Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
մեղադրող` Ռ. Խաչատրյանի
ամբաստանյալ` Հ. Հարությունյանի

2010թ. փետրվարի 01-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Հակոբ Հարությունի Հարությունյանի, ծնված 15.04.1970թ., Երևան քաղաքում, ազգությամբ հայ, ՀՀ քաղաքացի, ութամյա կրթությամբ, ֆիզիկապես առողջ, ամուրի, խնամքին ոչ ոք, նախկինում դատված, դատվածությունը մարված, չի աշխատում, հաշվառված և բնակվում է Երևան քաղաքի Քանաքեռ 16 փողոցի 6-րդ տանը:
Մեղադրվում է ՀՀ քրեական օրենսգրքի 235 հոդվածի 4-րդ մասով:

Պ Ա Ր Զ Ե Ց
1.Գործի դատավարական նախապատմությունը.
2009թ. դեկտեմբերի 17-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 235 հոդվածի 4-րդ մասի հատկանիշներով հարուցվել է թիվ 09123309 քրեական գործը:
2009թ. դեկտեմբերի 23-ին Հակոբ Հարությունի Հարությունյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 235 հոդվածի 4-րդ մասով և նրա նկատմամբ որպես խափանման միջոց ընտրվել է ստորագրություն չհեռանալու մասին:
2009թ. հունվարի 13-ին թիվ 09123309 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2009թ. հունվարի 13-ին քրեական գործը վարույթ է ընդունվել և նշանակվել դատաքննության 2010թ. հունվարի 27-ին:
2.Գործի փաստական հանգամանքները.
Նախաքննության մարմինն ամբաստանյալ Հակոբ Հարությունի Հարությունյանին մեղադրանք է առաջադրել հետևյալ արարքի համար.
Հակոբ Հարությունյանը 2009թ. նոյեմբերի 24-ին, ժամը 0230-ի սահմաններում, իր մոտ ապօրինի կրել է մարտական ՙնունչակու՚ զենքի նմանությամբ հարվածող-փշրող սառը զենք, որն էլ նույն օրը հայտնաբերվել է ոստիկանության ՊՊԾ 6-րդ վաշտի աշխատակիցների կողմից նրա անձնական խուզարկությամբ:
3.Ապացույցների հետազոտում.
Ամբաստանյալ Հակոբ Հարությունյանն ընդունելով իր հանցանքը ցուցմունք է տվել այն մասին, որ 2009թ. նոյեմբերի 23-ին առավոտյան տանից դուրս է եկել դրսից վառելափայտ հայթայթելու նպատակով: Հետդարձի ճանապարհին ՙՔամաքեռ՚ գերեզմանատան մոտ նկատել է սառնարան, որոշել է երեկոյան վերադառնալ և այն տանել տուն` ապամոնտաժելու և օգտագործելու նպատակով: Ճանապարհին, ժամը 0230-ի սահմաններում ՙՔամաքեռ՚ գերեզմանատան մոտ իրեն են մոտեցել ոստիկանության աշխատակիցներ և տարել ոստիկանության Քանաքեռ-Զեյթունի բաժին, որտեղ իր անձնական խուզարկությամբ հայտնաբերվել և առգրավվել է ՙնունչակու՚ զենքը: Նշել է, որ մանկուց զբաղվել է արևելյան մարզաձևերով և իր մոտից հայտնաբերվածն ինքը պատրաստել է վաղուց և այն կրել է զուտ ինքնապաշտպանության նպատակով:
Ամբաստանյալին առաջադրված մեղադրանքը, բացի նրա խոստովանությունից հիմնավորվել է նաև հետևյալ ապացույցներով.
