ԵԱՔԴ/0185/01/09




ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«16» մարտի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ս.Բադալյան
պաշտպան Է.Վարդանյան

դռնբաց դատական նիստում քննեց քրեական գործն ըստ մեղադրանքի`
Կարապետ Գալուստի Տերտերյանի` ծնված 1986 թվականի ապրիլի 19-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, նախկինում չդատապարտված, բնակվում է Երևան քաղաքի Քեռու փողոցի 79-րդ տանը: Մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2009 թվականի սեպտեմբերի 2-ին ՀՀ ոստիկանության Արաբկիրի քննչական բաժնի քննիչ Ժ.Թովմասյանի որոշմամբ ՀՀ քրեական օրենսգրքի 258-րդ հոդվածի 2-րդ մասով նախատեսված հանցագործության հատկանիշներով հարուցվել և վարույթ է ընդունվել թիվ 14128109 քրեական գործը:
2009 թվականի նոյեմբերի 16-ին ՀՀ ոստիկանության Արաբկիրի քննչական բաժնի քննիչ Ն.Եղիկյանի որոշմամբ թիվ 14128109 քրեական գործն ընդունվել է վարույթ:
2009 թվականի դեկտմբերի 7-ին ՀՀ ոստիկանության Արաբկիրի քննչական բաժնի քննիչ Ն.Եղիկյանի որոշմամբ թիվ 14128109 քրեական գործով Ղևոնդ Նորիկի Ալավերդյանի նկատմամբ ՀՀ քրեական օրենսգրքի 117-րդ հոդվածի հատկանիշներով քրեական հետապնդում չի իրականացվել բողոքի բացակայության հիմքով: Նույն որոշմամբ թիվ 14128109 քրեական գործով Արթուր Մանուկի Գրիգորյանի նկատմամբ ՀՀ քրեական օրենսգրքի 117-րդ հոդվածի հատկանիշներով քրեական հետապնդում չի իրականացվել արարքում հանցակազմի բացակայության հիմքով:
2009 թվականի դեկտեմբերի 8-ին ՀՀ ոստիկանության Արաբկիրի քննչական բաժնի քննիչ Ն.Եղիկյանի որոշմամբ թիվ 14128109 քրեական գործով Կարապետ Գալուստի Տետերյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով:
2009 թվականի դեկտմբերի 10-ին ՀՀ ոստիկանության Արաբկիրի քննչական բաժնի քննիչ Ն.Եղիկյանի որոշմամբ թիվ 14128109 քրեական գործով Արթուր Մանուկի Գրիգորյանի նկատմամբ ՀՀ քրեական օրենսգրքի 118-րդ հոդվածի հատկանիշներով քրեական հետապնդում չի իրականացվել արարքում հանցակազմի բացակայության հիմքով:
2009 թվականի դեկտեմբերի 24-ին Կարապետ Գալուստի Տետերյանի վերաբերյալ քրեական գործը մեղադրական եզրակացությամբ ուղարկվել է Դատարան:
Կարապետ Գալուստի Տետերյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով` այն արաքի համար, որ նա 2009 թվականի հուլիսի 27-ին` ժամը 22:00-ի սահմաններում, հոր` Գալուստ Տերտերյանի ծննդյան տարեդարձի կապակցությամբ իրենց տանը կազմակերպված խնջույքի ժամանակ բարձրաձայն հայհոյել է իրենց տան բակում, ապա չընդունելով հարևանությամբ բնակվող Մանուկ Գրիգորյանի դիտողությունը, ով պահանջել է դադարեցնել հայհոյանքը, շարունակել է հայհոյանքները, շուրջ 10 րոպե խախտել է հասարակական կարգը, հասարակության նկատմամբ բացահայտ անհարգալից վերաբերմունք ցուցաբերել, որի ընթացքում բռնություն է գործադրել Մանուկ Գրիգորյանի նկատմամբ:
2. Ապացույցների հետազոտում և գնահատում.
