռք բերել: Նրա հետ ինքը պայմանավորվել է հանդիպել նույն օրը` ժամը 13:00-ին: Դրանից հետո ինքը զանգահարել է Գեղամին ու ասել, որ թմրամիջոց բերող կա: Գեղամը եկել է իր տուն և իրենք դրսում սպասել են այդ անծանոթ անձին, սակայն այդ ընթացքում իրենց է մոտեցել Վախթանգը, և իրենք երեքով մտել են իր տուն: Որոշ ժամանակ անց Գեղամն իրեն ասել է, որ արդեն պայմանավորված ժամն է և իրեն տվել է 19.000 ՀՀ դրամ: Ինքն այդ գումարին ավելացրել է 1.000 ՀՀ դրամ և Գեղամին առաջարկել միասին դուրս գալ ու վերցնել թմրամիջոցը: Սակայն Գեղամն ասել է, որ որևէ տարբերություն չկա և ինքը միայնակ կարող է վերցնել թմրամիջոցը: Ինքը միայնակ դուրս է եկել և վերցնելով թմրամիջոցը` վերադարձել տուն: Այնուհետև ինքը պատրաստել է թմրամիջոցը և դրանից օգտագործել իր 1.000 ՀՀ դրամի չափով: Գեղամը նույնպես օգտագործել է այդ թմրամիջոցից, իսկ մնացած մասը վերցրել հետը:
Ամբաստանյալ Արտեմ Գևորգյանը նախնական քննության ընթացքում ցուցմունք է տվել այն մասին, որ 2009 թվականի հոկտեմբերի 21-ին իր` Երևան քաղաքի Լևոնյան փողոցի 22-րդ տան մոտ 20.000 ՀՀ դրամով անծանոթ անձից գնել է ափիոն տեսակի թմրամիջոց և անհիդրիդ: Այնուհետև իր տանն այդ ափիոնը պատրաստել է և 19.000 ՀՀ դրամի դիմաց այն տվել Գեղամ Կարապետյանին: Դրանից հետո Գեղամի հետ միասին այդ թմրամիջոցից մի փոքր օգտագործել է: Գեղամն իրեն թմրամիջոց չի հյուրասիրել, այլ ինքը դրանից օգտագործել է, քանի որ նշված գումարից 1.000 ՀՀ դրամը եղել է իրենը:
Դատական քննության ընթացքում ամբաստանյալ Գեղամ Կարապետյանն առաջադրված մեղադրանքում իրեն մեղավոր ճանաչեց և ցուցմունք տվեց այն մասին, որ ցավեր ունենալու պատճառով իր ընկեր Արտեմ Գևորգյանին խնդրել է թմրամիջոց ձեռք բերելու հարցում օգնել իրեն: Արտեմն իրեն պատասխանել է, որ կփորձի օգնել և հնարավորության դեպքում կտեղեկացնի: Դրանից մոտ 15 րոպե հետո ինքը կրկին զանգահարել է Արտեմին, ով ասել է, որ կարող է թմրամիջոց ձեռք բերել: Ինքն այդ օրը` կեսօրին, գնացել է Արտեմի տուն, նրան տվել 19.000 ՀՀ դրամ, որին Արտեմն ավելացրել է 1.000 ՀՀ դրամ: Դրանից հետո ինքն ու Արտեմը վերջինի տան բակում մոտ 15 րոպե սպասել են այն անձին, ով պետք է թմրամիջոց բերեր, սակայն մինչ այդ անձի գալն իրենց է մոտեցել Վախթանգն ու իրենք երեքով մտել են տուն: Տուն մտնելուց մոտ 10 րոպե հետո Արտեմը դուրս է եկել, հանդիպել ինչ-որ անձի և քիչ քանակությամբ թմրամիջոց բերել: Բերած թմրամիջոցն իր խնդրանքով Արտեմը պատրաստել է, որից հետո ինքն ու Արտեմը դրա մի մասն օգտագործել են, իսկ մնացած մասն ինքը ներարկիչով պահել է իր մոտ: Ինքը թմրամիջոցի լուծույթ պատրաստել չի կարողանում և եթե այդ օրը չլիներ Արտեմը, ապա ինքը չէր կարող այդ անձից թմրամիջոց ձեռք բերել, քանի որ նրան չի ճանաչել: Այնուհետև ինքն ու Վախթանգը տաքսի մեքենայով ուղևորվել են «Երրորդ մաս» կոչվող թաղամաս, սակայն «Սեբաստիա» հյուրանոցի մոտ իրենց կանգնեցրել են: Կանգնեցնողները եղել են քաղաքացիական հագուստով, չեն ներկայացել և չեն ասել, թե ինչի համար են կանգնեցրել և ինչ են փնտրում: Իրեն մեքենայից չեն հանել և մեքենայում խուզարկելով` իր ծոցագրպանից հանել են ներարկիչ: Հայտնաբերած ներարկիչը նրանք իրեն չեն վերադարձրել: Դրանից հետո իրենց տարել են ՀՀ ոստիկանության Քանաքեռ-Զեյթունի բաժին, որտեղ մինչ ընթերակաների գալն իր մոտից արդեն իսկ հայտնաբերած ներարկիչը դրել են սեղանի վրա: Ընթերական ճիշտ չի ասում, որ ներարկիչն իր գրպանից հայտնաբերել են ոստիկանության բաժնում:
Ամբաստանյալ Գեղամ Կարապետյանը նախնական քննության ընթացքում` 2009 թվականի հոկտեմբերի 22-ին, ցուցմունք է տվել այն մասին, որ 2009 թվականի հոկտեմբերի 21-ին` ժամը 11:00-ի սահմաններում, ինքը զանգահարել է իր ընկեր Արտեմ Գևորգյանին, ասել, որ իրեն լավ չի զգում, ափիոն տեսակի թմրամիջոցի կարիք ունի և հարցրել, թե արդյոք նա կարող է թմրամիջոց ձեռք բերել: Ինքն Արտեմին ասել է նաև, որ 19.000 ՀՀ դրամ ունի: Արտեմը պատասխանել է, որ նա նույնպես ափիոն տեսակի թմրամիջոցի կարիք ունի և պարզելուց հետո կզանգահարի իրեն: Մոտ կես ժամ հետո Արտեմը զանգահարել է իրեն և ասել, որ հնարավորություն կա ձեռք բերել թմրամիջոց և գումարն ինքը պետք է տանի: Ինքը երթուղային տաքսիով գնացել է Արտեմի տուն, որտեղ Արտեմը զանգահարել է ինչ-որ անձի, խոսել նրա հետ, որից հետո իրենից պահանջել է գումարը: Ինքն Արտեմին տվել է 19.000 ՀՀ դրամ, որին Արտեմն ավելացրել է ևս 1.000 ՀՀ դրամ և այդ գումարը պահել մոտը: Հետո ինքն ու Արտեմը դուրս են եկել բակ և սպասել թմրամիջոց բերող անձին: Այդ ընթացքում Արտեմի հարևան Վախթանգը մոտեցել է իրենց, և իրենք երեքով մտել են Արտեմի տուն: Դրանից մոտ 20 րոպե հետո` ժամը 13:30-ի սահմաններում, զանգահարել են