ԵԱՔԴ/0180/01/09







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«8» փետրվարի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ն.Թոփուզյան
տուժողի ներկայացուցիչ Ե.Ջհանգիրյան
պաշտպան Ա.Հոբոսյան

դռնբաց դատական նիստում քննեց քրեական գործն ըստ մեղադրանքի`
Ռազմիկ Հմայակի Անտոնյանի` ծնված 1940 թվականի փետրվարի 10-ին Արագածոտնի մարզի Արա գյուղում, ազգությամբ հայ, ՀՀ քաղաքացի, միջնակարգ կրթությամբ, նախկինում հափշտակություններ կատարելու համար չորս անգամ դատապարտված, դատվածությունները չմարված, չի աշխատում, հաշվառված է Երևան քաղաքի Նոր-Նորքի 8-րդ զանգվածի 30-րդ շենքի 68-րդ բնակարանում: Մեղադրանք է առաջադրվել ՀՀ քրեական օրենսգրքի 34-177-րդ հոդվածի 3-րդ մասի 3-րդ կետով, արգելանքի տակ է 2009 թվականի նոյեմբերի 12-ից:
1. Գործի դատավարական նախապատմությունը.
2009 թվականի նոյեմբերի 12-ին ՀՀ ոստիկանության Արաբկիրի քննչական բաժնի քննիչ Դ.Թովմասյանի որոշմամբ ՀՀ քրեական օրենսգրքի 34-177-րդ հոդվածի 3-րդ մասի 3-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 14135309 քրեական գործը:
2009 թվականի նոյեմբերի 13-ին ՀՀ ոստիկանության Արաբկիրի քննչական բաժնի քննիչ Դ.Թովմասյանի որոշմամբ Ռազմիկ Հմայակի Անտոնյանին մեղադրանք է առաջադրվել ՀՀ քրեական օրենսգրքի 34-177-րդ հոդվածի 3-րդ մասի 3-րդ կետով:
2009 թվականի դեկտեմբերի 18-ին Ռազմիկ Հմայակի Անտոնյանի վերաբերյալ քրեական գործը մեղադրական եզրակացությամբ ուղարկվել է դատարան:
Ռազմիկ Հմայակի Անտոնյանին մեղադրանք է առաջադրվել ՀՀ քրեական օրենսգրքի 177-րդ հոդվածի 3-ին մասի 3-րդ կետով` այն արարքի համար, որ նա, նախկինում երկու և ավելի անգամ հափշտակություններ կատարելու համար լինելով դատապարտված և դատվածությունները չմարված, 2009 թվականի նոյեմբերի 12-ին ժամը` 15:05-ի սահմաններում, Երևան քաղաքի Ազատության պողոտայի 21 հասցեում տեղակայված «Սթար» հանրախանութից փորձել է գաղտնի հափշտակել 13.160 ՀՀ դրամ ընդհանուր արժողության մեկ շիշ «Սմիրնոֆֆ» տեսակի 0.5 լ տարողությամբ օղի, մեկ շիշ «Կամպարի» տեսակի 1 լ տարողությամբ լիկյոր և երկու հատ «Սնիկերս» տեսակի շոկոլադե կոնֆետներ, սակայն հանցագործությունը իր կամքից անկախ հանգամանքներում չի կարողացել հասցնել ավարտին, քանի որ հանրախանութից դուրս գալու պահին բռնվել է անվտանգության աշխատակցի կողմից:
2. Ապացույցների հետազոտում և գնահատում.