Դատական քննության ընթացքում ամբաստանյալ Կարապետ Տետերյանը առաջադրված մեղադրանքում իրեն մեղավոր ճանաչեց և օգտվելով իր սահմանադրական իրավունքից` հրաժարվեց ցուցմունք տալուց: Սակայն իրեն առաջադրված հարցերին ամբաստանյալ պատասխանեց, որ ինքը հայհոյել է բակի շանը, իսկ Մանուկ Գրիգորյանը իրեն դուրս է կանչել հայհոյելու համար: Իսկ ինչ վերաբերում է վիճաբանության ընթացքում իր կողմից հայհոյանք տալուն, ապա դա եղել է իրեն հայհոյելու պատճառով:
Նախնական քննության ընթացքում Կարապետ Տետերյանը ցուցմունք է տվել այն մասին, որ 2009 թվականի հուլիսի 17-ին` ժամը 22:00-ի սահմաններում, իրենց հարևանությամբ բնակվող Մանուկ Գրիգորյանի ընտանիքի անդամների հետ տեղի ունեցած միջադեպի ժամանակ ինքն ընդանրապես որևէ մեկին չի հայհոյել և չի հարվածել, այդ իսկ պատճառով առաջադրված մեղադրանքում իրեն մեղավոր չի ճանաչում: Իրականությանը չեն համապատասխանում բոլոր այն ցուցմունքները, որոնց համաձայն ինքը հայհոյել և բռնություն է գործադրել: Իր և Մանուկ Գրիգորյանի միջև տեղի է ունեցել ծեծկռտուք, սակայն ինքը, կինը, հայրը և մայրը հրաժարվել են ենթարկվել դատաբժշկական փորձաքննության: Մանուկ Գրիգորյանն իրեն դիտողություն է արել ոչ թե հայհոյելու, այլ բարձր երաժշտության համար:
Վկա Մանուկ Գրիգորյանը ցուցմունք տվեց այն մասին, որ բնակվում է Երևան քաղաքի Քեռու փողոցի 83-րդ տանը: Իրենց և Տերտերյանների տան բակերի միջև հեռավորությունը մոտ 10 մետր է: 2009 թվականի հունիսի 27-ին` երեկոյան, ինքը, կինը և երկու հարսները նստած են եղել իրենց բակում: Այդ ժամանակ Տերտերյանների բակից լսվել են հայհոյանքներ: Ինքը ձայն է տվել Կարապետին և պահանջել դադարեցնել հայհոյանքները, սակայն նա ասել է, որ սեփական բակում ինչ ցանկանա, այն էլ կանի: Ինքը չի հիշում, բայց հետո իրեն ասել են, որ ինքը զայրացած է եղել և ինքն է Կարապետից պահանջել դուրս գալ: Երբ իրենք դուրս են եկել փողոց, ինքը Կարապետին հայհոյելու հարմար ամոթանք է տվել: Այդ ժամանակ նա հայհոյել է իրեն, գետնից վերցրել իր հետ նախօրոք բերած գորգեր թափ տալու փայտը և շարժվել իր ուղղությամբ: Այդ ժամանակ Տերտերյանների բակից դուրս են եկել Կարապետի հայրը, մայրը, կնոջ հայրը և այլ մարդիկ: Նրանցից Կարապետի կնոջ հայրը վերցրել է դարպասի մոտ դրված փայտը և հարվածել իր դեմքին: Հարվածից ինքն ընկել է, կորցրել գիտակցությունը և չի հիշում, թե հետագայում ինչ է եղել: Այնուհետև Կարապետը և նրա եղբայրը շշեր են նետել իրենց բակ, և հայհոյանքները կրկին շարունակվել են, սակայն ինքը չի կարող ասել, թե ովքեր են եղել հայհոյանք տվողները: Վիճաբանության ընթացքում ինքը ոչ ոքի մարմնական վնասվածք չի պատճառել:
