գործ No ԵԱՔԴ 0192/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ն.Ղազարյանի
մասնակցությամբ` մեղադրող` Ս. Բադալյանի
ամբաստանյալ` Գ. Գրիգորյանի
ամբաստանյալի օրինական ներկայացուցիչ` Ա. Գրիգորյանի
պաշտպան` Վ. Նիկողոսյանի
տուժողի օրինական ներկայացուցիչ` Վ. Մակվեցյանի

2010թ. մարտի 26-ին, Երևան քաղաքում, դռնբաց դատական նիստում, արագացված դատաքննության կարգով քննելով քրեական գործն ըստ մեղադրանքի Գուրգեն Արթուրի Գրիգորյանի, ծնված 24.07.1995թ., Երևան քաղաքում, ազգությամբ հայ, ՀՀ քաղաքացի, սովորում է Ղ.Աղայանի անվան 63-րդ միջնակարգ դպրոցի 10-րդ դասարանում, ֆիզիկապես առողջ, ամուրի, նախկինում չդատված, չի աշխատում, հաշվառված և բնակվում է Երևան քաղաքի Այգեձոր փողոցի 72 շենքի թիվ 18 բնակարանում:
Մեղադրվում է ՀՀ քրեական օրենսգրքի 112 հոդվածի 1-ին մասով:

Պ Ա Ր Զ Ե Ց
1.Գործի դատավարական նախապատմությունը.
2009թ. հոկտեմբերի 30-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 112 հոդվածի 1-ին մասի հատկանիշներով հարուցվել է թիվ 14134509 քրեական գործը:
2009թ. նոյեմբերի 12-ին Գուրգեն Արթուրի Գրիգոյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 112 հոդվածի 1-ին մասով և նրա նկատմամբ որպես խափանման միջոց ընտրվել է անձնական երաշխավորության հանձնելը:
2009թ. դեկտեմբերի 24-ին նախաքննական մարմնի կողմից որոշում է կայացվել թիվ 14134509 քրեական գործով անչափահաս Գուրգեն Արթուրի Գրիգոյանի նկատմամբ ՀՀ քրեական օրենսգրքի 118 հոդվածով քրեական հետապնդում չիրականացնելու մասին տուժողի բողոքի բացակայության պատճառով:
2009թ. դեկտեմբերի 29-ին թիվ 14134509 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2009թ. դեկտեմբերի 29-ին քրեական գործն ընդունվել է վարույթ և նշանակվել դատական քննության 2010թ. հունվարի 26-ին:
2.Գործի փաստական հանգամանքները.
Նախաքննության մարմինն անչափահաս ամբաստանյալ Գուրգեն Արթուրի Գրիգորյանին մեղադրանք է առաջադրել հետևյալ արարքի համար.
Գուրգեն Գրիգորյանը 2009թ. հոկտեմբերի 29-ին, ժամը 1600-ի սահմաններում, Երևան քաղաքի Բաղրամյան պողոտայի 57 շենքի հարևանությամբ գտնվող թիվ 172 միջնակարգ դպրոցի բակում վիճաբանել է անչափահաս Գառնիկ Մակվեցյանի հետ, որի ժամանակ դիտավորությամբ դանակի գործադրմամբ վերջինիս հասցրել է մարմնական վնասվածքներ աջ նստատեղի չթափանցող, որովայնի շրջանի թափանցող լյարդի ձախ բլթի կտրած-ծակած վերքերի ձևով` Գառնիկ Մակվեցյանի առողջությանը պատճառելով կյանքին վտանգ սպառնացող ծանր վնաս:
3. Արագացված դատական քննություն .
Մինչև դատաքննությունն սկսելն անչափահաս ամբաստանյալ Գուրգեն Գրիգորյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել են նաև ամբաստանյալի օրինական ներկայացուցիչ Ա.Գրիգորյանը և պաշտպան Վ.Նիկողոսյանը:
Մեղադրող Ս.Բադալյանը դատական քննության արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գուրգեն Արթուրի Գրիգորյանին առաջադրված մեղադրանքը` ՀՀ քրեական օրենսգրքի 112 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 112 հոդվածի 1-ին մասի հատկանիշներին և արարքի որակումը ճիշտ է:
Գուրգեն Գրիգորյանի նկատմամբ պատիժ նշանակելիս դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, հանցանքը կատարելու պահին եղել է 14 տարեկան 3 ամսական հասակում, մեղայականով ներկայացել է իրավապահ մարմիններ և աջակցել է հանցագործությունը բացահայտելուն, նախկինում դատված չի եղել, տուժողին պատճառված նյութական վնասն ամբաստանյալի ծնողների կողմից ամբողջությամբ հատուցվել է, բնութագրվում է դրական, ինչպես նաև տուժողի օրինական ներկայացուցչի խնդրանքն ամբաստանյալի նկատմամբ մեղմ պատիժ նշանակելու վերաբերյալ:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար անչափահաս ամբաստանյալ Գուրգեն Գրիգորյանը ենթակա է քրեական պատասխանատվության և պատժի:
Դատարանը հաշվի առնելով հանցավորի անձը բնութագրող, պատասխանատվությունն ու պատիժը մեղմացնող վերը նշված հանգամանքները, ինչպես նաև պատասխանատվությունն ու պատիժը ծանրացնող հանգամանքների բացակայությունը, հանգում է հետևության, որ Գուրգեն Գրիգորյանի ուղղվելը հնարավոր է առանց պատիժը կրելու` պայմանականորեն պատիժը չկիրառելու պայմաններում:
Դատարանը նկատի ունենալով, որ տուժողի օրինական ներկայացուցիչ Վաղարշակ Մակվեցյանը հրաժարվել է քաղաքացիական հայցի պահանջից, գտնում է, որ այդ հարցը պետք է համարել լուծված:
Դատարանն անդրադառնալով իրեղեն ապացույցների տնօրինման հարցին, գտնում է, որ իրեղեն ապացույց ճանաչված տուժող Գառնիկ Մակվեցյանի անթև շապիկը և անդրավարտիքը պետք է վերադարձնել նրան:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Գուրգեն Արթուրի Գրիգորյանին մեղավոր ճանաչել ՀՀ քրեական օրենսգրքի 112 հոդվածի 1-ին մասով և նրան դատապարտել ազատազրկման երեք (3) տարի ժամկետով:
Կիրառել ՀՀ քրեական օրենսգրքի 70 հոդվածը և Գուրգեն Արթուրի Գրիգորյանի նկատմամբ ազատազրկման ձևով նշանակված պատիժը պայմանականորեն չկիրառել` սահմանելով փորձաշրջան երկու (2) տարի ժամկետով:
Գուրգեն Արթուրի Գրիգորյանի նկատմամբ ընտրված խափանման միջոցը` անձնական երաշխավորության հանձնելը, թողնել անփոփոխ, մինչև դատավճռի օրինական ուժի մեջ մտնելը:
Տուժող Գառնիկ Մակվեցյանի քաղաքացիական հայցի հարցը համարել լուծված:
Իրեղեն ապացույց ճանաչված Գառնիկ Մակվեցյանի անթև շապիկը և անդրավարտիքը վերադարձնել նրան:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:
ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