Արտեմին և նա դուրս է եկել տնից, որպեսզի վերցնի թմրամիջոցը, իսկ ինքն ու Վախթանգը մնացել են տանը: Մոտ 2 րոպե հետո Արտեմը վերադարձել է և բերել ափիոն տեսակի թմրամիջոց ու անհիդրիդ: Արտեմը պատրաստել է 6մլ ափիոնի լուծույթ, որից 1.5մլ ներարկելու եղանակով օգտագործել է նա, իսկ մնացած 4.5մլ ծավալով թմրամիջոցն ինքը լցրել է ներարկիչի մեջ: Այդ ներարկիչում եղած թմրամիջոցից 1.5մլ թմրամիջոցն ինքը ներարկվելու եղանակով օգտագործել է, իսկ մնացած 3մլ թմրամիջոցը դրել իր բաճկոնի ծոցագրպանը: Վախթանգը եղել է այդտեղ, սակայն թմրամիջոց չի օգտագործել: Այնուհետև ինքն ու Վախթանգը նստել են տաքսի մեքենա և ուղևորվել դեպի «Երրորդ մաս» կոչվող թաղամաս: Ճանապարհին` Սեբաստիա և Տիչինա փողոցների խաչմերուկի մոտ, իրենց կանգնեցրել են ոստիկանության աշխատակիցները և բերման ենթարկել ոստիկանության Քանաքեռ-Զեյթունի բաժին, որտեղ իր անձնական խուզարկությամբ հայտնաբերվել է մոտ 3մլ ափիոնի լուծույթ, երկու դատարկ ներարկիչներ և բամբակի կտորներ:
Ամբաստանյալ Գեղամ Կարապետյանը նախնական քննության ընթացքում` 2009 թվականի հոկտեմբերի 24-ին, ցուցմունք է տվել այն մասին, որ 2009 թվականի հոկտեմբերի 21-ին` ժամը 13:00-ի սահմաններում, ափիոն տեսակի թմրամիջոց ձեռք բերելու համար գնացել է Արտեմի տուն և նրան տվել 19.000 ՀՀ դրամ: Արտեմն այդ գումարով իր համար ձեռք է բերել ափիոն տեսակի թմրամիջոց, որից 1.5մլ թմրամիջոցն ինքը հյուրասիրել է Արտեմին, 1.5մլ թմրամիջոցն օգտագործել է անձամբ, իսկ մոտ 3մլ թմրամիջոցը պահել է իր մոտ` հետագայոււմ օգտագործելու համար, սակայն այն հայտնաբերվել է ոստիկանների կողմից:
Ամբաստանյալ Գեղամ Կարապետյանը նախնական քննության ընթացքում` 2009 թվականի դեկտեմբերի 28-ին, ցուցմունք է տվել այն մասին, որ 2009 թվականի հոկտեմբերի 21-ին` ժամը 13:30-ի սահմաններում, ինքն իր ընկեր Արտեմի` Երևան քաղաքի Լևոնյան փողոցի 22-րդ տանը նրանից 19.000 ՀՀ դրամով գնել է որոշ քանակությամբ ափիոն տեսակի թմրամիջոց: Արտեմը պատրաստել է այդ թմրամիջոցը և դրա մի մասը ներարկվելու եղանակով օգտագործել, քանի որ Արտեմն իր տված 19.000 ՀՀ դրամին ավելացրել էր 1.000 ՀՀ դրամ: Դրանից հետո ինքը նույնպես ներարկվելու եղանակով թմրամիջոցի մի մասն օգտագործել է, իսկ մնացածը ներարկիչով պահել իր բաճկոնի ծոցագրպանում, որն էլ հայտնաբերվել է ՀՀ ոստիկանության Քանաքեռ-Զեյթունի բաժնում: Ինքն Արտեմին թմրամիջոց չի հյուրասիրել:
Վկա Ռոման Մարտիրոսյանը դատական քննության ընթացքում ցուցմունք տվեց այն մասին, որ Արտեմը եկել է իր տուն և իրենից անհիդրիդ ուզել: Դրանից մոտ երկու ժամ հետո` ժամը 12:00-ից 16:00-ն ընկած ժամանակահատվածում, եկել են ոստիկանները, և իրեն տարել ոստիկանության Քանաքեռ-Զեյթունի բաժին: Նախնական քննության ընթացքում իր տված ցուցմունքները համապատասխանում են իրականությանը:
Վկա Ռոման Մարտիրոսյանը նախնական քննության ընթացքում ցուցմունք է տվել այն մասին, որ Արտեմն իր հարևանն է: 2009 թվականի հոկտեմբերի 21-ին` ժամը 11:00-ի սահմաններում, Արտեմը եկել է իր տան բակ և իրենից անհիդրիդ ուզել: Դրանից հետո ինքն Արտեմի տան բակում տեսել է Արտեմին և Գեղամին:
Վկա Սարգիս Թադևոսյանը դատական քննության ընթացքում ցուցմունք տվեց այն մասին, որ աշխատում է «Սարաս» տաքսի ծառայությունում: 2009 թվականի հոկտեմբերին երթակարգավորողից ստացել է հասցեի ուղղությունը և ուղևորվել դեպի Լևոնյան փողոց: Լևոնյան փողոցում կանգնած են եղել Գեղամը և մեկ այլ անձ: Նրանք նստել են մեքենան և պատվիրել գնալ «Երրորդ մաս» կոչվող թաղամաս: Ժամը 15:00-ի սահմաններում Սեբաստիա փողոցում` «Բանկի կռուգ» կոչվող վայր չհասած, իրենց կանգնեցրել են երկու մեքենա: Այդ մեքենաներից դուրս են եկել մոտ 5` հավանաբար ոստիկանության աշխատակիցներ և իրենց դուրս հանել մեքենայից: Նրանք այդ ժամանակ իրենց չեն ասել, թե ինչու են կանգնեցրել, այլ ասել են, որ բերման են ենթարկում: Կանգնեցնելուց հետո իրենց բոլորին խուզարկել են, սակայն չեն ասել, թե ինչ են փնտրում: Այդ ժամանակ որևէ արձանագրություն չի կազմվել: Սեբաստիա փողոցում` Տիչինայի փողոց չհասած, մեքենայի կողքին, իրենց կանգնեցնողները Գեղամի գրպանից հանել են 8-10սմ երկարությամբ սպիտակ ներարկիչ, որի 2-3սմ լցված է եղել կարմրավուն զանգվածով: Այդ ժամանակ ինքը չի իմացել, թե ներարկիչում ինչ է եղել: Գեղամի գրպանից ներարկիչը հանելու ժամանակ ոստիկանները ոչինչ չեն ասել: Իրենցից և ոստիկաններից բացի այլ անձինք, ինչպես նաև ընթերականեր չեն եղել: Դրանից հետո իրեն և ուղևորներին նստեցրել են մեքենան և բերման ենթարկել ՀՀ ոստիկանության Քանաքեռ-Զեյթունի բաժին: Բերման ենթարկելու ժամանակ Գեղամի մոտից հայտնաբերված ներարկիչը եղել է ոստիկանների ձեռքում: Առավելագույնը մեկ ժամ անց իրենք եղել են ոստիկանությունում: Ինքը միայն ոստիկանությունում է իմացել, որ ներարկիչի մեջ թմրամիջոց է եղել: Ինքը չի լսել, որ Գեղամը հայտարարի, թե դա ինչ է և որտեղից է հայտնվել նրա մոտ: Նախնական քննության ընթացքում ինքը չի հայտնել, որ ներարկիչը Գեղամի գրպանից հանել են Սեբաստիա փողոցում, քանի որ իրեն նման հարց չի տրվել:
Նախնական քննության ընթացքում վկա Սարգիս Թադևոսյանը ցուցմունք է տվել այն մասին, որ աշխատում է «Սարաս» տաքսի ծառայությունում` որպես վարորդ, և իրեն ամրակցված է «Սամանդ» մակնիշի 9557 պետհամարանիշի մեքենան: 2009 թվականի հոկտեմբերի 21-ին` ժամը 15:00-ի սահմաններում, ինքը գտնվել է Շինարարների փողոցում, երբ երթակարգավորողը ռադիոկապով հայտնել է, որ Աջափնյակ համայնքում գտնվող Լևոնյան 24 հասցեից պատվեր կա: Ինքն ընդունել է պատվերը և շարժվել դեպի Լևոնյան փողոց: Ճանապարհին ինքն ընկել է խցանման մեջ, որի պատճառով ուշացած է հասել Լևոնյան 24 հասցե: Նշված հասցեում իրեն են մոտեցել երկու անծանոթ անձինք և ասել, որ նրանք են պատվիրել ավտոմեքենան: Նրանցից նիհարը և փոքր կազմվածք ունեցողը նստել է առջևի նստատեղին, իսկ ավելի լիքը մարմնակազմություն ունեցողը` ետևի նստատեղին: Իր կողքին նստած տղամարդը պահանջել է գնալ դեպի «Երրորդ մաս» կոչվող թաղամաս: Իրենք Սեբաստիա փողոցով շարժվել են դեպի «Երրորդ մաս» կոչվող թաղամաս, որի ընթացքում ուղևորները միմյանց հետ չեն զրուցել, և ինքը նրանց վարքագծում կասկածելի ոչինչ չի նկատել: Սեբաստիա և Տիչինա փողոցների խաչմերուկի մոտ իրենց կանգնեցրել են ոստիկանության աշխատակիցները և բերման ենթարկել ՀՀ ոստիկանության Քանաքեռ-Զեյթունի բաժին: Ոստիկանությունում ինքն իմացել է, որ նիհար մարմնակազմությամբ տղամարդը Գեղամ Կարապետյանն է և նրա մոտից հայտնաբերել են թմրամիջոց, իսկ ավելի լիքը մարմնակազմությամբ տղամարդը Վախթանգ Միքայելյանն է:
Վկա Մանվել Սիմոնյանը դատական քննության ընթացքում ցուցմունք տվեց այն մասին, որ երեխայի անձնագիրը հանելու համար գնացել է անձնագրային բաժին: Այդ ժամանակ ոստիկանները իրեն հրավիրել են ոստիկանության բաժին, որտեղ ներկա է եղել մեկ ուրիշ անձ, ում ինքը նախկինում չի ճանաչել: Իրենց հրավիրել են սենյակ, որտեղ իրենց ներկայությամբ Գեղամի բաճկոնի գրպանից հանել են ներարկիչ:
Վկա Մանվել Սիմոնյանը նախնական քննության ընթացքում ցուցմունք է տվել այն մասին, որ 2009 թվականի հոկտեմբերի 21-ին` ժամը 18:30-ից 19:00-ի սահմաններում, ինքն անցնելիս է եղել ՀՀ ոստիկանության Քանաքեռ-Զեյթունի բաժնի մոտով, երբ ոստիկանության աշխատակիցները, որպես ընթերակա, իրեն հրավիրել են բաժին: Ոստիկաններից մեկն իրեն ասել է, որ թմրամիջոց ձեռք բերելու և պահելու կասկածանքով բերման է ենթարկվել մի քաղաքացի: Ինքը նրան չի ճանաչել և ոստիկանությունում իմացել է, որ նրա անունը Գեղամ Կարապետյան է: Ինքը, որպես ընթերակա, հրավիրվել է ներկա գտնվելու Գեղամ Կարապետյանի անձնական խուզարկությանը: Իր ներկայությամբ Գեղամ Կարապետյանի սև կաշվե բաճկոնի ծոցագրպանից հայտնաբերվել է հինգ միլիգրամանոց ներարկիչ, որի մեջ եղել է մոտ 3մգ կարմիր հեղուկ: Բաճկոնի աջ գրպանից հայտնաբերվել է «Ախթամար» ծխախոտի տուփ, որի մեջ եղել է ռուսերեն «ապտեկա» գրառումով պոլիէթիլենային տոպրակ, որում եղել են երկու ներարկիչներ և բամբակի կտորներ: Գեղամի մոտից հայտնաբերվել է հեռախոս և նրա դրամապանակը, որի մեջ եղել է նրա անձը հաստատող փաստաթղթեր: Գեղամ Կարապետյանը հայտարարել է, որ ներարկիչի մեջ եղած հեղուկն ափիոն տեսակի թմրամիջոցի և անհիդրիդի լուծույթ է և ասել, որ դա պատկանում է իրեն, որը պահել է անձնական օգտագործման համար: Նշված հեղուկով ներարկիչը, դատարկ ներարկիչները և բամբակի կտորներն առգրավվել են ոստիկանության աշխատակիցների կողմից, փաթեթավորվել և կնքվել են իր ներկայությամբ, և կնիքի վրա ինքը ստորագրել է: Այդ մասին կազմվել է արձանագրություն, որն ընթերցվել է բարձրաձայն և ինքը ստորագրել է արձանագրության տակ: Բացի իրենից, որպես ընթերակա, ներկա է եղել նաև մեկ այլ քաղաքացի, ում ինքը չի ճանաչել:
Վկա Վախթանգ Միքայելյանը նախնական քննության ընթացքում ցուցմունք է տվել այն մասին, որ 2009 թվականի հոկտեմբերի 21-ին` առավոտյան, ինքը գնացել է իր եղբոր` Լևոնյան փողոցի 36-րդ տուն: Այդտեղից տուն վերադառնալու ճանապարհին` Արտեմի տան բակում, հանդիպել է նրան ու Գեղամին և իրենք երեքով մտել են Արտեմի տուն: Ժամը 13:30-ի սահմաններում Արտեմը դուրս է եկել տնից և մոտ 2 րոպե հետո վերադարձել: Այդ ժամանակ Արտեմի մոտ եղել է կոճակի նման մուգ զանգված, որից նա պատրաստել է լուծույթ: Այնուհետև Արտեմն այդ լուծույթից լցրել է ներարկիչի մեջ և ներարկվել: Դրանից հետո Գեղամը նույն հեղուկից լցրել է ներարկիչի մեջ և այն դրել բաճկոնի գրպանը: Այնուհետև ինքն ու Գեղամը տաքսի մեքենայով ուղևորվել են դեպի «Երրորդ մաս» կոչվող թաղամաս: Ճանապարհին` Սեբաստիա և Տիչինա փողոցների խաչմերուկի մոտ, իրենց կանգնեցրել են ոստիկանության աշխատակիցները և բերման ենթարկել ոստիկանության Քանաքեռ-Զեյթունի բաժին: Ոստիկանությունում ինքն իմացել է, որ Գեղամի մոտից հայտնաբերվել է նրա բաճկոնի ծոցագրպանում դրված ներարկիչը:
Անձնական խուզարկություն կատարելու մասին 2009 թվականի հոկտեմբերի 21-ի արձանագրության համաձայն` ՀՀ ոստիկանության Քանաքեռ-Զեյթունի բաժնի թիվ 46 աշխատասենյակում, ընթերականեր Վլադիմիր Ռաֆիկի Համբարձումյանի և Մանվել Ռոբերտի Սիմոնյանի ներկայությամբ կատարված Գեղամ Գրիգորի Կարապետյանի անձնական խուզարկությամբ նրա սև կաշվե բաճկոնի ծոցագրպանից հայտնաբերվել է 5մգ տարողությամբ մեկանգամյա օգտագործման ներարկիչ, որի մեջ եղել է մոտ 3մգ կարմիր հեղուկ, սև բաճկոնի աջ գրպանից հայտնաբերվել է «Ախթամար» ծխախոտի դատարկ տուփ, որի մեջ եղել է կարմիր խաչի պատկերով և «AПTEKA» (ապտեկա) նշումով պոլիէթիլենային տոպրակ, որի մեջ եղել են 2մգ ծավալով մեկանգամյա օգտագործման մեկ ներարկիչ և 2մգ ծավալով մեկանգամյա օգտագործման մեկ ներարկիչ, որի վրա առկա են եղել շագանակագույն հետքեր, և բամբակյա խծուծներ, որոնց վրա առկա են եղել մուգ շագանակագույն հետքեր: Արձանագրությունը կարդացվել է բարձրաձայն, ընթարակաների կողմից դիտողություններ և առաջարկություններ չեն եղել:
Փորձագետի 2009 թվականի հոկտեմբերի 22-ի թիվ 522Ք եզրակացության համաձայն` փորձաքննությանը ներկայացված մեկանգամյա օգտագործման համար նախատեսված ներարկիչում առկա 3մլ ծավալով հեղուկը հանդիսանում է ացետիլացված ափիոն տեսակի թմրամիջոցի լուծույթ, որում ացետիլացված ափիոնի չոր քաշը կազմում է 0.288 գրամ: Փորձաքննությանը ներկայացված արնանման նյութի հետքերով, մեկանգամյա օգտագործման համար նախատեսված ներարկիչում հայտնաբերվել են ափիոն շարքի ալկալոիդների ու թմրալկալոիդների հետքեր: Փորձաքննությանը ներկայացված դատարկ ներարկիչում և բամբակյա խծուծների վրա առավել տարածված որևէ թմրանյութի հետքեր չեն հայտնաբերվել:
Դատական քննության ընթացքում փորձագետ Արմինե Աբաջյանը 2009 թվականի հոկտեմբերի 22-ի թիվ 522Ք եզրակացության կապակցությամբ պարզաբանում տվեց այն մասին, որ թմրամիջոցի իրական քաշը եզրակացության հետևություններ մասում նշված 0.288 գրամն է, իսկ հետազոտություն մասում նշված 0.032 գրամը համակարգչային վրիպակ է և անուշադրության արդյունք: Դրա փոխարեն պետք նշվեր 0.048 գրամ: Ինքը հստակ հիշում է, որ փորձաքննության ներկայացված թմրամիջոցի իրական քաշը 0.288 գրամ է, քանի որ որոշ չափով հիշում է այդ օրվա իրադարձությունները և բացի այդ ինքը համապատասխան բանավոր զեկույց է ներկայացրել իր ղեկավարներին: Փորձաքննության համար իրեն ներկայացվել է 3մլ հեղուկ, որից փորձաքննության ընթացքում ինքն օգտագործել է 1մլ:
Փորձագետի 2010 թվականի հունիսի 10-ի թիվ 18341005 եզրակացության համաձայն` փորձաքննությանը ներկայացված 0.7մլ ծավալով հեղուկից ստացված 0.066 գրամ հաստատուն քաշով չոր մնացորդը հանդիսանում է տնայնագործական եղանակով պատրաստված «ացետիլացված ափիոն» տեսակի թմրամիջոց: Վերահաշվարկման դեպքում 1.9մլ ծավալով հեղուկից կստացվի 0.179 գրամ հաստատուն քաշով «ացետիլացված ափիոն» տեսակի թմրամիջոց: Փորձաքննության ներկայացված ներարկիչում առկա հեղուկի 0.5մլ ծավալից կստացվի 0.047 գրամ հաստատուն քաշով «ացետիլացված ափիոն» տեսակի թմրամիջոց:
Փորձագետի 2009 թվականի նոյեմբերի 3-ի թիվ 1009 եզրակացության համաձայն` Գեղամ Գրիգորի Կարապետյանի 2009 թվականի հոկտեմբերի 21-ի մեզի փորձանմուշում հայտնաբերվել են ափիոնի և կանաբիսի խմբերի թմրամիջոցների թմրալկալոիդներ:
Փորձագետի 2009 թվականի դեկտեմբերի 12-ի թիվ 1152 եզրակացության համաձայն` Արտեմ Գրիգորի Գևորգյանի 2009 թվականի դեկտեմբերի 12-ի մեզի փորձանմուշում կանաբիսի, ափիոնի խմբերի թմրամիջոցների և հոգեներգործուն նյութերի հետքեր չեն հայտնաբերվել:
Իրեղեն ապացույց ճանաչելու և քրեական գործին կցելու մասին 2009 թվականի դեկտեմբերի 28-ի որոշման համաձայն` մեկանգամյա օգտագործման համար նախատեսված ներարկիչում առկա 3մլ ծավալով ացետիլացված ափիոն տեսակի թմրամիջոցի լուծույթը, որում ացետիլացված ափիոնի չոր քաշը կազմում է 0.288 գրամ, մեկանգամյա օգտագործման համար նախատեսված ափիոնի շարքի ալկալոիդների և թմրալկալոիդների հետքերով ներարկիչը, դատարկ ներարկիչը, բամբակյա խծուծները, «Ախթամար» ծխախոտի դատարկ տուփը և կարմիր գույնի խաչով և ռուսերեն տառերով «AПTEKA» (ապտեկա) գրառումով պոլիէթիլենային փաթեթը ճանաչվել են իրեղեն ապացույցներ և կցվել քրեական գործին:
Գույքի վրա կալանք դնելու մասին 2009 թվականի դեկտեմբերի 18-ի որոշման համաձայն` գույքի հնարավոր բռնագրավումն և դատական ծախսերի բռնագանձումն ապահովելու համար Արտեմ Գրիգորի Գևորգյանի գույքի վրա դրվել է կալանք:
Անձին ոստիկանության բաժին բերման ենթարկելու մասին 2009 թվականի հոկտեմբերի 21-ի արձանագրության համաձայն` Գեղամ Գրիգորի Կարապետյանը թմրամիջոց ձեռք բերելու և պահելու կասկածանքով 2009 թվականի հոկտեմբերի 21-ին բերման է ենթարկվել ՀՀ ոստիկանության Քանաքեռ-Զեյթունի բաժին:
2009 թվականի հոկտեմբերի 22-ի ձերբակալման արձանագրության համաձայն` Գեղամ Գրիգորի Կարապետյանը 2009 թվականի հոկտեմբերի 22-ին ձերբակալվել է:
Կալանավորումը որպես խափանման միջոց ընտրելու մասին միջնորդությունը քննելու վերաբերյալ 2009 թվականի հոկտեմբերի 24-ի որոշման համաձայն` մեղադրյալ Գեղամ Գրիգորի Կարապետյանի նկատմամբ որպես խափանման միջոց ընտրվել է կալանավորումը, կալանավորման սկիզբը հաշվվել է 2009 թվականի հոկտեմբերի 22-ից:
ՀՀ ոստիկանության ինֆորմացիոն կենտրոնի պահանջագրի համաձայն` Գեղամ Գրիգորի Կարապետյանը նախկինում դատապարտված չի եղել:
Դավթաշենի 2-րդ թաղամասի «Սոս» համատիրության կառավարչի կողմից 2010 թվականի փետրվարի 2-ին տրված թիվ 32 տեղեկանքի համաձայն` Ֆենյա Վարդանյանը գտնվում է որդու` Գեղամ Կարապետյանի խնամքին:
Գեղամ Կարապետյանի հիվանդության պատմագրի պատճենի համաձայն` նրա մոտ ախտորոշվել է ձախ թոքի օջախային տուբերկուլյոզ` ինֆիլտրացիայի փուլում, ՄԻԱՎ վարակ` 4-րդ կլինիկական փուլում:
ՀՀ առողջապահության նախարարության ՁԻԱՀ-ի կանխարգելման հանրապետական կենտրոնի տնօրենի կողմից 2010 թվականի հուլիսի 13-ին տրված թիվ 192 տեղեկանքի համաձայն` Գեղամ Կարապետյանի մոտ 2009 թվականի դեկտեմբերի 22-ին ախտորոշվել է ՄԻԱՎ վարակ: Նշված օրվանից նա գտնվում է դիսպանսերային հսկողության տակ ՁԻԱՀ-ի կանխարգելման հանրապետական կենտրոնում: 2010 թվականի հուլիսի 13-ի դրությամբ Գեղամ Կարապետյանը ախտորոշվել է ՄԻԱՎ վարակ` 4-րդ կլինիկական փուլում, խիստ արտահայտված իմունային անբավարարություն, ձախ թոքի վերին բլթի օջախային տուբերկուլյոզ` ինֆիլտրացիայի փուլում, ԹՄԲ բացասական, քրոնիկ հեպատիտ C:
Հետախուզում հայտարարելու մասին 2009 թվականի դեկտեմբերի 7-ի որոշման համաձայն` մեղադրյալ Արտեմ Գրիգորի Գևորգյանի նկատմամբ հայտարարվել է հետախուզում:
Կալանավորումը որպես խափանման միջոց ընտրելու մասին միջնորդությունը քննելու վերաբերյալ 2009 թվականի դեկտեմբերի 7-ի որոշման համաձայն` մեղադրյալ Արտեմ Գրիգորի Գևորգյանի նկատմամբ որպես խափանման միջոց ընտրվել է կալանավորումը:
Անձին ոստիկանության բաժին բերման ենթարկելու մասին 2009 թվականի դեկտեմբերի 11-ի արձանագրության համաձայն` Արտեմ Գրիգորի Գևորգյանը 2009 թվականի դեկտեմբերի 11-ին բերման է ենթարկվել ՀՀ ոստիկանության Քանաքեռ-Զեյթունի բաժին:
ՀՀ ոստիկանության ինֆորմացիոն կենտրոնի պահանջագրի համաձայն` Մաշտոցի շրջանի ժողովրդական դատարանի 1997 թվականի հոկտեմբերի 20-ի դատավճռով Արտեմ Գրիգորի Գևորգյանը Քրեական օրենսգրքի 229-րդ հոդվածի 3-րդ մասով դատապարտվել է ազատազրկման` 2 տարի ժամկետով: 1998 թվականի ապրիլի 10-ին պայմանական վաղաժամկետ ազատվել է պատժի մնացած մասը` 1 տարի 3 ամիս 7 օր ժամկետով ազատազրկումը կրելուց:
Երևան քաղաքի Աջափնյակի թիվ 1 թաղային կոմիտեի նախագահի կողմից 2010 թվականի փետրվարի 16-ին տրված տեղեկանքի համաձայն` 1996 թվականին ծնված Գրիգոր Գևորգյանի հայրն Արտեմ Գևորգյանն է:
Երևան քաղաքի Աջափնյակի թիվ 1 թաղային կոմիտեի նախագահի կողմից 2010 թվականի ապրիլի 27-ին տրված բնութագրի համաձայն` Արտեմ Գևորգյանը բնութագրվում է դրականորեն:
ՀՀ ԱՆ «Նուբարաշեն» քրեակատարողական հիմնարկի պետի 2010 թվականի մարտի 23-ի թիվ Ե-40/18-8-1466 համաձայն` Արտեմ Գևորգյանը 2010 թվականի հունվարի 19-ից ստանում է հակատուբերկուլյոզային ստացիոնար բուժում հիմնարկի թոքախտաբանական բաժանմունքում «Աջ թոքի վերին բլթի օջախային տուբեկուլյոզ, ԹԿԲ բացասական» ախտորոշմամբ:
Դատարանը, քննարկելով վկա Վախթանգ Միքայելյանի նախնական քննության տված ցուցմունքը, Գեղամ Կարապետյանի անձնական խուզարկության արձանագրությունը, իրեղեն ապացույցները, փորձագետի 2009 թվականի հոկտեմբերի 22-ի թիվ 522Ք և 2010 թվականի հունիսի 10-ի թիվ 18341005 եզրակացությունները անթույլատրելի ապացույցներ ճանաչելու վերաբերյալ պաշտպան Ռ.Սաֆարյանի միջնորդությունը, գտնում է, որ նշված ապացույցները անթույլատրելի ճանաչելու հիմքերը բացակայում են, քանի որ դրանք ձեռք բերելիս պահպանվել են ՀՀ քրեական դատավարության օրենսգրքի բոլոր պահանջները:
Վերը նշված ապացույցները վերլուծելու և համադրելու արդյունքում Դատարանը հաստատված է համարում գործի լուծման համար նշանակություն ունեցող հետևյալ փաստական հանգամանքները.