Վկա Աշխեն Խաչատրյանը ցուցմունք տվեց այն մասին, որ իրենց տունը գտնվում է իր ամուսնու եղբոր` Մանուկ Գրիգորյանի տան հարևանությամբ, իրենց տան մյուս կողմում գտնվում է Ռիտա Բդեյանի տունը, իսկ վերջինի անմիջական հարևանությամբ գտնվում է Տերտերյանների տունը: Դեպքի օրը Տերտերյանների տանը միջոցառում է եղել: Նույն օրը` ժամը 20:00-ից 21:00-ի սահմաններում, ինքը լսել է Կարապետ Տերտերյանի հայհոյանքները, որից հետո իր ամուսնու եղբայրը նրանից պահանջել է դադարեցնել հայհոյանքները` ասելով, որ բակում կանայք կան: Սակայն Կարապետը պատասխանել է, որ ոչ մեկին չի խանգարում, դա նրանց բակն է, որտեղ ինչ ցանկանա, այն էլ կանի: Այդ պատճառով իրենց փողոցում վեճ է սկսվել: Ինքը այդտեղ է գնացել այն պահին, երբ վեճի մասնակիցներին փորձել են բաժանել: Ինքը չի կարող ասել, թե ով է հարվածել իր ամուսնու եղբորը, սակայն վերջինին տեսել է արյունոտ վիճակում: Վիճաբանության վայրում շատ մարդիկ են եղել, այդ թվում` իր որդին, իր ամուսնու եղբայրը, վերջինի կինը` Ֆլորան, որդիները` Արթուրն ու Գոռը, հարևան Մարտինը, ինչպես նաև Տերտերյանները և նրանց հյուրերը: Ֆլորան իրեն ասել է, որ հարվածից Մանուկը ուշագնաց է եղել և ընկել գետնին:
Վկա Ֆլորա Ավագյանը ցուցմունք տվեց այն մասին, որ իրենց և Տերտերյանների տները իրարից հեռու են մոտ 10 մետր: Դեպքի օրն ինքը, ամուսինը և իր որդիների կանայք նստած են եղել իրենց տան բակում: Ժամը 22:00-ի սահմաններում Տերտերյանների տան բակից լսվել են Կարապետի բարձրաձայն հայհոյանքները, ով միայնակ կանգնած է եղել աստիճանների վրա: Այդ ժամանակ իր ամուսինը` Մանուկ Գրիգորյանը, Կարապետից պահանջել է դադարեցնել հայհոյանքները, սակայն նա պատասխանել է, որ սեփական բակում ինչ ցանկանա, այն էլ կանի: Այնուհետև Կարապետը հայհոյել է նաև իր ամուսնուն, որից հետո նրանք դուրս են եկել փողոց և սկսել վիճաբանել: Ինքը ձայն է տվել իր որդիներին և ասել կատարվածի մասին: Այդ ժամանակ իր որդու` Գոռի կնոջ ինքնազգացողությունը վատթարացել է, որի պատճառով, Գոռը մնացել է կնոջ մոտ, իսկ ինքը և մյուս որդին` Արթուրը, գնացել են վիճաբանության վայր: Վիճաբանության վայրում լսվել են հայհոյանքներ, սակայն ինքը չի կարող ասել, թե ովքեր են եղել հայհոյանքններ տվողները: Այդտեղ են եղել Գալուստ Տերտերյանը, նրա կինը` Լարիսան, որդին` Կարապետը, վերջինի կինը և նրանց հյուրերը, ինչպես նաև մոտակայքում ապրող շատ մարդիկ, իսկ իր ամուսինը արյունոտ վիճակում ընկած է եղել գետնին: Իրենք բարձրացրել են նրան, որի ընթացքում այդտեղ է եկել նաև իր մյուս որդին և միասին ամուսնուն տարել են տուն: Այնուհետև ամուսինն ասել է, որ փայտով հարվածել են գլխին, որի պատճառով նա ընկել է: Նախկինում ևս Կարապետը հայհոյանքներ է տվել:
Վկա Ռիտա Բդեյանը դատական քննության ընթացքում ցուցմունք տվեց այն մասին, որ իրենց տունը գտնվում է Տերտերյանների և Գրիգորյանների տների մեջտեղում: 2009 թվականի հուլիսի 27-ին երբ ինքը տնից դուրս է եկել, լսել է Մանուկ Գրիգորյանի ձայնը` «հերիք է հայհոյես, չես թողնում հարսներիս հետ նստեմ», իսկ Կարապետն ասել, որ սեփական բակում ինչ ցանկանա, այն էլ կանի: Ինքը մտածել է, որ վիճաբանություն է սկսվելու և մտել է տուն, քանի որ դա առաջին դեպքը չի եղել, միշտ էլ Կարապետ Տերտերյանը հայհոյանքներ է տվել: Դրանից մոտ 2-3 րոպե անց զանգահարել են Ֆլորայի հարսները և իրեն շտապ կանչել: Ինքն անմիջապես գնացել է և