Դատական քննության ընթացքում ամբաստանյալ Ռազմիկ Հմայակի Անտոնյանը առաջադրված մեղադրանքում իրեն լիովին մեղավոր ճանաչեց և ցուցմունք տվեց այն մասին, որ 2009 թվականի նոյեմբերի 12-ին` ժամը 15:00-ի սահմաններում, գնացել է ոստիկանության Արաբկիրի բաժնի հարևանությամբ գտնվող ինքնասպասարկվող մթերային խանութ: Խանութից վերցրել մեկ շիշ գինի, մեկ շիշ օղի, «Սնիկերս» տեսակի երկու շոկոլադ, դրանք թաքցրել հագուստի տակ և փորձել առանց վճարելու դուրս գալ, սակայն այդ պահին իրեն բռնել են և ձեռքից վերցրել նշված ապրանքները: Ինքը փորձել է գողանալ նշված ապրանքնները, քանի որ իր մոտ եղած գումարը բավարար չի եղել դրանք գնելու համար: Նշված ապրանքնները վերցնելիս իրեն ոչ ոք չի տեսել:
Վկա Արա Շահինյանը ցուցմունք տվեց այն մասին, որ աշխատում է «Սթար Դիվայդ» ՓԲ ընկերությանը պատկանող, Ազատության պողոտայում գտնվող սուպերմարկետում` որպես անվտանգության աշխատակից: 2009 թվականի նոյեմբերի սկզբներին, նշված խանութում ինքը նկատել է, որ Ռազմիկ Անտոնյանը վերցրել է 1 շիշ լիկյոր, այն պահել հագուստի տակ և փորձել առանց վճարելու դուրս գալ խանութից, սակայն ինքը թույլ չի տվել: Այդ մասին ինքը ասել է Եսայի Ջհանգիրյանին, ով եկել է այդտեղ: Այնուհետև պարզվել է, որ Ռազմիկ Անտոնյանը վերցրել է նաև մեկ շիշ օղի և «Սնիկերս» տեսակի երկու շոկոլադ: Իր կարծիքով ամբաստանյալը չի նկատել, որ ինքը հետևել է նրան:
Անձին ոստիկանության բաժին բերման ենթարկելու մասին 2009 թվականի նոյեմբերի 12-ի արձանագրության համաձայն` 2009 թվականի նոյեմբերի 12-ին Ռազմիկ Հմայակի Անտոնյանը գողություն կատարելու կասկածանքով բերման է ենթարկվել ՀՀ ոստիկանության Արաբկիրի բաժին:
Անձնական խուզարկություն կատարելու մասին 2009 թվականի նոյեմբերի 12-ի արձանագրության համաձայն` Ռազմիկ Հմայակի Անտոնյանի անձնական խուզարկությամբ ոչինչ չի հայտնաբերվել:
Գողացված խմիչքների ներկայացման մասին 2009 թվականի նոյեմբերի 12-ի արձանագրության համաձայն` 2009 թվականի նոյեմբերի 12-ին Ազատության 21 հասցեում տեղակայված «Սթար» սուպերմարկետի անվտանգության ծառայության աշխատասենյակում սուպերմարկետի անվտանգության ծառայող Արա Պետրոսի Շահինյանը ներկայացրել է «Սմիրնոֆֆ» տեսակի 0.5 լիտր տարողությամբ օղի, «Կամպարի» տեսակի 1 լիտր տարողությամբ իտալական գինի, «Սնիկերս» տեսակի երկու շոկոլադ և հայտնել, որ նշված իրերն ինքը հայտնաբերել է Ռազմիկ Հմայակի Անտոնյանի հագուստի տակից, ով փորձել է փախուստի դիմել խանութից:
Ձերբակալման 2009 թվականի նոյեմբերի 12-ի արձանագրության համաձայն` 2009 թվականի նոյեմբերի 12-ին` ժամը 18:00-ին, Ռազմիկ Հմայակի Անտոնյանը ձերբակալվել է:
Տուժող ճանաչելու մասին 2009 թվականի նոյեմբերի 13-ի որոշման համաձայն` թիվ 14135309 քրեական գործով «Սթար Դիվայդ» ՓԲ ընկերությունը ճանաչվել է տուժող:
Տուժողի ներկայացուցիչ ճանաչելու մասին 2009 թվականի նոյեմբերի 13-ի որոշման համաձայն` թիվ 14135309 քրեական գործով Եսայի Մարտիրոսի Ջհանգիրյանը ճանաչվել է տուժող «Սթար Դիվայդ» ՓԲ ընկերության ներկայացուցիչ:
ՀՀ ոստիկանության ինֆորմացիոն կենտրոնի պահանջագրի համաձայն` Ռազմիկ Հմայակի Անտոնյանը`
-1972 թվականի հոկտեմբերի 25-ին 26 կոմիսարների շրջանի ժողովրդական դատարանի դատավճռով մեղավոր է ճանաչվել Քրեական օրենսգրքի 144-րդ հոդվածի 1-ին մասով և պատիժ է նշանակվել ազատազրկում` 1 տարի ժամկետով,
-1981 թվականի դեկտեմբերի 15-ին Լենինյան շրջանի ժողովրդական դատարանի դատավճռով մեղավոր է ճանաչվել Քրեական օրենսգրքի 148-րդ հոդվածի 2-րդ մասով և պատիժ է նշանակվել ազատազրկում` 4 տարի ժամկետով,
-1994 թվականի մայիսի 17-ին Արաբկիրի ժողովրդական դատարանի դատավճռով մեղավոր է ճանաչվել Քրեական օրենսգրքի 86-րդ հոդվածի 3-րդ մասով և պատիժ է նշանակվել ազատազրկում` 4 տարի ժամկետով,
-1996 թվականի մարտի 26-ին Արաբկիրի ժողովրդական դատարանի դատավճռով մեղավոր է ճանաչվել Քրեական օրենսգրքի 86-րդ հոդվածի 4-րդ մասով և պատիժ է նշանակվել 8 տարի ժամկետով ազատազրկում,
-2000 թվականի հունվարի 20-ին Երևան քաղաքի Արաբկիր և Քանաքեռ-Զեյթուն համայնքների առաջին ատյանի դատարանի դատավճռով մեղավոր է ճանաչվել Քրեական օրենսգրքի 86-րդ հոդվածի 2-րդ մասով և պատիժ է նշանակվել ազատազրկում` 6 տարի ժամկետով,
-2004 թվականի հոկտեմբերի 8-ին Երևան քաղաքի Ավան և Նոր-Նորք համայնքների առաջին ատյանի դատարանի դատավճռով մեղավոր է ճանաչվել ՀՀ քրեական օրենսգրքի 177-րդ հոդվածի 3-րդ մասի 3-րդ կետով և պատիժ է նշանակվել ազատազրկում` 5 տարի ժամկետով: 2006 թվականի դեկտեմբերի 28-ին պայմանական վաղաժամկետ ազատվել է նշանակված պատիժը մնացած մասը` 2 տարի 1 ամիս 10 օրը, կրելուց:
Կալանավորումը որպես խափանման միջոց ընտրելու մասին միջնորդությունը քննելու վերաբերյալ 2009 թվականի նոյեմբերի 13-ի որոշման համաձայն` Ռազմիկ Հմայակի Անտոնյանի նկատմամբ որպես խափանման միջոց ընտրվել է կալանավորումը, կալանավորման սկիզբը հաշվվել է 2009 թվականի նոյեմբերիի 12-ից:
Քննչական փորձարարություն կատարելու մասին 2009 թվականի նոյեմբերի 13-ի արձանագրության համաձայն` 177ՈՍ02 պետհամարանիշի մեքենայով մեկնել են Ռազմիկ Անտոնյանի կողմից նշված երթուղիով և կանգ առել Ազատության 21 շենքի մոտ, որտեղ Ռազմիկ Անտոնյանը մատնացույց է արել նշված շենքում տեղակայված «Սթար» սուպերմարկետը և հայտարարել, որ այդ խանութից է կատարել գողությունը: Այնուհետև Ռազմիկ Անտոնյանի ետևից շարժվել են սուպերմարկետի ցուցափեղկերի կողքով և կանգ առել սուպերմարկետի ձախակողմյան միջանցքի ցուցափեղկերից մեկի մոտ, որտեղ Ռազմիկ Անտոնյանը մատնացույց է արել խմիչքների ցուցափեղկը և հայտարարել, որ օղին և գինին վերցրել է այդտեղից: Այնուհետև շարժվել են նույն միջանցքով, որտեղ դրամարկղի մոտ տեղակայված կոնֆետների ցուցափեղկի մոտ Անտոնյանը կանգ է առել և մատնացույց արել նշված ցուցափեղկը ու հայտարարել, որ «Սնիկերս» տեսակի երկու շոկոլադները վերցրել է այդտեղից:
Առարկաների զննության մասին 2009 թվականի նոյեմբերի 13-ի արձանագրության համաձայն` զննության են ենթարկվել տուժողի օրինական ներկայացուցիչ Եսայի Ջհանգիրյանի կողմից ներկայցված օղին, լիկյորը և շոկոլադները: Զննությամբ պարզվել է, որ օղին 500 մլ տարողությամբ ապակե շշով է, ըստ դրան փակցված պիտակի վրա առկա գրառումների «Սմիրնոֆֆ 57» անվանմամբ է, պիտակը ունի կապույտ ֆոն: Լիկյորը 1 լ տարողությամբ ապակե շշով է, ըստ դրան փակցված պիտակի վրա առկա գրառումների «Կամպարի Միլանո» անվանմամբ է, շշում եղած խմիչքը վարդագույն է: Երկու շոկոլադե բատոնները պոլիմերային փաթեթավորմամբ են, ըստ դրանց վրա առկա գրառումների «Սնիկերս» անվանմամբ են, փաթեթները մուգ շագանակագույն են, իսկ գրառումները` կապույտ:
Փորձագետի 2009 թվականի նոյեմբերի 18-ի թիվ 41660910 եզրակացության համաձայն` «Սմիրնոֆֆ 57» մեկ շիշ օղու շուկայական արժեքը կարող է կազմել 2.300 ՀՀ դրամ, «Կամպարի Միլանո» բիտտերինը` 10.000 ՀՀ դրամ, երկու «Սնկիկերս» շոկոլադե բատոններինը` 580 ՀՀ դրամ:
Իրեղեն ապացույց ճանաչելու և տուժողի ներկայացուցչին ի պահ հանձնելու մասին 2009 թվականի նոյեմբերի 27-ի որոշման համաձայն` «Սմիրնոֆֆ» տեսակի 0.5 լիտր տարողությամբ օղին, «Կամպարի» տեսակի 1 լիտր տարողությամբ լիկյորը և «Սնիկերս» տեսակի երկու շոկոլադե կոնֆետները ճանաչվել են իրեղեն ապացույց և ի պահ հանձնվել տուժողի ներկայացուցիչ Եսայի Ջհանգիրյանին:
3. Դատարանի իրավական վերլուծությունները.
Վերոգրյալ ապացույցների հիման վրա Դատարանը գալիս է այն եզրահանգման, որ Ռազմիկ Հմայակի Անտոնյանը, նախկինում հափշտակություններ կատարելու համար չորս անգամ դատապարտված լինելով, դատավածությունները չմարված, 2009 թվականի նոյեմբերի 12-ին ժամը` 15:00-ի սահամններում, Երևան քաղաքի Ազատության պողոտա 21 հասցեում տեղակայված «Սթար» սուպերմարկետից փորձել է գաղտնի, ապօրինի, անհատույց և շահադիտական նպատակներով տիրանալ «Սթար Դիվայդ» ՓԲ ընկերությանը պատկանող զգալի չափ հանդիսացող` 12.880 ՀՀ դրամ ընդհանուր արժողությամբ «Սմիրնոֆֆ 57» տեսակի 0.5 լ տարողությամբ մեկ շիշ օղուն, «Կամապարի Միլանո» տեսակի 1 լ տարողությամբ մեկ շիշ բիտտերին և «Սնիկերս» տեսակի երկու շոկոլադներին, սակայն բռնվել է սուպերմարկետի անվտանգության աշխատակից Արա Շահինյանի կողմից և իր կամքից անկախ հանգամանքներում չի կարողացել տիրանալ նշված ապրանքներին: Այսինքն` Ռազմիկ Հմայակի Անտոնյանը կատարել է արարք, ինչը համապատասխանում է ՀՀ քրեական օրենսգրքի 34-177-րդ հոդվածի 3-րդ մասի 3-րդ կետի հատկանիշներին:
Ապացուցված է Ռազմիկ Հմայակի Անտոնյանի մեղավորությունը ՀՀ քրեական օրենսգրքի 34-177-րդ հոդվածի 3-րդ մասի 3-րդ կետով նախատեսված հանցանքը կատարելու մեջ:
Ռազմիկ Անտոնյանի անձը դրականորեն բնութագրող հանգամանքներ են` ինքնախոստովանական ցուցմունքներ տալը և կատարածի համար զղջալը:
Դատարանն արձանագրում է, որ Ռազմիկ Անտոնյանի պատասխանատվությունն ու պատիժը մեղմացնող և ծանրացնող հանգամանքներ չկան:
Կատարած արարքի համար ամբաստանյալ Ռազմիկ Անտոնյանը ենթակա է քրեական պատասխանատվության և պատժի:
Դատարանը, հաշվի առնելով Ռազմիկ Անտոնյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքների բացակայությունը, ինչպես նաև այն, որ Ռազմիկ Անտոնյանի կողմից կատարված արարքի համար ՀՀ քրեական օրենսգրքի 177-րդ հոդվածի 3-րդ մասի սանկցիայով նախատեսված է պատիժ ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի: Ընդ որում` կատարված արարքի համար չպետք է նշանակել 177-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Ամբաստանյալ Ռազմիկ Անտոնյանի պատժի կրման սկիզբը պետք է հաշվել 2009 թվականի նոյեմբերի 12-ից, քանի որ նա ձերբակալվել է այդ օրը, իսկ 2009 թվականի նոյեմբերի 13-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Ռազմիկ Անտոնյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2009 թվականի նոյեմբերի 27-ի որոշմամբ իրեղեն ապացույց ճանաչված և տուժողի ներկայացուցիչ Եսայի Ջհանգիրյանին ի պահ հանձնված «Սմիրնոֆֆ» տեսակի 0.5 լիտր տարողությամբ օղին, «Կամպարի» տեսակի 1 լիտր տարողությամբ լիկյորը և երկու «Սնիկերս» տեսակի շոկոլադե կոնֆետները պետք է վերադարձնել` տվյալ դեպքում թողնել «Սթար Դիվայդ» ՓԲ ընկերությանը` ի տնօրինություն:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Ռազմիկ Անտոնյանից ենթակա չեն բռնագանձման, քանի որ դատական քննության ժամանակ տուժողի ներկայացուցիչը հայտնել է, որ ամբաստանյալից որևէ պահանջ չունի: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 2-6-րդ կետերով նախատեսված դատական ծախսերին, ապա դրանք ամբաստանյալից նույնպես ենթակա չեն բռնագանձման, քանի որ 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 5-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Ռազմիկ Հմայակի Անտոնյանին մեղավոր ճանաչել ՀՀ քրեական օրենսգրքի 34-177-րդ հոդվածի 3-րդ մասի 3-րդ կետով և պատիժ նշանակել ազատազրկում` 4 (չորս) տարի ժամկետով` պատժի կրման սկիզբը հաշվելով 2009 թվականի նոյեմբերի 12-ից:
Ռազմիկ Հմայակի Անտոնյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Դատավճիռն օրինական ուժի մեջ մտնելուց հետո 2009 թվականի նոյեմբերի 27-ի որոշմամբ իրեղեն ապացույց ճանաչված և տուժողի ներկայացուցիչ Եսայի Ջհանգիրյանին ի պահ հանձնված «Սմիրնոֆֆ» տեսակի 0.5 լիտր տարողությամբ օղին, «Կամպարի» տեսակի 1 լիտր տարողությամբ լիկյորը և երկու «Սնիկերս» տեսակի շոկոլադե կոնֆետները թողնել «Սթար Դիվայդ» ՓԲ ընկերությանը` ի տնօրինություն:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:



ԴԱՏԱՎՈՐ Մ.ՊԱՊՈՅԱՆ