-Արտեմ Գևորգյանը և Գեղամ Կարապետյանն ընկերներ են,
-Գեղամ Կարապետյանն անձնական օգտագործման համար թմրամիջոց ձեռք բերելու նպատակով դիմել է Արտեմ Գևորգյանին,
-Արտեմ Գևորգյանը Գեղամ Կարապետյանին ասել է, որ նրա համար կարող է ձեռք բերել թմրամիջոց,
-Արտեմ Գևորգյանը և Գեղամ Կարապետյանը 2009 թվականի հոկտեմբերի 21-ին` կեսօրին, հանդիպել են Արտեմ Գևորգյանի` Երևան քաղաքի Լևոնյան փողոցի 22-րդ տանը,
-Երևան քաղաքի Լևոնյան փողոցի 22-րդ տանը Գեղամ Կարապետյանն Արտեմ Գևորգյանին տվել է 19.000 ՀՀ դրամ,
-Արտեմ Գևորգյանը Գեղամ Կարապետյանի տված 19.000 ՀՀ դրամին ավելացրել է 1.000 ՀՀ դրամ,
-Երևան քաղաքի Լևոնյան փողոցի 22-րդ տան մոտ Արտեմ Գևորգյանը 20.000 ՀՀ դրամով անծանոթ անձից գնել է ափիոն տեսակի թմրամիջոց,
-ձեռք բերած թմրամիջոցից Արտեմ Գևորգյանը պատրաստել է լուծույթ,
-պատրաստված թմրամիջոցի լուծույթի մի մասն Արտեմ Գևորգյանն օգտագործել է, իսկ մնացած մասը տվել Գեղամ Կարապետյանին,
-Գեղամ Կարապետյանն Արտեմ Գևորգյանի տված լուծույթի մի մասն օգտագործել է, իսկ մնացած մասը ներարկիչով պահել իր մոտ, որը եղել է 3մլ ծավալով ացետիլացված ափիոն տեսակի թմրամիջոցի լուծույթ,
-2009 թվականի հոկտեմբերի 21-ին ՀՀ ոստիկանության Քանաքեռ-Զեյթունի բաժնում Գեղամ Կարապետյանի անձնական խուզարկությամբ հայտնաբերվել է նշված 3մլ ծավալով ացետիլացված ափիոն տեսակի թմրամիջոցի լուծույթը,
-3մլ ծավալով ացետիլացված ափիոն տեսակի թմրամիջոցի լուծույթում ացետիլացված ափիոնի չոր քաշը կազմել է 0.282 գրամ (0.047 x 6),
-Գեղամ Կարապետյանը վատառողջ է և նախկինում դատապարտված չի եղել,
-Արտեմ Գևորգյանը վատառողջ է, բնութագրվում է դրականորեն և խնամքին ունի մինչև 14 տարեկան երեխա,
-Գեղամ Կարապետյանն արգելանքի տակ է 2009 թվականի հոկտեմբերի 22-ից, իսկ Արտեմ Գևորգյանը` 2009 թվականի դեկտեմբերի 11-ից:
3. Դատարանի իրավական վերլուծությունները.
Վերոգրյալ փաստերի հիման վրա Դատարանը գալիս է այն եզրահանգման, որ Արտեմ Գրիգորի Գևորգյանը 2009 թվականի հոկտեմբերի 21-ին` կեսօրին, Երևան քաղաքի Լևոնյան փողոցի 22-րդ տան մոտ անհայտ անձից ձեռք է բերել ափիոն տեսակի թմրամիջոց: Նույն օրը Երևան քաղաքի Լևոնյան փողոցի 22-րդ տանն Արտեմ Գևորգյանը ձեռք բերած թմրամիջոցի մի մասն օգտագործել է, իսկ մնացած մասը տվել է Գեղամ Կարապետյանին, ով դրա մի մասը նույնպես օգտագործել է, իսկ մնացած մասը` 0.282 գրամ չոր քաշով ացետիլացված ափիոն տեսակի թմրամիջոցը, պահել է իր մոտ:
ՀՀ քրեական օրենսգրքի 266-րդ հոդվածի կապացությամբ ՀՀ վճռաբեկ դատարանն իր` 2007 թվականի օգոստոսի 30-ի թիվ ՎԲ-135/07 որոշմամբ արտահայտել է այն իրավական դիրքորոշումը, որ «իրացման նպատակի տակ պետք է հասկանալ թմրամիջոցի կամ հոգեներգործուն նյութերի տարածման ցանկացած եղանակ, այդ թվում նաև նախնական պատվերով: Իրացման նպատակի մասին կարող է վկայել ինչպես ձեռք բերողի (ստացողի, սպառողի) հետ համապատասխան պայմանավորվածության առկայությունը, այնպես էլ գործի մյուս հանգամանքները. թմրամիջոցներ ձեռք բերելը և պահելը դրանք չգործածող անձի կողմից, զգալի քանակությունը, իրացման համար հարմար փաթեթավորումը և այլն ...