տեսել, որ երկու հարսներն էլ դողում են, իսկ բակում առկա են եղել կոտրված շշեր: Նրանք իրեն ասել են, որ վիճաբանություն է սկսվել և Ֆլորան գնացել է այնտեղ: Ինքը մտածել է, որ իր տղան ևս կարող է վիճաբանության վայրում լինել և գնացել է այնտեղ: Վիճաբանության վայրում խառնաշփոթ վիճակ է եղել: Մանուկ Գրիգորյանը արյունոտ ընկած է եղել գետնին, իսկ Արթուր Գրիգորյանը փորձել է բարձրացնել նրան: Արթուրը Կարապետից պահանջել է հայհոյանքներ չտալ, սակայն ինքը Կարապետից հայհոյանք չի լսել: Ինքը իրենց հարևան Մարտիկին օգնության է կանչել: Նախնական քննության ընթացքում իր տված ցուցմունքը համապատասխանում է իրականությանը:
Նախնական քննության վկա Ռիտա Բդեյանը ցուցմունք է տվել այն մասին, որ բնակվում է Տերտերյանների հարևանությամբ: Ինքը հաճախակի լսել է Տերտերյանների վիճաբանության և հայհոյանքի ձայները, որի համար նրանք զգուշացվել են: 2009 թվականի հուլիսի 27-ին ինքը դուրս է եկել պատշգամբ և լսել, որ Կարապետ Տերտերյանը բակում վիճում է ինչ-որ մեկի հետ և հայհոյանք տալիս: Ինքը ցանկացել է մտնել տուն, երբ լսել է Մանուկ Գրիգորյանի ձայնը, ով Կարապետ Տերտերյանից պահանջել է դադարեցնել հայհոյանքները, քանի որ նրա երկու հարսները բակում են եղել: Սակայն Կարապետը պատասխանել է, որ սեփական բակում ինչ ցանկանա, այն էլ կանի: Դրանից հետո ինքը Գրիգորյանների տնից լսել է լացի ձայներ և գնացել նրանց տուն: Ինքը Գրիգորյանների բակում նկատել է կոտրված շշեր, որոնք նետվել էին Տերտերյանների բակից, իսկ Մանուկի հարսները վախեցած լաց են եղել: Այնուհետև ինքը դուրս է եկել փողոց, քանի որ մտածել է, որ իր որդին էլ կարող է այնտեղ լինել: Վիճաբանության վայրում եղել են շատ մարդիկ` այդ թվում Տերտերյանների ընտանիքը, նրանց հյուրերը, Մանուկը, նրա կինը` Ֆլորան, որդին` Արթուրը, Աշխենը, Մարտինը և Էդիկը: Փողոցում ինքը նկատել է, որ Մանուկը ընկած է գետնին, իսկ Տերտերյանների հյուրերից մեկը փայտով հարվածել է նրան: Այդ ժամանակ Ֆլորան և Արթուրը փորձել են Տերտերյաններին մի կողմ տանել, որպեսզի գետնից բարձրացնեն Մանուկին: Այդ պահին ինքը նկատել է, որ Կարապետը փորձել է քարով հարվածել Արթուրին, սակայն ինքը բռնել է նրա ձեռքից: Դրանից հետո Մանուկի հարազատները, հարևաններ Մարտինն և Էդիկը բարձրացրել են Մանուկին և տարել տուն: Վիճաբանությունը տևել է մոտ 25-30 րոպե, որի ընթացքում Տերտերյանները հայհոյանքներ են տվել, իսկ Արթուրը նրանցից պահանջել է դադարեցնել հայհոյանքները: Այդ ընթացքում իրեն ոչ ոք չի հարվածել:
Վկա Արթուր Գրիգորյանը ցուցմունք տվեց այն մասին, որ դեպքի օրը Տերտերյանների տանը միջոցառում է եղել: Նրանց բակից հայհոյանքներ են լսվել, որի համար նախազգուշացվել են իր հոր կողմից: Բայց պատասխանը եղել է կոշտ` «ինչ կուզի կանի»: Դրանից հետո վիճաբանություն է սկսվել, որը շարունակվել է փողոցում: Ինքը փողոց է դուրս եկել այն պահին, երբ այնտեղ շատ մարդիկ են եղել: Ինքը տեսել, որ իր հայրը ընկած է գետնին, իսկ Կարապետը, Գալուստը և նրանց բարեկամները հարվածում են նրան: Ինքը բաժանել է նրանց և բարձրացել հորը: Այդ ժամանակ Կարապետը հայհոյանքներ տվել, իսկ ինքը նրանից պահանջել է դադարեցնել հայհոյանքները: Այդ ընթացքում իրեն հարվածել են, սակայն ինքը որևէ վնասվածք չի ստացել: Վիճաբանությունը տվել է մոտ 10 րոպե:
Վկա Մարտիրոս Մկրտչյանը ցուցմունք տվեց այն մասին, որ դեպքի օրը երեկոյան ինքը փողոցի կողմից աղմուկ է լսել, պատուհանից նայել է և տեսել, որ շատ մարդիկ են հավաքված: Ինքը, հասկանալով, որ այդտեղ վիճաբանություն է տեղի ունենում, անմիջապես դուրս է եկել փողոց և մարդկանց մեջ նկատել Մանուկ Գրիգորյանին, նրա որդուն, Կարապետ Տերտերյանին, նրա հորը և եղբորը: Ինքը նրանց խնդրել է հանգստանալ և դադարեցնել աղմուկը: Այնուհետև եկել են ոստիկանները և շտապ օգնությունը, որից հետո ամեն ինչ հանդարտվել է: Ինքը հայհոյանքներ չի լսել:
2009 թվականի հոկտեմբերի 16-ի առերես հարցաքննության արձանագրության համաձայն` Կարապետ Տերտերյանը հայտնել է, որ ճանաչում է իր հետ առերես հարցաքննվող Մանուկ Գրիգորյանին և նրա հետ գտնվում են նորմալ հարաբերությունների մեջ: 2009 թվականի հուլիսի 27-ին` իր հոր ծննդյան օրը, երբ ինքը եղել է բակում, Մանուկի փոքր որդին իրենից պահանջել է հայհոյանք չտալ և ասել, որպեսզի դուրս գա զրուցելու: Ինքը դուրս է եկել փողոց և զրուցել Գոռի հետ: Այդ ժամանակ եկել է Մանուկ Գրիգորյանը, մոտեցել իրեն և հարվածել դեմքին, որից հետո ծեծկռտուք է սկսվել: Տեղի ունեցած վիճաբանության ժամանակ ինքը տվել է տարբեր բնույթի հայհոյանքներ, միաժամանակ հայհոյել են մյուս կողմից: Այդ ժամանակ ինքը նկատել, որ իր հորը հարվածել են: Մանուկ Գրիգորյանի ցուցմունքները չեն համապատասխանում իրականությանը, քանի որ նրան ոչ ոք չի հարվածել, իսկ իրեն նկատողություն անողը և դուրս կանչողը եղել է Գոռը: Իսկ Մանուկ Գրիգորյանը հայտնել է, որ ճանաչում է իր հետ առերես հարցաքննվողին և նրա հետ գտնում է հարևանական հարաբերությունների մեջ: Դեպքի օրը` ժամը 22:00-ի սահմաններում, ինքը կնոջ և երկու հարսների հետ եղել է իր տան բակում: Այդ ժամանակ հարևան բակից լսվել են հայոյանքներ, և ինքը Կարապետից պահանջել է հայհոյանքներ չտալ, սակայն նա իրեն պատասխանել է, որ սեփական բակում ինչ ցանկանա, այն էլ կանի, որից հետո իրեն հրավիրել են փողոց: Ինքը գնացել է փողոց և փորձել Կարապետին հանգստացնել, սակայն նա վերցրել է նախօրոք բերված փայտը, որպեսզի հարվածի իրեն: Ինքը բռնել է նրա օձիքից և պահանջել գցել փայտը: Այդ պահին նրանց բակից դուրս են եկել Տերտերյանների հյուրերը, և նրանցից մեկը փայտով հարվածել է իրեն, ինչի հետևանքով ինքը կորցրել է գիտակցությունը և ընկել: Ինքը Գալուստ Տերտերյանին չի հարվածել, քանի որ գիտակցությունը կորցրած է եղել: Կարապետի ցուցմունքները չեն համապատասխանում իրականությանը:
2009 թվականի հոկտեմբերի 16-ի առերես հարցաքննության արձանագրության համաձայն` Գոռ Գրիգորյանը հայտնել է, որ ճանաչում է իր հետ առերես հարցաքննվողին և նրա հետ գտնվում է հարևանական հարբերությունների մեջ: Կարապետի ցուցմունքները սուտ են, քանի որ ինքը ներկա չի եղել այդ օրվա վեճին, իսկ սկզբում նրան նկատողություն է արել ոչ թե ինքը, այլ իր հայրը: Երբ ինքը դուրս է եկել բակ, տեսել է, որ Տերտերյանների բակից օղու և հանքային ջրի շշեր են նետվում իրենց բակ: Այդ ժամանակ իր կնոջ ինքնազգացողությունը վատթարացել է և ինքը մնացել է կնոջ մոտ: Դրանից հետո ինքը դուրս է եկել փողոց և տեսել է, որ իր հորն արյունոտ վիճակում բերում են տուն: Ինքը վիճաբանությանն ընդհանրապես ներկա չի եղել: Իսկ Կարապետ Տերտերյանը հայտնել է, որ իր հետ առերես հարցաքննվողը իրենց հարևան Գոռն է, ում հետ եղել է նորմալ հարաբերությունների մեջ: 2009 թվականի հուլիսի 27-ին նշել են իր հոր ծննդյան տարեդարձը: Ժամը 22:00-ի սահմաններում իրենց հարևան Մանուկ Գրիգորյանի տան բակից Գոռն իրեն ասել է, որպեսզի հայհոյանք չտա և պահանջել է դուրս գալ փողոց: Ինքն ու Գոռը դուրս են եկել փողոց և զրուցել: Այդ պահին եկել է Մանուկը և ձեռքով հարվածել իր դեմքին, որից հետո իրենց միջև վիճաբանություն է սկսվել: Ինքը չի նկատել, որ Գոռը որևէ մեկին հարվածի կամ հայհոյի: Գոռի ցուցմունքները չեն համապատասխանում իրականության:
2009 թվականի նոյեմբերի 20-ի առերես հարցաքննության արձանագրության համաձայն` Կարապետ Տերտերյանը հայտնել է, որ 2009 թվականի հուլիսի 27-ին` իր հոր ծննդյան 50-ամյա հոբելյանի օրը, ինքը բակում չի հայհոյել, այլ ժամը 22:00-ի սահմաններում, երբ գտնվել է իրենց պատշգամբում իրենց հարևան Գոռ Գրիգորյանը իրեն ասել է «արա, հերիք չի ձայնդ լսեմ»: Դա իր համար տարօրինակ է թվացել և ինքը Գոռի կանչով դուրս է եկել փողոց` պարզելու, թե ինչ է նա ցանկանում: Գոռի հետ զրուցելու ընթացքում իրենց է մոտեցել Գոռի հայրը` Մանուկը և առանց որևէ բան ասելու հարվածել իրեն, որից հետո ծեծկռտուք է սկսվել: Իսկ Արթուր Գրիգորյանը հայտնել, որ իր ընտանիքի անդամներն իրեն պատմել են, որ 2009 թվական հուլիսի 27-ին ժամը` 22:00-ի սահմաններում, երբ ինքը քնած է եղել, իրենց հարևանությամբ բնակվող Տերտերյանների բակից Կարապետը բարձրաձայն հայհոյել է, որից հետո իր հայրը նրան դիտողություն է արել, սակայն Կարապետը այն չի ընդունել: Իր հայրը բացատրելու նպատակով Կարապետին դուրս է կանչել, որտեղ վիճաբանություն է սկսվել և վերծվել կռվի: Այնուհետև իրեն արթնացրել են և ինքը դուրս է եկել փողոց, որտեղ տեսել է, որ Գալուստ և Կարապետ Տերտետյանները ծեծում են իր հորը: Այնտեղ ներկա են եղել նաև անծանոթ մարդիկ, որոնց մի մասը Տերտերյանների հյուրերն են եղել: Ինքը դժվարությամբ հորը դուրս է բերել կռվից: Այդ ընթացքում ինքը հարվածել է միայն Գալուստին, քանի որ նա բռնել էր իր պարանոցից: Իրենց ընտանիքից այդտեղ ներկա են եղել ինքը, իր հայրը և մայրը: Դրանից հետո ինքն իր հորը տարել է տուն: Իրեն արթնացնելու ժամանակ իր եղբայր Գոռը տանն է եղել: Գոռը փողոց է դուրս է եկել այն ժամանակ, երբ ինքը գտնվել է փողոցում:
2009 թվականի նոյեմբերի 20-ի առերես հարցաքննության արձանագրության համաձայն` Աշխեն Խաչատրյանը հայտնել է, որ պնդում իր նախկին ցուցմունքը: 2009 թվականի հուլիսի 27-ին իրենց հարևան Տերտերյանների տանը խնջույք է եղել: Ժամը 22:00-ի սահմաններում ինքը լսել է իր ամուսնու եղբոր` Մանուկի ձայնը, ով նկատողություն է արել բակում բարձրաձայն հայհոյող Կարապետ Տերտերյանին: Դրանից հետո Մանուկը գնացել է փողոց, քանի որ Կարապետը չի ընդունել նրա դիտողությունը և ասել, որ սեփական բակում ինչ ցանկանա, այն էլ կանի: Նման դեպքեր նախկինում էլ են եղել, որի համար ինքը ևս դիտողություն է արել: Նույն օրը տեղի ունեցած վիճաբանության և կռվի ժամանակ ինքը փողոց է դուրս եկել այն ժամանակ, երբ կռվի մասնակիցներին արդեն բաժանել են: Ինքը չի տեսել, թե ով ում է հարվածել, սակայն տեսել է, որ Մանուկի դեմքին արունահոսող վերքեր կան: Իսկ Կարապետ Տերտերյանը հայտնել է, որ Աշխեն Խաչատրյանի ցուցմունքը չի համապատասխանում իրականությանը, քանի որ նշված օրը իրենց բակում ինքը չի հայհոյել:
2009 թվականի նոյեմբերի 23-ի առերես հարցաքննության արձանագրության համաձայն` Ռիտա Բդեյանը հայտնել է, որ իրենց տունը գտնվում է Տերտերյանների և Գրիգորյանների տան միջև: Ինքը Կարապետ Տերտերյանին բազմիցս դիտողություն է արել հայհոյանք տալու համար, սակայն դրանք ապարդյուն են եղել: 2009 թվականի հուլիսի 27-ին` երեկոյան, Տերտերյանների տանը խնջույք է եղել: Երեկոյան ինքը դուրս է եկել պատշգամբ և լսել, որ իրենց հարևան Մանուկ Գրիգորյանը հայհոյանք տալու համար դիտողություն է արել Կարապետին, սակայն Կարապետը պատասխանել է, որ սեփական բակում ինչ ցանկանա, այն էլ կանի, որից հետո Մանուկ Գրիգորյանը Կարապետին կանչել է փողոց: Դրանից հետո ինքը գնացել է տուն, քանի որ չի ցանկացել լսել Կարապետի հայհոյանքները: Դրանից քիչ անց Մանուկի հարսը` Արևիկը, զանգահարել է իրեն և ասել, որ վատ է զգում և իր օգնությունն է անհրաժեշտ: Իսկ Կարապետ Տերտերյանը հայտնել է, որ Ռիտա Բդեյանի ցուցմունքը չի համապատասխանում իրականությանը: Ինքը երբեք հայհոյանք չի տվել և նա իրեն երբևէ դիտողություն չի արել: Ինքը 2009 թվականի հուլիսի 27-ին առավել ևս չի հայհոյել, քանի որ իր հոր ծննդյան օրն է եղել: Այդ օրը ինքը Ռիտա Բդեյանին ընդհանրապես չի տեսել:
ՀՀ ոստիկանության ինֆորմացիոն կենտրոնի պահանջագրի համաձայն` Կարապետ Գալուստի Տետերյանը նախկինում դատապարտված չի եղել:
Ամուսնության թիվ ԱԲ010425 վկայականի համաձայն` Կարապետ Գալուստի Տերտերյանը և Վերա Ղևոնդի Ալահվերդյանը ամուսնացել են, որի մասին ամուսնության վերաբերյալ ակտերի գրանցման գրքում 2009 թվականի դեկտեմբերի 18-ին կատարվել է թիվ 626 գրանցումը:
Ծննդյան թիվ ԱԲ048246 վկայականի համաձայն` 2009 թվականի դեկտեմբերի 23-ին ծնված Վահագ Կարապետի Տերտերյանի հայրը Կարապետ Գալուստի Տերտերյանն է, իսկ մայրը` Վերա Ղևոնդի Ալահվերդյանը:
Թիվ 11 տեղամասի լիազոր ներկայացուցչի կողմից տրված բնութագրի համաձայն` Կարապետ Տերտերյանի խնամքին են գտնվում կինը` Վերա Ալահվերդյանը և որդին` Վահագ Տերտերյանը:
Բնութագրի համաձայն` Կարապետ Գալուստի Տերտերյանը բնութագրվում է դրականորեն:
3. Դատարանի իրավական վերլուծությունները.