Վկա, Երևան քաղաքի վարչության ՊՊԾ գնդի 6-րդ դասակի 2-րդ վաշտի հրամանատար Արթուր Օսիպյանի ցուցմունքով այն մասին, որ 2009թ. նոյեմբերի 24-ին թիվ 65 պարեկային ավտոմեքենայով ոստիկաններ Վ.Թաղարյանի, Մ.Սարգսյանի հետ միասին ծառայություն իրականացնելիս, ժամը 0230-ի սահմաններում Հասրաթյան փողոցում, ՙՔանաքեռ՚ գերեզմանատան մոտ նկատել են տղամարդու և մոտեցել են պարզելու ինքնությունը: Նկատել են, որ նրա բաճկոնից դուրս են ցցված մետաղյա ձողեր: Իրենց մոտ կասկած է առաջացրել այդ հանգամանքը և այդ քաղաքացուն բերման են ենթարկել ոստիկանության Քանաքեռ-Զեյթունի բաժին: Պարզվել է, որ վերջինս հանդիսանում է Երևան քաղաքի Քանաքեռ 16 փողոցի 6 տան բնակիչ Հակոբ Հարությունյանը: Ընթերականների մասնակցությամբ կատարվել է Հակոբ Հարությունյանի անձնական խուզարկություն, որի ժամանակ բաճկոնի գրպանից հայտնաբերվել է 35սմ երկարությամբ, ամրակով-պտուտակով իրար շղթայով միացված երկաթյա ձողեր, որը նման է մարտական ՙնունչակու՚ զենքին:
Նույնաբովանդակ ցուցմունքներ են տվել նաև վկաներ, Երևան քաղաքի վարչության ՊՊԾ գնդի 6-րդ դասակի 2-րդ վաշտի ոստիկաններ Մանուկ Սարգսյանը և Վարդան Թաղարյանը:
Վկա Արման Կարապետյանի նախաքննության փուլում տված և դատաքննության ընթացքում հետազոտված ցուցմունքով այն մասին, որ 2009թ. նոյեմբերի 24-ին, ժամը 0230-ի սահմաններում իրեն որպես ընթերակա հրավիրել են ոստիկանության Քանաքեռ-Զեյթունի բաժին, որտեղ իր և մյուս ընթերակայի մասնակցությամբ կատարվել է քաղաքացի Հակոբ Հարությունյանի անձնական խուզարկությունը, որի ժամանակ վերջինիս բաճկոնից հայտնաբերվել է ՙնունչակի՚ զենքի նմանությամբ երկաթյա ձողեր, որոնք միմյանց ամրացված են եղել երկաթյա շղթայով: Այդ կապակցությամբ կազմվել է արձանագրություն, որը ստորագրել են նաև իրենք` ընթերականները:
Ամբաստանյալի կատարած հանցանքը հիմնավորվել է նաև գործով ձեռք բերված հետևյալ ապացույցներով.
Փորձագետի 14.12.2009թ. հմ 3393 եզրակացությամբ, համաձայն որի փորձաքննության ներկայացվածը պատրաստված է ինքնաշեն եղանակով, մարտական նունչակու զենքի նմանությամբ և դասվում է հարվածող-փշրող սառը զենքերի շարքին:
Հակոբ Հարությունյանին բերման ենթարկելու արձանագրությամբ, անձնական խուզարկության արձանագրությամբ, որպես իրեղեն ապացույց ճանաչված ՙնունչակու՚ սառը զենքով:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Հակոբ Հարությունի Հարությունյանին առաջադրված մեղադրանքը ՀՀ քրեական օրենսգրքի 235 հոդվածի 4-րդ մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 235 հոդվածի 4-րդ մասի հատկանիշներին և արարքի որակումը ճիշտ է:
Ամբաստանյալ Հակոբ Հարությունյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարածի համար:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Հակոբ Հարությունյանը ենթակա է քրեական պատասխանատվության և պատժի:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց ճանաչված, ՀՀ ոստիկանության ՓՔ վարչությունում պահվող ՙնունչակու՚ զենքի նմանությամբ հարվածող-փշրող սառը զենքը պետք է թողնել վերջինիս տնօրինությանը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Հակոբ Հարությունի Հարությունյանին մեղավոր ճանաչել ՀՀ քրեական օրենսգրքի 235 հոդվածի 4-րդ մասով և նրան դատապարտել տուգանքի երկու հարյուր հազար (200.000) ՀՀ դրամի չափով:
Հակոբ Հարությունի Հարությունյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Իրեղեն ապացույց ճանաչված, ՀՀ ոստիկանության ՓՔ վարչությունում պահվող ՙնունչակու՚ զենքի նմանությամբ հարվածող-փշրող սառը զենքը թողնել վերջինիս տնօրինությանը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ Լ. ԱՎԵՏԻՍՅԱՆ