Ապօրինի իրացումը թմրամիջոցի կամ հոգեներգործուն նյութի ցանկացած եղանակով օտարումն է: Ապօրինի իրացման տակ պետք է հասկանալ թմրամիջոցի կամ հոգեներգործուն նյութի` հատուցմամբ կամ անհատույց այլ անձանց հանձնելու, փոխանցելու ցանկացած եղանակ` վաճառք, նվիրատվություն, փոխանակում, փոխատվություն, պարտքի մարում, ուրիշի ներարկում և այլն: Իրացման առանձնահատկությունն այն է, որ նշված գործողությունների հետևանքով թմրամիջոցին կամ հոգեներգործուն նյութին տիրանում է մեկ այլ անձ, որն այս դեպքում հանդես է գալիս որպես ձեռք բերող, ստացող կամ գնորդ, սպառող: Ապօրինի իրացումը համարվում է ավարտված, երբ մեկ այլ անձ տիրանում է թմրամիջոցին կամ հոգեներգործուն նյութին: Մեկ ուրիշ անձին փոխանցելու եղանակը կարող է տարբեր լինել, սակայն դա արարքի որակման համար նշանակություն չունի: Ապօրինի իրացման հանցակազմի համար նշանակություն չունի, թե թմրամիջոցին կամ հոգեներգործուն նյութին տիրացած անձն ինչպես է այն տնօրինելու, դրա հետ վարվելու»: Նշված գործով ՀՀ վճռաբեկ դատարանը եկել է այն եզրահանգման, որ Մարտիկ Հակոբի Բոլյանը կատարել է ՀՀ քրեական օրենսգրքի 266-րդ հոդվածի 3-րդ մասով նախատեսված արարք:
Դատարանը, նկատի ունենալով, որ սույն քրեական գործի և վերը նշված քրեական գործի փաստական հանգամանքները նույնանման են, գտնում է, որ ՀՀ վճռաբեկ դատարանի 2007 թվականի օգոստոսի 30-ի թիվ ՎԲ-135/07 որոշման հիմնավորումները կիրառելի են սույն գործի լուծման համար:
Այսպիսով, Դատարանը գտնում է, որ Արտեմ Գրիգորի Գևորգյանն իրացնելու նպատակով ապօրինի ձեռք է բերել և իրացրել խոշոր չափերով թմրամիջոց, ինչը համապատասխանում է ՀՀ քրեական օրենսգրքի 266-րդ հոդվածի 2-րդ մասի 2-րդ կետի հատկանիշներին:
Ապացուցված է Արտեմ Գրիգորի Գևորգյանի մեղավորությունը ՀՀ քրեական օրենսգրքի 266-րդ հոդվածի 2-րդ մասի 2-րդ կետով նախատեսված հանցանքը կատարելու մեջ:
Ինչ վերաբերում է սույն քրեական գործով Արտեմ Գևորգյանի մասը կարճելու և նրա նկատմամբ քրեական հետապնդումը դադարեցնելու մասին պաշտպան Ռ.Սաֆարյանի միջնորդությանը (այն պատճառաբանությամբ, որ Արտեմ Գևորգյան արարքում բացակայում են ՀՀ քրեական օրենսգրքի 266-րդ հոդվածի 2-րդ մասի 2-րդ կետով նախատեսված հանցակազմի հատկանշները, քանի որ նա թմրամիջոցը ձեռք է բերել Գեղամ Կարապետյանի առաջարկով, նրա տված 19.000 ՀՀ դրամով` դրան ավելացնելով սեփական 1.000 ՀՀ դրամը, որի արդյունքում նա ոչ թե Գեղամ Կարապետյանի ապօրինի իրացրել է թմրամիջոց, այլ նրանք համատեղ ջանքերով իրենց անձնական օգտագործման համար ձեռք են բերել թմրամիջոց), ապա այն ենթակա է մերժման, քանի որ վերոգրյալ հիմնավորմամբ ապացուցվել է Արտեմ Գևորգյանի մեղավորությունը ՀՀ քրեական օրենսգրքի 266-րդ հոդվածի 2-րդ մասի 2-րդ կետով նախատեսված հանցանքը կատարելու մեջ:
Արտեմ Գևորգյանի անձը դրականորեն բնութագրող հանգամանք է մասնակի խոստովանական ցուցմունքներ տալը:
Արտեմ Գևորգյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած երեխայի առկայությունը:
Արտեմ Գևորգյանի պատասխանատվությունն ու պատիժը մեղմացնող հանգամանք է նաև դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Դատարանը գտնում է, որ Արտեմ Գևորգյանի պատասխանատվությունն ու պատիժը մեղմացնող հանգամանք է նրա վատառողջ լինելը:
Դատարանը միաժամանակ արձանագրում է, որ սույն գործում Արտեմ Գևորգյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Արտեմ Գևորգյանը ենթակա է քրեական պատասխանատվության և պատժի:
Դատարանը, հաշվի առնելով Արտեմ Գևորգյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալը, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ նրա կատարած արարքի համար ՀՀ քրեական օրենսգրքի 266-րդ հոդվածի 2-րդ մասի սանկցիայով` որպես հիմնական պատիժ, նախատեսված է միայն ազատազրկում, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ հիմնական պատիժ պետք է նշանակել ազատազրկման ձևով, որը նա պետք է կրի: Ընդ որում` կատարված արարքի համար չպետք է նշանակել ՀՀ քրեական օրենսգրքի 266-րդ հոդվածի 2-րդ մասի սանկցիայով նախատեսված լրացուցիչ պատիժը` գույքի բռնագրավումը:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ oրը հաշվելով մեկ oրվա դիմաց: Արտեմ Գևորգյանի պատժի կրման սկիզբը պետք է հաշվել 2009 թվականի դեկտեմբերի 11-ից, քանի որ գտնվելով հետախուզման մեջ` 2009 թվականի դեկտեմբերի 11-ին նա հայտնաբերվել է և արգելանքի վերցվել:
Դատարանը գտնում է, որ Արտեմ Գևորգյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Վերոգրյալ փաստերի հիման վրա Դատարանը գալիս է այն եզրահանգման, որ, Գեղամ Գրիգորի Կարապետյանը 2009 թվականի հոկտեմբերի 21-ին` կեսօրին, Երևան քաղաքի Լևոնյան փողոցի 22-րդ տանն Արտեմ Գևորգյանից ձեռք է բերել ափիոն տեսակի թմրամիջոց, որի մի մասը նույն տանն օգտագործել է, իսկ մնացած` խոշոր չափի 0.282 գրամ չոր քաշով ացետիլացված ափիոն տեսակի թմրամիջոցը պահել է իր մոտ, որը նույն օրը հայտնաբերվել է ՀՀ ոստիկանության Քանաքեռ-Զեյթունի բաժնում նրա անձնական խուզարկությամբ: Այսինքն, Գեղամ Գրիգորի Կարապետյանը, առանց իրացնելու նպատակի, ապօրինի ձեռք է բերել և պահել խոշոր չափերով թմրամիջոց, ինչը համապատասխանում է ՀՀ քրեական օրենսգրքի 268-րդ հոդվածի 2-րդ մասի 2-րդ կետի հատկանիշներին:
Ապացուցված է Գեղամ Գրիգորի Կարապետյանի մեղավորությունը ՀՀ քրեական օրենսգրքի 268-րդ հոդվածի 2-րդ մասի 2-րդ կետով նախատեսված հանցանքը կատարելու մեջ:
Գեղամ Կարապետյանի անձը դրականորեն բնութագրող հանգամանքներ են խոստովանական ցուցմունքներ տալը և կատարածի համար զղջալը:
Գեղամ Կարապետյանի պատասխանատվությունն ու պատիժը մեղմացնող հանգամանք է նախկինում արատավորված` դատապարտված չլինելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Դատարանը գտնում է, որ Գեղամ Կարապետյանի պատասխանատվությունն ու պատիժը մեղմացնող հանգամանք է նաև նրա վատառողջ լինելը:
Դատարանը միաժամանակ արձանագրում է, որ սույն գործում Գեղամ Կարապետյանի պատասխանատվությունն ու պատիժը ծանրացնող հանգամանքներ չկան:
Դատարանը գտնում է, որ կատարած արարքի համար ամբաստանյալ Գեղամ Կարապետյանը ենթակա է քրեական պատասխանատվության և պատժի:
Դատարանը, հաշվի առնելով Գեղամ Կարապետյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ նրա կատարած արարքի համար ՀՀ քրեական օրենսգրքի 268-րդ հոդվածի 2-րդ մասի սանկցիայով նախատեսված է պատիժ միայն ազատազրկման ձևով, գտնում է, որ նրա նկատմամբ պատիժ պետք է նշանակել ազատազրկում` 10 (տաս) ամիս ժամկետով, որը նա պետք է կրի:
Ամբաստանյալ Գեղամ Կարապետյանի պատժի կրման սկիզբը պետք է հաշվել 2009 թվականի հոկտեմբերի 22-ից, քանի որ նա ձերբակալվել է այդ օրը, իսկ 2009 թվականի հոկտեմբերի 24-ին նրա նկատմամբ որպես խափանման միջոց ընտրվել է կալանավորումը:
Դատարանը, նկատի ունենալով, որ Գեղամ Կարապետյանի նկատմամբ նշանակված պատժի ժամկետը լրանում է 2010 թվականի օգոստոսի 22-ին, գտնում է, որ Գեղամ Կարապետյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև 2010 թվականի օգոստոսի 22-ը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ 2009 թվականի դեկտեմբերի 28-ի որոշմամբ իրեղեն ապացույց ճանաչված ափիոն տեսակի թմրամիջոցի լուծույթով լցված ներարկիչը, ափիոնի շարքի ալկալոիդների և թմրալկալոիդների հետքերով ներարկիչը դատարկ ներարկիչը, բամբակյա խծուծները, «Ախթամար» ծխախոտի դատարկ տուփը և կարմիր գույնի խաչով և «AПTEKA» (ապտեկա) գրառումով պոլիէթիլենային փաթեթը, պետք է ոչնչացնել:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-6-րդ կետերով նախատեսված դատական ծախսերն ամբաստանյալներ Արտեմ Գևորգյանից և Գեղամ Կարապետյանից ենթակա չեն բռնագանձման, քանի որ 1-ին և 4-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ, 5-րդ և 6-րդ կետերով նախատեսված ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել:
ՀՀ քրեական դատավարության օրենսգրքի 360-րդ հոդվածի 1-ին մասի 11-րդ կետի համաձայն` դատարանը պետք է լուծի նաև գույքի հնարավոր բռնագրավումն ապահովելու համար գույքի վրա դրված կալանքը վերացնելու հարցը: Սույն գործով 2009 թվականի դեկտեմբերի 12-ին կայացվել է գույքի վրա կալանք դնելու մասին որոշում` համաձայն որի որոշվել է գույքի հնարավոր բռնագրավումը և դատական ծախսերի բռնագանձումն ապահովելու նպատակով Արտեմ Գրիգորի Գևորգյանի գույքի վրա դնել կալանք: ՀՀ քրեական դատավարության օրենսգրքի 238-րդ հոդվածի համաձայն` գույքը, քրեական վարույթն իրականացնող մարմնի որոշմամբ ազատվում է կալանքից, եթե քաղաքացիական հայցը ետ վերցվելու, կասկածյալին կամ մեղադրյալին վերագրվող արարքի որակումը փոխվելու հետևանքով կամ այլ պատճառներով վերացել է գույքի վրա կալանք դնելուց բխող սահմանափակումների կիրառման անհրաժեշտությունը: Դատարանը, նկատի ունենալով, որ վերը նշված հիմնավորմամբ Արտեմ Գևորգյանի նկատմամբ չպետք է նշանակվի ՀՀ քրեական օրենսգրքի 266-րդ հոդվածի 2-րդ մասի սանկցիայով նախատեսված լրացուցիչ պատիժը` գույքի բռնագրավումը, ինչպես նաև բռնագանձման ենթակա դատական ծախսեր առկա չեն, գտնում է, որ վերացել է գույքի վրա կալանք դնելուց բխող սահմանափակումների կիրառման անհրաժեշտությունը: Հետևաբար դատավճիռն օրինական ուժի մեջ մտնելուց հետո Արտեմ Գրիգորի Գևորգյանի գույքի վրա դրված կալանքը պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 138-րդ, 168-րդ, 238-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Արտեմ Գրիգորի Գևորգյանին մեղավոր ճանաչել ՀՀ քրեական օրենսգրքի 266-րդ հոդվածի 2-րդ մասի 2-րդ կետով և պատիժ նշանակել ազատազրկում` 5 (հինգ) տարի ժամկետով` պատժի կրման սկիզբը հաշվելով 2009 թվականի դեկտեմբերի 11-ից:
Արտեմ Գրիգորի Գևորգյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Գեղամ Գրիգորի Կարապետյանին մեղավոր ճանաչել ՀՀ քրեական օրենսգրքի 268-րդ հոդվածի 2-րդ մասի 2-րդ կետով և պատիժ նշանակել ազատազրկում` 10 (տաս) ամիս ժամկետով` պատժի կրման սկիզբը հաշվելով 2009 թվականի հոկտեմբերի 22-ից:
Գեղամ Գրիգորի Կարապետյանի նկատմամբ ընտրված խափանման միջոցը` կալանավորումը, թողնել անփոփոխ` մինչև 2010 թվականի օգոստոսի 22-ը:
Դատավճիռն օրինական ուժի մեջ մտնելուց հետո` իրեղեն ապացույց ճանաչված ափիոն տեսակի թմրամիջոցի լուծույթով լցված ներարկիչը, ափիոնի շարքի ալկալոիդների և թմրալկալոիդների հետքերով ներարկիչը, դատարկ ներարկիչը, բամբակյա խծուծները, «Ախթամար» ծխախոտի դատարկ տուփը և կարմիր գույնի խաչով և «AПTEKA» (ապտեկա) գրառումով պոլիէթիլենային փաթեթը, պետք է ոչնչացնել:
Արտեմ Գրիգորի Գևորգյանի գույքի վրա դրված կալանքը վերացնել:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