Վերոգրյալ ապացույցների հիման վրա Դատարանը գալիս է այն եզրահանգման, որ Կարապետ Գալուստի Տերտերյանը 2009 թվականի հուլիսի 27-ին` ժամը 22:00-ի սահմաններում, իրենց` Երևան քաղաքի Քեռու փողոցի 79-րդ տան բակում բարձաձայն հայհոյանքներ է տվել, ապա չի ընդունել հարևան Մանուկ Գրիգորյանի դիտողությունը, ով պահանջել է դադարեցնել հայհոյանքները, որից հետո փողոցում բազմաթիվ մարդկանց ներկայությամբ վիճաբանել է Մանուկ Գրիգորյանի հետ, որի ընթացում սպառնացել է հարվածել նրան և շարունակել է հայհոյանքներ տալ: Այսինքն` Կարապետ Գալուստի Տերտերյանը, հասարակության նկատմամբ բացահայտ անհարգալից վերաբերմունք դրսևորելով, դիտավորությամբ կոպիտ կերպով խախտել է հասարակական կարգը, որը զուգորդվել է անձի նկատմամբ բռնություն գործադրելու սպառնալիքով, ինչը համապատասխանում է ՀՀ քրեական օրենսգրքի 258-րդ հոդվածի 2-րդ մասի հատկանիշներին:
Ապացուցված է Կարապետ Գալուստի Տերտերյանի մեղավորությունը ՀՀ քրեական օրենսգրքի 258-րդ հոդվածի 2-րդ մասով նախատեսված հանցանքը կատարելու մեջ:
Կարապետ Տերտերյանի անձը դրականորեն բնութագրող հանգամանք է ամուսնացած լինելը և կատարածի համար զղջալը:
Կարապետ Տերտերյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած երեխայի (Վահագ Կարապետի Տերտերյան` ծնված 2009 թվականի դեկտեմբերի 23-ին) առկայությունը:
Կարապետ Տետերյանի պատասխանատվությունն ու պատիժը մեղմացնող հանգամանքներ են նաև նախկինում արատավորված` դատապարտված չլինելը և դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Կատարած արարքի համար ամբաստանյալ Կարապետ Տերտերյանը ենթակա է քրեական պատասխանատվության և պատժի:
ՀՀ քրեական օրենսգրքի 61-րդ հոդվածի 3-րդ մասի համաձայն` հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Դատարանը, հաշվի առնելով Կարապետ Տերտերյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Կարապետ Տերտերյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 360-րդ հոդվածի 1-ին մասի 14-րդ կետի համաձայն` դատավճիռ կայացնելիս դատարանը լուծում է այն հարցը, թե դատական ծախսերն ում վրա և ինչ չափով պետք է դրվեն։
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-6-րդ կետերով նախատեսված դատական ծախսերն ամբաստանյալ Կարապետ Տերտերյանից ենթակա չեն բռնագանձման, քանի որ 1-ին և 4-6-րդ կետերով նախատեսված դատական ծախսեր ընդհանրապես չկան, իսկ 2-րդ և 3-րդ կետերով նախատեսված ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Կարապետ Գալուստի Տետերյանին մեղավոր ճանաչել ՀՀ քրեական օրենսգրքի 258-րդ հոդվածի 2-րդ մասով և պատիժ նշանակել տուգանք` նվազագույն աշխատավաձի հարյուրհիսնապատիկի չափով:
Կարապետ Գալուստի Տետերյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված։
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:

ԴԱՏԱՎՈՐ Մ.ՊԱՊՈՅԱՆ