ԵԱՔԴ/0187/01/09





ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ


«8» փետրվարի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Մ.Պապոյան, քարտուղարությամբ Ռ.Ավետյանի, մասնակցությամբ մեղադրող Ս.Բադալյանի, տուժող Ա.Հակոբյանի, դռնբաց դատական նիստում քննելով քրեական գործն ըստ մեղադրանքի` Վլադիմիր Գրիգորի Սահակյանի (ծնված 1940 թվականի սեպտեմբերի 6-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, հաշվառված է Երևան քաղաքի Ա.Տիգրանյան փողոցի 13-րդ տանը) ՀՀ քրեական օրենսգրքի 113-րդ հոդվածի 1-ին մասով

ՊԱՐԶԵՑ

2009 թվականի հուլիսի 6-ին ՀՀ ոստիկանության Քանաքեռ-Զեյթունի քննչական բաժնի քննիչ Է.Պողոսյանի որոշմամբ ՀՀ քրեական օրենսգրքի 113-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 09110409 քրեական գործը:
2009 թվականի սեպտեմբերի 22-ին ՀՀ ոստիկանության Քանաքեռ-Զեյթունի քննչական բաժնի քննիչ Է.Պողոսյանի որոշմամբ Վլադիմիր Գրիգորի Սահակյանին մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով:
2009 թվականի օգոստոսի 28-ին ՀՀ ոստիկանության Քանաքեռ-Զեյթունի քննչական բաժնի քննիչ Ա.Ավետիսյանի որոշմամբ ՀՀ քրեական օրենսգրքի 113-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 09115809 քրեական գործը:
2009 թվականի սեպտեմբերի 15-ին ՀՀ ոստիկանության Քանաքեռ-Զեյթունի քննչական բաժնի քննիչ Ա.Ավետիսյանի որոշմամբ Անահիտ Համբարձումի Հակոբյանին մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով:
2009 թվականի սեպտեմբերի 22-ին ՀՀ ոստիկանության Քանաքեռ-Զեյթունի քննչական բաժնի քննիչ Ա.Ավետիսյանի որոշմամբ Վլադիմիր Գրիգորի Սահակյանին մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով:
2009 թվականի սեպտեմբերի 23-ին ՀՀ ոստիկանության Քանաքեռ-Զեյթունի քննչական բաժնի քննիչ Է.Պողոսյանի որոշմամբ թիվ 09115809 քրեական գործն ընդունվել է վարույթ, միացվել թիվ 09110409 քրեական գործին և նախաքննությունը շարունակվել թիվ 09115809 համարով:
2009 թվականի սեպտեմբերի 23-ին ՀՀ ոստիկանության Քանաքեռ-Զեյթունի քննչական բաժնի պետ Գ.Կարապետյանի որոշմամբ թիվ 09115809 քրեական գործի նախաքննության կատարումը հանձնարարվել է քննչական խմբին, որի կազմում ընդգրկվել են ՀՀ ոստիկանության Քանաքեռ-Զեյթունի քննչական բաժնի քննիչներ Է.Պողոսյանը և Ա.Ավետիսյանը, քննչական խմբի ղեկավար է նշանակվել ՀՀ ոստիկանության Քանաքեռ-Զեյթունի քննչական բաժնի պետի տեղակալ Վ.Գրիգորյանը:
2009 թվականի սեպտեմբերի 23-ին ՀՀ ոստիկանության Քանաքեռ-Զեյթունի քննչական բաժնի պետի տեղակալ Վ.Գրիգորյանի որոշմամբ թիվ 09115809 քրեական գործն ընդունվել է վարույթ:
2009 թվականի դեկտեմբերի 14-ին ՀՀ ոստիկանության Քանաքեռ-Զեյթունի քննչական բաժնի պետի տեղակալ Վ.Գրիգորյանի որոշմամբ թիվ 09115809 քրեական գործով Անահիտ Համբարձումի Հակոբյանի վերաբերյալ մասը կարճվել է և նրա նկատմամբ քրեական հետապնդումը դադարեցվել է ապացույցների անբավարարության հիմքով:
2009 թվականի դեկտեմբերի 14-ին ՀՀ ոստիկանության Քանաքեռ-Զեյթունի քննչական բաժնի պետի տեղակալ Վ.Գրիգորյանի որոշմամբ թիվ 09115809 քրեական գործի` Անահիտ Համբարձումի Հակոբյանի կողմից Լ.Նոխուդյանին սպանության սպառնալիքներ տալու մասը կարճվել է և Անահիտ Համբարձումի Հակոբյանի նկատմամբ քրեական հետապնդում չի իրականացվել ապացույցների անբավարարության հիմքով:
2009 թվականի դեկտեմբերի 26-ին Վլադիմիր Գրիգորի Սահակյանի վերաբերյալ քրեական գործը մեղադրական եզրակացությամբ ուղարկվել է Դատարան:
Վլադիմիր Գրիգորի Սահակյանին մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով` այն արարքի համար, որ նա 2009 թվականի հունիս-հոկտեմբեր ամիսներին, գտվելով լարված փոխհարաբերությունների մեջ Անահիտ Համբարձումի Հակոբյանի հետ, կենցաղային դրդապատճառով դիտավորությամբ երեք անգամ վերջինի առողջությանը պատճառել է միջին ծանրության վնաս` առողջության տևական քայքայումով: Այսպես.
2009 թվականի հունիսի 4-ին` ժամը 07:45-ի սահմաններում, Ա.Տիգրանյան 5-րդ շենքի մոտ վիճաբանության ժամանակ, ձեռքերով հարվածել է Անահիտ Հակոբյանին, ապա դանակով դիտավորությամբ հարվածել է նրա աջ զստափոսային շրջանին և ձախ բազկի միջին երրորդի ներսային մակերեսի արյունազեղումների, կրծքավանդակի հետին մակերեսի և աջ բազկի միջին երրորդի կողմնային մակերեսի ճանկռվածքների, աջ զստափոսային շրջանի ծակած-կտրած չթափանցող վերքի ձևով Անահիտ Հակոբյանի առողջությանը պատճառել է միջին ծանրության վնաս` առողջության տևական քայքայումով:
2009 թվականի օգոստոսի 22-ին` ժամը 13:00-ի սահմաներում, Ա.Տիգրանյան 38-րդ շենքի 2-րդ հարկից 3-րդ հարկ տանող աստճանահարթակի վրա վիճաբանության ժամանակ դանակով դիտավորությամբ հարվածել է Անահիտ Հակոբյանի ձախ բազկին և որովայնի ձախ կեսի առաջային պատին` նրա առողջությանը պատճառելով միջին ծանրության վնաս` առողջության տևական քայքայումով:
2009 թվականի հոկտեմբերի 11-ին` ժամը 14:00-ի սահմաններում, Ա.Տիգրանյան 13-րդ տան ավտոտնակի դիմաց վիճաբանության ժամանակ դանակով դիտավորությամբ հարվածել է Անահիտ Հակոբյանի ձախ կրծքագեղձին` նրա առողջությանը պատճառելով միջին ծանրության վնաս` առողջության տևական քայքայումով:
2010 թվականի հունվարի 27-ին գործով տուժող Անահիտ Հակոբյանը դիմում է ներկայացրել Դատարան` հայտնելով, որ հաշտվում է ամբաստանյալ Վլադիմիր Գրիգորի Սահակյանի հետ, քանի որ չի ցանկանանում վարկաբեկել իրենց ընտանիքները:
2010 թվականի փետրվարի 8-ի դատական նիստի ժամանակ Անահիտ Հակոբյանը կրկին հայտնել է, որ հաշտվել է ամբաստանյալ Վլադիմիր Սահակյանի հետ և նշել, որ գիտակցում է հաշտվելու հետևանքնները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 113-րդ հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Վերոգրյալը հաշվի առնելով` Դատարանը գտնում է, որ թիվ ԵԱՔԴ/0187/01/09 քրեական գործի վարույթը պետք է կարճել և Վլադիմիր Գրիգորի Սահակյանի նկատմամբ քրեական հետապնդումը դադարեցնել:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ որոշումն օրինական ուժի մեջ մտնելուց հետո` 2009 թվականի դեկտեմբերի 19-ի որոշմամբ իրեղեն ապացույց ճանաչված Անահիտ Հակոբյանի հագուստները պետք է վերադարձնել նրան:
Դատարանը, ղեկավարվելով ՀՀ քրեական դատավարության օրենսգրքի 123-րդ հոդվածով, գտնում է, որ 2009 թվականի դեկտեմբերի 19-ի որոշմամբ ապացույց ճանաչված DVD (ԴիՎիԴի) ֆորմատի տեսասկավառակը և կատարված վերծանումը պետք է պահել քրեական գործի հետ միասին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 116-րդ, 119-րդ, 123-րդ, 183-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԱՔԴ/0187/01/09 քրեական գործի վարույթը կարճել և Վլադիմիր Գրիգորի Սահակյանի նկատմամբ քրեական հետապնդումը դադարեցնել` տուժող Անահիտ Համբարձումի Հակոբյանի հաշտվելու հիմքով:
Վլադիմիր Գրիգորի Սահակյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումն օրինական ուժի մեջ մտնելուց հետո, 2009 թվականի դեկտեմբերի 19-ի որոշմամբ իրեղեն ապացույց ճանաչված Անահիտ Հակոբյանի հագուստները վերադարձնել նրան, իսկ 2009 թվականի դեկտեմբերի 19-ի որոշմամբ ապացույց ճանաչված DVD (ԴիՎիԴի) ֆորմատի տեսասկավառակը և կատարված վերծանումը պահել քրեական գործի հետ միասին:
Սույն որոշումը կարող է բողոքարկվել Հայաստանի Հանրապետության քրեական վերաքննիչ դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